شهد كانت واقفه جنبهم الا شافت الشاب حق الكتكات ابتسم لها واشر لها تجي وجات
الشاب: شخبارج شهوده حبيبتي
شهد: الحمد لله
الشاب: انتي بروحج هنا
شهد: لا جيت مع العنود والهنوف
الشاب : خواتج
شهد : لا بنت عمي
الشاب : انتو من هنا
شهد : لا احنا بيتنا في الخبر اليوم في الليل بنروح ابها بعدين نرجع الخبر
الشاب ضحك على برائتها : يووو حسافه اليوم بتروحون
شهد: أي وانت عمي متى بتروح
الشاب : ما ادري .. تعالي ابي اشتريلج كتكات قبل لا تروحين
شهد: لابعدين العنود والهنوف يخانقوني
الشاب: لا تخافين بشتريلج من هنا مو بعيد ..
شهد : طيب
كان في محل حق حلويات جنبهم راح هو ويا شهد واشترى لها كرتون كتكات وحط معاه زيادة حلويات
العنود والهنوف خذو اغراضهم
الهنوف: والله فكرتج حلوه
العنود : تعالي وين شهد
الهنوف: توها كانت هنا جنبي
العنود:ياااا ويلي لا يكون ضاعت
الهنوف: الله يهداها لا ما اتوقع اكيد شافت لها شي والحين تجي
العنود: قومي ندور عليها
قعدو يدورون عليها خمس دقايق وما شافوها
الهنوف : قومي نرجع للمكان اكيد راح ترجع
العنود: والله اذا ضاعت بتذبحني جدتي
الهنوف:لا تحاتين ان شاء الله بترجع
العنود: عاد ما ضاعت الا اخر يوم يابي الله يستر عاد مكه مليانه حراميه
الهنوف: العنود تعوذي من بلييس لا تقولين كذا
العنود والهنوف كانو خايفات ان شهد صار لها شي ... شوي الا شافو شهد جايه مع واحد
الهنوف: العنود شوفيها جايه مع ....
العنود ما خلتها تكمل كلامها وراحت لها تركض: شويهد .. ألحين ما قلت لج لا تتحركين من مكانج خليتيني ادور عليج خوفتيني
الشاب: انا اسف يا اختي بس كانت معي رحت اشتري لها كتكات
العنود بدون شعور رفعت راسها : انت راعي الكتكات حظرتك باي صفه تاخذها وتشتري لها اختك والا بنتك والا تقرب لك
الشاب حس بالذنب : انا اسف بس ما كان قصدي أ خوفكم بس
شهد: عنود عمي يحبني شرالي حلاو وشرالج حتى انتي
الهنوف : طيب يلا خلاص خل نروح
شهد: مع السلامه عمي
الشاب نزل وبس شهد : مع السلامه حبيبتي ولا تنسيني
شهد باسته على خده : شكرا
الشاب : العفو وقام وقف .. انا اسف يا العنود والهنوف
العنود بققت عيونها شلون عرف اسمي
الشاب يكمل كلامه : بس ما كان قصدي اخليكم تحاتون شريتلها حلاو والله يحفظها لكم ان شاء الله بس لانها تذكرني ببنتي شهد الله يرحمها
الهنوف انقبض قلبها : الله يرحمها
العنود: الله يرحمها احنا اسفين ومشكور ..
وخذو شهد وراحو لفت الهنوف عليه وشافت الحزن الي في عيونه عقب نزلت عيونها عنه
العنود: والله صدقتي يالهنوف
الهنوف: شفتي مو قلت لج
العنود: شكله يكسر الخاطر
الهنوف: الله يرحمها بنته بس تصدقين احس هالحزن مو بس من موته بنته اكيد في شي ثاني
العنود: الله يوفقه ويصبره مسكين .. يلا قومي نلحق اوصلهم لبنات ونرجع ..
الهنوف : يلا
راحو وصلو للبنات الي شرته لهم وشكروها واستانسو وسلمت عليهم
رجعو للشقه ودخلو الغرفه وكانت الساعه 11 ..
العنود: يلا بعد ساعه بنحرك الله يعين
الهنوف: انزين قومي رتبي اغراضج ..
قامت العنود ترتبي اغراضها هي والهنوف ويسولفون.. الا تدخل عليهم شهد
شهد: هنوف خوذي خلي الكيس عنج
الهنوف: ليه
شهد: بس عمي قال لي خوذي الحلاو الي تبينه وعطي الكيس الهنوف
الهنوف : طيب
طلعت شهد
العنود: اما هذا الولد غريب
الهنوف: ما علينا منه تعالي عندج كيس
العنود: لا ليش
الهنوف: ابي احط الشامبو والخرابيط فيه
العنود: خذي هالكيس
الهنوف خذت الكيس ورمت الحلاو الي فيه
الهنود: الله فيها مصاص الي احبه ارميلي وحده
الهنوف رمت للعنود مصاصه وخذت لها وحده وفتحوها وقامو يمصون .. الهنوف توها بتحط الاغراض في الكيس الا تشوف ورقه مدت يدها وخذتها
العنود: شنو هاذي
الهنوف تهز كتفها بعلامه ما ادري
فتحت الورقه والعنود نقزت جنبها وقامو يقرأون الورقه ....
جتني تودعني مساء يوم الأثنين
جتني بظرف ما يفيد اعتراضي
جتني ولوني انخطف بين لونين
فيه السواد وفيه لمحه بياضي
قالت غصيبه ياحمد فرقنا شين
ولزوم فرقانا تجي بالتراضي
قلت الخبر وشلون نبقى بعيدين
ودموعها قامت تسابق هياضي
قال فمان الله ياأغلى المحبين
حكم علينا الوقت والوقت قاضي
ماعاد أفيدك ياحمد والمرض شين
يمشي بجسمي مثل سيل الفياضي
بحكم القدر والوقت والعسر ماشين
لازم نطيع بقسمته وان فراضي
ملزوم ننسى ذكريات لها سنين
ملزوم نحسبها قديم وماضي
عجزت اصدق وين انا والخبر وين
وش هالقدر ياللي عرض لي عراضي
حضنتها ولميتها بالذراعين
وتقادحت عيني كما البرق قاضي
ممداني افرح في غلاها بعامين
وهل القدر غصب علينا افتراقي
أقفت وتمسح دمعها لي بكفين
واقفت تناظرني بفرقا الاراضي
عجزت اشيل خطاي وحنا مقفين
عجزت وجسمي يرتعش ينتفاضي
غصب علي بساير الوقت واللين
هذا قدرنا ما يفيد التقاضي
حسبي على وقت جمع وأفرق اثنين
ماشال هم كسرتي واغتياضي
هاذي قصتي مع زوجتي الهنوف اما بنتي شهد فكانت البنت الي انتظرها وماتت مع أمها قبل لا أشوفها
يمكن هاذي أجوبه للتساءلات الي كانت تشغل بال كل من يشوفني ويسألني عن حالي ...
الهنوف والعنود لفو وجيهم على بعض وكل وحده دموعها مغرقه في عيونها والمصاصه في فمها ابتسمو
العنود: الله يرحمها
الهنوف: ويعينه على فرقاها .. والله كسر خاطري
العنود وهي تمسح دموعها : والله الدنيا مليااانه مصايب بس مااحد دراي عن الثاني
الهنوف: الله يسعده ياارب والله من اول ما شفته وانا احساسي يقول ان فيه شي
العنود : هنوف يلا الساعه 11 ونص
الهنوف خذت الورقه ودخلتها في الشنطه : يلا يلا قومي ...
الجزء الثامن عشر
الأهل رجعو للخبر والباقي كملو رحلتهم ..
رفعه وأهلها بيكملون اسبوع في مكه عقب بيروحون مصر بالباخره ....
الساعه 12 تحركو لأبها ...
كانو البنات زعلانيين ومتحمسين في نفس الوقت ....
العنود الوجيده الي كانت مصحصحه فقعدت قدام مع سلمان وقامو يسولفون .. والبنات نامو الا الهنوف الي كانت مغمضه عيونها ..
العنود: حسافه كان خاطري نمر الطايف
سلمان : طلعتنا في الليل والا كان مرينا عليها
العنود: المطر الي نزل فيها ياخذ العقل
سلمان : ان شاء الله مطر ابها احلى
لفت العنود وجهها ابتسمت خذت الكاميرا الي كانت حاطتها تحتها وفتحتها
سلمان: شبتسوين
العنود: افتح النور .. بصورهم
سلمان : والله انج وحده
العنود: ادري وقامت تصورهم وهي تضحك عليهم وتطنز على كل وحده ويوم جا دور الهنوف
الهنوف : بووووو
العنود: بسم الله ههههههه
الهنوف : ههههههههه
سلمان: مسكينه ما لحقتتي تطنزين عليها
العنود: هبطي كشتج لو انج نايمه احسن على الاقل القلم مرفوع عنج
الهنوف: مالت عليج انا عندي كشه أصلا ادري فيج غيرااانه
العنود: مالت فديتها كشتي
سلمان :هالكشه اذ مو موجوده انتي مو العنود
العنود وتلف الكاميرا على سلمان وتحط يدها على راسه : عاد انت اسم الله عليك يدي ما اشوفها غرقت في كشتك
الهنوف: هههههههههه
بدور: بسكم خناق سلمانوووو سكر النور
العنود تلف الكاميرا عليها : وي ازعاجناج عميمه سكر سكر النور عاد كلش ولا بدورتي
قعدت العنود وسكرت الكاميرا وقعدت تسولف هي والهنوف وسلمان ..
سلمان : تعالي عنووود ما قلتيلي
العنود: وشوووووو
سلمان: السالفه الي قمتو تضحكون عليها في التلفريك
العنود قامت تضحك والهنوف ولعت ناااار من الحيا
العنود: الله يغربل بليسك ما نسييت
سلمان: لا ما نسيت ويلا قولي
الهنوف: عنود ما عندج شريط تحطينه
العنود: استحي تونا طالعين من مكه وتقول لي حطي شريط
الهنوف: يالزفته انا قصدي شريط اناشيد ..حطي يارجائي الثالث
العنود: شوفيه في الجيب عطيني اياه
الهنوف: هاج
العود حطته وطلعت انشودة فرشي التراب
العنود: الله تهبل هالانشوده .. والا شرايك عمي
سلمان : أي حلوه بس يلا قولي السالفه والهنوف هالتصريفه ما تمشي علي هاه
|