|
[ . . , يُ بَ ه .. أسَفة دمعتي بعيني اليوم كلن قراها = ( ]
دقـات قلبي تزيد بحرة ٍ فيها . . . والدمع من مهجتي بالحزن ذرافي
من لوعة يا عسى ربي يجليها . . . حمى غشتني بغم وتنفض أطرافي
ليت الليالي تعود بحلو ما ضيها . . . هيهاتي ترجع بما روَّح وما طافي
كل ٍ يعزي وأنا روحي أعزيها . . . لرحيل أبوي اللي بالأفضال معطافي
آآآهـ من الوقت والدنيـا أثنِّيها . . . دنيا تفرق شمل بالحيل تنعافي
بسمتك يا والدي ما ني بناسيها . . . تضحك إذا شفتني بالخير متعافي
ليت العمر ساعته تنباع وأشريها . . . بأغلى ثمن يايبه للعمر تنضافي
مسجدك مشتاق للآية وتاليها . . . ومنبرك من عقب ما فارقت له طافي
غرشة دهن عودك بدرجك أغطِّيها . . . أشم ريحه وكنك مقبل(ن) لافي
نظارتك شلتها حزني يبكِّيها . . . حتى المساويك ناحت بين الأرفافي
وعصاك مسنودة(ن) جيت أبحاكيها . . . تقول يكفيني ما فيني ترى كافي
وبستانك اللي به النخلات تسقيها . . . يبست سواقيه تمره دون خرافي
يبه .. يبه .. يا يبه لمن بأطرِّيها . . . هني من له أبو حي(ن) وينشافي
فنجال قهوة معاك أوقات نغليها . . . ويضمني بالشتاء في مشلح دافي
همزت رجليك أنا أفدى مواطيها . . . أرجي لبرِّك عسى ما تشكي خلافي
الارض ضاقت علي باوسع فيافيها . . . ماذقت نوم هني والانس متجافي
فضايلك يا يبه عجزان أوَفِّيها . . . لو وصلت بالشعر بيت الألف من قافي
يا ربي تجعله للفردوس ناصيها . . . ومن ثمار الجنان الاخضر قطَّافي
.............. ~ { سعد الطلحة
**
يابوي وينك عليك الروح ولهانه
والعين هلت على فرقاك خافيها
يابوي رحت وتركت نفوس تعبانه
وقلوب تنبض بحبك في مآسيها
البيت يصرخ يهز الصوت جدرانه
وين الذي سيرته زانت معانيها
وين الكريم الذي ماجف بستانه
يمناه ماوقف والخير حاويها
وين الذي بالعطا مامل ميزانه
ان زار له ديره يسعد أهاليها
مثل المطر بينهم يازين هتانـه
يروي صحاري وتفرح به أراضيها
وين الذي ماعبس وجهه لجيرانه
وين الذي تفتخر داره بلي فيها
وين الذي سيدالأحسان أحسانه
نفسه خفيفه بحاضرها وماضيها
وين الذي ماشكى لفلان فلانه
وين الذي ماذخر زله لراعيها
وين الذي في مجال الطيب له شانه
طيبه سحابه تجود بكل مافيها
جو الحزن ماخمد بالقلب بركانه
ياشينها ليله بانت مواريها
ناس تواسي وناس شبه غرقانه
وناس تعزي وتخنقنا تعازيها
يبكي عليه الشجرويبكي أغصانه
وتبكي عليه الدروب اللي يراعيها
ويبكي عليه البحر سيفه وشطآنه
تبكي عليه المدينه مع ضواحيها
نبكي ونبكي وكلٍ يخفي أحزانه
والروح مافارقت الا لداعيها
الله نور السما والأرض سبحانه
يرحم ابونا ويرسيه بمراسيها
جنات ينعم بها بالخير مليانه
يرتاح في ظلها ويذوق صافيها
. . |نبيل العضيدان ......
**
|