يالله يا عالم بحالي ماخفاك
شي بصدري ماتحملته سنين

رحمتك فيني لاتماديت ورضاك
وان ماقويت انت القوي الي تعين

ياحرف تكتبني على صفحة وفاك
وانا بمليك القصايد كل حين

لا ضاق مابي والقلم حبره لفاك
قلط بيوتي في سطور الخالدين

يا حلم لا تمسي وتحرمني عشاك
مبطي وانا ماذقت نوم الحالمين

واليا ذكرت الي فقدناهم هناك
على محطات المنايا راحلين

يارب تجمعنا بهم واحنا معاك
في دار خلدك كلنا والمسلمين

ولا يا نجوم الصبح ضيعتي مساك
يشع نور الشمس والدنيا تزين

ولا يامزون الغيث همالك هناك
اخايل بروقك مسافات الحنين

ولا ياهجوسي وش يعنيني وراك
ماراح راح ولا تروحين وتجين

لحظات واللحظات ماتمدي عساك
تجود من نفسك وبالله اليقين

عش ما بقالك واحمد الي مانساك
في كل ساعه واذكره في كل حين


وسلامتكم / ناشي الغيم