***


جلست بشاير ومشاعل في غرفة بشاير في بيت أم مساعد ,
أقفلت بشاير الباب وجلست الاثنتان بقرب بعضهما , قالت
مشاعل : ها بشاير .. وش قرّرتي ؟!

قالت بشاير : قولي لي انتي بالأوّل .. وش أخبار رجلتس ؟! ,
وش قال يوم زرتوه

قالت مشاعل : أبد .. حاله يقطّع القلب , دمعت عيني يوم شفته ..
بس سلّمنا الخيط والمخيَط على ما يقولون وقال سوّوا اللي تبونه ..
وحنّا بنطلعه بأقرب وقت وبندفع الدين

قالت بشاير : الله يجعه لكم بالسلامه .. وولده المسيكين جا فرحان
بتخرّجه لقا أبوه مسجون !

قالت مشاعل : طيب انتي ما قلتي لي .. وش قرّرتي في موضوع
رجلتس ؟!

قالت بشاير : خلاص يا مشاعل .. انتهينا

قالت مشاعل : وش اللي انتهينا ؟!

قالت بشاير : بعد شوي هو بيجي يكلّم أمي عشان ياخذ منها الكلام
الأخير .. هو طبعاً كان ودّه
يكلمني أنا , بس ما أقدر أشوف وجهه

قالت مشاعل : طيب ووش تبي تقوله أمي ؟!

قالت بشاير : يطلّقني !!

قالت مشاعل : اعقلي يا بشاير ولا تّسرعين ! , من صدقتس انتي
تبينه يطلقتس !! , بشاير انتي هالحين مصدومه ومجروحه .. يعني
لازم ما تتخذين أي قرار هالفتره .. عطي نفستس وقت وفكري

بشاير : أنا متعمده .. ما أبي أعطي نفسي وقت ولا أبي أفكّر

مشاعل : يا خوفي .. يا خوفي تندمين

نظرت بشاير الى مشاعل نظرة ذات مغزى وقالت : ما تسوى .. ما تسوى أفكّر
وما يسوى أرجع له .. وهو نفسه ما يسوى !!

قالت مشاعل : صدقيني أنا حاسّه فيك

قالت بشاير بعصبيّة وهي تكاد تبكي : أجل وش تبيني أسوّي ,
خلاص أنا ملّيت زهقت ما عاد فيني أتحمّل !! , عذّبني وحسّربي ,
كان يسافر برى عشان يخونّي ! .. يخووونّي !! , مع بنات أشكال
وألوان يسافر برى ويكذب علي ويقول سفرة شغل وهو مسافر
عشان يخونّي !! , تذكرين يوم أسألتس عن المقويّات الجنسيّه
اللي بشنطته .. أنا وقتها شكّيت واستغربت , لأنّه صار لها شهور
هاجرني !!, وأنا جالسه هنا حافظه بيته وصاينته وربّيت بنته أحسن
وأفضل تربيه , عاملني بجفا وبرود وقسوه .. قعد شهور هاجرني !! ,
شهور ما يكلّمني وهاجرني بدون سبب !! , وكل ما قرّبت منّه يصد
عنّي .. تحمّلت وصبرت وقلت ماعليه تحمّلي ومهما سوّا المَرَه ما لها
الا بيت زوجها وبنتس لولوه ما لها ذنب .. بس خلاص أنا ملّيييت !!! ..
هذا كلّه ما يهم .. الى هنا هذا كلّه ما يهم , بس بعد هذا كلّه يقوم الأخ
ويخطب وبيتزوّج علي !! , يعني بدال ما كان يخونّي بالحرام هالحين
يخونّي بالحلال !! , يتزوّج ويقول لزوجته أنا كان عندي زوجه بس
طلّقتها !! , خلاص هماه قال لزوجته الجديده انّه طلّقني ؟! , خلّوه
يطلّقني !! أنا ما عدت أبيه .. كرهته كرهته .. خلّيه يروح الله لا يوفقه ..
الله لا يهنّيه لا دنيا ولا آخره .. الله لا يحلّلك يا ناصر ولا يبيحك !!
اهئ اهئ

أخذت بشاير تبكي بحرقه شديدةٍ , لم تستطع مشاعل منع دموعها
من السقوط هي الأخرى , تألّمت كثيراً لكلمات التي سمعتها من بشاير ,
حاولت مشاعل تهدئة أختها وقالت في نفسها : "آآخ ياختي يا بشاير ..
معقول كل هذا شايلته بقلبك وساكته !"


***


أتى ناصر لبيت أم مساعد , قالت له أم مساعد عن كلام ابنتها حرفياً ,
لم ترغب أم مساعد بالتأكيد بطلاق ابنتها , ولكن بشاير ثائرة جداً
ومصمّمة على الطلاق , كان ناصر يريد أن يعطيها فترةً لتفكّر فيها
وتراجع نفسها قليلاً ولكن بشاير كانت مصمّمة جداً , لم يستطع ناصر
تأجيل زواجه واستمرت دانيه وأهلها بمكالمته والتساؤل عن موضوع
هذا التّأجيل , كان ناصر راغباً بزواجه من دانيه كثيراً .. حدّد موعد
"الملكة" ولن يؤجّله هذه المرّة !


***


جلست مشاعل مع حصه في غرفة حصه : قالت حصه : قولي يا
مشاعل .. وش بنسوّي هالحين ؟!

قالت مشاعل : طيّب .. أنا فكّرت بكل شي , طبعاً أولاً لازم نجمّع
كل قطعة ذهب بالبيت !

قالت حصه : نبيع الذهب ؟! , بس أبو حمد بيزعل .. أذكر قبل
سنة كنت ببيع قطعة ذهب وهاوشني وقال يا ويلتس لو بعتيها ..

قالت مشاعل : طيب عادي ! , حنّا هالحين محتاجين .. أقول
بس خلّينا نجمع الذهب هالحين

جمّعت مشاعل حصه الذهب كلّه و وضعته مشاعل في صندوق
بنّي صغير , قالت مشاعل : سواق أمّي جاي بالطريق .. بنروح
سوق الذهب ونبيعه كلّه ! , ولو انّه خفيف وقليل وما ظنيت يجيب
سعر زين

أتى سواق أم مساعد وذهبت مشاعل وحصه الى محلات الذهب ,
كان الذهب قليلاً جداً وخفيفاً , أعلى سعر حصلوا عليه هو خمسة
وعشرون ألفاً فقط , تمّ بيع الذهب واستلمت مشاعل المال

قالت حصه : طيب بعنا الذهب .. وبعدين ؟! , باقي كثير عشان
نكمّل المبلغ

قالت مشاعل : احسبي معي خمسه وعشرين الذهب وثلاثين الأسهم ..
هذي خمسه وخمسين ألف , يعني باقي لنا خمسين ألف .. تسعه
وأربعين ألف بالضبط باقي لنا

قالت حصه : تسعه وأربعين ألف .. ومن وين بنجيبها ؟!

قالت مشاعل : أنا كلّمت حمد .. بيبيع سيارته , بس سيارة أبو حمد
ما راح يبيعها لأن صعبه نبيع الثنتين وبعدين سيارة أبو حمد قديمه
مرّه وما تجيب شي , يعني نبيع سيارة حمد أحسن .. وللحين ما
قال لي بكم بيبيعها .. بس يقول بتجيب تقريباً أربع طعش ألف ..

قالت حصه : طيّب .. يعني باقي .. باقي خمسه وثلاين ألف
وتكتمل الفلوس

قالت مشاعل : لو قلنا خمسه وثلاثين .. أنا عندي بالبنك بحدود
سبع آلاف

قالت حصه : يعني رصيدتس كلّه سبعة آلاف ؟!

قالت مشاعل : ايه .. يعني بقى ثمانيه وعشرين ألف بالضبط ..
مدري كيف بندبّرها ؟!


***