منتديات قصايد ليل - عرض مشاركة واحدة

10-12-2010

باليوم اللي بعده وبنفس الوقت كانوا اهل شذى موجودين بزياره لبنتهم.. وكانت أم محمد وخالد وسعود هم الوحيدين الجايين أما محمد فكان الكل رافض روحته خصوصا بعد اللي سواه...تركي اللي لمن درى بجيتهم احتار يقلبها هوشه أو يحترمهم لأنهم ببيته..بالأخير اختار الثاني على الأول...
كانوا قاعدين بالصاله وتركي اللي توتر لمن شاف سعود...
ام محمد:يا ملحه ولدك يا شذى...مشالله يهبل...
خالد:هو مملوح بس وش فيه صغير كذا مره؟؟؟...
تركي اللي كان مابينه هو وخالد مشاكل:تصدق يا خالد حتى انا مستغرب بس تقول الدكتوره عادي مع الأيام بيزداد حجمه...
شذى تضحك:على صغره بس الشهاده لله إنه مزيون...
سعود كان قاعد جنب شذى:على خاله سعود ولا من وين له الحلا ياحسره..
تركي اللي يبي يقهر سعود:غلطان يا سعود ماخذى من ملامحك شي هو راجع لأعمامه...
سكت سعود وناظر شذى اللي ترجته بنظراتها لا يرد..بعدها سكت...
بعدها تكهرب الجو شوي بس خالد وام محمد حاولوا إنهم يلطفون الجو.. قعدوا يسولفون ويضحكون أما سعود وشذى كانوا يتكلمون مع بعض بصوت هامس لدرجة إنه محد سمعهم..
سعود بغيض:رجلك هذا ودي أصطره قاهرني..
شذى:طيب طنشه لا ترد...
سعود:ما أعرف...
شذى:تحمل مو إنت لك حاجه عنده...
سعود يناظره وهو يسولف مع خالد:ياربيه وش هالمذله؟؟؟...
شذى تضحك:جب أي مذله والله هذا بسبب غبائك...
سعود يرفع حاجبه:غبائي؟؟؟...أقول اسكتي واللي يرحم والديك يا الذكيه...
شذى:والله محد ضربك على يدك وقالك اسمع كلام محمد...
سعود عصب:شذى خلاص اكرمينا بسكوتك..وخليك بولدك..
شذى ضحكت وناظرت تركي اللي كان يسولف مع امها..اختفت ابتسامتها.. وقعدت تفكر بأي قرار تاخذ تقعد هنا...أو تروح؟؟؟...
.
.
.
بالمغرب جاء يزور شذى وأمها بنات عمها ومرة عمها..يسلمون عليها... قعدوا سوالف ووناسه...شذى استانست ببنات عمها...وهم فرحوا لها... وقعدوا معهم إلى بعد صلاة العشاء...

***

بعد صلاة المغرب..وهم طالعين من المسجد اللي كان قريب من بيت تركي.. حس سعود إنها فرصه يكلمه..خصوصا إن اهل عمه عند شذى اخته بالبيت..وخالد راح يسلم على على واحد يعرفه...
سعود بتردد:..تركي...
لف عليه تركي:نعم...
سعود:بغيت أكلمك بموضوع...
تركي ناظره ببرود وعرف وش خاطره يقول...
تركي:طيب امش للبيت وقولي هناك...
وراحوا البيت و دخلوا بمجلس الرجال...
تركي:قول وش عندك يا سعود؟؟؟...
سعود:بصراحه يا تركي ودي أكلمك عن بشاير...
تركي اللي كان متوقع عصب عليه:سعود رجاء لا تطري اسم اختي على لسانك فاهم؟؟؟...
سعود عقد حواجبه:بس هذي زوجتي...وانا مملك عليها...
تركي:كانت..بس ألحين لأ وزين إنك جيت عشان تطلقها وتفكنا...
سعود واللي ماعجبته طريقة تركي:لا يا تركي ماراح اطلقها...
تركي:أجل وش جاي تبي تقول؟؟؟..
سعود:أولا يا تركي لا تكلمني بهالطريقه...ثانيا مانيب اصغر عيالك تقعد تعصب علي...في الحقيقه أنا جاي ودي اصلح اللي صار بيني وبين اختك..
تركي اللي يناظره بإستغراب:سعود من جدك تتكلم؟؟؟...ترى بنات الناس مهوب لعبه عندك...
سعود:أي لعبته...تركي أنا اتكلم من جد ودي علاقتي بأختك ترجع مثل أول وأدري إني غلطت بحقها و…
قاطعه تركي:سعود إنت مو غلطت بحقها وبس…لا بالعكس بينت معدنك وبينت إنه مافيك خير…على العموم مستحيل ترجع لك..ولو هي توافق انا بارفض هالشي…
سعود انقهر وقعد يناظره بغيض..
تركي يكمل:إنشالله بكره تروح المحكمه وتطلقها..ومهرك اللي دفعته لها بيرجع كامل من غير ماينقص ريال واحد منه…
وقام تركي من عنده قبل لا يسمع جواب سعود اللي كان يدعي الله إنه بس يصبره ولا يقعد هواش مع تركي ويخرب كل شي…
بعد ماطلع تركي..راح سعود بعدها لسلطان خويه يشوفه...اللي فرح كثير بشوفة سعود...

***

راح تركي لسلمى...اللي ماشافها من أول يوم بالعيد...وخصوصا بعد التهزيئه المحترمه اللي جاتها منه..حس إنه ظلمها...
سلمى تناظر تركي بسخريه:وشو له جاي؟؟؟كان قعدت مع ست الحسن والدلال...شذى هانم..
ناظرها تركي:للحين زعلانه؟؟؟...
سلمى بعصبيه:رجاء لا تكلمني...
تركي:سلمى خلاص بلا زعل..ما اتوقع إنه فيه شي يزعل...
سلمى وهي عاقده حواجبها:وشو اللي مايزعل كلامك معي بيوم العيد وبعدها من ولدت الخايسه نسيتني...
تركي اللي على صوته:وشو خايسه؟؟؟...احترمي نفسك ونقي الفاظك... وبعدين كلامي معك بالعيد كان لأنك كنتي مستتره بزياده عن اللزوم...
كان يقول كلامه الأخير بسخريه وهي لاحظت هالشي...
سلمى واللي بدت العبره تخنقها:قولها ياتركي قولها...قول ماعاد أبيك وإنك بس تزوجتني عباطه..والحين متحسف وتدور اعذار والحجج عشان تطفشني فيها...ترى عادي إذا ماتبيني حتى انا ما أبيك...
انصدم تركي من كلامها..وش تقول هذي..بغت تقوم سلمى بس مسكها تركي من يدها...ورجع وقعدها..
تركي:سلمى الله يهداك وش هالكلام؟؟؟...
سلمى قعدت تصيح..اما تركي تفاجأ من صياحها..اول مره يشوفها تبكي ما حب إنه يكون سبب في صياحها...
تركي:سلمى تكفين لا تصيحين والله خلاص آسف إذا كنت زعلتك...
وسلمى ما ترد بس تصيح...
تركي:يابنت الناس آسفين والله عارفين إنا غلطنا بحقك...
سلمى من بين صياحها:خلاص تركي...حرام عليك اللي تسويه فيني...
تركي يناظرها بضيق:شوفي أروح من هنا وإنتي زعلانه مستحيل...
سلمى بس سمعته يقول كذا وهي تزيد من كميات الدموع..
...

سعود اللي ما طول مع سلطان رجع لبيت شذى يكلمها...لمن رجع ما شاف امه وخالد اخوه سأل شذى قالت راحوا لفندق ينامون فيه وإن تركي للحين مارجع...سعود حسها فرصه يكلمها على راحته مع إنها اصغر منه إلا إنها تفهمه أكثر من غيرها...
سعود:بصراحه تركي يرفع الضغط ما أدري وش أسوي معه؟؟؟...
شذى باهتمام:كلمته طيب؟؟؟...
سعود:وش اقولك تو...إيه كلمته بعد صلاة المغرب بس كلامه يقهر...
شذى:حاول إنك تداريه...بس تدري لا تحاول أحسن لك...
سعود:ليش؟؟؟؟...
شذى:لأنها مستحيل ترجع لك...هي قالت لي بنفسها...
سعود:أعرفها بشاير تحبني...
شذى بعصبيه:حبك برص إنشالله زين؟؟؟...
سعود:وإنتي بعد زين...
شذى قالت له عن الكلام اللي دار بينها وبين بشاير..وبعد ماخصلت كلامها
سعود بقلة حيله:طيب وش أسوي يا شذى الحين؟؟؟...
شذى:والله إنت اللي طيرت البنت من يدك بنفسك...
سعود وهو معقد حواجبه:والله ما كنت متوقع إن السالفه لها صدى هالكبر...
شذى تضحك بسخريه:ياحليلك يا سعود إنت وين عايش؟؟؟..وشو تقولهم ماعاد أبي بنتكم والحين تقول ما توقعتها كبيره...
سعود بحزن:لو ماصار اللي صار كانها الحين معي بالبيت...
شذى:[لو] هذي تفتح عمل الشيطان...خلاص انساها ياسعود...
سعود:مستحيل انساها...لو اعيش عمري مرتين ما باخذ غيرها...
شذى:تبي الصراحه ياسعود إنت موقفك معها مره نذل...
سعود يناظرها بطرف عينه:انثبري..
شذى بصوت واطي:انثبر انت...
سعود:يعني الحين..اعطيني الزبده..
شذى تتطنز:الزبده في الثلاجه...
سعود وهو يتأفف:آخر شي ناقصني بهمي تجين تنكتين انتي وخشتك...
شذى واللي طنشته وشالت ولدها اللي فتح عيونه ورفعته فوق...
شذى وهي تضحك:ياناس يزنن ولدي...بالله وش رايك ياسعود ما ياخذ العقل...
سعود يناظر ولدها كان طفشان بس غصب عنه ضحك على أخته اللي كأنه ولدها عندها لعبه عند طفل كل شوي شايله وماخذه معه...
شذى انتبهت لسعود اللي بدى يسرح...
شذى بهدوء:لهالدرجه تحبها يا سعود؟؟؟...
انتبه سعود لشذى وناظرها وهز راسه بنعم...
شذى:أجل خلاص كلم تركي مره ثانيه...
سعود يناظرها:توني كلمته ورد علي برد زي وجهه...
شذى:ارجع كلمه مره ثانيه..ولا تنسى الأهم بشاير روح كلمه خلي يقول لأهله امه وابوه...وبشاير...
سعود بعد فترة صمت طويله:شكل مالي إلا هالحل...
.
.
طلع تركي من بيت عمه..من عند سلمى بعد ما راضاها..حس بالألم لها..يحسها من جد مظلومه..على كل الفتره اللي مرت من ملك عليها للحين مافيه أي حب منه لها...حس إن ابوه ظلمها معه يعني لو ماخذاها تركي كان خذاها غيره اللي اكيد اللي بيحبها ويكون سبب لسعادتها...مالقى بنفسه غير الله يسامحك يابو بندر راعي هذا الزواج....

***

باليوم اللي بعده...
تركي يناظر من سعود اللي خلص كلامه:الحين انت جاي تعيد علي كلام أمس؟؟؟...
سعود:رجاء يا تركي عن الطنازة...
تركي وهو يعدل جلسته:لا والله ما أتطنز...بس من جد أتوقع الموضوع انتهى...يعني المفروض اليوم إنك تروح تطلقها..لأن رجعتها مستحيله أنا اقولك من الحين(بسخريه واضحه)لا تتعب نفسك...
سعود عقد حواجبه:إنت كلم اهلك وشوف...
تركي يقاطعه:من دون ما أشوف انا عارف ردهم..خلاص يا سعود لا تحاول...
سعود:إنت شوف يا تركي وكلمهم...
سكت تركي وقعد يفكر يقول لأبوه وامه هالكلام ولا كيف؟؟؟...
.
.
بنفس الوقت كانت ام محمد مع شذى بنتها...
ام محمد:الله يهداك شذى ليش تصيحين؟؟؟...
شذى:يمه اقعدي هنا معي ماله داعي نومة الفنادق هذي..اجل وشوله متعبه نفسك إذا بتروحين تنامين بالفندق...
ام محمد:تعرفين مشاكلنا مع رجلك...عيب بعد اللي صار ننام ببيته...
شذى:بتنامون معي...مو عنده هو..
ام محمد:بس لا تنسين هو صاحب البيت...ولا تبين إنه نكون مانستحي بعد اللي صار نرجع عادي...
شذى:بس هذي انتوا وخالد تسولفون معه عادي..
ام محمد:لأنه هذا من الإحترام بس لا تنسين اللي صار منك انتي وسعود الله يهداكم...
شذى تمت تناظر بعيون امها اللي تحسها سرحت...
ام محمد تكمل:بصراحه انا كنت ناويه اروح اكلم ام بندر على موضوع سعود وبشاير بس أخاف إن روحتي لها تكبر المشاكل..
شذى تأيد أمها:يمه روحتك بتزيد المشاكل..احسن لك لا تروحين...

***

تركي راح بعد صلاة العشاء يقولهم عن سعود..خصوصا إنه ابوه لمن درى بجيتهم أكد على تركي إنه لا يروح إلا بعد ما يطلق بشاير...
ام بندر بعد ما سمعت كلام تركي:بعد اللي سواه يجي يعتذر بكل برود؟؟؟..
تركي بهدوء:ما أدري عنه..بس هذي مره ثانيه يكلمني...
ام بندر بعصبيه:والله لو إنه عندي بس..قوله بنات الناس مهوب لعبه عنده خصوصا بشاير...
ابو بندر اللي كان مهوب مستغرب مره خصوصا لمن يتذكر شكل سعود لمن جاء يبي ينهي كل شي كان مبين إنه مدفوع لهالشي دفع خصوصا من محمد و اللي مأكد له هالشي تركي لمن قاله إن محمد يبي ينتقم منه عشان اخته...
تركي:طيب راي بشاير؟؟؟...
ام بندر بعصبيه:وعادك تسأل يا تركي...شي طبيعي إنها رافضه أصلا كله من مرتك السوسه شذى..لمن شافت إنه رجعنا معها عادي بعد ما ولدت صارت تبي ترجع أخوها لبشاير..هي على بالها إن احنا على هواها...
تركي بضيق واضح على معالم وجهه:الله يهداك يمه وش دخل شذى بالموضوع؟؟؟...
ابو بندر يقاطع كلامهم:طيب ليش يقول إنه مايبيها ما دامه بيرجع لها...
تركي يناظر ابوه باهتمام:لأني قلت لك يباه اخوه محمد الكبير أمره بكذا...
ابو بندر:وش يدريك؟؟؟...
تركي بتأكيد واضح:انا متأكد مثل مانيب متأكد إني ولدك أعرفهم زين يباه عيال عمي ابو محمد الله يرحمه...
ام بندر بعصبيه:بصراحه إذا هذا الشي صحيح إنه يترك اختك عشان اخوه قاله كذا فصدقني إنه مهوب رجال وش طوله وكلمته عند أخوه؟؟..يعني هو إمعه ماله راي؟؟؟...ماله شخصيته؟؟؟...انا ما آمن بنتي عنده اخاف اخوه محمد يجي يوم ويقوله طلقها...يقوله أبشر...خله بس يذلف ويفكنا...
ابو بندر بعصبيه:ام بندر خلاص وش هالكلام؟؟..اسكتي ماخليتيني حتى اعرف افكر...
ام بندر:والله من القهر من اللي قاعد اشوفه...
ابوبندر اللي عصب من كلام ام بندر لمن تكلمت عن سعود حس هالكلام تقصده فيه بطريقه غير مباشره..كأنها تذكره باللي صار معه مع اخوه ابو عبدالكريم لمن بغى تركي لسلمى...مايدري هل اللي صار لبنته جزاء للي سواه بشذى لمن زوج تركي...او عشان يشوف بنفسه كيف آراء الناس في سعود اللي طاع اخوه في فك الزواج وشلون إن الناس خذت عليه هالشي..
تركي:وش ارد عليه يباه؟؟؟...
ابوبندر:طبعا قوله لأ...وخله الله لا يهينه يطلقها لأنه ماله شي عندنا...
وبعد ما تناقشوا شوي طلع تركي من عند أبوه وراح...وطلعت ام بندر لحجرتها تبي ترتاح وهي طالعه شافت بشاير فوق تناظر التلفزيون حبت تقول لها هالخبر.. ماتدري بردة فعلها بس أكيد لازم تعرف...وبالفعل قالت لها أم بندر بكل اللي صار..وطبعا بشاير كانت داريه إن سعود يبي يرجعها بس مستحيل ترجع...

تركي اللي لقى سعود ببيته مع شذى..ناداه للمجلس وقعد معه...وقاله باللي صار..إن اهله ماعاد يبونه...
تركي:عاد أنا قلت لك يا سعود طلقها باللتي هي احسن.. احسن لك ولنا..
سعود بخيبة أمل:تركي ماراح أطلقها...
تركي:لا تعذب نفسك أختي اعرفها مستحيل ترجع موتها عندها احسن من الرجعه...
سعود مايدري ليه تذكر تركي لمن كان يجيهم ويبي شذى كانوا يقولون له مانبيك وطلقها...سبحان الله المشهد الحين ينعاد وكما تدين تدان...
سعود:تركي ممكن اعرف وش سبب إنه ماتبوني أرجع بشاير؟؟؟...
تركي اللي يناظره بإستغراب:سعود من جدك تتكلم؟؟؟...
وهاللحظه دخل خالد...
خالد:السلام عليكم..
تركي وسعود:وعليكم السلام....
خالد:وش عندكم...
تركي:بالله يا خالد شوف أخوك وش يقول؟؟؟..
خالد:وش قلت يا سعود؟؟؟...
سعود يقلب نظره بين تركي وخالد:قلت ليه مايبوني أرجع بشاير؟؟؟...
خالد سكت...يعني حسه سؤال غبي...تذكر كيف إنه قبل لا يسافرون قال لسعود ماله دخل باللي صار..وإنه ماراح يتدخل في الموضوع...
تركي يكلم خالد بجديه:خالد بالله قول لأخوك ليه؟؟؟...
خالد سكت من جد ماعرف وش يقول..واللي قهره ردة فعل سعود اللي ما كأنه مسوي شي...

***

بشاير اللتي بكت كما لم تبكي من قبل..الحب سطر لها في ميلادها تاريخ جديد وفجر جديد..حبها لم يكن مسألة وقت..او لم يكن مفروض عليها ان تحبه كزوج مستقبل..بل أحبته كما تحب المراه وليدها..وكما تحب الأنثى انوثتها..أحبته كما أحبة نفسها او أكثر من ذلك..حبه الذي جرى في أوعيتها كمجرى الدم..حبه اللذي تغلغل حتى النخاع..حبها له..فقدت أهدته الكثير من الحنان..كأم صغيره..واهدته الكثير من الحب والعشق.. كانت دمعتها تسبق المه..كان قلبها يخفق بشده لحزنه..عاشت أحزانه أحست انها ملكه في زمن لن تكن له ملكه..بكت كثيرا ارادت ان تكون جروح قلبها قد بردت ولكنها لم تبرد يوما..لقد باعها بلا ثمن؟؟..أحست بالغبن من حبيبها ومعشوقها ..بالوقت الذي تريد أن تنهي حبها وتنزع بقاياه من حناياها..كان اشد التصاقا بقلبها ووجدانها..حبا لن يكون من السهل محو ذكرياته مع الزمن..حبه الذي تغلغل بها فاصبح يجري بدمها ويتنفس هوائها ويشاركها جميع اجزاء جسدها...ولكن كانت عزة نفسها وأجزاء كرامتها مالتناثره ترفض وبشده القبول او حتى التفكير كانت تحس بالتوتر من شدة المها قلبها وحبه الذي يكبر مع كل ثانيه..وعقلها الذي يرفض أن يعود والقبول بالعوده من بعد الرفض...

كلمت شذى ريم خويتها بعد ما أرسلت لها مسج بأنها ولدت...تدري إنها متأخر بس ما كان فيه وقت..او بمعني أصح نست تقولها...
ريم:هلااااااااااااااااااا بمربية الأجيال القادمه...
شذى تضحك:من الحين أجيال...هو يادوب واحد وتقولين اجيال...
ريم:وليش مايصيرون جيل؟إنشالله السنه الجايه مثل هالوقت معك واحد ثاني
شذى:لا ما أتوقع فيه واحد ثاني...لأن فيصل بيكون وحيدي...
ريم:وليه هالفال الشين إنشالله؟؟...
وقعدت شذى تحكي لريم عن وش صار بولادتها لمن دقت على تركي..و قالت لها عن بشاير...وعن جية أهلها..وعن العمه حصه لمن كلمتها بقرارها بالرجعه وحكت لها بكل شي بنفسها لأن ريم هي الوحيده اللي تمون عليها شذى وتقدر تقولها بكل شي...
ريم بعد ما سمعت شذى:شذى تبين رايي؟؟؟...
شذى:هذا انا اسمعك قولي...
ريم:لا ترجعين...من جد والله أتكلم لا ترجعين خلك ببيتك احسن...
شذى اللي تفاجأت من رد ريم:ريم من جدك تتكلمين؟؟؟...يعني لو اللي صار لي نفس الشي صار لك مع عبدالعزيز بترضين؟؟؟...
ريم تحاول تقنع شذى:شذى ما أقدر اتوقع ردة فعلي لأنها يمكن تكون صح او خطأ...بعدين أنا اقولك من منظار الصح اقعدي ببيت رجلك...
شذى:بعد كل اللي صار لي أحس ماعندي كرامه لو قعدت...
ريم:وش دعوه؟؟؟...إنتي بتقعدين عشان ولدك اللي خاطري اشوفه و عشانك إنتي...شذى وش ماعندي كرامه؟؟؟...انا عندي نظرة لو تكون غلطانه بس اؤمن فيها مافيه شي اسمه كرامه بين الي يحبون بعض.. فيه عزة نفس صح...بس مافيه كرامتي ماتسمح لي وكرامتي..عسى ماشر؟؟؟..
شذى:......
ريم تكمل:اقول اقعدي وشوفي رجلك تركي والله كسر خاطري وإنتي بالشرقيه شوفي كم مره جاك وكم مره قلتي له ما أبيك وكم مره قالوا له اخوانك إنهم ماعاد يبونه صح؟؟؟..ليه ماقال نفس كلامك... شذى صدقيني لو تقعدين بيكون افضل..لأنه اخوانك ملتهين بزوجاتهم صح يحبونك بس لا تنسين كل واحد فيهم له حياته الخاصه..شذى فكري بقرارك لأنه بيأثر فيك وعلى كل اللي حواليك...
شذى واللي اقتنعت بكلام ريم:ريم مشكلتي الوحيد هي سلمى ما ادري وش اسوي معها...
ريم بقهر:حسبي الله عليها الساحره ذي..بس اسمعي اقعدي انتي ببيتك وزوجك بس مملك عليها..وأنتي ماتدرين يمكن لمن يستقر بحياته معك انتي وولدك يطلقها...خصوصا بس السالفه بينهم ملكه...
شذى:ريم لا تحطين ببالي امل بعدين اتحطم...
ريم:انا ما أئملك..بس إنتي حاولي يرجع لك حاولي تتقربين منه شذى إنتي ماحاولتي معه..اعرفي اسباب زواجه بالتفاهم يمكن شاف منك شي ماتدرين بس مع هذا كله يمكن يرجع يتزوج سلمى هذيك الساعه والله لك حرية الإختيار بأنك ترجعين أو تكملين حياتك معه بس ماراح تكونين ندمانه لأنك حاولتي معه لمن تطلعين بأقل الخسائر المصيبه تهون على قلبك لأنك بذلتي الأسباب...
شذى بعد ارتاحت لكلام ريم:ريم...
ريم:سمي...
شذى:الله لا يخليني منك إنشالله من جد كلامك يقنع يالدوبه من مكالمه وحده اقنعتيني..أجل عبدالعزيز بسرعه تقدرين تقنعينه...
ريم تضحك:هههههه بس هذا عشان تعرفين قيمتي وانا ياحليلي آخر وحده من درت بفصول ولدك عاد هو ماعنده خاله...أنا خالته من الحين..
شذى تضحك:أفا عليك بس..اول كلمه باخليه يقولها خالتي ريم...
بعدها قعدوا سوالف..ولمن صكت ريم من شذى قعدت تفكر شذى بكلام ريم اللي تحسه دق على الوتر الحساس بقلبها وخاطب عقلها بنفس الوقت... من جد ريم كلامها صح..بس تركي للحين ماكلمها من جوا اهلها عشان تقعد؟؟؟
قعدت تفكر شذى إذا ماجاء كلمني بروح مع اهلي...بس من جد لازم اكلم تركي إنه ينهي موضوع سلمى هذا...

بالفندق...
خالد: الصراحه اليوم عند تركي رفعت ضغطي...
سعود وهو يناظر من دون نفس:ليه يا بعدي؟؟؟...
خالد بعصبيه:كيف بعد كل اللي صار لهم منك تجي تقول ليه ترفضون ترجعون لي أختكم؟؟؟...
سعود يتأفف:ألحين بدا حكيم زمانه يلقي مواعظه...
خالد: شين وقوي عين...أتوقع هالمثل مفصل عليك يا سعود...
سعود يقاطعه بسخريه:ابشرك انا مقاطع الأمثال ماأسمعها..بس مشالله الحكماء اللي مثلك ماتقاطعون الأمثال أبد بالعكس قاعدين تطورون فيها وتدخلون عليها محسنات بديعيه بعد لأنكم فاضيين...
خالد يناظره بإستخفاف:ما أدري وش سالفتك انت؟؟...مغسول وجهك بمرق لمن يقولك تركي طلق اختي وأنت تقول لأ...افهم مايبونك...
سعود:أقول لو ترجع لصومعتك احسن لك..(بجديه يتكلم) اصلا لو فيك خير كان تكلمت معي وساعدتني مو قاعد معنا وكأن على رؤسهم الطير مالك داعي لو أنك بس تصير مثل محمد كان احسن...
يقاطعه خالد:والله محمد هو اللي وصلك لهالمواصيل...
سعود:محمد بصراحه هو خربها معي بهالسالفه...بس من جد يا خالد حبيب اخوك مو أنت لو إنك من جد تحبني كان ساعدتني...
خالد:وشو تحبني؟؟؟...بزر أنت...
سعود يستهبل عليه:لأني يتيم وأبوي مات الله يرحمه قمتوا تنسوني حرام أنا اخوكم الصغير إذا ما اهتميتوا فيني من راح يهتم فيني؟؟؟...
خالد اللي قام:سعود أشك بعقلك...

وبعد ماقام خالد..ضحك عليه سعود كان حاس بالضيقه خصوصا بعد اللي صار مع تركي...بالاخير حب يرفه على عمره قام دق على سلطان وبعض اخوياهم بالرياض عشان يطلعون بتمشيه تغير عليه الجو شوي...

***

حس إنه لازم يكلمها..لازم يقعدون بهدوء يتناقشون...بدوت هواش او تهم..
شذى وتركي...
شذى وهي تقعد بعصبيه:مالي قعده هنا ياتركي…
تركي:طيب ليش…
شذى وهي تصيح مقهوره:يعني ماتعرف ليش…منك أنت وزواجك من سلمى ولا نسيته…
تركي:وش دخل سلمى ألحين؟؟؟..
شذى:كيف مالها دخل وهي السبب بكل اللي صار…تركي ليش تزوجتني مادام مصيرك ترجع لبنت عمك..
تركي:مصيري أنتي يا شذى..والله أنتي اللي حبيتك من كل قلبي…
شذى:ما أقدر أصدقك…
تركي وهو يقعد قبالها:والله زواجي من سلمى سببه الظروف ولا أنا مالي فيه شي…
شذى تناظره وهي تصيح…
تركي:شذى صدقيني مكانك هنا ببيتك…
وقعد تركي يقنعها إنها تقعد كانت هي تقعد تصيح أو ترد عليه بليه يسوي كذا…في النهايه اقتنعت لأنه كان شكله من جد يبيها تقعد وكل الكلام اللي يقوله مبين إنه طالع من قلبه…وبالأخير…
شذى وهي تمسح دموعها:باقعد بس بشرط…
تركي:آمري انتي بس…
شذى بضيق واضح على ملامحها:تطلق سلمى…
تركي:صعب يا شذى والله زواجي منها مهوب برضاي…
شذى اللي ردت تصيح…قعد تركي يهدي فيها وحاول طول الوقت إنه يكسبها…
شذى بعد فتره صمت:بأقعد معك..بس ياتركي أقولك من الحين مهوب تهديد قد ماهو شرط..إنه إذا سمعت بس إنك بتعرس خلاص انت وسلمى برجع لأهلي…أنا وولدي…
تركي اللي حس بصعوبة شرطها:ما أقدر أوعدك يا شذى…
شذى:أجل خلاص برجع مع أهلي…
تركي:خلاص طيب بأحاول بس إنتي اقعدي إلين مايدبرها الله…
شذى:وبأقعد انا بحجرتي وانت بحجرتك…إلين ماتطلق بنت عمك الزفته…
تركي يبي يضحك مبين إنها تكرهها كثير وتغار بس الوقت مهوب وقت ضحك…
تركي:على هالخشم…فيه شروط ثانيه طال عمرك؟؟؟…
شذى:لأ خلاص هذي هي…بس إذا فيه زياده بأقولك…
تركي يضحك:طيب بس لا تزودينها…
وقام من عندها يبي يروح الغرفه ينام…

***

اليوم اللي بعده…
هاليوم بيرجعون أهل شذى للشرقيه...مروا عليها تغدوا معها ولمن جاء موعد الرحله توادعوا منها وراحوا...
أم محمد تكلم شذى قبل لاتروح:زين منك ياقلبي إنك قعدتي...
شذى تناظر أمها:ليه يمه ماعاد تبيني؟؟؟...
أم محمد:لا بالعكس والله..بس أحسن للبنت قعدتها في بيت رجلها...
شذى:الله يكتب اللي فيه الخير...
أم محمد:آمين...شذى والله رجلك شكله حبيب ويحبك..بس إنتي ليني معه شوي...
شذى بإستغراب::يعني انا مانيب لينه يمه؟؟؟...
أم محمد:لا ما أقصد بس إنتي احسك جافه معه شوي...إذا تبين تطيعين شوري صيري لينه سامحيه وعامليه من أحسن مايكون وصدقيني يمكن مع معاملتك يصلح غلطته ويطلق بنت عمه...
شذى:يمه إذا بيطلقها أنا مستعده أسامحه على كل شي...
أم محمد:إنشالله يرجع لك ويترك بنت عمه..بس إنتي لازم تكونين احسن من الزينه معه...عشان يتركها لأنه بيلقى اللي يبيه عندك أنتي...
شذى:...............
أم محمد تكمل كلامها:بس إذا مافيه فايده وبياخذها تعالي لي وصدقيني هذيك اللحظه بعذرك على كل شي تطلبينه لوتبين الطلاق بعد...
شذى تناظر أمها بحنيه:فديت رجولك يمه...
ام محمد بإبتسامه:بس أهم شي نفسك عشان ولدك فيصل فديته إنشالله...
وبعدها توادعت من أمها وخالد أخوها اللي كان مره يحب اخته...وجاها سعود يوادعها وهو حزين إنه مارجع بشاير...
راحوا أهل شذى وهي ماتدري اختارت الصح لمن قعدت أو غلطت.. بس مثل ماقالوا اهلها وريم خويتها...حاولي مع تركي عشان ولدها وعشان نفسها وعشان قلبها..وعشانه هو بعد...
كان اول يوم دوام له بالعمل...كان كل ما يشوفه أحد او يسلم عليه يباركون له بفيصل..وصاروا ينادونه بأبوفيصل...
تركي وهو يقعد مع زملائه الضباط سمعهم يتكلمون الإرهاب وخصوصا التفجيرات الاخيره اللي صايره هنا بالعاصمه الرياض...
طلال:من جد مساكين يظنون إنهم على حق...
الضابط سالم:والله المساكين العسكر اللي راحوا ضحايا لأفكارهم التكفيريه..
طلال:أنا ما ادري وش نهايتها معهم...
تركي يتكلم:أنا متاكد يا طلال إنه مصيرهم ينتهون..لأنهم على خطأ وعمر الخطأ مايستمر...
سالم:انا معك بهالشي بس إلى متى يابو فيصل..لا تنسى إنه فيه ارواح استباحت دمائها يعني متى نخلص منهم؟؟؟...
طلال:أنا اعتبر الضحايا شهداء...يكفيهم فخر إنهم أرواح مجنده في سبيل الدين والوطن...وصدقوني الدوله ماتقصر...
تركي:معك حق...بس لا تنسى إذا لا قدر الله صار فيه حصار لهم مثل قبل يمكن يطلبون المسانده يعني مو بس الطوارئ حتى احنا..
سالم:على العموم وزارة الداخليه تحاول قدر الإمكان إنها تحبط اعمالهم قبل لا تصير...
ثامر اللي كان جالس معهم بس ساكت:اقول يا شباب لو تغيرون الموضوع اليوم تركي ابوفيصل مداوم اول مره بعد ماصار ابو يعني يستاهل عزيمه..
سالم:يستاهل أبوفيصل والله...
طلال اللي يستهبل على تركي:أقول افرح ياتركي يالله عقبال ما اشوفك شهيد في سبيل الوطن وتخلي ولدك يفتخر فيك عاد لويكبر وانت عادك موجود على وجه الكره الأرضيه صدقيني بيتعقد...
ضحك تركي من كلام طلال:اقول طلال لوتكرمنا بسكاتك يكون أحسن( يكلم الشباب) ياجماعه ما أدري وش بلاه هالرجال شايل همي انا وولدي هو ووجهه...
وضحكوا الشباب وقعدوا سوالف وبعد الدوام طلعوا على فندق يتغدون فيه عازمهم واحد الضباط اللي معه عشان تركي(ابوفيصل)...