منتديات قصايد ليل - عرض مشاركة واحدة

10-12-2010

مع المغرب كانت الآلآم تزداد مع عاد قدرت تتحمل...مسكت الجوال ودقت على تركي...تركي اللي كان أصلا راجع البيت..شاف شذى تتصل عليه.. استغرب وش عندها...اصلا هي ماتدق عليه ابد...
تركي:هلا شذى بغيتي شي؟؟؟...
شذى تصيح:تركي إلحق علي ماني قادره اتحمل آلام فضيعه...
صكت الجوال منه وهي تصيح ماهيب قادره تتحمل...السواق كان بإجازه هذا اليوم..وهذا اللي حدها تدق على تركي...تركي اللي خاف موت ماعرف وش فيها...
.
.
.
كان تركي جالس برى ينتظرها...كان مره خايف ومهوب عارف وش يسوي...الدكتوره قررت إنها حالة ولاده وعلى طول دخلتها داخل... كان مابين حالة يأس ورجاء...فرح وخوف...خوف عليها..وفرح بأنه بيصير أب...كان يدعي الله إنه يقومها بالسلامه...
.
.
بعد مرور فتره طويله مرت كالدهر على تركي...ولدت شذى وزف له الخبر عبر النيرس إنها جابت ولد...فرح إلا بغى يطير من الفرح...
أخيرا انا صرت أبو...سأل عنها قالوا له إنها بخير...
اول ماطلعت الدكتوره...
تركي:هابشري يا دكتوره إنشالله هي بخير....
الدكتوره اللي كانت سعوديه:الحمدلل بخير هي..وبعد شوي تقدر تشوفها...
تركي:بس ليش هي طولت كذا بالولاده؟؟؟...
الدكتوره قعدت تضحك وهي تعدل حجابها:بالعكس عادي وولادتها كانت سهله والحمدلله...بس تعرف لأنها بكريه وهذا اول ولد...
تركي:مشكوره يا دكتوره الله يطمنك...
الدكتورة:العفو...وتقدر بعد شوي تشوفها هي والولد...
.
.
راح لها بالغرفه كانت منسدحه وتعبانه مره ومغمضه عيونها..كانت تحس بالإنهاك في جميع أنحاء جسمها...
قرب تركي منها...ناظرته بتعب خاطرها تتكلم بس كانت مره تعبانه...
مسك تركي يدها...وباسها على جبينها وخدها...
تركي بهمس:مبروك شذى..والحمدلله على السلامه...
شذى بصوت واهن:الله يسلمك...وين الولد؟؟؟...
تركي:الحين بيجيبونه...بس إنتي ارتاحي...
ودخلت النيرس ومعها الولد...راح لها تركي يبي يشوفه... كان صغير حجمه ووجهه أحمر وفمه كان مره صغير... باسه وهو في حظن النيرس..
النيرس:شيلوه ده ابنك...
تركي ابتسم بفشيله:اخاف يطيح...خليه بحظنك...
النيرس:الله رقال طول بعرض ومابتعرفش تشيلوه...شباب آخر زمن..
تركي بخاطره أنثبري بس...
وودته النيرس عند شذى..اللي كانت تحترق وهي تبي تشوفه...
حطته النيرس جنبها..كانت مره تعبانه وماقدرت تشيله...ابتسمت شذى لمن شافته...باسته على خده بخفه...حطت يدها عليه...بعدها قعدت تناظر فيه وهي ماهيب مصدقه إنها جابت ولد وولدت وإنها الحين ام..بعدها جاتها الصيحه..بدت تصيح بصوت مكتوم..انتبه لها تركي..وحب يخفف عنها..
تركي:حبيبتي..خلاص لا تصيحين...وش اللي يصيحك ألحين؟؟؟...
سكتت شذى وغطت بيدها عيونها وهي تصيح...شال تركي يدها من على وجهها وحب يخفف عنها...
سحب تركي يدها وباسها وقالها:شذى لا تصيحين والله خلاص كفايه...
شذى:لا تاخذه مني يا تركي...والله حرام..
تركي:ومن قالك إني باخذه منك...الله يهداك بس إنتي ارتاحي الحين...
وقعد تركي يخفف عنها من احزانها...إلين ماسكتت...وهدت وقعد معها إلين مانامت وهو بس يناظرها ويناظر ولده...ما يدري يحس بهاللحظه بس تغيرت اشياء كثيره فيه...

برغم.. برغم خلافاتنا..
برغم جميع قراراتنا..
بأن لا نعود..
برغم العداء..برغم الجفاء..
برغم البرود..
برغم انطفاء ابتساماتنا..
برغم انقطاع خطاباتنا..
فثمة سر خفي..
يوحد مابين اقدارنا..
ويدني مواطئ أقدامنا..
ويفنيك فيّ..
ويصهر نار يديكِ بنار يديّ..
000
برغم جميع خلافاتنا..
برغم اختلاف مناخاتنا..
برغم سقوط المطر..
برغم استعادة كل الهدايا..وكل الصور..
برغم الإناء الجميل..
الذي قلت عنه..انكسر..
برغم رتابة ساعاتنا..
برغم الضجر..
فلا زلت أؤمن أن القدر..
يصر على جمع أجزائنا..
ويرفض كل اتهاماتنا...
000
برغم خريف علاقاتنا...
برغم النزيف بأعماقنا..
وإصرارنا...
على وضع حد لمأساتنا..
بأي ثمن..
برغم جميع ادعاءاتنا..
بأني لن..
وأنك لن..
فإني أشك بإمكاننا..
فنحن برغم خلافاتنا..
ضعيفان في وجه أقدارنا..
شبيهان في كل أطوارنا..
دفاترنا..لون أوراقنا..
وشكل يدينا..وأفكارنا..
فحتى نقوش ستاراتنا..
وحتى اختيار اسطواناتنا..
دليل عميق..
على أننا..
رفيقا مصير..رفيقا طريق..
برغم جميع حماقاتنا..
(نزار قباني)

***

باليوم الثاني...قامت شذى وهي تعبانه ناظرت السرير الصغير اللي جنبها خاطرها تشوف ولدها ومن حسن حظها كان على وقت دخلت النيرس...
النيرس:صباح الخير يا ست الكل...
شذى بإبتسامه:صباح النور..
النيرس:عامله إيه النهار ده..إنشالله كويسه..
شذى:الحمدلله أحس إني أحسن من أمس...
النيرس وهي رايحه لسرير البيبي:وأخبار البيبي اليوم؟؟؟..
شذى:زين...أعطيني إياه...
وشالته النيرس وباسته وأعطته شذى وهي تقول...
النيرس:مشالله بيقنن الصغنن ده...
شذى وهي تشيله وتبوسه:مشكوره.هذا من ذوقك...
النيرس:مرت عليك الدكتوره اليوم؟؟؟..
شذى:إيه مرت علي ببداية الصباح...بس رجعت نمت...
وبعدها قعدت تناظر شذى بولدها وهو بحجرها...كانت مبسوطه حيل عليه..مع إنه كان نايم ولا يتحرك..بس كانت تراقب تنفسه وتتأمل ملامحه كانت تمسك يده اللي كان قابض عليها بقوه وتفكك أصابعه ومبهوره منه ومن صغر حجمه كأنها أول مره تشوف طفل..بس يمكن لأنه غير لأنه ولدها؟؟...على قولة الكويتيين(حشاشة يوفها)..تحط يدها على راسه بحذر لأنه تحسه باقي طري..وهي تناظره تذكرت إنه تركي كان يقولها إنه بياخذه منها..وإنه بس ينتظرها تولد...حست بالدمع بعيونها..مع إنه تركي أمس حلف لها إنه مابياخذ ولدها منها..بس حتى ولو فكرة إنه بياخذه تثير أحزانها وحسرتها..بخاطرها(لا مستحيل أي حد بالعالم ياخذ ولدي مني) ناظرت ولدها وهو نايم ولا حاس بشي من العالم ولا بمشاعر أمه اتجاهه..لمته شذى إلى صدرها بنعومه وقعدت تصيح بدون صوت...
.
.
دخل عليها تركي بعد ساعه يزوها..كانت قد وقفت صياح وولدها بجنبها على السرير كانت منسدحه على جنب وهو بجنبها ماملت منه...
تركي بإبتسامه:صباح الخير على الحلوين...
رفعت نظرها شذى له وبدون نفس:صباح الخير...
كانت باقي حاقده عليه من تهديده إنه بياخذه منها...
تركي راح لها وقال:ممكن اعرف ليش زعلانه؟؟؟...
شذى من دون اهتمام:مانيب زعلانه..
تركي ينحني لها:و نبرة الصوت هذي...وش نسميها؟؟؟...
شذى سكتت ناظرته وبعدها ناظرت ولدها...
تركي جلس على طرف السرير وقال لها..
تركي يناظر ولده:يا حبي له..مشالله على ولدي يهبل...
سلم عليه تركي...
تركي يكلم شذى:شخباره اليوم؟؟؟...
شذى:بخير...
تركي يلف شذى عليه...
تركي:شذى وش فيك؟؟؟...منتي طبيعيه؟؟؟...
شذى بعصبيه:ليه شايفني هبله...
تركي:لا مو كذا..بس أحسك زعلانه ومتضايقه...
شذى:زعلانه ومتضايقه..عندك مانع...
تركي بهدوء:لأ ماعندي مانع...بس ممكن أعرف ليش؟؟؟...
شذى:والله لو تعرف أكيد بتزعل فعشان كذا خلني ساكته...
تركي:مني يعني؟؟؟...
ناظرته شذى بكبر وهزت راسها بالإيجاب...
تركي انقهر منها فحب يقهرها...
تركي:والله عاد إذا جيت أزورك انتي تعالي تكلمي بس أنا جي أزور ولدي.
تفشلت شذى بس ردت عليه...
شذى:والله اللي يزور ولدي يزورني واللي يزورني يزور ولدي انا وهو واحد(تناظره بغيض)ومستحيل أي احد بالعالم يفرق بيني وبينه...
تركي يناظرها:وشو يفرق بيني وبينه ومسوية لي مسلسل مصري..
شذى بعدم اهتمام:والله مسلسل مصري ولا هندي افهمها زي ماتفهمها..
تركي مسوي بريء:طيب أبي انضم معكم لحزبك أنتي وولدك عادي؟؟؟...
شذى:لأ...
تركي يكلم نفسه بصوت عالي(يستعبط):والله وراح عليك الدلال ياتركي خلاص يا شذى الحين صرت صفر على الشمال والحب كله راح لولدك؟؟..
تناظره شذى بإستغراب(طالع وش يقول اللي يسمعه ماكأن بينا مشاكل واصله للسما؟؟؟...)..
شذى تناظره بإستغراب وتقول:أي حب وأي دلال لك مني؟؟؟أصلا كل شي بينا انتهى...وانا بس بدق على اهلي ويجون ياخذوني انا وفيصل..
تركي:مين فيصل؟؟؟...
شذى:ولد الجيران...يعني مين اكيد ولدي انا سميته فيصل..
تركي بجديه شوي:والله أنا اللي طلعت ولد الجيران ومثل الأطرش بالزفه عسى ماشر..بتاخذينه وتروحين لأهلك..وسميتيه على كيفك... ليه انا وش موقعي بالإعراب طال عمرك؟؟؟...
شذى ببرود:والله مالك موقع بالإعراب...محذوف من القائمه...
تركي:والله يا قلبي شكلك أنتي اللي بتنحذفين...هذا إذا باقي للحين ما انحذفتي...
شذى:والله عاد أنا وولدي مع بعض إذا نحذفت فهو معي...
تركي ماحب السالفه تكون جد وهو اللي من أول مارجع أمس البيت قرر إنه يستأنف حياته مع شذى ويرجعها مثل أول...لأن هذا الشي بيكون لصالحه هو وشذى وولدهم ألحين...
تركي بمزح:وش فيك الله يهداك معصبه كذا هدي...
شذى:والله ماسمعت انت وش تقول؟؟؟...
تركي يراضيها ويسندها حتى تعدل قعدتها...
تركي:يابعد قلبي ياشذى..إنتي وهالنتفه اللي أنتي جايبتها..لا تزعلين والله أمزح..وبعدين إذا تبين تسمين الولد فيصل أوكيه يابنت الحلال ولاتزعلين..
شذى راحت تشيل ولدها بحظنها:وبروح الشرقيه وارجع اعيش عند أهلي...
تركي:تبين تروحين مع السلامه..بس ولدك بيقعد هنا..تبين تقعدين معنا الله يحييك إذا ما شالتك الأرض أشيلك بعيوني...
شذى تناظره بإستغراب:وش هالحب الفجأه اللي نزل عليك وصرت تحبني؟؟
تركي بجديه:والله من زمان وأنا أحبك وماعمر مشاعري تغيرت بلحظه..
شذى:أحاول اصدقك بس مافيه فايده...
تركي:طيب وش قلتي بتقعدين معي أنا وفيصل ولا لأ؟؟؟...
شذى:طبعا لأ أنا بروح وهو معي للشرقيه وإذا تبي تشوفه مر عليه...
تركي يمزح:شوفي تتحكمين إذا صار هالولد لك بحالك بس لا تنسين هو شراكه بيني وبينك...يعني لي فيه خمسين بالميه...
شذى معقده حواجبها:عسى ماشر شراكه...لاحبيبي هذا ولدي بحالي...
تركي قعد يضحك...قام وباسها..
تركي:أنا طالع الحين امر على الدكتوره أشوف متى خروجكم...

بالعصر جا اهل تركي كلهم يزورونها بإستثناء فاطمه اللي ماتت قهر لمن عرفت إنها ولدت...
أم بندر واللي من فرحتها تناست المشاكل بينها وبين شذى...
أم بندر:مبرووك يا شذى والله ماتتخيلين فرحتي بولادتك...
شذى واللي مستغربه منها مره:الله يبارك فيك...
بشاير واللي جات مع أمها بالغصب:مبروك يا شذى(وكان الولد بحظنها) يجنن ولدكم...مشالله ماتوقعت إنتاجكم كذا...
سارا بجنب بشاير:شوي شوي على الولد ترى باقي صغير..بس شهادة حق شكله مره مغري إنك تشيلينه...
أم بندر:هاتوه أعطوني إياه ولدي خل أشوفه...
وقامت بشاير وأعطته إياه وهي بس تقرا عليه وتسمي وتذكر الله...
وبعد فتره بسيطه دخلت العمه حصه...وسلمت على شذى كانت شذى تحبها مره تحس إنها طيبه وعندها قلب مامثله بهالعالم...وراحت حصه جلست جنب أم بندر..وأخذت الولد منه...وهي الثانيه تذكر الله عليه...
حصه:وين تركي ما أشوفه؟؟؟...
أم بندر:الحين بيجي...
وقعدوا سوالف..أما شذى تمت تتأمل الورد اللي جابته العمه حصه معها وتتأمل الورد اللي جابته بشاير وسارا...والحلاو اللي جابته ام بندر أما تركي اللي مسوي لي فيها رومانسي ماجاب لها ولاشي بعدين قعدت تأمل عمرها إنها اصلا ماتبي منه شي؟؟؟...وبعدين ماستوعبت إلا على دخلة تركي...
تركي يكلم شذى:ترى أبوي ألحين بيدخل يسلم عليك..
ارتبكت شذى من متى ماشافت أبوبندر؟؟؟...يمكن من قبل لا يموت أبوها وماتدري وش موقفه منها خصوصا بعد كل هالمشاكل...
سلم تركي على عمته ودخل أبوبندر وسلم على شذى..كان ابوبندر يحس إن شذى مالها دخل..خصوصا إن تركي كان دايم يقوله من رجع شذى إنه مالها ذنب باللي صار...
أبوبندر:الحمدلله على سلامتك يا شذى...
شذى:الله يسلمك عمي..وتعبت نفسك على هالزياره والله...
أبوبندر يبستم للبيبي اللي بحظن حصه..
أبوبندر:لا بالعكس يستاهل ولد تركي إني أجيه ولا يا أم بندر؟؟..
أم بندر وهي تبتسم:إيه والله ولد تركي يستاهل...
وبعدها قعدوا سوالف وضحك...ومعهم أبوبندر كانت أول مره تشوفه شذى كذا على بساطته...حست إن قلبه كبير وحتى ام بندر اللي شكلها تناست اللي صار ببداية رمضان عندهم..استغربت لهالدرجه ولدها قدر يصلح العلاقات بينهم...
وبعدها استأذنوها وطلعوا...بعد كذا بساعه جاب تركي لها وله عشاء وكانت الساعه سبع...اول مادخل لقاها منسدحه شكلها تعبانه اول ما بغى يرجع ويطلع..سمع شذى تناديه...
شذى:تركي
تركي:هلا...إنتي صاحيه؟؟؟...
شذى:إيه بس كنت منسدحه وش عندك؟؟؟..
تركي:لا شكلك تعبانه...بس كنت جايب عشاء و...
تقاطعه شذى وهي تعدل قعدتها:لا بالعكس احس إني أحسن...
راح لها وسحب الطاول المثبته بالسرير وحط العشا...
ووقف...
شذى:وش فيك ماتبي تتعشا؟؟؟...
تركي:ِشكلك تعبانه..يالله بأستذن انا تامرين على شي؟؟؟؟...
شذى واللي ماحبت تتمسك فيه زياده:أبد سلامتك...
وراح يسلم على ولده اللي كان بالسرير...
تركي:انا اول مره ادري إني بحب إنسان كثر ماحبيته...
وبعدها سلم عليه وطلع..

***

سلمى اللي من درت ماتت قهر..خصوصا بعد التهزيئه اللي جاتها من تركي بأول يوم للعيد..كانت جايتهم أختها عايشه..وهي الثانيه بعد مقهوره من شذى..
سلمى بقهر:يالله يارب جعلها تموت بحريقه تحرقها هي وولدها قولي آمين..
عايشه:آمين...
سلمى وهي حاطه رجل على رجل:وتركي بس من جاه هالولد ولا دق علي..
عايشه:تو مرته الشينه والده أمس...
سلمى:عايشه انا ميته قهر...أحس خلاص ماني بقادره اتحمل اكثر من كذا..
عايشه:حسبي الله عليها من مره بس شوفي كيف خلته يرجع لها بعد كل اللي سوته هي واخوها...
سلمى وهي تعقد حواجبها:تدرين ليه لأنها ساحره وإحنا ياغافلين لكم الله..
عايشه تزيدها:لأنك مسكينه وعلى نياتك موهي تتمسكن إلين ماتتمكن...
سلمى بعصبيه:اوففففففف حسبي الله عليها الحيوانه...قاهرتني...
إلا يدخل عليهم فارس ولد عايشه...كان آخر شي ناقص سلمى دخلة فارس اللي كانت حركاته مره قاهرتها...
فارس يضحك:هاي قايز...
سلمى:قايز في عينك...وش شايفنا اصغر عيالك تراني خالتك وذي أمك...
فارس يقعد جنب امه:أقول سلمى وش هالرسميات؟؟؟...خلينا فري وفليها...
سلمى تكلم عايشه:عايشه سكتي ولدك ترى آخر شي ناقصني هو...
فارس:ماراح ارد عليك..(وبعدين كأنه تذكر)إي صح كل عام وإنتي بخير..
سلمى:تو الناس تعيد..اليوم ثالث العيد وإنت توك تعيد علي..
فارس:والله يكثر خيري بعد إني فكرت أمرعليك..توني كنت جدتي وجدي أمك وأبوك...وقلت بنفسي يافارس مر على خالتك واكسب أجر...
سلمى بسخريه:ليه شايفني سبيل انت وخشتك؟؟؟...فارس عن المصاخه..
فارس:اقول يمه...وش فيها معصبه أختك؟(ويناظر أمه اللي معصبه) وأنتي بعد معصبه ليه؟؟...الناس ترى عيد...يعني افرحوا انتووا ووجيهكم...
عايشه عصبت:استح على وجهك أنا امك...
سلمى:اقول خلي عنك ولدك اللي مامنه فايده..وقولي لي وش اسوي بتركي؟؟..
فارس والضحكه شاقه فمه:أها...عشان عمي تركي جاله ولد من مرته الأولانيه..والله وراح عليك ياسلوم..خلاص اتوقع تركي بيسحب عليك...
سلمى:انثبر بس...
فارس اللي حب يقهر سلمى زياده لأنها دايم تقهره لمن تعبي راس امه عليه
فارس:اقول سلمى سامحيني على هالكلام..أنت من جد ماتستحين على وجهك لمن اخذتي واحد متزوج؟؟؟(امه وسلمى يبحلقون فيه)صدق كلامي قوي بس هذا الصدق..اثبتي لي إنك خطافة الرقاله على قولة فيفي عبده..
سلمى بعصبيه وهي موقفه:فارس اطلع برى...
فارس وهو طالع يضحك عليها:انا اصلا طالع ياالدكتوره..يا حرام رجلها سحب عليها...
عايشه اللي تفشلت موت من ولدها..وسلمى اللي ودها تذبحه من القهر آخر شي كان ناقصها فارس يجي يتشمت...

تركي من رجع من المستشفى راح لبيت اهله..وبعدها طلع مع بشاير للسوق يشترون اغراض لفيصل ولد تركي...
بشاير وهي تمشي بالسوق مع تركي:بصراحه شذى مهمله شلون ماشرت لولدها من قبل لا تولد...
تركي واللي كان شايل الاكياس بدل بشاير:والله عاد اساليها...
دخلوا محل أطفال مواليد ووقف تركي عند الكاشير وقعد يناظر ببشاير وهي تشيل لها ملابس أطفال مواليد ويشوفها تسأل البائع عن اللفات وملابس الاولاد..كان يحس بحب كبير لها يشوف فيها الحنان والأمومه على رغم صغر سنها...يشوف قلبها الكبير وسعة بالها وطيبتها اللي غصب تحبب الناس فيها...كان يشوفها نقيه بزياده عن البشر يتمنى إنه يكون له قلب مثل قلبها يقدر يسامح ويرجع العلاقات الحلوه مثل أول وأحسن..ما قدر يقول بخاطره إلا يا لبي قلبك يابشاير...
بشاير:يالله حاسب على هالأغراض والحقيني خل نلحق على المحلات قبل لا تصكر...
تركي:اوكيه عمتي بشاير...تآمرين على شي ثاني؟؟؟...
بشاير:لأ بس يله بسرعه..تدري ياتركي إنت المهمل مو شذى موهذا ولدك بعد؟؟؟...
وطلعت من المحل..وحاسب على الأغراض وطالع معها...
تركي:والله الولد بيكمل سنه وما راح يلحق على لبس هالأغراض كلها؟؟؟..
بشاير تضحك:ياكرهك اقول يله يقولون منزلين بضايع حلوه للأطفال مااقول إلا ان حظ ولدك زين...
وهم ماشيين كانت عيون الناس عليهم..خصوصا تركي اللي كان يتضايق من نظرات البنات له..كانوا مبهورين بوسامته وهو مومعطيهم وجه...
بشاير اللي انتبهت قعدت تضحك:لو شذى موجوده كان ماتت قهر...
قعد يضحك تركي:اقول اسكتي بس..اخلصي علي ترى والله احس إني تعبان...
وبعدها راحوا لكم محل وشروا أغراض لفيصل ولد تركي...
وهم طالعين..بشاير:اقول تركي ولدك عنده سرير؟؟؟...
تركي:لا...
بشاير باندهاش:ليه؟؟؟...
تركي باستعباط:لأنه بينام على الأرض(بجديه)نسيت عنه يعني وش رايك...
بشاير:طيب بسرعه في محل يبيع أسرة اطفال روعه...
راح تركي معها..وهو ممتن لها..يحمد ربه على بشاير وقعد يقارن بينها وبين فاطمه..كانت المقارنه ظالمه لفاطمه اللي كان المفروض تكبر عقلها شوي...

***

عائلة شذى اللي كانت توها تدري الليله لمن أرسلت شذى مسج لسعود تخبره بهالخبر..وهو انبسط مره وبعدها راح لأمه يخبرها اللي كانت قاعده مع خالد ومحمد بالمجلس...
سعود يضحك:يا جماعه أبشركم..
محمد:طيب شوي شوي على نفسك..وش تبشرنا به...
خالد:عطوك اجازه؟؟؟...
سعود مسوي نفسه عنده سر ويروح لأمه:اول شي أقول لمامي...
ام محمد تضحك:طيب قول وش عندك بسرعه...
سعود يمد يده:اول البشاره...
ام محمد:وش تبي؟؟؟...
سعود:أبي حلاوه...<<<يستهبل...
ام محمد تضحك:مافيه حلاو...وصك الجوال...
محمد:يا ثقل طينتك بس...
سعود مثل اللي تذكر فجأه:اوووه نسيت شذى ع الجوال...
كانت شذى باقي على الجوال وسمعت حوار أهلها قعدت تضحك وحست بمثل الدمعه بعيونها خاطرها تكون ألحين معهم...
سعود يبتسم ويحط الجوال على اذنه:ابشركم صرت خال اخيرا...
ام محمد من الفرحه قعدت تناظر عيالها:ياقلبي ياشذى ولدت..متى؟؟؟..
سعود:هلا شذى..السماح لأني نسيتك على الخط...
شذى تضحك:لا عادي...
سعود يستهبل:عادي ولا ملون ههههههه...
شذى تضحك:عن البياخه وعطني امي...
وكلمت شذى ام محمد...وقعدت تسولف معها شوي وكلمت محمد وخالد.. وبعدها رجعت تكلم سعود...
سعود:اشوفك ماتنعطين وجه يا ام شوشه؟؟؟...
شذى:خير؟؟؟...وش تقول عمي؟؟؟؟...
سعود:يالله طولتي علي وانا مشغول...
شذى:اقول بس لا يكثر...
سعود:اوكيه شذى والله وكشختي وصرتي ام...يالله باااي...
شذى تضحك:باااااااااي...
.
.
بشاير:أقول تركي؟؟؟...
تركي:هلا...لا تقولين باقي في محل بتروحينه..ز
بشاير:لحظه لحظه..لا يكون أنا شاريه لعمري الحين...ترى كلها لولدك..
تركي:بس فرفره بهالسوق...والله احس بتعب..
بشاير:خلاص خلنا نرجع البيت..
تركي يضحك ويمسك يد بشاير:لا أمزح..والله تبين تروحين مكان...
بشاير:لا أبد..
تركي:طيب وش رايك نروح نتعشى بمطعم؟؟؟..
بشاير تبتسم:امممممم ماراح اقولك لأ...
راحوا وتعشوا بالمعطم..وقعدوا سوالف من زمان عن بعض..بعدها رجع لبيته وحط أغراض البيبي(فيصل)ورجع بشاير لبيتهم..ورجع بعدها بيته وهو دايخ مره يبي ينام خصوصا إن بكره موعد خروج شذى من المستشفى...

***

بصباح اليوم الثاني...كان موعد خروج شذى...مر عليها تركي.. وبعدها راح للدكتوره اللي طمنته إن شذى وفيصل ولده تمام...طلع معها على الساعه 11يمكن...وأول ما وصلت البيت ودخلت...كانت تحس باقي بالتعب...كانت تبي تطلع فوق ترتاح شوي...
تركي:تبين تنامين؟؟؟...
شذى بدون نفس:إيه...
وأخذت ولدها...وطلعت فوق مع ولدها اللي تحس إنها خلاص ماعادها قادره تستغني عنه...
واول مادخلت غرفتها اللي اتخذتها لها من رجعت آخر مره مع تركي إلا تشوفها فاضيه...عصبت وحطت ولدها على السرير..وراحت تفتح الدواليب وشافتها فاضيه...انقهرت..(على كيفك انا يا تركي متى ماتبي تجيبني تجيبني)..نزلت وشافت تركي قاعد بالصاله يتفرج على التلفزيون...
شذى بعصبيه وهي متكتفه:ممكن أعرف وش دخلك بأغراضي؟؟...
تركي يناظرها:مانمتي؟؟؟...
شذى:مالك دخل نمت ولا مانمت...ممكن اعرف ليش شلت اغراضي من دون اذني؟؟؟...
تركي:ليه ماتبين ترجعين تنامين معي؟؟؟....
شذى انقهرت:طبعا لأ...اصلا انا مالي قعده معك..برجع لأهلي وإنشالله عن قريب...
تركي عصب:اوكيه شذى هدي شوي...وشوله هالعصبيه يا حلوه...
شذى:مالك دخل حلوه ولا شينه...الموهم مالك دخل فيني...
وقعدت تصرخ تنادي الشغاله...ولمن جات قالت لها ترجع أغراضها لغرفتها...
وطلعت الشغاله تبي ترجع الأغراض...
تركي:لحظه..أنا ماقلت للشغاله ترجع أغراضك للغرفه مو لسواد عيونك ياحبي..لأ بس لأن بشاير أمس توها تقول لي إنها بتجي تنام هنا إذا طلعتي من المستشفى...
سكتت شذى..من جد بلشه إذا بشاير بتنام هنا..
شذى:ولو...قلي مو كذا على كيفك..ترى الدنيا مهيب فوضه...
تركي بضيق:خلاص..
وقام وطلع من عندها...شذى من داخل نفسها من جد على باله الدنيا فوضى؟؟؟...بعدها طلعت وعادي عندها وما كأنها سوت شي..وراحت تشوف ولدها اللي تحس غير معالم الحياه عندها...

طلال:مبرووووك والله وصرت ابو يا تركي...
تركي يناظر خويه طلال:الله يبارك بعمرك...
طلال:ياخي أنا اشوف إنك لو تتركك بنت عمك أحسن أحس إنها مظلومه صفر على الشمال...
تركي:والله يا طلال ما ادري...بس من جد كلامك أحسها مظلومه...
طلال:طلقها ولا تعلقها كذا...
تركي:مستحيل اطلقها...
طلال بإستغراب:وليش بالله مستحيل...
تركي:أولا لأنها بنت عمي..وثانيا وش ذنبها إنها تحمل لقب مطلقه...
طلال يضحك:أموووت على الحنيه أنا.. ياخي أحس مو لايق عليك الحنان..
تركي يضحك بسخريه:ياشينك وانت تضحك..تكفى ياللي تليق عليك ألحين..
طلال:اقول بس قم خلنا نروح نتغداء...
تركي وهو يقوم:لا ما أبي...خلها مره ثانيه...
طلال:امش انا عازمك على مطعم يحبه قلبك عليه مندي عمرك ماراح تذوق مثله...مادام مرتي عند اهلها فرصه اروح انا وياك...

باليوم اللي بعده...قامت شذى ولقت بشاير قد صحت من النوم...
بشاير:صباح الخير...
شذى:صباح الخيرات...متى قمتي؟؟؟...
بشاير تضحك:منذو مبطي...قولي لي بس وين فيصل؟؟؟...
شذى:باقي نايم...هو أصلا متى يقوم؟؟؟..
بشاير:بصرااااحه ولدك ماخذ عقل أمي...بتنهبل عليه كأنه اول مره يجيها حفيد...
شذى:ياقلبي عليه..حتى أنا ميته عليه ماتوقعت إني بحبه هالكثر...بصراحه ولدي ماينلام اللي يطيح بهواه من أول نظره...
بشاير تضحك:اقول لا يكثر بس تعالي افطري...
شذى:اوكيه..لحظه خلي أقول للشغالات يجهزون الفطور...
بشاير:هو جاهز بس باقي يجيبونه...
شذى بتفكير:طيب وين تركي؟؟؟...
بشاير:افطر الصباح وطلع...
شذى انقهرت:ياربي منه...بس يطلع مايعرف يقعد بالبيت..
بشاير:ماعليك بس تعالي افطري..مصيره بيرد...
وبعدها جابت الشغاله الفطور...بهاللحظه رضعت شذى ولدها..ووخلت الشغاله تجر السرير للصاله عندها قريب...بشاير قالت لها ماله داعي تجيبينه هنا...بس قالت ماتقدر تخليه بعيد كذا مره عنها...وهم يفطرون قعدوا سوالف وبعدها سكتوا فتره..حستها بشاير فرصه تتكلم مع شذى خصوصا تحس النفسيه شوي عاليه..وفيه تآلف بينهم مثل أول تقدر تكلمها..
بشاير:شذى ودي أكلمك بموضوع وياليت ماتعتبرينه لقافه أو...
شذى تناظره باهتمام: لا بالعكس يابشاير خذي راحتك...
بشاير:بصراحه انا ملاحظه إن علاقتك بأخوي تركي مره سيئه...وإنتي وهو مهما تحاولون ترسمون قدامنا إن علاقتكم عاديه لايزال باين إن بينكم مشاكل كثيره ومافيه أي ود وتفاهم...ليش كذا؟؟؟...
تناظره شذى وتبتسم بسخريه:تدرين ليش؟؟؟..لأنه مثل ماقلتي مابينا أي ود او تفاهم..خلاص أنا احاول أنسى كل اللي راح..ماعاد لي مكان هنا يا بشاير..بتقولين تركي وحبك له...باقولك خلاص عفت حبه..وهو طبعا متيم بهوى سلمى بنت عمك..وخلاص الزواج أكيد قريب...انا وهو ماعاد احد يبي يشوف الثاني..بس ولدي هو الشي الوحيد اللي ممكن يربطني بأخوك..
بشاير تناظره باهتمام:شذى..مو معقول اللي اسمعه؟؟؟...شلون ماتحبين تركي وهو مايحبك...انا لمن قضيت لولدك رحت بعد السوق انا وهو لمطعم تعشينا وقعدنا سوالف...قالي أشياء كثيره..منها إنه يبي يعيد برمجة حياته من جديد...
شذى تقاطعه:طبعا وانا اول المحذوفات..
بشاير:انتظري خلي اخلص كلامي...بالعكس يا شذى والله أحس إن تركي أخوي باقي يحبك..ويحبك موت بعد...
شذى:بشاير رجاء لا تكذبين علي...انا اخوك ماعاد أبيه وأهلي عن قريب بيزوروني...وبروح معهم أو بمعنى أصح أرجع اعيش عندهم...
بشاير متفاجأه:شذى وش هالكلام؟؟؟...عن الخبال...
شذى:طيب ممكن أسألك سؤال؟؟؟...
بشاير:اسألي...
شذى بتردد:سعود يا بشاير...
بشاير اللي تغيرت ملامح وجهها:شذى صكي الموضوع رجاء...
شذى:لا ما راح أصكه...
بشاير:سعود صفحه انطوت من حياتي..وبصراحه اعتبرها أسوأ واسود صفحه...
شذى:بشاير..يمكن ماتصدقيني لو أقولك..إن سعود اخوي باقي يحبك..
ناظرتها بشاير:اخوك أناني ومايحب إلا نفسه...وللأسف كنت مخدوعه فيه.. توقعت إني أخترت الرجل الأفضل..بس كان توقعي خطأ.. كان لمن يجي احد يبي يشككني بإختياري..أصير اذن من طين واذن من عجين ما اسمع صكيت عيني واذني عن كل الإنتقادات...(بدت تخنقها العبره)أكذب عليك يا شذى لو قلت لك إني ماحبيته..بالعكس كنت موتي وحياتي بيدينه.. حبيته بكل جوارحي...ما اتوقع حد حبه كثري.. تصدقين بعض الأحيان اول قبل لا تصير المشاكل..أبكي..خصوصا بعد مااصكر منه اخاف كثر ما أتعلق فيه كذا يروح مني..وبالفعل ماخاب توقعي...المشكله ليه تركني مافيه سبب؟ ..هو بهالحركه خلى الناس كلها تشمت فيني...أو يتعاطفون معي.. وانا أكره مايجيني بالحياه لمن أمشي واشوف بعيون اللي يناظرني شفقه علي.. أنا ما احتاج شفقه...لا بالعكس انا اللي اشفق عليهم...لأنهم مايعرفون أنا مين؟؟؟...انا قويه ومهوب أنا(سكتت شوي).. عشان كذا صكي الموضوع..
شذى تناظرها بحب:ياقلبي يا بشاير..بس حيبت أقولك إن سعود من جد ندمان على اللي سواه..وخاطره ترجع العلاقه بينكم..

بشاير:ندمان..ياحليله اخوك..على باله بأرجع له..قولي له نجوم السما اقرب لك من إني ارجع له...
شذى:بشاير طيب خليني أفهمك ليش هو سوى كذا؟؟..
بشاير:أعرف ليش سوى كذا..بسبب مشاكله مع اخوي تركي عشانك أنتي يا البطه...
شذى:بس والله هو متحسف مره وخاطره يرجعك..صدقيني اخوي سعود حبيب وقلبه أبيض...بس اخوي محمد ضغط عليه وكان الوقت حساس شوي...
بشاير بعصبيه:ليه هو ماعنده شخصيه مايعرف يقول لأ...
شذى:بليز بشاير...
بشاير:رجاء شذى صكي الموضوع...وخلي اخوك يرسل لي ورقتي عاد مايصير معلقني كذا...
شذى:بشاير...
بشاير قامت:الحمدلله انا شبعانه...
ناظرتها شذى وهي رايحه...ما ألومك يا بشاير لمن سويتي كذا من جد سعود حركته بايخه...
.
.
.
على الغداء جات ام بندر وحصه عند شذى بزياره لها هي وولدها...
أم بندر:أقول شذى لازم تهتمين بولدك اكثر من كذا...
بشاير:حراااام عليك يمه..وش تبين تسوي فيه أكثر من كذا تحطه بقزازه..
ضحكت شذى من كلام بشاير...
بشاير تكمل:من جد حومت كبدي من كثر اهتمامها فيه..كأنها الوحيده اللي عندها ولد بالعالم...
سارا:لازم كذا مع اول واحد...
بشاير:ولو...مهوب كذا عاد...
حصه:شذى اقول اهتمي أكثر بنفسك...شوفي شلون مصفره..
شذى:لا تخافين علي مهتمه بنفسي ياعمتي...
حصه ابتسمت:لا...لازم تهتمين اكثر بعمرك...أحس ماعاد فيك دم لازم تاكلين...
بشاير:حرام عليك ياعمتي...هي لازم تخف صايره دووبه...
حصه:بشاير لا تضحكين عليها المسيكينه وتصدق...
بشاير:والله هذا حتى كلام تركي رجلها...الكل يشهد إنها صايره دوبه..
حصه:لازم التغيرات اللي تصير مع الحمل..ولا تبينها آله ماتتغير..
شذى:يسلم لي لسانك يا عمتي...حكيمه والله جعلني ما أبكيك...
بشاير:كل هالكلام لها..عشانها دافعت عنك..ترى عمتي تجامل كثير..
حصه:إلا بالحق...ما أجامل...لا تاخفين يا شذى بس تخلصين الأربعين و مع الإهتمام بيرجع جسمك مثل أول...
شذى ابتسمت لها...محد فكر يقولها هالكلام غيرها..ولا احد يسال عنها..
.
.
بالعصر راحت أم بندر وسارا..ومعهم بشاير...اللي رفضت القعده لمن عرفت إن اهل شذى بيجون بكره...وحست إنه مالها داعي تقعد اكثر خصوصا موقفها من سعود...
أما حصه لمن عرفت إن اهل شذى بيجون حست إنها لازم تكلم شذى قبل لا يجيون...وام بندر اللي تغيرت ملامحها وعصبت من جيتهم عشان بشاير بنتها...وسارا كانت خايفه من هالزياره لا تكبر المشاكل أكثر من إنها تصغرها...
بعد ماعم الهدوء المكان من عقب روحة ام بندر وبشاير وسارا...
شذى بابتسامه:يا حيا الله عمتي حصه والله تو مانور المكان...
حصه:المكان منور بأهله...بس ياشذى خاطري اكلمك بس اخاف تقولين وش دخل ذي المره فيني...
ضحكت شذى خصوصا إن بشاير بالصباح قايلة لها نفس الشي..
شذى:افا عليك بس إذا ماتدخلتي إنتي من اللي يتدخل فيني...
حصه:طيب اسمعيني..الحين وش ناويه تسوين بحياتك انتي وولدك..
شذى:إذا جو اهلي يسلمون علي..بأشيل قشي واروح معاهم.. ياعمتي ماعاد لي مكان هنا...
حصه عقدت حواجبها:وش هالكلام ياشذى...من قالك ماعاد لك مكان هنا...
شذى تتكلم وتحس الكلام طالع من قلبها:ياعمتي..لا تجاملوني بالكلام.. أنا حياتي وقفت هنا مع تركي..اللي اصلا ماعاد أقدر اكمل حياتي معه..وحتى هو ماخذ بنت عمه..بروح مع اهلي..لأني واثقه مالي مكان إلا معهم...
حصه تمت تناظر شذى فتره وبعدها قالت لها:كلامك كله غلط ياشذى...
شذى:بالعكس هو عين الصح...وين اروح ياعمتي..ولد اخوك لو يراضيني من اليوم لبكره مستحيل ارضى عليه لأسباب كثيره...
حصه تحط يدها على خدها:طيب قولي وش هي؟؟؟...
شذى:اشياء كثيره...
حصه وهي مثل ماهي عليه:طيب قولي واحد منها بس...
شذى وهي ترفع حاجب وتنزل الثاني:اولا زواجه من بنت عمه...أصلا انا كنت داريه إنه بيرجع لها..أتوقع هالسبب بكفه والأسباب الثانيه بكفه ثانيه وش على باله انا راضيه بكذا..مستحيل اقعد على نار واحد متزوج غيري..
حصه:شذى الله يهداك وش هالكلام؟..ألحين على بالي إنك ماراح تكونين انانيه بس تفكرين بنفسك..طيب مافكرتي بولدك؟كيف بيعيش من دون اب؟..
شذى والعبره خانقتها:ياعمتي..عمري ماكنت انانيه..بس قولي وش اسوي؟؟ انا احس إني اموت باللحظه الف مره بس لمن أعرف إنه معها...والله ماني قويه لدرجة إني اشوف زوجي يروح لغيري وانا ساكته...ما اعرف...
حصه:طيب شوفي انا زوجي أبو فيصل..متزوجني ومتزوج وحده ثانيه غيري...بس عايشه عادي...
شذى:بس أنا ما أقدر...والله ما اعرف ما أتحمل...تكفين عمتي لا تضغطين علي...أنا برجع لأهلي وماعاد لي قعده هنا..
حصه:ليه؟؟؟..وولدك..شذى إنتي الحين ام..يعني لازم تفكرين بولدك قبل نفسك...
شذى:ولدي مكانه مع أمه...ومادام ابوه ما قدر أمه وش له يقعد معه...
حصه بنفسها ياربي وش كثر هي عنيده صدق ماكذب تركي لمن قال إن راسها يابس...
حصه:مافيه أحسن من ولد يعيش بين امه وابوه...بعدين ياشذى والله إن تركي شاريك..ويحبك موت وعمري ماشفت تركي يحب هالكثر...
سكتت شذى وتمت تناظرها وبعيونها دموع تلمع...
حصه وهي تشد على يدها:لا تتهورين وتروحين مع اهلك وتخلين تركي صدقيني لمن بتبعدين عنه مع الأيام حبه لك بيتبخر... المره صدق يمكن تحب رجل واحد طول عمرها وحتى لو يكون ميت..بس الرجل غير...
شذى ماقدرت تتكمل بعدها انفجرت بنوبة بكاء طويله...وكانت تشهق بين بكائها...كان بكاء حار من القلب بان عليها وش كثر كانت مخبيه بقلبها...
شذى وهي تصيح:والله خلاص ماعادني قادره أتحمل...أحس كثر ماني مجروحه وكرامتي مهدوره...أحس كثر ماني حيبته ولاني قادره أستغني عنه...
حست حصه إنها حطت يدها على الجرح...ووصلت للي تبيه...
حصه بحنان:شذى حبيبتي..صدقيني محد بيتضرر من قرارك غيرك أنتي وولدك..فكري زين ياشذى ووالله صدقيني أشوف قعدتك ببيت رجلك أحسن الف مره من روحتك مع اهلك وصدقيني الايام بتثبت لك كلامي...
سكتت شذى وقعدت تصيح كانت محتاره...وتحس بتوتر شديد خلاص تحس إنه أزف الفراااق؟؟؟...