منتديات قصايد ليل - عرض مشاركة واحدة

10-12-2010

كانت الساعه وحده بالليل وتو سعود راجع البيت وهو مهوب طايق يشوف أحد....
كان يفكر في كلام سلطان صديقه،مو معقول اللي يقوله...كل هذا صار لسلطان وأنا ما ادري...((ونعم الخوي والله انا له)) كان كذا يقول عن نفسه
باستهزاء وسخريه...لأن كان لسلطان معزه خاصه بقلب سعود،،،
شذى كانت قاعده مع أمها ام محمد بالصاله يسولفون وسمرانين وماخذين راحتهم لأن مريم ماكانت موجودة،ويدخل سعود بهاللحظه
وقعد يناظر أمه وأخته شذى...
ام محمد:هلا والله بسعود...وينك للحين؟؟؟....
شذى بلقافه:وين يعني...معزوم كالعادة...الأخ مشالله بزنس مان مهوب فاضي...
سعودبعصبيه:جب زين تتطنزين مع هالخشه...
ام محمد:بسم الله عليك وش فيك كذا معصب،أختك تمزح ماقالت شي...
سعود وهو داخل غرفته وماله نفس يطالع بوجه احد:تصبحون على خير...
ودخل وام محمد تطالع بنتها شذى بإستغراب...
ام محمد:وش فيه سعود معصب وزعلان كذا؟؟؟....
شذى:والله ما أدري عنه...أكيد ألحين متهاوش ولا زعلان مع واحد من شلة المحبه أصدقاه...
ام محمد سكتت وماعلقت على كلام شذى اللي تتطنز فيه على أخوها....
قعدت تفكر في سعود إيش فيه،،،دايما ولو يكون زعلان ما يدخل بهالطريقه دائما يسلم ويبتسم لها....

*******

وفي الكليه الصباح....
ريم: شذى قومي يللا خلينا نروح الكفتيريا أنا جايعه موووت...
شذى وهي تطالع ريم:أنتي هيه يالهبله،تراك انتفختي هاليومين،بسك أكل...
ريم بدهشه:حرااام عليك،أنا متنت...ولا تقولين هالكلام عشان إنك أضعف مني وجسمك أحلى مني...
شذى بغرور:من ناحية الجسم لا تتكلمين ولا تقارين نفسك فيني،بس من جد يا ريم أحس إنك زايده كم كيلو....
ريم:لا ما أتوقع إني زايده يا حلوة،يمكن تظنين كذا لأني القميص اللي لابسته الأبيض هذا مقلم بالوردي بالعرض فصاير مزودني كم كيلو...
شذى:على بالك ما أشوف،بس ولو أحسك زايده كم كيلو خففي ياشيخه مو كل ماتحسين إنك جايعه تروحين ركض تاكلين...
ريم وهي تقوم:اقول اذلفي عن وجهي والله بروح أشتري لي فطيرة مع بيبسي...
شذى تقاطعها:بيبسي لا يا الهبله يساعد على السمنه...تو جسمك يحلو هالسنه ترجعين تخربينه...
ريم بلا مبالاه: شذى أنتي ووجهك لاتسوي لي فيها أخصائية تغذيه ويعني إنك فاهمه ترى كلنا ندري ،بس أنا اقاطع الدنيا كلها إلا البيبسي
شذى:براحتك...بس هاه تراني بروح للشله تلقيني عندهم...
ريم وهي رايحه: وانا بروح مع ضحى ورفيقتها ينتظروني هناك...
شذى قامت وتطالع ساعتها باقي على المحاظرة الثانيه ساعه إلا ربع...وهي سنه ثانيه ملت من الدراسه،بس يلله مابقى إلا سنتين هانت كانت
كذا شذى تواسي عمرها خاصه إنها مو رتاحه مرة للقسم اللي هي فيه((لغه عربيه)) بس دخلت عشان أغلب شلتها فيه....
وهي ماشيه دقت جوال على أمل...
أمل:هلا والله بهالصوت....
شذى بضحكه:هلا بالمهلي هلا...
أمل:وينك من زمان عن هالصوت،أول ماشفت اسمك بشاشة الجوال ماصدقت...
شذى:ليه حرام عليك،والله إني دايم اسأل عنك...حتى إني الحين داقه أسال وينك ودي اقعد معك انتي والبنات...
أمل بفرح:والله؟ حياك إحنا في مكانا القديم لا تغير ولا شي .....عاد أبيك تقولين لنا بالتفصيل اللي يجيب السكته عن خطبتك...
شذى بضحكه:أووووه منكم يا البنات تبون تعرفون كل شي... يلا سي يو...أنا جايتكم...
وسكرت شذى وكان مكان شلتهم شوي بعيد...
وشذى ماشيه حست بعيون تراقبها فخاطرها(وبعدين مع هالمعجبات)<<<البنت واااثقه...
كانت اللي تطالعها عبير،حست شذى بعد كذا إنها عبير: ياربي على الإحراج والله فشله أروح أسلم عليها بس أخاف تظن إني فرحانه بولد
أختها أو أطنش بس بعد فشيله مو من الذوق اطنش...وبالذات عبير...
وبعد مد وجزر وتفكير قررت الخيار الثاني اللي هو تطنش ولا كأنها شافتها او لمحتها....
كانت عبير تطالع شذى ومنبهرة منها... البنت هذي تحبها حييييل ودخلت قلبها من أول ما شافتها...
كانت شذى لابسه تنورة جينز ميدي فوق الكعب بشوي والجينز كان شوي باهت لونه،مع تي شيرت أورانج روعه من زارا وجزمه سبورت
من نايك لونها سماوي مع جوارب برتقاليه قصيرة، وشعرها كان مرفوع بطريقه مهمله مع خصل مجعده نازله من على ألاطراف وعلى وجهها
وكان مكياجها ناعم وحلو غلوس اورانج مائي مع بلاش اورانج كانت حاطته بطريقه دائريه أبزرت فيه حلاوة خدودها المدورة طبعا مع
الكحل العربي اللي داعجه عيونها فيه بطريقه جذابه ولابسه عدسات بحريه وطالع شكلها روووووعه...
عبير بهاللحظه خطر على بالها تدق على تركي...وبالفعل دقت عليه...
تركي:هلا والله...
عبير بابتسامه:هلا بولد أختي هلا بالعريس ...
تركي وهو يكلم اللي عنده:خلاص أنتوا اطلعوا وبعد شوي بلحقكم...
عبير:تكلمني؟؟؟...
تركي:لا أبد اكلم اللي عندي...
عبير: تركي...خف على الجنود شوي أحس إنك جلف وجاف معهم...
تركي بجديه:شوفي حبيبتي العسكريه كذا شده وغلظه ما فيها يمه ارحميني،هذي يا حلوة تعرفين وش يسمونها؟؟؟..
عبير:وش يسمونها؟؟؟...
تركي بثقه:هذي مصنع الرجال،هذي الشده والقوة...
عبير تغير السالفه:ماعلينا أنا مادقيت عشان كذا،بس بغيت اقولك إن شذى هذي هي قدامي...
تركي:والله؟؟...
عبير:إي والله هذي هي ماره من عندي قبل شوي تهبل لابسه اورانج طالعه قمر...
تركي:أكيد...بس سؤال طالعه مغرورة هي او لأ؟؟؟..
عبير:شي مهوب هين شذى...ماتعطي أحد وجه، تصدق قبل شوي مرت من جنبي ولا طالعتني...
تركي:ياويلي على هالغرور...كل هذا كبر فيها...
عبير:لااا...بس أكيد ما انتبهت لي...ولا هي اول كل تلمحني تجي تسلم علي...بس بغيت أخبرك فيها...
تركي:ياحبي لها تهبل...تدرين أبيك توصفين لي شكلها يا عبير...
عبير:اوصفلك شكلها...((وتقلد المصريين))ده بعدك...
تركي بعصبيه:أجل ليه داقه علي أنتي ووجهك؟؟؟....
عبير:كذا...تقدر تقول عبط...
تركي:اوكيه عبير بس مارح انساها لك...تدقين على كذا تبين تشوقني بس...
عبير:وانا تراني...
يقاطعها تركي:خلاص خلاص درينا إنك عبير يلا باي عندي شغل وتدريب وأنتي معطلتني...
عبير:زين يا تركي مسوي لي فيها شخصيه مهمه...
تركي ضحك من خالته اللي يعزها: إي شخصيه مهمه عندك مانع؟؟؟...
عبير من غير نفس: بااااي...
تركي:بايات....
وبعد ما سكرت من تركي تنهدت فخاطرها تقول((يا حبي لهالتركي على غروره وثقتهة الزايده بس حبيب))...

وبعد هذا اليوم بيومين دق ابو محمد على ابو بندر يبلغه موافقتهم وإنه يشرفهم مناسبتهم والزواج منهم...
ابو بندر لتركي:أبشر بعزك يا تركي اهل العروس وافقوا...
تركي:والله ...الله يبشرك بالخير...
ابو بندر:الصراحه توقعت ردة فعلك أكبر من كذا...
تركي:بس انا كنت واثق إنهم بيوافقون...
ابو بندر:تركي...ترى الغرور مهوب زين...
تركي بجديه:المسأله مهيب غرور يابو بندر قد ماهي ثقه بنفسي وبمكانتي وإني ما انرد...
ابو بندر:ما اقول غير الله يصلحك يا تركي...
تركي:آمين....
ابو بندر: اجل إستعد الاسبوع الجاي نروح الشرقيه ونتفق معهم على كل شي...
تركي بحماس:اللي تامر به يا يباه...
ويدق جوال تركي...
تركي: هلا بمتعب...
متعب: وين الوالد دق على جواله مغلق...
تركي وهو يناظر أبوه:الناس تسلم بالأول...وبعدين هذا هو أبوي عندي...
متعب:عطني ابوي باكلمه...
تركي يمد لجوال لأبوه...
تركي:يباه هذا متعب...
ابو بندر يكلم متعب:هلا بمتعب وينك...
متعب:هلا فيك يباه،بس وينك الله يهداك أدق على جوالك مقفل...
ابو بندر:إيه صح نسيته قفلته بالصلاه وماتذكرت افتحه ،ليه خير إنشالله...
متعب:ماعلينا،بس بغيت أقول لك الأرض اللي عندك بالروضه بيعها لأني لقيت لها مشتري اللي وصيتني عليها...
ابو بندر:زين الله يبشرك...وبيدفع قيمتها؟؟؟...
متعب:أفا عليك بس والسعر اللي حددناه وفوق اللي شرطته لي...
ابو بندر:اقول متعب أهل عروسة تركي ردوا علينا إنهم موافقين ...
متعب فرحان لأخوه:مبروك والله يستاهل تركي...
ابو بندر:الاسبوع الجاي بنروح لهم عشان نتفق معهم على كل شي...
متعب:زين والله..
ابو بندر:عاد قلت تخاوينا؟؟؟...
متعب:أفا عليك بس أكيد بروح معكم...
ابو بندر:أجل يله ما اطول عليك...في حفظ الرحمن...
متعب:في حفظ الله يا الغالي...
وسكر متعب من ابوه...
ابو بندر:متعب اخوك بيخاوينا لأهل عروسك...
تركي بابتسامه:عز الخوي والله متعب....

وهو بسيارته راجع البيت فكر بشذى..(والله مسكينه لها أسبوع وهي تبيني أخذها للسوق)..فكر باقي على بال مايوصل للبيت ربع ساعه
ويمكن أكثر من هالزحمه اللي بالشوارع خاصه إن الوقت عشا...
أخذ الجوال اللي كان حاطه بجنبه ويبي يدق عليها طالع الساعه بالجوال ماكان باقي على صلاة العشا شي وأخذ يتأكد من ساعة يده
إلا يسمع الآذان بكل مكان بدت المساجد تأذن ويطالع المحلات بعد هي بدت تسكر وتغلق أبوابها إلى بعد الصلاه(الأسواق بالسعوديه تسكر بوقت الصلاة)...
فكر وقال((بعد الصلاة أمر عليها،وخلني أدق عليها من ألحين تتجهز مو تتركني ساعه أنتظرها))...
دق على تليفون البيت...
ريم بنت محمد بصوت طفولي:ألو...
سعود:ألو هلا ريم...
ريم بتعجب:مين على التليفون...
سعود بضيق:أنا عم سعود...
ريم بفرحة الأطفال:عم ثعود...أنا أحبك...
سعود بضيق أكثر:ثعود بعد غيرتي اسمي.....وأنا بعد أحبك...وين شذى؟؟
ريم:من زمان ماثفتك...انا أحبك مرررره...
سعود وهو مهوب طايق لفلسفة الأطفال:ريم حبيبتي نادي لي شذى بسررررعه عشان أعطيك حلاوة كبر راسك...
ريم مستغربه:فيه حلاوة كبر راسي؟؟؟...
طووط...طووط...طووط....
قفل الخط سعود التليفون ودق على جوال شذى...
سعود يكلم نفسه:وش هالذكاء كان دقيت من البدايه على جوالها بدل زحمة البزارين هذي ...
شذى:إنت هيه تكلم نفسك؟؟؟...
سعود متفاجأ:إنتي من متى على الخط؟؟؟...
شذى:من أول ما دقيت...
سعود:بسم الله منك امداك تردين يوم سمعتيه يدق...
شذى:لأنه كان معي اقرا مسج توه جاي وإنت طلعت لي والعياذ بالله...
سعود:هذا جزاي تقولين كذا وأنا الحين داق عليك عشان تتجهزين بعد الصلاة آخذك للسوق...
شذى بفرح:والله؟؟ ياحياتي ياسعود آسفه وهذي كلمتي وسحبتها...
سعود :شوفي هذا أنا سامحتك،بعد الصلاة مباشرة ألاقيك مخلصه من ألحين استعدي وجهزي حالك...
شذى بابتسامه:طياره...
سعود:تشاو...
شذى:بايو...
بعد ما صكرت من سعود...((واااااااو وأخيرا ما بغى ياخذني السوق...بس غريبه هو يدق بنفسه ويعرض السوق علي من دون طلب او واسطة امي))
وبعدها قالت بخاطرها...((وأنا وش دخلني من نفسه او غيره خلني اروح ألبس واستعد...بس لا يهون))....
وبعدها راحت تلبس وتستعد وخلصت بسرعه...وبعد كذ صلت العشا، ونزلت بالصاله تنتظر اخوها وهي لابسه عبايتها ومتجهزة بس تنتظر
يدق عليها جوال وتطلع له....