منتديات قصايد ليل - عرض مشاركة واحدة

10-12-2010

كانت الساعه تدق على الواحده ظهرا....
كانت شذى قاعده بالصاله اللي بالطابق الثاني ببيتهم وتطالع التي في وحاطه على مسلسل مصري تابعه، وهي بنفس الوقت سرحانه
بعالم ثاني ولا هي حاسه باللي حواليها....
شذى بخاطرها تفكر بصالح ولد صديقة امها فوزيه اللي كانت بينهم قصة حب ملتهبه بس المشكله كانت إنها من طرف واحد بس اللي
هو من طرف شذى، كان صالح هذا رفيق وصديق الطفوله بالنسبه لشذى، صدق ما كان حلو بس هو في نظرها انسان مافيه احلى و
املح منه، صالح أكبر من شذى بسنتين كان ولد مشكلجي وصاحب هواش وفزعات وكانو كل الأولاد اللي بسنه يخافون منه وهو وحيد
امه وابوه ومع هذا ماكان دلعهم مأثر فيه وكان يعتبر شذى مثل أخته لأن ماعنده اخوات...صالح كان ماخذ عقل شذى من أيام
الطفوله إلى أيام الصبا...كان في نظرها الحبيب والصديق...بس اللي صدمها لما عرفت إنه ينظر لها كأخت وليس كحبيبه...كانت
تشوف إنه شريك حياتها المستقبليه وإيش أحلى من حياه تقضيها مع صالح...بس اللي جرحها زياده هو لمن قالت أمه فوزيه صديقة
ام محمد إنه مايفكر يتزوج بوحده غير ببنت خاله...ولحظتها عرفت إنه حتى ما يفكر فيها وبكت على حظها الي خلها تحبه
وتعرفه...وحاولت تتنسى حبها الأولاني، وقعدت تفكر بتركي اللي شاغل هو تفكيرها ألحين و حياتها معه إذا بتتزوجه...وكيف
رح تقدر تعيش بعيد عن أهلها وتصير متزوجه وتترك عالم البنات و أحلامهم وتدخل الحياة الزوجيه.......
وهي قاعده سرحانه ما تحس إلا بصوت أفلام الكرتون على سبيس تون وتطالع إلا بنات محمد ريم ورنا يطالعون التلفزيون....
شذى: من غير القناة وحط على سبيس تون؟؟؟......
ريم:ماما....
شذى: وبعدين مع امكم...ماتشوفيني قاعد اتابع التلفزيون تجي تغير القناة....
وتدخل مريم بهاللحظة وسمعت كلام شذى....
مريم: اولا المسلسل هذا اللي كنت تابعينه انتهى...وشفتك بوادي ثاني والبنات ازعجوني قلت اشغلهم بالتلفزيون ويفكوني...
شذى:اوكيه خلاص...وين محمد؟؟؟....
مريم: راح المطار من قبل نص ساعه لأن عنده رحله لدبي....
شذى:يرجع بالسلامه إن شالله....
مريم:ليه بغتي منه شي؟....
شذى تبي تقهرها:سالفه خاصه بيني وبينه....
وقامت شذى من الصاله ونزلت تقعد مع ابوها بالطابق اللي تحت، وهي ماكان عندها لا سالفه محمد ولا شي بس كانت تبي تقهر
مريم لأنها فضوليه....

بالرياض ببيت ابو بندر......

وبعد ماقام الكل من الغدا....
فاطمه لأبوها: مشالله عليك يباه رحت خفيف انت وتركي ورجعتوا خفاف....
ابو بندر: إيه يا بنتي كذا أحسن و أفضل في امور مثل كذا.....
فاطمه: بس ما كأنكم استعجلتو شوي بالروحه...كان سألتوا عن البنت زياده وعن اهلها...
و خزها تركي بقوة على كلامها...
فاطمه تكمل: أنا قلت شي غلط يا تركي؟؟؟....
تركي:إيه لأن خلاص خطبنا وقضينا....فكلامك هذا ماله داعي...
عصبت فاطمه من كلامه: تركي...انا ماقلت كذا إلا عشان مصلحتك......
تركي:اقول كلامك مامنه فايده....فعشان كذا ياليت تسكرين هالسيرة....
فاطمه بعصبيه: تراني اختك....ومصلحتك تهمني...وأنا ماقلت كذا إلا عشان بعدين ماتتحسف او تقول إنك استعجلت...
تركي:آسف يافاطمه ولا تزعلين...وإعرفي إنك عزيزة وغاليه بس هالكلام من جد مامنه فايده....
يتدخل متعب:بس أما يا تركي شذيت عن القاعده وأخذت وحده من برا العايله.....
فارس:وانت صادق...الصراحه ياعم تركي...أنا معك في إن إحنا نضخ دماء جديدة في العائله ونغير شوي وناخذ من برا...
وقعد الكل يضحك من كلام فارس ولد بندر....
تركي بابتسامه: سمعت يا فاطمه هذا الكلام ولا بلاش.....
متعب بمزح: مافيه ...فارس ياخذ بنت عمه نجود اللي هي بنتي....
ابو فارس بندر: عزالله كدينا خير إذا بزوج بنتك ولدي...بنتك هذيك ولد اعوذ بالله مو بنت قشرا ومفترسه...
متعب وهو يمدح بنته:أقول لا يغركم مظهرها من برا تراها كلها نعووومه ورقه...
ابو بندر: ما علينا ألحين من انجود المهم....ترى إذا تركي بياخذ بنت ابو محمد بتصير الخطوبه بعيد الأضحى والزواج بالصيف..
ابو فارس: مشالله يباه اتفقتوا بعد على كل شي....كان جبتوا البنت معكم مرة وحده...
تركي:بندر اقول اترك عنك الطنازة انت ووجهك....ابوي نفسه بكذا.... الخطبه بعد شهرين بعيد الأضحى والزواج بالصيف...
متعب:أنا اقول بعد كذا أحسن...إذا ردوا بجواب اهل العروس اتفقوا معهم على كذا...
تركي وهو يناظر اخته فاطمه اللي حس إن الكلام مو عاجبها: وش رايك يا فاطمه براي ابوي؟؟؟....
فاطمه من غير نفس:وش لي كلام وراي من بعد كلام ابوي...اللي يبيه ابو بندر يصير.....
ابو بندر:بارك الله فيك يافاطمه وانا دايم اقول ماحد في الحريم مثل فاطمه......
تركي بابتسامه خبيثه:اقول فاطمه....وين ناصر عن الكلام هذا والمدح عشان يسمعه....
فاطمه بثقه: تطمن ناصر يعرف مكانتي زين.....

.................................................. ...............................................

سارا:هاه بشاير وش قال تركي عن العروس لمن شافها؟؟؟.....
بشاير: تركي هذا لعين يوم سألته عن شكلها وأوصافها ما جاوب علي طنشني وقال لي باختصار إنها حلوة وعاجبته....
سارا:اسمع خالتي ام بندر تقول إن عبير هي اللي دلتكم عليها وإنها مستخفه على البنت وهي اللي قعدت ورى تركي لين خطبها...
بشاير:إيه صادقه امي...بس تركي بعد يوم راح دورته العسكريه اللي بالشرقيه شاف اخوها وتعرف عليه عن طريق زميل له....
سارا بتعجب: سبحان الله...صدفه خير من ألف ميعاد...
بشاير: فاطمه اختي مهوب راضيه....وكانت تبي لتركي سلمى بنت عمي اخت عايشه مرة بندر اخوي....
سارا: لا وش يبي بسلمى...سلمى ألحين بالأردن مع اخوها تكمل دراستها بالكيميا وتبي تصير ياحظي دكتوره فيها...
بشاير: بيني وبينك أحسن خل تذلف سلمى ما أطيقها ولا أحبها....مغرورة بعمرها ودراستها خليهم ينفعونها....
سارا:لا تقولين كذا هذي بنت عمك.....
بشاير: روحي زين...أصلا هي ترد المعاريس من زمان عشان حجة هالدراسه والقرف حقها....
سارا: بس بيرجعون بعد سنه وهي مشالله عليها بتصير الدكتورة سلمى...يعني هي مهوب هينه...
بشاير: ما علينا من هالسلمى....تدرين عن مرة تركي اسمها شذى؟؟؟....
سارا:إيه اعرف تو خالتي ام بندر قالت لي....اسمها ناعم ودلوع....
بشاير قعدت تضحك من سارا....
سارا: ممكن اعرف وش اللي قلته يضحك....
بشاير بضحكه: وش دلوع؟؟؟....اول مره بحياتي اشوف اسم دلوع....
سارا بابتسامه: وانتي انشالله تقعدين تعلقين على كل كلمه اقول لها....انا اقصد إنه اسم دلع...
وهنا دخلت عليهم عايشه مرة بندر وسكتوا....
عايشه لبشاير: مبروك يا بشاير على خطبة تركي....
بشاير:الله يبارك فيك...وعقبال ولدك فارس...
عايشه:آمين....
وقعدوا يسولفون سارا وبشاير وعايشه بمواضيع ثانيه ....عشان عايشه أخت سلمى معروف إنها كانت تتمنى إن اختها تتزوج تركي
بس الأمور سارت عكس هواها وهذا الشي قهرها....