منتديات قصايد ليل - عرض مشاركة واحدة

10-11-2010

حمد :أمايا أي عرب عادي إنقليز..
أم سالم:أص.أقطع أنت..
يلست موزه تظحك عليه عشان هزبتة يدتة: وأنتى شله تظحكين ...يعلج تظحكين بلا ظروس.
عاد الحين ظحك حمد عليها ولا رام يسكت..وهى تثور من الغيظ...
أم سالم:حرام إن شفتكن مرة ثانية تربع لأظربكن ولا علية من أهلكن..مسودات ويه.. عنبوه غدينا زطيات......وخلن أشوف أمهاتكن ما هزبتهن..
سلامى:آسفين أميا ثانى مرة ما منركض..
أم سالم:قصوركن إلا تربع مرة ثانية لأنفدكن...
موزه:إن شاء الله أمايا آسفين السموووووحة...ويبن إيسيرن..
أم سالم:سلامى سيري عند بنات عمج ..وأنتى أم لسانين تعالى عندي ...
موزه فجن عيونها..أفف..يعنى لازم أيلس ويا حمد...؟؟؟ ..حمد يطالعها بنظرة يقول فيها بتيلسين وياي ..ههههههه..وحليلج هزبوج.. يلست يدتهم تسولف ويا حمد وموزه ساكتة بس تسمع ويالس تدعى على سلامى كل هذا من تحت راسها..
مى:ههههههههه..بعض الناس هزبوهم..
سلامى:والله أن ما سكتى لأصفعج..
مى :ههههههه..بخبر عليج أمايا شيخة..
سلامى تقلد صوت مى:بخبر عليج أمايا شيخة..
نورة:بس أنت شو فيكن تتحاكن تقول يهال...أصطلبن..
سلامى:ما عليه يا موزه ما رديتها..بتشوين...
الساعة 11:35 الصبح..
ووصلو الحديقة....وسارت يدتهم وقالت لحمد أنها تبى تيلس تحت هاي الشيرة بعيد عن الناس عشان ما دانى تيلس عدال الأجانب..وفرشت خديجة ويلس يدتهم ويا حمد وموزه.. أما البنات ما يبن إيلسن ويا يدتهم ويبن إشوفن العيال يوم يلعبون ويلاعبون شموه وسارة فيلسن شوي بعيد عن الألعاب فسارن شو بعيد هن وأمهاتهن..وشباب ويا عمهم سارو شو داخل في الحديقة يتمشون ما يريدون إيلسون..
يلست موزه ويا حمد ويدتها وهى ما تبى تيلس وياهم..تبى تروح تلعب ويا قوم سلامى بس يدتها ما خلتها..عشان ما تضارب ويا سلامى..وهى تتحرطم على سلامى وبعدين رضت بأمر الواقع ويلس وياهم وسولف..بس مش وايد عشان أونها زعلانة من حمد.. وحمد ويا يدته يالسين يتقهويون...
أم سالم وتمسح على شعر حمد إلى مخلى راسه على ريولها:هاه حمد ويت قصيدتك..ما سمعتنى إياها..
حمد إبتسم ويطالع موزه..لأنها هي إلى مجابلتنة..وهى ما عاطتنة ويه: الحين تبينها أمايا؟؟
أم سالم:نعاااام...
حمد:فالج طيب....وعدل يلستة..الله يسلمج تقول القصيدة..وهو يعد القصيدة يطالع موزه وموزه كل شوي تتلفت يمين يسار عشان عيونها ما إتى ويا عيونة..
يوم شفتك قلبي ارتاح....يا عزيز النفس يا الغالي
مالي على فرقاكم يواح...والقلب عنكم هوب سالي
انته نظير العين يا صاح..لا تلومني في عد الامثالي
وين ذاك الوقت لي راح..بينى وبينك باعتدالي
شوفتكشفانى وقلبي ارتاح..ودوم طرواكم على بالي
يا كم قلبي في الهوى راح..مصطاب من حلو الدلالي
وللي يحب الزين سماح..يسمح بروحه والحلالي
هذا المثل والكل يرتاح..وتعيش في دنياك سالي
ولا تستوي يا زين شحاح..وساير خوييك باعتدالي
وتم جيلي عد ما باح..منى أنا بعد الامثالي
وسلامتكم....
أم سالم:الله يسلمك.. غاويه قصيدك إلا حق منو هاي؟؟
حمد :حد وحدة غرشوب..
أم سالم:يا لله بستر ..وشعنة ما قلتلى عشان أخطبها لك..
حمد:ههههههه...لا أي غرشوب مب حق حد..
أم سالم:يا المكر لا حق حد قول لمنو؟؟
حمد:هههههه...ماحد ..
ويلست موزه ساكتة..حق منو هاي كاتبنها؟؟..معقوله يحب وحدة؟؟..بس وين يحب.. جان تذكر أنة بس هذا الأسبوع ما بكون وياهم..جان تسكت ولا تكلمت.ودموعها في عيونها..حراااااام ليش يا حمد؟؟كل يوم اتعلق فيك أكثر من اليوم إلى بعده..لا تروح عنها..وبعدين يه سعيد يكلم يدتة ويلس يقولها شىء ويوم كان يكلمها..
حمد بصوت واطى عن تسمعة يدتة:أيه أنتى ليش ما تتكلمين؟؟
موزه :............
حمد:من زمان ما سمعت شىء من إبداعاتج الشعرية..
موزه نزلن دموعها دموع حزن ودموع لفراق الإنسان إلى تكابر عشانه وعشان ما يلاحظ هذا الشىء.. بس هو ما شافها لأن سعيد سار عن ويدتة كلمتة ..
حمد:ها أمايا شو يباج سعيد؟؟
أم سالم:يشوفنى متى أبا أرد...
حمد:هاه أمايا شو متى تبين تردين ولا ما عيبتج اليلسة؟؟
أم سالم:لا حلوة اليلسة وجوهم حلوة.بس قتلة ما منبطى..ورانا صلاة ظهر
موزه يالسة وطالع الناس وتسمع يدتها ويا حمد يوم يسولفون ويظحكون وهى أونها .. يالسة ترسم عشان ما يلاحظونها..وبعدين كل أفكارها لحمد وهذا الأمر غصبا عنها وأنة هذا الأسبوع بس إلى بيلس وياهم وهى تطالع كيف يظحك ويسولف..والله حرام ليش جيه ويوم تحسة أنه يطالعها تنزل عيونها عشان ما يلاحظ أنها تصيح ودموعها خاننها ونزلن..وبعد هاي المرة ما شافها..وبعدين قامت تكتب قصيدة..عشان لمنو بتشكى الحال غير لقلمها ودفترها...آآه يا دنيا كيف تظلمين الإنسان..وكتبت..
قال لى وينـــــــــك وين حرفك والقصيد..جيت اجـــــاوب عن سؤاله واسبقتنى دمعتي
جيت بمسحها ولكن سال دمعي من جديد..وما قدرت اكـــتم دموعي يوم تاهت صرختي
وحار فكري في مصابي وضاع منطوقي السعيد..والــــــحزن حل وتمكن في حنايا دنيتي
آه ويلى من عذابي لان به حتى الحديد ..ضـــــــــاقت الدنيا بعيني واخنقتني عبرتي
من بشاكي في همومي غير خلاق العبيد..الله العــــــــــــالم بحالي يوم قفت فرحتي
من نشدني من عربية قلت مستانس سعيد..واظحك بوجه المصاعب واخفي همي بضحكتي
والحزن نوخ ركابه وصار محبوبي الوحيد..وين اهــــــــرب من همومي والمسافة وحدتي
جمرة داخل فوادي وبه لهايب تستقيد..لو تناست الــــــــــــــمآسي ذكرتني حيرتي
والليالي سرمديه والفجر نوره بعيد..وانعدم طفل الســــــــــــــــــعاده في مشاهد قصتي
ياللي تسأل وين حرفي ذا جوابي في القصيد واحتسب امري لـــــــــربي هو عليم بشكوتي
وسكرت الدفتر وتنفست بعمق حتى حمد لاحظها ولاحظ خشمها أحمر وشكلها كانت تصيح..وبعدين يوم شافتة يطالعها نزلت عيونها..ليش تصيح؟؟..أنا ما قتلها شىء.. بعدين..
موزه:أمايا شيخة بسير عند أمايا..
أم سالم:برايج بس هب تضاربين ويا سلامى..
موزه إبتسمت ومن التوتر أن حمد يطالعها ..نست تشل الدفتر..وسارت..سار حمد يوم شافها وشل الدفتر عشان يعرف شو كتبت لأن إللى فيها بتكتبه في الدفتر وهو مستهم منها ليش كانت تصيح..
سلامى:هلا والله بلى يانا..جان ما يتى؟؟
موزه:مب منى أمايا شيخة ما خلتنى وقالتلى لا ضارب وياج..عشان جيه بسويلج طاااف..
أم حمدان:موزه بس شو بلاج ويا بنت عمج؟؟
موزه:أمايا هى بادية..مب أنا..
أم سعيد:قومن سيرن تمشن فكنا من حشرتكن أكيه مى ونورة يلاعبن خواتكن سيرن وياهن..
وقامت سلامى وموزه..يتمشن في الحديقة..
سلامى:ما عليه مسودة الويه..
موزه:يا ويل حالى شو سويت؟؟
سلامى:سلامتج..
موزه:أوكية خلاص آآآآآسفة..
سلامى:خيبتج آسفة..
موزه:أوكية ..سوي طاف..
سلامى:عشان أمايا بس..ولا أنتى ما تستاهلين..
ويلسن يتمشن وشافن البحيرة فيها عيال يلعبون لأانها مثلجة يالسن يتزلجن.
موزه:لو دريت يبت جوتية وياية..
سلامى:هههههههه..عشان أمايا شيخة تمحيج من الوجود..
موزه:عادي أبويا ما يقول شىء ولا أمايا..
سلامى:أهلج..بس أمايا شيخة ما عندها هالسوالف..
موزه:إنزين خلينا نمشي..
سلامى:ما عندنا جواتى..
موزه:عادي بس منمشي شوي ومنظهر..
وسارن يمشن ...فوق الثلج....واليهال ويا أهلهم يزلجون...وكل شىء سلامى تتمسكن بموزه عن تطيح ويظحكن..
سعيد:أييييييييييه المخبل يوم ما عندكن جواتي شو مسيرنكن هناك؟؟
موزه: أنت شولك؟؟
محمد: أيييييييييييه ظهرن لا أقول حق أمايا شيخة تظهركن...
سعيد: محمد ما أتخيل أمايا سايره وراهن تربع وهى ماسكة العصا تبا تظربهن..
محمد: ههههههههه..تخيل لو تطيح......؟؟؟؟
سلامى: ما علية بخبرها.......
حمدان: موزه تعالى لا سيرين هناك بعيد تعالى....
موزه بدلع: حمداااااااااني شو بس ...والله من زمان ما تزلجت..
سلطان: يوم بطيحن لا صيحن ..وبعدين ما فينا على المستشفيات..
سلامي: شو تتحسبون أول مرة نزلج نحن من زمان نزلج من كلنا صغار..
سعيد: ظهرن فشلتونا الله يفشلكن..حد يزلج بجواتيه ؟؟يوم تبن هاتن جواتيكن وياكن..
سلامى:أنتو ليش مخلين دوبكن ودوبنا ..يا خي سيرو عنا الحديقة كم كبرها....
حمدان :موزه ...بسج ظهري..
موزه:حمدااااااان حرام شوي بعد..
وبعدين تغير الجو شكلة بي مطر..فنزل أول شىء رذاذ..فمن شافت موزه الرذاذ تمت تناقز ..فرحانة هى وسلامى..وتمو يظحكون عليهم ..
سعيد:إيه المخبل بسكن من الخبال ..أول مرة تشوفنه..
سلامى:يااااااااااااي..حلو شكلة..شوف كل اليهال مستانسين..
موزه ما أنتبهت إلا أن الثلج إلى تحت ريولها تكسر وطاحت وخاست ماي ويربع عليها حمدان وسلطان يشلونها..وكانت خايسة ماي..ويلست تصيح من البرد وريلها عورتها..كلهم زاغو ..لا يكون شىء ياها..بس الحمد لله ما ياها شىء سار سلطان محمد إييبون سياريرهم عشان الجو بارد والمطر بدى يزيد وموزه خاست ماي لين ما توصل البيت بتموت من البرد وبتمرض..من شافت أمها حمدان يقود موزه وهى متخيسة من الماي خافت ..لايكون شىء ياها..
أم حمدان:شو ياج؟؟
حمدان:ماشىء مشول أقولها لا سيرين ظهري ما تسمع الكلام لين ما انكسر الثلج وطاحت وخاست ماي..وهى من البرد تصيح..
أم حمدان:بنتى عن تموت من البرد..
حمدان:الحين سلطان ومحمد سارو إيبون السيايير منروح..
موزه:حمدان بردانة بمووت..
حمدان:شو أسويلج..ما عندي جاكيت..
شافت عمهم منصور كلهم متولفين شىء فيهم..
منصور:شو بلاهم ؟؟متولفين؟؟
حمد:شدرانى خلينا إنسير عندهم لا يكون شىء ياهم..
أم سالم:لا يكون شىء ياهم..
وسار عمهم منصور ويا يدتهم وحمد عندهم..
أم سالم:موزه.. شو ياج؟؟؟
منصور يطالع موزه إلى كانت عند أخوها: موزه شو فيج؟؟
عاد هم ما يرومون يقولولها أنها كانت تزلج لأنها بتهد عليهم..وهى توها هاده عليها...
حمدان :يالسة تلاعب شمة وسارة وتخرطفت وطاحت وتخيست ماي..
حمد ما أقتنع..سأل سعيد بصوت واطى..:سعيد شو سالفة؟؟
سعيد يظحك: بنت عمك الخبيل يالسة تلعب ويا سلامى سكيتنق وتكسر الثلج تحتها وطاحت..
حمد :بس...
سعيد:هيه بس ما يريدون يخبرون أمايا شيخة عشان بتهد عليهم..
حمد:بتموت من البرد خلونا نرد..
حمدان: الحين بي سلطان ومحمد ومنرد بسايير..
ويشوف موزه تنتفض وماسكه أخوها ..وخدودها حمر من البرد جان يفسخ جاكيتة ويعطيها إياه..
حمد يعطي حمدان:عطها تلبسه عن تمرض..
حمدان:مشكور..
وعطاها موزه..ولبستة..وكان حمد يشوف عيونها وهى رفعت عيونها لحمد..وكانت تقول بنظراتها..مشكووووورة حمد..إبتسم حمد....
منصور :يالله يو...يالله إنسير...
وسارو وكانت موزه عند أخوها حمدان وركبت وياه..وهى ساكتة ولا رايمة تقول كلمة بعد إلى إستوى..
الساعة 12:15 الظهر
نزلو كلهم بيت قوم موزه..وسيدة من نزلت سارت حجرتها وفصخت الجاكيت والعباه وسارت وتسبحت...أما هم يلسو يسولفون ويا يدتهم..
منصور:أميا شو رايج باجر إنسير المزرعة ؟؟
أم سالم:ما أدري والله..
سعيد:يا لله أمايا خلينا إنسير المزرعة خاطري أشوفها من زمان ما شفناها..
مى بتموت كل ما تكلم سعيد..تيلس تشوفة ومن يشوفها تنزل راسها وسلامى فاجة ثمها.. شو سالفتهم هالثنين...
سلامى: إنزين أنتو سيرو وأنحن منيلس..
سعيد يبى يصفعها..لأن المزرعة كلهم بيلسون في بيت واحد بيتهم إلى في الزرعة وايد كبير وجيه بروم يشوف مى كل وقت ..وبيلسون ويا بعض: ليش ما تبون إسيرون؟؟
سلامى:لا والله ..هي تبا تغايضة..
سعيد:أنا أقول حق أمايا وعماتى مب لج ..ويا ويهج..
سلامى:كلهم من رايي..
أم سعيد:لا والله أريد أسير المزرعة من زمان ما سرتلها..
سعيد:جب ..خلاص قفطوج..
سلامى:عادي سيرو أنتو أبيلس هنيه..
سعيد:ما عندنا بنات إيلس رواحن في البيت..
محمد:صدقة سعيد...شو إيلسج بعد ؟؟؟
أم سالم:بسم الله كلتو البنت..
سعيد: ما تشوفينها أمايا مسودة ويه تبا تيلس..
أم سالم: عيب سعيد هاي أختك...
سلامى: وع ...الله بلانى بهذا الأخو..
مى: يحظج عندج أخو مب أنا ما عندي أخو...وبعدين أستحت كيف رامت تقول جيه..
سلامى وطالعها بنص عين هي وسعيد:شليه..عطية ما لها جزيه..
سعيد يفرها بالمخدة:فقتج يا الدبة..
سلامى تطالع مى:ههههههه..الكلام موجة لج..لأنج أنتى الدبه..
مى بدلع:أبووووووياااااا قول حق سلامى أنا مب دبه..
منصور:سلامى شو تبينها؟؟؟؟
سلامى تقلد صوت مى: أبووياااااا قول حق سلامى أنا مب دبه...عيل كم وزنج؟؟
محمد معصب:سلامى.......ما تستحين بس عاد..
ويلسو جيه سلامى من ينب وسعيد من ينب..أما حمد يفكر في موزه.. وسلطان يطالع سلامى كيف تغايض..آآآآآآه يهالبنت كيف تحب تغايض..حشة الله يعينى منها..ومحمد يطالع نورة إلى من وصلو ما تقول شىء بس ساكته لو ظحكو تبتسم..هب أختة من وصلو ما لمت ثمها..
أما بنسبة لموزه ..يلست ساعة في الحمام..تفكر في حمد..وشوي تبتسم وشوي تصيح..على أنة بييلس بس أسبوع وياهم ولا أقل من أسبوع..وظهرت من الحمام وسارت عند جاكيت حمد ويلست تشم ريحتة..آآآآآآه ما حلات ريحتة..تجنن..أصلا هو بكبرة يجنن..وخلت فوق الشبرية وسارت تتلبس وبعدين شلتة عشان تردة ويوم حطت إيدها في مخبا الجاكيت يلست تصيح..ومن كثر ما كانت تصيح ما رامن توقف يلست ..لالالا.. حمد ليش؟؟؟..ليش؟؟