منتديات قصايد ليل - عرض مشاركة واحدة

10-09-2010

الجزء الخامس عشر
والأخـيــــــــــــــــر

الناس في بسمتي بالحيل منخدعـة.. ياكـم وراهـا طفـيت النار بأنفاسـي..
بعض المواجع لها ماتنفع الفزعة.. كلما جرعـت الحـزن رد امتلى كاسـي..
عودت نفسي أسـاير هزة الفجعـة.. وإن دست جمر الزمن ماينحني راسي..

العنود بعد ماقامت نزلت لأمها تسولف معها ويحللون الملكة كلها من جاء ومن ماجاء وهذي حلوه وهذي شينه ومن خرابيط الحريم ونزلت منيره وكملوها سواليف ..

العنود : تصدقين إن سحر مره منجنه عليك تقول طالعه حلوه ..
منيره : والله عيونها الحلوين الله يسلمها يارب حتى هي متغيرة ولا يمه ؟؟
أم سلمان : ماشاء الله الله يحفظها حتى الحريم يسألون من هي أمس ؟
العنود : والله لو تدري بتستانس ..
أم سلمان : العنود حبيبتي روحي شوفي سلمان أذن المغرب وهو توه ما قام ؟؟
العنود : أوريييييك فيه أنا ( وتقوم وهي مستانسه لأنها تحب تتناقر معه )

في بيت منصور ..
منصور جالس يقنع أمه في الجوهره ..
أم منصور : وش دراني عنها هالبنت يمكن تطلع صايعه ضايعه لا لا خلنا منها !!
منصور : الله يخليك يمه أنا أعرف اخوانها زين وناس طيبين انتي روحي وشوفيها بنفسك ..

أخته كانت جالسه تأكل ولدها ..
سلمى : طيب يامنصور الحين وش اللي يخليك تصر بنت بدالها ألف بنت ..
منصور : بس أنا معجبتني هالعايله ..
أم منصور : خلاص تراك أزعجتني من قمنا وانت فوق راسي تحن !!
منصور : خلاص تروحين لهم بكره تجهزي ..
أم منصور : طيب عطني رقمهم ولا شي ..
منصور : خلاص ان شاء الله أنا أكلم أخوها وآخذ الرقم ..

أهله تفاجأو من الخبر هذا لأنه دايم ما يحب طاري العرس بس هالمره ما يدرون وش عنده متحمس بقوووه ومزعجهم ..

نرجع للـ العنود راحت ودخلت على سلمان اللي ماسك المخده وضامها وناااااايم أول شي شغلت اللمبات وهو حس شوي بس ماهمه ..
العنود : سلمان يكفي نوم حشا ..
سلمان مارد عليها ..
العنود : سلماااااااان ترى بحوس لك الغرفه ؟
سلمان : حوسيها اطلعي برا بس ..
العنود : قم مضبطه لك قهوه على كيفك وحلى ..
سلمان تشجع شوي وأصلا هو بدا يشبع نوم ..
العنود : ويالله عندي سوااليف تجننننننن عن الملكه ..
سلمان فتح عيونه وجلس يعرك عيونه : آآآآآآآآه كم الساعه الحين ؟
العنود : الحين بيصلون المغرب الحق على الصلاه ..
سلمان : خلاص اطلعي باتروش وأروح أصلي ..
العنود : يعجبوني المؤدبين أنا ..

منصور كلم فهد وأخذ رقم أمه وعطاه أهله وقالهم يدقون ضروري اليوم عشان يروح لهم
أم منصور دقت الرقم وردت عليها الجوهره ..
أم منصور : السلام عليكم ..
الجوهره : وعليكم السلام ..
أم منصور : وش أخبارك يابنتي ؟؟
الجوهره : بخير الله يسلمك ..
أم منصور : انتي الجوهره ؟؟
الجوهره استغربت من هي هذي الحرمه : ايه ياخاله من معي ؟؟
أم منصور : ماراح تعرفيني عطيني أمك كانها قريبة ..
الجوهره : ان شاء الله ..

هي شكت في الموضوع وحست أنها أمه ولا من هي اللي بتدق وتطلب أمي ولا أعرفها نادت أمها وقالت لها ان وحده تبغاها ..

بعد ما كلمت أم فهد اللي ما أبدت أي اعتراض وقالت الله يحيك اليوم وتعالوا شوفوها ..

سلمان بعد ما خلصوا الصلاه دخل وجلس يسولف مع خواته وأمه ونسى سعود اللي منشغل باله وضايق صدره بقوه ..

سلمان ماقدر ينسى العنود ..
سلمان : العنود ..
العنود : سم آمر وش بغيت ؟
سلمان : كل هذا عشاني ياحظي ..
العنود : اخلص ترى ما راح أجاوب على السؤال ؟
سلمان : لا ا اا خلاص من هي البنت ؟؟
العنود تسوي نفسها غبيه : مين ؟؟ كثيرين البنات صراحه ..
سلمان : تقهريييين يالدوبا ..
العنود ما تحملت جلست تضحك : وانت وش عليك منها تبيها ؟؟
سلمان : لا بس باعرف من أقاربنا ولا لا ؟؟
العنود : لا هذي سحوره ..
سلمان : أهااااااا هذي سحر اللي غاثتنا عليها ..
العنود : ايه وش رايك فيها ( وتغمز له )
سلمان يبتسم ويمد لها الفنجال : صبي القهوه بس ..
العنود : الله يخليك سلمان ودي تاخذها أنا مفكره من زمان بهذي الفكره ..
سلمان : لا وتخططين من وراي ؟
العنود : طيب قلي البنت وش فيها ؟

رن جواله وكان سعود ..
سلمان : أقول اسكتي هذا سعود تلقينه معصب علي ؟
العنود استانست يوم قال انه سعود ..
سلمان : هلا وغلا ..
سعود : هلا بك كيف الحال وش أخبارك ؟؟
سلمان : بخير الله يسلمك وش فيك شكلك تعبان ؟
سعود : مره ونفسيتي زفت !!
سلمان : لا لا أكيد أحد مضايقك قلي وش السالفه ؟؟
سعود : والله ودي أشوفك تجي تمر علي ..
سلمان : خلاص أشوف بعد الصلاه ان شاء الله تامر بشي ؟
سعود : سلامتك ..

بعد ماسكر منه ضاق صدره سلمان عليه وحس ان فيه شي كبير مضايقه ..
العنود : وش فيك سلمان ؟؟
سلمان : آآه بس والله صوته يضيق الصدر ..
العنود : وما قالك ليش ؟؟
سلمان : لا بروح له بعد العشا ان شاء الله ..

في بيت أم فهد ..
الجوهره : ماقالت لك يمه من هو ؟؟
أم فهد : إلا منصور الـ ..........
الجوهره ما تدري ليه خافت ؟ وفي نفس الوقت شي يقولها وافقي عليه ..
أم فهد : شكلهم ناس ما عليهم اليوم بتجي تشوفك وعقبها اخوانك بيسألون عنه ؟
الجوهره : خلاص يمه ان شاء الله متى بتجي ؟
أم فهد : بعد المغرب ..

أم فهد كانت فرحانه ان بنتها انخطبت واللي فرحها زياده ان عايلة منصور معروفه انها غنيه فما بغت تردهم ..

منيره بغرفتها جالسه عند النت تسولف مع وحده إلا يدق جواله ويوم شافته فهد ارتبكت زياده وردت قبل لا ينقطع ..
منيره : الو ..
فهد : هلا بهالصوت ..
منيره بصوت خفيف : هلابك ..
فهد : وش أخبارك ؟؟
منيره : بخير وانت ؟؟
فهد : دامك بخير أنا بألف خيييييير ..
منيره تبتسم وتسكت ..
فهد : مشغوله الحين ؟
منيره : لا ما عندي شي !!
فهد : مارحتي للسوق اليوم..؟؟
منيره : لا باروح بعد المغرب ..
فهد : وش رايك أوديك ؟؟
منيره بدون شعور : لا سلمان بيوديني ..
فهد: وأنا زوجك بعد ويحق لي أوديك ..
منيره : اممم لا بكلف عليك ..
فهد : إلا قولي ماتبيني ؟
منيره : وش دعوا بس انا ترى نشبه في اليوم الواحد أفر الأسواق كلها ..
فهد : هههههه عادي نفر معك وش ورانا ؟
منيره : لا اعرفكم انتم الرجال تكرهون شي اسمه سوق !!
فهد : هههههههه شكلك متعقده من اللي عندك ؟
منيره :لا والله سلمان ما يقصر بس بدون نفس أحيانا ً...

جلس يسولف معها شوي وسكر واستانس إنها جريئه ولا استحت منه وتأقلمت معه وهي بعد كانت مبسوطه انه كذا موب رسمي معها بس حست أنها حسااااس كثير ...

الجوهره كانت منحاسه وحالتها حاله ولبست تنوره لونها بني وبلوزه وردي وبيج وطالعه ناعمه فيها ولا حطت مكياج غير كحل جوا العين بس ...
وهي بغرفتها تفكر بهالقرار ما تدري صح ولا غلط وهي اللي خلاها توافق هو أنها تحب منصور أول وحنت له الحين وخاصه بعد ماتاب دخل مزاجها بقوه ...
دخلت منى ..
منى : أحلى على اللي يستحوون ..
الجوهره : والله ماني فاضيه لك منى ..
منى : عادي وسعي صدرك واستانسي كل البنات ينخطبون ..
الجوهره : أقابلك يوم خطبتك ..
منى : عاد أنا غير هههه ..
الجوهره : ليش وانتي مين ؟؟
منى : تدرين انك نسيتيني ترى أمه جت وأخته ..
الجوهره : احلفي لا لا مابي أنزل استحي ..
منى : وش هالحيا الزايد تعالي ( وتسحبها مع يدها وهي ميته من الحيا )
الجوهره : والله خايفه ..
منى : قولي الأذكار ..
الجوهره : أصلا من الخوف نسيتها ..

دخلت منى ودخلت بعدها الجوهره وهي منزله راسها وسلمت عليهم ..
أم منصور : هلا ببنتي وش أخبارك ؟؟
الجوهره : الحمد لله ..
سلمى : وش أخبارك وأخبار الدراسه ؟؟
الجوهره تبتسم لها : ماشيه تمام ..
واللي أربك الجوهره انهم ماشالو عيونهم عنها وكان شكلهم ملاحظ ..

جلست شوي وطلعت من عندهم لأنها ما قدرت تتحمل راحت لغرفتها وانسدحت على السرير وخذت نفس * معقوله انها بتصير خالتي وهذيك أخت زوجي ما أقدر أتصور ولا اللي مو خاش مزاجي منصور انه بيصر زوجي أحيانا أحس اني غبيه *
منى : بوووووو ..
الجوهره نقزت من على السرير : يالدوبا روعتيني ..
منى : وش قاعده تفكرين فيه ؟؟؟ قولي ..
الجوهره : امممم مالك دخل راحو ولا لا ؟؟
منى : ايه راحو ..
الجوهره : وش قالت ؟؟؟
منى : قالت بنتكم مره شينه وتحوم الكبد ..
الجوهره : كذابه ..!!
منى : لا تصدقين بكيفك ..
الجوهره : تكلمي جد بلا سخافه ..
منى : هههههههههههههه لهدرجه متحمسه خليني أحرق أعصابك شوي !!
الجوهره : سخيفه (وتلف وجهها )
منى : خلاص ولا تزعلين ياحلوه ما قالت إلا انها بترد على أمي ..
الجوهره : أها ..
منى : وش فيك ضاق صدرك ؟
الجوهره : ولا شي خلاص منى اطلعي أبي أرتاح ..
منى : اصلا انا وشو له أقابل خشتك وش أبي فيك ؟

في السياره منصور كان متحمس يبي يعرف رايهم ..
أم منصور : تدري انك ذوق ياولدي ..
منصور استاااانس : أعجبتك يمه ؟
أم منصور : لا ماشاء الله الله يحفظها أبد اليوم بكلم أبوك وتروح بنفسك تخطبها ..
منصور ارتاح نفسيا وحس انه سوى انجاز كبير وحتى ولو أنه ما عرف موافقتها بس ضامنها التفت على أخته : وانتي ياسلمى أعجبتك ؟
سلمى : مره خطيره وباين عليها مربيه زين ..

سكت منصور ولا علق على كلامها ..

سلمان مر على سعود وخذاه لكوفي وجلسوا يسولفون وفي البدايه ما فتح له الموضوع ..
سلمان : ايه صح سعود وش فيك اليوم متضايق ما قلت لي ؟؟
سعود ارتبك شوي : امم خلاص انسى ..
سلمان : لا حبيبي لازم تتكلم والله من جد شكل فيك شي كبير ..
سعود : بقولك بس لا تفهمني غلط ..
سلمان : وش دعوا أنا ولد عمك ووصديقك وفاهمك من عيونك ..
سعود يحرك رجوله وهو منزل راسه ..
سلمان يناظر له وقال فجأه : عادي الحب موب عيب ؟
سعود رفع راسه بسرعه : سلمان وش قصدك ؟؟
سلمان : لا ماقصدي شي بس انت تكلم وقل اللي بقلبك ..
سعود : بصراحه سلمان وبدون مقدمات أقولك أبي العنود يعني أبيها ..
سلمان : هههههههههه أنا قايلك فاهمك والله طيب ليش ما قلتي لي من زمان ؟
سعود : ما حصل وقت ..
سلمان : طيب تبي تعرس الحين انت ؟؟
سعود : لا بس ابي أخطبها وأضمنها وبعدين لا خلصت دراستها بتزوج ..
سلمان : والله انك غالي وطلبك على العين والراس وأنا أقول من الحين أبوي ما راح يرفض وبيني وبينك العنود أتحداها تقول لا ؟
سعود استانس : وش دراك ؟؟
سلمان : انتم الاثنين فاهمكم زيييييين وما تقدرون تخبون علي شي ؟
سعود : الله يخليك ريحتيني بس ( وسكت )
سلمان : بس ايش وش فيك ؟؟
سعود : أمي رافضه ..
سلمان : طيب تقدر تقنعها يمكن عشانك توك صغير على قولتها ..
سعود : لا هي تبي تخطب لي وحده ثانيه وتقول العنود ما تصلح لك ؟
سلمان : لا أبد رح اليوم واجلس معها بهدوء وناقشها وشوف ..
سعود : أمي ما عليك أعرف شلون أقنعها ؟
سلمان : دام نيتك زينه ربي بيوفقك ..
سعود : يعطيك العافيه سلمان والله ماتدري شلون خففت علي ..
سلمان ابتسم له : واجبي يالغالي ..
على الساعه 10 رجع سلمان البيت وكان وده يفاتح أمه أول بالموضوع وبعدين يشوف راي أبوه دخل البيت ولقى أمه جالسه بالصاله تتفرج على التلفزيون وعمر يلعب بلايستيشن ..

سلمان : السلام عليكم يالغاليه ..
أم سلمان : هلا وغلا بولدي وعليكم السلام ..
سلمان يحبها على راسها : وين البنات عنك ؟؟
أم سلمان : والله في السوق هالأيام نادر ما أشوف منيره ..
سلمان : عروس بعذرها ما عندكم يمه قهوه ؟
أم سلمان : إلا فيه أقوم أجيب لك ..
سلمان : لا والله ما تقومين اجلسي أنا بروح ..
راح للمطبخ وفتح الثلاجه لقى فيها حلى وشكولاتات حطها مع القهوه وجابها ..
سلمان : تدرين يمه اني تو مع سعود في الكوفي ..
أم سلمان : وانت ما تشبع من القهوه ؟
سلمان : لا سحر والله شكلها ما أقدر أعيش بدونها ..
أم سلمان : ههههه طالع علي والله ..
سلمان : عبد الله وينه نايم ؟
أم سلمان : لا وش نايم عند كمبيوتره ..
سلمان : أكيد فاتح النت خليه أحسن أنا عندي لك سالفه حلوه ..
أم سلمان : لا تقول اني باعرس ؟
سلمان : ههههههه ياحليلك يايمه لا أنا بقولك بس وش رايك بسعود ولد عمي ؟
أم سلمان : هو يبغى لها سؤال سعود اعتبره ولدي وهو ماعليها كلام أخلاق وأدب الله يحفظه ..
سلمان : طيب يمه اليوم فاتحني سعود بموضوع ..
أم سلمان : موضوع وشو ؟؟
سلمان : لا تستعجلين يمه هو يبغى العنود له ..
أم سلمان : ماراح ألقى أحسن منه للـ العنود بس توها البنت صغيره ..
سلمان : لا بس يبي يخطبها وتصير له ولا خلصت دراستها تتفقون على العرس ..
أم سلمان : أنا من ناحيتي موافقه وبالعكس مستانسه أن واحد مثل ولد عمك بياخذها بس بيروحون عني هالبنات وأبقى لحالي ..
سلمان يضحك : لا تخافين يمه كلها كم سنه وتجيك وحده ويمكن قريب بعد ..
أم سلمان : الله يوفقك ياربي ويجيب اليوم اللي أشوف فيه عيالك يلعبون قدامي ..
سلمان : هههههه بتشوفينهم وتشوفين عيالهم إن شاء الله ..

وهم جالسين يسولفون دخلت منيره ومعها أكياس ووراها العنود ..
العنود : شفتي يمه هالبنت والله تعبتني وهلكتني ..
أم سلمان : وش موديك أنتي اللي تبين ؟
منيره : يالكذابه أقولك خليها تقولين لا لا ..
العنود : ههههههه والله ما خلت شي بالسوق ماشرته ؟

سلمان : تعالي بس تقهوي وفليها ..
العنود رمت عبايتها وجلست مع سلمان ..
سلمان : ولا فكرتي تجيبين لي هديه ولا شي ..
العنود : أصلا هي تعطيني مجال كل الروحه لها ..
سلمان : حرام عليك وانتي ما شريتي شي ؟
العنود : إلا بس اشتريت شنطه وسلسال وتنوره أعجبتني ..
سلمان : كل هذا وما شرت شي صدق انك طماعه ؟؟
العنود : غاير مني أصلا ..
سلمان : وش أغار منه ؟؟ أقول وين منيره ليش ما نزلت لا يكون مزعلتها ؟
العنود : لا وش أزعل أختي حبيبة قلبي أكيد تكلم زوجها ..
سلمان : أها أجل ما فيه نيه تنزل ..

مر أسبوع تقريبا ومنيره مشغوله مع السوق والعنود ما قصرت معها ..
وسلمان فاتح أبوه في السالفه واستانس يوم درى أن سعود يبي العنود ..
منصور مزعج أهله كل يوم يبيهم يروحون وحددو معهم يوم يجونهم فيه ..
الجوهره وافقت مع ترددها الكبير من هذا القرار بس توها ما سمعت موافقه أبوها واخوانها ..
فهد وعايش أحلامه مع منيره وكلن يضرب فيهم المثل في حبهم ووشوقهم لبعض ..

الجوهره بنفس اليوم اللي بيجون فيه منصور وأبوه كانت مرتبكه كثير فتحت الستاره وجلست تنتظرهم يدخلون تبي تشوفه تغير ولا لا ؟؟
شوي ووقفت سيارة كامري ونزل منصور وأبوه وكان شكله حلو بالغتره واللحيه اللي على وجهه محليته هنا الجوهره ارتاحت انه تغير صدق ..

دخل وسلم على أبو فهد وفهد وسعود وحمد وجلس بالمجلس ..
أبو فهد : الله يحيهم نورتو البيت ..
أبو منصور : الله يسلمك وش أخبارك انت وعلومك؟
أبو فهد : بخير الله يسلمك ..
أبو منصور : والله اليوم جايينك وسمعنا عنكم كل خير وتعرف الولد وده يكمل نص دينه وودنا ببنتك الله يحفظها لولدنا ..
أبو فهد : أبد وجهك وجه خير وماتنرد بس نشاور البنت ومالك إلا طيبة الخاطر ..
منصور ارتاح من كلام أبو فهد وجلس يسولف مع فهد لأنه عرفه يوم شافه في مكه وفهد داخل مزاجه مره ويوم طلعوا من عندهم ..

أبو فهد : وش رايك بالرجال يافهد ؟؟
فهد : والله يبه لا تحكم من الحين أنا أقولك انه بمظهره الخارجي وكلامه رجال سنع بس لازم تسأل ؟
سعود : أي يبه لا تستعجل ..
أبو فهد : خلاص أنا بروح أصلي بمسجدهم وأسأل عنه وأنتم أسألو زملائه بالعمل ..
سعود : تامر أمر يبه ..

سعود ماكانت هذي السالفه مأثره عليه كثر العنود اللي خذت قلبه وراح يشوف أمه ويفتح معها الموضوع مره ثانيه ..

منيره منسدحه على السرير وتسولف مع فهد .
فهد : حرام عليك والله مشتاق لك ..
منيره صارت طماطه : وانا أكثر ..
فهد حب يحرجها زياده : وين الصوت اختفى ؟
منيره تضحك عليه ..
فهد : ياحلوها هالضحكه خلاص وش رايك أمر عليك اليوم ؟
منيره : الله يحييك ..

جلس يسولف معها شوي وسكر وهي راحت قالت للخدامه تجهز القهوه وطلبت لها صحن حلى وفطاير ..

ورجعت لغرفتها تطلع لها لبس ومحتاره وش تلبس وشعرها وش تسوي فيه ؟؟
فتحت دالوبها وشافت بلوزه حمرا حلوه وأنيقه وهم دايم يقولون لها الأحمر عليك حلو فقررت تلبسها مع تنوره لونها زيتي وشعرها مسكته بشباصه فيه كرستال أحمر مع الاكسسوار طالعه حلوه وحطت مكياج خفيف مره دخلت عليها العنود ...
العنود : وش هالزين ؟؟
منيره : من جد حلو ولا أغيره ؟
العنود : تستهبلين وين بتلقين أحسن من هذا ؟؟
منيره : بيجي فهد ..
العنود : قولي والله ولهدرجه فرحانه ؟
منيره تضحك : كثييير ياحبي له ..
العنود : احم احم وصايره تتغزل إلا أقول ودي أسألك ؟
منيره : وشو ؟
العنود : وش اللي خلاك تحبينه ؟
منيره : سؤال للأسف ماله جواب ؟
العنود : سخيفه ..
منيره : ههههههههه لا والله الصراحه فهد تغير تماما وحتى سلمان لاحظ عليه ويمكن كانت فتره كان شايف فيها عمره وبعدين فكر بعقله ...
العنود : أها حتى الجوهره كثير متغيره ..
منيره : إلا على طاري الجوهره تدرين سمعت انها انخطبت ؟
العنود : ياحليلها والله ..
منيره : بس اسكتي لا تقولين لأحد الين ينتشر الخبر ...
العنود : تعرفين من هو ؟
منيره : لا والله ما قالي سلمان حتى هو ما يعرفه بس سعود قاله ...
العنود : عقبالنا أنا ومنى ..
منيره : أول مره أشوف بنت ما تستحي من طاري العرس ...
العنود : شوفي جوالك يدق تلقينه جاء ...
منيره تركض وترد : هلا ..
فهد: هلا بك كيف الحال ؟؟
منيره : الحمد لله بخير أفتح الباب ...
فهد : ياليت والله ..

منيره نزلت وهي مرتبكه بقوه فتحت له الباب ودخل ...
فهد : السلام عليكم ...
منيره منزله راسها : وعليكم السلام ...
مسك مع يدها عشان يبعد هالحيا ودخل معها للمجلس ...
فهد : وش أخبارك ياحلوه ؟
منيره : الحمد لله ...
فهد : الحين ما تقولين لي ليش ما ترفعين راسك ؟؟
منيره تبتسم وترفع راسها شوي ..
فهد : ايه صح نسيت هذي لك ..

وأعطاها الهديه كان عطر وطقم حلو مره ومغلفه بتغليف روعه ...

منيره : ما يحتاج ليش مكلف على نفسك ؟
فهد : أبد ما تكلفت ولا شي بالعكس تستاهلين أكثر ...
منيره : مشكو ر الله يعطيك العافيه ...
فهد : العفو حبيبتي ...

منيره قامت تجيب القهوه وهو مانزل عينه عنها يراقبها في كل حركاتها ...

ماطول عندها كثير جلس يسولف معها وهي استانست صارت تاخذ وتعطي معاه وتجرأت أكثر ...

سعود وفهد بدورهم سألو عن منصور بكل مكان الكل قال عنه أنه متغير وصاير دايم في المسجد ومع أبوه ومعاملته وأخلاقه راقيه ...

وأبو فهد سأل الإمام عنه ومدحه كثير وخاصه خلال الشهر اللي راح هذا الشي خلى الكل يطمنون أنه ما عليه كلام وأهله معروفين انهم ناس فيهم دين ...

أبو فهد دخل في بيته بعد صلاة المغرب وكانو متجمعين كلهم يسولفون وسعود كان بقوه ضايق صدره لأن أمه رافضه تماما العنود وشكله بينهم ملاحظ ...
أبو فهد : السلام عليكم ..
الكل : وعليكم السلام ..
أبو فهد : ماشاء الله اليوم كلكم حاضرين ..
حمد : ايه يبه اشتقنا للجمعه مع بعض ..
أبو فهد يلتفت على سعود : وش فيك عسى ماشر ؟؟
سعود : لا ابد مصدع شوي عن اذنكم بطلع لغرفتي ( وقام من مكانه )
أم فهد : سعود تعال اجلس ..
سعود : لا يمه شوي وبنزل ..
أبو فهد : وش فيه الولد ؟؟
أم فهد تسوي نفسها ما تدري ك والله مادري عنه ؟؟

أبو فهد : تعالي حبيبتي الجوهره ..
الجوهره جايه وهي تبتسم : هلا يبه ..
أبو فهد : يمكن انتي داريه أن فيه واحد جاي يخطبك ..

الجوهره انحرجت وسكتت ..

أبو فهد : يابنتي انتي كبرتي وكل بنت مصيرها الزواج وأنا جاي آخذ رايك وأحب أقولك ترى اخوانك سألو عنه ولكل قال مدحه لنا ..

الجوهره بعد صمت : اللي تشوفه يبه ..
أبو فهد : لا تستعجلين استخيري كم مره عشان نرد عليهم لأنهم شكلهم مستعجلين ويبون يملكون ..

هي صار وجهها طماطه وطلعت لغرفتها بسرعه عشان تاخذ نفس وأبوها فهم من جلسته معها أنها موافقه ولا عندها مانع ..

طلع سعود لغرفته وهو ضايق صدره والدنيا متسكره عنده فتح دفتره وجلس يشخط بالقلم وجا على باله هالأبيات وكتبها ..

مشتاق له ياناس مقدر أخليه..
الله يرحم حالتي في
بــعــا ا ا ا ده..!
*عيني* و *قلبي*
معها الروح تــغليــه..
حبــه بــقلبي فــارش له
وســا ا ا ا ده..!
لامـــر طيـــفه في خيـــالي وطـــاريه..
شفت الحـــياه أجـــــمل وزادت
ســعا ا ا ا ده..!
.......

وجلس يتأملها ويقراها كم مره وماحس إلا دموعه على خده * حرام يحرموني منها حبيتها وتوني أدري أن الحب عذاب ليش ما تفهمني أنا اللي قاهرني العنود نفس شعوري ولا لا ؟؟ آه بس *
رمى القلم جنب الدفتر وسمع أحد يطق الباب ..
سعود بصوت تعبان : مين ؟؟
أم فهد : أنا سعود افتح ..
سعود بدون نفس فتح الباب ..
أم فهد : سعود حبيبي وش فيك ؟؟
سعود : سلامتك يمه ما فيني شي ..
أم فهد تبتسم : والله ما تهون علي خلاص العنود لك ..
سعود فرح من داخله : بس يمه انتي مو راضيه وأهم شي عندي رضاك ..
أم فهد : دام هالكلام جا منك فوالله ياسعود اني راضيه عنك وراضيه بالعنود لك ..
سعود ابتسم من قلبه : والله يمه ..
أم فهد : ايه حبيب قلبي وأهم مافي الدنيا سعادتكم ياعيالي ..
سعود ضمها بقوه : والله أحبك يا أغلى أم ..
أم فهد : والله ما دريت أنك متعلق فيها لهدرجه ..
سعود ابتسم : يمه هذي اللي اختارها قلبي ..
أم فهد : الله يوفقك يارب ما عليك أنا بكلم أم سلمان تجينا اليوم هي والبنات وأفتح معها الموضوع ..

سعود كانت فرحته كبيره وقرر ما يطلع من البيت عشانها بتجي وقال لسلمان يجي هو وعبدالله و يسهرون معاهم في البيت ..

سلمان خذا أهله وراح لبيت عمه وسهرو عندهم كان سعود فرحان وقال لسلمان أن أمه وافقت وفرح له سلمان من قلبه ووعده يكلم العنود ويقولها ..

بعد مارجعو في الليل الساعة 2 وسلمان كان حاط في باله أنه يكلم العنود عشان سعود اللي أقلقه
وقبل لاتدخل ..
سلمان : العنود ..
العنود : هلا ..
سلمان : بتنامين ؟؟
العنود : لا ليش ؟؟
سلمان : امممم أبغاك بغرفتي تعالي ..
العنود : من عيوني أبشر ..

هي حست أن السالفه فيها سعود لأن منى ما قصرت قالت لها أنه ناوي يخطبها وهي بقلبها فرحاااانه ومبسوطه أن سعود مهتم فيها هالكثر بعد ما بدلت ملابسها راحت لغرفة سلمان ..
سلمان : هلا وغلا منورين ..
العنود : هلا بك ..
سلمان : تعالي اجلسي يووووه ما طلبنا لك عصير ولا شي ..
العنود : مسوي فيها ضيافه الحين ..
سلمان : إلا عندي صح تذكرت ( وفتح الثلاجه اللي بغرفته وطلع لها عصير بارد )
العنود : الللللللللله بارد تسلم سلوم ..
سلمان : احم احم أنا جايبك عشان سالفه ..
العنود : ايه صح وشي ؟؟ >>> تسوي نفسها ماتدري ..
سلمان : لحظه أن مابي حركات حيا !!
العنود تبتسم : وش السالفه ؟؟
سلمان : سعود قالي اليوم كلام وأنا شاورت أمي وأبوي وموافقين بس نحتاج موافقتك ..

هي ساكته ومنحرجه في نفس الوقت ..
سلمان : وش رايك وأنا عارف من عيونك انك تقولين ايه ؟؟

العنود تضحك عليه ..

سلمان : ماجبتك عشان تضحكين ..
العنود : اللي تشوفونه أنتم أهلي وعارفين مصلحتي ..
سلمان : ياعيني على الكلام المؤدب ..
العنود : خلاص بلا إحراجات ..
سلمان : والله ما يليق عليك الحيا وسعي صدرك ..
العنود : سلمااااااااان من وين لك هذي الصوره ؟؟
سلمان : هههه كنت بوريك اياها بس شفتيها ماشاء الله ..

( كانت الصوره لسعود وسلمان والعنود فوق سعود ما سكته مع راسه وعمرها تقريبا 3 سنوات )

العنود : ههههههههه تضحك قسم بالله ..
سلمان : شفتي الحب من يوم كنتو صغار كانكم دارين أنكم بتاخذون بعض ..
العنود تحاول تصرف : وأنت عليك شكل هههههه ..
سلمان : والله أزين من خشتك خليها بوريها سعود ..
العنود : لاااااااا والله بياخذها وأنا أبيها ..
سلمان : خلاص انتي وياه واحد ولا ( ويغمز لها )

العنود تبتسم وتنزل راسها توها ما تعودت على هذا الكلام ..

مرت الأيام سريعه على الكل وبطيئه على منيرة وفهد في يوم الخميس اللي قبل زواجهم كان يوم ملكة الجوهره اللي كانت ما توسعها الفرحه بأنها بتاخذ منصور وهو جاي وابتسامته ما فارقته بس ماحد يدري وش وراها ؟؟
الجوهره : منى روحي شوفي أمي تنادي ..
منى : طيب بس انتي استعجلي ..
الجوهره : خلاص بالبس فستاني وبس خلصت ..

لبست فستانها وكان لونه فوشي وطالعه فيه تجنن مع تسريحتها الناعمه ومكياجها اللي كان روعه عليها ..

منى دخلت عليها وشافتها قدام المرايه : ما شبعتي من شكلك يالله الحريم ينتظرونك تنزلين ..
الجوهره : طيب جايه ..

رشت العطر على ملابسها وشعرها ونزلت مع منى والعنود وسلمت على الحريم وكان اللي نا قصهم بس منيره اللي ماجت عشان زواجها بعد أسبوع ...

جلسو البنات يستهبلون ويرقصون الين نادتها أمها عشان منصور بيدخل بعد ما توقع على موافقتها ..

الجوهره : يمه بيدخل الحين ..
أمها : ايه حبيبتي لا تخافين أبوك بيدخل وإخوانك معه ..

دخل منصور مع أبوها وأخوانها اللي جلسو يستهبلون عشان يعطون جو للمكان ..
حمد : يالله ما تحسون إن ودّهم يقولون ضفو وجيهكم زودوتها ؟؟
منصور : لا عادي ..
سعود : يالله نستأذن ..

بعد ما طلعو كانت منزله راسها ولا عنده نيه ترفع راسها وهو ظل ساكت ولا تكلم الشي اللي خلاها تنقهر منه ..
منصور : طيب عطيني وجه ؟
هي كانت منقهره من هالكلمه حتى مبروك ما قالها ...
منصور : ممكن ترفعين راسك ؟
رفعت راسها موب عشانه عشان تعرف وش يبي منها شافته نفسه هو منصور اللي تعرفه بس شي غيره هي اللحيه بس ...
كانت نظرته لها قاسية ...
منصور : تدرين الجوهره ليش أخذتك ؟
الجوهره حست بخوف كبير منه وغصب عليها قالت : وش ناوي عليه ؟؟
منصور : بس بقلبي أعذبك ..
الجوهره : منصور ..
منصور : لا تنطقين باسمي انتي وصديقتك الخايسه ..
الجوهره : ادع لها بالرحمه الحين ولا تتكلم فيها ..
منصور : ما خربني إلا إنتم وأنا حبيت بس أنتقم !!
الجوهره ماقدرت تتحمل وقعدت تصيح :تنتقم بهالطريقه من الحين مابيك ؟؟
منصور : وأنا خذيت رايك توك موب الحين أطلقك ..
الجوهره : لي أبو وإخوان وإنت ضف وجهك ..
منصور : لا يطول لسانك وأنا بعد عندي كلام أقدر أقوله لهم ..

هي سكتت لأنها نقطة ضعفها هالشي ..
منصور : يالله بمشي ولو أحد يدري عن أي شي ياويلك مني ؟؟

هي ودها تصارخ ودها تصيح بأعلى صوتها كانت راسمه أحلامها معه وآخرتها يقابلها بهالوحشيه ..

دخل عليها فهد وهي تصيح بقوه ..
فهد : وش فيك ؟؟
الجوهره وهي تشهق : الله يخليك ما أبيه ما أبيه ..
فهد : فهميني وش السالفه وش اللي خلاك تقولين هالكلام ؟
الجوهره : حرام عليكم ظلمتوني فهد ليش تمدحونه لي ليييييييش ؟؟
فهد : طيب فهميني السالفه بهدوء قبل لاتكبر ..
الجوهره : هو الخايس بس بيتزوجني انتقام ..
فهد ما قدر يفهم منها شي : الجوهره انتي تتكلمين من عقلك خلاص اهدي الحين وبعدين تكلمي ..

( أخذ كاس وصب لها مويه وهدت شوي وهي موب قادره تنسى صورته قدامها )

بعد ماهدت فهمته السالفه كلها ...
فهد عصب : حقييييييير أوريك فيه وأنتي وش دخلك بصديقتك ؟؟
الجوهره : شفت أنا صرت الضحيه وهو مهددني أني إذا قلت لكم بيصير لي شي ..
فهد : أبد لا تخافين أنا راح أكلم أبوي في الموضوع الحين وأروح لبيته وأخليه يعرف من هو فهد ؟

دخل سعود وهو مستغرب من صوت فهد ..
سعود : وش فيك صوتك واصل عندنا ؟؟
فهد : والله انه مايسوى هاللي اسمه منصور ..
سعود : وش فيك قلبت على الرجال ؟
فهد : إلا هو اللي لاعب علينا وعلى أختي ..
سعود : فهمني وش السالفه ؟؟
فهد : أقول أبوي عنده أحد ؟
سعود : لا توه عمي طلع ..
فهد يلتفت على الجوهره : خلاص انتي ارتاحي وبكره ورقة الطلاق عندك رضى ولا مارضى ؟
سعود : طلاق ؟؟
فهد : تعال بس ..

دخل فهد وهو معصب وشرح لأبوه اللي انهار من كلامه وكان بيقوم يروح لبيته الحين ..
فهد : يبه ما يستاهل تتعنى وتروح له خلك بس أنا بدالك ..
أبو فهد : بنتي موب لعبه ؟

البيت كله توتر وأمها درت ومنى وهي سكرت عليها الغرفه ولارضت تطلع أبد مع انهم حاولو فيها بس هي أصلا ما ترد عليهم ...

فهد انشغل مع الجوهره ونسى منيره بعض الشي وهي قلقانه عليه وهو ما وده أحد يدري بالسبب غير إنه قال إنهم ما توافقو مع بعض في البداية صار الكل يحكي من جهة وتعرفون الناس ما يخلون أحد في حاله ...!!

مر الأسبوع بطيء وكله حزن من هالخبر والجوهره اللي خفف عليها يوم شافت ورقة الطلاق دليل انها افتكت منه خلاص وفهد ماخلاه بحاله وأم منصور حاولت تعتذر منه وتفشلت من ولدها وسواياه الشينه وهو ما همها وحتى أنه في البدايه مارضى يطلق بس خوفه من فهد خلاه يوافق ...

ما زال الجرح بقلبها وحتى فكرت ما تحضر زواج منيره بس منى عيت عليها وأصرت عليها وأقنعتها تروح عشان تبين للكل انه ما همها واقتنعت رغم انها فيها ضيقة صدر فضيعه ..

ليلة العرس ..
أبو سلمان الوحيد اللي ما قدر ينام حاس بشي ما سك على قلبه ويأنبه ونفس الشي فراق منيره ما هان عليه في هذي اللحظه وده يروح يضمها ويقول أنا آسف يابنتي بس موب قادر كرامته منعته
طلع من الغرفه عشان يرفه عن نفسه شوي وبالصدفه لقى منيره في الصاله جالسه ...
أبو سلمان : ما نمتي ؟
منيره : لا يبه ما جاني النوم ؟
أبو سلمان جلس بجنبها وهي استغربت تصرف أبوها ..
أبو سلمان : منيره لا أوصيك يابنتي بزوجك والصبر ترى الحياة تحتاج مجاهده ...
منيره : ان شاء الله يبه ..
أبو سلمان خانقته العبره بس جمع كل قوته وقال : سامحيني !!
منيره حست ان أبوها ندم صحيح انها تعذبت منه بس هالكلمه منه واعترافه لها بأنه مخطي تسوى عندها الدنيا ...
أبو سلمان : أدري أخطيت بحقك بس كانت وساوس شيطان !!!
منيره : لا خلاص يبه انسى انت أبوي قبل كل شي ومستحيل آخذ بخاطري عليك ..
أبو سلمان : من قلبك هالكلام ؟
منيره تمسك يد أبوها وتبوسها : ايه يبه من قلبي والله اني أحبك ولا فكرت بيوم أني أشيل بخاطري عليك ...

كان هالموقف اللي ما توقعته منيره أبد من أبوها وفي هذي اللحظه ...

أبو سلمان توه يعرف طيبتها وقيمتها ولو وحده غيرها كان أخذت حقها منه لأن اللي سواه موب شي بسيط ...

يوم العرس وتحديدا ً بالقصر ..

منيره كانت بالفستان الأبيض والشرعة والمسكة اللي بيدها روعه مشت على صوت الموال ..

أمها اللي من يوم شفت وهي جهها يلمع من الدموع والعنود صاحت الين تقطع قلبها وهي تشوف أختها تروح عنها ..

جلست على الكرسي وبعدين جو الحريم يسلمون عليها ويباركون لها ..

جابت الكاميرا وصورت معها ليلي والعنود و بنات عمها وطبعا حنان ونوره اللي كانو فرحانين لها ..

بعدها نزلت لغرفتها ودخل فهد مع اخوانها وأبوها هي ماقدرت تتحمل دموع أبوها يوم سلم عليها وسلمان اللي كان ماسك نفسه وما وده يضيق صدرها أكثر ..
أبو سلمان : الله الله بنتي ..
فهد يبتسم لها بحب ويمسك يدها : أبد لا تخاف في عيوني بحطها ..

منيره حست بالأمان وهي بجنب فهد بس اللي قطع قلبها أنها توها تحس بشي واحد وهو ( انها بتفارقهم لديرة ثانية )
فهد قرب من اذنها : والله تجنننننننننين بتخليني انهبل اليوم ...
ابتسمت ابتسامه حلوه ونزلت راسها ..

وقف جنبها سلمان وأبوها وعبدالله من الطرف الثاني وخذو لهم صوره حلوه مع بعض ...

وكانت أحلى صوره خذتها بين أبوها وأخوانها الغالين وزوجها ...

ودعت أهلها بدموعها وحزنها الكبير هالبيت اللي فيه تربت اليوم بتبعد عنه بعيد ولاراح تسكن بقربه
فيه ذكرياتها وفيه أحلى مواقفها مع اخوانها وأغلى صديقة ليلى كان موقف صعب عليها
حست بقلبها يضعف وهي تركب الطياره وشنطتها بيدها تودع أغلى أحبابها
ودعتهم وهم يبكون وخاصه العنود اللي ضيقت صدرها بقوه ...

مشت وهي تسحب رجولها ولا ودها لكن كلما رفعت عيونها وشافت عيون فهد حست بألأمل وأنها بخير دامها معه ..

( منيره )

خذت الكل بحبها عاشت بطيبه وعاشت بسلام والكل شهد لها وعرفوا غلاهم بعد رحيلها ..
سلمان من جد حس بفراغ بداخله ..
العنود كان الكل يحسدها على منيره اللي كانت تفضفض لها كل اللي بقلبها والحين افتقدتها بقوه ..
أم سلمان جلست أيام مو متقبله الوضع بدونها لأنها دايما ً تعطيها جو في البيت ..
أمها كان كل قلبها مع بنتها وتسأل عليها كل فتره وطلبت من فهد انه يعجل بزياره قريبه ..

ياكلمــة اغلى مــن الناس كلـــهم ... ياشمــس بقلي بعـــيد زوالها
يفرحــة تملي لى الكـــون بكملــه ... ياشجــرة تكبر ويكبـــر ظلالها
تضحــك لي الدنيا لي شفت زولها ... مثل السما تزهى بطلة هلالها
والبعـد عنها ياهل العــرف مقــدره.. لاشــك ناري زايــده بشتــعالها
ماعيــش ببــلاد ولا هـي برضـها ... ولا بي عيوني كان ما هي قبالها
ارض تــدوس امي بالاقدام رملــها ...اموت فيها وانــدفن بـــــــرمالها

(الجوهره)

بدت تنسى منصور وتعيش حياتها خصوصا بعد ما بدت الدراسه ..

( والعنود وسعود )

ينتظرون اللحظه اللي تجمعهم سوى لأن حبهم واضح في عيونهم ..

(سلمان)

ما فكر بالزواج إلا بعد ما يخلص من الجامعه وكان حاط سحر في باله ولا هو قادر ينساها بس هو شخصيته ما يبين ..

(منصور)

أبوه طرده من البيت ولا رضى يكلمها بعد اللي سواه ونزل راسه قدام الناس ..

( منى )

براءتها الكل يقراها في عيونها وعايشه حياتها بضحكتها ..

(حمد وعبد الله)

صارو ما يستغنون عن بعض وبدو يليقون على بعض بالمره ..

.................................................. .... انتهت الروايته