الجزء الرابع عشر

قولو لها.. اني بها حيل متيم..

واني لعينها اسهر طول الليالي..

واني فدوة لنظرة تطيب منها كل الاسقام..

والله اني كلي فدوة لنظرة العيوني..

احبها واكتب لها بوريــد الــدم..

اني على درب الهوى بــاقـي..


ليلة الملكة
منيره ما قدرت تنام وودها لو تنام ساعه عشان ترتاح بس مو قادره العنود حست فيها
العنود : منور وش فيك ؟؟
منيره : مااادري ودي أنام بس مو قادره
العنود : عشانك تفكرين
منيره تمسح دموعها : العنود خايفه
العنود : انتي مع أكثر واحد يحبك ويموت فيك فهد والله بيحطك في عيونه
منيره تحس كلام العنود يحط الأمل فيها ويبعدها عن الحزن اللي أرقها

من جهه ثانيه فهد اللي شايل هم وقلقاااان وما خلى أحد من أصدقاءه ما عزمه والكل فرح واستاانس له وخصوصا صديقه ماجد اللي من زمان وهو يقوله اعرس وجا اليوم اللي بيملك فيه

من يوم أشرقت الشمس ومنيره ناطه أصلا هي ما نامت إلا يمكن نص ساعه متقطعه وحطت قناع على بشرتها وجلست يمكن ثلث ساعه وهي ترتب في أغراضها بعدين غسلته شوي وتسمع صوت عند الباب
منيره :سلمااانوه لا تستهبل
سلمان : هههههههه شلون عرفتي ؟؟
منيره : عارفتك من غيرك يسوي هالحركات ؟؟
سلمان : ههههه ياحبيلك بس هاه وش أخبارك العروس ؟؟
منيره : خلاااص ترى استحي
سلمان : تقولين لي ليش من بدري قايمه
منيره : مادري ماجاني النوم
سلمان : أكيد تفكرين في فهودك
منيره تضحك وتحاول تصرف : امممم وانت الحين وش مقومك؟؟
سلمان : شفتي قلبي الرحوم ما أقدر أنام وانتي قايمه
منيره : لا أحسدك على هالقلب صراحه
سلمان : ههههههه لا والله أمس نايم مبكر فشبعان

جلس يضغط بجواله : اممم العنود ماقامت ؟؟
منيره : لاااا هذي إذا نامت تحداك تلمسها
سلمان : خليها ترتاح وراها اليوم شغل ملكة اختها من قدها
منيره : عقبااالكم كلكم
سلمان : آآآآآآآآآآمين الله يسمع منك عاد شوفي البنات اليوم وحده حلوه ولا لا ؟؟
منيره : أنا فاضيه لهم زين لو شفت نفسي
سلمان : بعذرك أنتي بس شوفي فهد زين تلقينه من أمس يتعدل
منيره : هههه خله يتزين أستاهل أنا
سلمان : صدق انك مصدقه عمرك امممم وش رايك اتصل فيه ؟؟
منيره : لا لا يمكن نايم تقومه
سلمان : احلقي عيني نايم تلقينه نفس الحاله عندك

يدق عليها وطبعا فهد جالس بغرفته وأصلا النوم مو مفكر فيه
وسلمان حطه على السبيكر
فهد : هلااااااااااا وغلاااااا بالنسيب
سلمان : ههههه هلا بك معرسنا وش الأخبار ؟
فهد : تمام حبيبنا وانت وش مسوي ؟؟
سلمان : والله بخير عايشين الحين ليش قايم ريح نفسك ياشيخ ؟؟
فهد : أقووول وين النوم عني
سلمان : بالله وش شعورك واليوم راح تملك وتدخل بحياتك انسانه جديده ( وهو جالس يناظر منيره ويضحك وهي متيه من الحيا )
فهد : انت احسن شي يعينوك مقدم في التلفزيون
سلمان : ههههههههه حلوه بس بايخه يالله جاوب
فهد : والله يا أخوي شعور لا يوصف فرحااان منحاس شوي خايف وبعد أزيدك مستحي
سلمان : لااااااا ما أقدر عليك انت واللي عندنا بتتقطعون من الحيا
فهد : الله يقلع شيطانك ههههههه هي عندك
سلمان : ايه نفسك بعد ماجاها النوم الله يهديكم بس
فهد : وش لك موكل فينا انت إلا قل والله اني فاضي
سلمان : ههههههههههههه جبتها والله على الصبح فيه أحد عنده شي إلا قلي مو وسعت صدرك
فهد : صراحه والله تو مليت حتى فكرت أطلع ادور بالسياره من الطفش
سلمان : تحمد ربك عندك ولد عم زيي
فهد : ترى زودتها حبتين ما تحس
سلمان :هههههههه خلاص معرسنا اليوم مفروض تصير مروق ونفسيتك زينه
فهد : لا الحمد لله ابشرك الأوضاع الحين ممتازه

جلس يسولف معاه ومنيره مرررره مستانسه وهي تسمع سواليفه وضحكه مع سلمان هالانسان اللي بيدخل بحياتها وتنتقل معه لمكان بعييده عن اهلها


العصر الساعه 5 كانت الكوفيره توها واصله وطبعا ماراح تزين إلا العنود ومنيره مع ان العنود قالت لمنى والجوهره يجون يتزينون معهم بس هم رفضو مايبون يحرجونهم

الكوفيره : من فيكم العروس ؟؟
منيره : انا
الكوفيره : الف مبروووك ان شاء الله تعيش حياه سعيده
منيره : يسلمو انتي لبنانيه ؟؟
الكوفيره : لا أنا من سوريا
منيره : ياهلا فيك تشرفنا
الكوفيره : من بدها ازينها اول
العنود : انا أبغى تسريحه ناعمه حقت ملكه
الكوفيره : اشوف شعرك ااه مش طويل باعملك تسريحه بتطلع جنان وتنخطبي كمان
العنود : ايوه كذا انا ابغى التسريحات اللي مثل هيك ههههههه
منيره : اثقلي وش مستعجله عليه ؟
العنود : ههه وش عليك يالله ابدي

العنود فستانها لونه ذهبي ناعم وما فيه إلا كرستال بسيط على جهه الوسط بس طالعه فيه تهبل

بعد ماخلصت العنود وسوت لها مكياج راحت العنود تشوف أمها عندها شغل ولا لا وعشان بعد توريها الزين
وهي نازله مع الدرج عبدالله كان قاعد بالصاله في البدايه استحت منه بعدين قالت وش علي منه
عبد الله : من هذي اختي ولا أبعد
العنود( تناظر له بنص عين) : تستهبل
عبد الله : لا من جد متغيره كثييير
العنود : عيب عليك لا تناظر البنات
عبد الله : هههه ضحكتيني تراك تحومين الكبد تحسبين نفسك شي
العنود : مقهوور أصلا تتمنى تلقى حرمه مثلي
عبدالله : لا مرتي بتطلع أحلى منك وش يجيبها لك

العنود تمشي وهي منقهره منه بس ما حاولت تبين وهي مييت من الضحك


دخلت العنود على أمها في المطبخ
أم سلمان : وش هالزيين كله بسم الله ماشاء الله
العنود : وش رايك فيني مامي حلوه أنا ؟
أم سلمان : تهبلييييين
العنود ( تبوس أمها ) : أحببببببك والله تو عبود يتهزا فيني
أم سلمان : ما عليك منه هذا وخري عن الحر لا يخرب مكياجك
العنود : لا من جد يمه ماتبين مساعده
أم سلمان : لا خليك بعيد كل شي جاهز ومنور خلصت ؟
العنود : لا توها باديه لها بالمكياج
أم سلمان : الله يوفقها يارب

منيره في غرفتها بعد ماخلصت منها الكوفيره وتتفرج على شكلها بالمرايه وكانت طالعه جماااال لا يوصف حتى لما خلصت منها الكوفيره قالت لها اقري على نفسك لا تنسين

دخلت عليها بهدوء العنود : منووووووور
منور انهبلت : يالدوووبا روعتيني حتى بيوم الملكه ما تصبرين
العنود : ههههههه وش هالحلاااوه شيييي ماشاء الله
منيره : لا صدق حلو مكياجها ؟؟
العنود : فنااانه ماشاء الله
منيره : جا أحد ؟؟
العنود : لا بس جت عمتي هيا وعمتي نوره وبنتها الكبيره
منيره : اها أهم شي لا جت ليلى خليها تطلع عندي
العنود : بتجي ليلى ونااسه أجل بنفلها ونرقص وسحر أكيد بتنهبل تحب الرقص
منيره : كلكم نفس الطبايع ومنى معكم
العنود : بنخليك ترقصين ما علي منك
منيره : ايه طيب تامرين أمر بس انا يالله بامشي وادخل عشان تبيني أرقص
العنود : يالله بنزل بشوف الضيوف
منيره : لا تنسين ليلى
العنود : طيييييب غثيتنا

منيره تحب ليلى من كل قلبها وتتمنى تفرح هالفرحه وهي بجنبها وتشاركها الكل يحسد هالبنتين على صداقتهم من يوم كانو صغار ولا عمرهم بيوم تخالفو

العنود تحت تستقبل مع أمها وبنات عمها منى والجوهره ومرة عمهم وشوي ووصلو أم منيره وبناتها
العنود : ياهلااااا والله تفضلو تفضلو
وسلمت عليهم ودخلتهم
نوره : وش هالزين عنوده ؟؟
العنود : تسلميين عيونك الحلوين وإلا انا عاديه
حنان : وش أخبار منيره ؟؟
العنود : ما عليها بخير بتشوفونها ان شاء الله

عند الرجال :
سلمان اللي شايل المكان بصوته ويهلي ويرحب وعبدالله داخل يصب القهوه
وشوي ويوصل فهد كان شكله معرس صدق هو من النوع اللي رزته حلوه وطوله
سلمان : هلا بالشيخ هلا تفضل ( وسلم عليه )
فهد : هلابك أكثر
سلمان ( يقرب من أذنه ) تبي الصراحه طالع تهبل
فهد : تسلم من ذوقك
دخل فهد وسلم على الموجودين وهو مرتبك وفي نفس الوقت فرحان وينتظر هالليله من زمان

وصلت ليلى هي وأمها
العنود : هلا وغلا ليلى
ليلى : هلابك أكثر وش أخبارك حلوتنا ؟؟
العنود : تمام والله
ليلى : وش أخبار منيره تصدقين كأن اليوم ملكتي انا
العنود : تراها مره غاثتني اطلعي لها فوق
ليلى : خلاص بسلم واطلع
العنود : منننى مننى
منى : نعم وش عندك ؟؟
العنود : اطلعي مع ليلى فوق عند منيره
منى : خلاص طيب

العنود تنتظر سحر تجي عشان يرقون لمنيره وينزلون معها وهم مفكرين يسوون لها حركه حلوه

دقايق ووصلت سحر نطت العنود لها بالحوش
العنود : اهلييييييييين ( وضمتها )
سحر : هلا بك وش أخبارك اشتقت لك والله
العنود : وانا أكثر ودايم انت آخر من يوصل
سحر : هههههه وش اسوي عاد
العنود : وين أمك ليش ماجت ؟؟
سحر : والله مره تعبانه وقالت لي اعتذر عنها
العنود : ما تشوف شر تقوم بالسلامه
سحر : الحين ليش موقفتني بالحر
العنود : تصدقين نسيت عمري بس انصحك افصخي عبايتك هنا وشوفي المرايا هذي أحسن
سحر : خلاص طيب بس تعالي عدلي لي شعري كانه خربان
العنود : لا تخافين ماراح يخطبونك اليوم هههه
سحر : سخيفه هذي أفكارك أصلا اما انا لا
العنود : ياعيني على اللي تفكيرها راقي
سحر وهي تعدل شعرها : ليش ما عزمتي أ ـ ابتسام ؟؟
العنود : والله فكرتي بعيدن قلت لا الملكه مختصره بالعرس بعزمها
سحر : اها طيب كذا حلو ؟؟
العنود : ايه حلوه تجنننننين
سلمان كان داخل ولاهو شايف أحد : العنود تعالي
( بس فجأه انتبه لوحده بجنبها وبالصدفه صارت عينه بعينها هو أصلا مختب عشان كذا ما عرف يمكن حتى العنود )
العنود : لااااااا لحظه
( نزل عينه ولف على جنب العنود جت تركض له )
سلمان : العنووود من هذي؟؟
العنود : مالك شغل لا تسأل عن البنات
سلمان : والله ما عرفتها أحسبها انتي انتم لا حطيتو المكياج تنقلبون
العنود : حلوه التصريفه ما تمشي علي أي أوامر ؟؟
سلمان : جيبي لي فناجيل زياده
العنود : خلاص طيب ولا تدخل مره ثانيه إلا مستأذن
سلمان : انتم أصلا وش مقعدكم في الحوش
العنود : بعدين أتفاهم معك

سلمان سحر رسخت في بالها لأنه شافها قدامه ومستحيل تنمحي من ذاكرته سحر من النوع اللي نظرته واستدارة وجهها حلو وهي اللي لفتت انتباهه بس قال بعدين بعرفها

طلعت ليلى عند منيره
ليلى : سلااام عروستنا
منيره : ليلى ( وتبتسم لها بكل حب )
ليلى شافت صديقتها ورفيقة عمرها راحت تركض بسرعه وضمتها لصدرها
ليلى : مبروووك غناتي والله يوفقك
منيره : الله يبارك فيك وعقبالك
منيره جتها الصيحه بس ماودها تخرب مكياجها بس هي عارفه لا شافت أمها ماراح تقدر تتحمل وتخرب المكياج وكل شي

طلعت العنود بسرعه لأن الكل يسأل عن منيره لأنها تأخرت
العنود : منووووووور
منيره تناظر لها وباين ان العبره خانقتها : نعم
العنود : لا لا حبيبتي
ليلى : خلاص لا تصيحينها ناقصين

دخلو سحر والجوهره وسلمو عليها وباركو لها ووسعو صدرها شوي وبعدين نزلوها وهي يالله تمشي وكانو مسويين لها زفه صغيره لأن الدرج حقهم حلو والحريم كانو قاعدين في الصاله لان صالتهم كبيره وفخمه وحاطين لها كرسي بالنص

نزلت بارتباك وليلى بجنبها ومن الجنب الثاني العنود ماسكتها وسحر معاها الورد تكب عليها وكانو مشغلين

حد منكم شاف في الدنيا بدر
مقبلن يمشي ومن حوله بشر

من حلاه يزف للناظر ضياه
إن ظهر للناس ولا ماظهر

مشت بكل حيا ومنزله راسها والحريم كلهم يذكرون الله عليها الوحيدين اللي كانت فرحتهم ما تساوي أحد هم أمها وخواتها

بعد مانزلت جو يسلمون عليها والكل بارك لها وجت أمها وهي من يوم دخلت عيونها ما فارقت أمها اللي وجهها يلمع من االدموع

أمها : الله يبارك لك ويوفقك ويسعدك ( قالتها وهي دموعها ما فارقتها )
منيره ( نزلت دمعتها وضمت أمها قدام الكل ونست انها عروس ونست شي اسمه كشخه ومكياج وصارت تصيح والكل يهديها طبعا كلهم يعرفون حياتها كيف انها ما عاشت مع امها
سلمت على حنان ونوره وريما وباركو لها

شوي وجلسو البنات يستبهلون معها عشان تنسى وشغلو المسجل يرقصون وهي صفقت لهم
العنود : عاااشت سحر عاشت
سحر ما تصدق شي اسمه رقص والكل يسأل من بنته هي وليلى لأنهم ما شاء الله طالعات حلوات

أم فهد تأشر على نوره وحنان : هذولي خوات منيره صح ؟
أم سلمان : ايه ما تذكرينهم
أم فهد : إلا بس ناسيه ما شاء الله الله يحفظهم وش رايك نخطب وحده لسعود ؟؟
أم سلمان : توه سعود على العرس
أم فهد : ما عليك الشباب هالوقت يبون العرس مبكر
أم سلمان : لا والله عن نفسي سلمان ما راح أزوجه الحين إلا إذا أصر مره
أم فهد : بيني وبينك سعود ما قد قالي بس بفاتحه يمكن يعجبه هالشي
أم سلمان : والله براحتك بس ترى إذا خذتي وحده منهم ترى ما عليهم جمال وأخلاق وأمهم بعد ما عليها كلام
أم فهد : حمستيني أكثر أجل

دق جوال أم سلمان وكان أبو سلمان يقول خلي منيره تجي عشان توقع على الموافقه

أم سلمان مسكت يدها وهي ترتجف : يالله حبيبتي أبوك يبيك
منيره : ان شاء الله

مشت وحلست بالمجلس ودخل عليها سلمان معاه الكتاب
سلمان : هلا منوره وش هالحيا ؟؟
منيره تكتفي بابتسامه حلوه وبس
سلمان باسها : الف مبرووووك ياقمر وش هالحلاوه ؟
منيره وجهها طلع أحمر : الله يبارك فيك
سلمان : هاه موافقه على شخص اسمه فهد ال.....
منيره تضحك بخفيف
سلمان : لازم نسمع صوتك تكلمي ولا مافيه بنطرده الحين
منيره تعرف أخوها واستهباله لازم يحرجها
أم سلمان : خل البنت موب لمك اليوم هي
سلمان : لا بس حبيت أستهبل معها
منيره : لا عااادري سلمان فرحتي تكتمل فيكم
سلمان : الله يوفقك يارب امسكي ( ويعطيها القلم )
منيره ترتجف يده موب قادره توقع وبعد محاولات وقعت
سلمان يقرب من عندها : منور
منيره : هلا
سلمان : فهد يبي يدخل اليوم عادي
منيره : لا لا مره مرتبكه
سلمان : شوفي بروح الحين وبدق عليك فكري زين تونا
منيره تهز راسها وتسكت

العنود : الف مبرووووووووك (وتضمها )
منيره : الله يبارك فيك عنودتي
العنود : وش شعورك وكيف حسيتي ؟
منيره : فاضيه لأسئلتك
العنود : خخخخ شكل في راسك شي
منيره : تو سلمان يقولي فهد بيدخل اليوم أخليه ولا لا ؟ظ
العنود : بيني وبينك وااافقي
منيره : انتي وش همك كل شي بيطلع فوق راسي
العنود : لا اسمعيني الحين انتي متزينه وكاشخه وشو له ؟؟
منيره : اممم عشان ملكتي
العنود : ياغبيه عشانه هو فخليه يدخل ويطيح اللي في راسه
منيره : والله انك دايم تخربين أفكاري
العنود : بالعكس أصلحها هههههه

دق سلمان بسرعه وقالت له خلاص يدخل منيره حز في خاطرها شي واحد ليه أبوها ما دخل يبارك ؟؟ بعدين قالت يمكن الحين بيدخل إذا دخل فهد

عند سلمان كان جاي لفهد
فهد : هاه وافقت
سلمان يهز راسه : للأسف لا
فهد : لاااااا قهر ليش ما أقنعتها
سلمان : مافيه شي اسمه غصب

فهد احترمه وسكت وشكله ضاق صدره
سلمان : إلا عاد زعلك يالمعرس تعال
فهد : تتكلم من جد يعني موافقه هي
سلمان : ايه وأصلا تقدر تقول لا
فهد : حتى في هذي الأوقات تلعب بأعصابي
سلمان يغمز له : كل هذا شوق ممدي بتمل منها
فهد : مالك دخل لا جت حرمتك نشوف

راح عبد الله مع سلمان عشان يبارك لها

سلمان جا في باله ان أبوه ما دخل وسلم على منيره وهذي النقطه حسااااسه عندها وأكيد بيجي بخاطرها
سلمان : لحظه فهد بس بشوف أبوي

سلمان راح يدوره شافه جالس مع الرجال أشر له وجا
أبو سلمان : وش بغيت صاير شي
سلمان : يبه اممم ما ودك تدخل تسلم على منيره
أبو سلمان بدون نفس : خلاص جاي معك فهد بيدخل ؟؟
سلمان : ايه بيدخل

مشى سلمان ومعاه أبوه والباقين
منيره عدلت لها المكياج العنود وعطرتها طق الباب أول ما رفعت عينها لقت قدامها أبوها اللي مفروض يناظر لها بنظره حنان وحب بس للأسف كأنه مغصوب هي كانت تتوقع الموقف بيلين قلبه بس للأسف ما سوى شي

أبو سلمان : على البركه الله يوفقكم ( وهو يسلم ) وبعدها طلع بسرعه

دخل عبدالله وسلم عليها وحلس يسولف معها شوي وبعدين طلع عاد بعدهم دخل سلمان وفهد اللي ما وسعته الأرض من الفرحه
فهد : السلام عليكم
منيره يوم سمعت صوته وهي جايها خوف وارتباك حتى ما قدرت ترد على السلام
جلس فهد قبالها وهو منزل راسه مرتبك
سلمان : الحين بتقعدون كذا
فهد يبتسم : وش أخبارك منيره ؟؟
منيره بهمس وبصوت خفيف : بخير

فهد ناظر لسلمان وأشر له يطلع ويوم قام منيره بدت نبضات قلبها تزيد
فهد : الحين جلسنا لوحدنا ما بغى يقوم
منيره اكتفت بابتسامه
فهد : على البركه الله يوفقنا
منيره بابتسامه حلوه وهي مو راضيه ترفع راسها : آمين
فهد : وش هالحلاوه كله عشاني ههه
منيره خلاص صارت طماطه من الحيا
فهد : من جد ما توقعتك بهالزين الله يحفظك أهم شي قريتي على نفسك
منيره تهز راسها ( ايه )
فهد : الحين ليش ما تتكلمين بظل أنا اللي أسولف
منيره ما تدري وش تقول
فهد : لا عادي مقطعكم الحيا انتو يالبنات
منيره ما توقعته بهالجراءه تحسبه بيستحي شوب بس هو فالها من أول يوم
فهد : عاد عشاني ارفعي عيونك شوفيني من اليوم وأنا أتزين حرام يضيع الزين ههههه
منيره هالمره ضحكت عليها ورفعت عينها بحيا
فهد : ايه كذا أحس فيه أحد معاي

ماطول معاها جلس شوي وشرب العصير ومشى ووعدها بجيات ثانيه أكثر

منيره يوم راح حست انها خلاص هو كل شي بحياتها يعني مالها إلا هو واللي ريحها هو مره معاملته معاها حلوه ودعت ربها يسعدهم
دخلت عليها العنود : منووور هاه قولي لي بالتفصيل كل شي
منيره : وش دخلك صدق انك ملقوفه
العنود : أنا أختك اللي مالك بهالدنيا سواها و
منيره تقاطعها : خلاص ابشري من عيوني بس مالي خلق أتكلم بعدين بسولف لك
العنود : ماشي مع اني أحس انك تصرفيني على فكره ليلى تسلم عليك كثيييييير
منيره : الله يسلمها ليش ماجت تسلم علي قبل
ليلى : جو أهلها وانتي حضرتك عندك زوجك وقالت سلميني عليها
منيره : الله يسلم قلبها ( وتحط راسها على الكنب )
العنود : وش فيك تعبانه ؟؟
منيره : مرررررررره تعبانه بموت من التعب تعالي شيليني
العنود : والله لو أقدر عادي ما تهونين علي
منيره : والله شغله يبغى لي أغير ملا بسي وأتروش عجزااانه
العنود : لازم تتحملين وتصيرين قويه وبعدين إذا جوك عيال وش بتسوين
منيره : الحين مو فاضيه لفلسفتك اسكتي

هالليله مضت سريعه وكانت بعيون منيره بطيئه ماتدري ليه قبل لا تحط راسها وتنام فتحت جوالها لأنها كانت مقفلته وصلتها رسايل من صديقاتها يباركون لها وآخر رساله استااااانست لما قرتها كانت من فهد كاتب

( اليوم كنتي قمر ماشاء الله وجمالك ما أقدر أوصفه صراحه يالله حبيبتي نوم العوااافي )

ودها ترد له بس مستحيه وجلست تفكر بكلام ترسله وأخيرا كتبت ( تسلم وتصبح على خير )
هي ما ادري كيف طلعت منها هالكلمات وهو يوم قراها استاااانس انها عبرته لو برساله وبعد مافيها مشاعر لكن بعذرها أول الأيام بتكون مستحيه شوي



من بكره الكل نايم ولا عندهم نية يقومون طبعا بعد التعب اللي أمس تعبوه قام أبو سلمان وزوجته يتقهوون
أبو سلمان : ماشاء الله أمس الناس كثيرين ما توقعته كذا
أم سلمان : زين والله حنا الحريم أقل شوي وأحسن أنا ماودي انها تكبر
أبو سلمان : الله يعين عاد العرس باقي لنا
أم سلمان : ماحددتو اليوم ؟؟
أبو سلمان: إلا حددنا بنهاية شهر 7 خلي البنت تتجهز من الحين
أم سلمان : الله يوفقها يارب والله بفقد حسها في البيت وصجتها مع اخوانها
أبو سلمان سكت شوي وقال : بالعكس زواجها خيره لها
أم سلمان : هذي بنتك مفروض ماتنام الليل عشانها الحين هي بتنقل لأبها موب عايشه عندك الله يهديك بس
أبو سلمان : أقول البنت ترى تتدلع أكثر من اللازم وحساسه كثير
أم سلمان : والله لو تدلع كل عمرها مفروض انت تعطيها عيونك يكفي الحياة المشتته اللي عايشتها بينا وبين أهلها
أبو سلمان : أبد هذي موب حجه
أم سلمان : وش قرق العنود عنها قلي ؟
أبو سلمان : أصلا ما فيه مقارنه
أم سلمان : إلا قل المشاكل اللي حصلت مع أمها السبب مع ان البنت وش ذنبها ما حست بالحنان أمها حارمها منها وأبوها ما يعبرها
أبو سلمان : انتي وش عليك ببنت الناس تدافعين عنها ؟؟
هنا أم سلمان انقهررت ليش يقول عنها بنت الناس : منيره بنتي مثل ما العنود بنتي ومابينهم فرق وغلاهم عندي واحد

منيره كانت نازله مع الدرج وسمعت هالكلمه من أم سلمان في نفس الوقت استانست انها عوضتها شي كبييير من اللي فاقدته وضاق صدرها ليش أبوها إلى الحين ما تغير أنا بروح وأسافر بعد كم شهر وهو ولا فيه ذرة احساس علي ..

أبو سلمان كالعاده إذا انفتح معها نفس الموضوع يحب يسكره بسرعه
أبو سلمان : طيب وين الشاهي ترى راسي مره يوجعني

راحت أم سلمان تسوي الشاهي

نزلت منيره وباين انها تعبانه ومانامت زي الناس
منيره : السلام عليكم
وجت حبت راس أبوها : صباح الخير يبه ( وحبت تغير الجو عليه ) ولا آسفه موب صباح الدنيا الظاهر نمنا وما حسينا بأنفسنا ههه

ابتسم أبوها : صباح ولا مسا كله واحد الله يصبحك بالخير
منيره : وش أخبارك أبوي ؟؟
أبوها : الحمدلله

سكتو وهي تحاول تجيب سالفه تغير فيها هالصمت اللي دايم يصير إذا كانت حاضره وأخيرا تكلم وليتها ما تكلم
أبو سلمان : تدرين زواجك بنهاية سبعه
منيره : حددتو ؟؟؟؟؟؟؟؟؟
أبو سلمان : ايه أمس اتفقت أنا ووفهد وهو بيقولك

منيره * وأنا ما لي راي ولا روحي ونفتك منك بس *

خذت نفس وحاولت تكتم اللي بنفسها وهالجرح اللي تعانيه أبوها اللي بيوم من الأيام قد ما تقدر تحاول ترضيه وتسعده وتبعد الأسى عن وجهه جلست تتذكر يوم كانت صغيره وكيف يعاملها مع انها توها ما فهمت بس يوم كبرت عرفت وش قصده يوم من الأيام وهي عمرها يمكن 6 سنوات كانت تلعب بالشارع مع ليلى طبعا صديقة العمر وسلمان كان صغير ويلعب بالسيكل جا أبوها وشافها وهي تلعب قال بكل عصبيه وصرخ بوجهها : الحين ليش طالعه قولي لي كم مره قلت لك الشارع ما تطبينه
هي بكل براءتها قالت : يابابا كل البنات مثلي يلعبون
هو قال بدون تفاهم : بس انتي ما تلعبين بسرعه دخلي سلمان

راحت تجيب سلمان وهو يصرخ ويصيح يبغى يجلس يكمل لعبه مع العيال
أبو سلمان معروف بمعاملته الراقيه مع عياله كلهم وحرصه على تربيتهم إلا هالإنسانه موقف مالها دخل فيه خلاه يظلمها

أم سلمان : منوور
منيره : هلا يمه ماانتبهت ( وتقوم تحبها على راسها ) وش أخبارك اليوم ؟؟
أم سلمان : أنا بخير بشريني عنك
منيره تبتسم لها : الحمدلله عسى ما تعبتي أمس
أم سلمان : لا والله من فرحتي لك ووناستي نسيت كل التعب
منيره بنظره كلها حب : الله لا يحرمني منك ( وتضمها وتصيح وأم سلمان ما تحملت دمعت عيونها وهي تشوف وحده غاليه عليها ربتها من يوم هي صغيره وتعودت عليها وبهاللحظه تنتقل لحياتها الزوجيه فرحه كبيييره ما وسعتها انها قدرت تطلع بنت مثلها )

في بيت أبو فهد
فهد كان قايم مبكر ولا جاه النوم راح ونزل تحت لقى أمه وسعود جالسين دخل وسلم عليهم وصبحهم بالخير وجلس يسولف عن الملكه وباين انه فرحان ومبسوط

لحظه صمت في وقتها كانت أم فهد تفكر أنها تكلم سعود عن خوات منيره وهي مقرره تاخذ نوره له بس موب عارفه ولدها بيتقبل ولا لا ؟؟
أم فهد حبت ما تبدا في الموضوع بسرعه فقالت : سعود وش رايك بالعرس ؟؟
سعود : يمه هذا مايبي له راي أكيد حلو ولا فهد ؟؟
فهد يضحك : اممم والله يعني
سعود : باين يعني قل إلا بتشقق من الوناسه
أم فهد : اسمعني ياولدي بصراحه انت رجال وما عليك كلام وكل بنت تتمناك
سعود : امممم بس ما فكرت الحين بالزواج المهم كملي * هو في باله يقول ياااارب انها العنود يااارب ان أمي حاطه عينها عليها *
أم فهد : أمس شفت خوات منيره وفيه وحده منهم مره ما عليها كلام زين وأخلاق وأدب
سعود * لاااااااااااااا أنا أبي العنود وبس * : لا يمه خليني عن العرس وغثاه
أم فهد : عارفتك تو تمدح العرس والحين لا
سعود بدا يتضايق : خلاص يمه قفلي الموضوع إذا جيت با عرس بقولك من هي البنت اللي أبيها
أم فهد : لا والله وكبرنا ياسعود وانت وش عرفك بالبنات تخطبهم
سعود يحرك رجوله بعصبيه بس هو ماوده يرفع صوته على أمه : طيب يمه انتي تخطبين لي بس مو الحين
أم فهد : طيب قلي من اللي تبيها وأخطبها لك
سعود ساكت ماتكلم
أم فهد : تغبي علي وأنا أمك
سعود : خلاص بقولها بس ما ترفضين
أم فهد : بشوف على حسب البنت
سعود : لا هي البنت ماعليها كلام ولا تقدرين تسبينها هي ( وبعد تردد ) العنود
أم فهد تبتسم : وكل هذا حيا
سعود يلتفت على أمه : وش قلتي الله يخليك وافقي
أم فهد : أنا ما قد فكرت بالعنود تكون لك وأحسها ياولدي ماتناسبك
سعود : ليش يمه وش فيها ؟؟
أم فهد : بس أنا أعرف البنات أكثر منك

سعود سكت وهو مقهور *مااابي إلا هي ولا مابي أعرس حرام إذا حطيت في بالك أحد وهم يحرمونك منه خصوصا انها ما قد سمعت عنها إلا الخير ليش أمي رافضه ؟؟عموما أنا لو يصير اللي يصير ماراح آخذ إلا العنود ولاموب لازم أعرس *

حبايب ذكرهم ما غاب ...سعاده قلبي وياهم
حسافه يازمن غلاب....ندور كيف نلقاهم



منصور
هالانسان يخطط ويبني بعقله أفكار ماحد يدري وش هي وضحيتها الجوهره

كانت جالسه بغرفتها ونوعا ما ناسيه سالفته بعد الملكه اللي صارت أمس وصلتها رساله



الجوهره حرام الحرمان اللي حرمتينياه وسهر الليل أدري انك تبتي
وهذا اللي أعجبني فيك وأنا بعد استحقرت الأيام اللي راحت عشناها بظلام فطلبي الوحيد أن تقبليني إذا خطبتك



انصدمت قعدت تقرا الكلمات عشر مرات وتتذكر كلام غاده * معقوله تاب وحس بغلطته ويبي يتزوجني أوافق لا لا أنا وش أبي به واحد رضى يكلمني أكيد يكلم غيري بس هوتاب ما أدري محتاره كثير باخلي أهلس يسألون عنه وأكيد كانه تايب صدق راح يوصلهم خبر


سعود هالسالفة نكدت عليه وقرر يصارح سلمان فيها
دق على سلمان اللي في سابع نومه ولا فيه أمل يقومه أحد لكن سعود أصر وقومه
سلمان وكله نوم : نعم
سعود : يكفي نوم يالله قم حشى كم ساعه وانت نايم
سلمان : والله ما ني فاضي لك أكلمك بعدين
سعود : لا الله يخليك قم
سلمان : طيب خلاص قايم
سعود صدقه وهو حط الجوال بجنبه وكملها نومه وطبعا غير الجوال وحطه صامت عشان يرتاااااااح من المكالمات والصجه

انتهى الجزء .......................................