الجزء السابع

كان المكان ظلام والجو بارد موقف بسيارته ومشغل اللمبات وحاط راسه على مرتبة السياره وعايش في أفكاره كانت الساعة 1 ونص تقريبا
سلمان اللي شايل هموم الدنيا فوق راسه اختار هالمكان عشان يكون بعيد عن العالم يبغى يصفي هالتشويش اللي حصل له ..
كأنه عايش حلم ..
منيره وخطوبتها السريعه..
ولا كأني قبل شهر تقريباً طالع من المستشفى وكنت على وشك الموت ...
وعبد العزيز صحيح نسيته بس هو أكيد ينتظر كلمة عفو مني ولا من سعود بس أنا عن نفسي مابردت قلبي عليه خله شوي يتأدب والسالفه اللي مشغلتني أكثر أبوي ..
ليش إذا شافنا حنا يكون مرتاح ولا يتضايق أما منيره لا كانت موجوده قلب الدنيا وعفسها مع أنها ياعمري ماشفت منها في حياتي شي يضايق طيبة قلب وسماحة وأخلاق وتدور سعادتنا دايم وأنا خايف من موافقتها اللي جت سريعه وفهد الله أعلم وش مصيره مع أختي ...
أنا أبي أعرف وش قلب حياتنا فجأة وبدون مقدمات بس الله له حكمة في كل شي
<<< عاش على هالأفكار وشوي يشوف جواله يأشر لأنه كان على الصامت وكانت المكالمه من أبوه
سلمان : هلا يبه السلام عليكم
أبوه : وعليكم السلام وينك تأخرت ياولدي ؟؟؟
سلمان : هذاني في الطريق جاي
أبوه : لا تتأخر بكره ورانا سفر
سلمان : إن شاء الله بس زحمة الطريق

سكر من أبوه وحرك السياره راجع للبيت
منيره والعنود كانو يرتبون ملابسهم عشان السفر
العنود : وش آخذ معي أكثر ملابس بيت ؟؟؟
منيره : لا بالعكس خوذي معك بلايزك الحلوه وكم تنوره لازم بتلبسين كل الوقت بملابس البيت
العنود : ايه صح ... أقول منيره ودي أكون أنا ومنى بنفس الشقه يعني ما نفترق حلاة السفر كذا
منيره : صعبه اخواني وين يروحون ؟؟؟
العنود : المفروض العيال ياخذون لهم شقه خاصه يعني فهد وسعود وحمد وسلمان وعبد الله في شقه مو أحسن ؟؟
منيره : صح اقترحي هالاقتراح عليهم

العنود : منيره بسألك بما أننا بنروح مع منى والجوهرة في مكان واحد أنا يضيق صدري لا شفت واحد من بيننا متنكد أو متضايق يعني الجوهره ليش كذا تعاملنا ؟؟؟
منيره : والله بصراحة ماني عارفه وش أقولك ؟؟؟
وحاولت معها بس هي مرره ماتستجيب ورافضه الفكره أنها تدخل بيننا
العنود : وش رايك منيره في هذي السفره نخلي الدنيا تصفى علينا ونعيشها كصديقه لنا وتستحي من تعاملها لنا
منيره : هههههههه ياحبيلك يالعنود أنتي وأفكارك بنحاول ويصبر خير

العنود فاتحه الدولاب تتنقى لبس وشافت لبس مصري كان عندها من زمان
العنود : منيره تذكرين هاللبس هههههههههه
منيره : هذا اللي لبستيه في مدرستكم يوم الحفله كنت في أول متوسط صح ؟؟؟
العنود : اللللللللللللللللللله ذكريات حلوه بس أتوقع اني سمنت وماراح يدخل فيني
منيره : وش دراك جربي من قال انك سامنه مو مره
العنود خذت اللبس تقوسه
العنود : وش رايك هههههه طالعه مصريه صدق
منيره : أقول خليه في الولاب أحسن
العنود : ما تعرفين تجاملين قولي فديتك أصلا هو موب حلو بس يوم لبستيه طلع حلو
منيره : ياحبلك للتمديح

سلمان دخل للبيت ولقى البيت مطفى اللمبات والكل نايم طلع لغرفته وشاف نور من غرفة البنات قال وده يوسع صدره مافيه نوم
سلمان يطق الباب
العنود : سلومي ادخل
سلمان يدخل مبتسم : سلام خواتي
العنود تحط يدها قدامه: هلا والله محسوب لك تأخير اليوم بعد الساعة 2 ما حد يدخل كم مره نعيد الكلام
سلمان يوخر يدها : تونا قاضين من الجامعه وخري
العنود : ههههههههه
سلمان : شكلك من زمان ماضحكتي ويلتفت على منيره : وش أخبارك منور .؟؟؟
منيره : تمام عايشين
سلمان : خلصتو أغراض السفر
منيره : تقريبا خلاص متى بنمشي ؟؟
سلمان : ما ادري يمكن الساعه 10 الصبح لأنهم يبون يوصلون مبكر
العنود : أجل خلونا ننام عشان ما أنام بالسيارة تلقين منى الحين في سابع نومه وبكره تجلس تستهبل علي
سلمان : ههههه وأنتي وبنت عمك هذي نكته
العنود : ايش ماسمعت ما أسمح لك ترى نسواك
سلمان : بسم الله علينا ترد الصاع صاعين يالله تصبحون على خير
منيره والعنود : وانت من اهله
منيره : العنود طفي اللمبه بناااااااام
العنود : وين تنامين هنا في الأرض
منيره : مشتهيه هالمكان هاتي الوساده والبطانيه
العنود : أجل أنا بجيب وسادتي بعد ليش انتي ؟؟
منيره : الله يعين على الغيورين بكره أقوم الصبح وألقى رجلك في وجهي تسوين مصارعه إذا جيت تنامين انتي
العنود : لك الشرف العنود أختك الصغيرونه نايمه جانبك
منيره : قال قال صغيرونه جيبي الوساده بس
العنود : خوذي

وتجيب العنود فراشها وتنام بجنبها اللي يشوفهم ماعندهم سرير بس كذا تغييير مكان

العنود كانت ودها تكون بجنب منيره دايم ولا تحسسها أنها وحيده
رافعه راسها لفوق ولا جاها النوم
العنود : منيره
منيره : وش عندك ؟
العنود : اممممم بسألك بس لا تعصبين
منيره : لا عادي ليه أعصب ؟؟
العنود : منيره ليش وافقتي على فهد ؟؟
منيره خذت نفس : العنود انتي لو بمكاني بتوافقين
العنود : ليش انتي ماتبين ؟؟
منيره : بصراحه عادي أوافق ولا لا ومادام هالشعور فيني ليش ما أسعد أبوي بأني أوافق
العنود : بس حتى لو لا تقدمين سعادتك على حساب أبوي
منيره : خلاص أنا وافقت ومتفائله من المستقبل

غمضت عينها ونزلت دمعتها كانت بس تمني نفسها بشي يمكن كذب سمعت صوت رساله جايه على جوالها
فتحتها وقرت
( ألف مبروك حبيبتي والله يجمع بينكم بخير ويوفقك يااااااااااارب يوم سمعنا موافقتك أمي وافقت وانا ) المرسل : رورو

منيره ( يعني أبوي أمس كلمهم أنا بعرس صدق ولا هذا كذب ليت أحد الحين يضربني ويقول منيره قومي انتي في حلم مو مصدقه )

غمضت عينها ونامت وهي تحمل في قلبها معاناة ما يقدر أحد يشيلها

في الصباح الساعه 10 كانو يحملون أغراض السفر
أم سلمان : العنود نزلتوا أغراضكم كلها ولا بقى شي
العنود : لا خلاص أتوقع منيره جبتي الكاميرا ؟؟
منيره : ايه معاي

أبو سلمان يدخل : يالله اركبوا ما بقى شي بسكر الباب
لبسوا عباياتهم منيره تذكرت دفتر مذكراتها نسته وطبعا هو أهم شي عندها
سلمان ومنيره والعنود في سياره
وأبوهم والباقين في سياره

في الطريق سياره سلمان
العنود : سلمان عندي طلب
سلمان : حتى على الصبح طلبات يالله صباح خير
العنود : لا بس ودي أركب مع سيارة منى
سلمان : منى أكيد راكبه مع سعود ومافيه
العنود : لا عادي نركب مع عمي أنا وياها
سلمان : لحظه بدق عليه وأشوف

ودق عليه
سلمان : السلام عليكم
سعود : وعليكم السلاااام حياك الله
سلمان : الله يحييك صباح الخير
سعود : صباح النور
سلمان : مشيتو ؟؟
سعود : ايه لنا ربع ساعه طالعين
سلمان : الله يعين إلا بسألك من معك في السياره
سعود : معي منى وحمد ليش ؟؟
سلمان : فيه ناس مزعجين عندنا يبون أختك
سعود : ههههههههه الله يعافيك تسوي فينا خير لا خذتها مزعجتنا
سلمان : ههههههه لا الله يجزاك خير نبي نصرفهم كلهم عند عمي
سعود : لا ترى أمزح خلها تجي معنا
سلمان : لا وين معك حمد بعد
سعود : على راحتك بس أبوي سابقني ما اقدر أوقفه
العنود تأشر له ( الله يخليك )
سلمان : خلاص وقف عند المحطه جايك
سعود : خلاص

سلمان يلتفت على العنود : اسمعي اول شي استأذني من أبوي وثانيا إياني وإياك حركات استهبال مالها داعي فاهمه خليك عاقله
العنود : وش قالو لك مو مؤدبه كلي أخلاق

سلمان يلبق عند المحطه وإلا سعود جاي
سلمان يفتح الشباك : هلا كيف الحال ؟؟
سعود : الحمد لله يالله اخلص تأخرنا سبقونا
سلمان : يالله العنود
العنود : طيب طيب نازله منيره هاتي شنطتي وخذت معها الجوال عشان يتصلون عليها

ونزلت وهي شوي مستحيه من عيال عمها
فتحت السياره وركبت
العنود : السلام عليكم
الكل : وعليكم السلام
سعود : وش أخبارك العنود ؟
العنود : الحمدلله << بصوت واطي

منى : أقول العنود ترى معي اللاب توب أجيبه
العنود : وش تنتظرين هاتيه ؟؟
منى : ماقلت لك أمس دخلت على المنتدى وقلت لهم بروح مكه مساكين ضاقت صدورهم
العنود : الله وأكبر وش بيفقدون
منى : من زينك
العنود : فديت قلبها شهوده مرسله لي على الصبح رساله
منى : الله يخلف على العقل بس

حمد : سعود جوعان أبي فطور
سعود : شوي وبنوقف انتظر
حمد : ما عندك شريط حلو نسمعه

العنود قاطه معهم : أنا عندي وتحوس بشنطتها وطلعت شريط كانت مجمعه فيه أصوات مررره حلوه
والأخت كانت بتمده لسعود نست عمرها تحسبه سلمان وهي جايه بتمده سحبته منها منى وعطته سعود
هنا العنود تفشلت ( الحين وش بيقول عني قليلة أدب )
سعود يقلب الشريط : وش فيه ؟؟
العنود بالقوة تكلمت: منوعات أنا جامعتها
حمد : شغله بس شكله حلو
سعود يناظر له باحتقار ويشغل الشريط

العنود ( تقول في نفسها ليتني ما ركبت معكم )
العنود سكتت ومنى تسولف على راسها بس البنت في عالم ثاني
دق جوالها وكان مكتوب رورو هي ببراءتها تحسبها وحده من صديقات منيره
العنود : الو
ناصر : هلا وغلا
العنود انهبلت ( معقوله منيره تكلم شباب وتقصر صوت الجوال عشان مايسمعون ولو شوي من صوته )
العنود : من أنت
هنا ناصر عرف انها مو منيره
ناصر : وينها منيره
العنود انقهرت وبكل جراءه يقول اسمها
العنود : بس ما قلت من معي
ناصر حس انها شكت في الموضوع : أنا ناصر أخوها
العنود انحرجت لأنها تو تنافخ عليها ( وش هالفشايل اليوم مع سعود وهذا شكلي اليوم مسويه ذنب )
العنود : الجوال معي وهي مو عندي دق على سلمان إذا بغيتها
ناصر : مشكوره ,آسف إذا أزعجناك
العنود انحرق وجهها : العفو وسكرت منه وودها تصيح من الفشيله

سعود درى انها تكلم ولد
سعود : مين اللي تكلمينه ؟؟
العنود ( وش دخلك ) : هذا ناصر
سعود انهبل وش ناصر بس هي ودها تقهره على اللقافه
سعود : ما أخبر تعرفين واحد اسمه ناصر
العنود : لا الجوال حق منيره
فهم سعود السالفه وسكت

الجوهره في سيارة أبوها بقوووووووووه طفشانه وكانت فاتحه جوالها وحاطه السماعات في اذنها وتتسمع
سهى : الجوهره
الجوهره ماتسمع عشان السماعات
سهى تطقها على رجلها : الجوهره
الجوهره : وش تبين ؟؟
سهى : وخري شوي أبي أنام
الجوهره : توك قايمه وشو له تنامين ؟؟
أم سلمان : خليها تنام مسكينه طفشت
سهى تحط راسها على الشباك وتنام لأنها تعرف الجوهره ماراح تعطيها مجال

سعود وقف عند البقاله ووقف وراه سلمان
سعود وهو نازل : حمد بتنزل ؟؟
حمد : ايه جاي يلتفت على البنات وش بغيتو؟؟؟
منى : جب لي كروسان جبنه وعصير مشكل وانتي العنود وش تبين ؟؟
العنود : مابي شي
منى : بلا سخافه حمد جب لها أي شي

نزل حمد
منى : العنود وش فيك والله أخوي تراه حبيب ما يقصد
العنود : قال قال حبيب وليش شاك فيني يوم أكلم
منى : مو قصده بس لو أي أحد بمكانه بيشوف نفس النظره
العنود : حتى ولو
منى : عاد اللي يشوفه هاوشك ولا شي بس سألك وانتي كبرتي السالفه
العنود : دافعي عنه أخوك بعذرك
منى : مو قصدي أخوي ولا شي خلاص انسي
العنود : والله ما اقدر بدايتها يوم أمد له الشريط والحين عشان المكالمه ما اقدر أناظر له من الفشله


في البقاله
حمد : أقول سلمان أختك وش تاكل ؟؟
سلمان : جب لها أي شي كل شي تاكله هي
حمد : هههههه
حمد نوع لهم شوكلاتات وعصاير وكم شيبس

يدق الجوال عند العنود وشافته شهد بس ماردت
منى : وش فيك ردي على الجوال
العنود : لا مابي أتكلم وأسولف وأخوك الحين بيجي خصوصا أنها شهد
منى : أخذتي رقمها ؟؟
العنود : ايه فاتك ياحبيلها وسولفنا مررره عسل بس كانت منحرجه شوي وقلت لها بنسافر
وصلتها رساله من شهد وبالأصح نقول ( سامي )

حبيبتي عنادي بس حبيت أشوف أخبارك وصلتو لا لا ؟؟
وشكلك مشغوله يالله غناتي دقي علي لا شفتي الرساله مشتااااقه لك

العنود تقرا الرساله وتبتسم على كلامها ردت لها
فديتك والله الحين بالطريق بس ما اقدر أرد لأني بسيارة ولد عمي وماراح آخذ راحتي لا وصلنا بكلمك قلبي

سامي استانس على كلامها قلبي وفديتك وصدق عمره خلاص ويتمنى بس يشوفها

الساعه 3
فهد كان توه قايم وموعد الطياره الساعه 4 العصر هو مايحب طريق السفر ووده يسافر معهم لمكه خصوصا هالمره بتكون غير مع انه ماسمع الموافقه من عمه بس الأخ ضامن

سعود حاس ان العنود متنرفزه منه لأنها أول مادخلت كانت تضحك ومستانسه وفجأه انقلبت
سعود : حمد الحين جوالك ليش مايسكت
حمد : على راسك خله موسع صدري
ويدق جواله حطه صامت بسرعه
سعود : غريبه رد عليه
حمد : مالي خلق له الحين
بس الرقم أشغله كل شوي داق
سعود يمد يده : هات أرد وأقول نايم
حمد : لا لا خله بس أنا برد

حمد : الو
: اهلين وينك ياحلو
حمد : كنت نازل والجوال بالسياره
: بس حبيت أطمن عليك خذ بالك على نفسك حبيبي
حمد : الله يسلمك أكلمك وقت ثاني اوكيه
: باين شكلك يالله تتكلم يالله باي قلبي
حمد : هلا والله مع السلامه

العنود كانت وراه وسامعه الصوت مو ولد بنت وبقوووه انقهرت ( الحين سعود ليش ما يأدب أخوه بس علي أنا )
منى : وش أخبارها أ ـ ابتسام ؟؟؟
العنود : آه ياعمري هي ودي أكلمها
منى : أكيد هي مشتاقة لك
العنود : لا تخليني أطير من الفرحه
منى : الى الحين وانتي مراهقه للأسف
العنود : أقول ما تحسين أننا طولنا مليــــــــــــت كم بقى ؟؟

سعود : الحين بنوقف نصلي الظهر والعصر وإن شاء الله على اذان المغرب واصلين
حمد : ما كلمك فهد ؟؟
سعود : ذكرتني فيه خليني أشوفه
سعود يدق : مقفل أكيد في الطياره خليني أشوف أبوي وينه الحين

سعود : السلام عليكم أبوي ؟؟
أبو فهد : وعليكم السلام هلا
سعود : وينكم ماشاء الله سابقينا
أبو فهد : واقفين الحين بنصلي ونكمل طريقنا
سعود : الله ييسر أجل حنا لاحقينكم

الساعه 4ونص وقفوا سلمان وسعود عشان الصلاة
سعود : يالله انزلو صلو ولاتتأخرون
العنود في بالها ( ياحبلك للأوامر )
وينزلون منى والعنود وكانت منيره توها نازله
العنود : أختي ( وتسوي نفسها تضمها ) اشتقت لك
منيره : العنود خير وش جاك بلا استهبال تونا في الشارع
العنود تكلم منيره بصوت واطي : برجع الحين معكم
منى : تراني سمعت
العنود : وش هالأذان
منى : قولي ماشاء الله وبكيفك على راحتك ترجعين ولا لا
العنود : منى حبيبتي لا تزعلين
منى مسويه نفسها زعلانه ماتكلمت
العنود : منى بلا سخافه كلميني
منى : والله ما ادري منه السخيف عشان أشياء بايخه تسوين كذا
العنود : أخوك شكله متضايق مني ليش أحشر نفسي
منى : لا متضايق ولا شي بس انتي تفسرين على كيفك
العنود : خلاص كم منى عندي أنا لا تزعلين ( وتمسك مع خدودها وتقبصها )
منى :ههههههه أي العنود شوي شوي علي
العنود : كذا أبغاك تضحكين يالله تعالي نصلي
العنود راحت تتوضا أما منى فكانت متوضيه وراحت تصلي يوم خلصت رجعت للسياره تبغى تكلم سعود بس مالقت غير حمد يكلم بجواله

منى : وين سعود ؟؟
حمد وهو يكلم : لحظه شوي يرد عليها : ماتشوفيني اكلم بس
منى : اوووووف الحين اللي يشوفك من تكلم خاف ربك تراك في طريقك لمكه
حمد ارتبك ماوده تسمعها نوف حبيبة قلبه

نوف : خلاص حمد أكلمك وقت ثاني
حمد : اوكيه باي

حمد : منى قسم بالله ان ماعقلتي لاوريك من هو حمد
منى : حمد تدري لو يدري سعود ولا أبوي وش بيسوي
حمد : مااااالك شغل فاهمه وأنا حر من أكلم
منى : طيب حمد أنت تعرف بس تنافخ علي بس أنا أعرف أأدبك

وتنزل من السياره إلا سعود جاي
حمد : منى

سفهته ومشت
منى : سعود وقف
سعود : وش عندك يالله بنمشي
منى : لا ابي أقولك شي
سعود حس فيها شي : وش فيك منى
منى : العنود لا تتكلم معها تراها متضايقه
سعود : انا حاس انها متضايقه خلاص مايصير إلا الخير بس والله مو قصدي شي
منى : والله أدري بس هي توها ما عرفتك زين
سعود : الله يعين وبس هذا اللي مضايقك
منى ساكته ودها تقول عن حمد بس مو وقته يعصب عليه في السياره ويفضحنا عند العنود

منى : ايه خلاص ومشت للسياره

حمد : منى ليش مارديتي علي
منى ساكته وسافهته
حمد : مسويه قويه بس أنا أعلمك ودخل سعود

سعود : وش فيك تنافخ ؟؟؟
حمد : ولاشي يالله تأخرنا ترى
سعود : وينها العنود
منى : الحين بتجي
العنود داخله : السلام عليكم
مارد عليها غير سعود : وعليكم السلام

منى معصصصبه وساكته
العنود : وش فيك منى سولفي
منى : مالي خلق أبي أنام شوي
العنود : بكيفك عطيني اللاب توب أجل
وشغلت أنشوده ( منو كثري شكى همه وعانق حرقته وغمه
منو جرب بقلبه يوم هموم الدنيا ملتمه

سعود خاش جو مع الأنشوده وحمد يفكر بنوف وعلاقته فيها يدري انه على غلط بس هو يحبها

في سيارة سلمان
منيره : تصدق اليوم نتايج خواتي أتوقع بس العنود ما خذه الجوال هذي لازم تطلعون لها جوال وتريحني
سلمان : طيب خوذي جوالي
وهي ماسكته بتدق دق فهد
منيره : امسك يدق
سلمان : من هو ؟؟
مدت له بدون ماتتكلم
سلمان حطه على السبيكر متعمد : هلا فهد
فهد : هلا بك كيف الحال ؟؟
سلمان : الحمد لله وصلت ؟؟
فهد : ايه توني واصل وخلاص استأجرت الشقق
سلمان : زين الله يعافيك
فهد : ليش مقفل جواله سعود ؟؟
سلمان : ما ادري عنه يمكن مافيه شحن
فهد : باقي لكم كثير
سلمان : لا ساعه أو أكثر شوي
فهد : زين يالله لا وصلتو دقو أوصف لك المكان
سلمان : ان شاء الله مع السلامه

وسكر منه منيره راحت في عالم ثاني ( معقوله هالصوت بيكون يوم من الأيام أنا وياه ببيت لوحدنا بنعيش لوحدنا لا ما ابيه )

سلمان : منيره
بس ماردت
سلمان : تبين الجوال خوذي
منيره انتبهت : وشو؟؟
سلمان : منيره ليش كذا ضاق صدرك
منيره : ابس أسألك ليه تتكلم معه بهالجديه
سلمان : ما ادري وش أقولك أصلا فهد من يوم أنا طلعت للدنيا وأنا ما اعرف غير اسمه وناااادر نشوفه
منيره : مو حرام أني أعيش معه ( قالتها غصب )
سلمان : منيره انتي وافقتي
منيره : ايه الله ييسر ويكتب اللي فيه الخير ابوي قال لهم
سلمان : ما اتوقع بس بيقوله أكيد هالأيام

منيره بتسكر الموضوع : عطني الجوال شوي
سلمان عطاها الجوال وهو عارف انها كارهه فهد من قلب

منيره تدق على جوال ناصر
ناصر : هلا سلمان
منيره : احم احم هلا
ناصر : منور هلا وغلا أخيرا دقيتي
منيره : هههه وش أخبارك
ناصر : الحمد لله وألف مبرووووووووووك حبيبتي
منيره تسكت شوي : الله يبارك فيك
ناصر : والله مو متصور بتطلعين عروس
منيره ( آه لو تدري ياناصر اللي في قلبي البنات يحبون اسم عروس اما أنا اكرهه )
منيره : ههه وش أخبار أمي وحنان ونوره وخالد وديما
ناصر : ههههههه كلهم صافين عندي الحين ويسلمون عليك
منيره : الله يسلمهم والله بشتاق لهم
ناصر : خوذي امي
منيره جتها الصيحه من طاري أمها شلون الحين بتكلمها
منيره : هلا وغلا أمي
أمها : هلابك بنيتي على البركه والله يوفقك ويهنيك
منيره نزلت دمعتها وبصوت متقطع : الله يبارك فيك
أمها : لا تصيحين ولد عمك وماراح يقصر عليك وبتعيشين معه بإذن الله بسعاده
منيره : ان شاء الله
أمها : ولا حددو ملكه ولا شي
منيره : لا توهم وش تبين أجيب لك من مكه ؟؟
أمها : والله ما بي إلا دعاك وترجعين لنا سالمه يارب
منيره : من عيوني ياأغلى أم ما راح تسافرون هالإجازه ؟؟
أمها : ما اتوقع تعرفين شغل عمك بس إذا تيسر مرينا على مكه
منيره : زين والله وش اخبار نتايجهم البنات ؟؟
أمها : لا ماشاء الله يرفعون الراس
منيره : الف مبرووووك وينهم عندك ؟؟
أمها : هاذهم نوره تعالي ولا انتي حنان
نوره تقمز : أنا أنا هلا منوره
منيره : هلا بك قلبي ألف مبرووووك مع اني ما عرفت كم نتايجكم ؟؟
نوره : الله يبارك فيك أنا احم احم 97 وحنان الدوبا 95
منيره : والله ما تلعبون دوافير
نوره : نعجبك ايه صح مبروك منيره
منيره : الله يبارك في عمرك
وتسحب الجوال حنان
حنان : هلا منيره
منيره : هلا بك شلون طلعتي انتي
حنان : خخخخخ وش أخبار العروس ألف مبروك
منيره : الله يبارك فيك وش هالنسب الحلوه مبروك وأبشرو بالهدايا
حنان : الله يبارك فيك وينكم في مكه الحين ؟؟
منيره : لا تونا شوي وبندخل
حنان : توصلون بالسلامه

خالد جنبها : سلميني عليها
حنان : خالد المهمل يسلم عليك
منيره : الله يسلم قلبه هاتيه بكلمه

خالد : هلا
منيره : هلا بهالصوت وش يقولون عنك مهمل ما هقيتها منك
خالد : ههههه خليك ساكته بس ما صدقت أنجح أخوك ما خذ نسبته 67 ومع مرتبة الشرف
منيره : الله يفشلك ليش كذا ؟؟
خالد : لا تقعدين تعطينا محاضره زي بعض الناس
منيره : ههههه أكيد هاوشك ناصر
خالد : لا أصلا أخوي حبيب ما يهاوش ولا شي ولا يعصب
منيره : ههههههههه هذا جزاه مهتم فيك
خالد : أبوي ماتكلم عشان هو يتكلم
منيره : الله يرجك بس يالله توصي شي
خالد : ايه جيبي معك سبحه لونها أصفر
منيره : ههههههههه وش هالتعقيد عاد كثرالله السبح في مكه بس أصفر ما ادري ألقى ولا لا
خالد : لا ماعلي منك أصفر وبس ولا مابي
منيره : طرار ويتشرط ماتنعطى وجه
خالد : هههههههههههه لا عاد من جد لا تنسين من دعوه قدام الكعبه ان ربي يهديني ويعقلني
منيره : أبشر كم أخو خالد عندي أنا
خالد : لا أدوخ ترى
منيره : يالله سلمني عليهم كلهم
خالد : لحظه قبل ما تسكرين مبروك
منيره : الله يبارك فيك وعقبالك
خالد : الللللله متى تجي ليلة عرسي
منيره : توك ياشيخ قبلك ناصر
خالد : ماعلي منه أنا بعرس قبله لو بانتظره شيبت
منيره حست أنها طولت على جوال سلمان مره : يالله خلودي ياكثر سواليفك
خالد : أوسع صدرك هذا جزاي
منيره : لا الله يسلمك سواليفك عسل سلم على الأهل
خالد : الله يسلمك
وسكرت منه

وعطته الجوال : آسفه سلمان طولت مررره
سلمان : لا عادي وش بيننا وش أخبارهم ؟؟
منيره : الحمد لله بخير

العنود ودها تكلم شهد لأنها مااااله منى حطت راسها ونامت مسكت الجوال وتدق يوم شاف سامي الاتصال كان بغرفته وركض على غرفة غاده بس ما كانت موجوده في البيت قال بس بسمع صوتها
العنود : ألو أهلين
سامي : ....
العنود : شهوده تسمعين
سامي : عفوا
العنود : مين ؟؟
سامي : أنا أخوها وجوالها معي
العنود : متى أقدر أكلمها أجل
سامي استانس عليها : والله على الساعه 9 بكون في البيت
العنود : خلاص مشكور
سامي :العفو

وسكرت منه وهو مرره انبسط انه سمع صوتها وقال شكلها مره حبوبه لو وحده ثانيه عصبت مني لازم أشوفها ماعلي أحبها

على الساعه 6 ونص دخل أبو سلمان وأبو سعود مكه والباقين كانو لا حقينهم

أبو سلمان يدق على أخوها أبو علي بيشوف بيجي ولا لا
أبو سلمان : السلام عليكم
أبوعلي : الله حيه وعليكم السلام

أبو سلمان : وش الأخبار عسى ماهونتو
أبو علي : لا بكره موعد الطياره الساعه 9 الصبح
أبو سلمان : زين والله
أبو علي : وصلتوا ؟؟
أبو سلمان : ايه والله تونا داخلين
أبو علي : الحمد لله على السلامه أجل
أبو سلمان : الله يسلمك
أبوعلي : وكل الشباب معك
أبو سلمان : ايه هالمره كلهم حتى فهد معنا
أبوعلي : ما شاء الله أجل هالرحله بتطلع حلوه مع الشباب
أبو سلمان : أكيد يالله ما أطول عليك
أبو علي : هلا بك والله

وصف لهم فهد مكان الشقق كانت مقابله للحرم مره يعني يمشون على رجولهم
وصل أبو سلمان أول ونزل عبد الله وشال عمرعلى كتفه لأنه نايم
عبد الله : آه يمه ثقييييييل
أم سلمان : طيب يالله مع المصعد ارقى الدور الثالث
عبد الله : يالله هذاني رايح

رقى عبدالله وهو مو عارف وين الشقه بس لقى فهد قباله
عبد الله : هلا فهد
فهد : هلا بك الحمد لله على السلامه
عبد الله : الله يسلمك وين الشقه بسرعه ترى هلكان
فهد : ههههه هنا شقتكم وترى خذيت شقه لنا العيال
عبد الله وين والله بس بودي عمر وأجيب الأغراض من السياره

وهو ماشي عمه كان طالع
فهد راح حبه على راسه : الحمد لله على السلامه عمي
أبو سلمان : الله يسلمك ولدي
فهد : هات عنك الأغراض <<< فهد مرره متغير معاملته مع عمه ينتظرهم يوافقون بس

وصل أبو سعود ونزلو شقتهم وسلمان وسعود بعد نص ساعه كانو موجودين

في شقة الشباب حمد أول واحد دخل يتروش وفهد كان جالس على التلفزيون يقلب في القنوات
عبد الله حاط راسه وخلاص فيه النوم بس ينتظر حمد يخلص
سعود وسلمان جالسين يسولفون
عبد الله : سلمان سعود ممكن تسكتون ازعااااااااااااااج
سلمان : وش فيك معصب
عبد الله : تعباااااااااان أحس فيني دوخه
سعود : تبي بنادول أتوقع معي بالسياره
عبد الله : لا وش بالسياره بتعبك أقعد الحين بنام ويخف
سلمان : أكيد الحريم معهم بروح أسألهم وأجي

سلمان راح لشقة أهله يدق الجرس
فتحت العنود
سلمان : هلا بالحلوين فيه أحد
العنود : لا راحو لشقتهم تعبانين
سلمان : زين ودخل
شاف أمه منسدحه
سلمان : هلا يمه ( حبها على راسها ) مشتاااااق لك والله
أم سلمان : اشتاقت لك العافيه
سلمان : ماعندك بنادول ولا مهدي
أم سلمان : وش فيك سلامات
سلمان : لا عبد الله تعبان
أم سلمان : ياقلبي ولدي عسى مو تعبان مره
سلمان : لا بس صداع خفيف عندك ولا أنزل الصيدليه
أم سلمان : لا عندي العنود هاتي شنطتي

أم سلمان تعطيه اياه : انتبه لأخوك ولا صار له شي قوي علمني ولا خذه المستشفى
سلمان : لا تخافين يمه مافيه إلا العافيه

ويلتفت على العنود : وانتي ليش ماتنامين وترتاحين ؟؟
العنود : الحين بنام بس انت خربت علي قمت أفتح لك الباب
سلمان : الله من الكذب بس يالله تصبحون على خير
أم سلمان : وانت من أهله

طلع سلمان لشقتهم
عبدالله : سلمان والله لأرتكب فيه جريمه هذا
سلمان : ما طلع إلى الحين
عبد الله : لا أوريه
سلمان : خذ البنادول وارتاح شوي

طلع في هاللحظه حمد
عبد الله : أخيييييييييرا وش جالس تسوي
حمد وهو يفرك راسه بالمنشفه : الواحد لازم يتنظف زين النظافه من الإيمان
عبد الله أخذ أغراضه وقبل لا يدخل سحب المنشفه من على راسه وضربه فيها ودخل
حمد : أي عبيد أوريك يالدب
سعود : تستاهل ماجاك
حمد : خلك ساكت بس وين غرفتي
سعود : انت هنا معك عبد الله
حمد : وهذا في كل مكان لاحقني
سعود : أجل أنا بصير معك
حمد : لا لا لا هونت ياحبيله عبد الله ولد عمي
سعود يناظره بنص عينه : اركد بس ورح نم

كان الكل تعبان ونامو بسرعه وهم ينتظرون بكره اللي بيكون حافل بالضحكه والوناسه
على أذان الفجر قام أبو سلمان وأبو سعود وهم طالعين
أبو سلمان : هلا ماودك تمر على العيال ما فيه أمل يقومون إلا بالصراخ
أبو سعود : خلني أدق عليهم
ودق عليهم بس ماحد رد حتى عبد الله اللي نومه خفيف ماحس لأنه تعبان
دق أبو سلمان على جوالاتهم بس مقفلينها كلهم انقهر منهم ومشو يصلون في الحرم

على الساعه 11 الصبح قام عبد الله وهو على باله ان الوقت توه يوم شاف الساعة 11 بغى ينهبل قال يمكن الساعة خربانه فتح جواله وفعلا الساعة 11
عبدالله يلتفت إلا حمد بسابع نومه ولا هو حاس بأحد : حمد حمد
بس ما رد عليه
عبدالله يضربه على ظهره : حمد يالله قم
حمد : وش تبي ؟؟
عبد الله : حلوه وش أبي الساعة 11 الحين ما صلينا
حمد : العب على غيري وخر عني
عبد الله : والله حمد قم والا اليوم بنتهزأ صدق
حمد قام من فراشه يفرك عيونه : وليش ما احد قومنا
عبد الله يقوم من مكانه : وانا وش دراني
راح لغرفة سلمان وسعود وفهد اللي نومهم ثقيييييييييل
عبد الله يصرخ : سلمان
سلمان فاتح نص عين : بلا ازعاج عبد الله
عبد الله : انتو مصلين الفجر
سلمان : وش تقول الحين كم الساعة
عبد الله : الله يعين على هواش عمي وأبوي قومو صلو ويالله نروح لشقتهم
سعود قام على اصواتهم : وش عندكم ؟؟
سلمان : قم ياشيخ الساعة 11 وحنا ماقمنا
سعود : احلف ويناظر جواله إلا الساعه 11 ومكالمات من أبوه وعمه سعود الوحيد اللي مخلي جواله مفتوح
سعود : شف كم مكالمه 7
عبد الله : الحين مطولين قومو بسرعه
سلمان وسعود قامو يتوضون وعبد الله راح يشوف حمد ولقاه بدورة المياه
عبد الله يكلمه من ورا الباب : حمد ياويلك تتأخر فاهم
حمد فتح الباب وطلع : لا مافيه مجال اليوم نتأخر تعال نصلي جماعه
فهد قام وشافهم مرتبشين
فهد يناظر سعود : كم الساعه
سعود : صباح الخير شف جوالك
فهد : أوب وقمز من السرير وراح يتوضا
وبعد ماتوضو صلو
حمد كان لابس بدله رياضه وعبد الله لابس ثوبه بدون شي وسلمان وسعود لا بسين ثيابهم مع الشمغ وطالعين وفهد قال بيلحقهم
عبد الله : الحين تعرف أهم مو مخلينك تصلي الظهر بهاللبس
حمد : ايه برجع وأغير لا أذن

دق سلمان الجرس فتح له عمر
عمر : سلمان وينكم
سلمان : من فيه ؟؟
عمر : كلهم هنا
سلمان : تفضلو قبلي
سعود : لا ياحلو خلك انت في المقدمه عشان يحطون الحره فيك
سلمان عرف انهم ماراح يدخلون دخل ودخلو وراه

في المجلس كانو جالسين عمه وأبوه
سلمان : السلام عليكم
أبو سلمان ما يناظر له : وعليكم السلام لا كان نمتوا شوي بعد
سلمان يحب راس أبوه : اسمح لي والله ما حسينا
ويسلم على عمه
سعود دخل ووراه حمد وعبد الله وسلموا عليهم
أبو سعود : الحين قبل كل شي ليش ماتردون على الجوالات
عبد الله : عمي ما حسينا بالعالم تعبانين
أبو سعود : اليوم يبيلكم عقاب ماصار ولا جا حتى أكبركم فهد أهبلكم
أبو سلمان : وينه معرسنا خلاص ما راح نزوجه
سعود : هههههه بقوله يجيك طاير الحين
أبو سلمان : الله يهديكم بس اسمعوني ان صارت السالفه مره ثانيه كل واحد راح ينام عند أبوه
حمد : لا خلاص اسفين وخلونا بشقتنا
أبو سعود : توك تتكلم انت
حمد سكت ما عرف وش يقول
أبو سلمان : يالله عمكم في الطريق جاي زين جيتو قبل مايجي
عبد الله : بنزل أجيب لنا فطور
أبو سلمان : خلاص وخذ معك أحد لا تروح لحالك
عبد الله : يالله حمد

وهم طالعين يقابلهم فهد طاق الزين كله
عبد الله : والله انك فاضي قاعد تكشخ ترى ماراح تشوفك
فهد يناظر له بحقران : مالك شغل
عبد الله خاف منه : يالله حمد تأخرنا ويسحبه مع يده

عبد الله : والله أخوك هذا ما ينفهم
حمد : أكرهه دايم كذا
عبد الله : لا تكره أخوك قل الله يهديه

فهد دخل وسلم على عمه وأبوه
فهد : وش أخباركم ؟؟
أبو سلمان : بخير وراك الله يهديك ما قومتهم تعرفهم ونومهم الثقيل
أبو سعود : هو أثقل منهم
فهد : السموحه منكم
أبو سلمان : اليوم جاي بقولك مبروك بس انت خربت على نفسك
فهد يبتسم : والله عمي وافقو
أبو سلمان : ايه الله يوفقكم
فهد يحط راسه على الكنب وياخذ نفس ( أخيرا تحقق اللي في بالي وباخذك يامنيره )

سلمان منقهررر منه ووده يقول ( ما تستاهل )

عند البنات
كانوا جالسين يشربون شاهي على جنب منيره والجوهره والعنود ومنى
العنود : كم بقى على الأذان
منيره : نص ساعه يمكن
منى : لا لا تروحين حر وشمس العصر نروح الحرم
العنود : منى مشتهيه أروح
منيره تلتفت عل الجوهره : شكلك تعبانه
الجوهره : لا عادي بس أحس مانمت زين ما اعرف أنام إلا بغرفتي
منى : يالدلع انتي لازم تتعودين
الجوهره : وش أسوي بس بتعود
العنود : وش عندهم أسولق حلوه
منى : لازم نمر على أسواق مكه
منيره : بس انتي وياها الناس جايه تتعبد هنا وانتو أسواق ماكفتكم الأسواق هناك
العنود :ياربيه المشكله انتي وسلمان نفس الأفكار حتى هو بيعيي
منى : ما عليك ندبر لنا أحد ما دام معك منى لا تخافين

وشي يدخل عليه ولد صغير شعره أشقر وعيون وساع يضحك معه حلاوه يمصها
العنود : ياناااااااس من هو هذا
منى تناظر له : هذا علي ولد عمي
الجوهره : جا عمي

دخلت أم علي وراه ( وفاء )
وفاء انسانه هاديه وحبوبه عمرها كبر منيره بي هي ماكملت جامعه تزوجت يوم خلصت الثانويه وكان الكل يحبها عشانها جدا متواضعه وكل أحد تعطيه وجه

.............................. انتهى الجزء