الجزء الخامس


الكل درى عن السفره وكانو مأيدين الفكره ومررره مبسوطين رغم انه في ناس كانت همومهم أكبر
سلمان مانام الليل من كثر التفكير
وش بيصير فيه هو وسعود بكره ؟؟؟
عنده احساس بيصير شي كبييير ....

الساعة 2 بالليل
منيره فاتحه النت تكلم نوره وحنان على المسن
منيره النيك نيم حقها
( لفراقكم صوره مثل كل الصور ما أقدر أقول اني حزين إلا بمووووت من القهر )
وش رايكم تزورونا قبل مانسافر والله ودي أشوفكم

( يااااارب نجيب نسبه عاليه )
والله فكره حلوه بشاور أمي ونشوف

( لفراقكم صوره مثل كل الصور ما أقدر أقول اني حزين إلا بمووووت من القهر )
بيصير وناااااسه تصدقون حتى العنود بتطير من الفرحه دايم تقول ودي أقعد معهم

( يااااارب نجيب نسبه عاليه )
ياحليلها سلميني عليها


( لفراقكم صوره مثل كل الصور ما أقدر أقول اني حزين إلا بمووووت من القهر )
أكيد أمي ماراح تقول شي روحو تجهزو بس

( يااااارب نجيب نسبه عاليه )
مررررررره مستعجله ياوخيتي

( لفراقكم صوره مثل كل الصور ما أقدر أقول اني حزين إلا بمووووت من القهر )
ههههههههههه


ودخلت العنود وجلست على الكرسي تقلب بعض الأوراق على المكتب
منيره تناظرها : وش فيك ؟؟
العنود : طفشانه وزهقانه دوري لي شغله
منيره : تعالي كلمي حنان على المسن اقترحت عليهم يجونا وش رايك
العنود : ونااسه ان شاء الله وافقو
منيره : ما ادري يمكن المهم بنزل أجيب لي شي آكله جوعانه ماتعشيت .
العنود : جيبي معك لي شي
وتجلس تسولف مع حنان
منيره نزلت بهدوء عشان ماحد يسمع لأن الكل نايم وماتبي تقوم أحد دخلت المطبخ وفتحت الثلاجه ومالقت غير انه تجيب خبز وجبن سايل وشاهي وبصرااحه له طعم لا صار الواحد جايع
وهي مندمجه تزين سمعت حركه أحد ينزل مع الدرج قالت أكيد العنود سكرت النت وجت
دخل المطبخ وشافها متحمسه وقال بخوفها بعدين قال لاااا تسوي لنا فضايح خلنا مؤدبين
سلمان : السلااااام
التفت بسرعه وحطت يدها على قلبها : بسم الله من وين طلعت ؟؟
سلمان : هههه خوفتك
منيره : يعني كنت ساهيه توقعتك العنود أصلا وش عندك مانمت ؟؟
سلمان : والله قاعد أتقلب ولا جاني نوم
منيره : خابرتك نومك ثقيل وراعي نوووم أكيد اليوم تفكر في شي
سلمان : لا وش أفكر شكلي مكثر قهوه اليوم
منيره : اها
سلمان : منيره وش تزينين ؟؟
منيره : لا بس أنا والعنود ماتعشينا
سلمان : احسبيني معكم
منيره : تامر أمر

وسكتو شوي ومنيره خلصت اللي معها
منيره : يالله أخ سلمان ماودك تشيل معي
سلمان : هاتي
وخذا منه كيس الخبز ومشى قدامها وهم ماشين للغرفه
سلمان : أي غرفه جالسين ؟؟
منيره : قصر صوتك هنا وتأشر له على الغرفه اللي قدام

سلمان يطق الباب
سلمان : العنوووووووووود
العنود : سلمان ؟؟؟ هلا والله أحلى سهره بتكون اليوم تفضل تفضل
منيره : خلصتي من النت ؟؟
العنود تقفل الكمبيوتر : ايه خلاص حنان طلعت من زمان والله انها تجنن وسعت صدري
منيره : ياليت يجون ودي أشوفهم قبل ما نسافر
سلمان : من هي حنان ؟؟؟؟
منيره : أختي
سلمان : اللي لها توأم صح ؟؟
منيره : ايه وتفضلو صراحة تعبت وأنا أسوي العشاء لكم
العنود تسحب كيس الخبز : مرره اختي أشوف عرقك يصب
منيره : هههههه كولي وانتي ساكته بس
سلمان : ايه وش فيه هالعشاء بالعكس حلو الخبز والجبن ومعها كاس شاهي شي صراحه
العنود : ياانك تحب تمدح الشي لو انه شين
منيره : وش قصدك شين ؟؟ هذاك تبلعين ماشاء الله
العنود : وش أسوي الجوع يسوي كذا وأكثر
منيره : أصلا الشرهه علي أنا اللي مسويتلك
العنود : خلااااااص عاد إلا زعل منور

في هاللحظه دق جوالها وشافت رقم ناصر حطته صامت ماتبي ترد قدام سلمان بس انه دق مره ثانيه قالت أكيد عنده سالفه مهمه قامت : خليني أشوفها ليلى وش تبي أكيد ضروري

وجلسو العنود وسلمان يسولفون
العنود : بسألك عن شي بس ماتزعل مني
سلمان : لا عادي ليش أزعل
العنود : أنا سمعت ما ادري صح ولا غلط
سلمان : وشو ؟؟
العنود : منى قالت لي ان سعود عنده قضيه عشان الحادث وتقول يمكن انت معه
سلمان حاول يفهم وش تقول يعني دارين معقوله سعود قايل لهم اللي أعرفه أن ابوي وعمي اللي يدرون بس
العنود : وش فيك ..؟؟
سلمان : انتي وش قاعده تخربطين ؟؟ وبعدين منى من قايلها ؟؟
العنود : ما ادري بس هي سامعه نفسي
سلمان : اقول العنود لا تقعدين تخرفون انتي وبنت عمك
العنود : سلمان لا تعتبرني صغيره أنا أحس السالفه فيها شي وانتو مخبينه
سلمان : مو مسألة صغيره ولا كبيره بس السالفه حادث وبس
العنود : بس انت ما عمرك جبت طاري الحادث وتتحاشاه دايم ولا ادري وش السبب ؟؟
سلمان : طبيعي بكره هذاك الموقف أجل تبيني أحبه
العنود يأست منه ومافيه مجال انه يتكلم ويقول شي رغم انه شاكه وبقوه بعد انه فيه أشياء وأسرار ورا هالحادث بس قالت ( الخبر اليوم بفلوس بكره ببلاش )

منيره تكلم ناصر ..
منيره : الحين مسوي صجه عشان كذا أحسبك فيك شي
ناصر : حنان ناشبه فيني الا تكلم وتقول اننا بنجيهم
منيره : هههههههه الله يحيهم والله اني استانست أخيرا من زمان ودي يزورونا في البيت
ناصر : يالله ما اطول عليك مع السلامه
منيره : مع السلامه


ورجعت منيره وشافت سلمان يضغط في جواله والعنود تقرا مجله
منيره : شكلكم جاكم النوم
سلمان : لا يعني
العنود تحط المجله : أنا بروح أنام يالله تصبحون على خير
منيره جلست وسلمان مازال يحوس بالجوال
سلمان : عندك رسايل حلوه ..
منيره : اممممم ما ادري شف الجوال وعطته
وجالس يناظر الرسايل
سلمان : الللللله حلوه الرساله هذي
منيره :أشوف وكانت من ناصر
سلمان : مين رورو ؟؟
منيره : مين يعني صديقتي ؟؟
سلمان : بس أنا ملاحظ شي كلهم أسامي صريحه الا هذي وش السر ؟؟
منيره : عاد هي تحب اننا نلقبها كذا <<< منيره ماكان ودها تكذب بس خايفه يصير موقفه مثل أبوها
سلمان قام وحط الجوال على الطاوله : منيره يا تتكلمين بصراحه وتوخرين هالغموض اللي فيك ولا بطلع
منيره : سلمان وش فيك أنا ماقلت شي
سلمان : أنا عارف من رورو
منيره تناظر له : سلمان ليش عصبت طيب ؟؟؟
سلمان : أنا بصراحه أدري أنك تكلمين ناصر من زمان أعرف رقمه وعادي ما أبديت أي تعارض بس ليش تو تقولين صديقتي

منيره خنقتها العبره أول مره سلمان يتكلم معها بهالجديه
نزلت راسها وجلست تصيح
ماهانت عليه أخته ولا هانت دموعها وحس فيها شي كبييير
سلمان جلس بجنبها ورفع راسها : منيره هالدموع ماتنفع أدري يمكن قسيت عليك شوي بس والله من خوفي عليك بس

منيره تمسح دمعتها : سلمان أنت موالمشكله أنا أعيش هم اكبر لا أنت ولا غيرك درى عنه
سلمان : طيب أنا اعترف يمكن قصرت معك بخصوص المرض اللي جاني

منيره : لا سلمان لا تقول كذا بالعكس انت الأمل الوحيد في حياتي ولا عمرك قصرت بشي ..
سلمان : كنت أتمنى أساعدك بأي شي بس تبين الصراحه أنتي ماعطتيني مجال
منيره : شف سلمان باقولك وابيك تفسر هل هو شي عادي ولا لا ..؟؟
سلمان في نفسه 0( خليني اعرف وش سر الحزن اللي تخبيه دايم والله لسوي المستحيل عشانها )
منيره : سلمان انك تشوف نظره احتقار من الانسان اللي تشوفه مصدر الحنان عشان موقف بايخ
سلمان : وش قصدك ؟؟
منيره : أبوي ياسلمان درى اني أكلم ناصر ومن بعدها ولا حتى يحط عينه بعيني ولا يعبرني وعطاني كم كلمه جرحني فيها والله لو اني مكلمه غريب ..
سلمان : تبين الصراحه أنا ملاحظ هالشي على أبوي بس ماحبيت أقول شي لك أما عن سالفه عشان تكلمين ناصر فأبد السالفه عااديه جداً وأنا ما أثرت علي
منيره : هو قال لي مو عيب بس العيب أنك ما قلتي لي وخبيتي هالشي ..
سلمان : يمكن شوي يزعل هالشي بس مو لدرجة أنه يعاملك كذا لو تبين فتحت الموضوع معه
منيره : لا سلمان لاتقول شي تدري خلاص على قولته زوجك بيمنعك بعدين
سلمان عصب : منيره انتي أختنا ولا عمرنا فكرنا اننا نبعدك وإذا كان هذا مكتوب فالحمدلله خيره ان شاء الله

منيره :أنا مايهمني أتزوج ولا لا لأني الشقا لا حقني وين ما أروح ؟؟
سلمان : لا تقولين هالكلام وش دراك والله الدنيا في لحظه تتغير وتنقلب وتحس ما كأنك الانسان اللي كنت أول تضحك وفي لحظه تقول الحمد لله كنت أعيش الحزن والحين سعيد
منيره : بس أنا عشت الحزن من يوم طلعت على الدنيا يكفي أول يوم اني صغيره كان أبوي يبين لي أنه يكره أمي وكنت أعيش دوامه من الأفكار ليش يكرهها وأنا أشوفها أغلى الناس مفروض يخليني أعيش ببراءتي ممدي على هالحزن

سلمان : أنا ما كنت أتوقع أبوي يوصل لهدرجه بس أكيد غصب عنه وصدقيني بيوم بيعرف أنه غلط في حقك
منيره : شلون بيعرف وأنا عندي احساس كبير انه بيعطيني فهد
سلمان : فهد ؟؟؟
( تذكر أن أبوه مره قاله أن فيه واحد خاطب منيره وانسان عاقل ورجال ينشرى واستغرب من اللي تقوله )
سلمان : لا إذا هو وافق أنا ماراح أرضى فهد ما يستاهلك وانتي من قايل لك الكلام هذا ..
منيره : لو تشوف اهتمام مرة عمي وعمي وتخطيطهم ودايم يلمحون لهالشي وأبوي ينتظر هالسنه عشان يقولي بس مستحييييل أرجووووك لاتوافق عشاني حاول تقنعه ..
سلمان : لا تخافين ماراح يصير الا اللي فيه خير <<<< ما يقدر يعطيها وعد لأن ابوه صعب يقنعه اذا اصر على شي
ويسمع صوت أذان الفجر
سلمان : يالله بطلع الحين يجي ابوي يقومني ويقول وينك ؟؟
منيره تبتسم له : يالله ومشكور سلمان
سلمان وهو طالع : ماسوينا شي ياحلوه مع اني ما مليت من القعده معك
وطلع
منيره تاخذ نفس أول مره تطلع اللي في قلبها لأحد إلا نادر يمكن لليلى بس لكن واحد من العايله مستحيل وسلمان هالمره أصر عليها وارتاااااحت راحه فضيعه لأنه يمكن يقدر يساعدها

في الصباح الساعة8 تقريباً
سلمان كان نومه متقطع لكن قدر ينام تقريبا ساعه متواصله دق المنبه وقام يتروش لأن الساعه 9 ونص لازم يحضر هو وسعود خذا له ترويشه سريعه وهو طالع من دورة المياه يمسح شعره سمع جواله يدق رد عليه
سعود : السلام عليكم
سلمان : هلا سعود وعليكم السلام
سعود : هاه جاهز ولا توك ما قمت
سلمان : أصلا قل نمت والله اني نمت ساعه وكلها حلوم وخرابيط
سعود : نفس حالتي يعني يالله يااخوي الله ييسر
سلمان : سعود فيه أحد غير عمي وأبوي يدري .؟؟
سعود : أتوقع حمد لأنه يوم يجون عندي في البيت هو اللي فتح الباب لهم
سلمان : طيب من الحريم ؟؟
سعود : ما أتوقع وانت وش جاب هالسؤال على بالك الحين ؟؟
سلمان : لا بس أمس العنود تسألني تقول فيه سالفه وانتم مخبينها
سعود ( تذكر يوم منى تدخل عليه قال شكلها فهمت السالفه )
سعود : والله ما ادري كان سمعوا وحنا ما ندري بعدين وش عليك انت اليوم مصيرهم بيعرفون
سلمان : أنا ماودي أمي تدري تعرف بتقعد على أعصابها أبغى إذا قضى كل شي في هالوقت عادي الكل يدري
سعود : طيب ياحلو ماتحس اننا تأخرنا أبغاك تمرني مافيني حيل أسوق وأحسن نجي مع بعض
سلمان : خلاص بس بشوف الوالد قام ولا لا ؟
سعود : يالله في أمان الله

سعود كان جاهز وطلع للحوش لقى أبوه فارش له فرشه ويتقهوى
أم فهد : ماقلتو وش المشوار اللي على الصبح
أبو فهد : مشوار قريب بنزور واحد تعبان
أم فهد : خلوها العصر أزين وش تروحون الساعه9
أبو فهد : لا العصر عندي كم شغله والولد مشغول
أم فهد : على راحتكم والله

أبو فهد يلتفت على سعود كان سرحان : سعود
سعود يلتفت بهدوء : هلا يبه
أبو فهد : بيتأخرون ولا نمشي
سعود : لا في الطريق جايين

سلمان طلع لبس ثوب وغتره وحتى هو من النوع ما يلبس عقال دايما لكن هالمره لبسه وكان لابس جزمه سودا جلد وكان شكله رسمي وريحته تفوح عطر
شغل السياره يحميها وأبوه طلع ومره قلقان عليه هو وسعود
أبو سلمان : يالله وش تنتظر أحس تأخرنا ..
سلمان : يبه هد أعصابك ترى لا شافوك متوتر يحسبون وراك شي
أبو سلمان : والله غصب عني

ومشى وشغل على الراديو ومر على سعود وعمه وهم في الطريق الكل ساكت ولا تكلم مشغولين بأفكارهم اللي ماتنتهي ..

أمام مركز الشرطه وقف سيارته ونزلوا كانت أشكالهم ناس موب راعين مشاكل وأمور قضايا عشان يجون لهالمكان

كان في استقابلهم أحد الشرطه وشرحوا له الوضع ليش جايين ؟؟ وأمرهم يدخلون في أحد المكاتب طق الباب سعود
الضابط : تفضل
سعود : السلام عليكم
الضابط : وعليكم السلام
سعود : معك سعود وسلمان ال ........
الضابط قعد يقلب في الأوراق قدامه بعدين قال : ايه نعم موجوده قضيتكم تفضلوا ..
دخل سعود ووراه سلمان وأبوانهم كانو برا مو مسموح لهم الدخول ..
الضابط : تفضلوا
سلمان : مشكور وجلسوا
الضابط : في البدايه بقول حنا كل هالوقت اللي مر ماراح عبث وحققو رجال الشرطه في القضيه بس للأسف التهمه ثابته عليك أنت ياسعود ( وناظر له ) وتعرفون لازم يسجن سجن تأديبي
سعود خلاص حس الدنيا تدور في راسه وش يقول ؟؟؟
سجن ؟؟؟
سلمان انفعل : بس انتم ماحققتو في اللي اسمه عبد العزيز شايفه بعيني أنا
الضابط : لحظه معك حق من ناحية هذي بس سعود يحال للسجن إلى ما نعرف شي عن عبد العزيز
سلمان : والله ربي بيجازيكم على هالظلم
الضابط : انتظر وفيه أوامر لازم تملى عليك انت ..
سلمان : نعم وش فيه دام أقدر أطلعه بهالأوامر
الضابط : نبيك تبحث مثل ماحنا نبحث بما اني سمعت أنكم تعرفونه قبل أكيد تعرفون أحد من أصدقائه سامع عنه وساكت




نزل من اللموزين وكان معه شنطة السفر ويمشي بكل ثقة واتجه للشرطي اللي عند الباب
عبد العزيز : ممكن أكلم المدير هنا
الشرطي : ومن صفتك ؟؟
عبد العزيز : عندي معلومات عن أحد القضايا
الشرطي : تفضل معي

بعد اجراءات مو طويله قدر عبد العزيز يدخل على المدير
المدير : تفضل أخوي وش عندك
عبد العزيز : أنا عبد العزيز ال.......
المدير : نعم ؟؟ انت هو
عبد العزيز : ايه نعم
المدير يناظر له معصب: وين كنت طول الفتره اللي نبحث عنك ؟؟
عبد العزيز : شي راجع لي وين كنت أنا جاي اسلم نفسي وأعترف أنا السبب في أنهم دخلو المستشفى وأنا ورطت سعود في قضية المخدرات
المدير كان عنده بلاغ أنهم اليوم اجتماعهم مع الضابط
المدير : اجلس جلس عبد العزيز وهو مقتنع باللي يسويه
اتصل على الضابط
المدير : السلام عليكم حضرة الضابط
الضابط : وعليكم السلام
المدير : تعال عندي المكتب ضروري وسعود وسلمان خلهم لا يروحون
الضابط : ان شاء الله

وطلع الضابط وأمرهم ما يتحركون من مكانهم
سعود : سلمان شفت نهايتها قايل لك أني ببقى هنا
سلمان غصب عنه نزلت دمعته : والله ياسعود ما اقول إلا حسبنا الله ونعم الوكيل
سعود : شلون بيتقبلون الأهل الموضوع وش بتكون سمعتي ماسكيني بقضيه مخدرات هذي آخرتها
سلمان رفع راسه : بيطلع الحق عندي احساس



عند المدير
الضابط : تدري أنك حقير ولا تستحي على وجهك ولا دمك شف شلون بهذلتهم ونكدت عليهم أبي تبرير واحد للي سويته ...

عبد العزيز كان ساكت ولاتكلم
المدير : خلاص اهدى الحين وابغى سعود وسلمان يدرون وهذا بيكون عندنا في السجن الين يعفون عنه
طلع الضابط وهو تفكيره شلون بس بيكون الموقف
الضابط دخل عليهم وكانت أشكالهم تضيق الصدر كل واحد في همه
الضابط : سعود سلمان
التفتوا ورفعو روسهم زي ينتظرون أي خبر يقول ان القرار تراه خلاص انلغى
الضابط : حنا متأسفين
سعود : شلون ؟؟
الضابط : سلمان عبد العزيز الحين عندنا
سلمان قام من مكانه : وش قلت عندكم ؟؟؟؟؟؟؟؟؟
سعود : وليش توك تقول ؟؟
الضابط : افهمو السالفه عبد العزيز جاي قبل دقايق سلم نفسه
سلمان رفع صوته: الخايس توه يفكر بعد ايش لازم اقابله الحين
سعود : ايه لازم نقابله قبل مانطلع
الضابط : بحاول اذا تقدرون
سلمان : قدرتو والا ماقدرتو أنا لي كلام لازم احطه بين يديه

أبو سلمان وأبو فهد حسو بأن فيه شي من أصواتهم اللي بدت ترتفع
الضابط : خلاص الحين خليكم جالسين برا الى ما أجيب لكم خبر

طلع سلمان وهو قباله أبوه وعمه
سلمان : إذا ما خلوني أشوفه راح ادخل غصب عنهم
أبو سلمان : وش فيكم فهمونا شي
سلمان كان منفعل ومعصب ولا تكلم وسعود جلس يشرح لهم الوضع
أبو فهد : يعني لوانه ماجا كان انت في السجن الحين

عند المدير كان واقف على جنب مع الضابط
الضابط : بس بصراحة له الحق يكلمه
المدير : بس أخاف يكون فيه صجه وازعاج
الضابط : بنكون حولهم لا تخاف
المدير : خلاص خل سلمان وسعود يجون عندي المكتب
الضابط : ان شاء الله

رجع المدير وجلس : عبد العزيز الحين سلمان وسعود جايين
رفع راسه بسرعه وبدا الخوف عليه : وشلون بهالسرعه عرفو
المدير : اليوم جايين ننقاشهم على القضيه ولو انك ماجيت في هاللحظه سعود كنا مقررين يكون بالسجن
عبد العزيز رجع وحط راسه على الكنب وخذا نفس ويقول في نفسه ( الله يعين )

طق الباب وطق معه قلب عبد العزيز دخل سلمان بكل هدوء ووراه سعود وكان عبد العزيز منزل راسه ولا قدر يحط عينه بعينهم
سلمان جلس يتأمله ولا تكلم والكل استغرب حتى سعود ينتظره يتكلم بس شكله ما فيه فايده
سعود : الله يسامحك على اللي سويته مسأله صغيره خليتها بهالكبر
عبد العزيز ما صدق يتكلمون : أدري ويكفي تأنيب ضمير تراني اليوم جاي مسلم نفسي
سلمان عطاه نظره خلته يطير من مكانه وقال بصوت عالي : الحين تمن علينا بتسليمك نفسك أنا تراني ماطلبت اني أكلمك إلا عشان أقول خاااااف ربك أنا كنت بين الحياة والموت وسعود اللي ماله ذنب معلقه بقضية مخدرات أنت وش هالتفكير عندك أنا ماتوقعت يبقى في الكون ناس مثلك ومثل تفكيرك الاجرامي

حس عبد العزيز أن كلام سلمان في الصميم وجا عالجرح وهو معه الحق في كل اللي يقوله ..
هنا الضابط جلس يهدي سلمان وقال : خلاص سلمان ماتقدرون تطولون أكثر
سلمان : خلاص أنا ماعندي كلام غير هذا وطلع

سعود الى الآن مأثره عليه الصدمه ويحس ما كأنهم في الواقع سحب رجوله بيطلع
عبد العزيز : سعود
سعود ماتكلم واكتفى انه بس يناظر له
عبد العزيز : أنا أتأسف رغم اني أدري ماراح تقبلون أسفي لأن اللي سويته كبير
سعود : الله يسامحك
وطلع وخلو عبد العزيز في دواااامه من الأفكار والهموم

وهم طالعين كان الضابط يقولهم : لكم الحق تعفون بأي لحظه ..
سلمان في نفسه يقول خله يتأدب في السجن بعدين أفكر أعفي عنه
وسعود كان حاط في خاطره منه يكفي صدمته يوم قالو انك بتدخل السجن عشانه لكن كان عنده يقين بيجي اليوم اللي بيقول ( مسامحه )

ويوم يطلعون كانت الساعه تقريبا 1 ونص الظهر والحريم حارقين جوالتهم لأنهم تأخرو
في السياره
أبو سلمان : الحمد لله على كل شي ياعيالي
سلمان ارتاح مرره أهم شي انه جا ومعه سعود وطلع وهو معه
سلمان :يبه شفت الدنيا كذا مهما تقسى ربي بيخليك تعرف خطاك وشف هو بنفسه عرف انه مخطي وجا يسلم نفسه

أبو سلمان يلتفت على أخوه : وش رايك غداكم اليوم عندنا
أبو فهد : الله يسلمك بس أكيد الأهل ينتظرونا
أبو سلمان : أجل خلاص العشا الليله أنت والأهل الله يحييكم
أبو فهد : والله ماودنا نكلف عليكم وخصوصا فيه سالفه ودي أقولها لك
أبو سلمان أجل تم ان شاء الله ...

في بيت أبو فهد الكل عرف السالفه
كانو جالسين فهد وأم فهد وحمد وسعود والجوهره على جنب فاتحه اللاب توب ولا ابدت اهتمام أصلا
أم فهد سوت نفسها زعلت : وكل هذا يصير وحنا تمشون علينا بكم كلمه تسكتونا
سعود : يمه ولا تزعلين والله ما ودنا نشغل بالكم علينا
أم فهد : ايه الحمد لله اللي طلعت بسلامه ..



وجت منى وحطت السفره
منى : الحمد لله على سلامتك أخوي والله وتعرف تخبي أسرار
سعود : الله يسلمك وش هالسناعه لازم يبيلك رجال
منى : حرام عليك توني طفله
سعود : طفله مره وحده كثري منها بتدخلين الثانوي الحين
منى : على طاري الثانوي ترا نتايجنا السبت مرررره خايفه
سعود : يالله اخلصو عشان نقرر نسافر أكيد ولا لا ؟؟
منى : وأنت واثق من عمرك حيييل انك ناجح
سعود : ايه ان شاء الله وش قالو لك منى انا

أم فهد : يالله جيبي الغدا منى ويكفي كلام
منى في بالها ( والجوهره وش حضرتها جالسه ولا عمرها بيوم فكرت تساعد آه بس مشكلة الطيبين )
منى : ان شاء الله بس هو كلامه مايقضي
سعود : أقول روحي بس ما ادري من هي اللي كلامها ما يقضي

منى مشت وهي تضحك عليه
سعود كان وده يتكلم عن السالفه بس ماحد معبره حمد مطير عيونه في الجوال وكل شوي جايته رساله ويرد
فهد : سعود والله ما توقعت السالفه كذا كبيره لأنه مابان عليك
سعود : والله كانت مأثره علي بس ليش أضيع مستقبلي وحياتي عشانها
فهد : مع اني والله ماشميت ريحة الخبر أبد
سعود : من كثر قعداتك بيننا
فهد : وش قصدك ؟؟
سعود : لا ولاشي بس تعرف يعني نادر مانشوفك ما تركد أبد الله يجيب الحرمه اللي تقعدك
فهد يبتسم : قريب ان شاء الله
سعود : والله الولد ناوي ولا تعلم أخوك عاد من هي ؟؟
فهد يناطر أمه : يمه قولي له من هي ؟؟
أم فهد : عاد ياولدي من حظك فيها إذا وافقت هي منيره بنت عمك
سعود : منيره ؟؟؟؟؟؟؟؟؟؟؟
الجوهره انتبهت ورفعت راسها
فهد : ليش مو عاجبك ؟؟؟
سعود ما تكلم وساااكت وما حب يعلق لأنه عارف بنت عمه وسمعتها وأخوه حرام ياخذها يعذبها والله

خلصت منى وجابت الغدا
أم فهد : روحي سهى حبيبتي نادي بابا دخل الغرفه ولاطلع
سهى : طيب وراحت تناديه

في بيت أبو سلمان بعد ماتغدو كانو منيره والعنود قالبين البيت لأن حنان ونوره بيجون وصار بالصدفه اليوم عمهم بيجي
العنود تمر من عند الصاله كان جالس سلمان عند التلفزيون ولاعبرته
العنود منقهره عقب ماعرفت السالفه ليش يكذب عليها


سلمان : سلمي عاد لا مريتي ولا الى الحين معصبه
العنود ماتقدر تصدعنه لأنه تحبه وغصب ترد عليه
العنود : قايله لك ماني صغيره بس انت مستحقرني
سلمان : خلااااااص والله ياحلوه مره ثانيه نقولك بس هالمره الموضوع مادرو عنه ناس أهم مثل أمي عشان انتي تدرين
العنود : أهااا يالله بروح اطلع لي لبس
سلمان : ايه صح اليوم بيجون بيت عمي
العنود : وبعد خوات منيره وأمها
سلمان : والله ياحليلهم أول مره يجون بيتنا صح ؟؟
العنود : ايه
سلمان : عاد ناظريهم زين كان فيه وحد زينه تصلح لي مثلا
العنود :ههههههه توك ياخي بتعرس الحين اخلص من الدراسه وتوظف
سلمان : اوووووووووووه بعيده مو مشكله لااعرست وأنا أدرس وش فيها ؟؟؟؟
العنود : شف عاد من بيزوجك وانت منتف لاوظيفه ولاشي
سلمان : والله الف من تتمناني يااختي ياحظها اللي بياخذها سلمان
العنود : ضحكتني وأنا ماودي أضحك خلني أزين شغلي أحسن

ومشت لغرفتها
عند نوره وحنان ..
نوره : وش بتلبسين ؟؟
حنان : ما ادري وش رايك البس لبس العيد
نوره : أي واحد اللي تنوره بيج صح ؟
حنان : ايه
نوره : ايه مره حلو لأن بنات عمهم بيجون تو منيره قايله لي
حنان : صدق يالله خلينا نعرفهم
نوره : وأنا شكلي بالبس اللي لبسته يوم نروح لعزيمة خالي
حنان : خلاص حلو وابيك تزينين شعري مالي خلق له
نوره : وأنا كوفيره عندك لازم تدفعين استشوار بسبعين تسريحه بميه و
حنان : اوص بس لا يكثر كلامك وترمي عليها كرتون المناديل اللي بجنبها
نوره : هههههههههههه

عند العنود قاعده تكلم منى
منى : صدق انك سخيفه ليش ما عزمتيها
العنود : ماجا على بالي تصدقين أجل يالله مع السلامه بكلمها وأشوف
منى : يالله مع السلامه

ودقت العنود على سحر ردت أمها
أم سحر : هلا والله
العنود : هلا خاله السلام عليكم
أم سحر : وعليكم السلام وش أخبارك وأخبار أمك وأهلك ؟؟
العنود : والله كلهم بخير
أم سحر : انتظري انادي لك سحر
العنود : لا لحظه خالتي ودي اليوم تجي عندي الله يعافيك
أم سحر : والله أنا ماعندي مانع وواثقه فيكم بس خليها تشاور أبوها ويصير خير

سحر سمعت وهي نازله مع الدرج وش تقول أمها واستااااااانست
العنود : هي حولك ولا لا ؟؟
في هاللحظه دخلت سحر
أم سحر : تعالي سحر شوفي العنود تبيك
سحر جت بسرعه لأنه سمعت خبر حلو
سحر : أهليييييييييييين
العنود : هلا والله يالله استعدي بتجين اليوم عندنا
سحر : خخخخخخخ على طول بابا توه ما بعد قلت له
العنود : لا ما راح يقول شي أكيد كم مره جيتيني وترىكثيير اللي بيجون
سحر : كثير مين ؟؟
العنود : بيت عمي وخوات منيره وأمهم ويمكن تجي ليلى صديقتها
سحر : كل هذولي يعني لازم اكشخ
العنود : ايه اكشخي أحس اليوم أكيد بيطلع وناااااسه ولا تتأخرين بعد المغرب تعالي بسرعه
سحر : أوامر ثانيه أخت العنود
العنود : لابس لا ذكرت شي بقوله
سحر : مصدقه عمرك انتي يالله روحي بس
العنود : خخخخخخخخ ياحلوك وانتي معصبه يالله عندي اشغااااال واجده
سحر : يالله أخليك مع السلامه

وسكرت العنود وراحت تشوف منيره وين ؟؟
لقتها في المطبخ
العنود : وش سويتي كم حلى ؟؟
منيره : أنتي تعرفين تسألين وليش ماجيتي تساعدين ؟؟
العنود : اممممم هذاني الحين جايه بسوي حلى مرررره يجنن سوته وحده من البنات وأعجبني
منيره : يالله يالسنعه ورينا شطارتك ..

وجلسوا إلى تقريبا آخر العصر وهم في المطبخ بعدين راحو يتلبسون

بعد أذان المغرب كانو جاهزات
العنود كانت لابسه لبس مره نعوم تنوره لونها زيتي ميدي وفيها حركات بسيطه مع تيشرت أورنج وشبشب أورنج فيه فصوص زيتيه وشعرها مو طويل مره يعني تقريبا إلى آخر كتوفها مدرج وكانت فاكته وهي من النوع اللي ماتحب تكثر مكياج يعني كحل ومسكره وقلس وبس .. وكانت متحمسه مررره تروح وتجي وترتب البيت

منيره لبسها كان مرره حلو ولايق على طولها تنورتها بيج وفيها كسرات من قدام وورى وبلوزه لونها ارتكوازي ومعها داخل بعض الألوان وشعرها بما انه طويل ما فكته كانت ماسكته ببنس وحاطه مكياج طالعه فيه حلوه ومرره مبسوطه أخيرا راح يجونها خواتها وليلى بعد معاهم ومادرت أن يمكن فيه خبر بينكد عليها

العنود : عمر بلا ازعاج خلاص رح انت وسهى والعبو بعيد عننا خلاص
عمر طالع وش ملحه يجنن لابس بدله لونها بيج وأحمر وكاشخ
عمر : طيب أصلا حنا دايم مؤدبين مانزعج

دخلت أم سلمان : منيره حبيبتي جيبي البخور
منيره : ان شاء الله يمه

في هاللحظه نزل سلمان وشافهم جالسين
سلمان : الللللله كل وحده احلى من الثانيه أقول العنود لا أوصيك اليوم شوفي البنات زين
العنود تناظر له مع ابتسامه خفيفه : عيب عليك
سلمان : خخخ مؤدبه بسم الله عليك ولا البنات لاكشخو ماحد يكلمهم خلاص
العنود : احلف عاد بعدين ليش توك تنزل لو جو الحين
سلمان : خليهم يشوفون الزين اللي فيني حرام أخبيه

وسمع ابوه يناديه
العنود : رح شف يمكن عمي جا

مشى سلمان للمجلس بسرعه
أبو سلمان : سلمان تو الناس كل هذا نوم
سلمان : والله مادريت عن نفسي
أبو سلمان : شف عمك عند الباب افتح لهم
سلمان : طيب ان شاء الله
وفتح الباب وكانو توهم موقفين سيارتهم واستغرب يوم شاف وراهم سيارة فهد مو من عادته يجي
سلمان : هلا والله نور البيت تفضلوا
وسلم عليهم ودخلهم
والحريم دخلو من الجهه الثانيه
في مجلس الرجال كانو جالسين يسولفون سلمان قرب من أذن سعود وقال : وش سالفة فهد اليوم على غير العادة
سعود : بتعرف قريب وسكت
سلمان شك في السالفه وقال في نفسه ( كأني عرفت بدايتها )

عند مجلس الحريم ..
أم فهد : وش أخبارك يا منيره وش أخبار الدراسه ؟؟
منيره : الحمد لله خالتي
أم فهد بس جالسه تناظر فيها وعاجبتها مرره لا من ناحيه الأدب والأخلاق ولا من ناحيه الزين
الجوهره جايه بالغصب ونفسها في خشمها ومنيره ماودها أحد اليوم يضيق صدره وحاولت تسولف معها
منيره : وش عندك ناحفه ولاهم اختبارات
الجوهره : مره مقطعه نفسي أنا لابس كذا يجيني حالات ما أشتهي آكل
منيره : لا عاد لازم تسمنين شوي وترجعين مثل أول دبدوبه
الجوهره : في الإجازه عاد أنواع الأكل لا تخافين بسمن
منيره : هالاجازه مافيه عروس قريبين مره عشان تقولين الفستان مايخرب
الجوهره تفكر ( والله ماتدرين ليش جايين اليوم )
الجوهره : وش دراك يمكن على آخر الإجازه يكون فيه
في هاللحظه دق جوال منيره وشافته ليلى
منيره : هلا ليلى
ليلى : هلا بك يالله أنا عند الباب تعالي
منيره : خلاص جايه الحين

وطلعت فتحت لها الباب وسلمت عليها وجلسو يسولفن
ليلى : أقول عندك مرايات برا ودي أشوف شكلي قبل ما أدخل
منيره : حلوه بدون ماتنظرين في المرايه والا تعالي شوفي شكلك يمكن يخطبونك لولد عمي ههههههه
ليلى : انقلعي أنتي وأفكارك

وشافت شكلها ودخلو مع بعض
ليلى : والله اني استحي منيره
منيره : توهم مابعد جا أحد بس بيت عمي جايين
ليلى : أمك وخواتك ماجو
منيره : لا الحين بالطريق جايين

دخلو على الحريم
ليلى : السلام عليكم
الكل التفت عليها : وعليكم السلام
وسلمت على أم سلمان : وش أخبارك يابنيتي ؟؟
ليلى : الحمد لله خاله أنتي وش علومك ؟؟
أم سلمان : الحمد لله
وتسلم على أم فهد
أم سلمان : هذي ليلى بنت جارنا الله يحفظها
أم فهد : الله يحيك وش أخبار الأهل ؟؟
ليلى : بخير كلهم والله ..

وسلمت على الجوهره ومنى وهي بتجلس دخلت عليهم العنود
العنود : هلااااا ليلى أقول أنا وش هالنور
ليلى : هلا بك الله يسلمك وسلمت عليها
العنود : وش أخبارك من زمان عنك ؟؟
ليلى : الحمد لله وش هالزين كبرتي والله
العنود : هههه الله يسلمك عيونك الزينه


عند الرجال
أبو سلمان جالس يسولف مع ابو فهد وفهد كل شوي ينغز أبوه يبدا في السالفه
سلمان وسعود وعبدالله وحمد جالسين على جنب وكا واحد فاتح جواله يرسلون لبعض بلوتوثات ..
أبو سلمان : عبد الله قم ناد خواتك قل عمك بيجي يسلم عليكم

عبدالله مسك جواله ودق على منيره وقالها يجون عند المجلس بيسلم عليهم عمي
منيره : العنود تعالي نسلم على عمي
العنود : طيب جايه

جلست ليلى تسولف مع منى وأعجبتها
ليلى : انتي كبر العنود أجل
منى : ايه كبرها
ليلى : متى نتايجكم ؟؟
منى : لا تجيبين طاريها خليني انساها شوي
ليلى : ههههه وسعي صدرك بتنجحين ان شاء الله
منى : والله اني خايفه أبوي قايل مافيه سفره إذا أحد رسب

ليلى تلتفت على الجوهره : وانتي على ما أظن الجوهره ؟؟
الجوهره : ايه
ليلى : انتي أي قسم تدرسين ؟؟
الجوهره : انجليزي
ليلى : ماشاء الله ان شاء الله ماشيه فيه
الجوهره : الحمد لله ماشين

العنود تحب راس عمها : وش أخبارك عمي وعلومك ؟؟
أبوفهد : الحمدلله يابنيتي
منيره سلمت عليها وهي مستغربه اهتمامه يسألها عن الدراسه وش مسويه ومرتاحه ولا لا وهو مو من عادته يسأل ويهتم هالكثر
فهد جالس على أعصابه ويسمع أصواته ووده يطل ويشوفها

وصلت أم ناصر وبناتها وكانت منى في استقبالهم لأن منيره والعنود مابعد جو
استقبلتهم ودخلتهم المجلس
أم سلمان : هلا والله بأم ناصر الله حيها
أم ناصر : الله يحيك ويسلمك
أم سلمان : وش أخبارك وش أخبار العيال
أم ناصر : والله بخير الله يسلمك وأنتي بشري عنك ؟؟
أم سلمان : الله يسلمك هذي الساعه المباركه اللي نورتو علينا
أم ناصر : الله يجزاك خير ويعافيك

منى كانت واقفه مع نوره وحنان
منى : هلا والله وغلا أخيرا شفناكم
حنان : هلا فيك أنتي أي وحده ؟؟
منى : من تتوقعون ؟؟
نوره : امممم أتوقع منى صح ؟؟
منى : صح بسم الله وش دراك ؟؟
نوره : تشبهين العنود
منى : لا وين مانشبه بعض مره
حنان : إلا أقول وين منيره

منيره توها طالعه
منيره : هلااااااااااااا حنان نوره
حنان : هلا أختي
وتسلم عليهم
منيره : ليش تأخرتو ؟؟ تو دخلت وشفت أمي حسبتكم ماجيتو معها
نوره : وش أسوي فيه ناصر ماجانا إلا متأخر
منيره : دخل هو ولا لا ؟؟
نوره : لا عنده مشوار وبغى مايجيبنا بعض
منيره : ياويله عاد ادخلو يالله ترى ليلى فيه
حنان : والله ؟؟
منيره : ايه ومسكت يد نوره ومشت وكانت مرره فرحانه فيهم

دخلتهم وعرفتهم على بنات عمها وليلى
حنان : منيره وين العنود ؟؟
منيره : الحين جايه شكلها راحت تجيب القهوه عاد اليوم طالعه سنعه مسويه حلى
نوره : ياحبيييييلها خليها تجي مافيه داعي تتعب عمرها

العنود تكلم سحر
العنود : تراه مو عرس الى الحين ماجيتي
سحر : هههه لا تعصبين خلاص كلها عشر دقايق وأنا عندك تعرفين بيتنا بعيد عنكم
العنود : يالله تأخرت عليهم بروح
سحر : يالله مع السلامه

العنود شايله القهوه وداخله : السلام عليكم
وشافت أم ناصر قدامها ولا عرفتها هي أول مره تشوفها سلمت عليها
منيره : هاه العنود وش رايك بماماتي ؟؟
العنود استحت : عسل والله
منيره تأشر على حنان ونوره : هذي حنان ونوره تذكرين أشكالهم
العنود سلمت عليهم : يعني مع انهم كبرو عن أول
حنان : هههههه حلو كبرو انتي اللي متغيره طالعه تشبهين منى بنت عمك
العنود : وععع أنا أشبها أنا أحللللى بكثيير
منى طارت عيونها : أقول العنود لك الشرف تكونين تشبهين لي
منيره : خلااااص عاد والله ترى إذا ماسكتو أوريكم الشغل

العنود قاعدة تضحك على شكل منى ومسكت القهوه وقاعده تصب

عند الرجال
فكر أبو فهد يبدا ويدخل الموضوع
أبو فهد : والله ياخوي اني جاي اليوم وعندي طلب لاتردني فيه
أبو سلمان : ماعاش من يردك إذا قدرت أبشر
أبوفهد يناظر فهد : والله تعرف الولد كبر ووده يستقر في بيت خصوصاً انه لقى له وظيفه وحنا ودنا نخطب بنتك لولدنا إذا ماعندك مانع

في هاللحظه سلمان بان على وجهه أنه متضايق وحتى عبدالله ماجاز له الوضع وحمد وسعود لاحظو هالشي وفهد كان ينتظر أي رد من عمه
أبو سلمان : والله ما ادري شقولك من ناحيتي موافق بس بنشاور البنت ونرد لكم خبر واللي فيه الخير بيصير

عبد الله قال لحمد تعال نطلع شوي نتمشى برا
وهم طالعين
حمد : عبد الله وش فيك ؟؟
عبد الله : لا ولا شي مليت من القعده قلت خلينا نطلع
حمد : طيب وش رايك ندور بالسياره شوي

عند البنات خذتهم منيره وجلسو مع بعض عشان ياخذون راحتهم أكثر والعنود منقهره من سحر إلى الحين ماجت

العنود : بنات وش رايكم بالحلى <<<< أول مره تسوي حلى مستانسه
منى : زي وجهك
ليلى : حرام عليك منى يجنن توني بقول هذا احسن حلى ذقته
منيره : وياسلاااام وأنا أكرف ولا تمدحين و لا واحد من حقاتي
ليلى : خخخخخ لا تزعلين تسلم يدينكم
حنان : والله بالعكس الحلى اللي بالجالكسي حلو مره
منيره : ماحد فاهمني غير خواتي ياحبيييلهم

دق الجرس العنود نقزت من مكانها أكيييد سحر وياويلها منها على التأخير

................. انتهى الجزء