الجزء الثالث ......................................

في بيت أبوناصر ..
ناصر يأشر لنوره من بعيد يقولها قومي جزء حطي الكيك والعصير والأكل على الطاوله نوره فهمت وراحت تزين كل شي
وهم خاشين جو في السواليف إلا تنزل ديما
ديما : السلام عليكم
الكل : وعليكم السلام
منيره : أهليييييييين ديمو وتروح تضمها

عاد ديما كل شي ولا أختها منيره تمووووووت فيها لأنها تعطيها وجه في السواليف

ديما : من زمان ماجيتينا والله اشتقنالك
منيره : وأنا أكثر ياحلوه وتمسك مع خدودها
منيره : ليش طالعه دبدوبه
ديما : هههههههههه
حنان : هذي كل يوم تفطر وتتغدى وتتعشا على اندومي
منيره : هههههههه لا مايصلح والله المره الثانيه أجي وألقاك ماتدخلين مع الباب
ديما : لاااااااااااااااا خلاص أنا باكل اندومي مره وحده في اليوم
منيره : ايوه شطوره
ويدخل خالد وكان كاشخ وطالع حركه
خالد : هلا أختي هنا منورين
منيره : هلا بك بوجودك وش أخبارك ؟؟ وتسلم عليه
خالد : الحمد لله
منيره : وش هالزين كله
خالد : لا عاد ترى استحي أنا
منيره : طالع علي خخخخ
ناصر : عاد انت وياه بلا وثوق هاه خالد وش رايك بالمفاجاه ؟؟
خالد : أصلا أنا داري شفت كل شي
ناصر : أوووووووووووووووووووووص لاتقول شي <<< عشان الحفله
حنان ماتت من الضحك وأمها ماتدري وش السالفه
منيره : خير وش فيكم ؟؟
ناصر : لا لا ولاشي
منيره تناظر له وتقول أوريك
جت نوره بعد ما رتبت مع الخدامه كل شي في المجلس
وجلست وأشرت لناصر انها خلاص انتهت من كل شي

ناصر : والآن عائلتنا الحبيبه بمناسبه قدوم أختنا الموقوره منيره ال......... بعدين سكت شوي وقال : تحيه ياجماعه

والكل صفق بقووووووه متحمسين
ومنيره فاطسه من الضحك عليهم وأمها جالسه تضحك على هبال عيالها
ناصر: خلاااااااااااص يكفي تصفيق
خالد : والله حلو هالتصفيق عيدوه هههه
ناصر: خلاص اسكت انت أكمل كلامي (قررنا نسوي حفله بسيطه وعملنا جميع التجهيزات بمساعدة الأختين نوره وحنان لذلك
حنان : لحظه لحظه وحنا نبغى تحيه
ناصر : ولايهمك تحيه تحيه ويصفق
خالد : وأنا لازم تقول اسمي ابي تحيه
ناصر : وأخونا الملقوف خالد درى عن كل شي
خالد : تحيه تحيه
والكل صفق له
أم ناصر : وأنا آخر من يعلم
ناصر : حنا مسوينها مفاجأه ياأمنا العزيزه
خالد : تحيه تحيه وجلس يصفق
نوره : خلااااااااااااااااص طولتوها ترى
ناصر : هيا لنتجه جميعا ..
منيره : ههههههههههههه الله يرجكم بس
وطلعو كلهم للمجلس
ناصر أخذ المفتاح وجا بيفتح قال : أول شي قولو ماشاء الله لأن كلنا فناااانين في التنسيق
وفتحها ودخلو وكلهم انبهرو من شكل المجلس كان متغير مرررره
وخاصه منيره
منيره : الللللللللللللللللللله ابداع صراحه مشكورين ليش كلفتو على أنفسكم
نوره : لا أصلا ماسوينا شي كل هذا تعبير عن فرحتنا فيك
منيره : الله يخليكم لي
ناصر : يالله منور قطعي الكيكه
منيره : لا بصراحه أنا ودي أمي تقطعها
أم ناصر : الله يعافيك يابنتي مايحتاج أنا أقطعها الحفله لك قطعيها انتي
خالد : تتعازمون يالله اخلصو ولا أنا بقطعها
منيره : ههههههههههه خلاص ولايهمك أقطعها
ومسكت السكين وقطعتها وجلسو نوره وحنان يصبون العصاير
وجلسو يسولفون
وكانت جلسه عائليه ولا أرووووووع

وجت الساعه تسع وأبو سلمان قلق شوي لأنها تأخرت ودق على منيره
هي يوم شافت الرقم ارتبكت وهي جالسه بينهم قالت : عن اذنكم وطلعت
منيره : هلا يبه
أبوها : السلام عليكم
منيره : وعليكم السلام
أبوها : هاه طلعتي ولا توك
هي في بالها ( وينك ياسلمان حطتني في ورطه وش أقول وتداركت الموقف وقالت : الحين سلمان في الطريق جاي
أبوها : خلاص أجل سلميني على عمك
منيره : ان شاء الله

وبسرعه دقت على سلمان وقالت له وهو بسرعه تصرف ودق عليه وقاله اللي اتفقو عليه وأبوها ما قال شي أهم شي يتطمن أنها موب عندهم

نرجع شوي للعنود ومنى
العنود كانت جالسه في السوق مع عبد الله وشافت من بعيد منى
العنود : منننننننننننننننى
عبد الله : اسكتي فضحتينا أول مره تشوفينها الحين
العنود : لا بس مليت وأنا انتظرها
عبد الله : وبعدين هذا حمد جاي معها بلا حركات مالها داعي
العنود : طيب

حمد يبتسم له من بعيد وقرب وسلم عليه
حمد : هلا ابو الشباب كيف الحال؟؟؟
عبد الله : هلابك الحمد لله وش أخبارك ؟؟؟
حمد : متى جاي من زمان ؟؟؟
عبد الله : لا لي ربع ساعه تقريبا

العنود ومنى على جنب
العنود : يالله منى خلينا نروح نتمشى
منى : وأنا وش قايله يالله تكلمي قولي أننا بنروح عنهم
العنود : لا أستحي من أخوك ما أقدر
منى : ياربييييييييييييييييه تعرفين تستحين
العنود : يالله يالبطله تكلمي
منى : حمد ترى بنروح دق علي لا جيتو بتطلعون
حمد : خلاص بس ردي على الجوال مو زي كل مره
منى : أصلا متى وديتني عشان تقول ( مثل كل مره ) <<<< البنيه نست نفسها وعبد الله يناظر لها ويقول شكلها بريئه بقوه

حمد عطاها نظره قويه : خلاص حنا رايحين ومشى

من جهه ثانيه منيره قاعده مع خواتها في الغرفه
منيره : هاه حنان وش آخر كتاباتك ؟؟
حنان : أووووووووووه كاتبه كثير بس أوريك آخر قصيده كتبتها اليوم
منيره : يالله أحب أشعارك والله مع أنك ماعمرك فكرتي تكتبين فيني ..
حنان : خخخخخخ وش دراك يمكن وحده كانت موجهه لك
نوره : صراحه قريت الشعر اللي كتبته حنان كان لك مرررره روعه
منيره : احلفي لي أنا ما أصدق وريني
وتعطيها الشعر الشعر طويل كان بدايته :

أبكي قصيده وأشبك البيت بالبيت
وأشكي قوافي الليل من كل ضيقه
وأدخل في بحور الشعر لامن تجليت
وأغوص في وسط البحور العميقه
في حبكم لاني بحي ولا ميت
كني كسير الطير ماله طريقه


منيره :روووووووووووووعه الله يعافيك وش هالابداع
حنان : الله يسلمك تستاهلين أكثر أخيتو
منيره : إلا أقول ماقد فكرتي تنشرينها في منتدى ولا مجله
حنان : والله مفكره حتى نوره مصره علي تقول نزليها
منيره : على هالطاري عندكم ايميل والله اشتاق لكم ودي اسولف معكم
نوره : ايه عندنا أفا وعطتها اياه ........................................


العنود ومنى في أحد المحلات
منى : أقول شوفي هالبلوزة مره حلوه ولا ؟؟
العنود : حلوه بس لونه مو مره حلو
: إلا جنااااان ذوقك ياحلوه
منى تناظر وراها لقت واحد قاعد يناظرها وسحبت العنود وطلعت
منى : خير وش يبي ذا ؟؟؟
العنود : أقول أمشي لا يلحقنا الحين
منى تلتفت لقت وراهم يناظر من بعييد وقعد يأشر لها
منى خافت مرررره وتمشي بسرعه
العنود : خلاص منى وجعتني رجولي من المشي ماراح يجي
منى : وش دراك ؟؟
العنود بتغير السالفه
العنود : وش رايك ندخل هالمطعم جوووووووووووووعانه وبموت
منى : والله جا في وقته حتى أنا جوعانه
ودخلو المطعم وطلبو ورق عنب وكل وحده شرت لها وجبه وجالسين يسولفون وفجأه دخلو حمد وعبد الله بالصدفه

منى : أقول والله أخوك أول مره أشوفه زين قدامي
العنود : مزيون يشبه لي صح ؟؟؟
منى : ايش مين المزيونه ؟؟؟
العنود : أقول منى شوفي أخوك
منى طارت عيونها أخوها حط ورقه على طاوله وحده من البنات وانقهررررررررررررررت بقوه وقالت : أوريك ياحمد
العنود : اقعدي بلا فضايح وش بتسوين ؟؟
منى : مالك شغل
وقامت عند طاوله البنت وخذت الورقه وراحت البنت تناظرها مستغربه خير وش السالفه بس هي ماهمها أحد
وجلست تقراها مكتوب فيها ( اتصالك يعني لي الكثير ــــــــــــــــــــــــ 05)
منى : لا ويعرف يرقم بعد هو ووجهه
العنود : مو وقته لا جا البيت حطي حرتك فيه الحين انسي
منى تمسك العنود : العنووووووووووووووووووووود
العنود : خير خوفتيني وش السالفه ؟؟
منى : شوفي اللي قدامك <<<<< كان اللي تو يلاحقهم
العنود : صدق لا قالو لزقه
منى : شوفي سلم على حمد يعني يعرفه
العنود : رحنا فيها امشي خلينا نطلع بسرعه
منى : يكون أحسن بعد
وهم طالعين حمد لمحهم وخاف لا شافوه وهو يرقم وكان سرحان
سالم : الووووووووووو
حمد : هلا معليش
سالم : ماقلت لك تو قاعد الاحق بنتين ومساكين تروعو
حمد : خخخخ ولا الحين على حركاتك
سالم : من زينك يقالك اليوم ماسويت شي ؟؟؟
حمد : والله الواحد مايصبر لازم ههههه
سالم : قلتها والله
حمد : خلك ساكت ترى ولد عمي معي والله بيفضحني لادرى لان ماعنده هالحركات
سالم : يالله سلام بروح أشوف هالبنتين وين ؟؟؟
حمد : خلهم في حالهم مسكينات وتعال اجلس معنا اعرفك على ولد عمي
سالم : لا احراج ياشيخ
حمد : خلك ساكت بس امش
ودخل سالم مع عبد الله بالسواليف وجلسو هالثلاثي يتعشون ويوم جت الساعه 11 قررو يطلعون واتجهو للبوابه ودق حمد على منى
منى : الو
حمد : هاه يالآنسات خلصتو
منى معصبه منه : ايه جايين وقفلت الخط
وهم متجهين للبوابه شافو سالم معهم انهبلو وش يبي ذا ؟؟؟؟؟
سالم شافهم ودرى انهم لهم طرف فيهم وقال يالله امشي باأقرب فرصه عشان مايفضحونا
سالم : يالله شباب فرصه سعيده اللي شفناكم اليوم
حمد : هلا والله الجايات أكثر
عبد الله : يالله مع السلامه وتشرفنا

وفي السياره العنود مبسوووووطه وتسولف لعبد الله كل شي
العنود : والله مشكور يااحلى اخو على الطلعه الحلوه تعرف سلمان قال بوديكم وسفهنا الله يهديه
عبد الله : العفو بس لا تقولين عن سلمان كذا يكفي اليوم مشغول مودي منيره وسيارته في الورشه هو مايقصر
العنود : ايه اصلا بيوديني أنا ومنيره لأن منيره ماراحت اليوم وهي ودها بالسوق
عبد الله : أقول صكيتي راسي من يوم ركبتي وانتي تقرقين اووووص دقيقه بس
العنود تذكرت سالفه سالم وقالت
العنود : ايه تذكرت من هو اللي كان واقف معكم تو عند البوابه ؟؟
عبد الله يناظر مستغرب : وش دخلك تسألين عن الشباب ؟؟
العنود : لابس أقولك بصراحه تراه انسان لعاب وشو له تمشي معه
عبد الله : أولا تراه صديق حمد وبعدين ليش لعاب ؟؟
العنود : أقولك بصراااااحه اليوم ماخلانا في حالنا
عبد الله عصب : وليش توك تقولين ليش مادقيتو علينا ؟؟
العنود : ما ادري قلنا يمكن يمل ويتركنا وما ودنا تسوونها سالفه في السوق
عبد الله : حتى ولو مره ثانيه تخليني أكره اوديك السوق
العنود : لا لا لا لا إلا السوق خلاص مره ثانيه أعلمك
العنود كانت ودها تقوله عن حمد وش سوا بعدين قالت لا وش دخلني يمكن تصيرمشكله بينهم على حسابي اسكت أحسن

نرجع شوي لمنى اللي من يوم ركبت السياره ولا تكلمت ولاحرف وكل مايكلمها ترد عليه بكلمه تسكته وهو عرف انها معصبه وشك انها عارفه السالفه يوم وصلو البيت
حمد : منى ماتستاهلين روحات انتي قولي ليش معصبه الناس ينبسطون إذا تمشو وانتي العكس
منى انقهرررررررررت وفتحت شنطتها وطلعت الورقه ورمتها عليه ونزلت
هو تمنى انها يموت ولا يصير هالموقف مع أخته يعني شافتني بس يااارب ما احد يدري أخاف تعلم سعود ويسوي لي سالفه آآآآآآآه بس أنا ماادري متى أتوب عن هالحركات دايم أحط نفسي في مشاكل ومواقف بايخه زي هالموقف

الساعه 2ونص ومنيره في بيت أمها مارجعت وبدت تخاف وينه سلمان ليش سواها فيني ماني ناقصه مشاكل أنا وشوي دق جوالها قالت في نفسها ( ياااارب سلمان ) وشافت المتصل لقته رقم غريب قالت يمكن داق من رقم ثاني
منيره : نعم
: الله ياحلو هالصوت
منيره تقفل الخط مو وقته والله الحين هذا رايق وأنا في حاله
وهالرقم أبلشها كل شوي داق وخواتها حسو هالتوتر فيها
ومنيره حرقت جوال سلمان مكالمات ومافيه أحد يرد
نوره : خلاص منيره يوديك ناصر إذا تبين تروحين
منيره : لا أنا هامني أكثر ليش مايرد علي وش فيه ؟؟
وبدت الهواجيس والأفكار تجيها
حنان : خلاص انتي اهدي وان شاء الله خير
وبدو خواتها ينسونها شوي ويريحونها

وجت الساعه تقريبا 3 وجاها اتصال من عبدالله
منيره : ألو هلا عبد الله
عبد الله : هلا وينكم سلمان ليش مايرد ؟؟؟
منيره يعني الكل يسأل عنه كله مني أنا آآآآه وجلست تصيح

عبد الله : الووووووووو منيره وش فيكم ؟؟
منيره بصوت متقطع : أنا ما ادري وش السالفه أنا عند أهلي ماجاني وجواله مايرد
عبد الله خاف بقوه ودق بسرعه على سعود بس حتى سعود مايرد وبدا القلق والخوف على الكل حتى العنود درت بالسالفه وجلست خايفه وبغت تدق على منى بس عبد الله قال ياويلك تقلقينهم
ويدعي في نفسه ( يارب يرجعون قبل مايقوم أبوي ولا أمي )
قبل أذان الفجر بنص ساعه العنود مسويه مناحه عند عبد الله ومنيره عند خواتها جالسه تصيح
وشوي يدق جوال عبد الله وشاف المتصل سعود
عبد الله رد بسرعه : ألو سعود وينك ؟؟
بس كان اللي متصل موب سعود
:أخوي أنت وش تقرب له
عبد الله: ولد عمه ليش وش فيه تكلم ؟؟
: لا مافيه شي اهدى بس اذا تكرمت يجي أحد أولياء أمر هاللي اسمهم سلمان ال...... وسعود ال....... بسرعه عندنا في مستشفى ال ...........
عبد الله انصدم مستشفى وش السالفه ؟؟؟؟ : ان شاء الله وقفل الخط
العنود : عبد الله وش فيه ؟؟؟
عبد الله : مو وقت الأسئله روحي دقي الباب على ابوي وقوميه بسرعه وراح لبسه ثوبه

العنود تطق الباب ووجهها كله دموع فتح أبوها فاتح نص عيونه
يوم شاف هالمنظر البنت تصيح وفي هالوقت من الليل
أبو سلمان : العنود أحد فيه شي
العنود تحاول تتكلم بس من كثر الصياح ما قدرت والكلمه اللي طلعت منها : عبد الله وأشرت على الباب
عبد الله نازل مع الدرج يركض : يبه بسرعه البس ثوبك انتظرك في السياره
في هاللحظه أبو سلمان خاف ولا يدري وش فيهم عياله بس كل اللي سواه انه لبس ثوبه ومشى
وعلى هالصجة قامت أم سلمان وشافت العنود غرقانه في دموعها
أم سلمان : خير وش فيكم ؟؟؟
العنود : ................ تصيح
أم سلمان : تكلمي منيره رجعت ؟؟؟
العنود هزت راسها لا
الأم بدت تخاف وش السالفه
وأخيرا تكلمت العنود : يمه سلمان مارجع ومنيره عند أهلها وتو اتصل واحد في عبدالله وقاله يجي هو وأبوي أكيد سلمان فيه شي
ودق تلفون البيت ردت أم سلمان كانت منيره
منيره : ألو يمه وتصييييييييح
أم سلمان : هلا بنيتي اهدي ان شاء الله مايصير الا الخير
منيره : يمه سلمان وسعود في المستشفى
أم سلمان : في المستشفى ؟؟؟؟؟
وهنا أم سلمان جاها دوخه من الصدمه ومنيره تناديها وما احد يرد
منيره في قلبها وش هالمصايب ؟؟؟؟أبي أفهم أبي أشوفهم قدامي كلهم بخير

في المستشفى عبد الله قال لأبوه وش السالفه والأبو صار متوتر
دخلو مسرعين قابلهم الضابط
أبو سلمان : أنا والد سلمان ال........ طلبتنا وش صار في ولدي
الضابط : اهدى شوي واجلس
عبد الله معصب : مو وقت الجلوس قلي أخوي وولد عمي وينهم
الضابط : ترى كل شي بقضاء الله وقدره وأنا أقولكم اللي اسمه سلمان كانت إصابته كبيره وهو بالعنايه حاليا واللي اسمه سعود الحمد لله استعاد وعيه بس عنده كسور خفيفه

أبو سلمان ما استوعب وش يقول هذا عنايه كسور أنا شكلي بحلم وصار ساكت ولا تكلم
الضابط : الحمد لله على كل حال وان شاء الله يطلعون لكم بالسلامه ...
أبو سلمان ماتكلم ساكت
عبد الله : طيب نقدر نشوفهم الحين
الضابط : تقدرون تسألون الطبيب تقدرون الحين ولا لا ؟؟
عبد الله يمسك أبوه : يبه يالله مشينا
أبو سلمان : صحيح اللي يقوله قل انه يكذب قل ما أصدق ونزلت دموعه
عبد الله : يبه خلك أقوى وان شاء الله مافيهم إلا العافيه ولازم أدق على عمي يحضر
أبو سلمان : صحيح دق عليه بس لا تخوفه قل حادث بسيط

كان أذن الفجر والحين الناس يصلون ودق عبد الله بس عمه كان بالمسجد ولارد
منيره تقطع قلبها وأهلها حولها
منيره : ناصر الله يخليك ودني لأهلي الحين ما احد يرد علي أبي أعرف وش صار فيهم
أم ناصر : قم ياولدي ودها
ناصر: ان شاء الله يمه
أم ناصر : ولاتنسين تدقين تطمنيني ترى ماني مرتاحه
منيره وهي تصيح : ان شاء الله بس لا تنسينا من الدعا
أم ناصر : الله يردهم سالمين كلهم


وبعد الصلاة عبد الله يدق
أبو فهد : هلا عبد الله
عبد الله : السلام عليكم
أبو فهد : وعليكم السلام
عبد الله : عمي
أبوفهد : وش فيك عسى ماشر ؟؟؟
عبد الله : لا ان شاء الله خير بس سلمان وسعود مسوين حادث بسيط ولازم تحضر

أبو فهد : حادث ؟؟؟؟؟ متى ؟؟ عسى مافيهم شي ؟؟
عبد الله : لا الحمد الله بسيطه بس تعال انت الحين
أبو فهد : خلاص مسافة الطريق وأنا جاي
أبوفهد ( ليش أنا ضيعت عيالي ولدي في المستشفى ولا دريت عنه آه بس ويدق على فهد بس كان نايم ولا سمع
ودق على جوال الجوهره وكانت صاحيه
الجوهره استغربت أبوها داق على الفجر
الجوهره وكلها نوم : ألو
أبو فهد : زين موب نايمه بعد أخوكم في المستشفى ولا أحد درى عنه روحي قومي فهد بسرعه

الجوهره مو مستوعبه وش السالفه أبوها يهاوش أخوي في المستشفى وماسمعت إلا طوط طوط طوط انقفل الخط
هي أول مره يحسسها شي قامت بسرعه وراحت لغرفة سعود لأنها توقعت أنه حمد اللي في المستشفى بس مالقت أحد ومرت على غرفة فهد وطقت الباب وبعد المووووووووت فتح
فهد معصب فتح الباب : وش تبين ؟؟؟
هي خافت
الجوهره : لا تنافخ سعود في المستشفى بسرعة تحرك
فهد : سعود ؟؟؟؟؟؟؟؟؟؟؟؟؟؟
الجوهره ماتحب أحد ينفخ عليها راحت بسرعه ولا ناظرته
فهد مافهم شي أخذ جواله دق على سلمان مسكين يحسبه ماصار له شي وطبعا مااحد يرد
ومالقى إلا يدق على عبد الله وفهمه السالفه ووش صار ؟؟
فهد بسرعه طلع لهم في المستشفى
الجوهره ما عرفت تتصرف هل تقوم أمها ؟؟؟ وشلون بتقولها ؟؟؟ أكيد بتنصدم
فكرت شوي وجت على بالها منى قالت يمكن تعرف تتصرف وهي ماشيه على غرفة منى إلا سهى في قبالها خايفه
سهى : منى تصيح وش فيها أقولها ليش ؟؟ تهاوشني تعالي شوفيها

في هاللحظه عرفت الجوهرة أن منى وصلها الخبر ارتاحت شوي لأنها ماودها هي اللي تفجعها
الجوهره أول مرة تكلم أختها صدق بس هالموقف يستلزم هالشي
دخلت ولقتها حاطه راسه على رجولها وتصيح بصمت
الجوهره : منى خلاص وان شاء الله سعود مافيه شي
منى : وشلون مافيه شي وأنا تو مكلمتني العنود مسوين مناحه في بيتهم
الجوهره : بس خلاص المهم الحين شلون أمي تدري ؟؟؟
رفعت راسها منى : أمي ماتدري ؟؟؟؟؟؟؟؟
الجوهره : لا
منى : خلاص اجلسي أنا بطريقتي راح أوصلها الخبر
الجوهرة : امسحي دموعك قبل لا تروحين عشان ماتحس أن الأمر كبير
منى : طيب
وقامت غسلت وجهها
الجوهره جلست تفكر ( الحين أنا الكبيره وماعمري سويت شي مفيد دايما أسبب المشاكل ومنى توني أكتشف على صغرها بس عقلها كبير ) وظلت الجوهره على هالأفكار الين جت منى
الجوهره : هاه وش قلتي لها ؟؟
منى : لا أشوى الحمد لله قلت لها حادث بسيط وهو بخير وقدر يكلمهم والحين هي تقدر تزوره وصحيح تأثرت لكن هديتها شوي
الجوهره : زين الله يشفيه
منى سكتت شوي : الجوهره سمعت أن سلمان في العنايه
الجوهره : في العنايه من قال لك ؟؟
منى : توني مسكره من العنود طبعا أنا مافهمت منها شي كل بين كلمه وكلمه تصيح بس اللي قدرت أفهمه أن أخوها حالته خطيره
الجوهره : الله يعين الا أقول ترى حمد نايم وأكيد مادرى بروح أشوفه
منى تذكرت سالفة السوق وانقهرت منه وفي بالها أخواني ولا واحد ينفع لشي ماغيرك ياسعود يارب ترده لنا سالم
في المستشفى
كان الكل متجمع أبو فهد وفهد وأبو سلمان وعبد الله وكل واحد يواسي الثاني وشوي دخل الطبيب
الدكتور أحمد : تقدرون تشوفون سعود بس رجاء ما احد يسأله عن الحادث كلها خمس دقايق وتطلعون والضابط بيكون معكم
أبو سلمان : ليش وش سالفة الحادث ؟؟؟
الدكتور أحمد : هذي تعليمات الضابط تفضلو
وقامو ودخلو عليه
كان نايم على السرير ورجله مادها مجبسه وعلى راسها لافين شاش يوم شاف أهله ارتاح وابتسم لهم
أبو فهد : السلام عليكم ويحبه مع راسه وشلونك ولدي ؟؟
سعود بصوت منخفض : الحمد لله
وجا عمه وأخوه وعبد الله وتحمدو له بالسلامه وماأمداهم يقعدون إلا الضابط يطلب منهم أنهم خلاص يطلعون وهم طالعين سعود مسك يد عبد الله وقال : عبد الله وينه سلمان ؟؟
عبد الله وش يقول يقوله أن في العنايه سكت شوي وقال : الحين مرقدينه وارتاح انت ان شاء الله بيكون بخير
في هاللحظه دخل حمد مسرع : سعود أخوي الحمد لله على السلامه ..
سعود ابتسم : الله يسلمك
حمد : والله توني داري ان شاء الله انك بخير؟؟
سعود : الحمد لله بس ادعولي تنفك هالجبوس مني

الضابط : خلاص لو سمحتو
عبد الله يقرب من عند سعود ويقول : سعود وش سالفة الضابط
سعود : ادع لنا نطلع ببراءه
عبد الله مافهم بس طلع عشان مايعصب عليه الضابط

وهو طالع شاف حمد ينتظره
حمد : عبد الله أخوك فيه شي ؟؟
عبد الله : آه ياحمد والله حالته خطيره
حمد : أبي أفهم وش سالفة الشرطه ؟؟؟
عبد الله : هذا اللي محيرني بعد علمي علمك

في بيت أبو سلمان العنود ومنيره وأمهم وعمر الصغير جالسين
كل واحد في همه ينتظرون أي اتصال منيره دق جوالها شافت المتصل ناصر
ناصر : السلام عليكم
منيره : وعليكم السلام
ناصر : وش أخباركم صار شي ؟؟؟
منيره : الى الآن بس اللي أعرفه أنهم رافضين يدخلونهم على سلمان بسبب حالته

ناصر : انا رايح لهم المستشفى وخوذي أمي تبيك

وجلست أمها تهديها وتذكرها أن تدعو له وأن الصياح وهالدموع ماتنفعه وأن الله قوي وقادر يبعد عنه هالبلاء

من جهه أخرى طلب الضابط من أبو سلمان وأبو فهد أنه يبغاهم في جلسه خاصه من دون العيال طبعا وافقوا وعلى راسهم ألف استفهام

جلسوا العيال حمد وفهد وعبد الله في الانتظار

عند الضابط
الضابط : أكيد راح تستغربون ليش جمعناكم والسالفه اللي فهمتوها أن الموضوع حادث وبس لكن اللي تبين أن الموضوع أكبر
أبو فهد : مافهمت كيف ؟؟؟
الضابط : راح تفهم انتظر شوي حنا جانا بلاغ بوجود حادث وتوجهنا للموقع بس الأمر اللي شفناه ما كان حادث وبس والدليل قدامنا واضح كان سعود برا سيارته طايح والدم على وجهه وسيارته مافيها شي وسلمان صحيح كان في السياره بس الحادث بسيط مايستاهل هالاصابات قمنا سوينا بحث و تحقيق عن الموضوع بس ماتوصلنا إلا لشي واحد وهو وجود شخص كان معهم وهرب ولا أحد يعرف من هو ؟؟
أبو سلمان : طيب يمكن سعود يعرفه
الضابط : وهذا هو الأمل بس ننتظر حالته تستقر بس إذا سمحتم أدري أنك راح تنصدمون حنا لقينا في سيارة سعود هذا الشي ...
وحطه على الطاوله ( كان كيس فيه مخدرات )
أبو فهد يناظر أبو سلمان : لا ما أتوقع الوحيد من عيالي اللي مستحيل أشك فيه
أبو سلمان : وأنا معه سعود عاقل ولا عند هالحركات
الضابط : بصراحه ما أقدر أصدق ولا كلمه لأن ماعندي أدله والتهمه ثابته عليه وسلمان بما أننا لقيناه بنفس الحدث لابد أننا نحقق معه بعد ما يستعيد وعيه

أبو سلمان : بس لا تتعجلون ولازم تعرفون الشخص الثالث اللي معهم ..

الضابط : يكون خير
وطلعو الاثنين وكل الدنيا عندهم سودااااا واتجهو لبيوتهم وقررو ما احد يدري عن سالفة الحادث هذي غيرهم
أبو سلمان دخل البيت وشاف عياله ومنظرهم الحزين
أم سلمان : هاه بشر عنه ؟؟ نقدر نزوره العصر ؟؟
أبو سلمان : ما أعتقد لأنه في العنايه الحين ادعو له
أم سلمان تصيح : ياقلبي عليك ياولدي الله يشافيه
أبو سلمان : أنا بطلع الغرفه ارتاح إذا جاكم أي خبر علموني
وطلع غرفته

الساعه 4 العصر كانو عايلة أبو فهد متجهين للمستشفى لأن سعود مسموح له الزياره وكلن مشتاق له حتى الجوهره اللي ماكان لها احتكاك في أهلها كانت بقوه ضايق صدرها

فتح الباب أبوفهد ولقى سعود جالس يقرا قرءان ويوم شاف أبوه وأهله سكر المصحف وقال : هلا والله با اهلي
أبوفهد : هلابك لا اليوم وجهك زين
وشوي تدخل ام فهد : الحمد الله على سلامتك ولدي
سعود : الله يسلمك أمي وحضنها وجلست تصيح عاد أمه من بين عيالها سعود غير
سعود : يمه لا تصيحين أنا بخير وراح أطلع لكم مثل أول ان شاء الله
منى والجوهرة وراهم يتابعون هالموقف اللي وجع قلوبهم ويقولون تونا نعرف غلاك ياسعود
منى : الحمد لله على السلامه سعود وتسلم عليه
سعود : الله يسلمك هاه فقدتيني ولا افتكيتي مني
منى : لاااااااااا ارجع بس البيت يضيق الصدر بدونك
الجوهره : وخري شوي بسلم عليه
سعود : هلا جوجو
الجوهره : ماتشوف شر أخوي وتسلم عله
سعود : الشر مايجيك
سهى : سلامات سعود
سعود : الله يسلمك قلبي والله اشتقت لكم
سهى : تعال ارجع لنا نبغاك
سعود : يا حبيلك بس ان شاء الله برجع قريب
منى : عاد سعود حبينا نقدم لك هالهديه الحلوه مني أنا وأختي الحلوه الجوهره وسهى الصغيوره

وكانت باقة ورد كبيره روووعه تجنن وحاطين بطاقه على جنب ألف الحمد لله على السلامه ياالغالي ... أخواتك
وكان بجنبها سلة حلاو اللي يحبه سعود ( باتشي )

سعود : تسلمون زيارتكم تكفي يابعدهم ليش مكلفين على أنفسكم ؟؟

الجوهره : لا بس تعبير عن فرحتنا بسلامتك
أم فهد : وش أخبار ولد عمك سمعت عنه شي ؟؟
سعود نزل راسه : لا يا يمه كل اللي أعرفه أنه مازال في العنايه
أم فهد : الله يطلعه سالم لأهله
الكل : آميييين
أم فهد : ما قلتي لي وشلون حصل هالحادث ؟؟؟
سعود لازم يطلع له كذبه وش يسوي : لا بس صدمت فينا سياره مسرعه على الخط السريع
أم فهد : عسى ماتعور صاحب السياره
سعود : يعني اصابات بسيطه ..

وانتهت زيارتهم اللي حس فيها سعود براحه وتغيير جو عليه لأنه ضايق بسبب سلمان

في بيت أبو سلمان كانت منيره تكلم ليلى : هذا اللي صار ويارب أخوي يرجع لنا والله مالي في هالدنيا مهتم فيني كثره توني أعرف قدره
ليلى : لا ان شاء الله يرجع لكم وترى كثير يصير مثل هالشي ويرجعون أحسن
منيره : الله يسمع منك
ليلى : بتداومين ؟؟؟
منيره : ما أعتقد نفسيتي زفت بقوه
ليلى : خليك أقوى وخلاص راح أوصلك محاضراتك إلى ماتداومين
منيره : مشكوره ماتقصرين والله
ليلى : العفو يالله ما أطول عليك سلميني على أمك
منيره : الله يسلمك
العنود اللي قالبه الدنيا ولاهي راضيه تكلم أحد حتى سحر دقت فيها كم مره بس ما في فايده وقدرت تعرف من منى السالفه عشان كذا مهتمه ...

بعد يومين مرو بطيئات طلع سعود رغم الكسر اللي في رجله لكن قالو له مايتحرك كثير ولازم يرتاح لكن سعود كثير تغير وصار هادي وكل وقت يدعي على من كان السبب بهذا الشي

وفي عصر يوم من الأيام كان جالس في الحوش على كرسيه ويحاول يراجع شوي من كتبه لأنه له وقت غايب وماحضر وشوي يدق جواله كان رقم غريب
سعود : نعم
الضابط : السلام عليكم
سعود : وعليكم السلام
الضابط : الأخ سعود ؟؟
سعود : نعم من معي ؟؟
الضابط : معك مركز الشرطه حابين نجيك الآن في البيت إذا ما عندك مانع
سعود : لا أبد تفضلو


بما أنه سعود مايقدر يحضر فقررو يجون عنده في البيت بعد ساعه دق الجرس سعود كان جالس في المسجد ينادي حمد
سعود : حمد حمد
حمد : نعم وش عندك
سعود : افتح الباب
حمد : طيب طيب
حمد راح وفتح الباب وانهبل يوم شافهم الشرطه
الضابط : هذا بيت سعود ال.......
حمد : ايه نعم بغيتو شي
الضابط : ايه حنا لنا موعد معاه
حمد فتح لهم الباب وهو مو قادر يفهم السالفه وليش أهله ساكتين ؟؟ مع انه شاك
دخل الضابط ومعه اثنين من الضباط وسلمو على سعود وجلسو

الضابط : أنت عارف ليش جايين نبغى تتعاون معنا عشان تطلع ببراءه
سعود : راح أقول اللي أعرفه
الضابط : أول شي تعرف اللي كان معكم ؟؟؟
سعود : كان متلثم ومعه سلاح لكن ما أطلق شي وكان معه أشخاص تقريبا ثلاثه كل اللي سواه ضرب سلمان فيه على راسه وأنا جيت بدافع وجاني صدمه خفيفه بالسياره وأنا شفتهم يوم ركبو السياره حقتي بس ما توقعت أنهم بيوصلونها لهاالدرجه

الضابط : زين طيب ماتشك بأحد ؟؟؟
سعود :كل اللي أعرفه أن سلمان كان بينه مشكله مع واحد اسمه عبد العزيز ال........ ومو بعيده يكون هو
الضابط : خلاص هالاسم بنبحث فيه

وبعد تحقيقات طويله انتهت هالجلسه وسعود ارتاح يمكن قدر يسوي شي يدافع عن نفسه وعن سلمان

نرجع لل العنود نفسيتها شوي تحسنت وكانت تكلم سحر
سحر : خلاص انتي يكفي غياب لك أسبوع الكل يسأل عنك
العنود : والله ماااالي خلق أجي
سحر: إلى متى أنتي حاولي تداومين الأسبوع الجاي
العنود : بحاول
سحر : تصدقين عاد اني أكسر الخاطر
العنود : لييييييش ؟؟
سحر : كذا مافيه وحده تستهبل معي ووحده اسمها العنود أقابل وجهها كل يوم وكلن يناظر لي كاني مسكينه
العنود : يااااعمري انتي لا تصيحيني كلش ولا سحر والله اشتقت لك
سحر : احم احم استحي
العنود : أقول وش رايك تعالي اليوم عندي ودي أغير جو ماله وطفشانه
سحر : امممممممممم اليوم ما أتوقع يمكن نطلع لجدتي من زمان ما رحنا لهم ويمكن ننام عندهم
العنود : قهررررر خليني أقول لمنى تجيني
سحر : إلا وش أخبارها ؟؟؟ مداومه ولا مثلك دلوعه
العنود : أنا دلوعه ؟؟ اوريك لا مداومه أخوها طلع الحمد لله
سحر : خلاص يالله بسكر الحين أهلي بيمشون وأنا بقعد شكلي أشوفك في المدرسه خلاص مع السلامه
العنود : أكيد و يالله مع السلامه

في صباح يوم الجمعه يدق جوال سعود بس كان توه مابعد قام لكن جواله كان عالعام ناسي يخليه صامت قام وشاف الاتصال لقاه من الضابط رد بسرعه
الضابط : السلام عليكم
سعود : وعليكم السلام
الضابط : ازعجناك على الصبح العذر اخوي بس الامر مهم
سعود : لا عادي تفضل
الضابط : اللي اسمه عبد العزيز مفقود له اسبوع وشوي تقريبا من الحادث أبيك إذا تعرف أحد من أصدقائه
سعود : كل اللي أعرفه أنه كان يجي بين فتره وفتره للاستراحه اللي نتجمع فيها ولا أعرف له صديق معين
الضابط : خلاص مشكور بس إذا قدرت تعرف شي علمنا
سعود : ان شاء الله

نروح الحين لمكان بعيييييييييد أبعد شوي في لندن من تتوقعون فيها
أكيد عرفتوه عبد العزيز كان جالس في غرفته ومعه صديقه صالح
كان كل الوقت من يوم جا هالبلده وهو في عالم ثاني يفكر في اللي سواه ( أنا حقير سالفه صغيره تخليني أسوي هالشي أورطهم في سالفة مخدرات وأنا الحين ماادري حيين ولا ميتين ... قطع تفكيره
صالح : ياشيخ ترى ملينا من هالقعده يا تستانس وتفلها يانرجع
عبد العزيز : استانس بعد اللي سويته
صالح : ماتوقعتك رحوم لهالدرجه وش الطاري
عبد العزيز : صالح خلاص مهما كان أنا ذبحتهم بيدي وأنت السبب
صالح : أنا السبب ؟؟؟؟ والله ما ادري من اللي قاعد يخطط
عبد العزيز : بس أنتو شجعتوني تقدر تقولي لا تسويها بس أنت من يوم عرفتك وأنت كلك شر
صالح : أنا كلي شر ؟؟ وانا اللي تارك ديرتي وقاعد معك هنا أنا وش قعدني يكون في علمك بكرا تراني حاجز بسافر وأنت اقعد عشان تعرف قيمتي
عبد العزيز : أنا قابضين علي قابضين انت رح في طريقك وأنا إن تيسرت لي جيت
صالح ناظر له نظراته كره : أتمنى بعد هاليوم ما أشوفك ولا تعرفني فاااااااااهم
عبد العزيز : الله لايحوجنا لناس أمثالك
صالح خلاص وصلت معه : عبد العزيز لا تخليني ارتكب فيك جريمه ..

طلع صالح من الفندق وحجز أقرب رحله للسعوديه يبغى يفتك وكانت رحلته الليله الساعه 12
رجع الفندق وحتى ما ناظر لعبد العزيز ولاعبره وهو شايل أغراضه وطالع ناداه عبد العزيز
عبد العزيز : صالح
فكر مايرد عليه بس وجعه قلبه : نعم بغيت شي
عبد العزيز : أول شي إذا ماعليك كلافه توصل سلامي للأهل وقل لهم أنا بخير وأبي توصل لي أخبار سلمان وولد عمه وان شاء الله برجع قريب
صالح : عبد العزيز شف أنا صح مازال قلبي يلومني على اللي سويته مع ذلك أقولك كل اللي تبيه راح أوصله لك ويالله مع السلامه وطلع

عبد العزيز خلاص حس الدنيا صغيره في عينه وأول شي حطه في باله قال برجع قريب بس مابي أحد يدري وقبل هذا كله أتمنى أعرف أخبارهم ان شاء الله يكونون بخير ..
عبد العزيزندم أكبر ندم على اللي سواه واستحقر نفسه لأنه بالفعل شي صغير خلاه كبير بس هو كان يقول ( كرامتي ماتهون علي ) بس شوفو وين ودته هالكرامه

في غرفتها كانت جالسه ومشغله المسجل على القرءان وهي جالسه تذاكر خلاص الامتحانات قربت ولازم يجي الجد منيره كان شاغلها الوحيد سلمان على نفس حالته ماتغيرت من الحادث سمعت صوت الجوال شافته ناصر
منيره : ألو هلا
ناصر : هلا بك السلام عليكم
منيره : وعليكم السلام
ناصر : وش أخبار الحلوين ؟؟
منيره : الله يسلمك تمام أخبارك وأخبار الأهل ؟؟
ناصر : الحمد لله يالله شدي حيلك آخر ترم في الجامعه ان شاء الله تتخرجين بتفوق
منيره كل ماتذكرت انها خلاص آخر ترم ضاق صدرها لأنها ماتعرف مصيرها بعد الدراسه
ناصر : الوووووووووو وين رحتي ؟؟
منيره : لا معك وش أخبار نوره وحنان عاد هم ثالث ؟؟
ناصر : والله قالبين البيت علينا من كثر المذاكره أول مره أشوفهم متحمسين ياحليلهم

في هاللحظه طق الباب عند منيره : خلاص يالله أكلمك بعدين
وسكرت
أبو سلمان : منيره من تكلمين ؟؟

منيره تغير وجهها وش قصده
أبو سلمان : ادري من هو ؟؟
منيره : بس يبه
أبو سلمان : لا بس ولاشي أنا ماكنت بيوم من الأيام أتوقع انك تغبين علي هالشي
منيره : هو أخوي يبه عادي
أبوسلمان : أدري عادي ومن قالك موب عادي بس العيب أني آخر من يدري ؟؟ ليش يامنيره تا خذين رقمه ؟؟ وش بينكم لو أنك تكلمينه على انه أخوك ما خبيتيه علينا

منيره : والله يبه مابينا شي لو تبي تكلمه كلمه أنت بنفسك وأسأله
أبو سلمان : منيره خلاص يكفي لا تلعبين علي بكم كلمه أنا ما راح أمنعك من أنك تكلمينه لكن زوجك قريب يمكن يمنعك

وقام ولا عطاها مجال تتكلم

منيره وش قال ( زوجك ) لاااااا يعني عنده نيه هالسنه يزوجني يارب أبوي ما يحطني بيد واحد مايعرف قيمتي عندي احساس أعرفه فهد بس يارب موب هو يااااااااارب حتى لو كان هو برفض ما آخذه لو وشو


انتهى الجزء ............
سلمان وهالغيبوبه اللي طالت على قلوب اللي يحبونه ...
سعود والقضية اللي شاغلته وش نهايتها وفقدانه لأعز صديق اللي تغيرت حياته من بعده ..
منيره تطلع من مشكله وتدخل في ثانيه وكل أمنيتها تعيش يوم بدون ما يجيها خبر ينكد عليها
العنود هذي الانسانه اللي الدنيا عندها بسيطه لكن هالأيام تحملت هم كبير وهو فقد أخوها سلمان
عبد العزيز صحيح ندم على اللي سواه بس وش ظنكم يسوي عشان يرتاح ولا يأنبه ضميره ؟؟