هذي التكمله،،،
هالعايله الأكثر من رائعه ماتشوف بينهم كره وحقد حتى أبو ناصر انسان محترم جدا




طبعا ناصر ما علم أمه حب يسويها مفاجأه واتفق هو واخواته يسوون حفله بسيطه
ناصر : خلاص أجيب الكيكه والعصاير والمعجنات وش بعد ..
نوره : جب بعد آيسكريم وفيه شي مهم جب بعض الزينات عشان تصير حفله صدق
حنان : بس وين بنحطها ؟؟
ناصر : في المجلس أحسن عشان يكون بعيد عن الأهل وما احد يدري
حنان : خلاص ويارب ما يدري خالد لأنه بيفضحنا لو درى
وتدخل ديما عليهم
ديما : نوره شوفي خالد جالس بغرفتي ومابقى شي إلا حاسه ( وهي تصيح )
نوره : يووووووه منكم وبعدين و هو وش هالحركات قولي له ترى ناصر بيجيك الحين
ديما تناظر ناصر تبيه يتكلم
ناصر : يالله روحي قولي له ترى بيصفقك ناصر
حست بفرحه وقعدت تضحك مع انه تو تصيح وراحت ركض تقوله
وفي الغرفه
ديما : خااااااااااااااااالد ناصر جا جا ياويلك
خالد حط اللي في يده : يالنذله ليه تعلمينه
ديما : أحسن تستاهل
خالد ماتشوفه من الخوف راح لغرفته أحسن من يجيه ناصر ويأدبه

راح ناصر السوبر ماركت بعد العصر وشرا بعض الأغراض وراح لمحل حلويات وشرا كم نوع ومابقى شي ماجابه
وهو في الطريق
اتصل في خواته
ناصر : ألو
نوره : هلا
ناصر : مين حنان >>>>> مايفرق بينهم
نوره : لاااااااا وع أنا حنان بعدين قالت : آآآآي
ناصر : أحسن تستاهلين هالضربه اللي جتك المهم أفتحو الباب وخليكم بالمجلس عشان نرتب كل شي
نوره : خلاص

نروح من جهه ثانيه منيره اللي ماوسعتها الدنيا من الفرحه بسس للأسف ما فيه أحد شاركها العنود وكانت مشغووله مع النت والخربطه فجت في بالها ليلى قالت أدق عليها وأبشرها اني بروح
دقت عليها بس جوالها مقفل
أرسلت لها
( ليلى أبشرك بروح لأمي اليوم وااااااااو فرحانه وش فيك ليش جوالك مقفل ؟؟ )
وراحت تتلبس عشان بعد المغرب قالها سلمان بوديك
وطلعت أحلى لبس عندها وجلست تستشور شعرها الطويل اللي كان روعه بعد ماخلصت منه وحطت مكياج خفيف وطلعت بنيه نعومه وكلها ملح ..

ومن جهه ثانيه ناصر وخواته عافسين الدنيا واحد يلصق والثاني ينظف وجابو طاوله كبيره عشان يحطون عليها الأكل وكان بعد ماخلصو شكل المجلس روووووعه ناصر كان واقف وقال : اللللله صدق فناااااااااااااااانين
نوره : شفت ياخوي عندنا مواهب بس ما احد يدري ههههه
حنان : أقول الحين بيأذن المغرب وأنا ما تروشت ولا تلبست يالله بروح
نوره : وقفي بجي معك
ناصر : لحظه لحظه نوره وين مفاتيح المجلس ؟؟
نوره : شفها في المكتبه
راح جاب المفاتيح وهو جالس يقفل المجلس دخل مر أبوه عليه ارتبك بقوووه
أبو ناصر : ناصر ليش مقفل المجلس ؟؟؟
ناصر : لا بس أجرب هذا مفتاحه ولا لا ؟
أبو ناصر : وش المناسبه موب عادتك
ناصر فكر شوي وقال أبوي لازم يدري عشان يعطينا فرصه نقعد مع بعض لأن منيره بتستحي منه
ناصر : ماقلت لك يبه اليوم منيره أختي بتجي بعد المغرب
أبو ناصر : الله يحييها البيت بيتها ولو تجي كل يوم ويالله ولدي توضا للصلاه
ناصر : بس يبه لاتعلم أمي انها بتجي خلاص بنسوي لها مفاجأه
أبو ناصر : ههههه حلوه حركاتك ياناصر ولا يهمك ماتدري ان شاء الله

وبعد صلاه المغرب جا سلمان من الصلاه وشاف سيارته كيف معفوسه بس قال بمسك نفسي عشان منيره
وركب السياره وهو يقول في نفسه ( ياربيه فشيييييييييييله لو يشوفني أحد ولا بعد بروح أوصلها بيت أهلها لو قابلني ناصر ولا أبوه )
منيره طالعه وشافت السياره جاها الضحك على شكلها
منيره وهي تركب : سلمان ليش سيارتك كذا ؟؟؟
سلمان : اقول اركبي لا احد يشوفنا بس
منيره : خخخخخخخ طيب
سلمان : شوفي أنا بحطك وبسرعه بروح واذا قالو وينه قولي مشغول حطني وراح لأن السياره ماتشرف
منيره : ههههه خلاص طيب بس ماقلت لي من مسوي فيها كذا ؟؟
سلمان: والله ماادري عيال الحاره كثيير أقول منيره عندي لك شي بتفرحين لو بقوله
منيره : بيفرحني ؟؟؟ اليوم يكفي فرحانه بهالروحه
سلمان : لا بتفرحين أكثر
منيره : والله ؟؟؟
سلمان : شوفي راح تقعدين عند أهلك اليوم إلى الساعه وحده أو ثنتين
منيره : ايييييش ؟؟ بس أبوي قال لاتطولين
سلمان : بس أنا أبو الأفكار شوفي لاجا الساعه 9 تقريبا ابوي بيدق بقوله اني منيره ودها تتمشى شوي وتروح السوق وانتي اقعدي عند اهلك لا جا الساعه 2 جيت وأخذتك وش رايك
منيره : والله صراحه ما ادري وش اقول دايم تحرجني سلمان الله يعافيك
سلمان : ما ابغى هالكلام حنا اخوان

منيره ماوسعتها الفرحه يعني بجلس الى الساعه 2 هذا شي مستحيل كان بحياتي اذا جلست ساعتين عندهم زين بس والله ان عندي اخو ما احد زيه
ودق جوال سلمان وكان سعود
سعود : السلام عليكم
سلمان : وعليكم السلام هلا هلا
سعود : هلا بك وش الأخبار ؟؟ وش جدولك اليوم وين بتروح وين بتجي ؟؟؟
سلمان : شوي شوي علي ههه اليوم ما اظن تشوف خشتي إلا بعد الساعه 12
سعود : ليش ؟؟
سلمان : السياره معفووووووووووسه وفيها شطوب بروح الورشه
سعود : سلامات مسوي حادث ...؟؟؟؟
سلمان : لا وش حادث طلعت من بيتنا لقيتها كذا تعرف العيال وحركاتهم
سعود : أجل خلاص اليوم بنجتمع في الاستراحه ننتظرك إذا خلصت
سلمان : خلاص

ووصلت منيره البيت ودقت الجرس وسلمان بسرعه مشى قبل مايطلع أحد وطبعا مااحد يدري إلا الثلاثه حتى أمها استغربت ليش نوره وحنان كاشخين بس قالو لها انا وحده من صديقاتنا بتجي ومشت عليها

يوم دق الجرس قامو نوره وحنان على اساس انها صديقتهم
فتحت نوره الباب
منيره تشوف مين عند الباب : نوااااااااااااااااااااري وتضمها
نوره : أخبارك منور ؟؟ قسم بالله وحشتينا ( وماحست إلا غصب نزلت دمعتها )
حنان : وخري نوره بسلم عليها عطيناك وجه
منيره : حنونه انتي هنا وتسلم عليها
حنان : وش اخبارك يالقاطعه ؟؟
منيره : الحمد لله والله من زمااان عنكم
نوره : قولي ماراح تطولين ياويلك
منيره :لا اليوم بقعد الى الساعه 2
نوره وحنان صرخو بقوه والكل في البيت انهبلو يحسبون فيهم شي
وطلع ناصر
ناصر : هلا والله ومسهلا توه ماينور البيت ادخلي ادخلي
منيره تسلم عليه
منيره : تصدق انك كبرت خخخخخ
ناصر : احلفي عاد وش قالو لك بزر
منيره : هههههههههه إلا وين أمي
حنان : تراها ماتدري مسوين لها مفاجأه
منيره : فديت قلبها والله

وهم داخلين أم ناصر شافتها من بعيييد ماصدقت هي بحلم ولا علم
منيره : السلام عليكم يمه
أم ناصر : هلا هلا ببنيتي ( خنقتها العبره ) وقامت
منيره كانت ضامه أمها وتصيييح الكل تأثر من هالموقف منيره محتاجه لهالقلب الحنون لكن ظروفها أقوى
ناصر : خلاص منيره ويمه يكفي صياح كذا الحريم لا فرحو
منيره تمسح دموعها
أم ناصر بعد ماهدت : ماقلتي لي وش أخبارك ان شاء الله مرتاحه ؟؟؟
منيره : والله يوم شفت هالوجه أكيد بفرح اشتقت لكم
أم ناصر : وليش ماتمرين علينا كل مابين فتره وفتره
منيره : والله يايمه ان سلمان مايفضى وابوي تعرفين شغله

أم ناصر : طيب قولي لناصر يجيبك إذا بغيتي
منيره : ان شاء الله خير يمه الا وين خالد وديما

نوره : تلقينهم قاعدين يتناقرون فوق
حنان : ايه صح تراهم مادرو انك بتجين
منيره : ياعليكم حركات أنتو خخخخ وش رايك يمه بمفاجأتهم ؟؟
أم ناصر : والله وقدرو يلعبون علي حتى أنا ما شكيت
ناصر : هههههههه يالله نوره روحي نادي خالد وديما
وقامت نوره تناديهم ..
نروح شوي للعنود
العنود كانت ماسكه التلفون بتكلم منى وردت عليها الجوهره
الجوهره : الو
العنود : السلام عليكم
الجوهره : وعليكم السلام ( وعرفت أنها العنود وكشرت )
العنود : كيف الحال ؟
الجوهره : الحمد لله وانتي ؟؟
العنود : تمام الا وين منى
الجوهره : والله ماادري وين لحظه أشوف

راحت الجوهره تشوف وينها بس طولت لأنها رقت فوق ومنى تخت في المطبخ نزلت وشافتها
الجوهره : وينك ؟؟؟؟؟ ساعه ادورك
منى : بسم الله علي وانا وش دراني عنك
الجوهره : روحي شوفي العنود تنتظرك على التلفون
منى : طيب أعصابك
الجوهره : أصلا ما ادري وش خلاني أرد

وراحت منى تكلم
منى : هلا وغلا
العنود :أخيييييييييييييييييرا جيتي يالأميره
منى : معلييش توها تقولي الجوهره
العنود : المهم بقولك شي وياويلك تقولين لا
منى : أشوف
العنود : أنا بطلع مع عبد الله للسوق نتمشى لأني طفشاانه وأبغاك تجين مع حمد هاه وش قلتي؟؟؟
منى : بصراحه فكره ولا أحلى بس حمد أكيد ماراح يعطيني وجه
العنود : وش دراك اسأليه وردي علي لنتظرك خلاص
منى : خلاص

وراحت منى عند أخوها وكان قاعد عند التلفزيون
منى جلست بعدين قالت : حمد
حمد : وش عندك ؟؟؟
منى : بسألك سؤال ممكن!!!!
حمد : اخلصي وش عندك
منى : انت ليش ماعمرك وديتني مكان ؟؟
حمد : وأنا فاضي لك
منى : طيب الحين وش عندك ؟؟؟
حمد : أفهم انك ودك تطلعين الحين ؟؟
منى : الله يخليك بتقابل أنا والعنود وعبد الله بيجي
حمد : دام عبد الله فيه خلاص موافق
منى : واااااااو مشكور
وراحت تتجهز


................................................. انتهى الجزء
ان شاء الله أعجبتكم الأحداث
بظنكم وش يصير عند منيره ؟؟؟
وش شعورها لاشافت الحفله البسيطه اللي مسوينها اخوانها ؟؟
هل بيدري أبوها بأنها جلست عندهم لآخر الليل ؟؟
وش راح يصير في السهره ؟؟
منى والعنود وروحتهم للسوق وش بيصير ؟؟؟
سلمان وسيارته هل بيعرف من مخربها عليه ؟؟

أحداث جديده راح نعرفها في الجزء الجديد ...............