عارف إيه إللي بيخلي أبوك يلف يطفي أنوار الشقة؟
ويدور يقفل في الحنفيات ؟ ويتأكد من ريحة الغاز ؟
ويزعق للي بيرزع الباب جامد؟
عارف إيه إللي بيخليه ينصحك بكلام مكرر وهو متأكد إنك مش هتنفذه ؟!
عارف ليه بيبقى متضايق يمكن أكتر منك كمان لما كنت بتجيب درجة وحشة؟
عارف إيه إللي بيخليه فرحان جداً ومرتاح نفسياً وانت بتصرف فلوسه ف حاجة كويسة
طب عارف إيه إللي جايبله الضغط والسكر والقلب من عصبيته على حاجات تافهة
من وجهة نظرك؟ أنا كنت زيك كده مش عارف إيه السر ف كده
بس لما كبرت ولقيتني تلقائي بأعمل كده فهمت السر .. المسؤولية
المسؤولية إللي بتخليك تفرح وتستمتع بإبنك وهو بياكل ويشرب ويلبس ويصرف
أكتر من فرحتك ومتعتك لما إنت شخصياً تعمل كده
المسؤولية إللي بتخليك حامل هم مستقبل إبنك
في الوقت إللي هو نفسه مش مهتم بالحاضر
عارف لما تبقى راكب جنب السواق
إنت بتنام وتصحى وتبص من الشباك وتلعب بالموبايل وهو ماسك الدركسيون
وعينه على البنزين والزيت والحرارة وعداد السرعة والطريق
لما تكبر هتحس بده كله .. لأنك باختصار
هتبقى السواق ولحد لما يجى اليوم وتبقى السواق
لازم تعرف أن جزمة أبوك قدام باب الشقة لاتقدر بثمن
نعم إنه أسد البيت والمسؤل الاول عن الجميع
إنه كبير البيت بالداخل فالزم الصمت والقى عليه السلام بهدوء
رحمة الله عليك يا أبي ربي يجعل قبره روضه من رياض الجنه
تحياتى للساده المارين
بقلم:
خ ـالد الشاعر
منقول

مشكوره قلبي ضوى الليل على تصميم مميز ربي يسعدك يارب