أمسى القصيد اللي يسامرك مغتاظ
كبرت بنفسه فيك يبذل حروفه

وقت المواصل مانفع سبك الألفاظ
وشلون ينفع لا عطاني كتوفه

تصنع حواجز بيننا طول وعراض
والجو يصفو وانت تشكي ظروفه

أفتل لك حبال الغلا وأنت نقاض
عهدك مع المشتاق ما اسرع نكوفه

أغازل اشعورك ولا أشوف هياض
والقلب خليت من غرامك كفوفه

يرعد سحاب الشوق والسيل فياض
عدى على قلبك ولا ابتل جوفه

لو تنبت أشواقي أزاهير ورياض
تنسى العيون الجاحدات معروفه

من كثرة أعذارك تحريت الإعراض
مثل القمر اول غيابه كسوفه

حبك مثل برقن على خافقي ناض
قفت مخاييله ونفسي شغوفه

الصاحب اللي فيك يقبل بمعواض
غض النواظر يم زوله وطوفه