دخلت لولو للغرفة و معها نوف و تكلمت عشان تلفت انتباههم:هي شوفوا من معي...
لفوا لها كلهم و تفاجأوا لما شافوا نوف بس بعد فرحوا من قلوبتهم لما شافوها...
مشت نوف لرانيا لأنها كانت أقرب وحده لها و سلمت عليها بابتسامة...
أحلام قامت و راحت لنوف:أفا نوفوه أنا أقرب لك منهم و تسلمين عليهم و أنا؟...
نوف ضحكت:ما سلمت على أحد بس رانيا الحين صاروا كلهم؟
سلمت عليها أحلام بفرح و بعدها راحت لنجلاء اللي كانت تلبس ولدها و هو كان صاحي و يناظر السقف...
نوف قعدت يم نجلاء و هي تناظر الولد:يا قلبي يجنن كم صار عمره الحين؟
نجلاء بابتسامة:تقريبا شهر...
لولو ابتسمت:هذا ولد أخوي طبعا؟
نوف ضحكت بخفه:ادري وش قالوا لك عني ؟
رانيا:متى جيتوا؟
نوف لفت لها:اليوم جينا طلعنا من المطار و سيدة جينا هنا؟
أحلام لفت لها:من جدكم؟
نوف ناظرتها:يعني أنتي شفتينا أمس أو اليوم الصباح في البيت عشان نكذب عليك...
أحلام ضحكت:سوري والله نسيت أنك معاي في البيت نفسه بس لا تاكليني..
نوف بابتسامة:لا تنسين مرة ثانية؟
نجلاء لفت للولو:لولو تعالي خذي عبد الرحمن بقوم أشيل أغراضي...
نوف لفت لها و مدت يدينها لها:لا جيبيه عندي أنا أبي أشوفه؟
نجلاء أعطتها الولد و أحلام تكلمت:ليه اليوم بتمشين...
نجلاء:اي فيصل مو راضي أقعد هنا أكثر زين منه خلاني كل هالمدة...
لولو بمزح:وش تقصدين يعني تبين تقولين لنا أنه ما يقدر على فرقاك اي درينا بس ليه تحبين تفوشرين فيه أنتي؟
ضحكوا كلهم و نجلاء تكلمت:يا حمارة أنا ما قصدت بس قلت أنه مو راضي...
لولو تقلد على نجلاء:زين منه خلاني كل هالمدة...يعني اللي يشوفه يقول متقطع عليك ما كنه ينام و ما يدري عن الدنيا؟
أحلام بضحك:مسكين أخوي خليه يشبع نوم الليلة بيصير معه دحوم أتحدى ينام...
رانيا تكلمت:تدرون أن شوق بترجع بكرة؟
أحلام بفرح:من جد تتكلمين؟
رانيا هزت راسها:اي اليوم الصباح كلمت عبد الله و قال لي...
لولو بجرأة:غريبة فاتح جواله الأخ؟
رانيا لفت لها:احترمي نفسك؟
نجلاء ناظرت نوف:ترا شوق حامل ما دريتي؟
نوف وسعت عيونها و هي اللي كانت تلعب دحوم:أمانه...
نجلاء:ليه ما تدرين؟
نوف:لو أنها حامل كان ما سافرت هي مو خبلة عشان تركب الطيارة وهي حامل...
أحلام:بس هم لما راحوا هناك عرفوا أنها حامل ما كانوا يدرون؟...
نوف ناظرت أحلام:اي بس أنا زعلانه منها شوق لما تجي تعتذر لي أبارك لها...
نجلاء وهي تحط ملابس دحوم في الشنطة:ليه؟
نوف:سخيفة في زواجي ما حضرت عشانها مسافرة يعني ما يقدرون يأجلون السفرة كم يوم؟
رانيا وسعت عيونها:لو سمحتي لا تقولين عن زوجة أخوي سخيفة مو منها هي كانت تبي تحضر بس عبود الله يهداه ما يصبر..
نوف لفت لرانيا:لا سخيفة و حتى أحمد زعلان منها؟
أحلام:هالقد حاقدة عليها؟
نوف ابتسمت:لا مو حاقدة بس زعلانة منها...
نجلاء:اي أنا بعد ما جيت ما زعلتي مني؟
نوف:أي أنتي لو ما عندك النونو هذا كان زعلت منك بعد بس أنتي معذورة...
لولو وهي تضحك:عاد أنا ما تقدرين تقولين شي عني من زود حبي لك صرت عروس معك بنفس الليلة و بنفس الصالة بعد...
لفت لها نوف و ضحكت لها وبنفس الوقت دخلت أم وليد الغرفة و استغربت لما شافت نوف بس نوف وقفت و أعطت دحوم للولو و راحت سلمت على أم وليد اللي فرحت فيها و بوجودها...
أم وليد بحنان:الحمد لله على سلامتكم متى جيتوا؟
نوف:اليوم جينا...
أم وليد:اليوم..وليه محد داري؟
نوف ابتسمت:مدري صارت كذا ما كنا حاسبين حساب لليوم بس جينا؟
أم وليد هزت راسها بالإيجاب و لفت للبنات:طيب يللا طلعوا برا القدا صار جاهز...
لولو لفت لعمتها:أخيرا عمتي والله ما يقى يخلص هالقدا صارت الساعة3 بذمتك الحين وقت قدا.؟
رانيا لفت لها:احمدي ربك بس...
أم وليد ناظرتها:اي والله احمدي ربك بعدين لو أنكم تبون تتقدون كان جيتوا ساعدتونا في المطبخ كل وحدة فيكم متزوجة و عندها بيت المفروض أنتوا اللي تطبخون مو حنا...
ضحكوا البنات و كل وحده صارت تناظر الثانية و أم وليد تكلمت:يللا لا تتأخرون القدا على الطاولة جاهز...
لولو ركضت ورا عمتها:اييييييي والله جوعانة حدي...
أحلام ضحكت و هي توقف و طلعت معها نوف:بأي شهر صرتي؟
أحلام لفت لها:بالثالث و قريب بدخل الرابع؟...
نوف:تقومين بالسلامة أن شاء الله...
طلعوا البنات كلهم و نوف سلمت على أم فيصل و أم عبد الله و استغربت لما ما شافت أم محمد موجودة معهم..
بعد القدا كانوا البنات كلهم قاعدين برا في الحديقة الخلفية لأن الحديقة الأمامية بوجه مجلس الرجال...
كانوا فارشين لهم فرش و قاعدين عليه و يسولفون و نجلاء كانت واقفة تدور بولدها اللي كان يبكي و مو عارفة كيف تسكته...
صارت تخاف منه لما يبكي لأنه لما يمسك الخط في الصياح وجهه يصير أزرق و ينقلب حاله..و خصوصا أن الدكتور محذرهم أنهم ما يتركونه يبكي كثير عشان لا يتعب قلبه أكثر...
نجلاء بخوف:يا ربي وش أسوي...
مشت نجلاء لداخل و هي تتكلم:بروح أوديه لأمي أشوف له حل؟..
دخلت نجلاء للصالة اللي قاعدين فيها الحريم و نوف تكلمت:ليه وش فيها مو عارفة تسكته؟
أحلام:بلا هي تعرف تسكته بس تعرفين البزارين أحيانا تجيهم حاله ويمسكون البكي و دحوم قلبه تعبان عشان كذا هي صارت تخاف منه لما يبكي كذا؟
نوف قطبت حواجبها بقوة:الله يشفيه؟
لولو:الله يسمع منك والله كاسر خاطر ولد أخوي توه صغير و تعبان كذا...
تكلمت رانيا اللي كانت مسندة ظهرها للجدار و تاكل الفاكهه اللي بصحنها:بس عاد خلاص لا تخلوني أتشائم الدكتور مانعني...
أحلام و نوف ضحكوا على شكلها هي مع بطنها و تاكل:ههههههههههههههههههههههههههههههههه...
لولو لفت لها:أنتي لا تتكلمين ولدك ما في أصح منه أربع و عشرين ساعة تاكلين...
رانيا ناظرتها:وش تبيني أسوي أتغذى...
أحلام و هي تضحك:اي تغذي الله يعطيك العافية...
نوف لفت لأحلام:ليه أم محمد مو هنا تعبانة هي فيها شي؟
لولو ضحكت بهستيريه و هي تناظر نوف و أحلام تكلمت:لا أساسا هي ما تجي هنا أبد...في المناسبات بس نشوفها؟
نوف قطبت حواجبها:وليه؟
أحلام كشرت:بس نوف سكري موضوعها من جد ما لي خلق لها أنا أفرح لما أجي هنا عشانها تصير بعيدة عني؟
استغربت نوف من كلام أحلام بس ما حبت تتكلم في الموضوع أكثر و ضلوا يسولفون بسوالف عادية لما طلعت لهم نجلاء و طمنتهم أن عبد الرحمن نام بهدوء...
...الساعة2الليل في قصر أبو فيصل و في جناح فيصل و نجلاء...
فيصل فتح باب الجناح بفرح و هو شايل الأغراض بيده:يا حيا الله دحوم حبيبي تو ما نور البيت...
نجلاء دخلت بابتسامة و حست أن في شي متغير بالجناح و لفت لفيصل و هو فهم نظرتها و تكلم و هو يمشي لغرفة الجلوس اللي كان بابها مسكر:عندي لك مفاجأة...
نجلاء قطبت حواجبها و دحوم بيدها:وش هي؟
فيصل ابتسم لها:تعالي هنا...
مشت له أحلام و فيصل فتح الباب و شغل النور و توسعن عيون نجلاء لما شافت غرفة الجلوس تحولت لغرفة عبد الرحمن الصغير...
كان فيصل مغير الغرفة ما كنها كانت غرفة جلوس بيوم من الأيام...
غرفة كاملة للأطفال كان جايبها و فارشها هنا لولده عبد الرحمن...
نجلاء وهي تناظر الغرفة:فيصل وش سويت؟
فيصل وهو يضحك بخفة:اللي تشوفينه؟
نجلاء دخلت:وين الأغراض اللي كانوا هنا و التلفزيون؟
فيصل:فضيت لهم غرفة برا و حطيتهم فيها...بس حبيت تكون غرفة دحوم قريبة من غرفتنا و ما لقيت إلا هالغرفة هذي؟
نجلاء لفت له:مشكور فيصل؟
فيصل مشى لها و أخذ دحوم منها:لا تقولين كذا ما سويت شي أنا كله لعيون هالقمر...
أخذه فيصل و لف لسريرة و حطة فيه بهدوء و أسدل عليه الستارة الشفافة ونجلاء كانت تناظره بابتسامة...
فيصل:وش رايك؟
نجلاء:تجنن...
فيصل مشى لها:أنتي اللي تجنين والله...نجلاء من جد اشتقت لك شوفي صار لي شهر كامل و أني بعيدة عني و أنا أزورك ببيتكم كني ضيف و أطلع...
نجلاء:لا لا تقول كذا فيصل البيت بيتك و أنت مو ضيف؟
فيصل كان يبي يضمها بس نجلاء صدت عنه و مشت للغرفة الثانية و هي تتكلم:أنتبه لدحوم أبي أروح آخذ لي دش سريع و طالعه؟
فيصل تنهد و هو يناظرها ويهز راسه بالنفي بابتسامة خفيفة و مشى للغرفة الثانية و بدل ملابسه و قعد على طرف السرير ينتظر نجلاء تطلع له..
بعد فترة قصيرة طلعت نجلاء من الحمام و دخلت الغرفة و ابتسمت لما شافت فيصل يناظرها بابتسامة هادية...
نجلاء وهي تقعد على كرسي التسريحة و بدت تسيح شعرها:وش فيك تناظرني كذا فيني شي غلط...
فيصل هز راسه بالنفي:لا ... لا ما فيك شي غلط أبد...
ابتسمت نجلاء و بعدما خلصت قامت و مشت لفيصل و قعدت يمه و لفت ناظرته بهدوء:مشتاقة لك فيصل؟
فيصل حوط بطنها بيده و ضمها لعنده:و أنا أكثر...ما كنت متوقع أني بمل كذا؟
فجأة...
سمعوا صوت دحوم يصيح من الغرفة الثانية و نجلاء بعدت عن فيصل و قامت بسرعة و مشت للغرفة اللي فيها دحوم..
فيصل عدل قعدته و تنهد بملل...
هذي توه أول ليلة وش بيسوي بعدين؟...
دخلت نجلاء للغرفة و هي حاملة دحوم بيدها و تكلمة بحنان و هي تحاول تسكته و مشت للطرف الثاني من السرير و قعدت عليه و دحوم بيدها...
فيصل لف لها بعصبية:نجلاء...
نجلاء لفت له وهي مقطبة حواجبها:فيصل والله ما أقدر أتركه يبكي و ما آخذه بعد هو اللي فيه كافية...
فيصل عطاها ظهره و تمدد على السرير بعصبية و حط الفراش على راسه...
بس هيهات ينام مع صوت دحوم اللي كان يبكي و نجلاء تغني له و تحاول تسكته بطريقتها...
فيصل قام و أخذ مخدته معه و لما وصل للباب لف لنجلاء و تكلم بعصبية:أنا شكلي مأثث الغرفة الثانية عشان أنا اللي أنام فيها و أنتي و ولدك تنامون هنا...
نجلاء ضلت تناظره باستغراب منه و هو راح الغرفة الثانية و سكر الباب على نفسه بعد...
...في قصر أبو محمد وفي الصالة تحت...
أبو محمد باستغراب:وش تسوين أنتي؟
أم محمد لفت له بفرح:مو أنت تقول أن أحمد و نوف رجعوا اليوم يعني أكيد بعد دقايق راح يوصلون على الأقل يكون البيت ريحته حلوة...
أبو محمد:أشوف ما سويتي كذا لما رجعوا أحلام و محمد من شهر العسل.؟
أم محمد ناظرته بتكشيرة:يوه الله يهداك لا تقارن لي نوف بأحلام...أنت عارف أن أحلام مو داخله مزاجي من البداية؟
أبو محمد هز راسه بالنفي و هي يناظرها و تنهد و بنفس الوقت انفتح الباب و دخل منه أحمد و دخلت وراه نوف و أم محمد بدورها راحت لهم و ضمت نوف و أحمد ضل يناظر أمه باستغراب...
أم محمد:وش أخبارك بنتي أن شاء الله تمام..
نوف ابتسمت لها بهدوء:الحمد لله أنا بخير...
مشت نوف لعمها أبو محمد و سلمت عليه لأنها ما شافته لما كانوا ببيت أم وليد و أحمد سلم على أمه باستغراب كبير...
بنفس الوقت انفتح الباب و دخلوا أحلام و محمد و استغربوا من الأجواء الغريبة بالبيت...
طبعا نوف ما تتغطى من محمد و أحلام بعد ما تتغطى من أحمد لأنها حماها و هم عادي عندهم بس يتحجبون...
أم محمد أعطت أحلام نظرة و لفت لنوف:حبيبتي روحي ارتاحي أنتوا من اليوم ما ارتحتوا أكيد أنتوا تعبانين من السفر..
أحلام و محمد تبادلوا النظرات و أحلام همست لمحمد:أنا رايحة فوق...
محمد:طيب أسبقيني و أنا بجي بعد شوي...
صعدت أحلام و تركت أحمد و محمد مستغربين من طريقة تعاملها مع نوف...
يا ترى أم محمد تعامل نوف كذا حبا فيها ولا هي حابة تقهر أحلام و بس؟؟؟
...فوق في جناح أحمد و نوف...
طبعا الليلة هذي أول ليلة لهم ينامون في هذا الجناح...
نوف قعدت يم أحمد بطرف السرير:أحمد ليه كنت تتكلم عن أمك و كنها شريرة بالعكس أمك طيبة و حنونة...
أحمد ضحك بسخرية و هو يناظرها...
نوف:وش فيك مو مصدق...أنت ما شفتها كيف استقبلتني قبل شوي؟
أحمد:بلا شفتها..نوف ترا أمي مو طيبة ولا حنونه و أنتي اللي راح تكتشفين هالشي لما تعيشين معها..بس لا تحاولين تخدعين نفسك فيها...
نوف:ليه تقول كذا عن أمك أحمد؟
أحمد قربها منه و هي حطت راسها على صدره بارتياح:نوف أنتي ما شفتي شي من أمي...إن كانت تعاملك معاملة زينة مو لوجه الله صدقيني...
هذي أمي و أنا أعرفها...
نوف ضلت حاطة راسها على صدر أحمد باستغراب كبير...
اليوم بس اكتشفت أشياء ما كانت عارفتها عن العايلة هذي؟...أشياء ما كانت بالحسبان؟...
يا ترى كيف راح تكون حياة نوف في هذا البيت مع أم محمد؟؟...