محمد باستغراب:لهالدرجة الموضوع ضروري؟؟
أحمد:ما بينا مواضيع واحد مشتاق يقعد مع أخته فيها شي...؟
محمد استغرب من عصبيته بس ما رد عليه و شاف الساعة و نزل و هو يأشر لأخوه:أخليك...
مشى أحمد و أخذ الجوال مرة ثانية و اتصل على ناصر و على طول جا له الرد:هلا...
أحمد:هلا فيك ناصر فاضي أنت الحين؟...
ناصر:أي بس قاعد أفطر ليه في شي..
أحمد:لا خلاص..بس عجل أبي أمر لك و أبيك تطلع معي...
ناصر:اوك...
أحمد:باي...
رجع أحمد لغرفته و أخذ مفاتيح سيارته و رجع نزل لتحت و كان يسرع و هو ينزل على الدرج و كن نوف بتطير منه...
ركب سيارته و انطلق لبيت أبو ناصر و أول ما وصل أعطي ناصر نغمة و سكر و بعد دقايق طلع له ناصر...
ناصر ركب و هو يسكر الباب:وش عندك من صباح الله خير طالبني...
أحمد لف لناصر وهو يحرك السيارة و تكلم بعصبية:والله هذي مو حالة أبي أشوف أختي ما في فرصة أبد...
ناصر ضحك:بسم الله وش فيك ما تكلمت أنا عشان تفتح لي موضوع أختك...
أحمد:والله قاهرني عبد الله الحمار من تزوج أختي وحنا ما نشوفها و إذا جات لنا البيت هو يقعد معها ساعة و يمشون بذمتك هذي حاله...
ناصر وهو يضحك:لا مو حالة؟..
أحمد لف له:تطنز أنت و وجهك تفكرني رايق لك...تراني من أمس ما نمت و ما لي خلق لك...
ناصر بجدية:أنت مو صاحي من أمس ما نمت و طالع من الصباح و تسوق و أنت معصب بعد...
أحمد تنهد و هو يلف للنافذة بصمت:..........................................
ناصر بهدوء:طيب قول لي وش كنت تبي من أختك و اللي مخليكك تعصب كذا؟..
أحمد لف لناصر:أبي أكلمها بموضوع خاص؟...
ناصر:أفا...موضوع خاص علي أنا؟..أنا أخوك موضوع خاص علي؟..
أحمد لف للطريق و بعد صمت:بصراحة أبي أقول لها تساعدني...
ناصر:افا عليك و أنا وين رحت...قول لي وش عندك و أنا مستعد أساعدك باللي تبيه؟...
أحمد رجع لف له وهو مكشر:بس بس واللي يخليك إلا هذا ما تقدر تساعدني فيه...محد يقدر عليه إلا أختي؟...
ناصر رفع حاجبة:أن شاء الله وش المساعدة اللي أختك تقدر عليها و أنا ما أقدر...
أحمد طفش من أسئلة ناصر و تكلم و هو يناظره:مثلا أنت تقدر تخطب لي؟...
ناصر ضل يناظر أحمد شوي و بعدها انفجر من الضحك و أحمد تكلم:يا كرهك و ياكره سخافاتك؟...
ناصر وهو يضحك:من الصبح قاعد تلف و تدور و معصب و من أمس ما نمت و مزعجني عشان تبي تخطب...
أحمد ابتسم و هو وده يضحك على نفسه...ما انتبه أنه سوا كل اللي سواه تو الحين نبهه ناصر...
ناصر:هههههههههه والله عليك حركات مو صاحية أنت و وجهك؟؟...
أحمد وهو مبتسم:أقول عاد أخلص بس ضحك ما قلت لك نكته أنا قاعد أتكلم جد...
ناصر و هو يمسك نفسه:طيب ما تقول لي من الحلوة اللي تبي تاخذك..بس تدري والله شايل همها من الحين ما دام أنها زوجتك...
أحمد لف لناصر:ليه وش فيني عشان تشيل همها عشاني أنا رجال ما شاء الله لا و بعد كم شهر داخل على الــ23أن شاء الله...
ناصر قاطعه و هو يضحك:بس أحمد تكفى أسكت ولا نزلني ترا بموت...في حد قال أنك بزر عشان تقول لي كم عمرك و متي تبي تدخل السنه الجديدة...
أحمد ضحك و هو يناضر ناصر:وش أسوي لك...أجل بالله قول لي وش قصدك؟...
ناصر أخذ نفس من بعد نوبه الضحك اللي ضحكها:آهــ لا أقول يا حظها لأنها حرمك المصون؟..
أحمد و هو يناظره:عارف أنك قاعد تتطنز بس بمشيها لك بكيفي أنت و وجهك...
ناصر مبتسم:طيب قول لي من سعيدة الحظ اللي طاح أختيارك عليها؟..
أحمد بعد صمت تكلم بهدوء و هو يناظر ناصر:أخت فهد...
ناصر قطب حواجبه:فهد اللي كان...
أحمد قاطعه:أي اللي كان زوج أختي...بس تدري أنا متردد و خايف...
أنت عارف أن أبوي و أبو فهد زوجوا شوق و فهد لبعض عشان مصالحهم و من تطلقوا و العلاقة بين أبوي و أبو فهد منقطعه...
عشان كذا خايف لما أتقدم لها يردوني مدري وش الحل؟...
ناصر بجدية:لا تقول كذا يا أحمد...
سبحان الله ما تدري يمكن الله يبيك تتقدم لها عشان العلاقة ترجع مثل قبل أحسن..و عشان يعرفون أن اللي بينهم ما كان مصالح شغل و بس...
أحمد تنهد:مدري والله شايل هم على قلبي...
أحمد تكلم بسخرية:لا و هذا بكف و أمي بكف ثاني...
ناصر:ليه وش فيها أمك بعد؟...
أحمد بشبة ابتسامة:ما أتوقع توافق...أنا عندي شك واحد بالمية أن أمي توافق؟...
ناصر ضل يناظر أحمد و أحمد تكلم:خصوصا أن أمي ما تبي أي أحد من طرف أبوي هي بالموت وافقت أن أخوي بتزوج بنت عمي...
ناصر تكلم:بس ما تدري يمكن الوضع الحين غير...زوجة أخوك بنت عمك بس هذي ما تقرب لكم أبد...
أحمد:أي بس أنا عرفتها من طرف أبوي و أختي شوق...و أمي أكيد ما راح توافق...
ناصر:لا تقول كذا ما تدري وش راح يصير بكرة...يمكن تتغير الظروف ما في شي بعيد عن ربك...
أحمد تنهد يبي يغير الموضوع و لف لناصر بابتسامة:إلا أنت ما قلت لي وش صار معك أمس ببيت عمي...
ابتسم ناصر و بدا يسولف لأحمد كل اللي صار معهم أمس ببيت أبو فيصل من دخلوا ليما طلعوا..
بس تجاهل يقول له الكلام اللي سمعه من أخته فاطمة عن لولو...
أولا لأن لولو بنت عم أحمد و ثانيا لأن أحمد ما يدري بالعلاقة اللي بين ناصر و لولو...
...الظهر في قصر أبو فهد و في شقة فهد...
دخل فهد الشقة و توه راجع من الشركة...
ضل واقف عند الباب و يناظر الشقة بصمت و هو يتخيل شوق...
يحس أن خيالها للحين موجود في الشقة...
لمساتها الناعمه...
عطرها...
ذوقها...
آهـــ من عذاب حبك يا شوق...
سكر الباب و بنفس الوقت طلعت مشاعل من الغرفة و كانت لابسه بيجاما حريريه...
مشاعل تكلمت و هي تناظر فهد:السلام..
فهد و هو يمشي عنها:وعليكم السلام...
دخل فهد الغرفة..
بس مو الغرفة نفسها اللي تنام فيها مشاعل...
هذي غرفة ثانية...
فهد من يوم زواجهم ولا مرة نام مع مشاعل...
حتى أغراضه أخذهم لغرفته الثانية بس محد من أهله يدري عن حالتهم هنا...
دخل الغرفة و سكر الباب و مشاعل لفت تناظر الباب و بحقد(طيب يا فهد...أنا راميني و صافطني و ما كني زوجتك... بس وين تبي تروح مني أنا لك و أنت لي..راح أخليك تندم على اللي قاعد تسويه فيني؟..)
فجأة سمعت صوت ضرب على الباب و مشت للباب و فتحته و ابتسمت ابتسامة مزيفة لما شافت نوف:هلا نوف...
نوف مبتسمة:هلا فيك فهد هنا؟...
مشاعل وهي للحين واقفة عند الباب:أي موجود...
بنفس الوقت طلع فهد من الغرفة و تكلم بصوته:نوف تعالي...
ابتسمت نوف لمشاعل و مشت عنها متوجه لفهد..و تركت مشاعل تحترق بنيرانها...
مشاعل سكرت الباب بهدوء بس بقهر..
مشت و كانت راجعة لغرفتها بس مرت على الغرفة اللي فيها فهد و نوف و سمعتهم يضحكون و ضلت واقفة شوي...
فهد:طيب أنتي جهزيهم كلهم أنا بس باخذ لي دش سريع و طالع...
نوف تنهدت:طيب ليه ما تخلي زوجتك ترتب لك أغراضك ولا هي ما ترضى...
فهد:كيفي أنا أبي أختي ترتب أغراضي ولا حرام...
نوف ضحكت:طيب ما قلت لي وين تبي تروح؟...
فهد:طالعين أنا و الشباب اليوم نبي نروح نخيم هاليومين نغير جو من زمان ما طلعنا...
بالنسبة لمشاعل ضيقت عيونها و هي تمشي لغرفتها(طيب يا فهد...
كل دقيقة و كل ثانية أكتشف أنك ما تبي تعلمني عن ظروفك و طلعاتك..بس أنا قاعدة لك..)
دخلت و سكرت الباب بقهر...
دقايق و طلع فهد من الحمام و نوف بعدما خلصت كل شي طلعت عنه و نزلت تحت...
لبس فهد ملابسه و أخذ شنطته الصغيرة و رماها على كتفه بطريقة عشوائيه...
طلع من الغرفة و لقا مشاعل قاعدة في الصالة...
ما عبرها فهد و مشى متجه للباب بس مشاعل وقفت و بهدوء و ابتسامة مزيفة على وجهها:فهد...
فهد لف لها و هو عند الباب و بصمت و مشاعل تكلمت:قبل شوي سمعتك تقول لنوف أنك تبي تخيم مع ربعك يومين؟..
فهد تنهد:و المطلوب؟..
مشاعل:لا بس أقول بدل ما أقعد لحالي هاليومين أبي أروح بيت أبوي و أقعد هناك...
فهد وهو يناظرها و بعد تفكير أشر لها بيده بتنبيه:بيت أبوك مو محل ثاني...
قال كلمته و طلع عنها و هي ابتسمت بخبث وهي واقفة تناظر طيفه...
يا ترى مشاعل تبي تروح بيت أبوها من جد ولا تبي تروح لماضيها الأسود و تلعب من ورا فهد...؟