نجلاء هزت راسها بالرفض:لا خالتي ما فيني شي عادي...
وقفت نجلاء و مشت لأحلام ببطء و ضربتها بخفه:وين سارحة الأخت؟
أحلام شهقت بخفه لفت عليها:حسبي الله عليك خوفتيني..
نجلاء:آسفة بس استغربت دخلت المطبخ و ما لفيتي علي ولا كلمتيني حتى؟
أحلام:ما انتبهت لك...إلا ليه أمس ما رجعتوا بيت عمتي من جد مليت و أنا قاعدة لحالي...
نجلاء تذكرت أمس و تضايقت و بدت تشتغل عشان تشغل نفسها:رحنا المستشفى عندي موعد و لما طلعنا كنت تعبانة و حبيت أرتاح عشان كذا جيت هنا على طول...
أحلام وهي تناظرها:مع أني مو مصدقتك بس بمشيها لك...
أم فيصل كانت واقفة تناظرهم بابتسامة و بعدها توجهت لباب المطبخ و طلعت منه رايحة تشوف زوجها...
كانت حاسة أن كل وحده عندها همومها و مشاكلها بس تحاول ما تبينها...
نجلاء ما ردت و فضلت تضل ساكتة أحسن...
كلام فيصل لها أمس ريحها وهدا من روعها بس مو قادرة تشيل من راسها أن بكرها و فرحتها يكون فيه تشوه خلقي...
هذا اللي مكتوب لهم بس هي أم و مثل أي أم تحب تشوف عيالها مرتاحين و ما ناقصهم شي...
بس ما بيدها شي...الحمد لله على كل حال...
كان ودها تشكي لأمها بس مترددة تقول لها ولا تخلي الموضوع يفاجأ الكل...
بس هي لازم تقول لأمها لأنها من جد محتاجة لحضن أمها و لدفاه...
أحلام قطعت حبل السكوت:كنهم تأخروا...
نجلاء ببرود:الحين يجون..
دخل فيصل للمطبخ و ابتسم لما شاف نجلاء:نجول من سمح لك تدخلين المطبخ؟
نجلاء لفت له و ابتسمت:أنا سمحت لنفسي...
فيصل مشى لها و أخذ اللي بيدها و حطهم:روحي غسلي و قولي لي وش تبين أمي تقول سألتي عني؟؟
أحلام ابتسمت وهي تناظرهم بصمت:............................................. ....
نجلاء انصاعت لأمره وغسلت يدها و لفت له:كنت بسألك متى بتروح المــــ...
سكتت نجلاء و أحلام حست أنها ما تبيها تعرف و تركت اللي بيدها و مشت متوجهه للباب:عن أذنكم...
فيصل قطب حواجبه:وش فيك؟
نجلاء ناظرت بطنها اللي بدا يكبر:متى رايح تشوف نتايج التحاليل...
فيصل تنهد بضيق وهو يناظر نجلاء بحنان:مدري..يمكن أروح الليلة؟
نجلاء ضلت ساكتة و فيصل تكلم:شكلك ما تبين أحد يعرف بالموضوع؟
نجلاء ناظرت فيصل:مو قصدي بس...هي مو بشارة عشان الكل يعرف...
فيصل حط يده على كتفها:بس أنتي بكذا قاعدة تحسسيني و تحسسين نفسك أن هذا عيب في الطفل..
نجلاء علقت عيونها بعيونه و فيصل كمل كلامة:هذا طفلك يا نجلاء و المفروض تفتخرين فيه مهما كانت الظروف...
نجلاء:أنا ما قلت غير كذا بس من جد الموضوع ما يستاهل أروح أخبر الكل فيه...
فيصل بضيق:صح كلامك..
نجلاء تناظرعيونه:أنت متضايق من الموضوع صح؟
فيصل تنهد:مهما يكون هذا حلمي يا نجلاء أكيد راح أتضايق بس ما بيدي شي أسويه...
نجلاء بترجي:لا تقول كذا أن شاء الله ما في شي...أن شاء الله يكون سالم من كل شي...
فيصل شاف الألم بعيونها وابتسم لها:أن شاء الله...ما دان أنتي أمه يا بخته..
نجلاء ابتسمت و بنفس الوقت دخلت لولو و برجتها:خير وش فيكم تراكم معطلين خلق الله...
فيصل تنهد و ذكر ربه و لف لها:وبعدين معك أنتي متى تعقلين...
لولو تأشر على راسها:كيفي ما راح أعقل وش حارق أعصابك أنت؟
فيصل:مو أنا اللي حارق أعصابي أن في واحد يبي خشتك بس والله أني متحسف عليه الرجال أخلاق و ثقل ما يستاهل يتعذب معك...
نجلاء ضحكت لأن فيصل قال لها عن موضوع ناصر...
لولو طارت عيونها فيه:تتكلم جد؟
فيصل بجدية و مسرخة:أي أتكلم جد بس هذا أنتي تسمعين زواج ما في لما تعقلين مو تروحين تفشلينا مع خلق الله...
لولو تناظره من فوق لتحت:أساسا أنت وش تبي وش دخلك أنا باخذ الراي من أبوي مو منك انت...
فيصل مشى للباب و تعداها:طيب أنا الحين رايح لأبوي و بقول له الموضوع و بقول له أن الرجال أبد ما يعرف الأخلاق و شوفي أن وافق عاد...
لحقته لولو وهي تصارخ:لا خلاص فيصل حبيبي تعال آسفة من جد آسفة آخر مرة...
نجلاء ضحكت عليهم و بنفس الوقت دخلت أم فيصل للمطبخ وهي تناظر نجلاء بحنان...
أم فيصل تنهدت:مدري وش أسوي معهم هالعيال للحين بزارين...
ابتسمت لنجلاء:و أنتي علمي زوجك الأدب خليه يصير رزة شوي عليه حركات مو صاحية...
نجلاء ضحكت بخفة و مشت تكمل شغلها:أن شاء الله...
أم فيصل بعد صمت وهي تناظرها وهي تناظرها:أقول نجلاء...
نجلاء لفت لها و ناظرتها:آمري خالتي...
أم فيصل مشت لنجلاء و بحنان و هدوء:أنا قبل شوي كنت جاية أبدخل المطبخ و سمعت كلامك مع فيصل...
بس مو قصدي أتسمع من جد الموضوع شد انتباهي مع أني ما فهمت وش كنتوا تتكلمون عنه أنتي وياه...
نجلاء نزلت راسها لتحت بضيق و أم فيصل كملت كلامها:أبي أعرف وش سويتوا أمس في المستشفى؟...
نجلاء ناظرت أم فيصل و بهدوء:خالتي..أنا...أنا...الدكتور يقول أن...الجــــ...
أم فيصل قطبت حواجبها:نجلاء يما وش فيك مو عارفة تتكلمين قولي لي وش صار؟
نجلاء نزلت دمعتها بسرعة على خدها و تكلمت بهمس مسموع:احتمال يكون مع الجنين تشوه خلقي...
أم فيصل قطبت حواجبها بقوة و بضيق وهي تمسح دمعه نجلاء:لا إله إلا الله...
نجلاء وهي تناظر أم فيصل و بترجي و دموعها على خدها:خالتي ولدي بيكون معه تشوه خلقي وش أسوي أنا. كيف أضل أناظره و يدي على خدي و ما بيدي شي أسويه له؟...
أم فيصل ضمت نجلاء لصدرها الدافي:حبيبتي نجلاء لا تبكين الحين الكل جاي في الطريق لا حد يشوفك كذا؟
بعدين كل شي بيد ربك ما في شي مستحيل عليه كل شي جايز...
يجوز الدكتور مخربط أو غلطان بعدين أنتوا لسا ما أخذتوا النتايج ليه تسبقين الأحداث؟
نجلاء بعدت عنها ومسحت دموعها:آسفه خالتي..بس من جد ما قدرت أمسك نفسي...
أم فيصل ابتسمت لها:عموما هذا ولدنا و ما راح نتخلى عنه لو مهما يصير صح؟
نجلاء هزت راسها بالإيجاب:صح..
أم فيصل:خلاص حبيبتي روحي أرتاحي لا تتعبين نفسك ما له داعي تدخلين المطبخ و أنتي تعبانة كذا...
نجلاء هزت راسها:طيب رايحة...
طلعت نجلاء من المطبخ و أم فيصل دعت ربها يهونها عليها و يفرحها بضناها و بكرها...
من جد تضايقت بس ما تقدر تسوي شي غير أنها تهون على البنت...
قعدت نجلاء في الصالة و جاوا الأهل كلهم مرة وحده و بدا البيت يصير فيه نوع من الضجة و الإزعاج...
فيصل لما شاف عبد الله سلم عليه و ما كان قادر يخبي عنه أكثر أخذه و قعد معه و قال له اللي صار معهم أمس...
عبد الله تضايق بس ما بين لفيصل ضيقته و ضل يهديه و يطمنه و يذكره بربه...
دخلت ديما المطبخ و توجهت لأحلام و تكلمت ببراءة:محمد يبيك هو واقف عند باب الصالة برا...
أحلام لفت لها و تنهدت:قولي له مشغولة ما تقدر تجي...
ديما:قلت له بس هو مو راضي يقول لي طيب ناديها بس شوي ما راح نطول...
أحلام حطت اللي بيدها:خلاص رايحة له...
...عند باب الصالة من برا...
كان محمد واقف و عاقد ذراعينه ببعض و مقطب حواجبه لأن الشمس كان قويه...
انفتح باب الصالة بهدوء و طلعت أحلام ولما شافت محمد ضلت واقفة تناظره شوي...
و بهدوء تكلمت:خير محمد وش بغيت...
محمد لف لها لأنه كان عاطيها ظهره و ضل يناظرها شوي كنه صار له دهر مو شايفها...
محمد ابتسم بخفه:حبيت أسلم...
أحلام تناظره بجفاف:مناديني من المطبخ عشان تسلم بس...
محمد مشى لها و صار واقف قبالها و بهدوء:و...وحبيت اعتذر بعد...
أحلام نزلت عيونها و صارت تناظر يده...ما كان لابس خاتمة...
محمد بهدوء:اتصلت اليوم بس كنتي نايمة...عموما أنا ما جيت لك أمس لأني ما نمت إلا الساعة12و ما صحيت إلا قبل لا نجي بشوي...
مر الوقت و ما انتبهت...
أحلام حن قلبها له(يا عمري أول يوم رمضان و ما تسحرت بعد)
أحلام بهدوء:لا ما صار شي عادي..أساسا أنا كنت محتاجة أبعد عنك شوي...
محمد قطب حواجبه بقوة:ليه؟
أحلام رفعت عيونها و كشرت لأن الشمس كانت تضرب بعينها:أنا تعبت و محتاجة أرتاح شوي..
محمد بضيق:أفهم من كلامك أنك منتي جاية معي اليوم بعد؟...
أحلام تناظر عيونه:يهمك لو ما جيت معك؟
محمد:أكيد يهمني...صدقيني أمس بالموت نمت لأنك بعيدة عني..أحس أني فقدت شي غالي...
أحلام:لا تقول هالكلام...صار لك شهر تنام في غرفة الجلوس..يعني بعيد عني...
محمد:صح..بس كنت متطمن أنك معي و قريبة مني...
أحلام بعد صمت:طيب وش تبي مني الحين؟
محمد بهدوء:أبيك ترجعين معي...
أحلام كانت تبي تمشي عنه:مو فاضية الحين...
محمد مسك يدها:أحلام أنتي عارفة وش قاعدة تسوين...كفاية صدود كم مرة اعتذرت منك..لو تعدينهم بتعرفين أني ذليت نفسي لك...
أنا أحبك ليه مو مصدقتني...أنتي قاعدة تهدمين حياتك كذا يا أحلام...
أحلام ناظرت عيونه:خلاص قلت لك مو فاضية الحين...
سحبت يدها من قبضة يده و دخلت داخل و سكر الباب و محمد ضل واقف مكانه(آخـــ يا ربي ساعدني..وش أسوي و كيف أتصرف)
صد راجع للمجلس و فكره كله عند أحلام...مريم...
جا وقت الفطور و كالعادة تجمعوا الرجال على سفرة وحده و فطروا مع بعض...
محمد ما كان له خلق ياكل شي بس أكل لأنه جوعان و قام أول واحد...
أحلام بعد ما أكلت شي بس قعدت تسولف معهم و قامت بسرعة...
هي بصراحة مشتاقة لمحمد و لحضنه بس ما تبي تسوي شي تندم عليه...
ما تبي ترجع له و تندم لانها رجعت بقرارها...
كان ودها تكلمه و تقعد معه...بس هي كانت تفكر بشي ثاني...
هل الليلة تمشي معه أو تضل قاعدة هنا؟
مر الوقت و صارت الساعة عشر الليل...
عبد الله استأذن و طلع مع فيصل ولد عمه و أحمد كعادته كل يوم يطلع مع ناصر خويه...
وليد ضل قاعد مع خاله خالد يسولفون في أمور الشركة...
صحيح وليد له شركته بس ما يمنع أنهم يتكلمون معه في أمور تصير عشان هو يتجنبها...
محمد وقف:عن أذنكم...
الكل:أذنك معك...
طلع محمد من المجلس و ركب سيارته و ضل محتار...
(أكلمها و أقول لها أني ماشي...يمكن تبي تجي معي؟...
لا.
ما راح أكلمك يا أحلام لو تبيني أنتي اللي تجيني...تعبت أركض وراك؟)
حرك سيارته و مشى متجه لبيتهم...
ما عنده مكان يروح له غير بيتهم...
صاير منقطع عن العالم هالفترة...
تعبان و ما له نفس يقعد مع أحد...
يبي أحلام ترجع له و بس ما يبي شي ثاني...
جا وقت السحور و قاموا الأمهات للمطبخ عشان يجهزونه و البنات قاعدات في الصالة...
رانيا:أحس أنه سخيف هذا المسلسل...
نجلاء:حرام تو الحلقة الثانية و عرفتي أنه سخيف...
رانيا ناظرتها:سخيف مبين عليه ما يبي له انتظر للحلقة الأخيرة عشان أحكم عليه...
أحلام:بالعكس حلو بس أنتي ما يعجبك إلا الأكشن و الفري...
رانيا:أي يعني بذمتك هذا عاجبك...
أحلام:أي عاجبني وش فيه؟...
انفتح باب الصالة و دخل خالد:ما في أحد...
لولو لفت له بابتسامة:حنا قاعدات و تقول ما في أحد...
خالد دخل:لا قصدي ما في أحد أتغطى منه...
رانيا:كلهم بالمطبخ الحين تطلع لك عمتي و تعلمك شغلك...
خالد قعد يم شوق:أنتي لا تتكلمين كلامك ينقط وصخ أعوذ بالله ما تعرفين تقولين شي عدل...
لولو فقعت ضحك:هههههههههههههههههههه حلوة ينقط وصخ...
شوق ضحكت بخفة وهي تناظر رانيا و رانيا عصبت و قامت:شوفوا اللي يقعد معكم...
خالد انتبه لأحلام:أنتي هنا؟...
أحلام ابتسمت له:وين تبيني أروح فيه...
خالد:لا بس غريبة...محمد ماشي من الساعة10ليه ما رحتي معه؟
أحلام انصدمت أنه ماشي من زمان وما أعطاها خبر وهي كانت قاعدة على أمل أنه يطلبها و تروح له بكل شوق...
أحلام تصرفها:ما قال لي أنه ماشي بس أنا قلت له مو رايحة معه الليلة...
شوق لفت لها:ليه؟...
أحلام ناظرتها بطرف عينها:كنك تقعدين معي عاد الأخ عبد الله 24ساعة مطيح عندنا...
شوق احمر وجهها و خالد تكلم بضحك:على الأقل عبد الله يعطيها خبر قبل لا يطلع مو مثل بعض الناس..
أحلام وسعت عيونها وهي تناظره:أي عادي لازم يعطيني خبر يعني؟...
خالد لف للولو:وش فيك ما سمعنا صوتك؟
نجلاء ابتسمت:مندمجة مع المسلسل مو معك...
خالد:الله يهديها بس إلا ديما وينها؟
نجلاء مبتسمة له:قبل شوي نامت داخل في غرفة الجلوس...
أحلام سرحت شوي تفكر في محمد(أي صح..
يمكن لأنه طفش مني و من صدودي راح و ما قال لي..يا ربي أن شاء الله ما أكون غلطانة بس)
أحلام:عمي متى تبي تمشي؟
خالد ناظر الساعة و تنهد:الحين..ليه تبين شي؟
أحلام قربت منه و همس بإذنه و ابتسم خالد:طيب ما عليه...
نجلاء ناظرت خالها:طيب اقعد تسحر الحين بيحطونة...
خالد ابتسم لها:بتسحر و بمشي على طول...
...في قصر أبو محمد وفي جناح محمد و أحلام الساعة2ونص...
كان محمد قاعد في البلكونة و فاتح بابها على الغرفة...
محمد(لمتى يا أحلام..عرفنا أنك مجروحة بس أنا بعد مجروح و أبي من يداويني..؟)
مسك جواله بتردد(لا يا محمد لا...لاتتسرع و تندم على اللي راح تسويه..)
محمد كشر و هو يسند ظهره لورا(خلاص عاد من جد أنا مليت..أحلام مهي راضية تجي تقعد معي و أنا ما راح أقعد انتظرها)...
من جهة ثانية أحلام فتحت باب الصالة بهدوء و دخلت بكل هدوء و هي تتلفت يمين يسار...
يا الله وش ذا الفرق...
البيت كنه مهجور لا حس ولا حركة...
توجهت للدرج و صعدت و على طول توجهت لجناحها لقت الباب مفتوح...
ابتسمت وهي تدخل بهدوء و كانت تتصور شكل محمد و كيف راح يستقبلها لما يشوفها جاية له بنفسها...
دخلت الجناح بهدوء و على طول توجهت لغرفة النوم و قطبت حواجبها لما شافت باب البلكونة مفتوح و محمد كان قاعد على الكرسي و ماسك الجوال عند أذنه...
أحلام ضلت واقفة عند باب الغرفة و تناظره و هي مقطبه حواجبها باستغراب...
بينما محمد كان بعالم ثاني...
ما يدري أن زوجته معه بنفس المكان الحين...
مريم ردت على الجوال بدون ما تشوف الرقم:أيــوا...
محمد سمع صوتها و حس بتأنيب الضمير بس في شي داخله يدفعه يكلمها...
محمد همس:مريم...
مريم لما سمعت همسه دق قلبها دقه قوية وهمست بنفس همسه:محمد...
محمد:أي أنا محمد...
مريم بصوت تخنقه العبرة:ليه متصل علي...
محمد:محتاج لك يا مريم..
مريم قطبت حواجبها تحاول تستوعب هي بحلم ولا بعلم:محمد وش قاعد تقول...خلاص اللي بينا انتهى أنت الحين متزوج...
محمد:متزوج و مو متزوج...محتاج لك لا تتخلين عني يا مريم..
مريم علت صوتها شوي:كفاية تلعب على الحبلين يا محمد...خلاص ما بيننا شي...
محمد بجدية:ليه تقولين كذا؟...وش سويت لك أنا...
مريم نزلت دموعها على خدها:وعدتني ما تتخلى عني..وعدتني ما راح تتركني مهما يكون..وعدتني نبقى مع بعض...
وين وعودك لي...و أكيد زوجتك بعد وعدتها خير...
تكلمت بعد صمت:محمد لا تخرب حياتك...مع السلامة...
سكرت مريم الخط بوجهه و محمد رمى الجوال على الطاولة وهو يحس أن مغامرته الفاشلة انتهت بسرعة...
وقف و لف ورا كان يبي يدخل للغرفة و انصدم لما شاف أحلام واقفة عند باب غرفة النوم اللي كان مقابل لباب البلكونة...
كانت دمعتها على خدها وهي نادمة على الساعة اللي قررت فيها أنها تجي لعنده...
محمد مشى و دخل للغرفة و تكلمت أحلام بهدوء و قلبها يتقطع:ما أظن تقتدر تعتذر الحين..جيت لك بنفسي و شفت و سمعت ولا تبي تكذبني بعد...
محمد:أحلام أنتي مو فاهمة شي...
أحلام:أي صح أنا مو فاهمة شي...ولا عمري راح أفهم أنك قاعد تخوني من وراي...
محمد مشى لعندها:أحلام لا تقولين كذا أنا ما أخونك...
أحلام بحزم و دموعها تسيل بهدوء على خدها:بلا تخوني...