...في قصر أبو فيصل و في جناح نجلاء و فيصل الساعة 10 الليل...
كانت قاعدة بغرفة الجلوس بملل و طفش...
من جد الليلة بس طفشت من قلبها لأن لولو و أم فيصل و أبو فيصل طالعين مو هنا...
هي رفضت تطلع معهم لأنها من جد تعبانة و أبو فيصل ما حب يضغط عليها و تركها...
تقلب القنوات و هي في انتظار رجعة لولو لأنها افتقدتها الليلة...
ودها تروح تنام في بيت أبوها لما يكون فيصل مو هنا بس هو رافض...
يبيها في بيته على طول...يبيها تقعد و تنتظره في المكان اللي هو اختاره لها...
انفتح باب الغرفة بهدوء و دخل منه شخص مبتسم و هو متلهف على شوفه حبيبته...
نجلاء كانت قاعدة و عاطية باب الجناح ظهرها و من الملل ما حست بالباب اللي انفتح...
دخل فيصل و مشى ببطء و سند يدينه ورى الكنب اللي هي قاعدة عليه و عقد يدينه قدام رقبتها بابتسامة...
نجلاء خافت و نبضات قلبها تسارعت و بسرعة لفت ورى و علامات الخوف مرتسمة على وجهها...
شافت وجهها الخايف قريب من وجهه المبتسم...
ضلت شوي تستوعب الموضوع و بعدها ابتعدت عنه و هي مقطبة حواجبها:خوفتني فيصل؟
فيصل اختفت ابتسامته و مشى و قعد يمها:افــا هذا استقبال تستقبلين فيه زوجك و أنتي من شهر ما شفتيه؟
نجلاء مسكت يده و هي مبتسمة:لا فيصل والله آسفة لا تزعل مني بس أنت خوفتني من جد و خصوصا البيت فاضي و عشان كذا خفت مــــرة...
فيصل بدل ما يبتسم لها قطب حواجبه:أيوا البيت فاضي ليه قاعدة لحالك هنا وش قلت لك أنا؟
نجلاء قطبت حواجبها و حطت يدها على بطنها:والله كنت بروح معهم بس تعبانة و أحس نفسي دايخة وش لي بالطلعات؟
فيصل وهو يناظرها:من متى تعبانة؟
نجلاء:فيصل عادي لا تكبر الموضوع يمكن من قل النوم صرت أدوخ كثير بس...
فيصل ناظرها بطرف عين:طيب أنا للحين زعلان...
والله كنت أطمح باستقبال أرقى من كذا...
نجلاء بدلع:وش أسوي لك أنت ما قلت لي أنك راجع لو أعرف أنك راجع كنت جهزت لك أحسن استقبال يستاهل حبيبي...
فيصل لف لها و ابتسم:لا عاد ما أقدر على كذا...
نجلاء ابتسمت له:على كذا ما تقدر وش لك بالاستقبال الراقي بعد...
فيصل ضحك و وقف و هو يناظرها:أنا بدخل أخذ لي دش سريع بس جوعان مــرة سوي لي أي شي...
نجلاء وقفت معه:من عيوني...
ابتسم لها فيصل و ما قدر يمشي من عندها بدون ما يطبع أرق قبلة على خدها الناعم المتورد...
مشى للحمام و دخل و نجلاء ضلت واقفة مكانها شوي وهي تحس نفسها فرحانة مرة لأنه فيصل رجع لها...
بس ما راح تدوم فرحتها كالعادة أسبوعين و يرجع يغيب عنها...
راحت طلعت له ملابسة و تركتهم على السرير بطريقة مرتبه و نزلت تحت عشان تسوي له عشا...
كانت تحس بالدوخة مع كل حركة تسويها بس كانت مستحملة عشان عيون فيصل اللي باين عليه جوعان و تعبان بعد...
طلع فيصل من الحمام بعد ما أخذ له دش و ابتسم لما شاف ملابسة مجهزة له على السرير...
وين أيام الخفجي هناك محد يهتم فيه ولا حد يدري عنه...
حتى ملابسة هو اللي ينظفها...
راح لبس ملابسة و من التعب رمى نفسه على السرير بالعرض و هو حاط بباله أنه يبي ينتظر نجلاء عشان يتعشى...
بس شكله سلطان النوم غلبه...
غمض عيونه و نام و شعره المبلل بالماي سوا دائرة تحت راسه...
بعد دقايق فتحت نجلاء باب الجناح و هي تتكلم:ها فيصل خلصت ولا بعــــ...
سكتت و هي تشوفه نايم على السرير...
دخلت غرفة الجلوس و حطت الصحن و رجعت لغرفة النوم و شافته...
كانت تظن أنه يمزح معها كالعادة و قعدت يمه بابتسامة:فيصل بلا ما تسوي لي حركاتك هذي قوم جهزت لك العشا...
فيصل:............................................. ..............................
نجلاء اختفت ابتسامتها و هي تناظره:نايم..
ضلت تناظر ملامحه الحادة الرائعة...
اللي يشوفه على طول يقول أنه له هيبة بس اللي يقعد معه يبصم بالعشر أنه بوادي و الهيبة بوادي...
ابتسمت نجلاء وهي تناظره و التعب واضح على ملامح وجهه...
ما تبي تصحيه ما دام أنه نام قامت فتحت الدولاب و طلعت من شرشف خفيف و فتحته و حطته على فيصل...
تمددت يمه و ضلت تناظر السقف بصمت و بهدوء و هي حاطه يدها على بطنها...
هذي حركة عادية أي واحد يتمدد على ظهره و يثني رجولة راح يحط يده على بطنه...
بس عند نجلاء غير...
ما تدري ليه الفترة هذي دايما يدها على بطنها...
غمضت عيونها و دمعة تدحرجت من جنب عينها و طاحت على المفرش السميك اللي على السرير...
هي نفسها ما تدري وش سبب دمعتها هذي...
يمكن مشتاقة لأبوها و يمكن لأن الأيام قلبها قابضها ما تدري ليه...
تحس بالضيقة بقوة بقلبها و ما تدري وش السبب...؟
نامت بعد فترة طويلة وهي تفكر في سر الضيقة اللي بصدرها...
...في قصر أبو محمد و في جناح محمد و أحلام...
أحلام بضحك:لا والله ما تطلع حلفت عليك محمد...
محمد مبتسم و هو يناظرها:صدقيني ما راح أتأخر أساسا وين أتأخر الحين الساعة10بالله قولي لي؟
أحلام بحزم:طيب أنت اليوم ما تقديت عشاني و أكيد الحين جوعان و أعرفك لما ترجع ما تبي تاكل شي عشان لا يثقل عليك و أنت نايم عشان كذا تتعشى أول أو ما تطلع كيــــ.....
قاطعها محمد و هو يضحك عليها و هي تتكلم بشكل متواصل:هههههههههههههههههههه بس خلاص فهمت خلاص روحي جهزي العشا و بتعشى و مو طالع بعد ارتحتي...
أحلام ضحكت و هي تناظره و لفت لباب الجناح تبي تطلع بس محمد مسكها:كنك نسيتي شي؟؟
أحلام لفت له بصمت:............................................. ......
محمد و هو يأشر على عبايتها:أخوي أحمد هنا مو برا ألبسي عباتك يمكن تصادفينه...
أحلام تنهدت وهي تناظر محمد و راحت لبست عبايتها الكتف و تحجبت كعادتها و نزلت بضيق...
صحيح حالها هنا مضيق عليها بس هي ما تبي تشكي لمحمد من حياتها في هذا البيت عشان لا تضايقة..
ما تبيه يفكر أنها طفشت منه هو...؟
بدل محمد ملابسة و قعد في غرفة الجلوس و بدا يقلب بقنوات التلفزيون بتركيز كعادته...
بعد فترة انفتح باب الجناح و تكلمت أحلام:العشا وصل...
محمد لف لها و ابتسم و هو يقوم لها و ياخذ منها الصحن:من أي مطعم...
أحلام و هي تدخل غرفة النوم عشان تفسخ عباتها:لا تستهبل علي...
دخل محمد غرفة الجلوس و حط الصحن على الطاولة الصغيرة اللي بنص الجلسة و قعد على الكنب ينتظر أحلام حبيبته تجي...
دخلت أحلام الغرفة و هي ترفع شعرها و مشت و قعدت يم محمد و بدوا يتعشون وهم يسولفون و أحلام كانت تحاول تخفي ضيقتها عن محمد بضحكها و ابتساماتها...
خلصوا العشا و قامت أحلام رجعت نزلت الصحن تحت في المطبخ و تركت مهمة تنظيفة للخدم و رجعت الغرفة لقت محمد قاعد مكانه و ينشف يده بالمناديل و شكله تو مغسل...
أحلام وهي تقعد يمه:أشوف التلفزيون صار يشغلك عني؟
محمد ناظر عيونها بصمت و بعدها تكلم بجدية:ما في شي يشغلني عنك أحلام...
أحلام:بس أنا أشوف العكس...
محمد هز راسه و هو يمسك يدها:يمكن...
لأني ما أحب زوجتي تخفي عني شي مهما كان هذا الشي...
أحلام قطبت حواجبها و هي تناظره بصمت:............................................. .
محمد:لا تنكرين أنك تحاولين تخبين عني أنك متضايقة حنا ما اتفقنا كذا يا أحلام...
ما أحب لما أسولف معك تكون ضحكتك لي كلها مجاملة عشان لا أحس فيك وش قصدك من الحركة هذي...
أحلام بلعت ريقها و هي تناظره بهدوء:آنا مو قصدي أخبي عنك بس ما في شي أقوله لك...
محمد:بلا في...
أنتي متضايقة من اللي صار اليوم مع أمي صح؟
أحلام هزت راسها بالإيجاب و تكلمت و هي تناظره:بس نسيت...
محمد بحزم:لا ما نسيتي...عيونك ما تقول أنك نسيتي...
أحلام نزلت نظرها لتحت بصمت:............................................. ...................
محمد ضل يناظرها:منتي قايلة لي؟
أحلام وهي على حالها:قلت لك ما في شي عادي...
محمد قطب حواجبه و تكلم بهدوء:أحلام أنا زوجك مو غريب ليه ما تفتحين لي قلبك مثل ما أنا فتحت لك قلبي..
لا تحسسيني أني....
قاطعته أحلام و هي تناظره:محمد لا تقول كذا والله مو قصدي...
بس من جد الموضوع ما يستاهل؟
محمد:لو ما يستاهل كان ما بكيتي عشانه...
أحلام ناظرته:أنا بكيت لأن الحركة قهرتني بس...
محمد:بس...
أحلام هزت راسها و هي تناظره:من جد انقهرت لأنها كانت تصارخ علي و أنا ما سويت شي غلط...
انقهرت لأن أمك تكرهني بدون سبب أنا ما سويت لها شي عشان تكرهني كذا؟؟
صار لي ثلاث شهور معها بنفس البيت و أنت كل يوم تقول لي أن بيجي يوم من الأيام و تتغير معاملتها و للحين ما جا اليوم...
أنا بنتظر اليوم هذا لما يجي؟؟
محمد ضل يناظرها بصمت يبيها تكمل:............................................. ................
أحلام نزلت نظرها تحت و بهدوء:الله ما يرضى كذا يا محمد صرت أكره أنزل تحت عشان ما تصارخ علي...
أنا أبوي ما عمره صارخ علي بدون سبب و أنت أمك صارت تصارخ علي من مزاجها...
محمد تكلم بهدوء:أحلام لا تقارنين بين حياتك هنا و حياتك ببيت أبوك...
أنا عارف و متأكد أنك مستغربة من حياتنا هنا...
يعني كل واحد لحاله..ندخل و نطلع ولا حد يدري عنه..ولو اجتمعنا على السفرة يكون الصمت سيد الموقف...
يعني عكس حياتك ببيت أبوك كليا...
أسرتنا متفككة يا أحلام مو مثل أسرتكم...
بس أنتي لازم تتعودين على كذا لأن حياتك راح تستمر هنا...
ابتسم و هو يرفع وجهها و يناظر عيونها:لازم تتعودين على حياتك ببيت زوجك...
أحلام ابتسمت له و عيونها معلقة بعيونه:........................................... .........
محمد بترجي:أحلام تحملي أمي عشاني بس...
أحلام بابتسامة:أبسوي كل شي عشانك وش تامر عليه بعد...؟
محمد توسعت ابتسامته و هو يناظرها:أحـــــــــــــــبها يا ناس...
أحلام ضحكت و محمد ضمها لصدره بارتياح...
ما يدري ليه يرتاح و ينسى همومه لما يكون مع الأنسانة هذي...