مرت الأيام تتبعها الأيام تتبعها الليالي و الساعات و الثواني...
تحدد موعد زواج فيصل مع محمد بنفس الليلة و بنفس الفندق بعد...
أحلام كانت فرحانة لأنه صديقة عمرها نجلاء راح تتزوج معها بنفس الليلة؟؟
أحلام و نجلاء كانوا يطلعون مع بعض و يقضون لزواجهم...
رانيا و وليد سووا ملكتهم و علاقتهم عادية جدا نظرا لظروف شغل وليد ما كان يقدر يروح لها بأي وقت...
و ما كان يقدر يكلمها بأي وقت...
محمد كان فرحان لأن موعد زواجه قرب و كان مجهز كل شي...
هو كان وده يطلع بشقة لحاله هو مع زوجته بس أمه رفضت و ما كان يبي يسوي مشاكل عشان كذا استسلم للواقع و فضى له جناح في بيتهم و أثثه أثاث جديد و فخم و رائع...
فيصل نفس الشي كان وده يقعد لحاله مع زوجته بس هو دايما يروح الخفجي و يضل هناك أيام طويلة عشان كذا فضا له جناح ببيتهم عشان لو راح الخفجي نجلاء ما تقعد لحالها...
بتكون بين أهلها...
شوق و فهد علاقتهم للحين مثل ما هي سطحية و كل يوم تزيد سطحيتها عن اليوم اللي قبله...
لولو وناصر وش أوصف لكم في العلاقة اللي بينهم...
مشاعل للحين الحقد مالي قلبها بس ما تدري وش الواجب عليها تسويه...
هل تنتقم ولا تنتظر؟؟
عبد الله ما تغير شي من حياته...للحين زي ما هو...؟
خالد و دانه كانوا فرحانين حــــــيل عشان حمل دانه و خالد دايما يكلم البيبي و يتمنى لو يكون ولد...؟
ديما كانت تغار مرات بس ترجع و تتفهم الموضوع مرة ثانية...
...
...الأربعاء في قصر أبو وليد الظهر في غرفة أحلام...
أحلام كانت جاية لنجلاء من الصباح و قاعدة تسولف معها...
نجلاء مبتسمة:والله أني كلما أكلم فيصل أقنعه يوريني إياها بس دايما يقول لي خليها مفاجأة أحسن...
أحلام ضحكت:أي و عشان يضمن أنك ما راح تشوفينها لما مشى للخفجي أخذ المفتاح معه؟؟
نجلاء مبتسمة:إلا هو متى راح يرجع ما تدرين؟
أحلام:بلا الأربعاء الجاي بيكون هنا أن شاء الله...
نجلاء قطبت حواجبها:بس المفروض يجي قبل بوقت كيف يجي يوم الأربعاء و الخميس الزواج...
أحلام ضلت ساكتة شوي و بعدها ضحكت:نجلاء راح نتزوج والله و كبرنا...
نجلاء:هههههههههههههههههههه وش فيك مو مصدقه...
أحلام بهدوء:مدري كلما أفتح دولابي و أشوف فستاني الأبيض أحس أني بحلم مو مصدقه...
نجلاء:بس بصراحة...
الله يعينك على أم محمد ما راح تتحملينها...
أحلام اختفت ابتسامتها:عارفة أني ما راح أتحملها...
لما رحت بيتهم مع محمد عشان أشوف الغرفة قابلتني بطريقة بشعة كانت تصارخ و تقول كلام ما فهمته...
بس راح أحاول أتجنبها قد ما أقدر عشان محمد...
نجلاء:هي ليه كذا...ليه ما صارت مثل أختها زوجة خالي أبو عبد الله؟
أحلام:مو كل الأخوات مثل بعض...
محد يصدق أنهم أخوات مو باين عليهم أبد...
أحلام ناظرت الساعة بالجوال:يللا نجلاء تأخرت أكيد السواق جا الحين...
نجلاء:تو الناس قعدي تقدي معنا...
أحلام:لا ما أبي أضايق وليد أكيد لو قعدت أنا ما راح يقعد يتقدى معكم...
بعدين لا تستعجلين بكرة كلنا راح نتقدى عندك وش تبين أكثر...
نجلاء ابتسمت و وقفت معها:اوك على راحتك...
نزلت أحلام و نزلت معها نجلاء وصلتها للباب و قعدت بالصالة مع أمها...
بالنسبة لأحلام رجعت بيتهم و لقت لها تهزئ من أمها لأنها كانت طالعه مع نجلاء السوق و تأخرت كثير...
دخلت أحلام غرفتها على صوت جوالها و لما شافت المتصل ابتسمت و هي ترد:هلا و غلا...
محمد:هلا و غلا فيك أخباارك؟
أحلام:الحمد لله بخير أنت كيفك؟
محمد:بخير دامك بخير..تعالي وين كنتي الصباح تعبت و أنا اتصل عليك و ما تردين؟؟
أحلام:اها الصباح كنت في مع نجلاء في المجمع و ما قدرت أرد عليك كنت أبتصل عليك لما طلعنا بس نسيت..
محمد بعتاب:ها...
أشوف بدينا ننسى من الحين؟؟
أحلام ابتسمت:لا عاد لا تفهم غلط ما نسيتك أنا نسيت أتصل عليك بس...
بعدين لا تعطيني محاضرة تو أمي هزأتني عشاني تأخرت؟؟
محمد ابتسم:ما عليه حياتي...
كلها أسبوع و تصيرين عندي بعدها أنا اللي راح أهزأك مو أمك؟؟
أحلام:هههههههههه أي نفس الشي وش سوينا يعني هو تهزئ تــهزئ...
ضلت تسولف معه لما وصل أبوها و حطوا القدا و سكرت منه و نزلوا يتقدون...
...في شقة خالد و دانه في الصالة بعد صلاة المغرب...
دانه مبتسمة:وش فيك مستعجل كذا تو الناس أنا لسا بالشهر الثالث يعني باقي ست شهور صبر نفسك..
خالد تنهد و هو يناظرها:و أنا وش بيدي غير الصبر...
طلعت ديما من غرفتها و قعدت يم أبوها:بابا نجلاء قالت لي أمس لما كنت عندهم أن أسبوع الجاي راح تتزوج فيصل صح؟؟
خالد ابتسم لها:أي صح؟؟
ديما كشرت:يعني لما أروح بيت عمتي ما راح تكون نجلاء هناك؟؟
خالد:طيب ليه زعلانة كذا ولا يهمك أوديك بيت عمك عشان تشوفين نجلاء...
ديما:بس فيصل أكرهه يقول لي بعدين ما راح أخليك تشوفين نجلاء...
خالد ضحك على سوالف فيصل:ما عليك منه يمزح معك...
ديما بحزم:لا ما يمزح يتكلم جد...
خالد:طيب ولا يهمك أنا أخذك و أوديك لنجلاء و فيصل ما راح يقول شي بعدين...
دانه ابتسمت لها:طيب وش فيها نجلاء زود عن الباقي...
ديما ناظرتها:لأن بس نجلاء اللي تلعب معي و الباقي ما أحبهم...
خالد:أي هين أنتي ضل أحد تحبينه...
ديما ناظرت أبوها:نعم...
خالد:أقول قومي كملي لعب و أوعدك راح أخليك تشوفين نجلاء...
ابتسمت ديما و باست أبوها في خده و راحت لغرفتها بارتياح و خالد لف لدانه اللي كانت تناظره بصمت...
دانه بهدوء:ما قلت لي أن زواجهم أسبوع الجاي...
خالد:صدقيني كنت أبسوي لك مفاجأة و أخذك للزواج بس هذي ما تترك أحد يسوي مفاجأة زي الناس...
دانه ابتسمت بفرح:من جد خالد؟؟؟
خالد ابتسم لها:أي من جد...
أبي الكل يشوفك و يعرفون أنك زوجتي و دانتي و أم عيالي...
دانه:طيب و أهلك؟؟
خالد:هذا زواج في فندق...يعني مكان عام محد له حق يتكلم...
بعدين صدقيني ما راح يقولون شي...أختي طيبة و لو درت أنك هناك أكيد راح تسلم عليك و ترحب فيك...
و مو معقولة أروح أسهر و أتركك لحالك هنا؟؟؟
دانه ابتسمت و حطت راسها على صدر خالد بفرح:أحبك خالد...
خالد حط يده على راسها:إذا أنتي تحبيني أنا أهواك و أعشقك يا دانه...
في نفس هذي اللحظة رن جوال التلفون و مد خالد يده و رد بهدوء:أيوا...
ــــــــــ:هلا والله خالد أخبارك؟
خالد عدل جلسته و ابتسم:هاشم...هلا فيك وين ودتك الدنيا؟
دانه لما سمعت الاسم عدلت جلستها و ضلت تناظر خالد بشوق...
هذا أخوها وهو صديق قديم لخالد...
خالد ضحك:أي يعني متصل عشان دانه مو عشان تسلم علي...
هاشم:والله الاثنين...
خالد ناظر دانه بابتسامة:طيب بارك لها لا تنسى؟؟
هاشم:أبارك لها على أيش؟
خالد:لأنها تنتظر مولود جديد...
هاشم ابتسم بفرح:بالذمة...
خالد:وش فيك مو مصدق؟
هاشم:طيب خلاص عطني إياها أبي أكلمها ترا خسرتني أنت و وجهك؟
خالد أعطى دانه التلفون و هي ابتسمت:السلام عليكم..
هاشم ابتسم لما سمع صوت أخته:هلا و غلا بالغلا كله والله اشتقنا لك...لك وحشة دانوه...
دانه ابتسمت:والله حتى أنا اشتقت لكم..
هاشم:مبروك يقول خالد حامل...
دانه:الله يبارك فيك..
هاشم:و ديما كيفها وش أخبارها افتقدناها والله..
دانه:الحمد لله بخير...إلا أمي و أبوي وين؟
هاشم:والله أنا مو في البيت طلعت من الجامعة و قلت أكلمكم في الطريق أتسلى...
دانه:هههههههههه يعني..
هاشم:ما في نيتك تزورينا ولا خلاص ما عاد لنا لزوم...
دانه:لا تقول كذا والله ودي أن شاء الله نقدر...
هاشم:أي هالمرة بتجين مع شخص زايد أكيد ما راح تقدرين تركبين الطيارة و أنتي حامل...
دانه:أكيد...
هاشم ابتسم:لو مأجله الحمل لما تجين هنا عشان أمي تمسكك وما تتركك تروحين مع خالد إلا لما تولدين..
دانه ضحكت و خالد تكلم:وش يقول لك كل كلمة و الثانية ضحكتي؟؟
دانه ابتسمت و هي تناظر خالد:اوك باي سلم لي عليهم كلهم...
هاشم:يوصل و أنتي سلمي على ديما و اللي يمك...
دانه:اوك...
سكرت منه وهي ودها تبكي...
اشتاقت لأخوها...
مو بس هذا كلهم اشتاقت لهم ودها لو تكون يمهم...
بس هي الحين بعيدة عنهم بآلاف الأميال و الأمتار...
خالد ابتسم بهدوء وهو يشوف نظراتها المشتاقة و حط يده على كتفها:حبيبتي عارف أنك مشتاقة لهم والله بس وش أسوي لما قررنا نروح حملتي و أنا مو بايعك عشان نركب الطيارة الحين...
بس وعد مني لما تقومين بالسلامة نروح لهم...
دانه:ست شهور طويلة مــــــــرة يا خالد؟؟
خالد:ما عليه اصبري...
...الخميس المغرب في قصر أبو وليد في الصالة...
كانوا قاعدين يسولفون و كل سوالفهم كانت عن تجهيزاتهم لزواج محمد و فيصل اللي موعده أسبوع الجاي...
شوق ضحكت:لا طبعا ما راح أوريكم فستاني إلا ليلة الزواج أحسن...
لولو:المفروض أنا يكون عندي فستانين لأن زواج أخوي و أختي بعد...
أحلام ناظرتها:طماعة...
لولو:لا مو طماعة أنا كنت مجهزة لي موديل لزواجك و موديل لزواج فيصل و الحين خربتوا كل شي والله متحسفة على الموديل الثاني أحس أنه أحلى...
نجلاء:هههههههههههههههههههه والله أنك نكته...
رانيا ببرود:أي عادي وش فيها باقي أسبوع فصلي لك فستان ثاني...
لولو ناظرتها:تتفلسفين مع وجهك؟
رانيا:لا ما أتفلسف أتكلم جد...وش رايك يعني تو الحين تفكرين و تقولين متحسفة...
شوق:و أنتي للحين ما طلع فستانك؟؟
رانيا هزت راسها بالنفي:لسا يوم الأحد بروح أخذه...
لولو ابتسمت بضحك:والله وناسه مو مصدقه أني خلصت ثالث ثانوي بالموت مرت السنة...
نجلاء ناظرتها:أوفـــ والله أنكم قديمين السنة الماضية أنا و أحلام في هالوقت كنا مخلصين...
شوق:أي بس حنا تو مخلصين السنة هذي خلينا نكمل فرحتنا...
رانيا:بس من جد طفشت من السنة هذي أحس أنها طولت كثير...
أحلام:أي عشانها آخر سنة و أنتي كنتي تنتظرينها تخلص عشان كذا بالموت خلصت...
نجلاء ناظرت شوق:أهل فهد راح يجوون في الزواج؟
شوق هزت راسها:أكيد..عمتي عطتني لهم بطاقات...
رانيا:أوفـــ ملل...
لولو بهمس و هي توزع نظرها بينهم كلهم:وش رايكم نروح شقة عمي خالد...
شوق و رانيا ابتسموا وهم يناظرون بعض و كن الفكرة أعجبتهم:......................................
نجلاء قطبت حواجبها:بس خالي خالد هنا؟؟
لولو:أي عادي نروح لزوجته هي قاعدة لحالها هناك؟؟
أحلام قطبت حواجبها:بس صعبة كيف نروح الحين أساسا أهلنا ما راح يرضون...
رانيا كشرت وهي تناظر أحلام و نجلاء:و أنتم ما تقدرون تمررون الموضوع على خير لازم تعقدون السالفة...
لولو:أي صح...
شوق بهدوء:بس أكيد راح نقول لهم ما راح نطلع من دون علمهم؟؟
نجلاء تنهدت:اوك نقول لهم بس راح نتعب على ما يوافقون...
لولو مسكت يد نجلاء بتشجيع:أي عادي نتعب لما يوافقون يللا قومي نقول لهم...
شوق ناظرت أحلام بابتسامة:يللا كلمي محمد هو اللي راح يوصلنا...
أحلام بشدة:لا محمد اليوم تعبان ما راح أقول له يوصلنا صرفوا لكم أحد ثاني...
رانيا:وش رايكم أكلم عبد الله؟
أحلام غمزت لها:وليه ما تكلمين وليد؟
رانيا طلعت جوالها:لا عبد الله أحسن ما أبي وليد يوصلنا؟
شوق تحمست للفكرة لأنها تبي تشوف عبد الله و طلعت جوالها هي الثانية:و أنا بكلم فهد و بقول له أني هناك عشان يجي ياخذني من هناك...
قامت شوق بعدت عنهم و هي تكلم فهد...
هنا رد عبد الله على رانيا ببرود:هلا..
رانيا:هلا وغلا بأخوي..
عبد الله فهم الموضوع:أنتي وراك شي قولي بسرعة لا تطولينها..؟
رانيا ابتسمت:ما شاء الله عليك تفهم...
عبد الله:وش قالوا لك خبل؟؟
رانيا:طيب عمي خالد موجود يمك؟
عبد الله:أي موجود ليه؟
رانيا:أبطلب منك طلب بس لا يدري عمي بليز...
عبد الله باستغراب:ليه ما تبينه يدري؟
رانيا:أحم...لأنا نبي نروح شقته لزوجته بس ما نبيه يدري أنا رايحين هناك..
عبد الله:اها و أنا المحظوظ اللي راح أوصلكم هناك؟؟
رانيا:أي...بليز عبد الله لا تردني؟
عبد الله تنهد:من معك؟
رانيا:أنا و أحلام و نجلاء و لولو و شوق...
عبد الله لما سمع أسم شوق دق قلبه بقوة...
حبيبته راح تركب سيارته من قده...أكيد راح يوافق ما قدامه خيار ثاني...
عبد الله:طيب...متى تبون تروحون؟؟
رانيا:اوك بس نرتب الأمور و أعطيك نغمة...
عبد الله:طيب مع السلامة...
رانيا سكرت و هي مستغربة و تكلمت:وش صاير بالدنيا عبد الله وافق بسرعة...
أحلام ابتسمت:ليه مستغربة؟
رانيا:لما أطلب منه طلب ما يوافق بسرعة لازم أضل فترة أقنع فيه و زين لو أقتنع بعد و الحين بسرعة قال لي طيب و أنا اللي محضرة نفسي للكلام معه...
في نفس الوقت جات شوق و ابتسمت:اوك فهد ما عنده مانع...
أحلام:الحمد لله عليكم رتبوتوا كل شي وللحين ما أخذنا موافقة الأهل ليه ما تصبرون؟؟
رانيا بثقة:أكيد راح يوافقون وين رايحين حنا؟
طلعوا نجلاء و لولو من غرفة الجلوس اللي كانوا جالسين فيها الأمهات و هم يضحكون:وافقوا...
رانيا ابتسمت بفرح:والله...
نجلاء قعدت وهي تتنهد:بالموت وافقوا نقنع وحدة و تطلع لنا الثانية و كل وحده مطلعة لنا عذر أقبح من الثانية..
لولو بثقة:بس حنا قدها و قدود أقنعناهم و وافقوا...
رانيا:و أنا كلمت عبد الله هو اللي راح يوصلنا لهناك...
نجلاء توجهت للدرج:طيب أبروح أجيب عباتي و أرجع لكم...
لولو بفرح:و أخيرا بشوف دانه اللي عمي ميت عليها؟؟
رانيا بفرح:والله مو مصدقه أني أبشوفها الحين...
شوق كشرت:بس لو أبوي و أعمامي عرفوا أنا رايحين هناك ما راح يمشونها على خير..
هم لحالهم بالموت بالعين وجودها بيننا هالمرة حنا رايحين لها...
لولو:ما راح يدرون...
نزلت نجلاء بابتسامة:وش فيكم قاعدين للحين يللا قوموا...
رانيا اتصلت على عبد الله و هو فهم السالفة و قام تعذر منهم أن عنده شغله صغيرة و راح يرجع لهم...
و هو ما سوا كل هذا و وافق على كلام أخته إلا عشان شوق معهم...
...في شقة خالد و دانه في الصالة الساعة8 و نص...
كان المكيف مشغل و التلفزيون مشغل على قناة(سبيستون)...
ديما كانت قاعدة في الأرض و منسدحه على بطنها وسط الألعاب اللي ماليين الصالة...
فاتحة دفتر قدامها وقاعدة تخربط فيه و هي تسولف لحالها و تناظر التلفزيون...
دانه توها قبل شوي طلعت ملابسهم من الغسالة و الحين قاعد تنشرهم في المنشر اللي في البلكونة الصغيرة تبع غرفة ديما...
طلعت دانه من غرفة ديما و كانت لابسة روب بيت حفر و قصير لركبتها و هي حاطه يدها على ظهرها...
دانه كشرت بعصبية:ديما ليه كذا و بعدين لمتى بضل أرتب وراك؟
ديما رفعت راسها لأمها ببراءة:قلت لك بروح مع بابا بس أنتي ما رضيتي لي...
دانه:أي و تقلبين الدنيا كذا عشاني ما رضيت لك تروحين...
رن الجرس الخاص بالشقة هذي و قامت ديما اللي كانت لابسة بيجاما شوورت و توجهت للباب بفرح:بابا جا...
دانه قطبت حواجبها باستغراب(معقولة خالد رجع الحين...
لا أكيد مو خالد تو الناس هو ما يرجع هالوقت هذا و بعدين خالد معه مفتاح الباب...)
ديما و هي واقفة عند الباب:ماما تعالي أفتحي الباب ...
دانه مشت للباب ببطء و فتحت بدون ما تقول مين لأنها ما تعرف أحد هنا و قالت أكيد هذا خالد اللي جاي...
قطبت حواجبها باستغراب و هي تناظر خمس بنات واقفين برا عند الباب...
لولو تقدمتهم و دخلت و هو تفتح الغطا عن وجهها:تراهم مستحين يدخلون عشانهم أول مرة يشوفونك؟؟
دانه استغربت منها...
صحيح أن خالد كلمها عنهم كثير بس هي ما تعرف أشكالهم ولا مرة شافتهم عشان كذا ما عرفتهم...
ديما مسكت يد نجلاء بفرح و جات لأمها:ماما هذي نجلاء...
نجلاء ابتسمت وهي تسلم على دانه:أخبارك؟
دانه و كنها عرفتهم ابتسمت:الحمد لله بخير...تفضلوا...
سكرت دانه الباب و قعدوا كلهم بالصالة و لولو تكلمت:افا بس ما توقعتك ما تعرفينا..
رانيا:من وين تعرفنا يا حظي؟
دانه ابتسمت:صح أنا ولا مرة شفتكم كيف أعرفكم؟؟
أحلام:ادري أزعجناك جايين بدون أذن...
دانه ابتسمت:لا بالعكس عادي أنا كنت طفشانه...
ديما مسكت يد نجلاء:قومي معي شوفي غرفتي داخل...
نجلاء ابتسمت و قامت معها لداخل و دانه وقفت:ما ضيفتكم...
راحت المطبخ و راحت معها لولو...
لولو:والله مطبخكم كبير المفروض يصير هنا الصالة وهناك المطبخ...
دانه ناظرتها بابتسامة:والله حتى أنا أشوف أن كذا أحسن صاير المطبخ أكبر من الصالة؟؟
لولو ضحكت:ترا عمي خالد ما يدري أن حنا جايين هنا..
دانه:ليه هو مو موجود معكم في البيت...
لولو بابتسامة:بلا موجود..بس ما يدري أننا جايين لك هنا...
دانه ابتسمت:ليه ما قلتوا له طيب؟
لولو وهي تفتح الثلاجة:مو لازم يعرف أننا جايين حنا أهلنا و بالموت أقنعناهم بعد...
دانه ابتسمت و هي تناظرها:أنتي لولو صح؟
لولو ضلت تناظرها شوي و بعدها انفجرت:هههههههههههههههههههه والله أنتي نكته تسولفين معي و ما تدرين من أنا؟؟
دانه ضحكت:لا والله جد أنتي لولو؟
لولو هزت راسها بالإيجاب:أي...وش دراك أن أنا لولو؟
دانه مبتسمة:خالد دايما يسولف لي عنكم هذا اللي قال لي عنك...
لولو توجهت لها:وش قال عني الأخ خالد؟
دانه ضحكت و هي تشيل الصحن اللي فيه كاسات الماي:ما قال شي بس قال لي أنك ملقوفة كذا...
ضحكت دانه وهي تطلع للصالة و لولو وراها:طيب يا خلود أوريك بس يجي و أعلمه كيف يقول عني ملقوفة؟؟
دانه قدمت الماي و قعدت و هي تناظرهم و تكلمت لولو:أدري ما تعرفينهم...
لولو و هي تأشر عليهم:هذي أحلام أختي...و هذي شوق...وهذي رانيا...
دانه ابتسمت لهم وهي تهز راسها بصمت:............................................
رانيا ابتسمت:تدرين عمي دايما يقول لنا أنك حلوة بس ما توقعناك كذا؟
دانه احمرت خدودها وهي تناظرهم:يعني هو كان يتكلم عني معكم؟؟
لولو ناظرتها بطرف عين:أي...ولا تفكرين بس أنتي اللي يتكلم معك عنا؟؟
دانه:هههههههههه وش فيك أنتي حقدتي علي عشانه قال عنك ملقوفة وش دخلني أنا..؟
رانيا و أحلام ضحكوا و تكلمت رانيا:أوفــــ قوية والله...
لولو ناظرتها:والله الكل يقول عني ملقوفة مع أني مو ملقوفة؟؟
شوق:أي أبد وينك و وين اللقافه؟؟
أحلام بضحك:أنتي بوادي و اللقافه بوادي...
لولو ناظرت دانه بعصبية:شفتي والله دايما أنا على هالحال معهم مدري وش الحل؟
دانه:لا عاد ما يتكلمون جد يمزحون؟
لولو:أي أتمنى..
دانه ناظرت أحلام:جهزتي للزواج؟
أحلام هزت راسها:أي خلصت كل شي مو ناقصنا إلا تجين أنتي في الزواج؟
دانه مبتسمة:أن شاء الله...
رانيا قطبت حواجبها:عمي خالد متى يرجع...
دانه:والله هو ما له وقت محدد بس ما يرجع هالوقت...
مر الوقت سريع و هم ضلوا يسولفون بسوالف مختلفة و دانه بسرعة خذت عليهم و صارت تضحك معهم و فرحت حيل بالزيارة هذي اللي كانت تتمناها من زمان...
دخلوا معها المطبخ و سووا لهم عشا خفيف و تعشوا وهو يسولفون و يضحكون و بعد العشا رتبوا معها الصالة اللي كانت مقلوبة فوق تحت بسبة ألعاب ديما...
الساعة11فهد جا و أخذ شوق و مشوا و بعدها جا عبد الله و أخذ أخته مع أحلام و لولو و نجلاء و رجعوا بيت عمتهم...
ديما من التعب لأنها صاحية من الصبح حطت راسها على الكنب و نامت و دانه ضلت قاعدة تنتظر خالد يجي...
ناظرت الساعة و كانت تشير 12ونص...
سمعت صوت المفتاح يحتك بالباب و وقف وهي مبتسمة:هلا وغلا...
خالد ابتسم و هو يسكر الباب و بيده كيس:هلا و غلا فيك؟
دانه قربت منه:وش جايب معك؟
خالد ناظر اللي بيده:عشا...
دانه ابتسمت:مشكور حبيبي بس أنا تعشيت...
خالد قطب حواجبه و هو يحط الكيس على الطاولة اللي بالصالة:تعشيتي لحالك؟
دانه لفت له و هي مبتسمة:لا مو لحالي...توقع تعشيت مع مين؟
خالد لف لها باستغراب:مع مين؟
دانه مبتسمة:لا ما راح أقول لك أنت أعرف بنفسك؟
خالد ناظر ديما و ابتسم:مع ديما يعني مع من؟
دانه هزت راسها:بعد في ناس تعشيت معهم...
خالد ناظرها و هو مقطب حواجبه:مين...دانه قولي لي ترا أنا ما أعرف أفكر لو صرت أبي أعرف بسرعة؟
خالد قعد و قعدت دانه يمه:أنت كنت ببيت أختك صح؟
خالد وهو يناظرها:أي...
دانه:طيب ما لاحظت شي...
خالد:شي مثل شنو بالضبط؟
دانه وهي تناظره:يعني ما لاحظت غياب ناس من البيت؟؟
خالد قطب حواجبه:بلا...
أنا لما دخلت أسلم على أختي ما شفت البنات..بس قبل شوي و قبل لا أطلع شفتهم بالبيت؟؟؟
دانه:طيب عرفت تعشيت مع من؟
خالد ابتسم وهو يتمنى اللي يفكر فيه صح:هم جاوا لك هنا؟
دانه هزت راسها بالإيجاب و بصمت:......................................
خالد توسعت ابتسامته:دانه تتكلمين جد؟
دانه:والله أتكلم جد...كانوا عندي و تعشوا معي بعد...
خالد:وش رايك فيهم عسى ما أزعجوك؟؟
دانه هزت راسها بالنفي:بالعكس استانست معهم و أنا لحالي كنت طفشانه...حتى ديما فرحت لما شافتهم...
خالد وهو يناظر دانه:وش سويتوا طيب؟
دانه هزت كتوفها:ولا شي بس بسرعة تعودت عليهم و كني أعرفهم من زمان...
خالد مبتسم بفرح:حلو...بس ليه ما قالوا لي أنهم جايين عندك؟
دانه ابتسمت بضحك:مدري...بس حتى أنا بعد قالوا لي أن ما عندك علم أنهم عندي؟
خالد ضحك:الله أوريهم أنا مدري متى يتركون حركاتهم هذي يعني وش فيها لو قالوا لي أنهم هنا؟؟
دانه ضلت مبتسمة وهي تناظر خالد بصمت و خالد لما انتبه لها مسكها و قربها منه و حضنها بشوق و حب و فرح و بهمس:وش أخباره عمور؟
دانه حطت يدها على بطنها وهي مبتسمة:بخير...ما يسأل إلا عنك؟؟
خالد تنهد:والله ما تدرين وش قد مشتاق أشوفه هالولد هذا؟؟...
دانه:مو بس أنت...حتى أنا بعد ودي أشوفه اليوم قبل بكرة؟؟
خالد و دانه...<<و كل يوم يزيد حبه لها؟؟؟
بالنسبة لمحمد و فيصل كان الأسبوع هذا له معنى كبير بقلوبهم...
لأنهم في انتظار يوم انتظروه من زمان...و قرب هذا اليوم؟؟
أحلام و نجلاء...
كانوا فرحانين بس الارتباك بأنهم راح يدخلون حياة جديدة ما يعرفون عنها شي مخوفهم...
الكل كان فرحان و ينتظر يوم الخميس بفارغ الصبر...
لأنه يوم فرح...مو فرحة وحده فرحتين...
و أخيرا
...جا يوم الخميس اللي الكل انتظره على أحر من الجمر...
...الظهر و في إحدى صالونات الرياض الكبيرة...
كانوا أحلام و نجلاء في غرف خاصة للعرايس و باقي البنات في الغرف العادية...
طبعا كلهم كانوا جايين مع بعض في صالون واحد لأن هم ما لهم إلا بعض و لأنهم يبون يكونون مع بعض...
لولو قاعدة على الكنب ببيجامتها و بيدها مجلة تتصفحها:شوق وش رايك بهذي؟
شوق ناظرتها و ببرود : حلو...
لولو سكرت المجلة و حطتها:قومي نشوف أحلام و نجلاء...
شوق أشرت لها و بهمس:لولو اسكتي فشلتينا من دخلنا و أنتي ما سكتتي الناس تناظرنا...
لولو ببرود:وش أسوي لهم أنا؟؟
شوق سندت ظهرها لورا:عمتي متى بتروح الصالة؟
لولو:مدري بس أتوقع لما تخلص...
جات لهم رانيا و قعدت:وش رايكم بشعري؟
شوق ابتسمت:روعة...
رانيا كشرت:أحس أنه مو مضبوط...مو عاجبني؟
رن جوال رانيا و من النغمة عرفت أنه وليد و ردت وهي مبتسمة:هلا وليد...
وليد:هلا فيك وش سويتي؟
رانيا ضحكت:وش فيك وليد كل شوي متصل تسألني وش سويت خلاص راح تشوفني بعدين...
وليد:والله لو أكلمك أحسن لي طفشت من الحوسه و كله عشان محمد و فيصل عسى يبين في عيونهم...
رانيا:هههههههههه وش دعوة عاد...
وليد ابتسم:بعد قلبي والله هالضحكه و راعيتها...
رانيا مبتسمة:والله أنك فاضي أقول روح شوف شغلك أحسن..؟
وليد ضحك:اوك بروح أشوف شغلي بس في الليل لازم أشوفك...
رانيا:اوك...
وليد:باي...
سكرت رانيا و شوق غمزت لها:والله حركات بعد الأخ كل شوي متصل...
رانيا ضحكت بدلع و هي تحرك شعرها:ما يقدر على فراقي...
لولو:هههههههههه إلا تلقينه يبي يشغل نفسه عشانه ما يبي يشتغل معهم قال رانيا أصرف لي...
رانيا ضربتها:يا حماره مو هذا قصده...
شوق:طيب بهدوء وش فيك عصبتي كذا نمزح معك؟
رانيا وقفت:أروح أشوف نجلاء و أحلام أحسن لي منكم...
راحت رانيا و ضلوا شوق و لولو يسولفون و على المغرب كلهم كانوا خالصين و كل وحدة تقول الزين عنديــ..
كلهم دخلوا غرفة التصوير و صوروا مع بعض و بعدها أحلام و نجلاء صوروا تصوير عرايس لحالهم...
شوق وهي تناظر نفسها في المرايه الكبيرة بفستانها الفوشي الناعم:أحس شكلي غير...
رانيا ابتسمت لها:مـــــــــــرة...و خصوصا بالفستان حقك مـــرة نعوم مثلك...
شوق ابتسمت بأسف:ليت أمي موجودة عشان تشوفني مثلكم...
لولو و رانيا تبادلوا النظرات بحزن و بعدها تكلمت لولو:شوق لا تقولين كذا كلنا أخوات؟؟
شوق ابتسمت تبعد جو الحزن اللي جابته بكلمتها:كنهم تأخروا أحلام و نجلاء...
رانيا ضحكت:عاد نجلاء الحين بتجنن العالم كل شوي تبي تعدل نفسها...
لولو:أي والله صايرة شكاكة اليوم...
رانيا ناظرت شوق:أنتي يوم زواجك سويتي مثلها؟
شوق هزت كتوفها بهدوء و ببرود:ما كان هذا اليوم مهم عندي مثل أحلام و نجلاء حتى أني ما حسيت فيه ولا فرحت مثل الناس...
رانيا ببرود:والله محد قال لك لا تفرحين...
لولو:عادي مو مهم يوم الزواج أهم شي أنك مرتاحة مع فهد الحين...
شوق بضيق(هه..يقولون مرتاحة...أي أكيد راح يقولون مرتاحة لأن محد يحس فيني...
محد يحس فيني غيرك أنت يا عبد الله..)
طلعت أحلام من غرفة التصوير وهي تضحك:تعالوا ساعدوني والله جاني النوم من الغرفة على طول ظلام...
شوق ضحكت:أوفـــ زوجة أخوي و الله تضحكين هذا والليلة زواجك بعد؟
أحلام قربت من المرايه و ابتسمت وهي تناظر نفسها بفستانها الأبيض...
كان عبارة عن تنوره لحالها و اللي فوق لحاله يعني(ساري)..
بس كان جدا فضيع مع خلاعته و نفاشته من تحت بس جاي عليها و مطلعها حلوة حيل...
كانت من جد عروس الموسم بجمالها وأناقتها و نعومتها و شكلها الكلاسيكي...
لولو قربت منها بضيق:أحلام لا تروحين والله الليلة مدري كيف بدخل البيت و أنتي مو معاي...
أحلام حست بقشعريرة وهي تسمع كلام أختها...
الليلة ما راح ترجع بيت أبوها لأنها بتطلع مع محمد زوجها...
محمد حبيبها اللي حبته من سنين طويلة و تعذبت عشانه...
جا اليوم اللي تجتمع فيه و يكون هو زوجها و هو سندها...
تحس بشعور متناقض..فرح و حزن و خوف و ارتباك و توتر...
أحلام ناظرتهم كلهم و الدموع بعيونها:خلاص عاد لا أصيح الحين؟؟
شوق ابتسمت:والله محد قال لك صيحي و إذا على أختك ما عليك منها يومين و تنساك..
...في صالة الأفراح الكبيرة و الضخمة...
الليلــة ليــلتــنــا ..::.. يا محلى جمعتنا
نثبت لكل الناس ..::.. قـــــوة محبــتـنا
إنسي وأنا أنسى الهم ..::.. ونشتت الأحزان
نضحـــكـ ونتفاءل ..::.. مــا دامنا خــلان
الله لا يحرمنا ..::.. من بعضنــــا آميــن
ولا تــفرقـنــا ..::.. كلمة عذول أو عين
...
كان صوت الأستريو و الدي جي عالي و مملي المكان...
الناس المعزومين كانوا قليل للحين ما بعد يجوون كلهم لأن الحين الساعة8...
دخلوا كلهم جناح العروس...بس هالمرة كان جناح لعروسين مو عروس وحده...
نجلاء على طول قعدت على الكنب وهي تفكر بفيصل و هاني...
تحس بالخوف...
مو قادرة تبتسم أو حتى تصطنع الابتسامة..ولو كانت ابتسامة صفرا...
بينما الباقين كلهم كانوا واقفين قدام المرايه و يسولفون و يضحكون بفرح...
أحلام و هي تناظر شكلها في المرايه و بإعجاب:والله شكلي طالعة قمر...
شوق ابتسمت:أو قمر وبس إلا شكله محمد مو نايم الليلة...
رانيا بضحك:لا تفرحين هي قصدها مو نايم من الخوف منك و من شكلك...
أحلام لفت لها:يا حماره لا تقولين كذا تحطميني؟
لولو توجهت للباب بفستانها اللي كان بدرجات السماوي بس جدا فضيع:بروح أنادي عمتي و أمي يشوفون بناتهم..
قبل لا تفتح لولو الباب انفتح الباب و دخلت أم وليد و ضلت تناظرهم بفرح و هي تذكر ربها:...........
بعدها طاحت عينها على بنتها الوحيدة و ابتسمت ابتسامة منشرحة تدل على فرحتها الكبيرة و مشت لها و نجلاء وقفت و ضمت أمها بقوة و هي ودها تبكي...
تحس العبرة خانقتها و تبي تطلع كل اللي بقلبها...
مو المفروض يكون أبوها موجود معها اليوم؟؟؟
أم وليد و هي تناظرها:بسم الله حولك و حواليك طالعة قمر...
أحلام بغيرة و هي واقفة:و أنا عمتي ولا شفتي بنتك و نسيتينا؟
أم وليد ناظرتها:الله يعلم أن كلكم بناتي و معزتكم وحده بقلبي...
انفتح الباب مرة ثانية و دخلت أم فيصل و على طول توجهت لبنتها و ضمتها بفرح وهي مبتسمة:...............
أحلام ابتسمت و هي بحضن أمها...حست بالدفا و الأمان...
خلاص من اليوم راح تبعد عن الحضن الدافي هذا؟؟؟
أم فيصل ناظرتها:بسم الله عليك والله أخاف تطلعين قدام الناس كذا...
رانيا ضحكت:هههههههههه من زينها عاد...
شوق ابتسمت:أكيد من زينها مو زوجة أخوي...
أم وليد وهي تناظر بنتها:يللا نجلاء أنا لازم أكون برا عند الضيوف بس راجعة لك بعد شوي...
لفت للبنات:و أنتوا بعد يللا أطلعوا برا ولا تبون تقعدون هنا؟
طلعت أم وليد و لحقتها أم فيصل و أحلام توجهت لأحلام و قعدت يمها و هي تحاول تخفي ارتباكها و تظهر بطبيعتها...
و بعدهم طلعوا البنات اللي هم رانيا و شوق و لولو...
شوق لما دخلت الصالة الكبيرة الفخمة على طول طاحت عينها على أم فهد و نوف و آلاء و توجهت لهم بابتسامة...
أم فهد و هي تناظرها:بسم الله عليك وش ذا الحلى كله...
شوق ابتسمت:تسلمين خالتي والله عيونك الحلوة...
آلاء وهي تناظرها باستهبال:والله فهد إذا شافك أكيد راح ينسى اللي حــــــــــــــــوله...
شوق لفت لها و أعطتها نظرة صمت و ما تكلمت:............................................ ...
جات أم وليد و ابتسامتها على وجهها:يا حيا الله من جانا؟
أم فهد سلمت عليها:الله يحيك و يبقيك...
أم وليد:أن شاء الله نوجبك بأفراحكم يا أم فهد و الله ما قصرتي فرحت لما شفتك هنا...
أم فهد ابتسمت و ضلت تسولف معها شوي و شوق كانت تسولف مع نوف و آلاء عن اللي صار لهم في المشغل اليوم...
نوف قطبت حواجبها:وين العرايس؟
شوق و هي مبتسمة:داخل في الغرفة...
انتبهت شوق لبنت صغيرة مسكت فستانها و نزلت راسها شافت ديما بنت عمها و ابتسمت لها:هلا و غلا ديما..
ديما مسكتها من يدها:تعالي الماما تبيك؟
شوق لفت لنوف:تعالي بوريك زوجة عمي اللي تبين تشوفينها؟
راحت نوف مع شوق لعند الطاولة اللي قاعدة عليها دانه...
كانت قاعدة لحالها و تناظر الرايح و الجاي...
شوق سلمت عليها بفرح:والله أحلام و نجلاء راح يفرحون لما يدرون أنك هنا...
دانه:عارفة أنا قبل شي كنت عندهم في الغرفة و الحين خالد معهم...
شوق رفعت حاجب:طيب وش رايك فيهم؟
دانه:يجنون والله...
انتبهت دانه لنوف و سلمت عليها و على وجهها علامة استفهام و تكلمت شوق:هذي نوف حماتي...
دانه ابتسمت لها:هلا فيك...
نوف قعدت:مبروك يقولون حامل...
دانه:الله يبارك فيك؟
نوف:متأخرة بس عادي توني أشوفك؟
دانه ضحكت:لا ما في مشكلة عادي...
جات لولو تسرع و بدفاشتها المعتادة :هلا و غلا باللي لفانا...
دانه ابتسمت وهي تسلم عليها:هلا و غلا فيك؟؟
لولو مسكتها من يدها:قومي معي شوفي عمتي هناك قومي سلمي عليها...
دانه حست بارتباك و خوف و هزت راسها:مو الحين؟
لولو قومتها غصب:لا الحين وش فيها يعني...
مشت لولو مع دانه و دانه ما كانت تبي تروح بس لولو سحبتها معها غصب...
شوق قعدت وهي تتأفف:ما تقدر هذي الله يهديها...
نوف:ليه؟
شوق:لأن دانه أول مرة تجتمع معنا في مناسبة و هي ولا مرة شافت عمتي و أكيد الحين خايفة من ردة فعلها و أنتي تدرين ليه؟
نوف:بس عمتك طيبة ما أتوقع تسوي شي يضايق دانه؟
شوق بعد صمت تكلمت بتردد وهي تناظر الطاولة:إلا فهد وش سوى اليوم؟
نوف ابتسمت و هي تغمز لها:طفشان بدونك و معصب علينا حنا...
والله ما تقدى ولا أكل شي كنه مو مشتهي ياكل و أنتي مو معه؟؟
شوق اصطنعت ابتسامة مزيفة:هو اللي جابكم؟
نوف:في غيره بعد؟؟
من جهة ثانية كانت أم وليد في المطبخ الخاص للصالة الكبيرة مع الخدم تشوف شغلهم و تشوف وش قاعدين يسوون...
دخلت لولو و معها دانه:عمــــــــــــــــــــتي..
أم وليد لفت لها و ضلت تناظر اللي معها باستغراب..
طبعا أم وليد ما تدري أن هذي دانه لأنها أول مرة تشوفها...
دانه كانت منزلة راسها بتوتر و ارتباك و مو عارفة وش الواجب عليها تسوي...
تمنت لو خالد موجود معها الحين...صارت ما تحتمي في أحد غيره هو...
أم وليد تكلمت و هي مقطبة حواجبها:خير وش عندك جاية لي هنا؟؟
لولو:مو أنا اللي جاية لك(أشرت على دانه)زوجة أخوك اللي جاية تبي تسلم عليك؟؟
أم وليد باستغراب:زوجة أخوي؟
لولو:أي عمتي هذي دانه زوجة عمي خالد وش فيك نسيتي؟
أم وليد ضلت واقفة تناظرها شوي بس ما قدرت تسوي شي غير أنها ابتسمت لها و بحنية:هلا فيك دانه حياك...
دانه رفعت راسها و ناظرت أم وليد بابتسامة و بفرح و مشت لها و سلمت عليها و حبت راسها و بهدوء:مشكورة...
أم وليد بابتسامة و هي تناظرها:خذي راحتك المكان مكانك...
دانه حست براحة نفسية و هي تناظر أم وليد بابتسامة رضا و بفرح:............................................
لولو تقدمت:والله يا عمتي شكلها خايفة قبل شوي بس قلت لها أني باخذها لك انقلبت ملامحها فوق تحت؟
طلعت دانه مع لولو للصالة الكبيرة اللي بجت تمتلي بالناس و الضيوف المعازيم و الأقارب...
دانه على طول كلمت خالد و قالت له عن اللي صار...
خالد فرح من قلب لأن حتى هو كان خايف من ردة فعل أخته...
جات الساعة 9 و أعلنوا عن دخول العروس الأولى(نجلاء)...
طبعا الزفة مبكرة لأنهم يبون يختصرون الوقت و يكفي لزفة أحلام بعد...
و خلوا نجلاء أول لأن طيارتهم على الساعة3الفجر و لازم يكونون في المطار قبلها بساعة على الأقل...
طفت الأنوار على صوت موسيقى هادية رومانسيه كلاسيكية من اختيار العروس نجلاء...
وهي اللي اختارتها عشان تكون زفتها عليها محد تدخل فيها...
مشت لحالها على المسرح بهدوء و ببطء و كل العيون كانت عليها و أمها لما شافتها ما قدرت تتحمل أكثر و دمعت و هي تناظر بنتها الوحيدة تدخل للكوشة الفخمة...
توجهت لأمها و سلمت عليها و باستها على راسها و بعدها سلمت على أم فيصل اللي كانت فرحانة فيها و مشت للكرسي و قعدت عليه بكل هدوء و قلبها يضرب طبول...
بعدها شغلوا الأنوار و بدا صوت الأغاني يعلا من الأستريو و البنات كلهم جاوا لنجلاء وهم فرحانين و ضلوا يسولفون معها و هي كانت تبي تبكي...
حتى دانه بعد جات و سلمت عليها و باركت لها و صديقاتها اللي كانت عازمتهم ما قصروا جاوا سلموا عليها و الكل رقص على المسرح الواسع الفخم الضخم...
بعد ساعة تقريبا الكل تغطا عشان يدخل فيصل العريس السعيد...
وقفت له نجلاء على المسرح و هي تحس رجولها مو شايلتها...ترتجف بخوف و بتوتر...
دخل فيصل و على يمينه أبوه وعمته أم وليد و على يساره وليد أخو نجلاء اللي كان ينتظر اللحظة هذي بفارغ الصبر...
يبي يشوف أخته عروس مع زوجها اللي راح يكون سندها لباقي عمرها...
يبي يشوفها في يومها الوردي اللي الكل كان ينتظره من زمان...
فيصل أول ما شافها كان عند الباب و ضل يناظرها وهو يمشي لما قرب منها و باس راسها و وقف يمها بفرح و ابتسامته مرسومة على شفاهه...
بعدها نجلاء سلمت على خالها اللي الحين صار خالها و عمها بعد و هو الثاني بعد كان فرحان لها و لولده...
بعدها سلمت على وليد اللي كان له دور كبير في حياتها و في كل شي يخصها...
هذا وليد أخوها و أبوها و ولي أمرها و سندها و عزها...
بس كنه الحين يتخلى عن كل مهامه و يسلمها لفيصل...
دمعت عيونها و هي تناظر وليد بعبرة و وليد رفع يده و مسح دمعتها بابتسامة:مبروك نجلاء عقبال ما نفرح في عيالكم...
نجلاء ابتسمت وهي تناظره و سلمت عليه و طلع هو و خالها و جات لولو على طول و سلمت على فيصل باستهبال:مبروك أخوي فيصل...
فيصل ابتسم لها:الله يبارك فيك عقبالك...
لولو كشرت بوجهه:لا تو الناس...
المهم أنا جاية عشان أعاتبك شلون أختك الحين زفتها و أنت بتطلع يعني ما راح تجي تبارك لها...
فيصل تنهد:بلا قبل لا أطلع بمر أسلم عليها كيف أطلع و أنا ما سلمت عليها؟؟
نجلاء كانت واقفة يمه و تناظر الأرض و هي تسمع صوته و هو يكلم أخته...
ما كانت قادرة ترفع نظرها و تناظر الناس الموجودين ولا هي قادرة تناظره هو نفسه...
جات المصورة اللي كانوا جايبينها عشان تاخذ لهم أروع اللقطات في أروع اللحظات و تضل ذكرى لهم...
و فيصل كان فرحان على الحركات اللي كانت تقول لهم المصورة يسونها بعكس نجلاء بالضبط اللي ضايقها الوضع...
بعدها جاوا البنات كلهم و سلموا على نجلاء و أمها و أم فيصل و زوجة عمها جاوا سلموا عليها و الكل كان يوصي فيصل عليها...
أخذها فيصل و طلعوا و قبل لا يركبون السيارة دخل جناح العروس و سلم على أخته اللي ابهره شكلها مثل ما ابهره شكل زوجته نجلاء...
ركبوا السيارة و توجهوا لبيت أبو فيصل اللي كان فاضي ما فيه أحد و اللي وصلهم لهناك وليد عشان هو اللي راح يوصلهم للمطار...
نجلاء من جد كانت متورطة لأنها كانت لحالها و ما عرفت كيف تتصرف بس كل اللي سوته لما دخلوا جناحهم الخاص بدلت فستانها بصعوبة و لبست جنز و تي شيرت حفر بس شكله روعة و فيصل كان تحت مع وليد...
بعدها نزلت لهم وهي متورطة وهم كانوا قاعدين في الصالة يسولفون عن العرس و يضحكون مع بعض...
تمنت لو كانت أمها معها بس من جد أمها ما كانت تقدر تطلع و تترك الضيوف اللي متعنين لها...
من جهة ثانية كانوا يتجهزون لزفة أحلام اللي بدا القلب يضرب عندها بقوة و بشكل ملحوظ...
بس هالمرة الزفة غير...
دخلت على أغنية:.
+,,+ قمر +,,+
يا أرض أحفظي ما عليك .. حبيب قلبي حضر
اليوم طالع قمر .. في طلتك يا سلام
حلاه غير البشر .. وأخذت مشي الحمام
شفتك وضاع الكلام .. ضيعت حتى الغزل
اعذرني والله جمالك .. ما خلى فيني عقل
وقفت قلبي بسحرك .. يا روحي والله ستر
يا أرض أحفظي ما عليك .. اليوم طالع قمر
يا عيني ع الابتسامة .. تمشي وسهامك تصيب
واللي يشوفك يقول .. يا بخت راعي النصيب
يموت بك من يشوفك .. لو كان قلبه حجر
يا أرض أحفظي ما عليك .. اليوم طالع قمر
واللي اختارها لها محمد...
هي ما كانت تبيها لأنها قديمة بنظرها بس محمد أصر عليها أنها تحطها في الزفة و حطتها لعيون محمد اللي كانت عاجبته الأغنية هذي و يشوف أنها جاية لأحلام...
دخلت و قعدت على الكوشة و كان شكلها غير عن شكل نجلاء...
أحلام كانت فلـــــــه شوي و تضحك و تتبسم عكس نجلاء اللي كان الخوف طاغي عليها و مو تارك لها مجال حتى أنها تبتسم...
البنات كلهم جاوا لها و رقصوا لخاطرها كلهم و لولو كانت فرحانة و بنفس الوقت متضايقة...
لأنها لما ترجع البيت الليلة بتكون لحالها...
لا أخوها ولا أختها موجودين من جد شي يحز بالنفس شوي...
مهما كان لهم وحشة...
أحلام حز بخاطرها أن أم محمد ما جات سلمت عليها مثل باقي الحميات...
أساسا أم محمد كان وجودها مثل عدمها من بداية الزواج و هي قاعدة حالها حال المعازيم...
مع أن المفروض أنها تكون بارزة للكل لأن الليلة ليلة فرح ولدها و بكرها بس حصل العكس...
صديقات أحلام جنوا عليها لما شافوها بالكوشة و كلهم تجمعوا حولها و ضلوا يسولفون معها و يضحكون حتى أنهم ما خلوا مجال للمعازيم أنهم يشوفونها...
الساعة وحده و نص الكل تغطا عشان محمد يدخل و شوق كانت طايره من الفرح عشان أخوها محمد...
دخل محمد للصالة مع أبوه و عمه أبو فيصل اللي الليلة فرحته فرحين..فرحته ببنته و بولده..
وعمته بعد ما نسته و دخلت معه لأنها تعتبره ولدها مثل وليد...
وشوق بعد دخلت معه و هو كان فرحان لأن أخته الوحيدة وقفت معه في ليلة عمره...
سلم على أحلام اللي كانت عيونها معلقة بعيونه و باسها على راسها و وقف جنبها و الدنيا مو سايعته من الفرحة...
سلمت على أبوها و عمها و طلعوا و بعدها جات لها أمها و سلمت عليها و على محمد و باركت لهم و محمد نادى شوق و سألها عن أمه...
شوق ما قصرت راحت لأم محمد و حاولت تقنعها تقوم تسلم عليه و تبارك له بس كانت ردة فعلها الرفض...
رجعت شوق لمحمد و ضايقته بالخبر بس حاول ما يبين عشان ما يضايق أحلام معه و هو ما يدري أنها نفسها متضايقة من الحركة هذي...
صورتهم المصورة و محمد ما نسى أخته شوق صور معها و مع أحلام أروع الصور و أروع الابتسامات مرسومة على شفاههم...
قعد محمد يم أحلام و طول الوقت كان ماسك يدها و مبتسم و هو يسولف معها بفرح و مو مصدق نفسه أن الليلة عرسه...
الكل كان منهبل عليه و على حركاته و على جماله و وسامته الخليجية العربية...
الساعة 3 و نص وقفوا صوت الأغاني مع طلعة محمد و أحلام...
بس ما توجهوا للبيت توجهوا لجناح في الفندق اللي هم مستأجرين فيه لأن الساعة 9 الصباح موعد رحلتهم...
سكرت الصالة و الكل توجه لبيته و لمكانه...
كانت ليلة روعــــــــــــــــــة بمنعى الكلمة من ليالي ألف ليلة و ليلة...
مريم عشيقة محمد كانت موجودة و كانت دموعها على خدها و هي تناظر حبيبها مع وحده غيرها بس ما كان بيدها شي تسويه غير أنها تتمنا له السعادة و الراحة...
حتى هاني عشيق نجلاء كان موجود و فيصل لما شافه بمجلس الرجال ما أعطاه وجه...
حتى لما جا هاني يسلم على فيصل...فيصل ما عبره و لا حتى كلمه...
لأن اللي سواه مو شوي...
ناصر كان موجود لأن أحمد عزمه على زواج أخوه...
بس هو كان جاي بعد عشان لولو قالت له يجي...