الجــــــــــــزء[20[
::
في الممر وصل ذياب لموزه و قلبه يدق من الانسانه إلي واقفه حذاله مشتااااق حقها يبا ياخذها ويظهر هو وياها من المستشفى يبا يتمشى وياها بروووحه هو وياها..
ذياب شال نظارته من على عينه: شحالج الغلا..
موزه تطالع الصوب الثاني وهي مغشايه: الحمد الله بخيــــــر.. " و كانت تمد في رمستها "
ذياب استغرب ردها: بــلاج الغاليه شو فيــج..
موزه: و الله ما فيني شي مرتاحه دامني ما شوف ويهك..
ذياب الرمسه ما فهمها بلاها؟: اشفيــج شي يعورج..
موزه بعصبيـه موصله حدها: لا ما شي يعورنيــه..
ذياب: زين زين شوي شوي على عمرج ليش ترمسينيه جيه؟..
موزه ببرود فضيــع مع ملامح حقيـره: لا و لا شي هذا اسلوبي..
ذياب: موزه بتقوليــن شو فيــج؟؟ و لا جيف..
موزه: بقول ليش شو تتـحرا عمرك انت هاه..
ذياب وهو ياخذها و يوقفها على برد من الممر: موزه اشفيــج جيه ترمسن..
موزه: ذياب ما أنا إلي انت تقص عليه فاهم " ذياب عقد حوايبه استغرب بلاها " لا تقعد تطالعني جيه و جنك هب فاهم السالفه.. شوف أنا هب ياهل تقص عليه انت فاهم و جان عندك صج شغل قول عندي شغل هب تقص عليه تقول عندك شغل و انت ما عندك شغل.. قول أنا عند هند و بـس لا اتعب عمرك أزيد ما انت تعبتها..
ذياب: موزه أنا صج كان عندي شغــل بلاج قلت لــج بسير الصناعيه و بشوف سيارتج جان خلصت و لا لاء..
موزه تستهين برمسته: هيــه صح صح يمكن أنا ما أعرف..
ذياب حرج: موزه عدلي رمستج..
موزه: هيه صح أنا ما عندي لـك رمسه .. و أتمنى المره اليايه يوم بترمس ويايه قول الصج لا تتعلث بالشغل..
و سارت عنه و حدرت غرفه عبيد و قعدت هي وياه يرمسون.. و خلت ذياب برا محترق من الرمسه إلي قالتها له " موزه هب مصدقتي.. أفا هذا آخر شي يظهر لها من صوبي والله العظيـم كانت عنديه شغله والله " و من الغيض سرح صوب غرفه عبيد و ما عليه منها و حدر عليهم..
ذياب: شحالك يا عبيد ربك بخيـر..
عبيد مبتسم مستانس إنه شاف ذياب من بعد ما شاف الموت فـ عينه خلاص بودر سوالف إلي براسي بسويه من بعد ما صار له الحادث خلاص ما يقدر يتخيل إنه يموت و محد راضي عليه: الحمد الله بخير انت شحالك عساك طيب..
ذياب: و الله الحمد الله.. " و قعد حذال موزه و قعد يطالعها وهو يرضف غترته على ورا "
عبيد يطالعهم هب حاس بشي من بينهم: هاه موزه شي مسويبج ذياب تراه بأدبه لـج " ويرفع أيده " بهذه ع راس..
سلطان: هيه جان تروم له انت..
ذياب: يا الله راونيه شطارتك يا حلو.. " و شال حمدان و قعده ع حضنه "
عبيد: ما روم لــك ما شا الله عليـك عرضة و جسمك خلني ســاكت احسن.. " موزه ساكت منزله عينها "
حمدان يطالع بوه: أبويه أبويه.. " و يحطي أيده ع لحيته و يلعب بشعر ويه بوه "
ذياب يبتسم: هاه .. " يطالع عبيد " اطالع عايبنه بو الشباب..
حمدان: أبويه.. الصغيروني إلي في بطن أميه تحـرك اليوم..
ذياب اطالع موزه وهو مستعجب جيف يعني: تحــرك ؟!!؟..
حمدان: و الله والله " يطالع أمه " صح أمايه ..
موزه ما لها نفس: صح حبيبي..
شمه: هيه والله تونيه لحظت بعد أنا " تطالع ذياب " شيطان ع بوه عنلاتك..
ذياب: أيـــه ماليه شغل أنا.. و شوي يحدر عليهم الغرفه مايد وكان محرج صج مفول و موصل حده..
مايد: السلام عليكم " و يطالع البنات " و انتو بأي حق تظهرون بدون ما تحطون الغشوه ع ويهكم هاه..
كل وحده فيهن فاجه حلجها منو يهزبهم مايد لا مش معقوله..
سلطان: هاه بو الشباب علامك انت..
مايد يطالعهن بالأخص شمه: ليش ظاهرات بدون غشوه محد عليه ويوه غيركن شووه؟؟..
عبيد ابتسم: خله خله يهزبهن..
ذياب: الحشم الحشم بويه خلهن وديه ثانيه ما بعيدنها أمسحها فويهي احينه.. " و يحطي أيده ع لحيته "
سلطان يسرح صوب و يقعده: هدي هدي السلم انت احينه لا تحرج..
شمه: زين نحن ما سوينا غلط..
عبيد اطالع شمه أونه اسكتي لا ترمسين .. و مايد اطالعها بغيــض خاطره يقوم لها و يلايمها بطراق و عوشه صاخه هي وخوله ما رمسن بجلمه.. و حدرت عليهن أم خالد و قالت لهن يروحن و شتلن البنات و سرحن البيت و شمه بتموت من الغيض ع مايد جيه يرمسهن جيــه و طبعا موزه روحت وياهن ما تبا تقعد ويا ذياب ما تبا تشوف رقعه ويهه بس ملت منه ملت من كلامه و من حبه و شوقه بس حست إنه هذا كـل بس قول و ما شي فـعل .. و عبيد هب ملاحظ لأنه هايم بحبه و بفكره بمهره و بولده إلي بعده ما نولد.. موزه أصلن ما حبت توضح لعبيد شي من بعد ما شافت المفاجأة إنه يكلم ذياب و ما تبا تخـرب عليهم علاقتهم الحلوه و تباها ترد شرات قبـل و احسن..
طبعا مهره ظهرت قبل عبيد من المستشفى بحكم إنها ما فيها شي بس عبيد قعد يوم ثاني في المستشفى لأنه إيده بعدها و عقب يو ظهر سوت أم خالد عزيمه ع سلامتهم و طبعا عزمت الكـل ع الغــدا و أحمد و عيلته الكريمه طبعا معزومين و وياهم منصور و هله.. و عقب العزيـمه من بعد ما روحو العـرب من بيتهم و شباب عيلتهم إلي قضو فتره العصر كلها في بيتهم.. فرش عبيد حصير في نص الحوي و ياب صوره يوم كان صغيـر و كانت وياه مهره و شمه و كان الجو العـصر مغيـم و بارد و حلو..
عبيد يرمس مهره: ما زيــن عليــج البــرد احدري الصاله " كان يرمسها بهدوء "
مهره: ما عليــك منيه..
شمه فأيدها صوره: هههههههههههههههههههههاي.. و الله تضحك يا عبيد طالعي طالعي كشته..
عبيد فأيده صوره: أشوووف " و يطالع " هذا شوووو من وين يبته هذا الشعر..
شمه: هيه موضه كانت الكشه ذيج أيام..
مهره تضحك بتموت ما تروم تيود عمرها: حراااام عليكم بتجتلوني من الضحك..
عبيد أونه يهازب: مهروووه تضحكيمن ع ريــلج ..
شمه: صبر صبر عبيد.. " و تراوي مهره " تعالي شوفي مهروه وينه عبيد و وينه سلطان؟..
مهره تاخذ الصورة: أشوووف.. " و دققت و شوي اطالعت عبيد وردت اطالعت الصورة " هذا عبيد إلي ع اليمين..
شمه: عبيد قـالج..
مهره: لا هب عبيد قالي بس إنتي قلتي شوفي حوايبهم و شعرهم و شعر سلطان أخف عن شعر عبيد..
شمه: فهمت الدرس..
عبيد: هاتي بشووو " و ياخذ الصورة من مهره إلي قاعده حذاله " وا فضيحتيه فشله.. قعدن شمه و مهره يطالعن الصور و يضحكن على عبيد و سلطان و خـالد..
عبيد: قومن إنتي وياها يبن تلفوني بسرعة..
مهره و هي تقوم: إن شاء الله الغالي..
عبيد طالع شمه إلي كانت جداه و يدزها بريله على ركبها: قومي ودي الصور إنتي الثانية..
شمه: انزين لا ادز.. و قامت وشالت الصور و حدرت الصاله.. و قعد عبيد يمرن أيده يفتحها و يسكرها و هي بعدها فيها الجـبس.. وشوي دخـل عليه سلطان إلي كان مرتبش و فاتح جامه السيارة وهو يدخل السيارة للحوي..
سلطان: عاشووووووووووووو.. يا حي مـــن بيــن ليــه الشووووق.. هيه هيه " و يبس ع جدام و ورا و مرتبش الحبيب " و أنا شراااااتيه صرت مشتااااااااااااااااااااااق.. عااااشوووووووووووووووو.. صوبك اشتااااق.. هيييييييييييييييييييه.. عبيد اطالعه و ابتسم و قعد هو الثاني يهز راسه و مغمض عينه و ايبس وهو قاعد في مكانه..
سلطان يطالع عبيد و يقصر ع المسجله: ههههههههههههههاي بو الشباب قاعد بروووحك..
عبيد يفتن عليه: طوووول عنلات عدووووك طوووول..
سلطان طول ع صوت المسجـل: هييييييييييييييييييييه عاااااااااشووووووووووو.. و لك في الخوافي تتطبع أورااااق .. و يغني ويا حربي.. حاشريـن البقعه ما ضن يرانهم ما سمعوهم..
أم خالد إلي كانت مقيله في الصالة: عنلاتكم قـصـر ع صوت المسـجل.. " سلطان مرتبش هب سامعنها بس عبيد صلب عمره أونه ما سوا شي "
أم خالد تفتن عليه: أيــه سويد الويه قصــر عليه.. سلطوووون عنلات عدووووك..
سلطان انتبه لها يقصر ع المسجل: هاه شو تبيــن..
أم خالد تسولف: قصر عليـه .. هذيـه وين ياراتنا أم زايد داقه تقول اشعندهم هب رايمه تقيل..
عبيد: وين عاده ويــن.. شوي شوي ع البيت من صواريــخج الوالده..
أم خالد تقعد حذاله: الهرم انت ما تستحي " و تطالع سلطان " بند احينه لو قرآن جان ما طولت عليه جيه..
سلطان وهو يبند السيارة: هاه الوالده شو بغيتي " وسار فتح الباب الثاني و شال ملابسه إلي يايبنهم من الدوبي " تبيــن شي و مسجل بندناه..
سلطان: تعال أباك في سالـفه..
سلطان: سونتا سنتووووووووووووووه.. " و تي الخدامه و يعطيها الملابس " وديه الغرفه زيــن .. و سرح صوب أمه و خوه عبيد و قعد حذال أمه.. و في نفس الوقت يتويه صوبهم خالد إلي توه ظاهر من بيته وشكله توه واعي من الرقاد لابس جلابيه بني ويا أبيض و لابس قحفيه ع راسه و يخر ع راس أمه وحبه..
خالد: ربج بخيــر..
أم خالد: بخيـر.. " تكلم سلطان " شفت و عيت خوك..
سلطان: وين عاده اسميج تبالغين احينه وين بيته و وين بيتنا..
خالد: بلا سمعت حس سيارتك عنلاتك..
أم خالد: خلك من هذه السالفه .. الأسبو الياي بيون عرب يخطبون ختكم..
خالد: منوه شموووه؟..
عبيد يبتسم: الساع خرب بيــته..
أم خالد: بسم الله ع بنتي من خراب البيت.. لا هب شمه خوله..
خالد: و منوه العـرب..
أم خالد: و لد بنت خالتي..
خالد: زين شاورتو الشيبه..
أم خالد: من زمـــان مخابرينه بالسالفه..
سلطان: و نحن آخر من يعلم..
أم خالد: و إلي يقول بتستهم.. و شوي تظهر مهره و وياها شمه و يو صوبهم وهم غيرو السالفه..
شمه تقعد حذال خالد: أمايه ما يتي تشوفين صورة عبيد وسلطان يو كانو صغار..
سلطان يطال عبيد: طلعت لهم الفضايح وا فشيلتنا عند مهره..
مهره تبتسم بمستحى: لا عادي..
شمه: بس خالد كان شيخهم و الله إنه هيبه من يوم ما كان صغيــر..
أم خالد: هيه بس سبل ابنا يو كان صغيـر..
شمه: اشصار بعد؟؟؟ خالد ما صدق!!..
أم خالد: ذاك اليوم كان عمره تقريبا 18 17 مادري والله ثانويه عامه كان.. ياي يقوليه أونه يحب بنت مصبح ويبا يتزويها يا هالعرب أسمعو شو يخربط.. أنا عاده أعرف بالسالفه بس أوني استغبيت.. " عبيد ابتسم لهم و اطالع خالد إلي بموت من الضحك و يطالع أمه "
شمه: هيه أمايه..
أم خالد: قلت له شو تبا فالبنيه " و اطالعت عبيد " و أي حد من العرب و خبر عليه و قال ليه إنه يسرح بسيارة بوج صوب بيتهم و ما يسير المدرسه إلا إلين ما يوصلها المدرسه.. و جان اشد عليه و افتن عليه من الزيـن و أهزبه ذيج الهزبه و عطيه من البرديـن و سار لخوه و ضربه كل ضربه بدمها مسكين عبيد حتى سرحناه المستشفى..
خالد بهدوء: و السبايب عبيــد.. عبيد ضحك بصوووت عالي و سلطان الثاني يضحك.. خالد استسخف عمره يوم كان صغير حس إنه كان صج مراهـق و مشاعره مشاعر اعجاب أقل لا أكثــر و ابتسم لهم..
شمه تطالع خالد: هاه حركات بعد يا خالد تحــب هاه و الله خبر عليك حصة..
أم خالد: و لا حد من العـرب يايبين حقهم أتاري ذيج الأيام يلعبون فيه..
مهره: هيه هيه ماريو..
سلطان يضحك: مال أوااااااااااااااااااااااااااااااااااااااااااااااال .. " و عبيد بموت و مهره الثانيه تتكركر "
أم خالد: مادري والله.. و حمد الله يهداه يايبنه حقهم ذيج الأيام كان موضه.. و يلعبون به وشوي اسمع مهازب علام شسالفه ظهرت لهم و إلا شفت كل واحد يضرب الثاني بيجتلون عمارهم من الضرب و موزه مسكينه من بينهم ما تعرف شو تسوي.. و سرحت صوبهم و شليت عنهم اللعبه و فريتها فالزباله.. و سرحت لهم و ضربتهم و غير هالضرب ما يبو غيـرة.. " سلطان منسدح من الضحك.. و خالد مبتسم بس باين عليه إنه بموت من الضحك.. مهره لحظت و شافت هيبته حتى في الضحك "
أم خالد تكمل سالفتها: ما شي حد من العرب زعل سار فوق السطح يقيـل خلاف يا أبوه وسرح صوبه ووداه عزبه الرجاب يراويه بكرته يراضيــه .. " عبيد يصفق و ميت من الضحك ع عمره "
شمه: و الله حركات..
عبيد يعابل عينه: و الله كله من سلطان أنا المفروض ليه اللعبه..
سلطان: انت من غبشه تلعب و محد قالك شي.. ويوم يا دوري يت تناقز تبا تلعب..
أم خالد: صدقه عينه ما يخوزها من التلفزيون " و تعيب عليهم " يبوكم بوكم كفر يوم إنه ياب لكم هذه اللعبه..
شمه تطالع تلفونها: و الله مـشاكــل عيال حمد و الله.. كل واحد له ماضي..
خالد: و الله فــشله..
عبيد يطالع شمه: شموووه اطالع تلفونج..
شمه تطالعه: شو تبابه..
عبيد: مسحتي الصور..
شمه: لا حرام وايــد عايبتني..
سلطان: لا يكووون الصور يوم إنه.. " خالد و أم خالد يرمسووون بروحهم "
مهره ما تعرف شي: شسالفه؟؟..
شمه اطالع صور عبيد و تراوي مهره: شو في ريـــلج يوم كان عزوبي.. مهره تاخذ التلفون و تطالع الصور كان عبيد مصور عمره من تلفون شمه عسب تراوي البنات أيام المغازل و كان لابس فانيله بو علاق و
طبعا هو جسمه معضل و يلعب كمال أجسام كان شكله روعه وهو واقف عجنب من جسمه الحنطاوي.. و في صوره ثانيه هو في السيارة لابس نظاره و و متعصم و شوي من خصل بكلته ظاهره من تحت السفر و شكله جنــان و سماعه الأذن في أذنه.. مهره تخبلت ع الصوووره و اطالعته وهي محرجه.. و في صوره ثانيه هو منسدح ع الشبريه و شعره ع عينــه و كان شكله بيرقد.. مهره اطالعته بعصبيــه.. و عبيد مبتسم ما يبا يقهرها بس هذا كلام أول و شي صار و انتها.. و في صور ثانيه كان ويا سلطان بس سلطان لاف بويهه و هو مستانس و شكـــله في كــل صوره يتغير .. و أكثـــر من عشر صور في التلفون..
عبيد مبتسم: حبي تراه هذا أول هب مال يوميـــن..
سلطان: ياك الموت يا تراك الصـــلاة.. بتخبرك أمس تقول إنه الشرده نص المريله راونيه جيف هي يا الله..
عبيد يطالع مهره: سلطان جـــب.. مهره والله مال أول " يطالع شمه " و إنتي شعنه ما تمسحينها..
شمه: هاه و الله عايبتني ماروم أمسحها خلها عبيــد..
عبيد يطالع التلفون: أنا بمسحها..
مهره: لا لا خلهن..
عبيد رفع حايب: ليـــش بمسحهن و الله حلفت أنا..
مهره: خلهن و شموه أدريبها ما بتراوي ربعها الصور..
شمه: فديـــتج أحبــج..
عبيد مبتسم ببتسامه أمبونها حلوه: أم حمد هب معصبه؟..
مهره منزله عينها مستحيه من سلطان: لا هب معصبه..
سلطان: عاااااااااشو الرقيقات..
أم خالد تظرب سلطان ع جتفه: و انت شعنه ما تسير تخطبها..
سلطان تروووع: شووو أمايه روعتيني..
أم خالد: عوشه بنت عمــك بخطبونها و انت قاعد..
سلطان : منووووه عوشه؟؟..
شمه: أمايه عوشه انخطبت..
أم خالد: إلا ما نخطبت بس اتخير له البنـــات..
سلطان: و زيــن بخطبوها خلهم يخطبونها نصيب وياها..
أم خالد: و انت إن شاء الله متى بتتزوج هب دايمه لك أنا ..
سلطان يلوي ع أمه: الله يخليـــج ليه يا الغاليه..
أم خالد: بس أنا شبعت من هذه الرمسه إلي ما من وراها فايده..
خالد: و البيت و خلــص ما بقى عليه إلا الأثاث و شتبا بعد..
سلطان: تعال البيت " يطالع عبيد " اشرايك نسرح نختار لنا الأثاث..
عبيد: ع الأقـل انت تعرف له أما أنا و الله ما عرف شي بذوق.. " يطالع خالد " شرايك..
خالد: خوفاتي ما يعيبك..
أم خالد: و يديــه شعنه تشاورن خوك عسب يتخير لك الأثاث .. هذيـه هاه مهره تراها تعرف لهذه الأشياء و إلا ما تعرفيــن؟..
شمه: لا أمايه تعرف بنسرح أنا وياها.. ونااااااااااااااسه.. " و أذن الأذان "
عبيد: الله وكبر و عظم كل من طغى و تجبر.. الله يعيني ع ذوووق شموووه.. و سرحو الشباب المسيد و دخلن البنات يصلن و عقب الصلاة أم خالد قاعده في الصالة تطالع التلفزين و جدامها الفواله و حدر عليها سلطان..
سلطان: سلام عليكم..
أم خالد: و عليكم السلام.. تعال انت تعال..
سلطان أي صوب أمه: هلا..
أم خالد: ايلس إنزين بخابرك بسالفه..
سلطان يقعد صوب أمه و ياكل رطب: و هاه قولي..
أم خالد: انت شعنه ما تخطب؟ في وحده فبالك؟..
سلطان ابتسم تذكر شمسه إلي انخطبت: لاء " و كان ياكل الرطب "
أم خالد تصب القهوه: زين يوم إنه محد فبالك شعنه ما تاخذ عوشه بنت عمـك تراها حشيمه و مرحبانيه..
سلطان: أدري أدري.. بس خوفاتي ما تباني..
أم خالد: ويديــه شعنه ما تباك؟؟... فديــتك شيخ من حلاتك إلي يشوفك اول مره يقول ولد شيخ..
سلطان ضحك: و الله أمايه تبالغين عنبوه ملك جمال..
أم خالد: ويديـه ولدي لازم أتمدح فيــك.. هاه اشقلــت..
سلطان: زيــن إنتي احينه لا تسوين شي زين أنا بفكــر عقب ما يخطبون خوله أنا روحي بنفسي بي و بقولج سيري و خطبيــلي عوشه ما با غيــرها تراه..
أم خالد استاااااانست: يا الله يا إني متآآآآآنسه من سمعت رمستك فديــتك.. تراه الزواج ستره لريــال..
سلطان: إنزيــن إنزيــن فهمنا " و يمد و ياكل له رطب "
أم خالد: كـل فديتك.. تراه البيدار ما اييب رطب من زيــن.. روح الأولاني عنلاته لو ما سواته جان المزرعه بخيـر و عافيــه..
في بيت ذيـــاب..
:: باتت عيوني عيوني حيل تذرف ليل و نهار و نهار و بين بشوق من علتي علتي و الجسم يرجف في داخلي داخلي و تزاحم الخوف.. ::

موزه قاعد في الصالة و حمدان سار ويا بوها المزرعه و يا سارة بنت خوها و حمد قعد عندها لأنه كان راقد.. احينه المغرب و ملانه تبا تسير بيت هلها بس هب محصله حد عبيد غالق تلفون و خالد و سلطان ما يشيلون التلفون.. و قعد تطالع التلفزيون مع حمد إلين خلاف و بدق لهم علو و عسى حد يرد.. ما تبا تتصل بذياب على إلي سواه فيها يا كــثر ما سوا و سامحته خصوصا الخيانه العوده يوم خذ هند بدون شورها ما تبا تسمع عنه شي تبا تعيش و يا عيالها تبا تربيهم بروحها تبا بالها يرتاح ما تبا تسمع عن ذياب شي.. صح إنها زعلتها خفيفه و ما ترزا بس هي امبونها طوفته حقه.. بس مع إنه هذه المره ظلمت ذياب لأنه كان صج مشغول.. دخل ذياب الصاله و امبونه حس التلفزيون عالي بحيث إنه موزه ما انتبهت له و ع حس كندورته..
ذياب: السلام عليكم..
موزه سمعت حسه حرجت: و عليــكم السلام.. شلت بعمرها بثقل..
ذياب: وين بتسيرين؟..
موزه اطالعته شافت فـ عيونه التعب و شكله صج هب راقــد و تعبان بالحــل كسر خاطرها بس إلين متى بظل تسامحه ما تقدر ما تقدر تسامحه إلي سواه فيها هب شويه وايد سكتت عنه ما قالت له شي يوم خذ عليها ثانيه ما عاتبته لو وحده غيرها جان تطلقت من زمان و لا قعدت عنده و لا لحظه إنذلت له هب عسب شي بس عسب عيالها إلي مالهم ذنب كله بس عسب خاطرهم و لا لو السالفه عليها جان ما قعدت عنده..
ذياب معقد حوايبه: وين بتسيريــن؟..
موزه بعصبيه: ما بسيــر مكان بروح حجرتي.. " و اطالعت فوق و نزلت بكلتها ع يبهتها "
ذياب يتكلم بجد خلاص ذياب موزه زعلانه منه وهو عيز من كثر ما يراضيها: موزه أبا أرمس وياج..
موزه بعصبيه: ما عندي لك رمسه و بعدين ما من بيني و بينك رمسه.. سير عندها بتسمعك صدقني..
ذياب حرج: ما يصير جيه كل ما ييتج تتشكيــن.. مووووووووووووزه الله يخليــج أنا هب فايــج و الله تعبت بس خلاص تعبــت من هـ العيشه إلي.........
موزه تقاطعه: هب انت إلي تعبت أنا إلي تعبت منك و من سواياك والله ما بمن عليك لو وحده غيري جان تطلقت منك من زمان على العيشه إلي عايشتنها بس أنا صبرت هب عشانك عشان عيالي إلي مالهم حد غيري و انت بزووور تسال عنهم..
ذياب عصب و صرخ بويهها: مووووزه أنا عيالي ما قصرت فيــهم..
موزه أيدها ع خصرها: لا تصرخ أنا هب أصغر عيالك " و بنبره تحذير " تفهم و إذا هب عايبتنك الرمسه اجلب و يهك و ظهر..
ذياب يتجدم لها: مــوزه إنتي اشفيـــج؟؟؟؟؟؟؟!!!
موزه و معصبه و تتكلم بصوت عالي بحيث إنه حمد قعد يطالعها و فاتح عينه: بس خلاص مليــت مليـــت يا ذياب مليــت .. تبا تي البيت ع كيفك بس لا تتريا مني أي معامله حلوه و إذا أصريت أنا فبيت هلي..
ذياب كان يشوف موزه و يسمع كلامها هب مصدق هذه هب موزه و كلامها غيــر الطيبه الحنونه الرقيقه تنجلب جيه..
موزه: خذ راحـــتك بس أكثر من هذه المعامل ما بتحـــصل.. عن أذنك.. و تخطته بس هو ما خلها ها يود أيدها.
موزه تطالعه من طرف عينها: خوز أيدك احسن لك..
ذياب وهو تعباااااااااان حيــل و هب فايج لشي: موزه أحبــج لا تخليــني..
موزه بصد: ذياب خوز أيدك قلت لك خوزه أيدك.. لازم يكون في حد لهذا الموضوع..
ذياب: و أنا أنا يا موزه " يأشر ع عمره " ليه حق عليــج بما إنج حرمتي..
موزه: حــــق!؟! بس هذا إلي هامنك الحق إلي عليك و أنا يا ذياب أنا " تأشر ع عمرها " مشاعري احساسي ما يهمك معلوم صارت ما تهمك.. خذت و حده من وراي و ورا هلـك و لا استحيت و لا خيلت بعد عنبوك أنا قاعده عندك ليل و نهاره و لك عين بعد تحط عينك بعيني.. انت لا تتخيل أنا ساكته عنك لشي لا انت تعرف ليش أنا ساكته بس هذا السكوت ما راح يدوم.. و بي يوم بنتدم على إلي سويته يا ذياب..
ذياب و أيده على جتفها: موووزه لا تقوليــن هذا الكلام العالم الله إني أموووت فيج و أحبج أكثر من أول أنا ما أحبــــج أنامغـــرم فيـــج والله مغـــرم..
موزه خلاص قلبها نزف من إلي تسمعه أول مره ذياب يقول لها مغرم.. بس ملامحها قست صارت شروات الصخـر: حبيتك و لا زلت أحــبك بس كرامتي فوووووووووووووق كل شي يا ذياب فوووق كل شي .. و سارت عنه و كانت الدموع ما زره عينها ما تبا تصيــحه ما تبا تنزل دمعه من عينه يودت عمرها و هي تركب الدري .. أما ذياب تقطع قلبه شو نهايه عذابه شو نهايه هذه العيــشه إلي هو عايشها.. اطالع حمد و سار و قعد حذاله و حمد قعد يطالع أبوه إلي ويهه كاسنه الحــزن وهو هب فاهم السالفه..

مر هذا الأسبوع بحلاوته و يا عبيد و مهره و مسكيييينه مهره عبيد هب مخلنها تروح مكان أو إنها تمشي حتى الجامعه منعها تسيرها.. وايد وايد يداريها و يحط باله عليها و إلي تباه ايبه لها و الكل لحظ في البيت.. و خوله كل ما تشوفهم تبتسم و يمكن جيه خطيبها يسوي حقها و الأسبوع إلي عقبه بتنخطب له رسمي ... أما موزه فكانت تعيش حياتها عاديه و كانت تلهي عمرها بدوامها و تربيه عيالها عن ذياب حتى يوم إنه أي البيت كلامهم خفيف و ما تظهر له وايــد.. و هند لحظت إنه ذياب وايد تعبان في الفترة الأخيــرة و صاير عصبي عليها بس سكتت بتشوف شو نهاية هذا العذاب..

الإسبوع إلي عقبه يوم الأثنيـن.. خطبه خوله و الكل في البيت مرتبش أي البيت العيله بكبرها مرتبشه و كانت خطبه عاديه هله و هلها لأنها خطبه.. و البنات في غرفه شمه لأنها اطلع ع حوي البيت و شموه لازقه ع الدريشه تطالع شباب عيلتهم..

و كانن البنات لابسين مخور عادي لأنه خطبه عاديه.. شمه و مهره لابسات شرات الشي مخور عنابي ويا أسـود و محطيــن آي شدو ع نفس لون الكندوره يعني عنابي ويا الأسود ألوان مداخله عبعضها و شكـــلهن رووووعه و مطلعين قصصهن من تحت الشيله .. أما العروس خوله فكانت لابسه مخور لونه سماوي ويا وردي مدرج الألوان و محطيه آي شدو نفس لون الكندور و جلوس و ردي و شكلها روووووووووووعه و فاله شعرها إلي يو صلها لنص ظهرها و مسويه فيه فـير..
موزه وهي شاله حمد و تحدر عليهن الغرفه: يا الله بســكن تعالن امايه تقول سلمن ع الحريــم " تطالع خوله " باربي انزلي تراه أم المعرس تحت.. " موزه كانت لابسه بعد مخور لون بيج ويا وردي و معاه بني و محطيه ميك آب خفيف صحراوي و شكلها فــن و غير جيه بطنها بارز و و رافعه شعرها بماسك بطريقــه حلوه و نعوميـه بحيث إنه نازل بطريقه رقيقه..
خوله وهي محرجه: بس إنزيــن بدينا عاده..
موزه تضحك: يا الله زيــن أمايه تقول..
خوله تطالع شمه: شموووه يا الخايسه لاحقه لاحقه ع هذا " و تأشر ع الدريشه "
شمه تأشر بأيدها: صبريييييييييي..
خوله: شموه لحقي عختج و الله بموووت..
موزه تلعب بخاتمها إي فأيدها: عنبوووه و إلي يقول بعرس بــج تعالن يا الله بشوف.. و حدرت عنهن و عقبها حدرن وراها و الكــل قاعد عوشه و العنود ختها و المها و عيال خالهم و خالاتهم و أهــل المعــرس إلي أمبونهم يعرفوونهم من قبــل..
موزه قاعده حذال العنود: طاعي طاعي خولوه..
العنود: بتمووت مسكيــنه..
رويـه: أيــه عن الغلط تراها حرمه خويه..
موزه تطالع خوله و تضحك:ها الله ها الله فيها " و تلعب بحوايبها.. خوله انتبهت عليها بس ما سوت سالفه بتموت من موزه من الصبح حاطه عليـها "

برا عند الشباب ربــشه و حركات ع حميــد إلي كان المعـرس..
عبيد وهو يعابل أيده: و الله لو دريت إنك المعرس جان صكيت باب الدروازه..
حميد مستحي اليوم خطبته: و هذا و نحن بنصيـر نسايب..
عبيد: معلوووووم.. " و شوي يطالع تلفونه و كان داق حقه ذياب " مرحبا محيا بو حمدان و را ما تحدر عدنا؟ هاه و إلا شي شاغلنــك..
ذياب: خسك الله عنلات صداك اظهرلي أنا خاري عند الدروازه..
عبيد: أدله البيت و احـدر بشو يلا ارقبك.. بعد من الواحد للعـشرة.. و سكر عنه التلفون.. حدر ذياب و سلم ع الشباب إلي برع مسوين لهم خميه صغيرة اطل عباب الميالس من برع و حدر الحوي و سلم بعد الشباب إلي في الحوي قاعدين عند المنامه و عقبها حدر الميـلس.. و وايه العـرب و الشواب و عقبها سار صوب حبيب عمـره عبيـد..
ذياب يدقه خشم: هلا و الله..
عبيد وهو واقف: مرحبــا فيـك أقـرب.. و شكل عبيد فــن كندوره ختم بيـضه و غتره بيضه و نعال عزكم الله بعد بيضه و الدهن عود كلعاده و الدخون يفوح منه.. و ذياب بعد هو الثاني مطقم وياه في اللبـس و حتى السباحه إلي فأيده شرات عبيد و قعدو الحبايب يرمسون و عادت المياه إلا مجاريـها.. اطالع أبو خالد المنظر ابتسم من الخـاطر ما تحرا إنه العلاقه بين عبيد و ذياب بتعود ما ترزا الدنيا نزعل ع أسباب تافهه يوم رب العباد غفور رحيـم فليش بني آدم ما يكون غفور رحيــم..
خالد وهو قاعد حذال ذياب: هاه بو حمدان شو مسوي..
ذياب يطالع: و الله الحمد الله يسرك حالي..
يا سلطان من برع و سلم ع ذياب: هاه علوووومه..
عبيد: هو بخيـر لكن نسيبك ضاربنه حفوز..
سلطان يطالع حميد: أسميــك أسميــك " و يهز له راسه و يبتسم بخبث و يلعب بحوايبه "
حميد: و الله الواحد وده يعرس يعيش حياته بس ربعه ما يحفزو..
سلطان: ما عليـه بنضري ع الضروه..
ذياب: وينه عيل سهيـل ما ريـته عيل برع..
سلطان: قاعد يسولف عند المنامه و يا الشباب يبا ايول الحبيب.. ما تسمع الحشره برع " و يأشر ع باب الميلس إلي يطلع ع فريـجهم " قوم ظهرنا تراه قاعد أيـول " و يطالع صوب باب الميلس " عاااااش حمـــد العامري " كانت غنيه الله عطانا "

طبعا خلصو و اتفقو ع كـل شي و بتكون الملـجه عقب شهـر لأنه خوله موصيتهم ما تبا تستعيـل فشي.. و حميد مسكين من كثر ما هم و اصفيـن خوله يبا يشوفها يبا يشوف حرمته جيف هيه.. و خبر عبيد و عبيد ما قصر به و هو من حقه و سار و حدر عند الحرمات في الصالة.. بس شكله محد عاطنه فيس و دق ع تلفون البيت.. و من حظه شالته مهره..
عبيد: ألوه..
مهره: مرحبـا..
عبيد: لا أموووت .. فديـت نصخـج حبيبتي.. زين يوم شليتيه..
مهره كل ما يرمس عبيد تحس بشعور ثاني: أهليـن الغالي..
عبيد: تعالي تعالي أنا عند باب الصالة..
مهره: إن شاء الله.. و سارت له و كان بين الصالة و باب الصالة ممر و قبل الممر عامود عبيد هناكي واقف.
مهره وهي تعدل شيلتها و ادخـل قصتها: ها بو حمد اشتبا..
عبيد اطالعها فتح عينه: شو مسويه بعـــمرج إنتي..
مهره انفجعت لا يكون هب حلوه: ليــش؟!!!!!!!..
عبيد بدلع: تبين تجتلين تبين تجتليني " و يقولها بسرعة "
مهره ابتسمت: ليش حبيبي؟..
عبيد: شو مسويه بعمـرج أذوب أنا يوم أشوفج جيه..
مهره استحت: عبيد بس عاده..
عبيد: زين مهروه أوووه خوله وينها قدها الساعة 11 و ربع و الريال يبا يشوفها متوله..
مهره: قالت لكم ما تبا تشوفه.. و هو من وين شافها عسب يتوله..
عبيد: هب بكيفها تكسر كلمتيا.. و بعديـن من حقه يا خي..
مهره: زيـن أنا بخبرها..
عبيد: زين قوليلها تي و إنتي حدري القسم بشووف..
مهره: ليش؟؟..
عبيد: بس من الرمسه الزايـده و بعدين إنتي حرمه ما بين روحيـن لا اتعبين عمـرج..
مهره تتجدم له و تضربه بخفيف ع صدره: لا تخاف أداري ع عمري..
عبيد: يوم بطيحين أنا ما ليه خص سويت إلي عليه..
مهره ذايبه فسحر عيونه: إنزيـن.. أنا احينه بسير ازقرها لـك.. و بقعد عند البنيات عيب عقب يقولون شوفو حرمه عبيد ما تستحي خلتنا و قعدت في قسمها.. بعدين الرمسه لك هب ليه..
عبيد: أسميــج.. مكاره وحده ما تنغلبين.. زين احينه سيري زقريها و قعدي عند البنات حشي و قرضي فالوادم و ظهر عنها..

مهره ضحكت عليـه قالها بغيـض بس شو تسوي.. سارت لخوله و قالت لها عارضت الحبيبه ما تبا تشوفه من الله بزور موافقه بعد تقعد عنده.. بس شمه في المرصاد و قالت لها تسير و تشوف جيف شكله عسب عقب في الملجه ما تنصديم فيه يطلع متين قصير طويل أبيض أسمر و تتوهق به عقـب.. اقتنعت خوله و قامت و اتصلن فعبيد إلي انبونه هو و حميد قاعدين في ميلس الرياييل إلي عند باب الصالة ونش عبيد عسب أيبها و كانت وياها مهره..
خوله: لا تسيرين خلج ويايه..
مهره: تخبلتي إنتي؟.. تبين عبيد يجتلنيه لا بويه من اي يا خذج امبوني بسير عنج..
خوله: ما تنفعين لا إنتي و لا ريـلج..
شمه من ورا مهره: لا تنزلين عينج عاده اطالعيه زيـن..
خوله و قلبها كل قرقعه: و الله مستفيـجه.. زولي من ويهي ما ادانيــكم كلكم.. سيرن زبنن عند بنات عمكن..
عبيد وهو ظاهر لهم أونه محرج: هاه علام اشها الحشره كلها.. " و اطالع مهره و بصوت خفيف " فديتج..
شمه ادز مهره لأنها انتبهت لها: طوفي بس عاده من هالمغازل عنبوووكم ما تشبعون.. و سارن عنهم..
عبيد يطالع شمه: شوي شوي عليها لا اذبحج" شمه اشرته له أوكيـه "
خوله متروعه: عبيد الله يخليـك لا تخلنيه بروحيه الله يخليـك.. " بسرعه بسرعه تقول رمستها "
عبيد ابتسم: عيل هو يبا يقعد وياج بروحكم..
خوله: بن عروه عيل ما بحدر خله يخيس..
عبيد بهدوء: خوله ما بسويبج شي بيرمس وياج تعارف بسيط..
خوله تيود أيده و بتوسل: الله يخليييييك دخيييييييلك يا عبيد اقعد وياينا دخيـلك..
عبيد كسرت خاطره خته و هز راسه و حدرو الميـلس و كان الجو بارد و هادي و حميد منزل راسه و يهز ريله متوتره يبا يشوفها و يحطي ألف صوره في باله و جيف هي و صفاتها هب عارف مرتبش الحبيب.. و تحم حم عبيد و حدر الميـلس و خوله بتموت كانت بترد بس خلاص احينه حدرت ما تقدر و نزلت عينها.. حميد من تحم حم عبيد اطالع صوبه و جلب نظره لخوله غمض عينه كانت بسيطه في الجمال و ناعمه في مشيتها منزله راسها و باين عليها المستحى حميد أول شي يا في باله " الحمد الله لـك يا رب " قام من مكانه و قعد يطالعها و هي تتقرب منه و كانت ورا عبيد تحاول إنها تطالع بس ما فيها جرأه.. عبيد و خوله سارو و قعدو جدا حميد يفصل بينهم طاولتيـن صغار.. و حميد بعده واقف يرقب عبيد يظهر..
عبيد يطالع حميد: ها يا حميد هذه خوله.. " يطالع خوله " خولوه هذا حميد.. خوله رفعت راسها بس ما شافته.. حميد يطالع عبيد "بلاه هذا علامه ما يطلع "
عبيد مبتسم: علامك جنه إلا في خاطرك ترمــس..
حميد يتنبه له: هاه لا.. عبيد يبا يضحك ع شكالهم و متحسف في نفس الوقت لأنه ما مر بهذه التجربه يوم إنه خـطب مهره..
عبيد يقعـد و حميد يطالعه بنظرات: هب ظاهر أوامر الحرمه.. " و خوله قعدت صوبه لازقه فيه "
حميد قعد ابتسم بحسره: هاه لا عادي.. " و اطالع خوله " شحـالــج..
خوله بإندفاع: بخيــر.. " عبيد اطالعها بدفاشـه و ضحك في ويهها و ضحكه صغيره و اطالع حميد "
حميد يأشر لعبيد براسه إنه يروح عنهم.. و عبيد يرد له نفس الحركه بلاء و يأشر ع خوله.. حميد يأشر أونه خلها تولي عنك اظهر انت.. عبيد يهزر راسه يبا يقهر حميد "
حميد حاس بوزه ورضف غتره: عساج طيبـه..
خوله: طيبه طاب حالك و منصوبك..
حميد ابتسم أخيرا رمست رمسه كامله و عيبته بعد في الرد: و الله بخيـر وسهـاله ما نشكي باس.. و هني قام عبيد بسرعة عنهم و سرح حذال باب الصالة أونه يرمس بتلفون بس بغيب عنهم 4 دقايق.. و كانت الأربع دقايق مثل الأرب قرون بنسبه لخوله..
حميد: زيـن ما تبين تشوفيني ع الأقـل رفعي عينج و أنا بنزل عيني عسب ما تنحرجين..
خوله رفعت عينه ببطئ وهو نزل عينه أول ما طاحت عينه عليـه تذكـرته على طول " هذا الريال إلي شفته في العيد و إلي شفته في المستشفى معقووول فديـــتك ربي" و قعدت ادقق فيه و تتأمله كم هي تمنته " أويـــه كنت برفضه الحمد الله لك يا رب الحمد الله انك سقته ليه " حميد حس إنها طولت و بعدها تطالعه وهو يبا يشوف عيونها و بسرعة رفع عينه صوبها و و تلاقت العيون في هذا الوقت.. سرح حميد في سحر عيونها إلي غايصه بسحر الكحل و جنها من سواد الليـل.. و هي بعد ما قصرت تمت معلقه عينها بعينه إلين حدر عليهم عبيد يطالعهم..
عبيد: أحم أحم.. ترانا حدرنا الميلس.. خوله و حمد اطالعوه و خوله على طول نزلت عينها..
حميد: و الله نحن ما سوينا شي غلط جداك بعد هب من وراك..
خول في هذا الوقت قامت من مكانها بس قلبها رقيـص هب راضي يوقف و تحس إنه الدنيا حاره مع إنه المكيف مشتغـل و برد.. ما تدري تحس بالحر و البرد في نفس الوقت..
خوله تطالع عبيد: عن أذنكم تصبحون على خير.. و لا سوت لهم سالفه ظهرت و تحس إنها رابع أميال و على طول حدرت غرفتها و قعدت فيها تاخذ نفس و تطالع من حوله.
خوله و تحطي أيدها ع ويهها: معقوووله كنت ما بوافق عليه معقووووله.. هئئئئئئئ لا لالالالا ما أتخيـل الحمد الله الحمد الله أبيـــه شو بسوي " و شكلها قافط المسكينه لو لا المكياج جان بين عليها " أويــه شو سويت احينه بقول شو ها الياهــل " مسكينه ترمس عمرها و تبتسم في نفس الوقت "
أما في الميـلس حميد محـرج..
حميد: كله منـك عنلات عدوك..
عبيد: يلا يلا يلا بسك عنبوووك ما سدتك الدقيقتين؟.. بتجابلها طول العمر حتى بتلوع جبدك..
حميد صج من الخاطر محرج: و الله ما رمست وياها زين..
عبيد يقعد جداه: ترا انت وايد ماخذ ع عمرك مقلب.. المفروض تشكرني..
حميد بستهزاء: هيه ليــش؟؟..
عبيد: اصلن هي موصيتنا و قالت لنا إنها ما تبا تشوفك بس انا إلي غصبتها..
حميد: زين مشكور ما تقـصر ع الخدمه.. ممكن خدمه ثانيه..
عبيد: اطلب يا النسيب..
حميد: أبا رقمها..
عبيد محرج: بن عروه أعطيـك رقمها..
حميد: ليش عاده؟؟..
عبيد: ما عدنا بنات يرمسن رياييلهن إلا عقب العـرس في الملجه بعد بزور..
حميد متفاجأ: شوووووووووووه؟؟.. عبود والله لا ألايمك بطراق " و يأشر بأيده "
عبيد يرجع ظهره ع ورا مستفيـج: قلت لــك.. حميد نفخ بعمره عبيد دوم يغايضبه عكـس سلطان حبوب و مرحبــاني و كل شي أي عنده بتفاهـــم..