الجـــزء [14[
......................................
في أول أيام عيد الفـطر حمدان قاعد بملابسه الداخلية يرقب الخدامه تيب حقه كندورته..
حمدان وهو قاعد على الغنفه: أميه وينها الخدامه بموت من البرد..
موزه وهي اظهر ملابس حق حمد: احينه بتي اسكت عن يوعي خوك..
حمدان: أمااااااااااااااااه برداااان بسرعااااه..
موزه: زين احينه بتي صبر.. وشوي و تي البشكارة وهي شايله كندورتين ككاويات وحطتهن عند الغنفه وين قاعد حمدان .. بس موزه سمعت حمد يصيح وسارت له..
موزه: فدييييتك حبيبي و عيييت و عييييت " حمد يباغم بصوت عالي موزه وهي تشيله " بس حبيبي بس تعال اليوم بتسير عند يديه حمد منوه بسير له هاه.. قام حمد و هو متحلق مودنه سلطان البارح و شكله طالع فـن بس عاده يصيــح و قاعد من الرقاد ..
حمدان: أمااااايه يا الله ..
موزه: انزين صبر سير بند المكيف و تعال سير.. حمدان سار يبند المكيف بس في هذه اللحظه دقت حق موزه ربيعتها مريم و قعدت تكلمها و حمدان مسكين حاله متململ في مكانه و موزه اطالعته كسر خاطرها و بندت عن ربيعتها و سارت لبسته كندورته وظهر كشششششششخه بس الشعر شويه معتفس وسارت له ويابت المشط و سحيت شعره و نزلته له وشوي رن تلفونها وإلي داقه حقها شمسه ربيعتها وقعدت ترمس وياها و حمدان وقف عند التسريحه و يطالع عمره و كل شوي يعدل شعره .. حمد اطالع خوه واطالع كندورته إلا يلبس شراتها وسار عند أمه..
حمد: ماماه أمدان ماماه أمدان..
موزه: هيه .. لحظه لحظه .. شو شوتبا ..
حمد يأشر بصبوعه الصغيره: أمدان..
موزه ابتسمت: زين انت سير اقعد و أنا بيك صبر زين..
شمسه: بلاه حمد الدلوع..
موزه: حرام عليـج..
شمسه: بلاه؟؟..
موزه: يبا شرات حمدان تراه لابس كندوره " الختم " ككاويه و يبا عاده يلبس احينه..
شمسه: و الله خقاقه و مخققه بعيالج إنتي هذيلا وين و الختم وين..
موزه: و الله كيفنا بندلعهم أبوهم يدلعهم..
شمسه: عاش ذياب ..
موزه: تعالي إنتي وافقتي على إلي خطبج..
شمسه تذكرت السالفه حاست بوزها: موزه الله يخليج لا تذكريني بالسالفه..
موزه: إنتي وافقتي ..
شمسه: شسوي يا موزه والله لو بيدي جان علوم..
موزه: لو خطبج سلطان احينه بتوافقين عليه..
شمسه: بس أبويه قرب بالريال و هله..
موزه: يعني ماشي أمــل..
شمسه: و الله ياريــت ..بس ليش ما يحاول يمكن يلقى نصيب..
موزه: شمسوه إنتي تعرفين سلطان زين ما يحب سالفه الرفض هذه و إذا هو واثق من الموافقه جان تقدم لـج
شمسه: و الله ما عرف شو أقولج.. بس والله أحب سلطــان والله..
موزه: زين عيل بخليـج أنا احينه بشوف حمد وين سار ما دريبه وين.. فداعه الله .. و بندت موزه عن شمسه وسارت لحمد شافته ميود كندورته يبا يلبسها موزه ماتت عليه من الضحك و شكله يلبس الكندوره ..
موزه تسير له: هات انت هاتها ما تروم لها .. وشالت عنه الكندوره و اتفاجأ إنها هب موجوده فـ أيده شسالفه اطالع فوقه شاف أمه ابتسم لها.. موزه نزلت لها وباسته على خده..
موزه: تعال يا الله بسرعة اسبــح.. و دخلته الحمام و عقب خمس دقايق ظهرت هي وياه و على جسمه الفوطه
موزه تلبسه الفانيله: تعال البس.. ولبسته و يوم خلصت شالت الكندوره و لبستها له و هو استانس و يابت العطـر و عطرته تحت أذنه و نزلته تحت يقعد ويا حمدان إلي قاعد يطالع تلفزيون وهي سارت تسبح عسب بروحون يسلمون على هلها..
...............................................
في شقه ذياب..
ذياب توه ياي من الصلاة العيد: هندوووووووووه هندوووه.. " كان كاشخ و خطيييير لابس كندوره بيضه و غتره بيضه و ريحه العطر اصك الراس من حلاتها و شكله فـــــــــــــــــــــــن و مسوي سكسوكه"
هند و هي تظهر له: هلا..
ذياب يبتسم: هلا يااااااااااااااااات .. كل عام و إنتي بخيــر حبيبي..
هند تسير صوبه: و انت بخير و صحه وعافيه " وباسته على خده "
ذياب بصوت مبحوح: استحي .. "هند استحت و نزلت راسها" اسولف ويــاج الغلا يا الله خلصتي؟..
هند: هيه صبر بلبس وبيك .. " سارت هند لبست و خلصت لبست جلابيه من اليشمك لونها أبيض مع نقوش بخيوط ذهبيه و شكلها روعه و خطت عينها بكحل و ظهرت فيه كششششخه "
هند: يا الله الغلا روحنا ..
ذياب قام من مكانه: محلوووووووووووه يا الله " ابتسم لها "
.................................................
عند موزه توهم داخلين بيتها عبيد وسلطان و مطقمين في اللبس و طالعيــن كوبي يتشابهون صج يوم قالو عنهم توأم و لا ليته حد يفرق من بينهم محد حتى أمهم ما تقدر .. لا بسين هم الثانيين كنادير بيض و غتره بيضه و مسوين ترابي في ويههم .. حتى حمد و حمدان ما عرفو منو خالهم سلطان و عبيد ما قدر يفرقون ..
حمدان: خاليه أثنينه ..
سلطان ضحك عليهم: في العيد محد يعرفنا أنا و انت..
عبيد: شوف شوف جيف يطالعونا.. بويه حمدان انا خاليه عبيد و هذا خاليه سلطان زين حبيبي ..
سلطان: بعوره راسه مسكيـن.. سار وشال حمدان و قعده على حيره و قعد يسولف وياه ..
عبيد: حمد تعالي " حمد قاعد ما يضحك و لا تعبير في ويهه غير إنه محرج" بلاه جيه مويم تعال أقولك ..
حمد لا بسنهم طاف طاف اطالع التلفزيون و سار له عبيد و شاله بس حمد قعد يصيح بصوت عالي بحيث إنه موزه سمعته ويات تفزع تتحرا طاح صار له شي ..
نزلت موزه و هي لابسه مخوره سماوي ويا أبيض و فن شكلها بالمخور و شعرها مفلول: علامه حمد علامه..
سلطان: دلوووع ولدج هذا لو ولدي من زمان جاتلنه..
موزه وهي تطالعهم ما عرفت منو يرمس: انت مالك شغل زيـن " وطالعت عبيد " نزله انت ما تعرفه إنه ما يقهر حد ..
عبيد: لا ما عـرف.. و حمد يصيح ويمد أيده لمه .. موزه سارت له و شالته..
عبيد: وين ترومين له هذا و إنتي ما بين روحين..
موزه: شسويلك يوم صيحته..
عبيد يبوس راسها: المهم كل عام و إنتي بخيــر My sis ..
موزه عرفته لأنه عبيد دايم يزقرها جذا: و انت بخير و صح و سهاله قربو قربو ..
سلطان: كل سنه و إنتي طيبه..
موزه: و انت طيب سلطان اقربو تعالو ..
سلطان: إنتي وين يا ختيه من مساع نرقبج .. احينه لو يايبين تلفوناتنا جان خالد من مساع هازبنا..
عبيد: هيه والله ..
موزه: دوم تسون هذه الحركه فيه مسكين فقير عنكم خالد..
عبيد: والله عاده ما قلناله يكون البــجر.. و قعد صوب الفواله عسب يتفولو..
سلطان يطالع حمد: مالت عليك تعال بشوف.. " حمد رجع عمره على ورا سدح راسه على صدر أمه "
موزه: شو تبابه انت احينه.. " حمدان يضحك عليهم "
عبيد سار له: تضحك هاه تضحك .. وشاله و قعد يلعب وياه و حمدان ميت من الضحك و حمد يطالهم ..
عبيد: ما نباك لا تطالعهنا فاهــم..
موزه: أوه بسير بيب لــكم الجاي و القهوه..
سلطان: يلسي ما نبا لا جاي و لا قهوه استريحي ..
عبيد يطالعه وهو ياكل همبا: انت مالك شغـل " يطالع موزه" سيري حبيبتي هاتيلنا القهوه سيري.. موزه ابتسمت له وقامت عسب تيب حقه القهوه..
سلطان محرج: انت أيــه حرام عليك انت ما تشوفها ما تروم تشيل عمرها..
عبيد: في الحركه بركه " يطالع حمد " مالت عليــك..
سلطان يطالع حمد: أمرررررررررره ذياب محطاي كوبي عن بوه..
عبيد: خسك ما لقيت تيب هـ الطاري إلا احينه..
.......................................
في بيت بو خالد
خالد إلي كان لابس كندوره بيضه و غتره بيضه هو بعد الثاني ما ناقصه شي عسب ما يكشخ في العيد دخل الصالة وهو محرج يدور على عبيد و سلطان..
خالد: وينهم عيالج و الله و لا واحد منهم يوجب عنبوهم ما يستحون..
أم خالد: انزين انت بلاك محرج صبر يمكن سارو يسلمون على ربعهم..
خالد محرج: ما يرومون يصبرون بلحقون عليهم ..
حصة وهي يايه من برع: زين انت لا ترفع ضغطك..
خالد يطالعها و يرضف غترته على فوق: أبويه كل شويه يسال عنهم شسوي أنا فيهم..
أم خالد: سير انت احينه لا ترفع ضغطك أنا احينه بدق حقهم..
خالد: أونه بدق حقهم هو لو واحد منهم شايل تلفونه جان زيـن .. و لا واحد يرد تلاقين تلفوناتهم في غرفهم..
أم خالد: سير انت سير الحريم احينه بسمعن حسك سير..
خالد: لا إله إلا الله محمد الرسول الله.. و روح خالد وهو موصل حده..
أم خالد: عنبوه حار..
حصة: دومه جيه .. زين عموه خلصنا القهوه و الجاي..
أم خالد: وينها مهره..
حصة: سارت فوق عسب تسبح..
أم خالد: يزاكم الله الف خير..
حصة: تراه في حريم في الميــلس..
أم خالد: زين إنتي سيري لهم و أنا بزقر الفسد إلي فوق..
حصة ضحكت: إن شاء الله.. سارت حصة الميلس و أم خالد سارت فوق عسب تزقر خوله و شمه إلي كانن في غرفه شمه.. خوله قاعده على التسريحه و تعدل جحلها و شمه واقفه على الدريشه تطالع الشباب إلي يحدرون الميالس إلي حذال الدروازه.. وكانن لابسات مخور شمه لابسه أخضر و عليه ورود بنيه و خوله لابسه شرات موزه سماوي و يا أبيض و شكــلهن كششششخه..
شمه: خولوه تعالي شوفي خلود ظهر من الصالة و هو محرج..
خوله تطالعها: مثل كل مره زيد و عبيد محد ..
شمه: خولوووه تعالي شوفي مايد والله فـــــن ..
خوله وهي تي صوبها: أشوووف خوزي عاد " و هي تطالع " ويـــنه؟؟؟؟..
شمه: هناك عند الشيره و اقف حذاله واحد لابس كندوره بيـج هذااااك..
خوله: هيه هيه شفته وييين إلي حذاله أحــلا..
شمه: خوزي خوزي سيري مكانج احسن لج أونه " و تعيب عليها " إلي حذاله أحلا.. مالت..
خوله: جب يا الله جب..
شمه تبتسم: شوفي شوفي فــلاح و الله إنه فــن غتره و عقال بعـد حركات..
خوله: أي فلاح خو سلامه إلي قدج..
شمه و هي تطالعه: هيه تعالي و الله كاشخ..
خوله و هي الثانيه تطالع: هيه والله غادي ريـــال..
شمه: خخخخخخخخخخخخ و الله حركات بعد العيال كبرت..
خوله: خطيبج ..
شمه: خسي خذيه إنتي..
خوله: صغير عليه.. وشوي دخــلت عليهم مهر إلي كانت لابسه مخور ويــل فيه كذا لون على الخامه..
مهره الكحل فـ عينها و غلوس وردي خفيف: كل عاااام و انتو بخير بنات..
شمه وخوله يطالعنها: و إنتي بخيــر " وايهو مهره "
مهره: كاشخات الربع..
خوله: هيه نعــم شو تبين عيل ما نكشخ..
شمه تزقر خوله: خولوووه خولوووه تعالي هاذوه ظهر..
خوله سارت صوب الدريشه تربع: ويييينه .. هيه و الله إنه أحلا من مايد..
شمه: وين عاده.. مهروه تعالي شوفي و قارني منو أحـلا..
مهره: ما شاء الله شمه مغتنمه الفــرض..
شمه: هيه نعم..
خوله: حظها والله هب نحن..
مهره تطالع الريال إلي قالو عنه: أي واحد إلي على اليمين.. لا ما شا الله عليه وسيم بس عبادي أحـــلا..
خوله: سيري إنتي عبادي أحــلا و الله عاده كلمه الحق تنقال و الله إنه أحلا من عبيد..
مهره: نعمممممممم ..
شمه: اضاربو بعد اضاربو .. وشوي يتبطل الباب بقو..
أم خالد تفاتن: عنلاتج إنتي و ياها..
شمه إخترعت و خوله: عوذ بالله من الشيطان الرجيم..
أم خالد: و أنا من مساعة هب زاقرتنكن عسب تنزلون توايهن الحريم..
شمه: زين أمايه بلاج قولي لا إله إلا الله ..
أم خالد: محمد الرسول الله.. طوفن جداميه بسرعة ..
خوله: عيدج امابرك أمايه.. داخله بمشراع وميداف الله يهداج..
أم خالد: أيامج سعيده يا الله طوفن عنبوكن ساعدن حريم خوانكم..
شمه: فديت إلي تفاتن و الله.. يا الله ولا تزعلين حدرنا نوايهم ..
أم خالد: يا الله.. وسبقتهم..
شمه: قردنتها لــكم.. و مشن كل وحده تتمخطر بمشيتها و سارن وعند الميلس يتعازمن كل وحده ادز الثانيه عسب تدخل أول و يات من وراهم حصة ودخـلتهن و سلمن على الحريـم..
.......................................
في بيت بو ذياب
ذياب توه ومقف السيارة عند مظليات بيتهم إلي مليان سيايير و حدر هو و هند و حدر الصالة إلي كانت فاضيه.
ذياب: صبري بزقر لــج أمايه.. و سار برع و شاف أبوه و وياهه و قاله يسير يزقر راشـد و حدر ذياب الصالة مره ثانيه و على طول سار يزقر راشد.. في هذه اللحظة دخـلت شيخه وهي شايله المدخن فـ أيدها و تفاجأت بوجود هند إلي كانت قاعده في الصالة..
شيخه: السلام عليكم..
هند وهي توقف ابتسمت: و عليكم السلام ورحمه الله وبركاته.. وايهت شيخه هند
شيخه بدون نفس: شحالج..
هند: الحمد الله بخيـر.. و حدرت عليهم أم ذياب ..
أم ذياب تطالع شيخه: وينه المدخـن الحريم بروحون " و اطالعت هند " هلا حبيبتي..
هند: كل سنه و إنتي طيبه عموه.. " وايهتها "
أم ذياب: و إنتي طيبه فديتج.. استريحي .. انا عاده اسمحيلي عندي حريم شيخه هاتي المدخن و قعدي عند حرمه خوج إلين ماي .. وشالت المدخن و روحت عنهم و قعدت تشيخه ويا هند و هي مالها نفس..
هند تبتسم: أدري إنتي ما تبلعيني..
شيخه: صح ما أبــلعج..
هند: شكــلج يوضح..
شخيه:زين يوم عرفتي.. قربــي الفواله..
هند: مشكوره ما تقصرين..
شيخه: لا تخافين ما فيها شي..
هند تبتسم: مال أول يحطون في الأكل شي..
شيخه ابتسمت لأنها فهمتها: خلاص عيل قربي البيت بيتج.. " و مرت فتره و ثنتيناتهن ساكتات "
شيخه تبا تعرف جيف هي خذت ذياب و فجأة: جيف وافقتي على ذياب؟!؟..
هند ارتاحت وايد لشيخه ابتسمت لها لأنه ذياب خبرها عن علاقته بشيخه: من حقج تعرفين بس وضحي..
شيخه: على ما اعتقد إنج فهمتي .. بس بوضح إنتي تعرفين إنه متزوج و عنده عيال ما أعتقد إنه ما تعرفين عن ريال ياي يتزوجج لازم تسالون عنه..
هند: أنا بقولج بالول ما وافقت عليـه تبين الصراحه ما كنت أتوقع إنه حياة الحرمه الثانيه جيه عاديه شرات ما أنا حرمته الأولى..
شيخه: أدري أصلن ذياب ما يقصر بحد بس احسبه وايد مقصر ويا موزه..
هند: شيخه لا تتحرين إنه الزوجه الثانيه دايمن تكون متسلطه و على قولتهم شريرة لا .. ما بقولج أنا و أنا بس صدقيني ذياب مخلتنه يتصرف ع كيفه المهم يسوي ما يملي عليه ضميره ..
شخه: جيف عرفتيه؟؟!!؟؟..
هند: مصره عـ السؤال.. خلاص أنا كنت اشتغل فـ الاتصالات في دبي و حولوني بوظبي و كنت اقعد ويا ختيه هناكي و كنت اشوفه بس يوم أقوله إني شفتك في بوظبي و إنه كانت من بينا رمسه هو يقولي ما يذكر.. و الصدفه الثانية إنه كان فـ المستشفى يوم توفى بويه و كنت ذيج الساعة مخطوبه لولد عمي و ستوا ظرف بينا المهم في المستشفى طحت و إلي شافنيه ذياب يوم قلت له قال ليه كانت موزه بعد مرقده في المستشفى عسب ظهرها .. و عقب كل هذه المواقف..
عمـر: هند ياينج ريال يخطبج منيه؟؟.
هند إلي كانت فحاله ما تسر: منو بعد هذا؟؟
عمـر: ذياب تحيدينه إلي شفتيه فـ المستشفى..
هند: هيه بس هذا ما تقول عنه متزوج..
عمـر: بلا..
هند: و ياي يخطبني وين يبا هذا آسفه أنا بعد المصايب إلي ياتني ما أبا حد..
ليلى: عيل تبين أحمدوه راعي الأجنبيات..
هند وهي تتذكر أحمد إلي كان كل شي فحياتها: بسس ليلوه الله يخليــج لا تيبين طاريه..
عمر وهو محرج: ليلى ظهري من الغرفه يا الله..
ليلى: بضيعين حياتج بنفسج يا هند..
عمر: ليلى ظهري قبل لا اظهرج يا الله.. " اطالع هند " لا تسمعين رمستها هند هذه حياتج و لازم تفكرين ..
هند: و الريال إلي ياي يخطبني..
عمر: ذياب ريال و النعم فيه و الكـل يمدحه بس ليش يباج مادري..
هند: ما عرف مـــاعرف.. و عرف بو أحمد عن السالفــه إنه هند خطبها ريال متزوج ويا من الهير عسب يعرف شسالفه ..
بو أحمد: ليــش انت ما تعرف إنه أحمد محير حق هند..
عمر: عمي السموحه منك بس من بعد إلي سمعناه خلاص هند ما تبا أحمد..
بو أحمد يطالع عمر: شو سمعتو..
عمر: إنه أحمد متزوج و حده أجنبيه..
بو أحمد فتح عينه: شوووووو؟؟
عمر: آسف عمي..
بو أحمد: بس هو طلقها و يبا بنت عمه..
عمر: دام الريال مغصوب على هند نحن ما نباه يا عمي..
بو أحمد نزل راسه: بس أنا دريت أنه الريال إلي خطب هند متزوج..
عمر: عمي هند ما وافقت عليه..
بو أحمد: انت قلت لها..
عمر: عيل شوه.. عمي انت ما شفت هند جيف حالتها من بعد وفات بويه وقبلها خبر زواج أحمد من صدمه لصدمه و هذه بنت ما اعتقد تتحمل أكثـر من جيه و احينه ياي تقول تباها حق أحمد لا تغصبها يا عمي و بعدين ترد لنا مطلقه الله يخليــك..
بو أحمد: يعني تردني خايب يا عمر و هذه و صات بوك..
عمـر: إذا وصات بويه على تعاست ختيه نحن ما نباها هذه الوصيه الله يخليك عميه ما نبا مشاكـل..
بو أحمد كلام عمر أقنعه و تم ساكت..
عمر قام من مكانه وباس راسه عمه: الله يخليك عمي إذا هند تعتبرها شرات بنتك لا تغصبها ع شي ما تباه..
بو أحمد: أفا يا عمر هند أكثـر من بنتي و إلي تباه بيستوي تامر هي ما تطلب.. و قام من مكانه بو أحمد وروح عنهم وهو مكسور الخاطر يبا يستر على بنت خوه بس ولده ما حشمه وسوا إلي فـ راسه..
هند: وجيه السالفه من عقب ما ظهر عمي من بيتنا خبرني عمر عن كـل شي و رفضت ذياب و عقب بسنه يا وخطبني مره ثانيه و .......................... .. قطع عليهم صوت ذياب و راشد..
راشد: زين صبر غترتي ما عدلتها عنبوك صبــر عنلاتك زاد صبر ذيابووو صبر..
ذياب:والله بويه توه داق حقي بسرعه تعال.. و نزلو الصالة و شافو هند ويا شيخه ابتسم ذياب من إلي شافه..
راشد وهو يعدل غترته عند المنظره إلي فـ الصاله: امبــــــاركن عيــدكم..
هند تبتسم و تطالعه: أيــــــامك سعيــــــده..
راشد اطالع و استغرب من الصوت: السلام عليــكم..
شيخه: و عليكم السلام..
ذياب سار لشيخه وباسها على راسها: كل سنه و إنتي طيبه..
شيخه ابتسمت: و انته طيب الغالي..
راشد: شحالج هند..
هند: الحمد الله بخير و عافيه.. و ينه العصبي خليفة..
راشد ابتسم: يوجب الرياييل..
ذياب ابتسم: يا الله يا راشد.. " يطالع هند " أقولج يوم بدق حقج ظهري حقي أوكيه..
هند: إن شاء الله.. و ظهرو الشباب و سارو يوجبون العـرب إلي ياينهم.. و حدرت عليهم في نفس الوقت ميثه و يا بنت عمها فطيم و قعدو يسولفون ويا هند وشيخه روحت عنهم عسب توجب هي الثانيه الحريم..
.........................................
في بيت موزة..
عبيد: ما نبا عليـج دخون..
موزه: بلا احينه بتسيرون بتوايهون العرب ما يصير طارت ريحتكم..
سلطان: عطيني مظرب المخلط إلي عندج.. "موزه تعطيه الدهن عود المخلط " شوي شوي بس أبا..
عبيد: يدخن غترته: من بعدك الله يخليـك .. بسنا بنروح بتسوتي عشر ونص و العرب فـ بيتنا ..
موزه: سلمو على أميه قولو لها بيها على العـصر المغيربان يعني..
سلطان: إختاري إلي يعيبج أفا عليـج.. " و يغمز لها "
موزه: إنزين .. و قام سلطان ويا عبيد..
حمدان: أمايه بسير وياهم إنزين.. " ويهز راسه "
موزه: سير بس هاه لا تقعد تضرب بنت خالك..
حمدان يطالعها ويفتح عينه: أمايه هي إلي تضربني عييييب عيييييييييييب..
عبيد: صدقه عييييب منقود حرمه تمد أيدها على ريال..
سلطان: يعورها الضرب بعد من الغضه إلي فيها بتضربه..
عبيد يشيله: اضربها وصفعها بعد..
موزه: هيه انت وز الولد عـ البنيه.. عقب يوم بيكبر بيندم..
سلطان: ليش؟؟..
موزه: تراه خطيبته بتستوي..
عبيد: خيييييييير خالك ما خطب انت خطبت أشووف..
سلطان: و الله يوم بتكبر و بتتفتح عينه بقول ما أباها معروفين شباب الكراااامه..
عبيد: يا الله قوم هبابنا ناخذ لنا شويه امفاتن من خوك بو ساره.. " و ظهرو و سرحو صوب يارتهم "
عبيد: يا الله " يطالع موزه وهي ميود بحمد " ديري بالج على نفسج و هذا خليه عنج ما بينفعج..
موزه: هيه بويه هذا إلي بشيلني وبدافع عني و بسويلي كـل شي..
عبيد: منو قال؟؟..
موزه: أنا أقـول..
عبيد: افتح السيارة افـتـح قالت شو هذا.. و سلمو على ختهم وعقبها روحو عنها ..

في هذا الوقت ذياب دق حق هند عسب يوديها بيت هلها و يات هند على طول و سارو بيت هل هند و كانو عندهم عرب و دخل ذياب سلم عليهم و من بين هذولا العرب أحمد ولد عم هند وقعد ذياب 10 دقايق بالضبط و عقبها روح عنهم لأنه بروح عند موزه اليوم عيد و ما شافها دق حقها الصبح بس ما شالته وصل و دخل السيارة في الحوي و بند السيارة و حدر عليهم الصالة إلي كانت موزه فيها توها ربيعتها مروح عنها و هي قعدت ويا حمد يطالعون تلفزيون..
ذياب ولهان بالقوووو: الســلام عليكم امباركن عيدكم..
موزه اطالعته: أيامك سعيده.. ووقفت له.. وسار لها ووقف اقبالها ..
ذياب: ليش واقف يا الله تحركي..
موزه استغربت: شو تبا ليش أتحرك..
ذياب: بوسه العيـد..
موزه ضحكت: سير لاه و اتحريت شي بعد..
ذياب: أفأ ليـــش؟؟.. خلاص ما تبين تعطيها لنا أوكيه " و جرب منها و حبها على خدها برقه .. و اطالعها " كل عام و إنتي بخيــر يا موزه.. " موزه استغربت تصرفه هالعيد هادي غير عن كل عيد "
ذياب اطالع حمد: حمودي حبيبي تعال لبوك " وشاله ذياب و قعد يبوسه و قطعه من البوس و حمد مستانس و يضحك "..
موزه: من مساع قاعد و مويم لا يضحك و لا شي و احينه ما شاء الله عليه..
ذياب: معلوم ولد بوه هذا صح حبيبي صح " حمد يهز راسه وهو مستانس " فدييييتك أنا ..
موزه: ياي من بيتكم..
ذياب: هيه و طوفت هند على بيت هلها و ييييتج خيوووول .. كلي لــج اليوم " ويطالع بطنها " كل عام و انت بخيير يا حلوووو بعد ما بننساك تبا عيديه..
موزه تضحك: ههههاي تخبلت انت شوه..
ذياب: عيالي بعد ما اسلم عليــهم.. و ينيه عيل حمدان البجـــــر..
موزه: يوه خواله عبيد وسلطان و خذو وياهم..
ذياب: هم يو؟؟..
موزه: هيه م ساعة مروحيــن من الصبح عندي..
ذياب: شحاله عبيد عساه مرتاح ويا مهره أعرفها ما تعرف تتطبخ..
موزه: امشيه حالها.. تعال انت .. أقــرب أقرب ..
ذياب: شو ؟؟..
موزه: قوم تعال الميــلس..
ذياب: قعدي زين إلي يقول ريال غريــب..
موزه: ما فيها شي قوووم.. و شوي يرن تلفون ذياب وكان ربيعه و يبارك له على العيد و قال له إنه ياي بيته هو و حرمته ..
ذياب: أقــــرب فا عليــك ..
سالم: في بيتك انت..
ذياب: هيه يا الله أرقــبكم.. فداع الله.. " يطالع موزه " سالم ربيعي ياي و يايب وياه حرمته..
موزه: حياه الله في أي وقت..
............................................
في بيت بو خالد
أم خالد تأشر على البنات إنهن يروحن وهن مخترشات يسمعن السوالف و يات لهن حصة وقالت لهن يروحن و نشت مهره وشمه أما خوله سارت تيب لأمها المـدخن و عطته حقها ويوم ما شافت خواتها ظهرت عن الحرمات بس في حرمه كانت تطالع خوله و هي تويبهم..
شمه وهم قاعدين في الصالة: عنبوه ما ورا ظهرنا عنهن حش عنبووووه..
خوله وهي يايه: شبعتي سمعتي إلي يعيبج..
شمه: بس جب.. " تطال مهره " و إنتي جيه ما قعدتي عندهن..
مهره: لا بويه منو قالج إني حرمه و بعدين ليش صدعه الراس؟؟..
شمه: تراج حرمه متزوجه..
مهره: لا هذا غيـــــــر..
خوله: زيد وعبيد اليوم ما شفناهم..
شمه: اليوم عـ الغدا اسمعي المفاتن من الزيــن.. وشوي يدخل سلطان و عبيد.. " من الباب إلي ورا "
سلطان يرضف غترته: هلا مرحبا السلام عليكن امابركن عيدكن..
البنات: و عليكم السلام ورحمه الله وبركاته..
سلطان يسلم عليهن وحده وحده و كل ما سلم على و حده رص على أيدها..
شمه: آآآآى عنلاتك..
سلطان يسلم على مهره ويسوي لها نفس الحركه و مسكينه عورها..
سلطان ضحك: إنتي عاده أوكيه لابسه خاتم و أكيد بعورج.. مهره ابتسمت له و هي تمسح على أيدها..
عبيد هو الثاني سلم عليهن: كل سنه و إنتو طيبين..
شمه وخلوه: و انت طيب..
مهره برقه تكلمه و بدلع: كل عام و انت بخيـر عبيد..
عبيد اطالعها و لا تعبير في ويهه: و إنتي بخير " و قلبــه يدق يحس كلما سمع حسها يدق قلبه "
شمه تنغز خوله على جتفها و تصاصرها: شوفي عبيد رمنسي..
عبيد اطالعهن: بلاكن تطالعن..
خوله: لا ماشي.. و يدخــل عليهن خالد إلي شافهم و سار لهم وهم سمعو حس كندورته و سو عمرهم عادي..
خالد: ما شاء الله ييتو جان طولتو احسن بعده وقت..
عبيد: و الله نسيت التلفون فوق..
خالد محرج: بس بس يا الله طوفو جدامي فشلتونا ربعكم برع يسالون عنكم..
سلطان: أنا بي بسير بيب تلفوني وبي ..
شمه تضحك: والله فشيله يقول يهال يرغونهم ويدورونهم ..
عبيد وهو ماله نفس: بس جب.. "يطالع خالد و يدقه خشم" و لا تزعل بو سارة يا الله سلطان بسرعة هات تلفونك و يا الله الحقنا..

روح خالد و عبيد أما سلطان فسار يجيك على تلفونه يوهم عمره المسكين إنه شمسه دقت حق بس للأسف ما شاف لا كول و لا مسد كول اضايج وايد يدور من بين إلي متصليله رقمها بس ما شي أي شي تنهد من الخاااااااااطر و طرش لها مسج " عـ الأقـل بكون أحسن عنج و بقول لــج كل عام و إنتي بخيـر يا الخيـــــر كـــــــله " اتريا يمكن اطرش له مسج وفعلن طرشت له مسج و كان مستانس من المسـج هذا و فتــحه " كــل عام و انت بخير و كــل عيد و انت بخيــر بس أرجوووك امســح رقمي من تلفونك " انصدم من إلي يقراه " شسالفه معقوووله نستني معقووووووووووووله " ابتسم بسخريه" الله يا دنيا امسح رقمي " عورته هذه الكــلمه وايد و ما يعرف شو الشعور إلي ياه ذيج الساعة حقد كره حب بس ما سكت عنها ورد لها بمسج " إن شاء الله بمسحه بس إنتي لا تنسين تمسحين رقمي بعد " و على طول غلق تلفونه .. و هي يوم وصلها هذا المسج انقهرت و اتصلت له بس شافته مغلق و انقهرت زيادة.. أما هو فطب السالفة يوم شاف ربعه و قعد يسلم عليهم ويسولف..
سلطان شال دله القهوه: هاه هيه بنسير له عقب..
حميد: وين وين؟؟..
مايد: رزه وايد رزه..
سلطان يمد له بفنيال قهوه: بنسير ميلس ناصر..
حميد: هيه .. قول جيه من الاول " يعيب عليه " رزه..
سلطان يطالع الصوب الثاني: هلا والله مرحب مرحب..
مايد يطالع عبيد إلي قاعد هادي حذاله: بلاك يا خي هب من عوايدك هب زواج يعقل هذا..
عبيد اطالعه بدون نفس: مايد تراه هب فايج خلني ساكت احسن..
حميد: يا ريال تراك مب حلووو جيه ابتسم على الأقل..
عبيد ابتسم شوي: جيه زين..
حميد: ازيد بعد شوي " و ضحك عليه "
عبيد ابتسم من الخاطر: بااااااااااااااييييييييييييييييييييييخ..
حميد: حبيبي طالع عليك.. بتسرح ويانا بيت قوم ناصر..
عبيد: إن شاء الله..
....
شو ممكـــــــــــــــن يصيــــر بالأجزاء اليايه..
موزه معقــــــوله ببتـــقبل بهذه الحـــاله..؟؟
و هنـــــــــــــــد ما حمـــلت معقوله في الجزء الياي تطـلع حامـل..؟؟
و عبيــد شو حياته و يا مهره..؟؟
و مهره ضنكم هي عايشــه حياتــها ويا عبيد..؟؟