الجزء ( 12 (
...............................................
في الإمارات بعد صلاة التراويح موزه توها يايه من المسيد مع حرمه يارهم و دخلت شافت حمدان و حمد يطالعون التلفزيون و ياكلون منسدحين على غنفه وحده ..
موزه تبتسم: عنبوكم بطيحون .. اطالعو أمهم بس ما هتمو حقها قعدو يكملون إلي يشوفونه ..
موزه تقرب منهم و أيدها على بطنها الواضح: انتو شو تطالعون " و تطالع " بااااس هذه إلي ماخذ عقلكم ..
حمدان: أمايه تعالي أقعدي ويانا ..
موزه ابتسمت له و مررت صبوعها على شعره: إن شاء الله بسير بفصخ عباتيه وبيكم .. سارت موزه غرفتها و هي مستثقله عمرها و قعدت شوي حست بتعب خفيف و ألم في بطنها بس شالت الشيله و العباه و نزلت تحت عند عيالها و شافت عندهم أبوها و أبو ذياب قاعدين ويا حمدان و حمد و محتشريــن الشواب ..
موزه مبتسمة: هلا هلا و مرحبا و أنا أقول الشعبية منوره قولو الشواب عدنا ..
أبو خالد: هلا بموزه هلا ببنيتي.. موزه سارت و وايهت بوها و عمها و قعدت حذالها..
أبو ذياب: شحالج موزه ..
موزه: الحمد الله بخير و عافيه..
أبو خالد و حمد قاعد على حيره : و هذه شو تأكلينه غادي جيه ..
موزه تطالع حمد: و الله ما أكله شي بس الله يهداه امبزاي ..
أبو خالد: هيه ما يفهم عليج و لا جان علوم .. أنا ماروم أقول جلمه جدام سارونه فديتها جان إلى ويقت عليه أونها فهمت الرمسة ..
موزه تضحك: هيه أدريبها سارة فطينه ..
حمدان سمعهم يتكلمون عن سارة: و أنا أنا أمايه ..
أبو ذياب: يا الغيار انت ..
أبو خالد: طالع عليك..
أبو ذياب ابتسم: مسماي عليه جيف ما تباه يطلع عليه ..
موزه: عيل أنا بسرح أيب حقكم فواله " وسرحت موزه تيب حق الشواب فوالتهم و الشواب كملو سوالفهم "
...............................................
عند ذياب إلي لابس كندوره بيضه و متعصم بغتره حمره و ميود السباحه توه داخل الشقة قعد على الغنفه و شاف التلفزيون مشتغل ..
ذياب: و الله حاله .. هنووووود يا هنووووووووووود ..
هند وهي في المطبخ: هلا حبيبي ييييت ؟ ..
ذياب: سؤال سخيف .. هيه ييت وين الفواله ..
هند: زين احينه بحطها لــك .. و سارت يابت له الفواله و حطتها جدامه و يابت العصيـر و الجاي و القهوة و حطته جدامه و قعدت مجابلتنه ..
ذياب: و ليش ما ييتي و قعدتي حذالـي ..
هند بدلع: مينون انت ..
ذياب: فـــــــــــــيــــج عمــري .. " هند نزلت راسها و ابتسمت بمستحى " يا الله على إلي يستحون .. جبي قهوة حق ريلج يا الله بشوف ..
هند اطالعته: إن شاء الله .. وسارت جبت له قهوه و ناولته الفنيال و حطت له من الدونات و الكيك إلي جدامها.
ذياب: لا ما با ..
هند عقدت حوايبها: ليش مسويته حقك ..
ذياب: خليه حق بليل و بعدين تعالي ما يصير جيه إنتي حرمتي و ما شفتي هليه و لا سلمتي عليهم ..
هند خافت: لا ذياب أنا هب متهيأه اليوم ..
ذياب: يا الله عن الخربطانه شو متهيأه و ما متهيأه صله الرحم يا هند وصى عليها الرسول و إنتي عمرج ما زرتي هليه و لا سلمتي عليهم ..
هند: اللهم صلي و سلم عليه.. هيه..زين و ليش عيل هم ما سلمو عليه ..
ذياب: هند انت تعرفين الظروف إلي مرينا فيها.. و إنتي لازم تكسبين هليه فيها .. شو رايج؟؟ يا الله قومي كلمه لاء ما أبا أسمعها على لسانج.. يا الله تراني أرقبج سيري لبسي شيلتج و عباتج و أنا بترياج .. هند اضايجت صدقها هب متوقعه اليوم.. هو خبرها البارح إنه بسيرون بيت هله بس هب اليوم .. قامت هند و هي مضايجه جيف بجابلهم و جيف بتكون رده فعلهم للموضوع .. دخلت الحمام و سبحت و عقبها ظهرت و لبست جلابيه خفيفه لونها بني غامج ويا عنابي و سحيت شعرها و رفعته و رشت عطر على أيدها و حطته على ويهها و يابت الكريم حق البشره و حطت على أيدها و على ويهها و عقبها لبست شيلتها و عباتها و ظهرت لذياب إلي ابتسم لها ..
ذياب وهو يقوم: يا الله .. و سارو بيت هل ذياب و كانت هند بتموت من الخوف مرتبشه و متوتره " شو بصيـر لها ؟؟" ..
بيت أبو خالـد
في بيت أبو خالـد خالد إلي كان لابس كندوره رمادي و متعصم بسفره بيضه قاعد في الصالة ويا أمه إلي كانت منسدحه حذاله و ترمسه وهو يضحك وياها .. نزل عليهم سلطان لا بس كندوره سوده و محطي في شعره جل ومرجعنه على ورا ..
سلطان وهو يغني: سلام الله على حسنك وزينك لدين العود و خدود الرهايف يغار الفجر من طلعه جبينك و يغار الليـل من شعــر رضايــــف.. " وهو يأشر ع شعره من تحـــت و أيـــبس حق أمه و خالد خوه وهم يضحكون عليــه و على حركاته لـــــهم "
شمه وهي يايه من المطبخ: خير خير رمضان رمضان ..
سلطان يطالع صوبها و يقعد حذال خالد خوه: بلاها هذه أختك عن أصفعها .. يبتي الزلابيا..
شمه وهي تحطي الدلال: بن عروه تمس اشعره من شعريه ما تروم.. هيه يبـــــــــــــــتا..
سلطان: عن ينط لــج عرج و بعدين لا تقولين ما أروم تراني روم أصفـعج..
أم خالد: خل عنك هذه المصاخه انت .. أروم ماروم هو .. و ين ساير؟..
سلطان: ما بسير مكان ميود بيني ..
خالد: بيستوي عيل ..
سلطان: ليش الوالده بغيتي شي ؟؟ ..
أم خالد: إلا بس قلت يعني بتوديني بيت خالتك شويه ..
خالد: أفا الوالده أنا موجود ..
أم خالد: فديتيك حبيبي..
سلطان يطالع خالد: بويه فديتك أنا شو سويت في بيتنا؟؟..
خالد: احينه ذكرتوه عنبوكم و لا تكذرونه..
سلطان: المهم ما توصلك بيزاته.. المهم المهم خبرني شو آخر التطورات متى بخــلص..
خالد: البيت خالص بس نا قصنه الديكورات و الشوي الحمامات..
سلطان: خلني أنا بختار الديكوريشن من اختيـــاري أحــــــسن..
وشوي يدخل عليهم بو خالد وهو شال حمد: السلام عليكم ..
الكل: و عليكم السلام..
أم خالد و هي تعتدل في يلستها: من وين ياي .. وهذا من وين ضاويبه ؟؟..
سلطان يدز شمه: أم خالد تغار ..
شمه: هيه هيه قبضته من أول ما دخل ..
أم خالد سمعتهم و و اطالعتهم و بعدين كلمت بو خالد: من ضاوي يا بو خالد تحيرت ..
بو خالد: ياي من عند بنتج موزه و يبت معايه هذه الحلو " ويحبه ع خده "
خالد: لا يكون خطيب بنتي ياي..
بو خالد: لا هب ياي خليته عند أمه ..
أم خالد: يا الله هبابنا يا بو خالد ..
بو خالد: وين تبين تسيرين ؟..
أم خالد: انرود ختيه نسيت إنها مريضه و ولدها مسوي حادث ..
بو خالد: لا ما نسيت يا الله قومي ..
خالد: أوديكم أبويه ؟..
بو خالد: تسوى خيـر ..
خالد وهو يقوم: يا الله عيـــل..
أم خال تطالع شمه: شموه سيري يبي شيلتيه و عباتيه دهديه ..
شمه: إن شاء الله .. سارت شمه ويابت شيله أمها و عباتها ..
أم خالد وهي تلبس عباتها وشيلتها: شمه أميه نعتي عـ الخدامه قوليلها تحطي العيش في الماي إلين ما أي من بيت خالــتج ..
شمه: لا أميه حصوه بتسوي السحور ..
أم خالد: فديتها و الله ما اسوى من دونها .. و ظهرت أم خالد لبو خالد وخالد و حمد إلي متعلق فـ يده ما يبا حد يشيله و روح بيت أخت أم خالد ..
...............................................
في بريطانيا عبيد ظهر من السوبر ماركت وشال الأجياس يتحرا مهره روحت الشقة دخـل الشقة وهو محرج و قعد يزقرها و سار المطبخ و حطى الأغراض فيه و سار الغرفه ما حصلها دور عليها في الشقة بس ما حصلها ..عبيد متوتر لو يشوفها جدامه جان لتها بكف: حسبي الله ونعم الوكيــل .. و ظهر يربع يدور عليها و سأل آندرو راعي العماره و قاله إنه شافها تسير صوب الحديقة العامه و روح عبيد صوب الحديقة بس ما لقاها زادت دقات قلبه " أويييييييييه وين سارت هذه بعد و بعدين هذه ما تعرف البلاد شو مودنها هذا الصوب زين يا مهره بتشوفين خلني بس أشوفــج "
منصور و أحمد كانو يتشمون ملانين وهم قاعدين في واحد من الكراسي إلي في ساحة بريطانيا يلعبون بالحمام
أحمد يضرب على ركبه منصور: شوف هذه هب عبيـد