الجـــزء [ 11 [
...............................................
شمه قاعدة في غرفتها ترتب شو بتلبس حق الكلية وشوي دقت حقها عوشه بنت عمها ..
عوشه: هاه شو بتلبسين ..
شمه واقفة عند الكبت تطالع الملابس : و الله مادري شكلي بلبس مخور ..
عوشه: كليه و مخور ..
شمه: هيه نعم بستوي مواطنه ..
عوشه: عاشت المواطنة ..
شمه: و الله عوشه شرايج نلبس مخور باجر الله يخليج هابه نفسي فيها ..
عوشه: وحام وحام عنبوج ..
شمه تخلي التلفون سبيك و قعدت تختار ملابس: عيب الله يلعن بليسج ..
عوشه: انتي ايه صدق بتلبسين مخور باجر ..
شمه: و الله لا البس مخور ..
عوشه: زين لا تحلفين .. ترا بنت عمج وياج ..
شمه: الحمد الله فديييييتج أنا " وشوي يندق الباب " لحظه العاش لحظه .. " وسارت عند الباب " شو ..
سلطان: السلام عليكم..
شمه: و عليكم السلام خير ياي ليه بانصاف الليالي ..
سلطان وهو يقعد: بس ملان وقلت خلنيه أي اقعد وياج برمس وبضحك عليج ..
شمه: و الله ماشي مذهب" تسكر باب الغرفة "
عوشه إلي كانت على الخط: شموه منو عندج ..
سلطان يطالع التلفون: منو هذه ؟؟ ..
شمه: عوشه ..
عوشه: أيه الخايسه ..
سلطان: منوه عوشه بنت عمي ..
شمه: هيه ..
عوشه وهي محرجه: و الله يا شموه إن ما شاليتي التلفون بتشوفين شي ما يسرج ..
سلطان شال التلفون: أنا شلته و شو بتسوين يعني انا إلي ما بعطيها التلفون ..
عوشه: باي ..
سلطان: إنتي ايه ليش خقاقه ..
عوشه تبتسم: أنا هب خقاقه ..
سلطان: باين..
عوشه: شموه ويــن عطني شموه ..
سلطان يطالع شمه إلي كانت عند الكبت اظهر لها ملابس: شموه اظهر لها دريس حق باجر ..
عوشه ضحكت بخفيف: زين سلم عليها و تصبحون على خير ..
سلطان: قاعدين ما شبعنا منكم..
عوشه: سكر انت سكر ..
سلطان: يا حرمه يا بنت الناس يا بنت اللوادم ..
عوشه تضحك: باااااي ..
سلطان: ميود وينه عيل ..
عوشه: محد مايا ..
سلطان: تخيبه بعده مايا .. زين بتخبرج أنتي ليش مغرورة ..
عوشه: ئئئئئئئه ليش بعد مغرورة أنا هب مغرورة ..
سلطان: بلا مغرورة بس عزج الله البقرة ما تشوف ذيلها تشوف ذيل ربيعتها ..
شمه اطالعته: أييييييييييه سلطان " وسارت له وشالت التلفون " ييب التلفون عنلاتك " وتكلم عوشه إلي زعلت من كلام سلطان و حرجت و عقبها سكرت " حرام عليييك عوشه زعلت ..
سلطان: قولي و الله " ابتسم" و الله ما قلت لها شي الحقيقة تقال مثل ما يقولون..
شمه: تراه هب فوق راسك فوق راسي أنا ..
سلطان: ما عليج منها زين بنات آخر زمن .. زين شحالج بعد ..
شمه: الحمد الله بخير.. سلطان اشفيك انت ..
سلطان يشغل التلفزيون: اشفيني بعد..
شمه: ما شي بس اشوفك ما تظهر شرات قبـل ..
سلطان ياخذ الرمود: ما احسن ليه عن المراغد برع البيت ..
شمه ابتسمت: هيه زين بس انت جي هب حلو ..
سلطان يطالع عمره من الجامه : و الله إني حليو ..
شمه: انت تعرف شو أقصد شي فيك ..
سلطان: آآآآآآآآآآآآآآآآآآآه لا ما فيني شي .. " وقام من مكانه " سلمي على بنت عمج و قوليلها لا تزعل .. و ظهر عن شمه و سار غرفته ماله خلق في شي انسدت نفسه زود ما هي منسده .. انسدح على شبريته و شوي يدق حقه مايد ..
مايد: سلاااااااااااااام عليييييييييهوووووم ..
سلطان: و عليكم السلام أرســــل..
مايد: علومه بشراااع ..
سلطان: تمام قلنا لك أرســـل..
مايد: و الله ما عنديه خانه أدق حقك بس اشتقتلك ..
سلطان ابتسم: يازين منطقووووقك انت .. زين و أخبار الشباب..
مايد: بخير و سهاله يتنشدون عنك تراهم ..
سلطان: سلم سلم.. و حميدوه وياكم ..
مايد: لاء ساير العين مودي هله ..
سلطان: مسكين الله يعينه هذه السيرات ما تعيبه موليه ..
مايد: تونا دقينه حقه و ضحكنا عليه ضحك ..
سلطان: يا ريال شو تبون بريال تغثونه بروحه مغثوث ..
مايد: تعال .. زين يسلم عليك ..
سلطان ابتسم: الله يسلمه..
مايد: تعرف يتنشد عنك هو الثاني ..
سلطان: هيه تراه محد غثه اليوم ..
مايد: هيه والله .. ليش ماييت يا ريال ..
سلطان يحك عينه : عندي دوام باجر و بعدين هب متفيج ..
مايد: هيه .. زين عيل نحن ما نبا نطول عليك تصبح على خير ..
سلطان: و انت من أهله .. فداعه الله .. وسكر عن مايد و انسدح و لا بند الليت و رقد و هب حاس بعمره ..
...............................................
مغمضه عينها بألم و هو يتكلم بهدوء موزه ما تحملت في كلمات ذياب قطها مثل السهام على قلبها إنه حب هند هذه إلي قاله لها ..
ذياب يكمل رمسته و اطالع موزه: و عقبها " وسكت قعد يطالع موزه و هي مغمضه عينها تتألم ما قدرت تيود عمرها و ذياب يطالعها اشفيها البنت و طلعت منها صرخة صغيره ذياب فتح عينه و قلبه يدق بسرعة تروع موزه تتألم " ..
ذياب بخوف: موزه اشفيج .. جرب منها و مسك أيدها .. موزه اطالعته بألم و عقبها قامت بسرعة و قعدت تمشي على الطرف الثاني من الصالة تمشي و تمشي تحس بعمرها ما تروم تمشي من كثر الألم بس تمشي تكمل و ذياب يطالع هب عارف شو يسوي يطالعها رايحه راده وقف وسار صوبها ..
ذياب يطالعها بطريقه غريبة: موزه أوديج المستشفى .. " موزه هزت راسها بلاء " ليش حياتي بتموتين من الألم قومي بوديج الله يخليج..
موزه اطالعته بتوسل بأنه يسكت و وقفت و غمضت عينها و خذت نفس على و أيدها على خصرها و هذا الحال إلين مده و هدت شوي و اطالعت ذياب إلي أول مره يشوفها على هذه الحالة ..
ذياب: الله يخليج موزه خلنا نرح المستشفى ..
موزه ابتسمت له: لا ماله داعي..
ذياب محرج: شو ماله داعي كنتي بتموتين جداميه و تقولين ماله داعي ..
موزه: و الله ماله داعي شي عادي..
ذياب عصب وبجديه: موزه أنا قلت بنسير المستشفى يعني بنسير تفهمين كلمه لاء ما أبا أسمعها .. وسار الغرفة و ظهر لها شيلتها و عباتها و غترته خذتها عنه و هو سار صوب الممر إلي يودي لباب الصالة يتعدل عند المنظرة تعصم بسرعة بسرعة بس طلع فيها فــن .. موزه ابتسمت وهي تلبس شيلتها و عباتها تذكرت عبيد خوها يوم إنه يلبس بيجامته و يتعصم ..
ذياب يطالع موزه إلي تطالع شيلتها عسب تلبسها: يا الله هبابنا ..
موزه: شو بتسير جيه ..
ذياب يطالع عمره : بلانيه ؟؟ ..
موزه: لا ولا شي..
ذياب: جب و لا جلمه جداميه بشوف ..
موزه: و العيال..
ذياب: ما اعتقد إنهم فـ البيت بروحهم و أنا بخبر شيخه تراودهم .. يا الله .. ظهرت موزه وهي ميوده على بطنها الألم بعده فيها بس خفيف و على طول سارو المستشفى و في طريقهم خبر ذياب شيخه تشوف عياله لأنه بيسير المستشفى .. دخلت موزه عند الدكتورة و قعد ذياب يرقبها و دق حقه ربيعه ..
ذياب: ها بو الزمان ..
سعيد: مررررررررحب ..
ذياب: ملايين و لا يسدن ..
سعيد: علوووومه بو حمدان ..
ذياب: الحمد الله .. عيل في البلاد اليوم ..
سعيد: هيه باجر الفير مروح .. وين أنت ؟؟ .. ما ييت ..
ذياب: اسمحليه هب ياي اليوم ..
سعيد: لا انت معذور إلي عنده حرمتين معذور ..
ذياب: تتمصخر لا أي و أدفنك ..
سعيد: لا نسولف أفا عليـك .. زين أقولك سيارة يوسف في الكراج و هو ساير الشارجه ما عليك أماره ترح باجر و اتيبها منه ..
ذياب: لحظه انت داق حق منوه لا يكون الدريول مالكم و أنا ما دري ..
سعيد: ذياب يعني ما فيها شي إذا يبتها احينه لو عبيد قايل لك جان أمره و لا فكرت بعد ..
ذياب ابتسم بسخرية: هه عبيد ليته يطلب أفا عليه عيوني لـه ..
سعيد: زين خل الريال احينه هو معرس يديد " يكلم إلي حذاله " زين بلاك صبر .. " و يكلم ذياب" ها شقلت بتيبها و لا لاء تراه الريال ذبحني كل شوي مأذيني ..
ذياب يبا يركب أعصابه: و انت ..
سعيد حرج: و الله انك تركب الأعصاب..
ذياب: و الله ما قلت لك رح انت ويبها اشخانتك ..
سعيد: و الله العظيم و الله إنيه بداوم انت ما تفهم ..
ذياب: هيييييييه زين خبر فلاح خوه ايبها له ..
سعيد: فلاح صغير ما يسوووق ..
ذياب: زين زين لا ترفع ضغطك بيبها ما طلبت ..
سعيد: قوووول جيه من الأول و الله ذليت أمنا يا خي ..
ذياب يضحك: في شي ثاني إنتو حق المصالح جاهزين ..
سعيد: باي باي ما تنعطى ويه ..
ذياب: زين حبيبي مصير الحي يتلاقى " وسكر التلفون في ويه سعيد و اطالع شاف الدكتورة ظاهره من الغرفة إلي فيها موزه و سار صوبها "
ذياب: السلام عليكم ..
الدكتورة : و عليكم السلام ورحمه الله وبركاته .. نعم خوي ..
ذياب: أبا اسأل عن موزه حمد ..
الدكتورة: موزه ؟؟ .. انت ريلها ..
ذياب يهزر راسه: هيه أنا ريلها .. أباج تكونين معايه صريحة ..
الدكتورة ابتسمت: أكون صريحة ؟؟ إن شاء الله قول ..
ذياب: شوفيها بضبط ؟؟ ..
الدكتورة: لا لا تخاف ما فيها إلى العافية ..
ذياب: جيف ما فيها إلا العافية انتي اصلن ما شفتيها و هي تتألم ..
الدكتورة: هيه بس هذا .....
ذياب يقاطعها: و الجنين و هي وينها احينه ليش ما ظهرت ..
الدكتورة تتمالك نفسها عن تضحك في ويهه: يا أخ الحرمة ما فيها شي وهذه شي طبيعي و بعدين الألم إلي حستبه حرمتك كان شي عادي صار لها بسبب تحرك الجنين في البطن ..
ذياب: بس أنا عندي ولدين و عمري ما شفتها تتألم جيه يوم كانت حامل فيهم ..
الدكتورة: يا خوي لازم الحرمة الحامل يصيبها تشنج في فترات من حملها أحيانا تكون قويه و أحينا تكون ألام خفيفة و بسيطة..
ذياب: زين و الجنين ..
الدكتورة تبتسم له: لا أطمنك الجنين بخير و حرمتك بعد بخير و تغذيتها ممتازة لها و للجنين ..
ذياب ارتاح: مشكورة دكتورة ما تقصرين ..
الدكتورة: العفو أفا عليك ما سوينا شي هذه واجبنا ..
ذياب: زين استرخص منج .. وسار عند موزه إلي كانت منسدحه على الشبريه وتلعب بشعرها دخل عليها ابتسم لها ..
موزه تطالع و تعتدل في يلستها: هاه شو قالت لك ..
ذياب: لا إنتي بخير و عافيه أصح مني و من الدكتورة ..
موزه: شفت قلت لك أنا.. بس انت الله يهداك ..
ذياب: ما فيها شي إذا اطمنت عليج صح ..
موزه وهي تقوم عن الشبريه : هيه يا الله بويه خلنا نروح فيه رقاد ..
ذياب يود أيدها عسب يساعدها: يا الله .. ظهرت موزه هي وذياب و كشتها ذياب شوي و كانت البلاد فاضيه و عقبها ردو البيت عسب يرقدون ..
...............................................
في شهر رمضان عبيد ومهره بعدهم في بريطانيا و مهره بتموت تبا تروح هذه أول رمضان تقضيه بدون هلها و منسده نفسها عن كـل شي .. الساعة تسع ونص عبيد ساير الجامعة و اليوم صايم و لا له خلق في شي .. و أحمد و منصور واقفين حذال باب الكلاس إلي جدام و عبيد من شافهم خطف صوبهم و سار دخل من الباب إلي ورا ..
أحمد يتحرش: عنبوه السلام عليكم شهر رمضان .. " كان عبيد يتخطاهم و عبيد ابتسم بس ما وضح حقهم "
منصور: أيــه سمعك..
أحمد: خله يسمع قاعدين نسابر حقه نحن .. " و تتخطاهم بني أجنبيه .. أحمد دز منصور على جتفه يوم تخطتهم و اطالعت أحمد بنظره ودخـلت الكلاس "
منصور نزل راسه: استغفر الله العظيم من كل ذنب عظيم .. شهر رمضان ..
أحمد: شفتها هذه إلي تموت على ترابي ..
منصور: تراك مطيحهن تموت عليهن و يموتن عليك .. " أحمد سكت ونزل راسه " هاه لا يكون ذكرت بلي مضى ..
أحمد: أنسي السالفة أنا ياي أنسى و لا تذكرني.. زين بتخبرك هذوه عبيد يا الله قوم نتعرف عليه ..
منصور: ليش هو ولد كلاسي و لا ولد كلاسك .. لا بويه هب ساير اتعرف عليه انت ..
أحمد اطالعه ورجع راسه على فريم الباب: يعني اليوم الفطور من المطعم ..
منصور: شوف انت بشو يفكر ..
أحمد سحب منصور: و الله لا تعرف عليه قوم تعال.. و دخلو الكلاس و شافو عبيد قاعد صوب الدريشة و فاتح دفتره و يرسم فيه و يكتب و جنه هب وياهم و في الكلاس كانت فوضه و ازعاج و شكل عبيد هب حاس بهذا الإزعاج ..
أحمد واقف يطالع عبيد: و لا جنك ويانا ..
عبيد اطالعهم و عقد حوايبه : ليـــش ؟؟؟!! ..
أحمد ياب له كرسي وقعد صوبه و منصور قعد على الطاولة: كل هـ الزعاج و انت هب حاس ..
عبيد: يعني أسكتهم..
منصور ابتسم: ما عليك منه زين..
عبيد اطالع منصور و اتذكره و ابتسم له من ورا خاطره على إلأي سواه في المطار أول مايو ..
أحمد: أنا أحمد .. " و يأشر على منصور " وهذا منصور ولد عمي و تبا الصراحة من زمان نبا نتعرف عليك بس انت شكلك ما يعطي ويهه ..
عبيد ابتسم: ليش ما اعطي ويه عادي ..
أحمد: بلا " يطالع منصور " صح منصور جم من مره نبا نكلمك بس انت شكلك بتصفعنا ..
عبيد ضحك: شو صفعتك احينه ..
أحمد: لا " و ابتسم " هاه ربــع ..
عبيد اطالع منصور: شو قولك انت ..
منصور: انت شو تبا نكون ربـع؟ ..
عبيد: تخسي أقـول لاء .. و شوي يدخل عليهم السيـر وظهر عنهم منصور وروح كلاسه و رد أحمد يقعد مكانه حذال البنت إلي تخطته و كانت تحبه و تسوي حقه حركات بس احينه رمضان ما يقدر يقول لها شي و ربيعها شكله يخرع ما يقدر يتقرب منها و على طول ما طاوعه قلبه إنه يقعد حذالها في هذا الشهر الفضيل شال بعمره و قعد صوب عبيد و عبيد ابتسم يوم إنه قعد صوبه و دقوها سوالف و ضحك ..
...............................................
في الإمارات الحبيبة كان عندهم المغيربان و قاعدين يحطون الفطور شمه في بيت ختها موزه و وياها عوشه بنت عمها ..
موزه: عوشه بويه سيري زقري حمد و حمدان و ساروه شوفيها وين ..
عوشه: إنزين .. وسارت عوشه تزقر حمدان و ساره بس حمد ما شافته وعقبها شافته راقد في الصالة و شكله حليو و شعره على عينه و نايم على جهة اليمين ..
عوشه: بخليه احينه وعقبها بوعيه .. شالته من على الأرض و دخلته في الغرفة إلي حذال الصالة إلي يرقد فيها سلطان و هي ظاهرة شافت كندوره بيضه جدامها رفعت راسها و نزلته استحت و ظهرت برع .. ذياب اطالعها أول مره يشوفها في بيتهم ابتسم هو الثاني و سار فوق و فصخ كندورته و لبس بيجامه و نزل لهم ..
ذياب يدخل عليهم: هاه أذن ..
موزه ابتسمت: لا ما أذن..
ذياب قاصد هذه الحركة مسوي حقها مفاجأة: السلام عليكم جميعا ..
الكل: و عليكم السلام..
ذياب: هاه شموه شحاااالــج ..
شمه قاعده حذال حمدان: الحمد الله بخييييييييييييييييييير ..
ذياب يطالع موزه: ولدج رقد في غرفه سلطان ..
موزه: هيه ما دري متى رقد ..
ذياب يطالع عوشه و يأشر عليها: هذه أنا ما عرفتها و أخاف تستحي منيه أنا بسير الميلس و هاتيلي الفطرو عقب ماي من الصلاة .. " و شوي أذن الأذان "
شمه: لا عادي عاشوه ما تستحي.. " عوشه دزتها على جتفها " ..
ابتسم ذياب: جيف ما تستحي .. مويز عطيني اللبـن و التمـر .. موزه عطت اللبن حق سارة عسب تعطيه حق ذياب ..
ذياب: فديت هذه الصغيرة أنا " و باسها على خدها و سارة استحت منه و سارت صوب عمتها موزه ابتسمت و لوت عليها " يا الله بعد تستحي ..
شمه: وراثة المستحى..
ذياب:هممممممم من عند موزه هيه لكن منج أشــك الصراحة ..
شمه: قاعد يشتمنا قول لنا ظهرو برع البيت عادي بنطلع ..
ذياب ابتسم وهو يشرب اللبن: محشووومه يا بنت حمد محشووومه ..
...............................................
في بريطانيا في نفس الوقت مهره قاعدة بروحها التلفزيون ممل و مافي شي زين عسب تشوفه و عندها بس قناة دبي الرياضية ملت و هي تطالعها و عبيد شال الاب توب و هي من جيه ملانه .. قامت من مكانها تبا تسير تسبح بس أطالعت التلفون و سارت له ودقت بيتهم بس محد يشيله و دقت بيت عمها بعد محد يشيله .. دقت بيت خوها ذياب و قعد يرن و عقبها يات الخدامة و شالته ..
البشكاره: ألوووه ..
مهره: ألوه..
البشكاره : نأم ..
مهره: وين موزه..
البشكاره : منو ؟؟؟؟..
مهره: زقريها انتي بعد منوه ما منوه سيري ؟؟.. سارت البشكاره زقرت موزه و ذياب توه ياي من المسيد يطالع موزه و هي سايره الصالة ..
موزه: ألو..
مهره: ألو السلام عليــــكم..
موزه: الله مهرووووه شحاااالج شخبارج و عبيد شحاله وينكم انتو ما تتصلون..
مهره دمعت عينها: مووووزه شحاج إنتي و الله مشتاقة حقكم أبا أرد البلاد ..
موزه: لا أفا خلج قويه .. " و اطالعت ذياب إلي يأشر لها أونه منو عندها مهره ؟؟ .. موزه هزت راسه بهيه و خذ ذياب السماعة عن موزه "
ذياب: مررررحبا بالعروووس إلي ما تتصل لهلها ..
مهره: ذياب شحالك شخبارك " في هذه اللحظة مهره ما رامت تيود عمرها و قعدت تصيح "
ذياب: أفا أفأ لا تصيحين يا مهره خلج قويه احينه بيج عبيد و بيفتن عليج و علينا .. موزه تطالع بذياب و تشوف قلبه الطيب الصافي بعده يحب عبيد بعده يشتاق حقه شرات قبل بس يتريا إشارة من عبيد عسب يردون شرات قبـل ...
مهره: و أميه شحالهم مايردن عليه اتصلت لهم ..
ذياب: هم بخير ما يشكون باس لا تشيلين هم ..
مهره: زين سلم على أميه وقول لها بدق حقها خلاف..
ذياب: زين يا الله سلمي علي عبيد .. قوليله بعده يترياك ..
مهره ما فهمت: أنزين سلم على موزه وايد ..
ذياب: الله يسلج توج مكلمتنها .. يا الله فداعه الله .. سكرت مهره عن ذياب اشتاقت حقهم و حق رمستهم و و حق ضرابتهم و كـل شي و قعدت تصيح و في هذا الوقت دخـل عبيد عليها وهو مستانس و مر من صوبها و شافها منزله راسها ..
عبيد استهم فيها : اشفيج مهره ..
مهره منزله راسها تمسح دموعها: ما فيني شي ..
عبيد: ليش تصيحين حد قالـج شي شوه ..
مهره: لا بس كلمت موزه..
عبيد: هييييييييييييه اشتقتي لـــهم شوه؟.. " مهره اطالعته و هزت راسها " عبيد ابتسم و وده ينقع عليها من الضحك بس ميود عمره جدامها ..
مهره: يسلم عليك ذياب .. " هنيه عبيد حرج و تذكر " و يقولك بعده يترياك ..
عبيد قام : زين يصير خير و عطاها الاب توب وهو محرج و دخـل الغرفة و رض بعمره عليها ما يحبه ما يحب ذياب ما يطيقه و لا يطيق حتى يسمع اسمه و خصوصا من مهره غمض عينه ..
ذياب: يا الله شوت .. في حصة الرياضة كانت الحصة الثالثة و عبيد و ذياب كانو صف ثلاثة ثانوي و يلعبون الكوره ..
عبيد شات الكوره حق ناصـر: نصور شوت نصور ..
ناصر يشوت الكوره لذياب و ذياب رماها للمرما بس حارس المرمى كان أقرب لها ..
ذياب ميود على راااسه : آآآآآآآآآآآآه شيييييييييييييييييت ..
عبيد محرج: انت ما تعرف آخر مره نعطيك الكوره ..
ذياب حرج منه: زين جان خذتها انت و الله بس يحب يتحرطم ..
سهيل: عنلاتك انت ويا بس بدا اللعـــب .. و بدا اللعب مره ثانيه و كل شوي تي كوره لذياب وذياب يعطيها حق عبيد و عبيد يحاول فيها لأنه كان هداف الفريق .. يات الكوره لناصر إلي عطاها حق سهيل و سهيل عطاها حق ذياب و ذياب مره ثانيه حاول فيها بس خسارة ما يت في الجول عبيد أطالعه و ذياب رفع أيده " أونه الحظ " كمل عبيد لعبه و لبس الموضوع لأنه مستانس بالعب و خلص الشوط الأول .. على الشوط الثاني و في الدقايق الأخير فريقهم خسران فرق بينهم وبين الفريق الثاني نقطه و الفريق الثاني بدا يتحمس حق اللعب و شكله بفوز .. عبيد يربع و عنده الكوره إلي عطاها حقه ذياب إلي سار عند الجول و تم واقف هناكي و على طول عبيد ياته الفـرصة و رما الكوره صوب ذياب إلي كان يرقب الكوره إلي على طول ضربت في العارض و دخـلت الجول .. هنيه ذياب ابتسم لعبيد و عبيد روح عند ذياب و نط فوقه و يو الشباب نطو فوقهم صدقهم فرحه صحيح تعادل بس وايد عانو .. خلصت المباراة و عبيد قاعد عند الشباب يسولفون لحظ إنه ذياب هب موجود و اطالع الصوب الثاني شافه قعد على الكرسي و يهوس على ريله ..
عبيد سار عنده: هاه بو الشباب شو تسوي ..
ذياب: و لا شي بس ريليه تعورنيه ..
عبيد يفر عليه غرشه ماي: هاك .. بلاها بعد العيوز ..
ذياب: و الله محد عيوز غير رييلك .
عبيد يقعد صوبه و يهوس على ريله: تصدق عندك الأنكل تعبان مفتركه تراها و بتورم بعد شوي ..
ذياب: أوووه عدنا امتحان احينه و أنا ريليه تعورني بموت ..
عبيد ابتسم بخبث: ما عليك منه بنمتحن احينه الحصة الرابعة و عقبها بنروح ..
ذياب يبتسم بألم وهو يشرب الماي: قولتك جيه ..
عبيد: هيه قولتيه ما بقعد جيه ترانيه عوف و عايف عمريه ..
ذياب يرش على عمره ماي: و أنا بعد حر عنبوووه ..
عبيد يمط له خدوده: أشوووفك محمر .. يا الله قوم خلنا نسرح الصف تراني بموت من الحر..
ذياب يرفع أيده: شلنيه ..
عبيد: عن الدلع يا الله قوم .. ساعد عبيد ذياب عسب يسرحون الصف .. و فتح عينه و هو مبتسم و فوقه هي و رد حرج مره ثانيه..
مهره مبتسمه في ويهه: يا الله قوم أذن الظهر ..
عبيد يطالع الصوب الثاني : زين قومي من ويهي ..
مهره استغربت تصرفه حرجت و ظهرت عنه و هو أطالع الباب بقهر و قام من مكانه و سار الحمام عسب يسبح .. و عقب ما صل ظهر و قعد في الصالة و شافها قاعدة و لابسه جلابية صفره و عند الصدر نقشه هندية و بعد عند الأكمام و شعرها مفلول و تلعب بقصتها و هي عينها على الاب و تسمع أناشيد ..
عبيد بدون نفس: إنتي ليش قاعده ما تسيرين تسوين فطور..
مهره تطالعه و تلعب بقصتها: هممم هيه ما شي أغراض ..
عبيد يطالعها بتعجب: و ليش ما خبرتيني من الأول ..
مهره: انت مالك نفس بعد شو اسويلك ..
عبيد: هممم زين سيري لبسي شيلتج و عباتج يلا بسرعة ..
مهره تطالعه : زين انت سير لازم انا اسير ..
عبيد عصب و نبره صوته تغيرت: أنا هب حرمه أعرف شوفي البيت و لا ما فيه يلا قومي عن الفسد ..
مهره خافت منه و على طول سارت الغرفة عسب تلبس شيلتها و عباتها .. عبيد صج عصب منها و برود إلي ردت عليه قهره زيادة .. ظهرت مهره و ظهر هو جدامها و هي وراه إلين ما وصلو السوبر ماركت إلي حذال العمارة و دخلو يشترون أغراض .. عبيد خلا مهره بروحها تشتري حطا في باله يمكن تستحي و تبا تشتري إلي في خاطرها وهو سار الصوب الثاني عسب يطالع هو الثاني شو يبا وهو يطالع ..
سارا: Hiiiiiiiiiiiiiiiiiiii عبيد.. " لبنانيه و تعرف عبيد أيام ما يا هو و ربيعه سيف مال بوظبي يدرسون "
عبيد اطالع وراه و ابتسم: آآآآه سارا شحالــج ..
سارا ابتسمت : أيـــه منيحا .. كيفاك انته..
عبيد صج استانس: الحمد الله بخير و عافيه شحالج و شحال الشيبة ..
سارا: لا بيه امنيح بسيلم عليك ما يشكي باس .. صحيحه ..
عبيد يضحك: هههههههههاي لا أصح من الصحيح ..
سارا: شو جابك هون ..
عبيد: ياي أكمل دراستي..
سارا: أيه أنا شفتك معك وحد هيدي مرتك و لا أختك ..
عبيد: لا هذه أم العيال..
سارا: شو يعني ؟؟ .. ما فهمت يعني مرتك ..
عبيد: هيه مرتي ..
سارا ابتسمت: أيـه نيالك .. مبروك..
عبيد ابتسم: الله يبارك في حياتيج .. بعرفج عليها حبوبه .. في الجهة الثانية من القسم إلي واقف فيه عبيد و سارا مهره كانت تمشي و تسمع أصواتهم استغربت و سارت صوبهم بس من بعيد شافت بنت شقرا شعرها كاريه و محطيه فيه جل و مجعتنه لابسه بدي مخطط بحري ويا أصفر و أبيض و بنطلون جينز أزرق إلين تحت ركبها و جوتي كعب بو خيوط رقيق و البنت شكلها روعه و رقيقه في رمستها ورسميه و يا عبيد مهره وقفت منقهره منه جيف هو يضحك معاها و لا بعد عيني عينك .. عبيد ابتسم و اطالع مهره و كلم سارا شوي عقب يا صوبها ..
عبيد مبتسم: تعالي سلمي على ســـ.................................
مهره قاطعته و هي محرجه: و الله أحلف انت بـــس .. و احتقرته و سارت عنه عبيد اطالعها بستعجاب ..
عبيد يطالعها و يطالع سارا: بلاها هذه تخبلت ولا شو " و سار صوب سارا " السموحه سارا ..
سارا ابتسمت له : لا ولو لا تعتزر و بعدين مرتاك تغار شي طبيعي و امبين عليها تحبك ..
عبيد: السموحه سارا ..
سارا: ألنالك ماله داعي شو يا الله روح نادي عليها و إن شاء الله فرصه غيرها بنتعرف عليها ..
عبيد ابتسم و نزل راسه: أدريبج ما تشيلين على خاطرج ..
سارا: ما علينا و بعدين بنت عرب و العرب لازم يغارون .. يا الله روح أزقر عليها " و ابتسمت و مالت براسها له .. عبيد رد عليها بنفس الابتسامة و روح عنها عسب يدور على مهره " ..
.....
شو بصيـــر بعبيـد و مهره ؟؟..
و سلطان بظــل جيه حياته؟؟..
و هنـــد ما شفناها في هذا الجــزء ضنكم بنشوفها في الجزء الجاي؟؟..