منتديات قصايد ليل - عرض مشاركة واحدة

09-20-2010

لاتدفنون الشيخ منصـور ماجيـت
خلوه لين أحـب خشمـه وجبينـه
له قدر عندي ذايع الطيب والصيت
الطاهـر الوافـي لربعـه ودينـه
الصاحب اللي كل ماضقـت دقيـت
أشكي عليه الضيقـه ولا الغبينـه
وكان أيتبسم كـل مابـه تلاقيـت
ويضمني ضمة غـلا فـي يدينـه
أخوي وشيخي في ديـاره تربيـت
قبـل السنيـن أتحدنـا للمديـنـه
كنت الطفل وإن شفت منصور فزيت
وأقول ياليت أنا منصـور وزينـه
زين الفعل والشكل لو به تماليـت
كل الخصـال الطيبـه لـه قرينـه
ويوم ٍ كبرت مع القطامي تخاويـت
مافيـه كبـر وكلـنـا عارفيـنـه
ياما قطعنا كل صحصـح وغنيـت
وهو معي ماينشـد الـدرب وينـه
وياما معه شبيت ناري وتقهويـت
من بننـا اللـي تونـا حامسينـه
والحين راح وأنا حي ٍ وهو ميـت
ياليتنـي معـه ومعـي دافنيـنـه
أو ليتني أصقه ولالموتـه أوحيـت
أومثـل مجنـون ٍ نسـى والدينـه
يمكن عذابي خف ولاصحت أونيـت
أون مثل اللي عمى الموس عينـه
ياشيخ رحت ولو تأذيـت ماأذيـت
تبكي عليـك المرجلـه والسمينـه
ويبكيك نجد ويشهق أرطاوي حليت
والضلع يبكـي والذيابـه حزينـه
ويبكيك غيم ٍ مـن رذاذه توضيـت
ويبكيك ورد الأرض مع ياسمينـه
ويبكيك مسجد فيه أميت وصليـت
ويبكي عليك الطيب مـع كاسبينـه
ويبكيك دلو البير وكل نخله أسقيت
وأبكيك أنا والناس في حال شينـه
ويبكيك ذود ٍ مابرك مـن توفيـت
ويبكي عليك القبر وينـوح طينـه
يالله ياللي بأمـرك نحـج للبيـت
يالواحـد اللـي كلنـا عابديـنـه
تغفـر لعبـدك يـاإلـه ٍ تعلـيـت
منصـور أبـن وديـد يالله تعينـه
الله يرحم ذايع الطيـب والصيـت
آميـن قولـوا قولـي ياسامعينـه