تبعثر حلمي الفطري على كف السحاب وجيت
أبجمع من شتات الأرض بقايا حطام وجدانـي
لقيت الباقي عظام وقصايد ذكريات ((وليـت))
وطفولة قاسيه وجرح وجريمة تستر الجانـي
تفكرت بمعاناتي ولقيت أحلا العمـر تشتيـت
تفاءلت بفرح بكره وأنا أدري ضيوفي أحزاني
وأنا أجزم باقيُ ساعة لجنونٍ محسن التوقيت
ولكن بجمع حطـامٍ تناثـر لأجلـه إنسانـي
حرام يضيع مفهوم الحقيقة في ذرى التصويت
حرام يخونني وقتي ويسرق روعـة ألحانـي
أبجمع ماتبعثر لي وأببني من حطامـي بيـت
لعل اللي يتوارثني يكون أرحم على إخوانـي
وريثي لا تبعثرها إذا مات الجسـد وأقفيـت
توارثها ((وريث الجرح)) لأن الورث ربّانـي
كفاني من الزمن حزنه جزا لحظه بها وفيـت
كفاني شهقة آلامـي وحلـمٍ حيـل عنانـي
رصدني واقعي المؤلم على طرقه أنا غنيـت
تفاجأت برسم شطر الكآبـه أسـود ألوانـي
على هامش فلاسفة الشعر واقف ولاصفيـت
تحاقرت الشعر كلـه مدامـه صـد خلانـي
أبرحل مع فجر صمتي لو إني بداخلي حنيـت
أبادفن ياحزن جرحك وأكفن باقـي أشجانـي
وأنا موادع عن الدنيا من طعون الزمن مليت
أبترك لك على صدر الزمن ذكراي وإقرانـي
عادل الظفيري.