منتديات قصايد ليل - عرض مشاركة واحدة

09-18-2010

بهازيج الكلام

لي مدة من بهازيج الكلام معزول
اسمع جهازاتها ومطفّي نورها

وأنا خفوقي ودود ولي مزاج ملول
أحارب انفاقها واعاشر جسورها

أوحيت من ثامر بن قطيم صوت تلول
لايق لمرضيهــــا لايق لجمهورها

كنه يحول على لب المسامع محول
وتلــــــد له لدة الطيح لمقهورها

واسند على كوكب بالشعر يطلل طلول
ســــود الليال يتبدد منــــه ديجورهـــا

عيد السمير المزيني مثل ضرب المثول
ما يستلـــم كل عله كـــود دكتــــورها

وأخذت فنجال كيف مع الفناجيل دول
ضرمت يوم القهاوي دنت نجورها

وشرد القرايح خزايزهن حذور جفول
تسكن مساس الصدور وتدهل اقفورها

يا صاح مهلك ترى ابن آدم ظلوم جهول
حمله رفضته جبال الأرض وبحورها

تجار مصر الكنان من الفلاليح فول
وتجــارة الشام تفاحــــه وبندورها

وتجار بغداد بر في بطــــــون الحقول
وتجارة أهل الحسا تفخر من تمورها

وجميع ما في البسيطة من كيان يزول
والامه أمر الله الغالب عـــلى أمورها

وأكثر عيون العرب من شـارة الحق حول
لو تشرق الشمس من صوبه حجب نورها

والفرق بين العلالي والسهل والسفول
مثل الأصابع بنانيها وخنصــــــــورها

ودي يا ذات اللبيب اليابغيت الوصول
لا تبحث الناس لين تثور شعـــورها

ومن العدود اشرب الصافي وكب الحثول
واسرح وخل السواني في ظهر ثورها

فاح النفل والخزامى بالفلا والميــــول
فأول شطور القصيدة وآخر شطورها