يمه على الطاري مع فرحة العيـد
قمت اتلفت فـي عيـونٍ حزينـه
أسمع خرافتهم " عسى عيدك سعيد"
وجيه تضحـك والفـرح فاقدينـه
أفطرت حزن وباشرتنـي تناهيـد
عايـدت روح وفارقتنـي سكينـه
العيد لحظـة " الله أكبـر" وترديـد
اليا انتهت يبـدا الحـزن باالمدينـه
طفلك كبر والناس كانـوا اجاويـد
واليـوم غابـوا راكبيـن السفينـه
هم حاصروني في غيابك بلا قيـد
وتسائلـوا عنـي فقدنـاه وينـه؟؟
هم خوفوني من صـراخ المواليـد
قالو لـي احـذر والنوايـا دفينـه
قالو لي ابعد بـس لاترحـل بعيـد
قالو لي اقـرب والبلـد حارسينـه
قالو لي انظر وجه حظك تجاعيـد
قالـو تسمًـع والحكـي مانعينـه
هم حددو لي الحلم بالقوس تحديـد
وآخر سطـر بايدينهـم ماسحينـه
قالو لي أقرا لاتنقـص ولا تزيـد
ولا تنًشـد مـن متـى كاتبيـنـه
يمه ولا ودي على السالفـه اعيـد
أخاف همسي يزعجك فـي ونينـه
نفس الزمان ونفس ذيك الاناشيـد
شفنا الهـلال ولا حسبنـا سنينـه
نمنا برجوى العيد في ليلـة العيـد
والصبح ما شفنا الفـرح بالمدينـه
محمد المتعب.