البارت الخامس والعشرون:
:
راشد يتلفت يدورها : انا احوط حول المبنى ادور باركن وادورج لكن تعالي الباركنات اللي ورى .
مهره: بعيد راشد والله ماروم امشي لين هناك
راشد ضحك وهو يرد على البوابه الرئيسيه وقال: تعالي شفتج !
مهره اللي انتبهت على سيارته اتجهت صوبه وسكرتت تلفون ركبت وهي تقول بخجل : سلام عليكم .
ضحك راشد عليها وهو يقول: ماعرفتج وانتي تستحين يا بنت عمي .
ضحكت بخجل وهي تحط الكيس ورى ولفت عليه بلهفه وهي تفج شيله عن ويهها وقالت: جب بس جب لا تحرجني ويلا قول شو في خاطرك
بلع ريقه بتوتر وهو يشوفها كل هالزين قدامه ومايضعف مستحيل قرب منها وهو يقول: تسمحيلي احضنج !
ضحكت بخجل وهي تقول: لا والله مب توك اليوم مطلقني في المحكمه .
رمش بعيونه وقال: ارجعج على ذمتي وين المشكله وفتح ايدينه .
تقدمت منه وهي تحضنه بحب بس تحاول ماتبين شد على حضنها وميلت راسها على كتفه وقال بحب : فديت قلبج والله اني احبج واباج.
ابتسمت بحيا وقالت: يلا نحرك على بوظبي وقولي شو فخاطرگ ..
مازال شاد على حضنها له وقال: انزين ليش مستعيله خليني احضنج يمكن بعدين مالاقي حضنج ..
ضربته بخفيفدوهي تقول: بسم الله عليگ ،، حضني دوم بيكون مفتوح لك بس رجاءً لا تقعد تفاول على عمرك عساك سالم بس..
ضحك على غباها وقال: الحين انتي كله تفكرين بشيء سيء انا اقصد ان عقب ما تخلصين عدتج ما بقدر احضنج ..
تضايقت من كلامه وانصدمت منه بعدت عنه وهي تقول بغصه: شو كنت تبا مني قول!
ابتسم يوم لمح ملامح الضيق عليها وقال بتنهيده وهو يشبگ ايده بيدها: بتعرفين بس نوصل ،، ليش مستعيله!
مهره بضيق: بس أبا اعرف الكلام اللي بتقوله لي ..
راشد بحب وهو لازال ماسگ يدها: والله يا مهره انا يوم طلقتج مب برضايه وانتي تعرفين هالشيء رغبة ابوج ، وانتي اكثر وحده عارفه رفضي لوجود ثريا في حياتي وتعرفين اني كنت رافض وبشده اني اطلّعها عند اهلي لكن البركة فيج انتي ويزوي ييتوا وخربتوا كل شي عليه ، مهره لو انتي رخيصه عندي جان من زمان أعلنت ثريا من يوم ما عرفت انها حامل ، لكن انتي تعرفين غلاج عندي وتعرفين اني ماودي اخسرج وخصوصًا في ظل الظروف هذي لف وطالعها وشافها متنّحه وطالعه وكمل كلامه وهو يقول: الحين مايشفع لي شيء عند عمي وانا مالومه والله ضربتين في راس توجع حيل اول شي طلاق لطيفه وعقب استقبلوا صدمتي بثريا وزواجي منها رغم انّ انتى واليازي تعرفون انّ زواج تصحيح غلطه لا اكثر ولا اقل ، لكن ما كنت أتوقع انّ هذي الغلطه بتنهي حياتي وياج بسرعه قبل لا تبتدي انا حتى ما تهنيت وياج كنت خايف حد يعرف ويخبرج وكان خوفي اكثر منها هي انها توصل لعنواني وتيني لين البيت وساعتها صدق بخسرج قلت بروح لها وشوف حل لموضوعي معاها يمكن نجهض الجنين لكن عارضتني اليازيه خوفاً من الله يعاقبني فيج بلع ريقه بخوف وتوتر وهو يقول: كنت أقول كيف صار بيني وبينها حمل ؟ كيف سمحت لها ؟! لكن اعترفت لي في يوم ولادتها بانها كانت تحط لي حبوب مُسّكِره عشان اقرب منها وانساج وتبلت على عمرها عشان اطلقها صحيح باقي لها طلقتين وتطلع من ذمتيه لكن وسكت وهو يمسح على ويهه حس بيدها للي شدت على ايده ويبين انها متوتره بهمس قالت: لكن شو يا راشد. !؟
تفاجأ من نبرة صوتها الهاديه واللي فيها الكثير من الألم وصل بيت اليازيه ووقف قدام ملحقهم وسند راسه على سيت سياره وغمض عيونه وقال: كمية الألم اللي في نبرة صوتج قاعده تأّلم قلبي بشده يا مهره .
لفت عليه وملامح الخوف باينه في ويهها: رد علّيه لكن شو يا راشد ..
بند سياره وهو يلف عليها: يلا ننزل نكمل كلامنا ..
هزت راسها بطواعيه نزلت وشلت الكيس وياها ودخلت لبيتها هي وياه وممسكين ايدين بعض شافت كل شي مرتب ومنظف ومدخن ،شكله بشكارة اليازيه اليوم نظفته ودخنته ( بخرته) وبروده المكيف اللي في صاله تدل على انه حد دخل البيت ونظفه ورتبه وشغل المكيف لفت عليه بعد ما قال: افصخي عباتج وتعالي قعدي عندي
مهره فصخت شيلتها وهي تحطها على العلاقه ( الشماعه) وقربت منه وهي تحرر شعرها وترتبه بما انه ويفي ومثبّت قالت له: قبل لا افصخ عباتي وابدل قولي لكن شو يا راشد ..
راشد اللي يتامل ملامح ويهها ومنفتن فيها زود : لكن ما تقبلوها اهلي ولا تقبلوا ولديه سلامه الوحيدة اللي تقبلت وجودهم وتساعد ثريا بحمد شوي كونه قاصر وانتي تعرفين انه ما كمل شهوره فلازم متابعته والاهتمام به يكون اكثر عن طفل الطبيعي المكتمل شهور مسح على خدها بعذاب واسترسل كلامه بـ ماجمعني معاها غرفه ولا مكان هي في غرفه وانا بغرفه ، مع الأيام انا متاكد بيتقبلون ولديه وما بيتقبلونها لانها سبب في بعدنا عن بعض، وزعل عمي عليه والله مب راضي على الحال اللي وصلنا له انا وانتي وابويه وعمي وحمد ولطيفه لكن حمد اصلاً الوالده رافضه موضوعه نهائياً ما تباه يتزوج لطيفه ماعرف السبب ، لكني متاكد ان حالة ابويه وعمي غير عاديه ابويه متلوم في ابوج وماقدر يحط عينه في عين اخوه بسبب سواتي اللي سويتها إصرار عمي على اني اطلقج او يصير بينا محاكم وقضايا وامور كثيره اضطريت اخضع لرغبة ابوج واطلقج لكن في نفس الوقت قررت اني ارجعج على ذمتيه وطلعت ورقة الرجعية من المحكمة الشرعيه قانونيا احتسبت الطلقه الأولى ولكن شرعياً بعد ماطلبت رجوعج على عصمتيه، ورجعج القاضي على ذمتي طلبت ورقة الرجعيه وخذت نسخه منها وطرشتها حقج على الواتس آب بس اتضح عندي انج مسكره الفون وماشفتيها اضطريت اني اوهم عمي بانها ورقة طلاقج لان عمي لا يعرف يقرى ولا يكتب صّدق انها ورقة طلاقج لكن هي في الحقيقة ورقة الرجعيه مرر اصبوعه على خدها المتورد وهو يشوف كثافة رموشها وخدودها المتورده وعيونها اللي تناظر عيونه وفيها لمعة قالت بخوف: انزين ! كمل كلامگ! وبلعت ريقها بغصه وخوف .
قال وهو يناظر عيونها : رديتج حليله لي ومحد يدري بشيء هذا ماباج تعيشين على وهم طلاقج ،، اموت ولا اطلقج يا مهره ما اتخيل انج في يوم تكونين لغيري او ياخذج غيري انا غلطان وشو ما تبين تسوين فيني سويه! لكن لا تخليني ولا تصرين على موضوع الطلاق ولا تخافين من ابوج انا بس اتريا منج انج تعطيني فرصه اثبت لج فيها اني احبج واموت عليها قاطعته وهي تحط صبوعها على شفاته وشهقت بين دموعها وهي تقول: والله ادري انك تحبني ماله داعي تكرر كلامك وحلفانك انته اعظم نعمه الله عطاني إياها وانا بعد اباك غمضت عيونها من باس صبوعها اللي على شفاته وقال: شو اللي تبينه امري فديتج! شو اللي يرضيج ؟!
تأملت عيونه بحب واضح وقالت بغصه : اللي يرضيني قربگ ..
ابتسم وحاوطها من خصرها وقربها منه وخلل اصبوعه في شعرها وبهمس: يعني الليلة ليلة رضا .
ابتسمت بحب رغم خوفها من ابوها وقالت بحب وهمس اربك راشد واختل توازنه: الليله يا عمري مب ليلة رضا وبس ،، الليله بالذات ليلة ولادتي وبدايه حياتي وعمري اللي ابتدوا فيگ قرب منها بحب وهو يهمس في اذنها: نعلنها صلح بين قلبي وقلبج .
هزت راسها بخجل وهي تعانق رقبته: من قال لك اني برضى ببعدك والله كنت وايد احاتي الموضوع بس كنت خايفه من ابويه ومتردده اني اتصل واعترف لك علشان جي أغلقت تلفوني وحطيته في الكبت خفت يخوني قلبي وادق لك واعترف لك بكل شي .
باسها على شفايفها بحب وبهمس: يعني انتي تحبيني
بعدت عنه وهي تقول : عندگ شگ ..
ضحگ بحب وهو يقول: بصراحه لا ،، بس ممكن انج تراضيني بما انج انتي اللي تسببتي في هذا كله .
حضنته بحب وهي تقول: ما اتحمل حد يشاركني فيگ اغار عليگ انته لي انا وبس..
راشد يبتسم: صدق يالغيوره قولي والله قبل ما تبيني اقرب منج ..
ضحكت بخجل: انته ما تبا تعترف بسواتگ..
قرب منها زود وهو يهمس : يلا انزين راضيني .
ابتسمت بخجل من نظراته الجريئه ودفنت راسها في صدره حواطها بحب وهو يقول: گل عام وانتي بخير يا اغلى البشر .
رفعت راسها ببطء وطالعته طالعها وهو يقول: شوووو ناسيه ان بعد ساعات قليلة يوم ميلادج ..
تنحت وهي تحاول تذكر التاريخ وشافت ساعه اللي صارت ١٠ وقالت: مر الوقت بسرعه والله تحسبته المغرب .
ابتسم وهو يقول: نحن وصلنا بوظبي عقب المغرب، يلا بدلي لبسج عرفتي ليش اخترت اليوم لانه يوم ميلادج فحبيت انه في هاليوم نبتدي صفحة يديده بينا ويبتدي عمرنا مع بعض في هاليوم المميز عشان تعرفين مانسيت يوم ميلادج رغم الظروف اللي نمر بها لكنج مطبوعه ومرسوخه هنيه وهو يأشر على قلبه ابتسمت بحب وهي تقول: وانته بخير يا عمري احرجتني راشد والله ماتوقعتك متذكر يوم ميلادي وانا أصلاً ناستنه والله .
بعد عنها وقال: يلا تجهزي وتعالي بنروح نحتفل وياج بهالمناسبة.
ضحكت بخجل وراحت لغرفتهم وهي شاله الكيس في ايدها دخلت الحمام وشطفت جسمها على سريع ونشفته وحطت كريمات ولبست الفستان الماروني اللي اشترته ورتبت شعرها وطلعت من الحمام وهي تشوفه واقف قدامها مصدوم قرب منها وتسارعت نبضات قلبها وهمس وهو يحاوط خصرها: شو هالزين يا عمري شو رايج نسحب على الحفله ونحتفل باجر حفلتين وغمزلها^_*
استحت من نظراته وهي تقول: لا والله خلك حقاني .
راشد يشد على خصرها ويقربها زود لين اختلطت انفاسهم وقال: اذا على الحق فحقوقي عليج وايد وقبل عليج دين ما اديتيه كنتي تتهربين مني .
ضحكت بخجل وقالت بحب وهي طوق رقبته: لا تقعد تحرجني باسلوبك وكلامك المعسول لكن وعد مني لك اني اوفي كل ديوني اللي طالبني فيهن .
بحب وخبث قال: متى تسددين اللي عليج عشان تبدين في حقوقي وابتسم.
غمضت عيونها باحراج من حست به يمسح على خدها بلحيته ويوزع بوساته الهاديه في كل مكان بعد عنها بعد ما قبّـل نحرها وطلع تكريزاته عليها قال بهيام: يلا نروح قبل لا اييب العيد .
بعدت عنه وهي تشوف نظراته الهايمه فيها وقالت: يلا ثواني ويايه تعطرت ع سريع ورتبت شكللها بسرعه وخذت شنطتها وزادت روجها الأحمر ولبست عباتها وشيلتها وطلعت بسرعه وركبت في سياره بعد ماسكر راشد الباب ..
مر الوقت سريعاً ووصلوا مكانهم المقصود وكان يخت مستأجرنه راشد ليوم ميلاد مهره ومجهز بكل شي من كيك وعصاير وبالونات ورد منثور وشموع واغاني دخلها الحجره داخل ووقفها عند المرايه : الليله يا عمري اجمل ليالي عمري طالعت نفسها بخجل في المراية فصخ عباتها وشيلتها وهو يعلقها وقال: خذي راحتج يا قلب راشد ترا اليخت حاجزنه لنا لمدة يومين .
شهققت بخوف وقالت بصدمه: يومين..
ضحك بنذاله وقال: خلي لطوف تكمل تغطيه عليج لين نرجع .
بخوف جاوبت: متاكد ما بيشكون فينا.
رد عليها وهو يحضنها : لا محد بيشك فينا، لاني متاكد من لطيفه انها بتشغلهم ولحد بيلاحظ غيابج.
حست بيديه طوّق خصرها وقال: نرقصص مع بعض .
شبكوا أيديهم مع بعض وبدوا يتمايلون بجسدهم على لحن الموسيقى الهادي وعيونهم تعانق بعض بحب . مر عليهم الوقت وراحوا برى اليخت ع طاوله وغنى لها راشد واحتفل بها وطفت الشمعه وقرب منها باس شفتها وهو يقول: الله يجعله ميلاد السعاده والحب بينا ابتسمت بحيا وهي تبوسه على شفته وبهمس: امين يا عمري وياگ ..
بعد ما احتفلوا نزلوا مع بعض لغرفتهم في اليخت قرب منها وهو يشلها بين ايديه اسدحها على شبريه وسط ضحكاتها الخفيفه انسدح عدالها وهو يحضنها ويقربها منه زود وبهمس يدغدغها بشعر لحيته قال:فديت ضحكتج عانقت رقبته بيديها وقالت: احبگ
وزع بوساته على رقبتها وخدودها وهو يقول: وانا اموت فيج والله.
ابتسمت وهي تغمض عيونها وتستسلم له بكل طواعيه وهي تقوله بحب: ماعندي شگ في حبگ لي
ورجعت لواقعها وهي تقول بتنهيدة حب : في ذمتي انها كانت من احلى ليالي العمر وياه .
ابتسمت عهود وهي تقول: ثرج مب هينه طلعتي من ورانا ترتبين امورج.
بخجل ضحكت: سكتي بس والله لو تدرين بكمية الرعب اللي انزرعت فيني بس يوم روحت وياه خفت والله لكن الحمدلله الفضل من بعد الله سبحانه يعود الى لطوف فديتها غطت عليه عسى ربي يفرحها ويعوضها
عهود بتنهيده : امين ،، وبضيق قالت: انزين انتي ماتعرفين أي شي يعني!
مهره: عن حملي قصدج!
هزت راسها عهود بالإيجاب وردت مهره بحيره: ماعرف
عهود: طلعتي وياه كم مره ..
ضحكت مهره بخجل وقالت: وايد والله كله بالسر الله يخلي لطوف وتغطياتها .
عهود: انزين فديتج الحين انتي تحسين باعراض الحمل
مهره تهز راسها بالنفي: لا وتنهدت ..
عهود تمسح ع ظهرها: لعله خير فديتج …
مهره تبتسم : ان شاء الله والله محد مرتاح غير لطوف راسها بارد ما تحاتي شي ..
ابتسمت بضيق عهود وهي تقول: الله يكون في عونها مسكينه والله لطوف بروحها في هم ما يعلم فيه الا الله ..
مهره تقوم واقفه وترتب الأغراض: والله مافيها الا العافيه ما دام انها تطلقت وهي بنت ماعليها ملامه ولا عليها خوف ..
هزت راسها عهود وطلعت من غرفة مهره ..
:
اما في حجرة لطوف كانت متضايقه بسبب إصرار الكل انها تروح الملجة وهي مالها بارض على المجاملات طلعت فستان ذهبي وكعب اسود وطلعت اكسسواراتها ورتبتهن وطلعت عباتها اللي بتروح فيها الملجة وشيله دخنتهن وعطرتهن حست بدخول حد عليها لفت وشافت نايف اللي ابتسم وهو يقول: اوب اوب باجر بتنخطبين عيل ..
ابتسمت مجامله وقعدت ع الشبريه وهي تقول: انته لازم تزوجني عشان ترتاح
حواطها من كتوفها بحب وباس راسها: ان ما فرحت لج افرح لمنو يا عين اخوج
ابتسمت بتعب وهي تحط راسها على صدره وتغمض عيونها ..
ادرك حركتها بانها متضايقه وقال: يخسسسي الضيق وانا موجود لج عون وسند امريني الغاليه شو اللي يرضيج ويسعدج ..
ابتسمت بتعب وفي خاطرها تقول ليتني اقولك عن اللي في قلبي شاله هم وحمل يهد جبال وش اقولك ياخوي اني مب بنت وانه انتقم من سعيد فيني اهاني بطريقه اللي يباها طلعت منها تنهيده عميقه رفع راسها بيده وهو يطالعها بعيونها : الغاليه فيها شي مكدر صفو جوها
هزت راسها باعتراض وهي تقول: لا الغالي بس مالي مزاج احضر ملجة سلامي
نايف يرفع حايبه: بحاول اصدق ان هذا عذرج..
شتت نظرها وتوها بتنطق انفتح الباب ودخلت شما وهي تقول: صدق اللي سمعته
نايف : شوو ؟
شما بغيض : حياب خطب لطيفه
نايف بصدمه: شو ؟؟ صاحيه انتي حياب عمره ٤٢ شو يخطب لطيفه
شما بقهر: والله توني اسمع امايه تقول لبويه وقالها حياب زين ما بتحصل لطيفه احسن عنه ..
نايف: شو هالرمسه انتي فكينا من هالرمسه وانا بقول لبويه عنبوه حياب كبير وايد بالنسبة للطيفه حرام …
لطيفه بضيقه: أقول طلعوا برى صدعة والله أبا انام لين المغرب …
طلعوا عنها وهي ازفرت بضيقه هاللي كان ناقصها بعد حياب ..
:
نزل نايف عند ابوه وقال: ابويه لا تقرّب بحياب ما ينفع اول شي اخو مايد من الاب ثاني شي كبير ع بنتك ..
بو سعيد بهدوء: هيه صدقك ثره اخوه وانا اتحسبه نسيبهم ..
ضحك نايف وهو يقول: هههه الكبر عوف يا بويه
ضحك ابوه وهو يقول: والله يا نايف افكر بخواتك مادري كيف بغمضة عين صار لهن جي ..
نايف: الحمدلله يابويه بس مثل ما قلت لك لطوف بعدوها شوي عن مواضيعكم الا اذا كان من برى العايله يكون افضل لها نفسيا.
هز راسه ابوه قام نايف باس راس ابوه وطلع …
في سوق
:
دخلن مهره وعهود واشترت عهود دريس بيجي ومن فوق عليه رفات نازله بداننتيل وماسك على الجسم ..
مهره خذت لها شوز ابيض كعب ..
وخذوا اكسسوارات لهم وطلعوا ..
:
في ليل بعد ماجهزت لطوف لبسها وفستانها الذهبي اللي قصير من قدام ومن ورى فيه ذيل وحلجة سبعه وفيه زمم مع بعض وشوية كسرات وطالع يجنن عليها ..
:
دخلت عهود عليها وقعدوا مع بعض لفت عليها لطوف وهي تقول: امريني !
عهود بضيقه: لطوف انا اليوم سمعت كلام وابا اعرف صدق ولالا!
لطوف بهدوء: موضوع حياب اخوج اللي من ابوج !
عهود تهز راسها بالإيجاب نطقت لطوف: مرفوض فديتج
عهود: ليش !! شو سبب !!
لطوف بضيقه وهي تحط يدها على كتف عهود: ماشي نصيب فديتج .
هزت راسها وطلعت عنها …
:
في بيت عوض ..
كانوا يرتبون اغراضهم لباجر دخل هزاع على امه وقال: ها الغاليه ربج مستانسه
امه: هيه الحمدلله عقبالك
ضحك هزاع وهو يقول: على ايدج دوري لي باجر في الملجة على بنت حلوه وجميله ..
ابتسمت امه وهي تاشر ع عيونها: ان شاء الله فالك طيب من عيوني …
:
عند مكتوم كان حاس بضيق يبا يفسخ خطبته من بنت عمه بس كيف مايعرف راح عند امه ودق الباب ودخل: امي ابويه وين !
امه: الحين بي ليش !
مكتوم: أبا افسخ خطبتي من بنت عمي ..
امه بصدمه: ليش شو ياك
مكتوم بضيقه: مادري احس أبا من نسايب عوض شوفي لي وحده حلوه
تنهدت بضيق وهي تقول: ما بفشل عمري انا خل ابوك يوصل وتكلم وياه والأفضل تتكلم في هالموضوع عقب ملجة اخوك ..
طلع مكتوم وهو يحس بضيقه …
:
اليوم المنتظر يوم الملجة …
:
في بيت بوحمد ..
كانوا حاطين طاولات وكراسي برى في الحوش ومسوين عازل عن ميلس رياييل عشان مايشوفون الحريم في صاله بعد صلاة المغرب اليازيه وبنتها ودوم موجودات عند سلامه فوق وام حمد وام سعيد يشرفن على الترتيبات برى ويطالعن العشا وقفن عند باب صاله يستقبلون الحريم اللي بيين نزلت ثريا وهي لابسه فستان ماسك على جسمها ووقفت ويا عمتها عند الباب تستقبل الحريم ..
:
اما عند بيت بو سعيد كان توتر في لطيفه الف واصل بعد ما حطت ميكب ولبست فستانها وليست كعبها الأسود وساعتها وخواتمها والاسواره والسلسال والحلق كطقم كامل شافت شعرها اللي سوته رفعه بسيطه وخلت الباقي مفتوح وما شاء الله واصل شعرها لين تحت ركبتها حطت عباتها ع كتفها ولبست شيلتها ودخنت وتعطرت ولفت على الكبت تنهدت وهي تطلع تلفونها اللي من يوم طلاقها فرته في الكبت افتحته وانصدمت من كميات الرسايل اللي يايتنها بالهبل مسحت كل رسايل من دون ما تقراهن ومسحت رقم مايد وبلكته حست براحه خفيفه لبست شنطتها ونزلت من ع دري تحت عيون نايف اللي متخبل عليها حضنها بحب وهو يسمي عليها: يابختي يوم انا اخوج حظيظ ولا من عنده لطيفه ويعافها
ابتسمت بحب وهي تقول: محد مرفع معنوياتي الا انته سديت عوقك يا الغلا ..
باس راسها بحب وهو يقول: ودعتج الله ..
طالعته بحب اخوي وهي تقول : فديت الكاشخ انا علني ماخلى منك..
ابتسم بحب : ولا منج
لطوف تشوف مهره والريم وعهود نازلات وقالت : حيهم الشيخات صليت بكن على النبي عن تنخطبن اليوم وحده ورى الثانيه ..
ضحكت الريم وهي تقول: الله يعلم اليوم منو بيغطي علينا وبياكل الجو
استحت لطوف لان صدق احلى وحده في العايلتين كلهن لطوف بياض عيون وساع رموش كثيفه شفايف مليانه شعر ما شاء الله لين تحت ركب وكثيف جسم متناسق وحلو قطع جوها عهود وهي تقول: يلا لطيفه بنسير
تنهدت وهي تشوف نايف يلعب بفونه ومطنش هالمسكينه قلبك حجر ياخوي ..
تقدمت بتطلع مسكها نايف وهو يقول: وين بتروحين
لطوف طالعته وطالعت عهود وقالت بغباء: وين بعد الملجة شفيك
نايف يمسكها من ايدها وقال: الحين توكلنا ما تطلعين من دوني
ابتسمت باحراج وهي تشوف عهود اللي تغشت وطلعت قبلهم وبهمس قالت: تراك بتنسال عنها يوم القيامه ..
نايف بضيق: مودي ما يسمح اني اعكره اليوم انا مستانس وايد وخصوصا اني شفتج طلعتي من البيت .
سكتت لطوف بصمت وصلت السياره وشافت مهره راكبه قدام ركبت ورى وكان الترتيب كالتالي ورى سيت مهره عهود وفي نص الريم ورى نايف لطيفه وصلوا بيت عمهم ونزلوا ..
:
عند باب استقبال الحريم رحبت ام عوض وام حمد فيهن وسلمن على البنات وكانن متغشيات وصلن عند امهن وسلمن عليها ولطيفه حبتها ع راسها وقالت أمها: ابركها ساعه يوم ظهرتي يا بنت حمد ضحكت لطيفه بهدوء وكملت سلمت على حمده ومريم وصباح ولفن يمين ودخلن الغرفه اللي فيها الفلبينيه اللي تحافظ على أغراض الحريم وفجن غشوتهن وعبيهن وشيلهن وعطنها الفلبينيه دخلن الحمام وشيكن على عمارهن سمعت لطيفه مهره تقول: ليش مارفعتي شعرج ياختي بيحسدونج العرب ما تعطي خير ..
لطيفه ببتسامه: الله الحافظ فديتج وانا قريت عليه فضلت اني اخليه مفتوح وايد اريح لي ..
هزت راسها مهره وطلعن برى ،، قبل ما تطلع لطيفه خذت شهيق عميق ومسكت تلفونها عشان توتر يخف ..
طلعت على صوت الأغاني وشافت مهره والريم وعهود يسلمن على اليازي وودوم توهن نازلات من دري سارت لطوف صوبهن وهي تحس بالانظار عليها ..
اليازي ببتسامه: حي الله بنت حمد وحضنتها بقووو اشتقنالج يالخامه عنبو ما تسالين ..
لطوف بلوم : والله سمحي لي فديتج ادري اني مقصره فيكم ،، المهم انتي شحالج غناتي ربج بخير ..
اليازيه تبعد عنها وتتعمق فيها بالنظر: بخير يعلج الخير فديتج حلويتي اكثر يا لطوف وضعفتي وايد مجملج ليت قلب عمي يحن على اللي متعذب بسببج ..
ابتسمت بضيق وهي تقول: يزوي لا تضايقيني دخيلج مابا اسمع طاري عرس ولا اريد اعكر مزاجي تكفين بنت العم
اليازيه بضحك: حاضرين حاضرين ولا يهمج الغاليه
لفت وسلمت على ودوم وهي تقول: حي الله بنت شهاب شحالج
ودوم وهي مفهيه فيها: بخير فديتج انتي شحالج
لطوف تبتسم: بخير ونعمه فديت قلبج
ودوم تمت متنحه فيها ولطوف لفت على اليازيه اللي قالت لها: شو يديدج بنت العم
لطوف ببتسامه: ابدا والله ماشي يديد كله قديم وبايت
ضحكت اليازيه وتنهدت بضيق نطقت بعد فتره وهي تقول: بتسيرين عند سلامه
لطوف وهي تشوف بنات يايات صوبهن :: بعد شوي
هزت راسها اليازي ولفت على البنات اللي سلمن عليها ..
اليازيه ترحب فيهن وبعد ما سلمت عليهن قالت وهي تطالع لطوف: هذي بنت عمي ..
تقربت منهن لطيفه وابتسمت لهن لانها مسلمه عليهن اول مادخلت كانت متغشيه وقالت اليازيه للطيفه: اعرفج هذيل خوات المعرس هذي حمده وهذي مريم وهذي صباح وهذي اخرهن هند
ابتسمت لطيفه وهي تقول: والله ونعم فيكن يا مرحبا الساع مبروك ما دبرتوا ..
حمده اللي متخبله عليها وعلى شعرها الطويل اللي يلفت الانتباه: الله يبارك لج فديتج ..
انحرجت لطيفه من نظراتهن زود وابتسمت باحراج وهي تقول : عن اذنكن..
راحت فوق وتوتر الف فيها دخلت عند سلامي وشافت البنات مسويات لها جووو ضحكت وسلمت عليها وباركت لها ..
تحت عند رياييل حمد وراشد كانوا يبون يدخلون داخل يبدلون ثيابهم راشد اتصل بثريا وقالها سوي لي درب بدخل دخلته من باب المطبخ وراحت تكمل استقبالها للحريم ،، اما حمد كان متحرقص يبا يشوفها وفي نفس الوقت يبا يغير ثيابه اتصل باليازي وقالها بدخل دخلته اليازي من باب المطبخ وسارت وياه لين الغرفه دخل داخل وقالت اليازي: شفت لطيفه يا حمد تبككيييي والله انها حلوت عن قبل زوود
زادت دقات قلبه وقال: لا تعبيني يا اليازي راد نفسي عنها بالقوه عمي امس قال لو انك بين الحياه والموت ماتاخذها لو علاجك واقف عليها ..
اليازيه بضيق: عمي صراحه يقهر بعد المهم انته تسبح وبدل وانا بخليك تشوفها على الأقل تشبع عيونك لو من بعيد …
ضحكت وطلعت …
اما مهره اللي كانت لابسه فستان نيلي وطقم العقد اللولو مع الأسواره والحلق وكعبها االلوليء ورافعه شعرها كامل ومنزله خصل من قدام طلعت من حجرة سلامه على اتصال اليازي وهي تمشي في الممر اليازي بضيق وهي تشوفها: تعالي ياختي أبا حمد يشوف لطوف
شهقت مهره وهي تقول: لا يالهبله لا تسوييينها والله بتزعل نحن ما صدقنا تطلع من جحرها اللي هي فيه..
اليازي بضيقه: يعني اخلي اخويه متضايق
مهره بقهر: يالمينونه انتي مريضه صح!! لا تينين امج ماتباها لحمد وانتى تعرفين بشي هذا وابويه انهى الموضوع من زمان لا تيلسين تخلطين الحابل بنابل الله يرضى عليج توكلللي على الله ووريني عرض اكتافج يلااااا ودزها صوب دري واليازيه تضحك بقهر ..
اما مهره تحرطم: هبله ورب الكعبه تبا تسوي في لطوف نفس ما سوت فيني والله حاله حست بدوخه غمضت وافتحت عيونها بسم الله شفيني انا ،، شوي بتلف صوب غرفه سلامه ولا تشوف راشد اللي واقف ويطالعها بكل شوق تقدم لها بسرررعه وهو يمسكها: بسم الله عليج يا قلبي فيج شي
مهره غمضت عيونها بتعب وقالت بضيق : راسي يعورني ..
|