× في بيت أم عبدالله ..
× عبدالله ونورة يتغدون ..

نورة "تبتسم " : مررررة أحس إنه ناقصني شي ..

عبدالله : لااااازم أجيبه اليوم والله اشتقت له ..

نورة : ياحبي لك .. أكيد مبسوط ياقلبي عليه بس ..

عبد الله "وهو يآكل " : إيه نورة ..

نورة : سم ..

عبدالله " بسرعة " : فكرتي باللي قلت لك ..

نورة : تدري عبدالله .. البارح ماقدرت أنام بس أفكر .. والله أخاف الناس يآكلونني

عبدالله "يقاطعها" : وش عليك من الناس هذا واحد .. ثانياً أنت مو مرتاحة ياأوخيتي لاتجبرين نفسك على واحد ماتبينه ..وأنت متمكلة أهون من انه يدخل صح وإلا لا ؟

نورة " سكتت " : فكرت والله فكرت ..واستخرت كذا مرة ولا ارتحت لعبدالعزيز .. ومن زمان ماني مرتاحة أحس اني استعجلت

عبدالله : خلاص أنا أكلمه بالموضوع وننهيه إن شاء الله ..

نورة " سكتت شوي .. اللي تشوفه ..




× في شقة عبدالرحمن ..

دانة "مرتبكة " : وش طاري عليك يعني ..

عبدالرحمن "يبتسم " : ودي أشوف ديرتج اللي كنت تدرسين فيها ..

دانة "نزلت رآسها " : مو حلوة تراها صغيره

عبدالرحمن "قاطعها": مااااهمني بس والله ودي أشوف نيوكاسل وقريبة ماراح يضرنا شي المهم باجر الصباح بنمشي بالقطار..

× دانة أسكتت .. ولا تبي تبين له شي ..







× في بيت أم عبدالله ..

×نورة تكلم بالجوال .. مرة نفسي أشوفك ..

ليلى : قولي اللي بخاطرك ترا خالد طالع ..

نورة " والدمعة بعينها " : ليلى وش أقول لك بس .. والله مرة مبسوطة إنك جيتي .. على الأقل ألقى أحد أفضفض له

ليلى "قاطعتها" : ماعندك صديقات؟

نورة : أمي الله يرحمها ماكانت تحب أروح لهم وانقطعنا عن بعض تعرفين بعد الثانوي

ليلى "ابتسمت " : عديني أختك وصديقتك وكل شي ..

نورة : ياحبي لك يعلم الله إني عادتك أختي وأكثر ..

ليلى : الله يخليك يارب .. طيب نورة قولي وش جديدك

نورة "تنهدت": وش أقول لك .. !! خلاص بتطلق من الثاني .. وحالتي حالة حسيت إني ولاشي ..تخيلي ياليلى .. أدعي ربي يغفر لي بس والله كنت أتخيل عبدالعزيز فيصل يوم كنت أكلمه .. ماني قادرة أنساه .. ولا ارتحت إني أتزوج غيره ..


ليلى "بعقلانية " : اسمعيني يانورة .. أنا أعرف البير وغطاه فيصل هو اللي تركك .. ولازم تتزوجين وتفكرين بنفسك .. بكرا ولدك يتزوج ويخليك ..وهذا واقع يانورة .. لا تخلينني أزعل جد فكري شوي بنفسك ..


نورة : أنت تعرفين أهل عبدالعزيز وأنا ماني مرتاحة لهم وأولهم أخته سارة
ليلى"قاطعتها" : يووووه هذيك أنا ماأطيقها وشوفي إذا جاك رجل بعد عبدالعزيز وحتى لو كان متزوج لا تترددين بعد مشيئة الله طبعاً .. فكري والله الدنيا تخوف .. والرجل مانستغني عنه ..


نورة : والله صادقة .. بس فيصل ..والله ودي أكلمه .. وأقول له عن كل اللي بخاطري ×دمعت عيونها .. تخيلي ياليلى كل ماحطيت راسي على الوسادة .. أقول وش سويت معه يجازيني كذا .. آآآآه بس

ليلى " سكتت .. الله يوفقك يانورة ولا تشيلين شي بخاطرك ربي أرحم من الأم لولدها .. وربي معك

نورة "بكت " : بعد أمي فقدت كل شي .. كانت مالية البيت علي ولا أحس بالفراغ ..ليلى أنا فقدت أبوي وأنا صغيرة .. وفقدت أمي وأنا توي .. وطلقني فيصل بدون سبب مقنع .. ليلى أنا أحتااااج أحد يطلعني من اللي أنا فيه .. تعبت والله تعبت .. ليش حظي كذا


ليلى "قاطعتها وهي راحمتها " : لا تعترضين هذا شي مكتوب .. ومثل ماقلت ربي معك .. ادعيه يانورة .. صلي بالليل وادعيه بإذن الله راح تفرج .. ومع كل ضيقة فرج ..لاتخافين .. وإذا احتجتي أي شي رقمي عندك .. وباب البيت مفتوح ..وأنا بلصق عندك بالبيت بتقولين ليتني ماعرفتها .. ×تقولها وهي تضحك .. تبي نورة تضحك

نورة "ابتسمت " : يااااحبي لك







× يوم جديد ..


× في استراليا ..

× دانة وهي بالقطار .. تفكر .. ياترى للحين بنيوكاسل .. أشوفه وإلا لا ؟؟

×قاطعها عبدالرحمن .. دندون .. المناظر خيااالية

دانة "تطالع " : روووعة .. ربي معطيهم طبيعة ..

عبدالرحمن : والله بالصحاري أحرقتنا الشمس .. آآآه بس ياليت من سكن هنا

دانة " ابتسمت ": مافيه أحسن من إنك تعيش قريب عند أهلك إن شاء الله بخيمة ..

عبدالرحمن "يضحك " : ايييييه كلام أكل عليه الدهر خلينا نعيش نشوف حياتنا ..





× فيصل يكلم بالجوال .. والله ماقدرت أفهم شي الماادة صعبة مرررة صراحة .. شكلي بجيب مدرس .. الله يسهل بس .. والله مالي خلق دراسة وأنا أخوك تعرف الغربة متعبة .. الله يوفق .. ... والله مادري ايه يبي لي بعض الأغراض بس مادري ماأحب السوق .. أجل محظوظة اللي بتتزوجك .. خلاص اللي تشوفه ونتغدى هناك .. اووكي ذن سلامتك .. هلا وسهلا .. × حط الجوال جنب اللاب توب ..×يكلم نفسه .. بشتري لي تي شيرتات يقعدون لخمس سنين قدام عشان أقعد 5 سنين ماأروح للسوق أبد .. آآآه الله يذكرك بالخير يانوير مخليتني ماأعرف السوق ..تتقضى ومريحتني.. "ابتسم " .. والله المرة مالنا غناة عنها ..





× عبدالرحمن ودانة وصلوا وتوهم ينزلون من القطار..

دانة "فتحت الشمسية أول مانزلت .. التفتت على عبدالرحمن وهي تمشي .. الجو مايساعد نروح للبيتش تمطر حبيبي ..

عبدالرحمن "قرب ودخل تحت الشمسية ومسك يد دانة ويمشون .. عادي الحين نروح نتغدى .. وبعدها نتمشى وأبغي أشوف جامعتج اللي درستي فيها ..

دانة "التفتت وابتسمت " : طيب خل نآخذ تاكسي الحين ..



× فيصل ماسك الجوال ..طلع رقم نورة .. ×بينه وبين نفسه .. والله مشتاق لعبودي .. أدق أسألها .. بسرعة ضغط الخضراء ودقات قلبه أسرعت بالنبض .. ومرتبك ..

× بالسعودية الصبح .. صحت نورة على صوت الجوال .. استغربت أخذت الجوال اللي كان على الكومادينة .. تشوف الرقم دولي ميين !! حست ,, !! .. ×ردت



ألو ..

فيصل "ارتبك " : صباح الخير نورة..

نورة "ماصدقت وانصدمت حست ماء حار انكب على جسمها .. صباح النور ..

فيصل " مرتبك بالمرة " : كيفك ؟

نورة "والدمعة بعينها " : تمام ..

فيصل "تنهد " : مع اني متأخر ..عظم الله أجرك

نورة "مرتبكة " : أجرنا وأجرك ..

×سكتوا شوي .. !!

نورة " بسرعة " كيفك ؟

فيصل "يضحك " : تعرفين الغربة متعبة ..

نورة : إيه صح ..

× كلهم مو على بعضهم ..

فيصل "يلعب بالكيبورد " : نورة ..بسألك عن عبودي أخباره ؟

نورة "ابتسمت " : الحمدلله تمام ..

فيصل : وينقصكم شي يانورة ..؟

نورة : ربي معنا الحمدلله ..

فيصل" انحرج " : نورة أنا أبوه لا تستحين قولي ..

نورة "ماصدقت إنها تسمع صوته .. الحمدلله أهلك مايقصرون وأبوك ماقصر الله يجزاه خير ..

فيصل : طيب .. انا بس مشتاق لعبودي وقلت بشوف أخباره وقلت بعد أعزيك مهما كان أنت تبقين بنت خالتي..

نورة : الله يجزاك خير ماتقصر..

فيصل : مع السلامة ..

نورة : مع السلامة .. ×سكرت نورة وهي ترتجف .. وضمت الجوووال .. يااااااااااحلو صوتك .. يااااحلووووه ماتغير .. ×طار النوم من عيونها .. يااااااااالله أنا بحلم وإلا بعلم .. فيصل .. لو تدري شقد اشتقت لك .. ×تبوس الجوال .. يااااااااااحبي لهالصوت ويازييييينة .. ×تنهدت يااااااااارب رجع لي أيامه .. اشتقت له ..


حــنيت لإحساسنــا بـوصالنـا مــن كثــر مـا حنيـــت ..
حسيــت إن الوصــل يمكــن حصـل لـكني مـا حسيــت ..
يــالله يـا ربهــم أهديتـهم فـ أهديـه يـا الله ..
ربــاهـ رب البشـر .. رب القــدر كــان القــدر .. فرقـاه



× فيصل .. يكلم نفسه .. ياااااي يانورة والله شكلك ماصحيتي من النوم من يوم طلقتك .. خبري فيك نوامة .. وتقدرين النوم .. بس والله كانت أيام حلوة .. ×وقف وهو مبسوط ..

×دق جواله .. رد .. هلا سامي .. يالله هذاني طالع .. وينك بالمول ؟ .. اوكي عند المطاعم ؟ نتغدى ونتسوق .. يالله مسافة الطريق ..





× عبدالرحمن ودانة .. بالمول .. جالسين على طاولة بقسم المطاعم ..

عبدالرحمن : حظنا تمطر اليوم ..

دانة "تضحك " : أصلاً مافيه أماكن كثيرة هنا .. كنت إذا زهقت طلعت للمول أو البيتش ولا بعد مافيه أكبر من هالمول

عبدالرحمن : حليووو المول

دانة : ايه بس مافيه أحلى منه ولا فيه مولات كثيرة هنا ..

عبدالرحمن : إيه صغيرة المدينة وبعدين وايد حلوة للدراسة بصراحة ..

دانة : ايه صادق جوها دراسي .. عشان كذا اخترتها قبل ..

عبدالرحمن : طيب وش أحسن مطعم هنا ؟

دانة "تطالع مطعم تركي " : الفطاير التركية حلوووة بصراحة .. وفيه الأكل الياباني اللي أموت عليه

عبدالرحمن : اوكي دامج تموتين فيه نطلب أكل ياباني

دانة "وقفت " : أنا أروح أجيب الأكل عشاني أعرفه .. وبطلب سوشي .. تبي معي ؟

عبدالرحمن : أوكي اطلبي لي ..


×راحت دانة ..

× دخلوا فيصل وسامي قسم المطاعم ..

× عبدالرحمن يطالعهم .. والله الخليجيين وايد اهني .. مع إن أشكالهم سعوديين .. مروا من عند طاولة عبدالرحمن .. ابتسموا .. السلام عليكم ..
عبد الرحمن "ابتسم وعليكم السلام ..

× فيصل يكلم سامي ..

شكله خليجي مهوب سعودي ..

سامي : إيه فيه قطريين هنا .. وفيه اماراتيين ..

فيصل: بس والله السعوديين كاثرين بالديرة ..

سامي : ايييييييه مرة .. تعال نجلس هنا ..

فيصل : تروح تطلب .. ؟

سامي : أوكي .. وش تبي ..

فيصل "يفكر " : والله مشتاق للياباني ..

سامي : أوكي ..وش تبي ؟

× عبدالرحمن .. جالس قدامهم .. بس بعيد شوي .. يطالعهم .. والله فشله ماأقوم أسلم .. ×قام ..

× فيصل لحاله على الطاولة .. يطالع عبدالرحمن وهو جاي ويبتسم ..

عبدالرحمن : السلام عليكم ..

فيصل "قام وهو يبتسم " : وعليكم السلام ..

عبدالرحمن : كيف الحال ؟

فيصل "جلس": والله تمام أخبارك أنت ؟

عبدالرحمن : بخير .. والله يديد على استراليا .. وخاطري أشوف أي عربي بسأله

فيصل : تآمر أمر باللي تبي

عبدالرحمن : انا بصراحة ياي مع زوجتي تدرس بسدني .. بس قلت أستفيد وأتعلم أكثر

فيصل : دارس أنت ؟

عبدالرحمن : إيه مخلص جامعة .. بس جاي أغير جو هنا مع زوجتي اللي تدرس..

فيصل "يبتسم " : شكلك اماراتي ؟

عبدالرحمن : إي والله إماراتي

فيصل : والنعم والله بأهل الامارات

× دانة حطت الأكل على الطاولة .. يوووه وين راح هذا ؟؟ ياربي بس .. تتلفت .. وشافته واقف ومغطي على فيصل "يعني ماتدري من يكلم" ..

سحبت الكرسي وجلست مكان عبدالرحمن يعني قدام فيصل وعبدالرحمن واقف معطيها وراه..


فيصل : ماشاء الله عليك .. والله راحة دامك مخلص وجاي تتمشى خاصة سدني ماتمل منها أبد

عبدالرحمن : ياليت والله نشوفك في سدني ..

فيصل : ماتقصر إن شاء الله ..

عبدالرحمن : عاد أنا أتعلم اللهجة السعودية ..بما ان زوجتي سعودية ..

فيصل "يضحك " : لاااااه ..

عبدالرحمن : يالله أنا بروح أتغدى .. تآمرني على شي يالغالي ..

فيصل : سلامتك .. بس ماقلت وش اسمك ؟

× دانة عصبت .. ياربي منه ياكثر كلامه .. مايمل ..


فيصل : والنعم والله .. أنا فيصل ..

عبدالرحمن : يالله يافيصل نشوفك على خير ..

فيصل : فمان الله .. ×تحرك عبدالرحمن .. وفيصل .. طاحت عينه على دانة اللي كانت تفتش بشنطتها .. ×انصدم .. وماتأكد .. يطالع ..

وعبدالرحمن يمشي ..

×دانة سكرت الشنطة ورفعت رآسها .. ×انصدمت .. تطالعه وماهي مصدقة ..

×جاء عبدالرحمن وجلس .. ×يضحك .. والله السعوديين طيبين مثلج حياتي ..

×دانة ..ساااااااكته وهي ماصدقت ..

× جاء سامي حط الأكل على الطاولة ..

سامي : هذا اللي تبيه ؟

فيصل "انقلب " .. !!!!

سامي "يصوت" : أقول هذا الأكل اللي تبيه ؟

فيصل "وقف " : شوي سامي بطلع .. مادري أحس شي جاني .. ماقدر أقعد ..

سامي" مسك يده " : وش فيك عسى ماشر ؟

فيصل " سحب يده بسرعة ومشى وهو ماصدق اللي شافه " ... مافيني شي مافيني شي .. !!

سامي " يكلم نفسه " .. وش جاه ؟؟

× دانة بعصبية.. خلاص قلت مالي خلق آكل ..

عبدالرحمن : بهواج .. أنا بآكل ..والله مادري شنو اللي صار لج ..

دانة " بينها وبين نفسها " .. هذا اللي كنت خايفة منه ..


× فيصل " مايشوف اللي قدامه .. طلع بسرعة لسيارته .. طلع دخانه ..

ويضرب الدركسوون بقووووة .. ليييييييييييش .. !! ليييييييييش يادانة ..

لييييييش .. ×مرررة منقهر ومنصدم .. وأنا اللي مأمل أرجع لك .. ×حط رآسه على المرتبه .. آآآآآآآآآآآآآآآآه.. آآآآآآآآه.. ياليتني انعميت ولاشفتك معه .. يااااااااااليتني روحي طلعت ولاشفتك ..






× دانة .. طالعة من الغرفة .. ومنسدحة على الكنب .. وتبكي .. !!


اثنينا خننا بعض .. !!
لما رضينا بالفراق..
لاأنت جابك لي حنيني ..
لاجابني لك اشتياق .. !!
عاندتي وعن رحلت .. وأنا بعد زدت العناد ..
علمني بس من هالفراق من اللي فينا استفاد !!
لا أنت جابك لي حنيني ..
ولا جابني لك اشتياق !!

عيشتني بحيرة وألم مابين حزني وعبرتي ..
وحرمتني من كل شي من راحتي ومن فرحتي ..
...
اثنينا خننا بعض !!





.......................




بعد أن رحلت تلك الغيمة السوداء ..
لكن لم تتلاشى بل بقيت بعض الجروح مبلولة ..
أغلقت قلبي عن من كانت تستحقه ..
وأحكمت إغلاقه ..
وفتحته لأخرى حفرت فيه أسوأ الذكريات ..
...
عد للوراء أيها الزمان ..
واجعلني أُقبل رأسها
وأعتذر عما بدر ..!!
وأعطيها قلباً لايستحقه سواها ..
زوجتي الأولى ..
أنتِ الأولى ..
وأنتِ الأخيرة ..
عودي .. !!
واجعلي الحياة تشع نوراً كمبسمك ..
وكوني شمس نهاري .. وقمر ليلي ..
..
آسف ..
اقبلي الأسف ..وهذا قلبي مفتوح لكِ ..
فادخليه .. وعانقيه بكل شوق ..



آسف
فيصل



.............






× في بيت أم عبدالله ..

×نورة تهاوش عبود وهي جالسة على اللاب توب .. ترا جيتك بضربك خل الريموت .. ×عبود يفكك الريموت ..

قامت نورة بسرعة .. وضربت يده وأخذته .. وع أنت ..

عبود : أنتي

نورة "شالته " : تعال اجلس جنبي ولاتحرك .. ترا الحين خالو يجي ..

× جلس جنبها .. ويضغط اللاب توب .. التفتت بسرعة .. خل اللاب توب لاتجيه .. وخر يدك .. ترا بضرب يدك ..

×دق التيلفون .. وردت نورة .. هلا خالة .. الحمدلله تمام .. عبووود الله يصلحه بس ..خوذي وخلي شياطين .. اممممم خلاص أشوف عن عبدالله والله طفشانة.. خلاص بعد المغرب ان شاء الله .. يالله ياهلا وغلا ..

×سكرت ..

×تكلم عبود .. هذي ماما ..

عبود : ماما ..؟؟

نورة : إيه ماما ..اعقل عشان تروح لها ..

× سكت ..
نورة "تمسك خده" : ياااقلبي على الأدب بث .. ياااازينك ..

× سرحت .. وش عندها خالتي .. لايصير بعد أحد خاطبني !! الله يعين بس .. !! متى أرتاح منهم






× في بيت أبو فيصل ..

أم فيصل "تكلم بالجوال " : مبرووووك يايبه ألف مبروووك ..

فيصل : الحمدلله .. عاد بجي وأرتاح شهرين عندكم وأكمل الدكتوراه ان شاء الله ..

أم فيصل : ترفع الراس يايبه ..

فيصل "بهدوء" : طيب يمه وش صار على الموضوع اللي قلت لك؟؟

أم فيصل : اليوم يمكن تجي ان شاء الله ..

فيصل " بينه وبين نفسه .. الله يجمعنا وينسيني ..

أم فيصل : طيب ماأطول أنا تبي شي يبه ؟

فيصل : سلامتك يالغالية سلمي لي عليهم كلهم وقولي لعلي يالقاطع ولاكأن لك أخو ..؟؟

أم فيصل : إن شاء الله يبلغ ..






× عبدالله ونورة وعبود على رجولها بالسيارة ..

نورة : طيب حرام والله رحمتهم ..

عبدالله "منقهر" : طيب ليش ماترحمني ؟

نورة : يعني دام أبوها دري عن حركاتها ودري عن السالفة قبل وخاصة إنه موب هين أكيد بتتغير ..

عبدالله : أنا قلت ربوها عندكم .. ومافيه رجل صبر مثلي .. بس لأني تربيت على الطيب ..وإلا وش حادني على وحدة مثلها

نورة : أنا متأكدة إنها بتتغير ..

عبدالله : لعل وعسى .. أتمنى ,, أنا بعطيها آخر فرصة ..

نورة : الله يجزاك خير ..

عبدالله : بس قهر خربت عليك وأنا أخوك ومرة ندمان إنه لي دور بتركك لعبدالعزيز

نورة "تقاطعه" : والله إذا ماتركته الحين بتركه بعدين أنا ماارتحت واتخذت القرار عشان أمي الله يرحمها وعشان عبودي .. لااا خلني كذا أنا وولدي أحسن من رجل غريب يربيه ..




× في بيت أبو فيصل ..

× أم فيصل ونورة ومنار يتقهوون ..

نورة : ياحبي لك ياخاله .. والله ماعندي إلا عبود يوسع صدري والشغالة بعض الأحيان ..

أم فيصل : وينها ماجبتيها اليوم ؟

نورة : عندها شغل

أم فيصل "تقاطعها " : بس مايصلح تخلينها والله ماينضمنون لو تقرين القصص تشوك بالراس من بلاوي هالشغالات

نورة : الله يكفينا شرهم ..

منار "قامت ..

أم فيصل " تطالع منار " : وين تقهوي معنا .. ؟

منار : بروح أجيب عبودي من علي ..

أم فيصل : زين واقعدي شوي عنده أبي نورة ..

منار " وهي تمشي " : طيب ..

نورة "استغربت ... !!!!!

×راحت منار ..

أم فيصل : شوفي يانورة .. قعدتك كذا وأنا خالتك غلط .. ويقولون مالها رجل شينة وتعرفين الناس مايرحمون

نورة "انقهرت " : أنا كذا مرتاحة ياخالة .. ولا أبي أتزوج .. وقلت لك قبل لا تقولين عن أي رجل يخطبني

أم فيصل "ابتسمت " : ليش ؟

نورة " بهدوء " : عبودي ياخاله .. ماأقدر والله حياتي كلها له

أم فيصل "قاطعتها " : حتى لو كان أبو عبودي يبيك ؟

نورة " مااستوعبت و بسرعة " : وشلوووون ؟

أم فيصل "مبتسمة " : حتى لو فيصل اللي يبي يرجع لك ..

نورة "ارتبكت ": هو قال كذا ؟

أم فيصل "تصب قهوة " : إيه هو يبي يرجع لك عشانك وعشان عبود .
.
نورة " سكتت .. ومن جوا ماصدقت من الفرحة .. ×ابتسمت ..

أم فيصل : توافقين ترجعين له ؟

نورة "تلعب بطرف شعرها" : أبو عبود ياخاله ..



ياللي ماحبيت عمري إلا منك .. منهو يقدر يشغل التفكير عنك ..!!
لو عطيتك ماي عيني مو كثير .. لو تشاركني سنيني مو كثير ..!!


جابك الله لي هدية من السماء جيت مثل الشوف لعيون العمى ..
صرت أشوف الدنيا فيك .. !! ياحيـــاتي ياحلاة الدنيا فيك ..






× نورة بسريرها .. وتحاول تنوم عبود جنبها ..وماقدرت .. وتسولف عليه .. خلاااص عبودي بنجتمع أخيراً .. ربي مايضيع حق أحد ..

الحمدلله .. "دمعت عيونها " .. وينك يايمه تفرحين معي .. أدري إنك بتصيرين أسعد وحدة بالدنيا .. آآآآه يايمه .. لو تشوفين شقد فرحانة إن فيصل بيرجع لي .. × تطالع عبود .. وأنت بيصير أبوك قريب منك ..

×عبودي يضحك .. ×نورة تبوسه .. الله يخليك لي




×يوم جديد باستراليا ..

× فيصل .. يكلم .. الله يباااارك فيك .. أكيد ليلى انبسطت ..

خالد "يضحك " : مانامت من الفرحة .. الله يوفقك وأنا أخوك والله عين الصواب اللي سويته ..

فيصل : الله يتمم وأنا أخوك .. تعرف الظروف اللي مريت فيها مو سهلة .. وانصدمت وعرفت إني على خطأ ..

خالد : هذي الدنيا تضحك لك يوم وتبكيك أيام .. وإن شاء الله الأيام الجاية كلها وناسة ..

فيصل : إن شاء الله ..

خالد : واللي صار لك درس .. وتعرف إن زوجتك مافيها مثلها ..

فيصل " بقهر " : والله إني تندمت على كل شي سويته .. وعرفت إنها طيبة وماتستاهل أبد أسوي فيها كذا .. بس ابليس أعوذ بالله منه ..

خالد : الله يوفقك ويسهل أمرك ..

فيصل : اللهم آمييييين وياك..







×في بيت أبو فيصل

× علي ومحمد بغرفتهم ..

محمد : وش قلت ياشييييخ أبي بلاي ستيشن حرام بعد ؟؟

علي "معصب ": وأنا قلت حرااام .. بس أنت واحد ماتنضمن صراحة والبلاي ستيشن فيه مضارب وتفحيط وبلاوي وغزو على قولتهم .. أنا ماني ضد البلاي ستيشن .. بس ضد إنه يصير عندك .. لأنك أنت شخص همجي وعندك سرعة بالتطبيق ولو تشوف مضارب وإلا تفجير رحت تطبق ووديتدنا بستين داهية فلذلك اعقل واطلع من مخي أنت وأفكارك

محمد "انقهر" : يااااخي وش تقول أنت ؟؟

علي " يضغط بجواله وواقف " : وأنا صادق .. مابغيت تودينا بداهية وأنت توك شاري لاب توب

محمد "يقاطعه" : ايه ماله داعي تعاير وتعيد ماضي .. أنا كنت غبي وماأفهم والحمدلله فكني الله من شرهم

علي "يطالعه " : الحمدلله .. بس اعقل وخلك بدراستك

محمد "قام ": بروح أجلس مع أمي أبرك من مقابل وجهك أنت وكلامك السخيف ..

علي "يضحك " : انقهرت ؟

×محمد طلع ..
......................


أم فيصل وعلي بالصالة ..

أم فيصل " معصبة " : بس مايصلح تقول له كذا ..؟

علي : أمزززززح والله العظيم أمزح

أم فيصل "مستغربة " : هذا مزززح ؟؟؟؟ الله يصلحك وأنا أمك ..
علي : خلاص أنا أعتذر له بطريقتي ..

أم فيصل : لا جد لاتقهرونه .. يعني اللي سواه شي مو سهل .. ويبي ينسى .. مو تقعدون تعايرونه .. يأثر على نفسيته

علي : حقك علي ياأم فيصل ..





× في بيت أم عبدالله ..

×عبدالله ونورة يتقهوون .. المغرب ,,

نورة : يكفي وأنا أختك إننا راح نجتمع لو عشان عبودي اللي ماله ذنب ..

عبدالله : الحمدلله .. والله ماله ذنب .. وبعدين لازم ينتبه لولده .. والله بعض الأحيان ماأحس عنده شعور تجاهه من كثر ماأبعد عنه ..

نورة : هذا اللي قاهرني .. وأنا تعبت لحالي .. تعرف لازم الأبو ..

عبدالله : الله يوفقك وأنا أخوك ..

نورة "تطالع ساعتها " : يالله رح جب مرتك .. الساعة 7 ..

عبدالله : شوفي حمي القهوة وحطي شي ..

نورة "ابتسمت " : متحمس ؟

عبدالله "وقف " : لازم نحط لها شي يعني تعرفين ..

نورة "تضحك وتشوفه " : طيب ياعبدالله أفندي .. ومر جب معك تشوكليت لأني أذكرها تحب الخرابيط هذي ..

عبدالله "يطالعها " : ايه بمر .. وأنت ماتبين شي ؟

نورة : جب الحلاوة اللي يحبها عبودي ..

عبدالله : من عيوني .. بس صحيه يكفي نوم ..

نورة "وقفت " : يالله رح أنت بسرعة ..







× في بيت أبو عبدالعزيز ..

×سحر واقفة هي وسارة بالحوش تنتظر عبدالله ..

سحر " بصوت واطي " : ومثل ماقلت لك .. أخته وبترجع لزوجها وأمه ماتت يعني ماعندك أحد فلذلك عدلي معاملتك معهم ..

سارة: الله يعين بس .. وأهم شي نوير تذلف وأرتاح ..

سحر "منقهرة ": ايه بس أنت تعدلي .. والله إن يذبحك أبوي ..

سارة "دق جوالها " : يالله يالله مع السلامة ..

سحر : مع السلامة بالتوفيق ولاترجعين لنا أبد ×تضحك ..

سارة "وهي تمشي " : وخري بس ..








احترق قلبي شوقاً ..
واحترقت أنا حباً وعشقاً ..
كم خانتني الأيام وكم عانقت جروحي غدر تلك الأيام ..
انتظرت البسمة تعود .. !!
لكن زادت جروحي ألماً وزدت أنا قهراً
بعدكِ ياأعز الناس
ياأمي الحبيبة ..

رحلتي وتركتي جروحي تتضاعف ..
ولكن
قد تلتم بعض جروحي في قادم الأيام ..
وقد ترجع البسمة ..
أو قد أذبل .. !!
كالوردة التي تفقد من يسقيها ..
من يدري .. !!
نورة





× في بيت أم عبدالله ..

×أم فيصل وسارة وليلى ونورة بغرفة نورة .. وعندهم الكوافيرة ..

سارة : ياااشينك يانورة .. ليش مالبستي فستان زواج ؟

ليلى : أنا قلت لها كذا ..

نورة : أحسن ناعم .. ياختي عارفني ونضحك على أرواحنا ×تضحك ..

أم فيصل : بس الفستان مررة قابل عليك .. ولونه يليق عليك ..

سارة : إيه والله مرة يجنن ..

نورة : ياحبي لك سارة لبسي عبود .. شوفي ملابسه مع الشغالة ..

سارة : طيب ..

×طلعت سارة ..

أم فيصل : يالله خلي هذي تحرك بسرعة .. عشان تجلسين شوي مع أم عبدالعزيز

نورة : بس أم عبدالعزيز بتجي ..

أم فيصل : ومعها سارة .. ومادري إذا بيجي أحد .. !!



× في بيت أبو فيصل ..

فيصل "يلبس شماغه ": وش رآيك عليوي ضبطت الشخصية ؟

علي "واقف ": ممتازة .. وبعدين عارفتك .. ياخي تضحك على روحك ..

فيصل "يضحك وهو يمشي " : أنا سامع عنك إنك صاير ظررريف وخفيف دم هالأيام .. والأصداء واصلتني وأنا باستراليا .. يقولون من يوم تخرج وتوظف أخوووك صاير قمة البثارة مع الظرافة ..

علي "يضحك " : الله يسلمك ياشيخ .. حتى أنا حاس بالشي هذا ..

فيصل " وهو طالع " : يالله بس تعال بسرعة كانك بتروح معي ..؟

علي : يالله جيت ..



× أم فيصل .. ونورة ومنار توهم جالسين ..

×.. وسارة تصب ..

أم عبدالعزيز "تطالع نورة " : ماشاء الله تبارك الله .. الله يوفقكم ..يارب ..

أم فيصل : اللهم آمييين ..

أم عبدالعزيز : أجل مافيه أحد بيجي وخزياه شكلي بس أنا اللي جاية غلط ..

أم فيصل " استغربت " : وووش دعوى ياأم عبدالعزيز والله من غلاك وأنت من أهل الدار ..

نورة : وتعرفين ياخاله غلاك من غلا سارة ..

×سارة بينها وبين نفسها أجل أمي موب غالية .. دامها من غلاي ..

أم عبدالعزيز : الله يسلمكم .. يارب ..


× أبو فيصل يكلم فيصل عند باب بيت أم عبدالله ..

أبو فيصل : وترا نورة ماهي نورة الأولى .. وبعد ماماتت أمها صايرة مرة حساسة .. وأنت فاهم وتعرف .. وأنا سألت أمك عن كل شي..

فيصل : لاتخافون بحطها بعيوني ..

أبو فيصل : تراها ضعيفة والله مرت بأوقات صعبة ..

فيصل "مسك يد أبوه " : لا تخاف يبه .. وأنا ماقلت برجع لها إلا عشانها بنت خالتي .. وأنا أولى الناس فيها وغير كذا عشان ولدي ..

أبو فيصل : الله يوفقك وأنا أبوك .. يالله ادخل ..

فيصل "باس راس أبوه " : دعواتك يالغالي ..

أبو فيصل : الله يوفقك ..





× دخل فيصل .. للمجلس ..فيه..وعلي وخالد ..

×سلم على خالد ,, وبارك له ..

×دخل عبدالله .. وابتسم .. وسلم على فيصل .. ياااهلا والله وسهلا .. الله يوفقك يارب

فيصل : اللهم آمين .. وياك .. أخبارك ؟

عبدالله : الحمدلله تمام تفضل ..استريح ..

فيصل "جلس " ..

علي : وين أبوي .؟

فيصل :يكلم واحد عند الباب..





× منار بصوت واطي تكلم نورة .. ترا فيصل وصل ..

نورة "قلبها يرجف بسرعة " : من قال لك ؟

منار : أنا سمعت صوته قبل شوي ..

نورة "مرتبكة ": طيب اسكتي لايسمعونك ..

منار "وهي تضحك " : تراااه متغير وزاين وصاير أزين من أول ..

نورة "ابتسمت .. ×بينها وبين نفسها .. وهو شين أصلاً .. يااااحبي له بس ..

× دق جوال أم فيصل .. هلا عبدالله ..

×نورة ارتبكت وكأنها أول مرة تشوفه .. !!

أم فيصل : إيه إيه خلاص .. طيب .. هلا ..

أم فيصل "قامت وراحت لنورة " : يالله قومي للمجلس عشان فيصل بيجي ..
نورة "وقفت وهي مرتبكة وبصوت واطي لايدخل أحد ياخاله .. خليه لحاله ..

أم فيصل "تبتسم " : إن شاء الله ..

× راحت نورة ..

أم عبدالعزيز : الله يحننه عليها يارب ويسخرهم لبعض وياجعلهم مايشوفون مكروه ..

أم فيصل "وهي تمشي " : اللهم آمين ..

× دخلت نورة المجلس وصكت الباب .. ومرة مرتبكة .. يااارب .. ×تقرا بينها وبين نفسها .. سمعت أصواتهم قربت .. وراحت تجلس قدام الباب .. شافت الظل .. وشافت يد الباب تتحرك .. ×طاح قلبها ..

×فتح فيصل الباب .. ×ودخل .. ويلتفت يكلم أمه .. خلاااص طيب يمه ..



نورة "وقفت وتشوفه دمعت عيونها من الشوق ومن الظلم ومن القهر ومن كل شي صار لها بسبب فيصل ..

×فيصل صك الباب .. وابتسم .. مااااشااااء الله يااانوير زاااينة .. ×قربت وهي طايرة من الفرحة ..

×فيصل قرب وسلم عليها .. ×وهي ضمته وقلبها يرجف ..×بكت ..

فيصل "أبعدها ويضحك " : لاتوصخين ثوبي بكحلك ..

نورة "راحت تآخذ منديل ..

فيصل "قرب ومسك يدها .. وجلسوا .. معقولة كل هذا شوق ..

نورة "بصوت هادي " : وتتوقع كله شوق ؟

فيصل " يطالعها" : عيونك تقول شوق ..

نورة "ابتسمت " : شوق وحب وغلا وكل شي حلو يجي فبالك ..

فيصل "بهدوء" : يعني مبسوطة ؟

نورة "تطالعه وحطت يدها على خده " : تسأل مجنونتك هذا السؤال ؟؟ أكيد مبسوطة ..

فيصل "يبتسم " : طيب اخبارك ؟

نورة : ماني مصدقة إني رجعت لك ..

فيصل : لا صدقي ..

نورة "طاحت دموعها " ..

فيصل "يمسح دموعها " : يكفي دموع .. الحين يشوفونك ويقولون هاوشها وأنا ناقصهم بعد ×يضحك ..

نورة "ابتسمت ": ياحبي لك .. أخبارك أنت ؟

فيصل : طاير من الفرحة ..

نورة "سكتت ..

فيصل : وين عبودي ؟

نورة "بغيره " : يوووه توك تشوفني وتقول وين عبودي ؟؟

فيصل "يضحك " : تغااارين ؟

نورة "بصوت هادي " : لا تقهر .. شوي على عبودي .. خلنا الحين لحالنا ..

فيصل "قرب وباس رآسها " : طيب .. آآآآآسف ومن قلبي أقولها لك .. أبيك تنسين الماضي .. وأبي نعيش حياة حلوة ..

نورة "تطالعه " : من يوم رجعت لي وأنا نسيت الماضي ..

فيصل : وبحطك بعيوني ..وبصير أمك وأبوك وأخوك وكل شي بالدنيا ..

نورة "ودموعها تطيح " : أمي ؟؟؟

فيصل "سكت ..

نورة : وينها تفرح معي ,, × بكت ..

فيصل "ضمها .. يااالله لاتقلبين اليوم صياح .. نبي نفرح .. نبي حياتنا تصيرصافية من كل شي ونبي نصير أحلى اثنين ..

× أم فيصل قطعت الجو عليهم وطقت الباب ..

فيصل : ادخل ..

×دخلت أم فيصل وهي شايله عبود.. هاه ماتبون عبود معكم؟

فيصل " قام يآخذ عبود " : إلا إلا نبيه يابعد قلب أبوه .. × يكلم عبود .. مااشتقت لبابا .. ×أخذه ..

أم فيصل : خوذوا راحتكم أنا بطلع ..

نورة " تبتسم " : الله معك ياخاله ..

×طلعت أم فيصل

× فيصل جلس وعبود بحضنه .. هلا هلا بعبودي ..

نورة "مسكت يد عبود " : هذا بابا ..

عبود "يطالع أبوه ويحط يده على وجهه " : بابا ..

فيصل "ضمه بقوة ": ياااااحبي لك ..

نورة : عسى الله مايفرقنا ..

فيصل "مسك يد نورة " : آميييين عسى الله يقدرني وأسعدكم وأعوضكم عن كل اللي فات ..

















ماأجمل مصاعب الحياة عندما تثمر عن سعادة .. !!
وماأجمل الحب عندما يكون بطل تلك المصاعب ..!!
..
كم هو مجنون هذا الحب .. !!
وكم هو قاسي مع قسوة الأيام ,, !!
..
لكن ماأطيبه عندما يجتمع العشاق ..



النهاية ..