× في بيت أم عبد الله ..
× نورة وأم عبد الله بالصالة ..
نورة "بصوت واطي " : من جاي معه ؟
أم عبد الله " بهمس " : علي .. وقال لي علي فيصل يبي يسلم عليك قلت لا ..
نورة " سكتت شوي .. " طيب ماسمعتي وش ردت فعله يوم شاف عبود ؟
أم عبد الله " وقفت وبصوت واطي " : بروح أنادي علي يآخذ القهوة له .. وأقول له ينتبهون للولد إذا بيطول ..
نورة : أوكي ..
× راحت أم عبد الله ..
× نورة وقفت ,, وراحت تمشي شوي شوي للمجلس وتسمع .. فيصل يكلم علي ..
فيصل " يضحك ويلعب ولده " : يابعد عين أبوك .. × يطالع علي .. تدري ياعلاوي ما توقعت شعور الأبوة كذا ..
علي " يبتسم " : تنصحني أتزوج ..
فيصل " رفع ولده " : إذا بتجيب مثل عبود تزوج ..
علي " يضحك ....!!




× نورة تسمع .. وبينها وبين نفسها .. يازين صوتك.. نفسي أسلم عليك .. وأسألك عن أخبارك × طاحت دموعها .. ×ورجعت .. جلست بالصالة وكأن هموم الدنيا كلها على رآسها .. × جت أمها للصالة ومعها القهوة .. نورة ..
نورة " مسحت دموعها بسرعة " : سمي ..
أم عبد الله " تطالعها " : والله إني مشتاقة لفيصل وودي أسلم عليه وأتحمد له السلامة ولو مو عشانه عشان أختي ..
نورة "ابتسمت " : سلمي يمه .. لا تجاملينني ..
أم عبد الله " قربت وبرحمه وبهمس " : والله إن التراب اللي تمشين عليه يسوى الدنيا ومافيها واللي سواه فيصل كأن الجبال فوق صدري من القهر ,, بس والله إني بين نارين أنت وأختي ,, وبتنقهر لو تدري إني ماسلمت ..
نورة : ياااااابعد عمري أنت .. لا والله يمه جد روحي ..
أم عبد الله "مشت " : الله يعينني والله أخاف أصيح ..
نورة " تطالعها " : روحي بسرعة يالله .. × بصوت واطي .. ياليتني خالته .. ولا صار اللي صار ..


× دخلت أم عبد الله ..
× فيصل انحرج ..
× قربت أم عبد الله .. الحمد لله على السلامة يافيصل ..
فيصل " يبوس رآسها وعبود معه " : الله يسلمك .. × نزل رآسه بسرعة ..
× علي أخذ القهوة يصب ..
أم عبد الله "جلست وفيها حرة " : كيفك ؟
فيصل " يبتسم " : الحمد لله دامي شفت عبود بخير .. وشفتكم بعد ..
أم عبد الله " نزلت رآسها " : الحمد لله .. ×وقفت .. يالله مع السلامة أشوفك على خير ..
فيصل " استغرب " : ما سولفت معك ياخاله ..
أم عبد الله " والدمعة بعينها ووقفت عند الباب " : ما أقدر .. × طاحت دموعها ..
× علي نزل رآسه ,,
أم عبد الله " التفتت وتطالعه " : لولا غلا أمك بقلبي ما مديت يدي لك ..
فيصل " سكت ..
أم عبد الله " مسحت دمعتها " : ترا نورة وعبد الله أغلى ماأملك بالدنيا .. واللي يرمي عليهم كلمة تضيق فيني الدنيا ..
فيصل " ساكت ..
أم عبد الله " ابتسمت بحزن " : ماودي أقول لك الكلام هذا الحين .. بس أنا أم ومو قادرة أنسى اللي سويته في بنتي .. × طلعت لأنها تبكي ..




× سكتوا شوي فيصل وعلي ..
علي " بصوت واطي " : ياااااويلك من الله .. بكيتها .. والله تقطع قلبي ..
فيصل " يتنهد " : تدري علي ؟ والله إني تسرعت بالجية .. والله وسيع وجه .. اللي سويته مو هين ..
علي : أحرجتهم ..
فيصل " يطالع ولده " : عشانه ماقدرت أفكر ودي أشوفه .. وتوي أحس إن الجية مالها داعي أبد ..
علي : يالله .. الله يعينك أنت فتحت لنفسك مليون باب ومن الأساس ماشاورت أحد .. واللي بيجي أكثر .. بعد عبد الله ماجاء ..
فيصل " يتنهد" : شكلي بخسر أهلي عشان دانة ..
علي : أنت اللي اخترت .. وتحمل ..
× فيصل سكت ..








× في بيت أبو دانة ..
× دانة بالمطبخ تكلم مشاعل بالجوال .. مشمش حتى مسج ما أرسل !!!
مشاعل : يمكن جالس مع أهله .. والله المفروض تقدرينه اليوم أول يوم ..
دانة : حتى أنا من أهله .. المفروض مسج طيب ؟ والله شي غريب !
مشاعل : يمكن فيه شي عندهم ..
دانة : ياخوفي رجع للعلة يامشمش والله بموت لو يرجع ..
مشاعل : عادي توقعي كل شي .. يمكن يبي يعدل بينكم .. أول يوم بعد السجن لها واليوم اللي بعده لك × تضحك ..
دانة " بتطنز ": وش المطلوب مني أضحك وإلا أبتسم وإلا ايش ؟
مشاعل " تضحك " : صيحي .. ×بسرعة .. شوفي شوفي .. تذكرت شي ..
دانة : وش تذكرتي .. ؟
مشاعل : نورة مو حامل .؟
دانة " تتنهد " : ايييييييييييييه أكيد ولدت .. لأنها من زمان حامل ..
مشاعل : أكيد ياقلبي ..
دانة "عصبت " : الله يآخذها مو وقتها ..
مشاعل : أنت حرام عليك تدعين عليها ..
دانة : ياكرهها بعد ..ميشو إذا تزوج عليك اللي عندك عرفتي وشلون القهر ..
مشاعل " بهدوء " : أكيد بنقهر لأني بصير مكان نورة واللي راح تزوج رجلي بتصير خاطفته مني وبموت قهر .. لأنها زوجة ثانية ..
دانة " استغربت من كلام مشاعل " : وش تقصدين ..؟
مشاعل : جد هذا واقعك لا تتهربين أنت اللي داخله عليها وتتكلمين عنها وكأنها خاطفة زوجك ..
دانة " انقهرت " : أقول وخري بس تقولين الكلام ولا تثمنينه .. ياثقل مزحك .. بايخه .. × عصبت ..
مشاعل " تضحك " : مع السلامة شكلك عصبتي ..
دانة : وخري بس × قفلت بسرعة ,, يووووه منك وكلامك البايخ ..









× في بيت أبو فيصل .. فيصل وعلي بغرفة النوم ..
فيصل " مسترخي " : أمي ياحبي لها مرة فرحت يوم عرفت إن خالتي سلمت ..
علي " جالس على طرف السرير " : ماتدري إنها بكت ..
فيصل "تنهد بقهر ": يالله .. وش مسوي أنا ؟
علي : شكلك ندمان ..
فيصل " يبتسم ويكابر " : ومن قال ؟ .. والله مشتاق لدانة مرة .. ومتوقع إن نورة ترفض تسلم علي ..
علي " استغرب " : للحين تبي زوجتك الثانية ..
فيصل " يضحك باستهزاء " : ياخي لعبة هي ؟؟؟ وبعدين وش تغير ؟؟ دخلت السجن وطلعت ..
علي : بس كلهم ضدك ..
فيصل : يتعودون أنا بضحي عشان أرضيها .. × يتنهد .. أحبها ياعلي .. والله أحبها .. × أخذ جواله .. ويطالع علي .. تدري الجوال للحين مافتحته وأكيد داقه وقالبه الدنيا ..
علي " منقهر " : يا مسكينه يانورة ..
فيصل : حتى نورة أبي أشوفها وأدري عن أخبارها ..
علي "يضحك " : كم قلب لك ؟.
فيصل " يطالعه " : مو على كم قلب .. !! نورة تعودت عليها .. ودانة حبيتها .. يعني كلهم أفقدهم ..
علي : طيب من تختار ؟
فيصل " سكت شوي " : هذي أم عبد الله .. وهذي دانة ..
علي : يعني كلهم سوا ..
فيصل : لو نورة ماجابت عبود كان اخترت دانة ..
علي " سكت ..
فيصل : ما أعجبك كلامي ..
علي " بقهر " : والله العظيم لو شايف حالة نورة وهي تولد إن تترك دانة واللي جابها ..
فيصل " تحمس " : وشلون ؟؟؟
علي : أنا اللي وديتها يوم بدا معها الطلق .. والله العظيم رحمتها وقلت كيف يتزوج عليها فيصل .. تمنيتك أنت اللي موديها عشان تعرف قيمتها جد ..
فيصل " سكت ..
علي : كانت تتعذب .. وأدعي ربي نآصل المستشفى بسرعة ..
فيصل : مرة تتألم ؟
علي "يتنهد " : يااااااااااالله .. بعض الأشياء ماأتذكرها من صدمتي بالولادة ماتوقعتها كذا .. وشلون هي اللي تحس فيها ؟؟؟
× فيصل سرح ..!!!!!!









×دانة منسدحة بتنام .. ماسكة جوالها .. وتدق .. ياااالله للحين مقفل .. وش أسوي أنا ؟؟!! والله بموت قهر ..













× فيصل منسدح ومشغل الاباجورة.. ويطالع علي وهو نايم .. × يبتسم .. ماشاء الله عليك ياعليوي قبل شوي تسولف وهالحين تشاخر .. عطني شوي .. طلع جواله من تحت الوسادة وفتحه .. وقام من السرير يمشي شوي شوي عشان مايصحى علي ..وفتح الباب وطلع .. نزل للصالة .. وجلس .. وطلع رقم دانة .. ودق ... !! بصوت هادي .. السلام عليكم ..
دانة " كانت نايمة وبهدوء " : وعليكم السلام ..
فيصل " يضحك " : نايمة ؟
دانة "تنبهت وبسرعة " : فيصل ؟
فيصل " يضحك " : ياااااابعد عمري ياهالصوت .. وربي اشتقت لك ..
دانة : حيااااتي ,, أخبارك ؟
فيصل : والله تمام بس مشتااااق .. تعرفين وش معنى مشتاق ؟
دانة " بكت " : والله اشتقت لك .. حرام عليك ولا دقيت ولا مسج ..
فيصل : أبيك تشتاقين أكثر .. مايحق أتغلى ..
دانة "تتنهد وبدلع " : إلا يحق لك والتغلي لك ..
..........

......






× راحت الليلة سواليف وغزل وعتب .. !! بين قلبين جمعهم الحب .. !!











× في بيت أم عبد الله نورة جالسة على طرف السرير ومعها الجريدة ..


نسيت أول حب داعب نبضات قلبي ..
ونسيت أيام شوقي لذلك الحبيب ..

أحبك
يامن أعشق حتى تعذيبه !!
يامن سلمته قلباً مخلصاً ..
ورده لي جريحاً ..
يبكي دماً ..

أحبك
يامن جعلت سعادتي ترحل معك ..

أحبك
فهل تعود ...!!



× نورة ماسكة الجريدة وتتنهد .. تكلم نفسها .. يالله على صاحب الخاطرة يعاني مثلي .. !! يعني مو بس أنا اللي مكسورة .. × قطع تفكيرها صوت أمها تصوت .. نورة تعالي شوفيني وأنا أغسل ولدك تعلمي أنا ماراح أدوم لك..
نورة " تكلم نفسها " : الله يخليك لي بس .. × وقفت .. جيت جيت أتعلم × تضحك ..











× في بيت أبو فيصل ..

× أبو فيصل وأم فيصل بغرفة النوم .. بيطلعون منها ..
أبو فيصل " واقف وبهمس " : مثل ماقلت لك تفاهمي معه شوي شوي باللين كل شي يمشي ..
أم فيصل " تطالعه " : إذا قدرت إن شاء الله ..
أبو فيصل : الله يهديك مافيه شي يجي بالشدة ..
أم فيصل : هذي أنا مأقدر أتغير .. وش أسوي ..
أبو فيصل " عصب وبصوت واطي " : هذا اللي خلا فيصل كذا .. كله منك ومن البداية غاصبته على شي مايبيه .. خلاص اسلوب الشدة ماينفع ..
أم فيصل : الله يهديك بس وش قلت أنا بحاول أتفاهم معه .. خلاص








× فيصل وعلي ومنار جالسين بالصالة ..
فيصل " يطالع منار " : هاه منور تغطيتي ؟
منار " تضحك " : ياااااي من زمان أتغطى بالشارع بس جوا البيت لا ..
علي " يضحك " : يعني عن عبد الله ما تغطي وجهها ..
منار " تطالع علي " : بعد هذا اللي ناقص أتغطى عن عبد الله .. زوج أخت صديقتي ..
فيصل وعلي يضحكون ..
فيصل " يضحك " : ياخال أبوي حك ظهري .. ليش أبعدتي ولد خالتك ياخلبة .. وبعدين بتتغطين عنه إن شاء الله أحسن لك الستر زين..
علي " يطالع منار " : السنة الجاية صح ؟
منار : لا مابي أتغطى عنه .. هو يقول بزوجك ولدي .. وبيصير عمي وبكشف بعدين .. يعني وشوله أتغطى .. هو اللي يقول كذا..
فيصل " يبتسم " : ماشاء الله كلامك أكبر منك ..
× نزلوا أبو فيصل وأم فيصل .. ......... السلام عليكم ..
كلهم : وعليكم السلام ..










× دانة توها طالعه أخذه شاور .. وتحط كريم على وجهها بالغرفة .. × أمها تطق الباب .. دانة دانة
دانة : مفتوح الباب ادخلي ماما ..
أم دانة " تبتسم " : ماودك تنزلين تغدين معنا ..
دانة : مامي اليوم بيجي فيصل يشوفني وأبي أتزين له .. خلي الشغالة تجيب لي الأكل هنا .. مالي خلق أنزل ..
أم دانة : على راحتك يمه .. بس إذا خلصتي مري وريني شكلك ..
دانة " تبتسم " : إن شاء الله ..
أم دانة " رجعت " : ايه صح .. وش بتلبسين له ؟
دانة "تفكر " : امممممممم والله محتارة أنت وش رايك ؟ فستان نعوم مرة وإلا تنورة ..
أم دانة : فستان حلو ..
دانة " التفتت للسرير وأخذت الفستان " : هذا شوفيه حلو ..
أم دانة : لااااا والنيلي يجنن عليك .. ماشاء الله ..
دانة : توقعين يعجبه تعرفين الرجال يمكن الألوان هذي جرئية ..
أم دانة : لالالا يعجبهم أي شي .. لأن الرجال يهمهم اللباس مو اللبس ..
دانة " ابتسمت ..








× أم فيصل وفيصل بالمجلس .. لحالهم ..
فيصل " منزل رآسه " : يمه ما أقدر أطلقها .. تكفين لا تضغطين علي ..
أم فيصل : يايبه بنت خالتك حرام تكسر خاطرها .. وجابت لك الولد اللي بيزين العلاقة بينكم ويمتنها ..
فيصل " رفع رآسه " : ونورة ماراح أطلقها .. والله يقدرني وأعدل ..
أم فيصل " تضحك باستهزاء " : عبد الله مسافر وإذا رجع بيحل كل شي .. وبيحط لسالفتك مع أخته حد ..
فيصل " ساكت ..... !!
أم فيصل " عصبت " : أنت ماتغيرت أبد .. هي هي عادتك .. ماتعطيني كلمة .. حتى يوم أخطب لك نورة استسلمت وساكت .. رد خليني أسمع رآيك .. عطني لو كلمة وحدة ..
فيصل " يتنهد " : لا إله إلا الله .. يمه وش أقول .. خلاص قلت لك ماني مطلق ولا وحدة ..
أم فيصل " بتطنز " : أقول لك خل نرجع نورة لك تقول ماني مطلق .. وكل كلامك ماني مطلق .. × وقفت .. شف يافيصل .. أنا أمك وأنا أكثر وحدة تعرف مصلحتك ,, اللي عرفته إنك للحين طايش ولا تعرف تدبر نفسك أبد .. المهم دامنا ماوصلنا لحل .. يا تطلق دانة .. وإلا البيت يتعذرك ..
فيصل .. ساكت ..
أم فيصل " وهي واقفة ومعصبة " : للحين ساكت ما ترد .. ؟؟ فيصل اطلع دبر نفسك بنفسك .. مثل ماقدرت تدبر مهر لعلتك هذي .. تقدر تدبر لك شقة .. أنا ماعندي استعداد أخسر أختي عشانك .. وأنا طقيت لها صدري وقلت بحلها .. بس للأسف اللي قدامي مو رجل .. ولا فيه ذرة رجولة ..
فيصل " عصب " : وش أقول وش تبيني أسوي .. تطلبين المستحيل .. × وقف .. خلاص أطلع من البيت .. وأنا اللي قلت قلبك متقطع من الشوق .. آخرتها تطردينني .. وأنا مالي يوم عندك .. !!
أم فيصل " تطالعه ومستغربه إنه رفع صوته " : ترفع صوتك عشان وحدة ماتسوى ؟؟؟ أنا أمك يافيصل .. أنا أمك ..
فيصل " معصب " : أنت اللي تفرضين رآيك .. تبين الناس على كيفك .. × طلع بسرعة ..
أم فيصل " طاحت دموعها .. .. !! لا إله إلا الله .. يارب تصرفه عنها ..






× في سدني .. عبد الله وسارة بالفندق ..
سارة " واقفة على الدريشة وتطالع المطر " : عبد الله .. أجواء تفتح النفس ..
عبد الله " جالس على الكرسي " : أهم شي تعجبك الأجواء ؟
سارة " تبتسم " : أكيد دامي معاك ..
عبد الله : يالله والله منقهر .. المفروض نورة معنا ..
سارة " حست بغيرة " : بس الأقدار فوق كل شي وربي كاتب الشي هذا ..
عبد الله : صح .. الأقدار فوق كل شي ..
سارة " تطالع عبد الله وبخبث" : ياعمري يانورة مسكينة مرة وتكسر الخاطر .. ياربي ليش الرجال مايرحمون .. يعني مالها سنتين أو أقل وتزوج عليها .. بس بصراحة بصراحة .. أكيد التقصير منها ..
عبد الله " استغرب " : لا نورة ماتقصر .. وما أسمح لك تتكلمين عن نورة مو مسكينة ولا شي .. ربي معها ..
سارة " تضحك بخبث " : بس إذا فيصل بيطلق بيطلق ماسأل عنكم ..
عبد الله " يطالعها " : ومن قال لك إنه بيطلق .. فيصل يبي نورة وقريب بيطلق زوجته الثانية .. وأرجوك سارة أمورنا العائلية اطلعي منها ..
سارة " عصبت " : لااااا ياقلبي .. أنا الحين منكم وفيكم ..
عبد الله : يالله يالله بس البسي خلينا نطلع .. وحركات الحريم اللي يدخلون أنفسهم في كل شي ماأبيها .. وأبيك تعرفين إن نورة عن الدنيا كلها ..
× سارة انقهرت وسكتت ...













× دانة .. بالمطبخ .. عصبت على الشغالة .. أنا ماقلت لك صبي العصير الثاني ..
الشغالة : نسيت .. خلاص سوي مرة ثاني ..
دانة : يالله بسرعة .. × رن الجرس .. خلاص خلاص روحي افتحي الباب وارجعي يالله ..
الشغالة : طيب .. × راحت ..
دانة " تنهدت " : ياااالله بدوخ .. !!









× أبو فيصل وعلي بالصالة..
أبو فيصل : أمك ماراح تغير أسلوبها أبد ..
علي " بهمس " : قلت لها شي ..؟؟
أبو فيصل : إيه قلت لها وقالت إذا بترجع فيصل والله لا أطلع من البيت ..
علي " يبتسم " : ياااااه غريبة أمي بعض الأحيان ..
أبو فيصل : المشكلة إني ماأقدر أفرض رايي عليها .. مادري ليش ..؟؟!!
علي "يطالعه " : أجل لو تدري إنك رحت لدانة ..
أبو فيصل : يووووه بتقلب الدنيا ..× سكت .. المهم .. وش أسوي مع أخوك ؟
علي : ساعده يبه .. دبر له شقة والله فيصل ماعنده شي .. وفلوس الشقة مايقدر .. ساعده لما تبدأ دراسته ..
أبو فيصل : هذا اللي بيصير .. بدبر له كل شي ..
علي "يبتسم " : بس تكفى يبه لا تجيب طاريي عنده .. لأني أنا جد ضده بهالزواج ..
أبو فيصل : لا تشيل هم .. والله يوفقه..






× في بيت أبو دانة ..
دانة وفيصل بالمجلس ..
دانة "تضحك " : يالله انبسطت يوم شفتك .. ماني مصدقة وربي ..
فيصل "يبتسم" : لا صدقي حبيبتي ..
دانة "مسكت يده " : الله يخليك لي ..
فيصل " يطالعها " : المهم دانة .. حاولي تخلصين أمورك لأني جد بحاجتك .. وزواج مازواج مابي إذا خلصتي قول لي تعال خذني ..
دانة " تضحك " : من جدك أنت ؟
فيصل : إيه من جدي .. وبآخذ شقة نقعد فيها فترة ونروح ندرس ..
دانة " سكتت ..
فيصل : وش فيك ؟
دانة : تتوقع يسمحون لك تطلع وأنت كنت بالسجن وبتهمة ومو أي تهمة بعد ؟؟
فيصل "يبتسم " : لالا مالي دخل .. إن شاء الله نطلع وندرس .. ونرجع نرفع روسهم ..
دانة : إن شاء الله
فيصل : يالله متى أجي آخذك .. مو قلتي لي البارح طلع فستانك ..
دانة : إيه طلع ..
فيصل : الحمد لله .. والباقي تجهزين معي .. والله العظيم محتاجك دانة ..
دانة : طيب أنت وش الوقت اللي يناسبك .. ؟
فيصل : أكثر من شهر مابي ..
دانة " تطالعه وتبتسم " : أوكي حبيبي أجهز أغراضي المهمة .. والباقي معك الله يعينك ..









الحياة ألوان .. !!

منها الأسود ..
ومنها الأبيض .. !!
ومنها الرمادي .. !!

يغيم الحزن تارة ..
ويبتعد تارة ..
لتحل السعادة محله ..
هكذا تعلمنا الحياة .. !!






بعد مرور أسبوع .. !!
__________








× في بيت أم عبد الله ..
× عبد الله ونورة بالصالة ..
عبد الله " بهدوء " : وفيصل يقول مستعد أسوي لها اللي تبيه ..
نورة " وولدها على رجولها وتلعبه .. تطالع عبد الله " : بس والله بقلبي شي عليه .. وأخاف أرجع وأصير أشد من قبل معه ..
عبد الله " يطالعها " : قلبك هذا خلاص طنشيه .. نورة الولد ماله ذنب يعيش بدون أبو .. ويربى وفيه نقص عن غيره ..
نورة " تتنهد " : طيب مثل ماقلت موافقة يجي نتفاهم على كل شي .. ويحلها ربي ..
عبد الله " ابتسم " : يارب تآصلين لحل ..
نورة : طيب خلنا من موضوعي اللي أشغلتك فيه .. سولف لي وش سويت وكيف سارة معك ؟
عبد الله " يتنهد " : والله السفرة ماناقصها إلا أنت وأمي ..
نورة "تقاطعه " : وكيف زوجتك معك ؟
عبد الله " سكت .. والله مادري وش أقول ..
نورة "استغربت " : وش فيك ؟
عبد الله : تشوفين الحريم اللي بالمسلسلات اللي ألسنتهم طويلة .. وياويلك تدوسين لها على طرف .. هذي سارة ..
نورة " استغربت بقوة " : جد ؟؟
عبد الله : انصدمت .. تعرفين وش معنى انصدمت .. ؟؟ جد .. البنت لو أقول لها أخبار أبوك .. × يتطنز .. تقول وش فيه أبوي ..؟؟ وش عندك تسأل عنه .. حان عليه .. الله يديم عليك .. × يضحك .. ومن هالكلام ..
نورة : لالالا ماأحب اللي كذا ..
عبد الله " يبتسم " : وش أسوي .. يمكن أنا مافهمتها للحين .. أنا وسيع صدر .. وأضحك .. ولا علي من كلامها .. وبالعكس مرتاح ..بس أنت حاولي ماتقولين لها أي شي .. أخاف تروح تقول لأهلها ولا أبي يصير بيننا مشاكل على سواليف صغيرة ..
نورة : ما عليك أختك سنعة .. ومالي ومال المشاكل ..
× جت أم عبد الله ..
عبد الله " يطالع أمه " : هاه يمه أعجبتك الهدية ؟
أم عبد الله " جلست " : والله حلوة .. ودامها منك أحلى وأحلى .. بس ليش ماجبت سارة معك .. ؟
عبد الله : تقول مشتاقة لأهلي ..
أم عبد الله : بسلامتها ..
عبد الله : يمه بكرا فيصل بيجي يآخذ زوجته ..
أم عبد الله " تطالع نورة " : جد ؟
نورة " تضحك " : لا بس قلت يجي نتفاهم .. هههههه عبد الله بلا نصب ..
أم عبد الله : الله يآخذ ابليسك فرحتني ..







× فيصل بالسيارة .. ويكلم .. يابعد عمري .. يابعد عمري .. اسمعيني ..
دانة " معصبة " : بس أنت ماقلت لي بترجعها .. أو عشانها جابت لك الولد ..
فيصل : لا أنت رضيتي تزوجيني وأنا متزوج .. يعني من البداية هذا اتفاقنا ..
دانة " بكت " : فيصل الله يخليك .. خلها بعد زواجي .. أبي أنبسط معك ..
فيصل " يتنهد " : صعبة .. هي بعد بحاجتي .. ولازم أكون بينهم ومع ولدي ..
دانة : طيب وين بتحطها ؟ والشقة أنا اللي بسكن فيها ..
فيصل : تتدبر .. يحلها ربي ..
دانة : ياااااااااااالله .. والله أغاااار فيصل .. مستعدة أسوي أي شي عشان تنساها ..
فيصل : أنا ناسيها أصلاً .. بس عشان الولد .. لو مالولد بيننا كان تركتها لعيونك ..
دانة : طيب مستعدة آخذ الولد .. بس طلقها ..
فيصل : دانة وش فيك .. ؟
دانة : مادري تعلقت فيك أكثر .. أبيك لي لحالي ..
فيصل : طيب أنا وصلت أكلمك بعدين ..









× سارة وسحر بالغرفة جالسين ..
سارة : كيفه معك ..؟
سحر " بسرعة " : تعاااالي ماقلت لك .. مرة كلمني يوووه صوته غريب ويقط خيط وخيط .. والله مو طبيعي ..
سارة " سكتت شوي" : بيني وبينك عبد الله مايطيقة ..
سحر " طالعتها ونزلت رآسها .. وسكتت ..
سارة " ندمت إنها قالت عبد الله مايطيقه " بينها وبين نفسها .. وش قلت أنا ؟؟

سحر " طاحت دموعها " : خايفة منه يا سحر .. يخوفني ماني مرتاحة .. وزواجي باقي عليه 3 أيام وش أسوي ؟
سارة "تضحك " : ههههههههه يوووه الحالة هذي تجي كثير من البنات خوف وارتباك .. شي طبيعي ياقلبي ..
سحر " تبكي " : شي طبيعي للي يحسون إنهم بيتزوجون رجال طبيعيين .. بس أنا لا .. سلمان أبد مو طبيعي .. وأنت عارفة إنه راعي سفرات .. ويهيت والله خايفة ..
سارة " تقنعها " : كل شباب الحين يحبون السفرات .. الدنيا تغيرت مو مثل قبل .. سحر " تمسح دموعها " : يالله الله يعين ..








× دانة بغرفتها ,,, وتبكي .. !! × الشغالة تطق الباب ..
دانة " بهدوء " : ادخلي ..
الشغالة " معها كافي " : دانة وين أحطه ؟
دانة " تطالعها " : جيبيه واطلعي .. وإذا قالت ماما نادي دانة تتعشى قولي ماتبي .. زين ؟
الشغالة : إن شاء الله .. × طلعت ..
دانة : يااااالله وش أسوي معاه هذا .. ؟ ؟ لازم أسوي شي .. مابيها .. ماأطيق أشوفها .. × دق جوالها .. وأخذته وشافت الرقم ولا ردت .. ماراح أرد يافيصلوه .. رح لحبيبة قلبك .. الله يآخذ روحها ..

× دق الجوال مرة ثانية .. ولا ردت .. تطالعه .. وبعد دقيقتين تقريباً .. وصلها مسج .. فتحته .. ( شوفي دانة حركاتك هذي ماتسوينها عندي .. إنك ماتردين على الجوال هذا تصرف طفولي .. وانسي أدق عليك طيب .. ؟؟ أنا بس فاضي للمشاكل وإلا رايق لها ؟.. إذا بغيتي شي الرقم عندك أما إني أدق أنا انسي ) .. تكلم نفسها .. لا تدق أبركها من ساعة ..








× في بيت أم عبد الله .. فيصل وعبد الله بالمجلس ..
فيصل : طيب خلها تجي الحين أتفاهم معها على كل شي ..
عبد الله : هي تقول بكرا .. اليوم مالها خلق ..
فيصل :عبد الله ..
عبد الله : سم ..
فيصل : ماعليه إذا رجعت لي أخليها عندكم .. ؟
عبد الله " يبتسم " : اتفق أنت وياها أنا مالي دخل .. إلا إذا طلبت مني أتدخل ..
فيصل : يعني راضي ؟
عبد الله : ماعلي منكم أبد .. بس أهم شي نورة لا تزعل .. × يبتسم ..
فيصل : إن شاء الله مالها إلا اللي يرضيها ..
عبد الله "وقف " : بجيب عبودي ماتبي تشوفه ؟
فيصل : إلاااا تكفى ..
× طلع عبد الله ..






× دانة بالغرفة .. ومساكة جوالها .. أرسل وأقول له .. أكيد بيقابلها .. لازم أخرب .. لااااازم .. أنا ساكته طيب فيني .. بس خلاص ماراح أسكت .. تكتب مسج ..






× في بيت أم عبد الله .. بالصالة
× عبد الله " شايل عبود " .. ونورة واقفة جنبه .. وش يقول بعد ؟
عبد الله : يقول تجي نتفاهم الحين .. وقلت هي تبي بكرا ..
نورة " فرحت بس مابينت " : لا أبي الحين ..
عبد الله : عادي أروح أقول له لأنه مطول ولا عنده شي .. بس روحي البسي ..
نورة "تبتسم " : طيب .. × راحت بسرعة .. وهي تمشي وقفتها أمها .. وش عندك ؟
نورة : بتفاهم مع فيصل ..
أم عبد الله "مستغربة " : شكلك مبسوطة .. ؟
نورة " تضحك " : إيه أكيد ..
أم عبد الله " تطنز " : اركدي اربطي نفسك شوي خليه يعرف إنك قوية على الأقل .. الحمد لله والشكر ..
نورة " مشت " : بروح ألبس وراجعة لك ..
ام عبد الله " بتطنز " : ياربي لك الحمد .. ماكأنه متزوج عليها الخبلة .. يالله انك تخلف علي ..




× دانة .. تقرا المسج .. أيوه ضبط .. طيب .. أرسلته ..





× فيصل لحاله يلعب عبود .. يااااقلب أبوك .. والله مشتاق لك ..
× نورة خلصت .. ونزلت .. عبد الله بالصالة مع أمه .. يالله يانورة بسرعة فيصل ينتظرك ..
× فيصل " طلع جواله " .. ويقرا المسج .. ( والله أنا محترمة نفسي ولا قلت وش سوت فيني زوجتك وأنت بالسجن أنا مابي أفرق بينك وبينها .. لكن فيني قهر .. وحاسة إنها أهانتني .. إذا كنت ماتدري ترا نورة جتني البيت وضربتني .. والله راح يحاسبني إذا أتبلاها .. )
× فيصل دق على دانة بسرعة لأنه عصب ولا يشوف اللي قدامه ..
فيصل "على طول بعصبية " : ليش ماقلتي إلا الوقت هذا ؟
دانة : مادري .. بس هذاني قلت لك ..
× نورة مرتبكة ولا دخلت .. ووقفت وسمعت قبل تدخل .. !
فيصل " بعصبية " : متى ضربتك ؟
دانة " تبكي " : وأنت بالسجن .. والله العظيم ماأكذب ..
فيصل " يتنهد " : ليش سوت كذا ؟
دانة " تمثل بالبكي " : منقهرة يعني ليش ؟
فيصل " يهديها " : طيب حبيبتي .. أنا أوريك فيها ..
× نورة تسمع ومستغربة .. ؟؟
دانة : فيصل من غلاك بقلبي قلت بسكت .. بس ماقدرت ..
فيصل : لا أكيد نورة فاقدة عقلها .. ماتدري إن ظفرك يسواها ويسوى اللي جابها فعلاً ماتربت..
× نورة انصدمت .. وطاحت دمعتها .. ورجعت .. × شهقت بقوة .. ماراحت للصالة .. راحت لمجلس ثاني .. وجلست على الكنب .. تبكي .. لييييه وش سويت لك .. ؟؟




× أم عبد الله وعبد الله بالصالة .. يارب يتفاهمون ..
عبد الله : لا فيصل إن شاء الله بيحلها ..
أم عبد الله : نقول إن شاء الله .. وحتى ماضغطنا عليه ولا شي ..



× في بيت أبو دانة ..


× دانة جالسة على طرف السرير .. ياربي وش صار ؟؟ والله كان معصب .. يارب يقلب الدنيا عليها ..




× في بيت أم عبد الله ..

× دق جوال عبد الله .. استغرب " هذا فيصل ؟؟ × وقف بروح أشوف وش يبي ؟



× فيصل جالس ينتظر .. دخل عبد الله .. استغرب .. هه وين نورة ؟
فيصل " يبتسم مجاملة " : للحين ماجت ؟ مادري وينها ؟
عبد الله " مستغرب " : وشلون ماجت .. قبل شوي راحت من عندنا ؟؟؟ طلع يصوت .. نورة نورة ..
× فيصل " يكلم ولده " .. شفت أمك وش مسوية .. والله لا أوريها .. بس خلني أشوفها ..
× دخل عبد الله المجلس .. شاف نورة تبكي .. نورة وش فيك ؟
نورة " بكت بقوة " : عبد الله اتركني الله يخليك ..
عبد الله " جلس جنبها " : فيصل قال لك شي ؟
نورة : أصلاً ماشفته .. خلاص مابيه ..
عبد الله "يتنهد " : أنت قبل شوي تبين تتفاهمين معاه وش غيرك ؟
نورة " عصبت " : خلااااص كذا من ربي مابيه .. ياخي طلقوني منه .. خلاااااص
عبد الله " مستغرب بقوة " : نورة أكيد قال لك شي ..
نورة " بصوت عالي وهي تبكي " : أبيه يطلقني .. × وقفت .. أنا أروح له .. × فقدت أعصابها ..
× وقفت عبد الله ومسكها .. اذكري الله ..
نورة " تبكي بقوووة " : بروح أقول له يطلقني .. إذا يبي ولده يآخذه .. مابي شي يذكرني فيه ..


× فيصل يسمع صراخ .. !! أروح أشوف .. ؟؟ إيه بروح هذي زوجتي مافيه أحد غريب ..



× دخلت أم عبد الله عليهم وش فيك يانورة ؟
نورة " جلست وكأن حيلها منهد " : يمممه خلوه يطلقني قبل يطلع ..
× دخل فيصل وعلى طول شاف نورة .. !!!
نورة " نزلت رآسها وتبكي " ..
فيصل " يطالعهم ونورة كسرت خاطرة " : وش فيكم ؟
عبد الله " عصب" : فيصل قلت لها شي ؟
فيصل "بسرعة ": ماجتني أصلاً .. ؟؟ وشلون أقولها ؟
نورة " تطالع فيصل " : فيصل تكفى طلقني ..
× سكتوا ..
× قربت أم عبد الله ومسكت يد نورة .. تعالي معي يمه ..
× فيصل " ومعه ولده " .. وعبد الله .. واقفين ..
فيصل " شك إنها سامعة " : عبد الله تراها مادخلت ..
عبد الله " تنهد " : هي طلعت من عندنا تضحك .. وش غيرها ماندري .؟؟
فيصل " يهز كتوفه " : مادري ..










× فيصل بالسيارة يكلم دانة .. صارت الأمور صعبة يادانة ..
دانة "ابتسمت " : كيف ؟
فيصل : شكلها سامعة كل شي وأنا قلت كلام المفروض ماأقوله..
دانة " بينها وبين نفسها " : أحسن ..
فيصل : طيب أنا مررررة مالي خلق .. أكلمك بعدين ..
دانة : يالله مع السلامة ..
فيصل : مع السلامة ..



× نورة بغرفتها تبكي ..


× دخلت أمها .. يمه خلاص .. والله تعبتي نفسك ..
نورة " تطالعها " : خليني أبكي يمكن يطلع القهر اللي فيني ..
أم عبد الله " قربت وجلست جنبها " : طيب قولي لي وش قلبك ؟
نورة " تتنهد" : يمه كذا ..
أم عبد الله "تقاطعها" : مافيه شي كذا ..
نورة : تكفين يمه خليني ...
أم عبد الله : مليت لحالي وعبد الله راح لزوجته ..
نورة " بهدوء" : وعبود وينه ؟
أم عبد الله "تبتسم " : ياقلبي ياعبود .. نايم .. قومي رضعيه عشان تنامين ترتاحين ..







× فيصل بالشقة ..جالس بالصالة ويدخن .. وباله منشغل مرررة .. إذا طلقتها أمي ماراح ترضى أبد .. وإذا خليتها على ذمتي ضيعت عمرها .. والله اللي قاعد يصير غلط .. لازم أدور حل .. وبعدين نورة شكلها من الأساس ماتبيني .. × يتنهد .. صعبة أطلقها والولد .. !!








× في بيت أبو فيصل .. الساعة 3 الفجر تقريباً .. وفي غرفة أبو فيصل وأم فيصل .. صحى أبو فيصل من النوم يسمع صوت بكي قريب عنده .. التفت على أم فيصل .. لولوة .. لولوة ..
أم فيصل " التفتت وعيونها دموع " : سم ..
أبو فيصل " استغرب ": وش فيك ؟
أم فيصل " بكت " : شفت محمد بالحلم ومن الفرحة بكاني .. وماقدرت أنام بعدها ..
أبو فيصل "باس رآسها " : قومي توضي وصلي ركعتين وادعي له .. بحاجه للدعاء الحين ..
أم فيصل : صادق .. يارب أكحل عيوني بشوفته ..
أبو فيصل : آمين ..










× يوم جديد .. في شقة عبد الله .. وعبد الله وسارة بالمطبخ يفطرون ..
سارة " جالسة على طاولة الطعام " : أجل نورة تبي الطلاق .. ؟
عبد الله " واقف يدهن الخبزة " : إيه .. وبقوة بعد .. تقول مابي أتراجع ..
سارة "تضحك " : استغفر الله .. وأنت معها ومع رآيها ؟
عبد الله "يطالعها " : أهم شي راحتها .. وبعدين اللي جاها مو شي هين .. أنت ترضين أتزوج عليك ؟
سارة " تضحك باستهزاء " :ههههه أصلاً ماتقدر .. وبعدين أنا أفرق عنها .. ولو سويتها عادي .. مو أنا اللي تدمر حياتي وحدة ..
عبد الله : المهم إنها تبي الطلاق ..
سارة : بس أنت تقول فيصل مايبي يطلق ..
عبد الله : بالطيب بالغصب يطلق .. إمساك بمعروف أو تسريح بإحسان ..
سارة : إيه .. خلها يقولون عنها مطلقة .. اللهم لك الحمد .. والله شي يفشل أخت زوجي مطلقة ..
عبد الله "عصب" : وإذا صارت مطلقة جابت لنا عار ..
سارة " تطالعه " : وش فيك عصبت ؟
عبد الله "قرب عندها " : شوفي سارة يا تكلمين زين وإلا تسكتين .. × طلع من المطبخ وهو يقول .. ياسبحان تسد النفس عن الأكل ..
سارة "تكلم نفسها " : هذا اللي ناقصني وش قال قال .. تبي الطلاق .. وإذا تزوج عليها ؟؟ أول وحدة هي ؟؟ !!!






× أم فيصل بالصالة تكلم .. أختها .. شوفي يا أم عبد الله والله ماخليت شي ماقلت له حتى طردته من البيت ..
أم عبد الله " بقهر " : هذا اللي خفت منه يالولوة .. تذكرين يوم أقول والله لو تصير مشاكل راح تصير بيني وبينك .. وقلتي أبد .. ولدي وأعرفه يدلع .. والله ماشفنا منه إلا القلق .. والسموحة ياأوخيتي ..
أم فيصل " طاحت دموعها " : والله إني مقهرة ..وإني القصد نقرب أكثر .. ولا يفرقنا إلا الموت .. بس فيصل الله يهديه ..
أم عبد الله : المهم أنا أبي راحت بنتي واللي صار صار .. عسى الله يعوضها بواحد يشيل عنها همومها ..
أم فيصل "تقطاعها " : لا تكفين .. الطلاق واللي يسلمك لا .. يمكن تنحل ..
أم عبد الله "بكت " : تعبت يالولوة .. وأتعبتني بنتي ماتنام إلا ودمعتها على خدها .. أبي لها الراحة بعد أنا .. وأنت تذكرين وشلون تعبت بالحمل .. والشكوى لله ..
أم فيصل : الله يعين .. والله يكتب اللي فيه الخير .. والله اني مابيها تصير بيني وبينك ..
أم عبد الله : مالك دخل أنت ولا لك ذنب باللي صار ..







× في شقة عبد الله .. عبد الله جالس بالصالة يشوف التلفزيون .. × جت سارة جلست جنبه ..
عبد الله " زعلان .. !!
سارة : اليوم وش عندك ؟
عبد الله : بروح لأهلي .. أرتاح شوي ..
سارة " بعصبية ": وش تقصد ماريحتك .. ؟؟
عبد الله " حط يدها على فمها " : اقصري صوتك واللي يرحم لي والديك ..
سارة "وقفت " : يعني ماشاء الله عليك والراحة اللي تلقاها في بيت أهلك .. كلها مشاكل في مشاكل ..وأختك تجيب المرض .. وين الراحة..
عبد الله " رفع صوت التلفزيون ..
سارة " تطالعه " : أكلمك ..
عبد الله .. سااااااكت ولا رد ..
× راحت .. وتكلم نفسها .. أنا مادري وش شايف بأهله .. ؟؟







× أبو فيصل وأم فيصل وعلي بالصالة ..
أم فيصل : لا أنا ابي أروح له .. علي يالله ..
أبو فيصل "يطالعها " : خليه يجي يعني كل هذاعناد .. وإذا جاء تفاهمي معه ..
أم فيصل "وقفت " : أنا اللي بروح له وأشوف وش عنده .. ؟
أبو فيصل : طيب خليها بعد الغداء ..
علي : صادق أبوي خليها بعد الغداء ..
أم فيصل : طيب بروح أصلي وبعد الغداء إن شاء الله أروح له .. دق عليه وقل له لا يطلع ..
أبو فيصل " يهز رآسه " : لا إله إلا الله .. وين بيطلع يعني .. لا تدق عليه ولا شي ؟؟ أصلاً مايطلع الظهر ..
أم فيصل " بعناد ": وإذا طلع .. ؟
أبو فيصل"يتنهد " : أقول اذكري الله وروحي صلي بس .. وماشاء الله ياهالاجواء اللي تساعد على الطلعة الظهر .. روحي روحي الله يهديك ..





× فيصل جالس بالصالة .. ويكلم .. متى بتروحين ؟
دانة : بعد شوي .. عندي أشياء بسويها بالمشغل ..
فيصل : ياكثر خرابيطكم ما تخلص ..
دانة "تضحك " : أبداً ماتخلص .. المهم .. تقول لي الشقة بنفس الشقق اللي أخذتها قبل ؟
فيصل :لالالا بس العمارة قريبة منها .. وبعدين الشقة اللي قبل صغيرة مرة مو مثل هذي ..
دانة : طيب والأثاث ..
فيصل"يقاطعها" : الأثاث فيها والعمارة كلها جديدة .. وبعدين حرام بنروح ندرس ..
دانة : صح صح .. طيب وش اسمها ؟ وينها
فيصل "يضحك " : تحقيق هو ؟
دانة : بس كذا .. يالله عاااااد ..







× في بيت أم عبد الله .. أم عبد الله بالمطبخ .. تكلم الشغالة .. روحي نادي نورة تتغدى معي .. يالله دامي أحط الغداء ..
الشغالة : طيب ماما ..
× دخلت نورة ومعها ولدها .. جيت يمه ..
أم عبد الله "ابتسمت " : يااااااااهلا وغلا بهالوجه .. واللي معك بعد ..
نورة "تبتسم " : ياحياتي أنت .. × قربت وباستها ..
أم عبد الله : خلاص يمه شوفي وش سرع الدنيا باقي أسبوع وتطلعين الأربعين ..
نورة : تركض الأيام ولا نحس فيها .. × تطالع عبود .. عقبال ماأفرح فيه ..
أم عبد الله " أخذت الصحن وتمشي " : أخبارك اليوم ..؟ نمتي زين ..
نورة " تمشي وراها " : يعني .. تعرفين .. واستخرت يمه .. ومرة مرتاحة لرآيي ..
أم عبد الله : الله يكتب اللي فيه الخير ..








× أم فيصل وعلي بالسيارة ,,
أم فيصل : من وين دبر فلوس الشقة تدري ؟
علي : لا ماأدري عنه ..
أم فيصل : الله يهديه هو ورآسه اليابس .. آخر مرة أشوفه إذا مارضى يسوي لي اللي أبيه ..
علي " ساكت ..
أم فيصل " عصبت " : حتى أنت مثل أخوك .. ماتعطونني كلمة ..
علي "بهدوء" : تسولفين وأسمعك يمه .. وش دعوى ..
أم فيصل : مادري كل العايلة منقلبة علي .. وكأني على خطأ ..
علي : لالا يمه ماأحد انقلب بس أنت تحسين لأنك زعلانة على فيصل ..




× دانة توها طالعة من محل ورود .. ومعها بوكيه ورد أحمر .. وركبت مع السواق .. × أرسلت مسج لفيصل ( بعد ربع ساعة افتح باب شقتك .. ياويلك تفتحه قبل ترا بزعل .. أحبك )





× فيصل جالس بالصالة ومعه اللاب توب على رجوله .. وقطعه صوت المسج .. أخذ الجوال وفتح المسج وابتسم .. يكلم نفسه .. ياحبي لك .. الله يخليك لي .. ويكتب مسج ( أحبك ياأحلى دانة بالدنيا ) ..




× وصلوا علي وأمه للشقق .. نزلت ..
× بنفس الوقت وقفت سيارة سواق دانة .. ونزلت لابسة نظارة شمسية وشكلها مررررة حلو ..
× دخلوا بنفس الوقت ..



× أم فيصل تهمس لعلي .. الحمد لله وش هالبنت ؟
علي " ابتسم " وسكت ..
أم فيصل " بتطنز " : لااا ومعها ورد وع يابنات الحين .. ؟؟



× دانة تضغط على اللفت .. وأم فيصل وعلي جنبها .. × انفتح باب اللفت ..
دانة " تبتسم وتشوفهم " : تفضلوا ..
× كلهم مع بعض .. وساكتين ..
دانة تشوف ساعتها ..
× انفتح الباب وطلعت دانة بسرعة ..



× دانة حطت الورد عند الباب وشافوها علي وأم فيصل ..

× علي انصدم .. لأنه يعرف رقم شقة فيصل ..

علي " بسرعة يأشر" : هذي شقة فيصل ..
أم فيصل " استغربت " : لا تصير هذي زوجته بس؟
علي " منصدم " : أظن يمه ..
× راحت بسرعة أم فيصل ودانة واقفة .. هذي شقة فيصل ؟
دانة "تبتسم بخوف " : إيه ..
علي "قرب ومو مصدق ": أنت دانة ؟
دانة "تبتسم ومرتبكة " : إيه ..
× فيصل فتح الباب ..
أم فيصل " بسرعة أخذت الورد اللي عند الباب ورمته بعيد " " تطالع فيصل و بعصبية " : الله يخلف علي .. هذي اللي أنت متزوجها ؟
فيصل " يطالع دانة .. يمه ادخلي لا تصرخين برا ..
دانة " راحت بسرعة .. وهي تسمع أم فيصل تقول .. هالحين تارك اللي متسترة ومحتشمة عشان هالضايعة ..
علي " بهدوء " : اقصري صوتك يمه وادخلي ..
فيصل " فتح الباب بقوة ومعصب " : ادخلي نتفاهم جوا تكفين مالها داعي الصراخ ..
× دخلت أم فيصل بسرعة .. ×ودخل علي وراها بسرعة وصك الباب وراه ..


فيصل " يتنهد" : يمه ليش تكلمين قدامها ؟
أم فيصل " معصبة وبتطنز " : خايف عليها ؟؟ وعلى مشاعرها ياقلبي ؟؟ وهذي اللي قالب الدنيا عشانها .. لا بارك الله فيك أنت وذوقك .. وين بودي وجهي ؟؟ وذي زوجة ولدي ..
فيصل " معصب ": مو كل وحده تكشف يعني خلاص البنت ضايغة .. المسألة مو كذا .. البنت عاقلة وفاهمة وطيبة بس مو راضية تقتنعين فيها ..
أم فيصل "بسرعة " : ولا أبي أقتنع طول عمري ..
فيصل " طلع زقارة وأول مرة يطلعها عند أمه ... !
أم فيصل " استغربت " : لاااااااااااا والأخلاق خربت بعد .. ياعيني على ولدي .. أنا جاية بصالح بينك وبين نورة .. بس والله العظيم دمعة من دموع نورة تسواك يالضايع أنت واللي متزوجها ..
× علي جالس على الكنب .. وساكت ..
فيصل " عصب " : خلاص نورة بطلقها ..
أم فيصل " دمعت عينها " : ياحسااااافة تربيتي .. بس تدري ياليت صاير علي حادث قبل أوصل أهون من إني أشوف زوجتك.. الله يخلف .. الله يخلف .. × بسرعة .. يالله علي خلنا نرجع ..
× طلعوا علي وأم فيصل ..
× فيصل جلس الكنب ورجع رآسه ياااااالله .. اووووف متى أرتاح ..؟؟




× دانة تبكي بالسيارة .. يالله وش هالحظ .. !! وبعدين وش هالمتخلفة .. تقول عني ضايعة .. الله يعينني بس ..







× أم عبد الله وأم فيصل بالصالة ..
أم فيصل " صوتها تعبان " : والله قلت لعلي ودني له وياليتني مارحت .. قلت أمرك أرتاح شوي ..
أم عبد الله : الله يهديه ..
أم فيصل " بسرعة " : مادري وشلون قبلها على نفسه ..
أم عبد الله : والله وش نقول .. خلاص هذا الحل المناسب ..
أم فيصل : الشكوى لله .. الله يعيننا على الدنيا وبلاويها .. واللي قاهرني منقلب علي عشانها ..
أم عبد الله : القلب وأنا أوخيتك .. والضحية بنتي وولدها .. الله يعوضها برجل يدللها ..
× دخلوا عبد الله وسارة ..
أم عبد الله "تبتسم " : يااااااهلا وغلا ..
عبد الله وسارة : السلام عليكم ..
× قربوا وسلموا ..
أم فيصل " تبتسم " : وشلونكم ؟
سارة : تمام الحمد لله ..
× جت نورة .. تبتسم .. أهلين عبود .. نور البيت ..
عبد الله : بوجودك ..
× قربت وسلمت على سارة ..




× دانة جالسة بالصالة وتكلم وعبايتها عليها .. والله يافيصل تقول عن ضايعة وأسكت ..
فيصل : تعرفين أنت العادات خلاص انسي .. تبينني أضربها يعني ؟ هذي أمي ..
دانة " بعصبية " : طيب تحترم نفسها .. يعني كاشفة خلاص مو بنت ناس .. وسمعتي في الأرض ... ؟؟ والله شي يقهر ..
× أم دانة وقفت تسمع ورا دانة ... !!
فيصل : ما عليه آسف عنها حبيبتي ولا تزعلين ..
دانة "بكت " : بكرا إذا صار لي عيال وش راح تسوي .؟
فيصل " بسرعة " : طيب غطي وجهك .. وخلاص ..
دانة " بعناد وبصوت عالي " : لاااااااااا انسى
فيصل : خلاص أجل .. تحملي .. عادات أهلي تختلف عن عاداتكم تحملي مايجيك .. لأن بكرا بتجتمعين معهم ..
دانة " بسرعة " : مو لازم أجتمع الله يخلي لي أهلي ..
فيصل "استغرب ": لاااا لا لا .. إن شاء الله المشاكل هذي تعدي وترجع المياه لمجاريها حبيبتي .. حركات مابي أهلك ومادري كيف انسيها .. مو يعني إني تزوجت غصب على الكل إني ماأبيهم .. لا ياقلبي هذولا أهلي ,, إذا ضاقت فيني الدنيا مالي إلا الله ثم هم ..
دانة : يا سلاااام .. يحترمون أنفسهم طيب .. المهم المهم .. أنا موب رايحة المشغل .. أمك عكرت مزاجي .. بروح أرتاح ..
فيصل : يالله مع السلامة .. ولا تتكلمين كذا عن أمي ..
دانة " تبتسم بتطنز " : إن شاء الله .. مع السلامة .. قفلت ..
أم دانة " بعصبية " : ماشاء الله رايحة لهم وأنت تقولين بروح المشغل ..
دانة " التفتت بسرعة ووقفت " : من متى أنت هنا ؟
أم دانة : أنت وش تسوين من وراي ؟؟؟
دانة " تحط جوالها بالشنطة " : ماما السالفة غررررريبة .. بالصدفة شفت أم فيصل وسوت قلق تعرفين المتخلفين بكل مكان .. وهذي السالفة ..
أم دانة " تطالعها " : داااانة .. قولي الصدق ..
دانة : والله العظيم .. رحت اشتريت بوكيه ورد لفيصل قبل أروح للمشغل وشفتها هناك .. وقالت كلام عشاني كاشفة ..
أم دانة " تتنهد " : ماشفتي شي بعد .. بس والله انهبلت قلت لا يصير راحت لهم ..
دانة : لاااااا مامي وش دعوى أروح من وراك ..





× نورة وسارة بغرفة نورة ومعها ولدها ..
سارة "بخبث " : أبرك لك بالطلاق .. اليوم أقول لعبد الله ريحوها بس ..
نورة " تطالعها وابتسمت " : اللي كاتبه ربي بيصير ..
سارة "بسرعة " : طيب يقولون زوجته صديقتك ؟
نورة " تبتسم " : لاااا مو صديقتي من قال لك .؟؟
سارة " تبتسم " : سمعت .. وتدرين ياعمري إذا جلسنا بمكان قالوا فيه مغتربة هي وزوجها .. صادقت وحدة وخطفت زوجها ..
نورة " انهبلت " : جد السالفة طالعه مرة ؟
سارة " تكذب " : إييييييييه مرررررة .. ياعمري أنا أقول لو إني منك أتطلق بأسرع وقت .. واقهريه ..
× نورة نزلت رآسها ..
سارة : يا عمري وش فيك ؟
نورة : مافيني شي ..
سارة : زوجة أخوي عبد العزيز سوسة سوسة .. تعرفين وش سوسة .. أنا وسحر مانطيقها .. بس أمي على نياتها ..
نورة "تتنهد " : ماعلينا من الناس .. يالله قومي نجلس عند أمي وخالتي ..
سارة " بنفس شينه " : يووووه أنا أكره أجلس مع الحريم الكبار .. سواليفهم تجيب لي المرض .. بايخين ..
نورة "استغربت " : هذي أمي وأم زوجك .. وشلون تقولين عنها كذا ؟
سارة : شوفي أنا اللي فقلبي على لساني أقوله مايهمني أحد ..
نورة " تطالعها وبهدوء " : بس احترمي نفسك وخلي أسلوبك حلو لو سمحتي ..
سارة " بتطنز " : يااااعيني على المثالية أدوخ أنا ..
نورة " بتطنز " : أقول بروح عند أمي وخالتي ..
سارة " بخبث " : أنا مادري وش مخليك تموتين على خالتك وولدها وراك نجوم الظهر ..
نورة " واقفة وانصدمت وعصبت " : سارة أرجوك احترمي نفسك ,, هذي خالتي قبل أتزوج ولدها .. وإذا ماأعجبتك الجلسة عندنا مافيه شي غصب تقدرين تطلعين ..
سارة " وقفت وتمثل ": تطردينني من البيت ؟
نورة " انهبلت " : لا ما أطردك .. بس أقول ما أعجبك مانتي مجبورة تجلسين ..
سارة " تطالعها " : شوفي نورة أنا محترمة نفسي مابي أخليها آخر مرة أجي ..
نورة " مسكت كتفها " : حقك علي بس يمكن فهمتيني خطأ ..










------------------------------





×
عانقت قلبه قبل أن أعانقه ..
أحببته قبل أن آراه ..
سلمته قلباً عذرياً لم يسكنه سواه

×××
أجمل ليلة في عمري
إنها الليلة ..

فيصل


أحبك
زوجتك دانة

فيصل " يطالع دانة " : مبروووك دانة ..
دانة " قربت ومسكت يده " : فيصل أخيراً .. والله والله مرررة مبسوطة ..
فيصل " بهدوء" : دانة أنا عارف إنك تزوجتيني لأنك فتحتي قلبك لي .. ومستعدة تتحمليني بحلوي ومري صح ؟
دانة "تبتسم " : أكيد ..
فيصل : أنا خسرت وكسبت بحياتي .. ومن أعظم ماخسرت نورة ..
× دانة نزلت رآسها ..
× فيصل حط يده على خد دانة .. بس أنت أجمل وأحلى ماكسبت بحياتي ..
دانة "ابتسمت " : الله يوفقنا .. وعسى مايفرقنا إلا بالموت بعد عمر طويل ..
فيصل " يطالعها " : آمين.. ياحلوك بفستان العرس ..قمر يادانة ..
دانة "استحت..








× نورة .. بغرفتها .. مسترخية .. والله ماني مصدقة .. فيصل خلاص طلع من حياتي ..حتى ماحاول نتفاهم .. طلقني بسرعة .. آآآه بس ..



لحظه وداعك آه يا لحظة وداعك ياهي صعبه بالحيل صعبه
وأنا إللى أبي قربك وأبي قلبك وأبيك أبدنيتي تبقي معي تبقي
نسيت إني أعشقك ولا تنسي إني بفقدك..
لحظه وداعك ياهي صعبه بالحيل صعبه




من لي غيرك ياعمري لو بعدت ورحت عني
لو تحس بس إلى فيني بلحظه ما تتخلى عني
نسيت إني أعشقك ولا تنسي إني بفقدك..
لحظه وداعك ياهي صعبه بالحيل صعبه




هل حين أنت بعيد صدقني هذا الجديد
الهم والضيقة وحزني زاروني وأنت بعيد
نسيت إني أعشقك ولا تنسي إني بفقدك..
لحظه وداعك ياهي صعبه بالحيل صعبه