× مرت 4 أيام بسرعة .. !!







× في بيت أم عبد الله ..

عبد الله واقف بالصالة ولابس البشت الأسود وكاشخ على آخر شي .. !! ونورة واقفة تعطره .. أم عبد الله ترتبه
عبدالله " يبتسم " : هاه مضبوط شكلي ..؟
أم عبد الله " طاحت دموعها" : الله يوفقك يايبه .. والله نفسي أشوفك واقف مع عروستك .. بس تعرف ..
عبد الله "باس رآسها " : وش دعوى ياميمتي .. دعواتك لي ..
نورة " تضحك " : شكلك شي .. والله أول مرة أحس انك مزيون ..
عبد الله " يضحك " : ايه ماتدرون .. × طالع ساعته .. يالله أنا تأخرت ..
نورة " تبتسم " : الله يوفقك ..
أم عبد الله : اقرا وردك يبه ..
عبد الله " يبتسم وهو يمشي طالع " : إن شاء الله .. دعواتكم ..


× طلع عبد الله ..


× أم عبد الله بكت دموع فرح .. يااارب توفقه ..


نورة " تبتسم " : الله يوفقه ويسعد البنت أهم شي .. حنا مساكين ..
أم عبدالله " طالعتها ورحمتها " : الله يسخرهم لبعض ..



× دق تيلفون البيت .. ردت أم عبد الله .. وجلست .. هلا لولوة ..
أم فيصل : وشلونكم ؟
أم عبد الله " بكت " : راح عبد الله .. ادعي له .. والله بفقده يابعد عمري ..
أم فيصل : يااااارب توفقه .. أخبار نورة عسى ماتأثرت ؟
أم عبد الله "تبتسم " : لاااا مبسوطة .. فرحانة لأخوها أكيد..
أم فيصل : الله يسخر وليدي لها هذا أخوها راح وماباقي لها إلا الله ثم أنت وفيصل والله أدعي لها ..
أم عبد الله " ماتبي تبين عشان نورة عندها " : الله يسلمك ..
× نورة سرحانة ..









× في بيت أبو دانة ... دانة وأمها وجدتها بالصالة ..
دانة : وش أسوي اعتذرت الترم هذا ..
أم بدانة " منقهرة " : هذا اللي كسبناه من زواجك .. الله لايعافي ابليسك ..
جدتها : توظفي على شهادتك ..خلاص ..
دانة " تتنهد " : هذا اللي أفكر فيه .. وبتوظف بقناة أصير مذيعة وإلا مراسلة وإلا أي شي في القناة ..
أم دانة " استغربت " : وش تبين بالتلفزيون ..؟
دانة " تطالع أمها " : أنت تعرفين إني من زمان أبي أصير مذيعة وشوي شوي وأطلع إن شاء الله ..
جدتها : أهم شي تشتغلين بشرف .. وترفعين روسنا ..
دانة : والله الموهبة فيه ولغة معي .. بس يارب يقبلونني ..
أم دانة " سكتت شوي " : بس زوجك يادانة يرضى ؟
دانة " تشوف أمها " : وش علي منه ؟
جدتها " عصبت " : وشوله تزوجتيه ؟
دانة : أبيه .. بس هو الحين بالسجن .. وأنا بشتغل .. لا دراسة ولا شغل بموت ..
أم دانة " طالعتها " : يمكن تفكيره غير عنك يرضى تطلعين بالتلفزيون وإلا تختلطين مع الرجال ؟
دانة " استغربت " : ليش فيه ناس ما تميز بين الشغل الشريف والشغل اللي مو شريف ؟ وش فيه شغلي دامي محافظة ؟ أكيد راح يرضى وبرفع رآسه ..
أم دانة : أنا مثلك وجدتك بعد .. بس فيه ناس غير عنا يايمه .. لا تحسبين كل الناس مثل عايلتنا ..
دانة " مصرة " : لالالا فيصل نفس تفكيري .. وبالعكس أتوقع يفرح لو يشوفني أشتغل لقناة أو أقدم أي شي طيب بالتفلزيون ..
أم دانة " انقهرت من كلام بنتها " : والله ياأنت جاهلة الدنيا ولا تدرين عن شي توي أدري إنك كذا ..
جدتها " تقاطع أم دانة " : والله ولا تعرف للرجال تحسبهم على كيفها وهواها ..
دانة " بقهر " : وش فيكم أنتم كل ماقلت شي جبتوا طاري فيصل وكرهتوني بالزواج وش ذا ؟ يعني لهالدرجة قاهرتكم ؟
أم دانة " عصبت " : مو قهرتينا بس لو أنت متزوجة أحمد ولد عمك يمكن عادي عنده حنا عايلتنا تختلف عن كثير من العوايل .. وفيصل مو منا .. وباين من يوم قال لا تكشفين ..
دانة " وقفت " : ياااااليتني ماقلت لكم عنه .. خلاص أنا بروح بكرا وبحاول أقابل المدير الاقليمي وبقول حطني أي شي لو أتكلم بتقارير واللي براسي بسويه .. × راحت ..
جدتها : والله بنتك ماهي صاحية أبد ..
أم دانة : الله يعينني عليها ..
جدتها : قولي لعمها ناصر .. بتسوي شي بدون علم زوجها ..
أم دانة : هذا اللي بيصير لازم أحد يوقفها عند حدها .. صح أنا مابي فيصل بس لازم تحترم زوجها لأنها لو تركت فيصل وحرضناها على كذا راح تتمرد على زوجها الثاني ولا راح تمشي حياتها أبد ..
جدتها : صادقة .. لازم تتأدب ..








× في الفندق .. عبد الله وسارة توهم يدخلون الغرفة ..
عبد الله " يبتسم " : والله هذي أحلى ليلة بعمري ..
سارة "تبتسم ومستحية " : الله يسلمك ..
عبدالله "مسك يدها وجلسها على الكنب " ...
سارة مرة مستحية ..
× جلس عبد الله قدامها .. وش فيك .؟
سارة " تضحك وهي مستحية " : مادري شفيني ؟ والله مستحية ..
عبد الله : هههههه لالالا لاتستحين .. خلاص أنا زوجك الحين وأقرب شخص لك ..
سارة "طالعته وابتسمت ..
عبدالله " ابتسم " : بس شكلك مرة خطيررر .. أنا سمعت وأقرا ان البنات يكثرون المكياج بليلة الزواج ..
سارة "منزلة رآسها " : ايه ..
عبدالله : بس أنت مرة خطير مكياجك مع اني ما أعرف فيه .. بس خفيف وحلو كأنك طبيعية ..
سارة : إيه أنا طلبته كذا .. أحب أكون طبيعية ..
عبد الله " قرب لها ومسك يدها " : ياحبي لك أنت وطبيعتك .. الله يوفقنا ..








× دانة بغرفتها .. منسدحة بتنام .. يالله وش صار فيك يابعد عمري .. تآكل زين ,, تنام زين .. يااااارب تفرج عنه كل ضيقة يارب .. يارب يطلع بأقرب وقت والله اشتقت له .. × طاحت دموعها ..








× نورة جالسة على السرير .. كل اللي فبالها عشان تنام وهي مرتاحه ..


( فيصل ليه خنتني .. بس تدري أنا الحين مرتاحة أكثر من أول لأني عرفت اللي فقلبك .. وأنا مابي من الدنيا إلا أشوف ولدي اللي منك .. وبهتم فيه زيادة لأنه منك.. بس اخترت اننا ننتهي ولا أبي أشوفك أبد .. مع إن قلبي مشتاق لك مرة .. بس عزت نفسي ما تسمح لي أشوفك .. الله يهنيك مع دانة وأنا يهنيني مع البيبي .. يوووه وصح نسيت أقول اليوم زواج عبود الغالي .. × طاحت دموعها .. أكيد راح أفقده أغلى إنسان وأصدق إنسان معي .. بس خلاص تزوج وبينشغل عني ×بكت بقوة ) × سكرت الدفتر من دموعها ماقدرت تكتب .. وتلمس بطنها .. خلاص قربت تطلع على الدنيا وتزين دنيتي وترجع لي الضحكة .. وأنسى أبوك ..








× في بيت أبو فيصل ..
أبو فيصل عند علي بالغرفة ..
علي " بهدوء" : من وين جبت الأخبار ؟
أبو فيصل " يبتسم " : أمك ماتدري .. بس فيصل قريب إن شاء الله بيطلع ..
علي "انبسط " : طيب بهالسرعة ؟
أبو فيصل : اللي قايل لي مايبي أحد يدري لأنه الشغلات هذي سرية بس قلت بطلع اللي فقلبي من الفرحة .. وأمك أكيد بتقول لأختها و أبي السالفة بيني وبينك ..
علي " يبتسم " : أنا أقول ليش مانمت للحين ؟
أبو فيصل : خلاص محمد قال كل اللي عنده ..
علي " طالع أبوه " : طيب محمد ؟
أبو فيصل " يتنهد " : محمد ؟ والله مادري الله يستر عليه .. ويفرج عنه .. بس إن شاء الله مايطول ..
علي " يتنهد " : والله انبسطت مسكين فيصل وبنفس الوقت منقهر عشان محمد ..
أبو فيصل : بس أهون .. والله يسهل يارب .. × وقف .. والله ماقدرت أنام قلت أقول لعلي وأرتاح ..
علي : وإلا عاد بقدر أنام بنتظر فيصل أحس بكرا بيدخل ..
أبو فيصل : ههههه لالا ما أتوقع يبي له أسبوعين شهر .. يعني حولها .. بس الحمد لله ..
علي : الله يبشرك بالخير .. يالله تصبح على خير ..
أبو فيصل " وهو يمشي " : تلقى خير ولا تقول لأحد ..


× علي يكلم نفسه .. والله أم فيصل بتنبسط .. يارب تعجل باليوم .. يارب ..








× الصباح .. دانة بغرفتها تتجهز بتطلع .. دخلت أمها عليها .. مستغربة .. دانة ؟ وش تسوين ؟
دانة "بهدوء" : بروح أقدم دامي متحمسة ..
× قربت أمها .. لاااا والله مانتي صاحية .. أبوك ماله شهر ميت .. وزوجك بالسجن وبتروحين ترززين بين الرجال ..
دانة " وقفت " : ماما خلوني على راحتي بسوي اللي أبيه خلاص مات بابا أستسلم ؟؟ لا من قال كذا لازم أشتغل ولازم أنسى العمر يمشي تبونني أبكي طول الوقت .. خلاص الدموع خلصت ..
أم دانة " مستغربة كلام بنتها " وبهدوء " : اقعدي واسمعيني الله يرضى عليك ..
دانة " بعصبية رجعت قعدت .. قولي بسمع .. !!
ام دانة : يا يمه اصبري لما يطلع فيصل واتفقي أنت وياه .. وبعدين أبوك يايمه معقولة ما أثر فيك ؟
دانة " تطالعها " : والله مأثر فيني ومرة مقهورة .. بس أنا ماأحب أستسلم .. هذا قضاء الله وقدره .. ولازم حياتي تمشي .. ماأوقفها ..
ام دانة : بعدين وش هالقناة اللي بتشغلك وزوجك مشتبه به ؟
× دانة سكتت شوي .. طيب وش دخلني ؟
أم دانة : يايمه يايمه اسمعيني خلي زوجك يطلع وتنحل الأمور ..
دانة " تطالع ساعتها " : يالله ماما بطلع الساعة 10 تأخرت ..
أم دانة " طالعتها " : يعني مامنك فايدة ؟
دانة : لا .. بسوي اللي أبي ..

أم دانة " راحت بسرعة للباب وسحبت المفتاح × بعصبية .. أنا اللي أعرف وشلون أربيك .. وقفلت على دانة ..

دانة " وقفت بسرعة وتركض للباب .. وتطق ماما الله يخليك افتحي ..
أم دانة " بعصبية " : انسي .. لما تعدلين ..
دانة " رجعت وقعدت على طرف السرير " طاحت دموعها " : ليش ماما .. كله من فيصل ؟ .. × ندمت .. بس فيصل ماله ذنب .. كله مني ..


× نزلت أم دانة ومعها المفتاح .. راحت للصالة .. وأمها جالسة فيها ..
الجدة : وش فيكم ؟
أم دانة " بعصبيىة رايحة للتيلفون " : قليلة هالأدب .. تبي تروح تقدم على وظيفة تقول ؟
الجدة : وش فيك عليها ؟ خليها تروح يعني بيوظفونها على طول ؟
أ م دانة " ماسكة السماعة " : مو على يوظفونها يا يمه البنت متمردة خلاص ما وراها رجل تمردت .. وبعدين أبوها توه ميت وزوجها بالسجن خليها تنطق قفلت عليها عشان تحلم تطلع ..
الجدة : الله يهديها .. وبعدين لاتقفلن عليها تعاندك ..
أم دانة " تدق الرقم " : والله العظيم كأنها طفلة ياسبحان الله .. بس خلي عمها يجي يربيها ..
× الجدة سكتت ..
أم دانة : السلام عليكم .. أم أحمد ..
أم أحمد : وعليكم السلام ..
أم دانة : لا تصيرين بس نايمة ؟
أم أحمد : لا والله جالسة أنا وناصر نفطر .. اليوم ما داوم ..
أم دانة : طيب الله يسلمك ممكن أكلمه أبو أحمد ..
أم أحمد : لحظة ..
أم دانة " تكلم أمها " : من حظي بعد ماداوم عشان ما أطول قافلة عليها ..
الجدة : أحسن ..
ناصر: هلا ..
أم دانة : صباح الخير أبو أحمد ..
ناصر : ياصباح النور .. هلا والله أم دانة .. وشلونكم ؟
أم دانة : والله كلنا بخير ..
ناصر : الحمد لله ..
أم دانة : بغيتك با أبو أحمد تجي بخصوص دانة ..
ناصر " استغرب " : وش فيها ؟
أم دانة : والله جننتني بتروح تقدم على وظيفة ؟
ناصر : ايه طيب الله يقويها عادي خليها تروح لمصلحتها وين المشكلة ؟
أم دانة " تفهمه " : يا أبو أحمد المشكلة إنها تبي تصير مراسلة وإلا مذيعة ؟
ناصر " انهبل " : خير إن شاء الله بتطلع وزوجها بالسجن ؟
أم دانة : وغير كذا أبوها توه ميت .. لو هي وظيفة عادية ..
ناصر : خلاص أنا أتفاهم معها ..
أم دانة : الغداء عندنا ؟
ناصر : إ ن شاء الله ,, انتظروني ..
أم دانة : مع السلامة ..
ناصر : فمان الله ..
× سكرت السماعة أم دانة .. خليه يجي ..
الجدة : وبتقفلين عليها .. لما يجي ؟
أم دانة : لا 12 بطلعها .. بس خلي الموظفين يطلعون ..





× دانة تكلم نفسها بالغرفة .. والله ما أكون دانة إذا ماسويت اللي براسي ..






× في بيت أم عبد الله ..منار توها داخله ..
أم عبد الله : أجل أمك مارضت تجي ؟
منار : لا تقول روحي أنت انبسطي ومالها خلق أبد أمي..
أم عبد الله " تنهدت " : الله يعينها ..
× سكتوا شوي ..
منار " تطالع خالتها " : خاله أنا دايم أقول لأمي ليش أنا ماصرت بدال علي عشان أصير مثل عمر نورة .. أنا ماعندي أحد ..
أم عبد الله " تضحك " : يااااااابعد عمري اليوم بيجون أهل روان صديقتك .. وروان معهم .. شفتي خلينا روان تقرب لك أكثر ..
منار " تضحك ومستحية ..

× نزلت نورة وهي تبتسم .. ومتزينه .. ولابسة فستان حمل ناعم ..
× تشوفها أمها وكاسرة خاطرها .. وبينها وبين نفسها .. يابعد عمري والله لو على كيفي ماصار لك اللي صار .. بس الحمد لله ..
نورة "تضحك " : تو مانور البيت يامنور.. × منار وقفت وتبتسم .. × ونورة قربت وسلمت ..
منار " بحياء " : مرة حلو شكلك وين فيصل يشوفك ؟ بينبسط .. × ببرائة
نورة " ابتسمت بقهر " : شكراً .. يامنور ..
أم عبد الله "تطالع نورة " : اجلسي يمه ريحي نفسك ..
نورة "جلست " : والله من زمان عن العزايم .. وإن شاء الله نبدأ نجتمع مع أهل سارة .. ونوسع صدرونا ..
أم عبد الله : ياليت يصيرون ناس يحبون الجمعة ..










× في بيت أبو دانة .. في المجلس .. دانة وعمها ..
دانة "تبكي " : يا عمي أدري طيب خلاص أوقف عمري ؟
ناصر : يا دانة لازم تحترمين زوجك .. ومايصلح تسوين شي من دون إذنه ..
دانة : طيب وش سويت حرام أو خطأ أو مافيه احترام ؟.. الله يخليكم افهموني أبي أسوي شي ماأبي اجلس كذا ..
× عمها رحمها .. سكت شوي ..
دانة : وش قلت ؟
ناصر : شوفي يادانة أنا مستعد أساعدك .. بس والله أخاف فيصل مايرضى ؟
دانة " تتنهد وهي تبكي " يالله .. كل ماقلت شي قالوا فيصل .. لا تمللوني منه ..
ناصر " رحمها " : خلاص × سكت شوي ,, أنا أوديك بنفسي بكرا ..
دانة " ضحكت " : جد ؟
ناصر : إيه بس إذا قالوا مافيه وظايف ترا خلاص لا تفكرين وبتجلسين لما يطلع فيصل ..
دانة : الله يخليك يارب ..
× دق جوال عمها .. رد .. هلا أبو سليمان .. والله تمام .. خلاص متى تبي أمرك .. إن شاء الله شوي الحين أنا ببيت أخوي فهد الله يرحمه عند بنته وأمرك إذا طلعت .. لالا مافيه شي بس نسولف .. ياهلا ..
× دانة ساكته ..
ناصر " يطالعها " : هذا عمك صالح ..
دانة " تبتسم " : مو مثلك طيب ما يسأل عنا ولا شي ..
ناصر " يطالعها واستغرب ": ايه هو مشغول بهالدنيا اللي تغير وأنا عمك ..
دانة : طيب بكرا نروح ؟
ناصر "وقف " : أمرك الصبح .. ومثل ماقلت لك إذا مافيه وظايف مافيه أبد .. تصبرين لما يطلع فيصل ..
دانة " باست رآسه " : والله ماتقصر ياعمي .. وإن شاء الله تحقق اللي فبالي .. الدراسة راحت وطموحي مابيه يوقف ..
ناصر : الله يوفقك ..









× في بيت أم عبد الله .. مجتمعين كلهم بالمجلس .. أم عبد الله .. وأم عبد العزيز وبنتها سحر وروان .. ونورة تجيب وتحط ومرة مشغولة ..
أم عبد الله : هذي الساعة المباركة تو ما نور البيت ..
ام عبد العزيز : الله يسلمك .. والله يقاربك بالإحسان ..
أم عبدالله : الله يوفقهم ويسخرهم لبعض ..
ام عبد العزيز : اللهم آمين .. ويوفق نورة ..


× نورة بالمطبخ .. دق جوالها .. بسرعة ردت .. هلا وينكم ؟ طيب طيب .. خلاص بقول لسحر تتغطى والباقي مافيه أحد يتغطى عنك .. يالله ادخلوا ..

× نورة طلعت وراحت للمجلس .. تبتسم سحر تغطي عبد الله بيدخل ..
× سحر تبتسم أخذت عبايتها وتغطت ..
× دخلوا عبد الله وسارة للصالة قبل المجلس ..
نورة تزغرد .. ومافيها غيرها مرة مبسوط .. × جت منار ووقفت وتصفق ..
نورة " تضحك " : يااااهلا بالمعاريس ..
عبد الله "يضحك " : تحفة أنت ومنار .. ههههههه
نورة " راحت تسلم على سارة " : مبروووك ياقلبي الله يوفقك يارب ..
سارة " تبتسم ومستحية " : ويوفقك حياتي ..
عبد الله " يطالع سارة وبصوت واطي " : شيلي عبايتك مافيه أحد بالبيت ..
نورة " قربت " : عطيني عبايتك ..
سارة "تبتسم " : سمي ..
× ودخلوا على الحريم ..
كل الحريم .. ماشاء الله تبارك الله .. سلمت سارة وجلست وسلم عبد الله وجلس ..
أم عبد الله " مبسوطة " : أخبار معاريسنا ؟
عبد الله : تمام الحمد لله .. أنتم أخباركم ..؟
× جلسوا يسولفون وانبسطوا وكانت عزيمة حلوة للكل ..








× نورة طلعت وراحت لغرفتها ووقفت ورا الباب.. تبكي ..وش جابك فبالي هالوقت .. خلاص اطلع من حياتي والله مبسوطة بدونك .. × مسحت دموعها وراحت للمرآية تعدل الكحلة .. وتمسح بالمنديل ..
× طق باب الغرفة .. راحت تفتح ..
عبد الله " يبتسم " : وش فيك رحتي ؟
نورة " طاحت دموعها " : عشانك .. مابيك تتركني ..
عبد الله " يطالعها " : وش دعوى نوير ماراح أطول أسبوعين وجاي .. والله لو أنت مو حامل والله أخليك تروحين معنا ..
نورة " تطالعه وتبتسم " : الله يخليك ياعبود والله لولا ثم أنت كان ماشفتني أتشجع وأصبر ..
عبد الله " مسك يدها " : يالله انزلي وأنا أدري وش فيك ؟ بس ماعليه بمشيها لك .. يالله اجلسي مع زوجتي واضحكي ..
نورة " وهي تمشي " : هاه حبوبه سارة ؟..
عبد الله : تعرفين تونا بالحكم عليها بس إن شاء الله إني مرتاح ..
نورة " تبتسم " : دامك مرتاح الحمد لله ..







× في بيت أبو دانة ..
الجدة ودانة بالصالة ..
دانة " بقهر " : طيب ليش ماما ماتكلمني ؟ خلاص عمي تفهم للموضوع بس هي مو راضية ..
جدتها : أمك أبخص من عمك وأدرى منه .. هي تبيه عون صار فرعون ..
دانة : يالله .. وش أسوي الحين والله مليت ..
جدتها "عصبت " : وش راح من الوقت عشان تملين بس هذي نتيجة الدلع الزايد .. وأصلاً وش جاك من الدنيا عشان تسوين بأمك كذا ..؟ بس والله ما تستاهلين ولا ربع اللي سوته لك ..
دانة " سكتت شوي .... يالله بس خلاص أنا بروح مع عمي وإذا مافيه فرصة عمل خلاص .. راح ترضى ..
جدتها " انقهرت " : إن شاء الله يطلع اللي بالسجن ويوريك دلع أمك وأبوك الله يرحمه ..
× دانة شافت جدتها وسكتت .. ملت من الكلام معهم ..









× بيت أم عبد الله .. أم عبد الله وأم عبد العزيز يسولفون بالمجلس .. ومنار وروان يلعبون .. وعبد الله ومرته ماطولوا لأن عندهم رحلة..
× نورة وسحر يسولفون بالصالة ..
نورة " تبتسم " : حلو الله يوفقك ..
سحر : يعني تمنيت إني أتزوج مع سارة عشان ماأحس بفراقها .. بس يالله شوي وش مستعجلين عليه ..
نورة " تطالعها " : جد وش مستعجلة عليه ترا الزواج شقى .. والرجل يبي ..
سحر " تطالعها وبهدوء" : بس بيني وبينك شكل سلمان عسل ومايبي على قولتك × تضحك ..
نورة " حست بشعور غريب " : أهااا.. × ارتبكت .. الله يوفقك ..
سحر " ودها تآخذ وتعطي بس نورة ماتساعد ..
سحر " بسرعة وعفوية" : نورة أنت مبسوطة مع فيصل ؟
نورة " ابتسمت بتطنز " : تستهبلين ؟
سحر " انحرجت " : وش دعوى ؟ لا ماأستهبل ..
نورة " مستغربة وتطنز " : عبود قايل لسارة وسارة أكيد قالت لك ..
سحر " سكتت " ...
نورة : تراها متساوية معي .. عادي .. × منقهرة ..
سحر " رحمتها " : لالا ماأقصد والله .. بس مايمنع يمكن أنت تحسين انك مبسوطة ..
نورة " تضحك بقهر " : ما أظن فيه مرة عاقلة يتزوج عليها زوجها وتنبسط .. تضحك على روحها هذي .. !!!!
سحر : صح ..
× نورة سرحت ..
× سحر منحرجة .. طيب خلينا نرجع عند أمي وأمك ..
نورة " تطالعها .. يالله " وقفت .. × بينها وبين نفسها .. وش جاب طاريه هذا وراي وراي .. ؟؟ اوف منه ..
سحر " وهي تمشي " : نورة ترا ماأقصد أجرحك وربي ..
نورة " تمسك يدها " : عادي ماصار شي لا تصيرين حساسة ...








× راحت الليلة ..









× الفجر ..




× نورة خلصت مصلية .. وراحت جلست على طرف السرير .. وتتألم ,, ياااالله وش فيني .. زاد عليها الألم .. آآآآه ياربي وش أسوي ,, وقفت .. وراحت بسرعة لغرفة أمها ..
× دخلت .. وأمها توها مخلصة مصلية ..
أم عبد الله " استغربت " : وش فيك .؟
نورة " بألم " : يمه شكل الطلق بدا ..
أم عبد الله " ابتسمت ووقفت بسرعة ": اصبري شوي توه بادي معك ؟
نورة " تتألم " : يمه وش أصبر ؟؟ له أكثر من ساعتين المغص يروح ويجي .. الله يخليك بسرعة ..
أم عبد الله " مسكت نورة وجلستها على طرف السرير .. اصبري يمه أدق على علي مافيه غيره ..
× نورة تتألم وزاد معها ..
× أم عبد الله تدق من جوالها على علي ..
أم عبد الله "تتنهد " : مايرد ..
نورة : يمه دقي على خالتي تصحيه تكفين .. بسررررعة ..
أم عبد الله " راحمتها " : يالله يمه اصبري .. تحملي شوي ..
× دقت على جوال أم فيصل .. مقفل ..
أم عبد الله " طاحت دموعها " : يالله وينهم مافيه أحد ؟ ياربي الله يذكرك بالخير ياعبود ..
نورة " بكت من الألم " : يمه دقي على الثابت دوري حل وإلا على أبو فيصل ..
× دقت أم عبد الله على جوال أختها مرة ثانية .. ومسك ..
ام عبد الله : يارب ترد ..
نورة : ياااارب ..
أم عبد الله " بسرعة " : هلا أم فيصل ..
أم فيصل " مستغربة " : وش فيك داقه هالوقت ؟
أم عبد الله : واللي يسلمك أم فيصل دوري لنا أحد يجي يودينا للمستشفى نورة تطلق ,,
أم فيصل " انبسطت " : يالله يالله أقوم أصحي علي ..
أم عبد الله : الله يعافيك بسرعة ..
أم فيصل : مع السلامة ..






× أم فيصل راحت بسرعة لغرفة علي .. وشافت مافيه أحد بالسرير .. يااااااربي وين راح هذا .. معها جوالها .. وتدق عليه مايرد .. ياااربي وش أسوي .. ؟؟




× تسمع صوت أحد تحت ... × تصوت .. من اللي تحت ..
× علي يرقى الدرج .. أنا يمه وش فيكم . ؟ أزعجتوني بالمسجد وش عندكم .. ؟
أم فيصل " بسرعة راحت له " : ياوليدي رح بسرعة لبيت خالتك .. نورة بدا معها الطلق ..
علي " انهبل " : يعني بتولد إذا جاها الطلق ؟
أم فيصل " عصبت " : مو وقت أسئلتك رح هالحين وإذا جيت اسأل يالله يبه بسرعة ..
علي " رجع " : يالله يالله ..






× أم فيصل دقت على أم عبد الله .. هلا أم عبد الله .. يالله خلك عند الباب ترا علي جاء ..








× في بيت أم عبد الله ..
أم عبد الله " واقفه عند نورة " : وين عبايتك ؟
نورة : بغرفتي معلقة على الشماعة ..
× طلعت أم عبد الله .. ونورة زاد الطلق عليها ..
نورة " تصرخ " : يمه الله يخليك بسرعة ..
× دخلت أم عبد الله ومعها العباية .. يالله يمه قومي ألبسك ..
× نورة وقفت ..
أم عبد الله : وين حطيتي الشنطة اللي جهزناها ؟
نورة : بالغرفة عند سريري ..


× راحت أمها وأخذت الشنطة ..

× طلعوا ينتظرون علي عند الباب ..








× في بيت أبو فيصل ..
أبو فيصل " توه داخل غرفته " : وين راح علي ؟ سيارته مو عند الباب ..
أم فيصل " جالسة على طرف السرير ومو على بعضها " : نورة ياعمري بتولد ..
أبو فيصل " انبسط " : الله يهون عليها يارب .. أجل ما أقدر أنام ..
أم فيصل " بكت " : ولا أنا ..
أبو فيصل " قرب وجلس جنبها " : المفروض تفرحين أبوه فيصل ..
أم فيصل " تبكي " : تمنيت فيصل بيننا يحس ويسمع الخبر ..
أبو فيصل " يهون عليها " : إن شاء الله قريب يطلع .. ادعي له .. وراح ينبسط ..
أم فيصل " والدموع مالية وجهها " : يارب تفرج عنه وعن محمد.. يارب ..





× نورة تتألم وهي بالسيارة .. والطلق يزيد.. علي الله يخليك بسرعة ..
علي " منحرج وخايف ": يالله قربنا ...
أم عبد الله : تحملي يمه .. اصبري ..
نورة " تبكي " : ياااااالله ..






× أبو فيصل منزل رآسه .. طيب ماودك ننزل وش يقعدنا ماراح ننام ..
أم فيصل : اي والله صادق لما تولد نورة ونروح لها الله يهون عليها ..
أبو فيصل " وقف ومسك يد زوجته " : يالله قومي وادعي ربك يهون على نورة ..
أم فيصل "وقفت " : الله يهون عليها .. ويارب ولدي يشوف ولده قريب .. يارب .. × تبكي ..






× علي جالس بالإنتظار .. دق جواله .. هلا يمه ..
أم فيصل : هلا يبه .. هاه وش الأخبار ؟
علي : دخلت خالتي مع نورة .. وأنا أنتظر ..
أم فيصل : وش قالوا ولادة ..؟
علي "بسرعة " : ايه ايه ولادة وبسرعة دخلوها ..
أم فيصل : يارب تهون عليها .. بشرني يبه ترانا ننتظرك أنا وأبوك ..
علي : إن شاء الله ..
أم فيصل : مع السلامة ..
علي : هلا ..











× في استراليا .. خالد وليلى ..
ليلى " مسترخية بتنام وعندها خالد .. بس حتى ولو ياخالد أنا زوجتك والمفروض تقول لي ..
خالد "بهدوء " : طيب وشوله تعيدين السالفة بس حب مشاكل ؟
ليلى " مستغربة " : لا بس قاهرني .. ليش ماقلت يعني شايفني خبلة بقول لنورة ..؟؟
خالد " يطالعها " : مو مسألة خبلة ؟ بس أنتم يالحريم مريضات ولا تأمنون أبد ..
ليلى " تضحك بتطنز " : حنا مريضات ؟
خالد : إيه مريضات .. وتحبون القيل والقال .. وتسوون أنفسكم فاهمين الدنيا .. لااااا ويجي فبالك إنك بتصلحين بيت وأنت بتخربينه أنا أعرفك زين ..ملقوفة ..
ليلى " طالعته وبتطنز " : نم نم بس تكفى .. دامك تشوفني مريضة .. خم وسادتك ونم ..
خالد " يضحك " : شفتي ماتقدرين تدرين ..
ليلى : إلا أقدر أرد .. بس اللي مثلك حرام أتعب نفسي بالكلام معه ..
خالد " سحب اللحاف " : الله يوفقه فيصل ما قصر تحمل أنا عشت معه كل لحظة وأنت ماتدرين عن شي أبد ..
ليلى "مستغربة " : وش فيك أنت ؟ صاحي ؟
خالد " يطالعها " : ايه صاحي .. نورة ماكانت تعرف تتعامل مع فيصل أبد .. وقسم بالله ماكان ينام الليل من القهر اللي فيه .. بس هذا أنتم يالحريم ماتصحون إلا إذا عطيناكم العين الحمرا ..
ليلى " عصبت " : يااااالله فيه رجال يتحملون إلى خمس سنين وإلى عشر ,, وفيه حريم يصبرون العمر كله .. هذا وش شاف ياحسرة .؟؟ توه حتى سنتين ماكمل .. جد بعض الرجال مايستاهلون التقدير ولا الصبر .. وعلى فكرة مو بس فيصل صبر .. حتى نورة صبرت عليه..
خالد "بتطنز " : قومي قومي تكفين طفي النور .. لأن الكلام معك عقيم وباين ماتدرين عن السالفة أبد .. وجلستي مع نورة جلستين وضحكت عليك بكم كلمة .. يالله قومي طفي النور الله يصلحك بس ..
ليلى " طالعته وسكتت ... !!









× في بيت أبو فيصل .. أبو فيصل وأم فيصل بالصالة ..
أم فيصل : يابعد عمري ياعبد الله نفسه يصير عند أخته ..
أبو فيصل : ياحليله هالولد ماشاء الله ..
× دق جوال أم فيصل ..
× ردت بسرعة .. هلا علي .. هاه بشر ..
علي "يضحك " : أبشرك يمه ولد ..
أم فيصل " بكت " : ولد يا أبو فيصل ..
× أبو فيصل انبسط ..
أم فيصل "بسرعة " : طبيعي ؟
علي " يبتسم " : خالتي تقول طبيعي ..
أم فيصل " وهي تبكي " : الحمد لله ونورة كيفها ؟
علي : يمه دقي على خالتي جوالها فاتحته اسأليها والله مادري عن شي بس قالت لي وراحت ..
أم فيصل : يالله مع السلامة ..
علي : مع السلامة ..









× أم فيصل وهي ماسكة الجوال .. ألف مبروك ياأبو فيصل ..
أبو فيصل : الله يبارك فيك .. يالله دقي تطمني ..
أم فيصل " تدق " ... .... هلا أم عبد الله .. ماشاء الله مبروووك والحمد لله على سلامة نورة ..
أم عبد الله " تبكي من الفرحة " : الله يسلمك ..
أم فيصل " بكت بقوة " : والله إني تمنيت ولدي بيننا ويفرح .. والله نفسي يدري ..
أم عبد الله : ادعي له ..
أم فيصل " أخذت منديل " : طيب كيفها نورة عسى ماتعبت ؟
أم عبد الله : لا ياربي لك الحمد ..
أم فيصل : الحمد لله .. عاد أنا الظهر بجي إن شاء الله ..
أم عبد الله : الزيارة الساعة 3 ..
أم فيصل : خلاص إذا قدرت أصبر جيت على 3 أنا وأبو فيصل ..
أم عبد الله : مع السلامة بدخل عند نورة ..
أم فيصل : سلمي عليها وباركي لها ..
أم عبد الله : يبلغ .. ومبروك وأنا أختك ..
أم فيصل : يبارك بعمرك ..









× في بيت أبو دانة .. دانة تلبس عبايتها وهي تنزل الدرج ..
× طلعت أمها من غرفتها وشافتها .. دانة ..
دانة " التفتت " : سمي ..
أم دانة " وهي زعلانة " : تراني ماني راضية عنك لو تشتغلين ..
دانة " طالعتها ولا اهتمت " : مع السلامة ماما ..
× أم دانة انقهرت ولا ردت ..




× دق جوال دانة .. وشافت الرقم وابتسمت .. أهلين عمي .. يالله هذاني طالعة .. × حطت جوالها بالشنطة وطلعت ..









× في المستشفى ..

أم عبد الله " تطالع نورة " : هاه كيفك الحين ؟
نورة : الحمد لله ..
أم عبد الله " تمزح " : هاه تحملين مرة ثانية ؟
نورة "بتعب " : لالااااااا خلاص .. والله اني وأنا أولد أقول الله يعظم أجر أميمتي .. وبس أدعي لك ..
أم عبد الله " تبتسم " :ايه حسيتي بالتعب عرفتي ورا الأمهات ينقهرون إذا ارفعوا بناتهم أصواتهم عليهم .. عشان هالولادة والتعب ..
نورة " بتعب " : خلااااااص سامحيني يمه .. والله والله ماتوقعت الولادة كذا لو كنت أدري بس عن ربعها كان شلتك فوق راسي ..
أم عبد الله : يابعد عمري طول عمرك عسل ولا شفت منك إلا كل خير يايمه .. الحمد لله على سلامتك ..
نورة " تطالع أمها " : الله يسلمك يالغالية .. × سكتت شوي .. يمه تكفين قولي لهم يجيبون ولدي بشوفه ما مليت ..
أم عبد الله : قلت للممرضة تجيبه تقول شوي ..
× نورة سكتت ..
أم عبد الله : يابعد عمري يا أختي شبعت من الصياح ..
نورة " برحمه " : تبكي ؟
أم عبد الله : إيه .. تقول ياليت فيصل بيننا ..
نورة " سكتت .. ونزلت رآسها .. وتكلم نفسها .. مو بس هي تحتاج فيصل .. حتى أنا أحتاج بوسته على رآسي ,,
أم عبد الله " تطالع نورة " : الحمد لله .. يرجع إن شاء الله ويشوفك وبتطمن عليك وعلى
نورة "قاطعتها " : لا أنا ما أبيه .. الله يفرج عنه ويروح لأمه المسكينة ..
× أم عبد الله سكتت ..










× في مكتب المدير الإقليمي ..
× ناصر ودانة ومدير المكتب ..
ناصر : الموهبة إن شاء الله موجودة .. والبنت متمكنة ..
المدير : بالعكس حنا نرحب في تواجد العنصر النسائي وزيك عارف ..
ناصر : شي طيب ..
دانة : كيف الحين تم قبولي وإلا لا ؟
المدير " يطالعها " : مو بالسهولة هذي أختي .. راح نسوي لك تجربة .. وإذا نجحتي تسوين تقارير للأخبار أو للبرامج .. أو حتى تصيرين مراسلة ..
دانة "تبتسم ": وين أسوي التجربة .. ؟
المدير : امممم تسوينها في قسم الأخبار .. لأن هناك التقارير كثيرة .. وإن شاء الله تعجبينهم ..
ناصر : ومتى نجي .. ؟
المدير : تقدر تروح له الحين .. وترتبون معاه ..
ناصر "وقف ومد يده يصافحه ": الله يعطيك العافية ماقصرت ..
المدير : الله يعافيك وبالتوفيق ..
دانة "تطالعه وتبتسم " : مشكور ..
المدير : العفو ..


× طلعوا ..

دانة " وهي تمشي " : توقع يقبلونني ..
ناصر : إن شاء الله .. وشكلك أعجبتي المدير بجرأتك بالحوار ..
دانة "تبتسم " : أهم شي الجرأة ..
ناصر : الله يوفقك وأنا عمك ..








× أم فيصل لابسة عبايتها وواقفة تنتظر أبو فيصل .. تكلم نفسها .. يالله وش فيه تأخر وينه ؟؟
× جت منار .. يمه تكفين بروح معك ..
أم فيصل : لا يمه بكرا بتطلع تروحين معي لبيتهم ..
منار "مسكت عبايتها " : الله يخليك يمه ..
× نزل أبو فيصل .. يالله يالله تأخرنا ..
أم فيصل " تطالعه " : وينك يالله بسرعة ..
منار " تطالع أبوها " : يبه تكفى بروح ..
أبو فيصل : يالله روحي غيري لبسك وأنتظرك بالسيارة بسرعة ..
أم فيصل : لا مو لازم تروح خلها تروح بكرا ..
أبو فيصل " وهي يمشي التفت على منار " روحي البسي يبه أنتظرك ..
أم فيصل : الله يهديك بس ..
أبو فيصل : تحرمينها مبسوطة بتشوف ولد أخوها ..









× ناصر ودانة بالسيارة راجعين للبيت ..
دانة : ياي التجربة بعد أسبوع والله بموت من الملل ..
ناصر : زين بعد أسبوع ..
دانة : يالله حلو .. يمكن أعجبهم على قولتك ..
ناصر : لا وتراه قال لي شكل البنت جرئية ..
دانة : هههههه وش فيهم كل من شافني قال جرئية ..؟
× دق جوال عمها .. ورد .. هلا أحمد .. ..
ناصر : مبرووووك الله يبشرك بالخير .. ألف ألف مبروك يبه .. زين بعد عشان تآخذها معك لاستراليا .. يالله يالله إذا جيت للبيت قل التفاصيل مع السلامة ,, هلا يبه ..
× دانة ساكته ..
ناصر " مبسوط " : ماشاء الله وافقوا أهل البنت اللي خطبناها لأحمد ..
دانة " بقهر " : مبروك .. ماشاء الله ..
ناصر " بهدوء" : بس لا يدري أحد لأن الموضوع ماتم .. وتعرفين أنت بالأمور هذي ..
دانة : لا تخاف عمي .. طيب بيدرس هو ؟
ناصر : إيييه ماشاء الله ماباقي على دراسته إلا 3 أسابيع .. يروح ويرجع يتزوج ..
دانة : الله يوفقهم
× دانة حست بقهر لأنها خسرت دراستها ولو كانت مكان البنت ماصار لها اللي صار .. تكلم نفسها .. وش هالحظ لك .. ؟؟ مالت علي بس ..







× في المستشفى ..
أم فيصل شايله الولد .. ياااابعد عمري والله يشبه فيصل .. × تبكي ..
أبو فيصل "واقف جنبها " : ماشاء الله مزيون ..
أم عبد الله : منهي أمه يالله من فضلك ..
منار : يشبه فيصل ياخاله .. مرة بعد ..
أم عبد الله "تمزح " : يشبه بنتي مايشبه أخوك ..
نورة " تبتسم " : هاه وش رآيك ياعم ؟
أبو فيصل : ماشاء الله تبارك الله مزيون الله يصلحه .. وش بتسمينه ؟
نورة سكتت .. !!
أبو فيصل " يطالعها " : ما اتفقتوا على اسم قبل ؟
نورة " طاحت دموعها " : قبل يختلف عن الحين ياعم ..
× سكت أبو فيصل ورحمها ..
أبو فيصل " يطالعها " : أنت وش الاسم اللي معجبك ؟
نورة " بكت " : اللي يعجبك ياعم .. أنت سمه ..
أبو فيصل " جلس على الكرسي " : شوفي يايبه إذا ماودك تسمين علي كيفك ومسامحك يايبه ..
أم عبد الله : اسمك من أفضل الأسماء .. يا أبو فيصل ..
نورة : صادقة أمي ..
أبو فيصل " يقنعها ويبي يرضيها عشان فيصل" : بس نورة أكيد فبالها اسم ؟
نورة " سكتت شوي .. ايه أنا فبالي اسم ..
أبو فيصل " يبتسم " : قولي يبه .. ونسميه ..
أم فيصل " تطالعها " : نورة سميه هذا ولدك يايمه ..
نورة " بهدوء " : بعد من أفضل الأسماء .. وغالي على قلبي والله .. أبي أسميه عبد الله ..
أبو فيصل : يالله من فضلك والنعم وألف نعم .. والله لو يآخذ من عبد الله بس اسمه يكفيه ..
أم عبد الله "تضحك " : الله يسلمك مير ياأبو فيصل ..
أم فيصل " تطالع أختها " : إلا بشرتوا عبد الله ..؟
أم عبد الله : ياااااابعد حيي ياعبود .. لا والله مابشرناه مقفل جواله .. وأرسلت له رسالة بس شكله ماشافها ..
نورة : يوووه بس أخاف يرجع من سدني لو يدري ..
أم فيصل : ياحبي له الله يخليه لكم .. وصل ؟
أم عبد الله : ماأظن إنه واصل شكله بالطيارة للحين .. وإلا يانورة ؟
نورة " تطالع أمها " : أكيد لأن الرحلة طويلة.. × سكتت شوي .. أو يمكن جواله مافيه شحن ..
أم فيصل : يدري إن شاء الله ..










× في بيت أبو دانة ..
أم دانة وأمها بالصالة ..
أم دانة " بقهر " : دخلت والله حتى السلام ماسلمت .. بس تقول تم القبول مبدئياً ..
الجدة : هذا اللي قهرني ..
أم دانة : كلمت عمها صالح .. وعصب وحتى عصب على ناصر ..
الجدة " استغربت " : صاحية أنت تكلمين صالح والله ان يقلب الدنيا على بنتك وتفتحين لنفسك ألف باب . ويتدخل فيكم ..
أم دانة " سكتت شوي " : أحسن هذا اللي أبيه ..
× رن جرس البيت ..
أم دانة " تصوت " : ناني افتحي الباب .. × تشوف أمها .. ووقفت هذا أكيد صالح جاء .. بروح أجيب شي أحطه على شعري ..
الجدة : الله يهديك بس مادري وشوله قلتي له ..
× دخل العم صالح للصالة بسرعه .. وبعصبية .. وينها ؟
الجدة " تطالعه " : اذكر الله وسلم قبل ..
العم " معصب " : هلا هلا وشلونكم .. وين دانة ..؟؟





× دانة بغرفتها مسترخية وماسكة الرواية بيدها .. وتسمع صوت الإزعاج .. ونزلت من السرير وحطت الرواية على الكومادينة .. يوووه وش فيهم .. ؟ فتحت باب الغرفة .. وطلعت وشافت عمها يرقى الدرج ..
العم " بسرعة وبعصبية " : دانوه ..
دانة " بكبرياء " : خير ؟
العم " قرب بسرعة ومسك شعرها وبعصبية " : لا تتكلمين معي بهالأسلوب أقطعك تقطيع ..
دانة : أيييي اترك شعري طيب ..
العم " ويشد شعرها " : أنت بتنزلين وجيهنا بالأرض ياقليلة الحياء ..
دانة " بكت " : اتركني طيب .. والله عورتني ..
العم " رفع رآسها وضربها كف قوي ..
× دانة بكت ..
العم " بصوت عالي " : شوفي بنت أبوك تروحين للقناة ..
دانة " وهي تبكي " : بروح ومالك دخل فيني أنت مو ولي أمري ولا شي ..
× قطعها الكف الثاني ..
دانة " بكت بقوة بصوت عالي " : ماتعرفنا إلا بالمشاكل ..
× جت أم دانة .. خلاص خلاص يا صالح ..
العم " وهو رافع اصبعه االسبابة ومعصب " : دانة ترا ماطلع شي .. وقسماً بالله العلي العظيم لا أمسح فيك الأرض وأنسيك الدنيا .. خلك بس تتجرأين وتسوين شي .. وناصر حسابه معي ..
دانة " وهي تبكي " : اتركنا خلاص ماعليك منا ..
× أم دانة مسكت بنتها ... خلاص اسكتي ..
العم : أنا رايح الحين وخليني بس أدري إنك متعدية عتبة البيت ..
× دانة بينها وبين نفسها انقلع الله يآخذك..
× نزل عمها ..

دانة " تطالع أمها وتبكي " : أنت اللي علمتيه .. أدري ..
أم دانة " بهدوء " : أبي مصلحتك .. ولا سويت شي خطأ ..
دانة " ماتكلمت .. ودخلت غرفتها وسكرت باب الغرفة بقوة وقفلت الباب وبصوت عالي وهي تبكي بقهر .. يااااااارب تفرج عن فيصل .. ياااااارب .. والله إن الغالي على حق يوم يزوجني قبل يموت .. × جلست على طرف السرير تبكي بقوة ..
× أمها واقفة عند الباب وتسمع .. ورحمتها ..
دانة " وهي تبكي " : ليش تقولين له .. خلاااااص ماله دخل فيني .. وإلا عشان اللي يتكلم ويدافع عني مات بيتدخل فيني .. الحين أنت تدرين إنك فتحتي له باب يرجع ويسوي مشاكل .. الله يآآآخذه × تبكي ..
× أم دانة واقفة وندمت إنها علمت .. ×تتنهد ..لا إله إلا الله محمد رسول الله ..







× في المستشفى ..
نورة تكلم بالجوال .. يااااابعد عمري أنت ..
عبد الله " يضحك " : أخيراً صرت خال ..
نورة : لا واسمه عبودي بعد ..
عبد الله : ياحبي لك .. أنا ورا ماأجي الحين والله ماأقدر أصبر ..
نورة "تضحك " : لالالا انبسط وإن شاء الله عبود الصغير ماراح يطير ..
عبد الله : طيب ياعسل سارة تسلم عليك مرة ثانية ..
نورة : يسلمها ربي واشكرها على المكالمة ..
عبد الله : يالله فمان الله وانتبهي لعبودي ..
نورة "تبتسم " : إن شااااااء الله .. يالله فمان الله ..
عبد الله : هلاو غلا ..


× أم عبد الله تطالعها .. هاه مبسوط ..
نورة " تبستم " : مرة ياحبي له .. يقول بطير من الفرحة ..
أم عبد الله : ياحبي له .. شوفي ترا اليوم أم سلمان بتجي لا تقولين ولا كلمة عندها كلمة ورد غطاها ..
نورة : إن شاء الله .. وطيب توقعين يدرون إن فيصل متزوج ؟
أم عبد الله "تتنهد " : والله مادري يمكن سحر قايلة لسلمان وعاد سلمان مثل أمه ..
× نورة سكتت ..
أم عبد الله : المهم لا تجيبين طاري انك منقهرة .. لأنها بتفرح بالمشكلة بيني وبين اختي ..
نورة : طيب يمه .. ماراح أقول شي .. وأم عبد العزيز بتجي بعد ..؟
أم عبد الله : لا لا ماأتوقع يجون بالبيت إن شاء الله .. والله يعين .. هالنفاس تعب ..
نورة : الله يعين ..








× دانة مسترخية على السرير وتبكي .. الله يرحمك يالغالي .. الله يرحمك .. والله فراقك صعب .. × تمسح دموعها .. وفيصل بالسجن .. وش هالحظ .. ؟؟ يارب يارب تصبرني ..






× في بيت ناصر .. ناصر وصالح جالسين بالمجلس ..
ناصر " وهو يصب القهوة " : بس حتى ولو مالك حق تمد يدك عليها ..
صالح : تستاهل أصلاً من قبل وهي قاهرتني أبوها معطيها الضوء الأخضر في كل شي ..
ناصر " يطالعه " : الله يلوم اللي يلوم أبوها ,, ماله إلا ثم هالبنت وش تبيه يسوي فيها ؟
صالح " سكت شوي وبقهر " : لااااا واللي يقهر إنك تسوي لها اللي تبيه ..
ناصر : أنا راحمها .. مسكينة البنت أبوها وزوجها راحوا بوقت واحد ..
صالح " يتنهد " : زوجها بيرجع إن شاء الله ..
ناصر " يقنعه " : ياخي لو بنتك أمل يصير لها نفس اللي صار لدانة ماتنقهر .. حتى فرحة مثل البنات مافرحت على طول زوجها انسجن..
صالح " مستغرب من أخوه " : بعد أخوي الله يرحمه مزوج بنته واحد حتى السؤال عنه ماسأل وغير كذا متزوج بس لأن بنته دانة وافقت وتبيه.. وبعدين لا تقارن بنتي بدانة أرجوك ..
ناصر " ابتسم باستهزاء " : ليش ماأقارنها ؟
صالح "بسرعة " : تربيتي لأمل غير .. حتى الحمد لله ماتخالطهم عشان ماتخرب أخلاقها ..
ناصر " يبتسم " : دانة أخلاقها قمة .. وأنا لو عندي بنات كان خليتهم 24 ساعة عند دانة ..
صالح " بسرعة " : المهم المهم .. لا تودي دانة الأسبوع الجاي وإلا والله لاأقلب الدنيا عليك أنت وياها ,,
ناصر " سكت ..
صالح " وقف " : تآمرني بشي ..
ناصر " وقف " : شوف صالح دانة بتسوي اللي تبيه وأنت مالك سلطة عليها ولا لك حتى كلمة .. البنت متزوجة
صالح "قاطعه": قلتها البنت متزوجة .. يطلع زوجها وهو يتصرف معها لا أنا ولا أنت ..
ناصر : بس حنا ماسوينا خطأ .. اللي سويته أنت هو اللي خطأ ..
صالح : أنا بربيها من جديد .. وماأبيها تسوي شي من ورا زوجها .. لأن زوجها يختلف عنا زي ماقالت لي أمها .. ولا أبي بنت أخوي تتطلق ..
ناصر " يتنهد " : يحلها ربك أنا أجلس مع دانة وأشوف ..





× بعد مرور أكثر من أسبوع .. !!





× في بيت أبو دانة ..


× أبو فيصل ودانة بالمجلس ..

دانة " مستحية " : الله يحييك ياعمي ..
أبو فيصل : تعبت والله وأنا أدور عنوانك ..
دانة : الحمد لله إنك حصلته ..
أبو فيصل : والله من زمان عندي العنوان ولا أحد يدري .. بس قلت أجي بوقت مناسب × سكت شوي .... وهذا واجبنا وأنا عمك ..
دانة : الله يجزاك الجنة ياعم × دمعت عيونها .. والله توي أحس إني متزوجة ..
أبو فيصل : صح مارضينا بس خلاص صار واقع وإن مارضينا نرضى غصب .. المهم أنا قلت أجي أبشرك بنفسي ..
دانة "ابتسمت " ...
أبو فيصل : فيصل بكرا بيطلع ..
دانة " ضحكت " : جد ؟
أبو فيصل : إيه .. وقلت أجي أقول لك لأنك أكيد ماتدرين عن أخباره وهذا واجبي وأنا عمك أنت زوجته ومن حقك تعرفين ..
دانة " مبسوطة " : الله يعطيك العافية على الخبر .. والله جد فرحتني ياعم ..
أبو فيصل " وقف وطلع من جيبة فلوس ومسك يد دانة خليهم معك وأنا عمك ..
دانة " ترجعهم " : لا ياعمي والله ماعلي قاصر الله يجزاك خير ..
أبو فيصل : والله ماآخذهم خليهم معك يبه .. × رجعهم ..
دانة " نزلت رآسها وطاحت دموعها " : والله أحرجتني ياعم ..
أبو فيصل : ولا احراج ولا شي أنا أبو زوجك ..
دانة : تسلم ..
أبو فيصل : يالله مع السلامة والله يوفقك .. وانتبهي لا أحد يدري بجيتي لك ..
دانة : إن شاء الله .. مع السلامة ..








× في بيت أم عبد الله ..

× أم عبد الله وأم فيصل ونورة ومنار ..
أم عبد الله "تطالع نورة " : رضعي ولدك أنت لا يصير جوعان ..
نورة : يااااااربي توي مرضعته يمه وش فيك ؟
منار " تقاطعهم " : شيليه وحطيه على رجولي نورة ..
أم فيصل : لا يا منار نايم خليه مو زين الصغير يصحى من النوم ..
نورة : صادقة خالتي أحطه على رجولك إذا صحى ..
× سكتوا...
أم فيصل : والله مادري وش أسوي إذا جاء فيصل بكرا .. فيه بقلبي شي عليه ..
أم عبد الله : لا يا لولوة لازم تشوفين ولدك ..
× نورة سرحت .. !!!!!
أم فيصل " بحزن " : مشتاقة له والله العظيم قلبي جمر من الشوق .. بس وش أسوي اللي سواه مو هين ..
أم عبد الله : سامحيه يا لولوة .. واللي صار بينه وبين بنتي ..
أم فيصل : مادري والله مادري .. × طاحت دموعها ..








× في بيت أبو دانة ..
× دانة ومشاعل بالغرفة ..



دانة : ياختي عسل أبو فيصل ..
مشاعل : الله يوفقك يارب ..
دانة : المهم فجرت رآسك من يوم جيتي بالسالفة .. وتركت سالفتي الأولى ..
مشاعل : إيه وش صار .. كيف التجربة للقناة ؟
دانة " مبسوطة " : انهبلوا يقولون صوتك جناااان وتدرين .. !! يركزون على أشياء ما توقعتها فيني ..
مشاعل " تبتسم " : تجنين أنت .. الله يوفقك يارب ..
دانة : آمين يارب .. وعمي مايدري عن شي الكريه هذا .. ياحبي لعمي ناصر قال ماراح يدري عن شي .. وخلاص بكرا يطلع فصولي..
دانة " بسرعة " : ماقلت لك .. يوم الأربعاء اللي فات دخلت فستان زواجي ..
مشاعل " بقهر " : لييييييش ماقلتي عندي فستاني والله يجنن وقاعد بالدولاب كذا ..
دانة : لالالا أنا أبيه ذكريات الله يسلمك ياقلبي ..
مشاعل " تطالعها " : أنا قلت كذا قبل أتزوج الحين خرابيط والله أبي أستفيد منه وأأجره على الأقل أكسب منه ..
دانة "تبتسم " : أحس الأسبوع هذا حلو .. مو مثل اللي فات يوووه بس أبكي ..
مشاعل " دق جوالها .. هذا زوجي .. أكيد عند الباب .. هلا يالله جاية .. ×سكرت .. ووقفت .. يالله تزيني لزوجك لاتنسين ..
دانة : لا توصين ياقشطة .. يالله ولا تقطعين ..
مشاعل : إن شاء الله .. عاد أنت تعالي ..
دانة : إن شاء الله ..





× في بيت أبو فيصل ..
أبو فيصل وعلي بالصالة .. يتعشون ..
علي : زين أمي راحت لخالتي والله إني راحمها أمس تقول ماقدرت أنام أسمع صوت محمد بالبيت ..
أبو فيصل : يالله ماتنام الليل .. والله حتى أنا اشتقت لمحمد ولفيصل ومزحه ..
علي " يتنهد " : الله يعين ..
أبو فيصل : تدري ياعلي ..
علي : سم ..
أبو فيصل : رحت لزوجة فيصل اليوم وقلت إن فيصل بكرا بيطلع ..
علي " استغرب " : يبه وش سويت ؟
أبو فيصل : وش سويت ؟
علي : يبه حرام ونورة ؟
أبو فيصل "يقنعه " : لازم نرضى يايبه البنت مالها ذنب بعد .. حرام نتركها ..
علي : ياااالله لو تدري أمي ..
أبو فيصل : لا تقول لأحد ..
علي : لالالا ماراح أقول أكيد .. طيب تدري إن فيصل جاه ولد ..
أبو فيصل : لا ماقلت شي وشكلها ماتدري ..
علي : أحسن ..
أبو فيصل : إذا خلصت متعشي جب أمك من بيت خالتك ..
علي : إن شاء الله ..







× في بيت أبو دانة ..
أم دانة والجدة .. وأم إبراهيم بالصالة ..
أم دانة : زوجة إبراهيم ماعمرها جت لبيتي ..
أم إبراهيم : خليها تجيني أنا ياأم زوجها وبعدين تجيك × تضحك ..
الجدة : الله يصلحها .. عكس إبراهيم ..
أم دانة : شفتي يا أم إبراهيم .. رجل دانة بكرا بيطلع من السجن ..
أم إبراهيم : الحمد لله .. الله يبشرك بالخير .. مسكينة دانة والله مقطعة قلبي ..
الجدة : وبس تبكي ومتضايقة متعلقة فيه ..
أم دانة : توها بعد .. ماشافت إلا الدلع ..
أم إبراهيم : صادقة الحين أيام الدلع ..









× في بيت أبو فيصل ..
أبو فيصل وأم فيصل بغرفة النوم ..
أم فيصل " مسترخية " : والله مادري وش أسوي ياأبو فيصل ..
أبو فيصل : إن شاء الله بتسلمين وتستقبلينه عادي ..
أم فيصل " بكت " : ما أقدر والمسكينة إلى اليوم تطيح دموعها منه .. كاسر خاطرها ..
أبو فيصل : لازم ترضين عنه يالولوة ..
أم فيصل " تسمح دموعها " : يارب .. والله مادري شسوي ..
أبو فيصل : هذا ولدك وبكرا بيجينا غير عن كل مرة .. بيجي مشتاق للدنيا كلها ..
أم فيصل "بكت بقوة " : والله اني مشتاقة له .. يابعد عيني ياوليدي ..




× يوم جديد ..


في بيت أم عبد الله ..
نورة " وولدها على رجولها يبكي " : بس يبه .. بس ..
أم عبد الله : ياربي مانومنا بالليل بدينا بالشياطين ..
نورة " تضحك " : على خاله .. ياحبي له ..
أم عبد الله : يالله غيري له قومي ..
نورة : تكفين يمه غيري له أنت ..
أم عبد الله : عطيني اياه وبسبحه بعد .. أكيد أبوه بيجي يشوفه اليوم .. × أخذته ..
نورة " سكتت ..
أم عبد الله "راحت " وتكلم عبود .. ياعين أمك أنت ..

× نورة .. بينها وبين نفسها .. والله مشتاقة لك يافيصل .. والله نفسي أشوفك .. ياليتك تدري عن فرحتي.. !! والله ودي أضمك .. يابعد قلبي أنت ..






× في بيت أبو فيصل ..
أم فيصل ومنار بالصالة ..
منار : يمه دقي على علي شوفي وينهم والله طولوا وأنا أنتظر ..
أم فيصل : يابعد قلبي يافيصل وش بيسوي لو يدري عن ولده ..
× سمعوا صوت باب ..انفتح ..
أم فيصل "وقفت ": يمه روحي شوفي أكيد هم ..
منار "راحت تشوف .. وتصوت يمه يمه فيصل جاء ..
× طلعت أم فيصل بسرعة ..
أبو فيصل : تو مانور البيت يبه ..
أم فيصل " شافته وبكت .. فيصل يااااااابعد قلبي ..
فيصل " بسرعة قرب وضمها " : هلا بالغالية ..
أم فيصل " تبكي وهي حاضنته " : الحمد لله على السلامة يبه ..
فيصل : الله يسلمك يالغالية ..
× علي يكلم أبوه بصوت واطي .. متى نقول له عن ولده ؟
أبو فيصل : شوي إذا دخل وارتاح عشان مايروح ..
علي : زين ..
أم فيصل " تلمس رآسه وتبكي " : يابعد قلبي ياوليدي يالله ادخل خذ لك دش وارتاح ..
فيصل " يتنهد " : ارتحت بشوفتكم والله ..
× دخلوا ..




× في بيت أم عبد الله ..
× دق التيلفون .. ردت نورة .. هلا
أم فيصل : هلا نورة يمه ..
نورة " قلبها يرتجف بسرعة " : أهلين ..
أم فيصل : وين أمك ؟
نورة : تغير لعبود .. بغيتي شي خالتي .
أم فيصل "مبسوطة " : قولي لأمك فيصل طلع ..
نورة " طاحت دموعها " : الحمد لله على سلامته ياخاله ..
أم فيصل : الله يسلمك يالله يمه بقعد مع ولدي .. سلمي على أمك ..
نورة : يبلغ .. × قفلت ..
× نورة تكلم نفسها .. ياااااالله .. كذا طلعت من حياته على طول .. خالتي تكلمني وكأني غريبة مو زوجته .. !!!!!!







× في بيت أبو دانة ..
× دانة فتحت باب غرفة أمها وبسرعة دخلت وهي مبسوطة .. ماما أبشرك فيصل طلع ..
أم دانة " ابتسمت " : الحمد لله على سلامته ..
دانة " قربت لأمها " : والله مبسووووووووطة مرة نفسي أروح الحين أشوفه .. × تضحك ..
أم دانة : دوم مبسوطة .. بس من قال لك ..
دانة : عمي أرسل لي .. ياحبي له ..
أم دانة : الحمد لله يايمه ..






× في بيت أبو فيصل ..
× كلهم جالسين بالصالة ..
أم فيصل " ودموع الفرحة مالية وجهها ": عقبال محمد .. أشوفه بيننا وترجع حياتنا مثل أول ..
فيصل " نبرة تعب " : آمين ..
كلهم : آمين ..
أبو فيصل : دامك ماتقدر تنام عندنا لك بشرى ..
فيصل "يطالع أبوه " ...
أبو فيصل " يبتسم " : نورة جابت لك ولد ..
فيصل " بسرعة " : والله جاني ولد ؟
أم فيصل : إيه سمته عبد الله ..
فيصل " بكى من الفرحة " ... ووقف بشوفه .. تكفون بشوفه .. !!!!








وش راح يسوي فيصل يرجع لنورة وإلا دانة !!!!!!