× دانة واقفة عند الباب .. منصدمة من شكل أبوها ولا شعره فيه .. وصاير جلد وعظم يالله معقولة .. !!! ساكته .. أبوها طاحت دموعه .. قربي يبه ضميني .. × دانة ساكته .. والدموع على وجهها ..


ليت المرض فيني ولا فيك ياأبوي *** وليت العمر يهدى لأهديك عمري ..



قربت دانة وتحس بشي جواها ماتقدر توصفه قهر .. وحسرة ..وحزن من شكل أغلى إنسان عندها.. وضمته وهي تبكي .. وتشاهق من البكي .. أبعدت عنه .. وتشوفه .. وتطالع أمها اللي تبكي ,, ماما ليش ما قلتوا لي ؟؟
أم دانة " تمسح دموعها وسكتت شوي " : مانبيك تشيلين هم والحمد لله على كل حال ..
أبو دانة : الحمد لله .. يبه أنا بخير ..
دانة "نزلت راسها والدموع مالية وجهها وبهدوء ": ايه بخير .. !! × تسترجع أحلى لحظاتها مع أبوها .. تسترجع أيام الدلع ..ومستحيل أي إنسان يعوضها حب أبوها وعطفه ..
أبو دانة " يطالعها " : كيفك يبه ؟
دانة " تطالعه ومنصدمه " : كنت بخير .. الحين لا ماني بخير ..

× أم دانة جالسة على كرسي جنب السرير .. ومو قادرة تتكلم ..
دانة " مسكت يد أبوها وباستها ودموعها تطيح على يده " : عسى ربي يخليك لي .. والله مابي دنيا أنت مو فيها ..
أبو دانة " حط يده على رآسها ويمسح " : هذا قدر ومكتوب يا يبه .. والحمد لله ..
أم دانة "بهدوء" : يالله يمه روحي ارتاحي أنت توك جاية وتعبانة ..
دانة : لا يمه بجلس عند الغالي .. مشتاقة له .. خليني ..
× سكتوا ..
دانة " بهدوء" : طيب قولوا لي السالفة .. والله قلبي ناغزني من زمان لا تطمنت وحاسة إن فيه شي ..






× فيصل سكن في شقة .. قريبة من بيت أبو دانة ..وتعبآآن وعلى طول نآآآم لما وصل .. !!






× نورة في غرفتها .. تكلم مستشار في العلاقات الزوجية تبيه يساعدها .. طيب لو سمحت ممكن لو أولد يرجع لي مثل أول ..
المستشار : إن شاء الله .. يا سبحان الله فيه رجال يتعاطفون مع نسائهم إذا ولدوا ويرحمونهم وممكن يحبها إذا جابت له الولد ..
نورة : يارب .. طيب تنصحني بشي بعد ..
المستشار : تبتعدين عن النكد .. تقابليه بابتسامة دائماً .. تغيرين بشكلك .. إذا أمرك تبتسمين .. لا يجي وأنت نايمة .. سوي اللي هو يبي خليك دائماً مطيعة بعيدة عن العصبية وخليك مرحة ..
نورة : يعطيك ألف عافية .. والله ماقصرت ..
المستشار : الله يعافيك .. ومثل ما قلت النكد العدو الأول للرجل .. وحاولي تبتعدين عنه..
نورة : إن شاء الله .. يالله مع السلامة ..
المستشار : مع السلامة بالتوفيق ..


× سكرت الجوال.. ياااارب ينفع معاه .. يااارب .. نزلت من السرير بتطلع ووقفت .. وتناظر شكلها بالمرآية .. يوووه وينك يافيصل تشوف بطني وتلمسه .. والله راح تنبسط وأنت تحس بالبيبي يتحرك .. ياحياااااتي أنت ..








× دخلت دانة غرفتها .. قفلت الباب .. ورمت نفسها على السرير وتبكي .. ياااااااالله كل هذا صار ولا أدري .. دانة تبكي والتعب بعد السفر والإرهاق وفوق كل هذا الصدمة لما عرفت عن المرض .. وإنه خلاص بأي وقت ممكن أبوها يرحل ويتركها .. ويبعد عنها للأبد وتودع عيونها أصدق الناس .. وأوفاهم وأطيبهم قلب وأحنهم .. تبكي بقهر .. والدموع ماراح ترجع الصحة والعافية لأبوها .. تبكي رجل مو أي رجل .. تبكي أصدق نصيحة تسمعها أذنها .. وأحلى كلام.. !! دانة تمنت إنها موجودة وتعطيه كبدها .. وتمنت إنها موجودة تواسيه وتخدمه ,, تمنت كل شي لأنه بحاجتها وشكله يقول إنه قريب بيودع الدنيا .. × تفكر .. مين راح يعوضني ؟؟ مين راح يتحملني .. لمين أشكي بعد الله .. لمين أفضفض .. يااااااااارب تشفيه .. يارب تطول بعمره .. نامت وهي غرقانة بدموعها ..










× يوم جديد في استراليا .. خالد وليلى يفطرون .. على طاولة الطعام ..
ليلى " تطالعه وبتطنز " : ماشاء الله فيصل راح بنفس رحلة دانة .. والله صدفة وأدوخ على الصدف اللي كذا ..
خالد "يطالعها " : أنت وش دخلك بالناس .. خلي الناس بحالهم ..
ليلى " رفعت حاجبها " : طيب .. بنشوف هالصدفة وش تسوي .. الله يعينك يا نورة ..
خالد "مستغرب" : طيب تدرين إني سألت فيصل .. ولا قلت لك ..
ليلى " انهبلت " : يااااااشينك .. ما لك داعي تسأله ..
خالد : صديقي .. وقهرتيني أنت بعد ..
ليلى : بس حتى ولو اللي بيني وبينك ما تقول له ..والله انك تقهر ..
خالد "يضحك " : ويقول الحريم ذولي عليهم سواليف .. يقول وش فيها شاكة خبلة مرتك .. والله فشلتيني ..
ليلى : ما أحد قال لك قل له .. بس جد مالك داعي ..
× خالد بينه وبين نفسه .. والله مادري وشلون أتستر عليك يا فيصل راح تبين السالفة بعدين ..







× الساعة 5 الصبآح في السعودية .. فيصل توه مخلص مصلي .. × والله نفسي أشوف أهلي ومشتاق لهم حرام بالسعودية ولا أشوفهم .. يارب تعينني .. قام فيصل بيرجع ينام .. استرخى ع السري ويفكر .. يفكر.. ومشتآآآق لأهله .. !!






× دانة مسترخية على السرير .. وماسكة جوالها تكتب مسج .. يالله لازم ترضى يافيصل وش أسوي ؟؟ ..





× فيصل غفى وصحاه صوت المسج .. يالله مين ؟؟ أخذ الجوال يقرا المسج ( كيفك فصولي ؟ إن شاء الله تمام .. بقول لك موضوع زواجنا لازم نأخره لأني يمكن ماأرجع استراليا وبعتذر الفترة هذي لأني رجعت والدنيا متغيرة وبابا مريض بالمرض الله يكفيك شره ودعواتك وأشوفك على خير ) ياااالله يارب تشفيه .. بس وش أسوي جاي وتارك دراستي عشان أتزوج وآخر شي أرجع ما سويت شي ,, يكتب لها مسج ..





× دانة وهي جالسة بسريرها .. ولامه رجولها لبطنها والجوال جنبها .. وصوت المسج وصل ,, ( الله يشفيه يارب ويخليه لك ..بس صعبة والله أنا جيت وخليت دراستي أسبوعين أرجع كذا أقل شي نتملك عشان نآخذ راحتنا ) يااااالله يافيصل رايق والله أنا فيني هم كبر الجبل وأنت تبينا نتزوج ,, وش أسوي ..؟؟


× دانة طق بااب غرفتها ,, وقامت تفتح ,,
أم دانة : إيه أشوى صاحية ,,
دانة "وتبتسم وهي حزينة" : إيه قايمة لي ساعة كذا وأصلي..
أم دانة " جلست على طرف السرير " : اسمعي يمه .. أنا وأبوك تكلمنا عن موضوعك .. وأبوك يبيك تستعجلين ..
دانة " تقاطعها " : لا ماما ما أقدر والله نفسيتي تعبآآنه .. أجلوها ..
أم دانة " تطالعها " : يمه أبوك حالته صعبة ويقول أخاف عليها من عمانها بكرا .. أضمن حياتها دامي حي ..
دانة " سكتت شوي " : بس والله صعبة ..
أم دانة "تطالعها " : يا يمه أنت تملكي وسوي اللي تبينه ..
دانة "تتنهد " : أخاف والله يآخذني فيصل معه وأبوي محتاجني ..
أم دانة "تبتسم " : لا يا يمه بيتفهم ..
دانة "سكتت شوي : طيب اللي تشوفونه بس ماراح أسافر ..
أم دانة "وقفت " : طيب يمه نامي أنت .. وحاولي إنه يستعجل لأنه الولد عاجب أبوك مرة ..
دانة "بابتسامه " : إن شاء الله .. × طلعت أم دانة ..





× فيصل منسدح بفراشه طآآآير النوم من عينه .. وخاف دانة تطير منه .. والهواجيس توديه وتجيبه .. !! يطالع جواله .. والمسج وصله .. فتحة بسرعة ( سوري والله أزعجتك .. بس اللي تبيه يصير وأي وقت تبي نتملك ونرتاح ونآخذ راحتنا أنا حاضرة ) فيصل ابتسم .. ويكتب مسج ( أنا بجي اليوم وأسلم على أبوك ونحدد الوقت اللي هو يبي )





× دانة وصلها المسج .. ابتسمت .. والله توقعت إني راح أكون مبسوطة .. بس صار الموضوع يالله خلينا نسرع بكل شي عشان عمانك .. وأبوي وصحته أنساهآآآ يعني أفكر في نفسي !! وإلا أفكر بمين ؟؟!!! بس يالله أتملك وأرتاح ..







× راح الوقت بسرعة .. نورة وأمها جالسين في الصالة..
نورة "تطالع أمها" : دقيت عليه ألف مرة مقفل ،مقفل .. ياربي والله أخاف فيه شي..
أم عبد الله : دقي على ليلى شوفي يمكن يدرون وينه ..
نورة "ابتسمت": يوووه مادري شلون ماجتني الفكرة .. !! × اخذت جوالها تدق .. تطالع أمها .. هلا ليلى ..
ليلى " خالد عندها" : هلااااا وغلا ..
نورة : كيفك ؟
ليلى : تمام الحمد لله أنت كيفك ؟
نورة : بخير ياربي لك الحمد .. شوفي ماأقدر أطول بس بسألكم عن فيصل أدق ومقفل جواله ..
ليلى: إيه الحمد لله والشكر ماوصل ؟
× خالد طالعها منهبل ؟؟؟؟
نورة "استغربت " : وصل وين وصل ؟؟
ليلى "تشوف خالد ومستغربة " : السعودية .. والله فيصل راح يقول عشانك ..
نورة "انهبلت " : لاااااا أكيد فيك شي أنت ؟؟
× خالد سحب الجوال وقفل بسرعة ..
خالد "بعصبية" : غبية أنت ؟
ليلى " مستغربة " : وش فيك ؟ تسأل عن زوجها ؟؟
خالد : ماعليك منهم بحريقة هو وزوجته ؟؟
ليلى "عصبت " : والله فيه شي مو طبيعي إذا دقت نورة بقول أنا فاهمة السالفة خطأ أحسبه بالسعودية × دق الجوال ..
خالد : قولي لها أمزح وإلا أي شي .. × ردت .. هلا نورة ..
نورة " مستغربة " : وش فيك ؟
ليلى "تضحك" : الله يآخذ ابليسه الجوال تسكر من نفسه ..
نورة : طيب أنت تقولين فيصل جاي ؟
ليلى " تضحك مجاملة " : ياااااعمري أنت أمزح معك بشوف وش تقولين .. لا هنا وتوه خالد جاي من عنده ..
× خالد سرحان .. والله مادري وش أسوي فيك يافيصل ؟؟
نورة " تتنهد " : الحمد لله ريحتيني أهم شي يصير بخير .. والله يخليك قولي لخالد يقول له يفتح جواله ..
ليلى : إ ن شاء الله يالله ماأطول عليك ..
نورة : يالله مع السلامة ..
ليلى : مع السلامة .. × سكرت وتطالع خالد .. كيف فيصل ودانة عساهم مبسوطين ؟؟
خالد "يطالعها " : وش تبين توصلين له بالضبط ؟
ليلى : ترا علاقتهم حرام خلهم يتزوجون أبرك لهم ..
خالد "مستغرب " : وأنت وش دخلك يالملقوفة ؟
ليلى : صفق له بس حرام عليكم .. ياكرهكم صدق مالكم أمان .. ودانة وحدة جد مالها أمان ..
× خالد سكت وخلاها ..
ليلى "تطالعه وهي معصبة " : بس نفسي أنبه نورة المسكينة .. !!
خالد "عصب" : خلاااااص اسكتي ..
ليلى : طيب بسكت بس إذا كبرت بتكلم ..
× خالد سكت وخلاها مرة ثانية لأنه مايدري وش يقول..






× أم عبد الله ونورة .. !!
نورة : والله غريبين ؟
أم عبدالله : زوجك أصلاً مو طبيعي وبس ..
نورة "تطالع أمها ": لا طبيعي بس هو تجيه حالات يقفل جواله يطفش من كل شي أفهمه مرة فيصل ..
أم عبد الله : الله يستر منه بس ..






× فيصل وهو راكب تاكسي.. لا قبل مر بنك الرياض اللي قريب من هنا الله يعطيك العافية..
االسواق : حاضر أخوي ..
فيصل : إن شاء الله ما تتعبون مرة ..
السواق "يضحك " : ههههههه لا أكيد تعب يعني تعرف طول اليوم تعب وندور رزقنا ..
فيصل : الله يعينكم جد تعب .. الله يرزقك يارب ..
السواق : وعندي العيال واجد الله يخليهم والحريم 3 ومصاريف ..
فيصل "يضحك " : الله يعينكم مادري ليش تضغطون على أنفسكم وخاصة الزواج بأكثر من وحدة ..
السواق : هذي الدنيا ومكتوبين العيال بس أنصحك ماتزوج أكثر من وحدة × يمزح
فيصل "ابتسم " : إن شاء الله ..

× سكتوا شوي .. ووصلوا البنك .. حاسبه فيصل ونزل ..
يمشي بيدخل البنك .. ويوقفه صوت واحد .. فيصل .. فيصل .. × فيصل انصدم ..
أبو سعد "صديق أبو فيصل " : ماااااشاء الله يالله حيه ..
فيصل "منحرج " : هلا والله ابو سعد .. × سلم عليه ..
أبو سعد : بشر عنك ؟
فيصل : الله يسلمك بخير والله أنت كيفك وكيف العيال ؟
أبو سعد : الحمد لله كلنا بخير .. أبوك أمس وأنا معه ولا قال لي إنك جيت ولا شي يقول توك على الجيه ..
فيصل "انحرج " : إيه ايه .. وشلونك أجل ؟
أبو سعد : تمام الحمد لله ..
فيصل : أنا والله مستعجل يا أبو سعد عندي كم شغله بخلصها واشوفك على خير ..
أبو سعد : الله يساعدك .. يالله مع السلامة وسلم على الوالد ..
فيصل : يآصل .. × راح فيصل .. من وين طلع لي هذا الله يآخذ ابليسه ..




× أبو سعد × يدق على أبو فيصل .. يكلم نفسه الحين يقول لي توه على الجيه ..
هلا أبو فيصل ..
أبو فيصل : هلا هلا ..
أبو سعد : مهوب أمس تقول لي توه فيصل ماعنده نية يجي ..
أبو فيصل " يضحك " : الله يصلحك يا أبو سعد وش عندك ؟
أبو سعد : توي شايف فيصل عند البنك مادري وشوله تضحك علي من حينك تستخف بي ..
أبو فيصل "مستغرب " : ولدي ؟
أبو سعد "بتطنز" : لا ولدي ؟ إيه ولدك ؟
أبو فيصل : ههههههههههههه تأكد الله يصلحك أنت وهاللقافة ..
أبو سعد : والله إني تو سلمت عليه .. وسولفت شوي معه ..
أبو فيصل : يا ابن الحلال مخطي ولدي باستراليا ..
أبو سعد "عصب " : أقول لك والله إني مسلم عليه تبي أروح أدوره أنا قريب من المكان اللي هو فيه ؟
أبو فيصل : وخر بس وش تدور الله يصلحك ..
أبو سعد " بعصبية " : كيفك ترا ولدك جاي بس ماتدري عنه ..
أبو فيصل : طيب مع السلامة بس داق تقول لي إنه جاي ..
أبو سعد : إيه وخر مع السلامة ..


× سكر أبو فيصل الجوال ..
أم فيصل " تطالعه " : وش عنده الملقوف ؟
أبو فيصل " يضحك " : ملقوف أبو سعد الله يصلحه يغالطني يقول ولدك تو سلم علي ..
أم فيصل " تضحك " : هههههههههه ما عقل هو وكذبه ؟
أبو فيصل " يضحك " : والمشكلة كبر الجبال وإلا مستخف ..
أم فيصل : هههههه يا حليله .. بس نكته هالرجل ..
أبو فيصل : أبد يوسع صدرونا بالاستراحة ..





× في بيت أبو دانة .. دانة تساعد الشغالة بترتيب المجلس والتنظيف .. شوفي مسحي الطاولة زين وأنا بطلع لبابا طيب ..
الشغالة : طيب ..


× طلعت دانة .. من المجلس ,, وراحت لغرفة أبوها .. × دخلت وهي تبتسم .. يالله بابا تقوم تجلس هناك فيصل شوي ويجي ..
أبو دانة " يطالعها " : يالله يبه .. × وقف أبودانة .. وجسمه تعبان
دانة "قربت ومسكته ومشت معه " : الله يخليك لي يالغالي ..
أبو دانة : ويخليك يارب ويوفقك .. × رن جرس البيت ..
دانة " قلبها طاح وتصوت للشغالة .. ناني .. ناني .. روحي افتحي الباب بسرعة ..
× دانة دخلت أبوها المجلس وطلعت .. دخل فيصل لابس ثوب وشماغ وكااااشخ ع الآخر .. السلام عليكم ..
أبو دانة "يطالعه " : وعليكم السلام .. × وبيوقف ..
فيصل "بسرعة " : استريح استريح ياعم × باس رآسه ..
أبو دانة : ياهلا وسهلا ..
فيصل " جلس " : ياهلا فيك ..
أبو دانة : كيفك إن شاء الله بخير ..
فيصل : الحمد لله الله يسلمك ياجعلك ماتشوف شر وطهور إن شاء الله ..
أبو دانة : الحمد لله والشكر .. ياربي لك الحمد ..





× دانة جالسة بالصالة .. ياااربي والله نفسي أشوفه .. بس فشله .. ايه أحسن إذا تمكلنا إن شاء الله × جت أمها .. خلاص ودينا القهوة ..
دانة : ودتها الشغالة ؟
أم دانة : إيه .. الله يوفقك يمه ..
دانة "تبتسم " : آمين يارب ..





× أم فيصل توها داخله على أختها أم عبد الله وتوها جالسة .. ونورة عندهم ..
أم فيصل "تضحك " : اليوم أبو سعد ياختي هالرجل أحس إنه مسكون ؟
ام عبد الله : بسم الله
نورة : ههههههه وش فيه ؟
أم فيصل : يقول سلمت على فيصل وشفته عند البنك..
نورة "انصدمت عشان ليلى قالت لها بعد" : وشلون ؟
أم فيصل : خبل هالرجل موب صآآحي ..
× نورة سرحت ..
أم عبد الله "تضحك " : بسم الله الرحمن الرحيم .. عليه كذبات ..
نورة " سكتت ......!!!! وحطت ألف سؤال في رآسها ..






× فيصل مبسوط ومرتاح .. والله يشرفني إني أرتبط ببنتك ياعم ..
أبو دانة : تسلم وتستاهل كل خير .. ودانة إن شاء الله تسعدك ..
فيصل "يبتسم " : وإن شاء الله أسعدها وارتاح ياعم لاتشيل همها..
أبو دانة : الله يستر عليكم ويوفقكم ..
فيصل : طيب بكرا نتملك لأن ما معنا وقت والله ..
أبو دانة : اللي يريحك وتشوفه أنت .. أنا خلاص هاللي تشوفني وشلون ..
فيصل : الله يعطيك الصحة والعافية ..







× نورة راحت تشكي لأخوها ..
عبد الله : معقولة ؟
نورة : يعني أول شي قلت يمكن صدفة بس الحين لا والله أتوقع فيه شي مو طبيعي ..
عبد الله "يطالعها ويفكر " : لالالالا ماني مصدق وش يبي يجي للسعودية الحمد لله والشكر أنت وأبو سعد حتى صرتي مثله اللهم لك الحمد ..
نورة "والدمعة بعينها " : طيب ليش من أمس أدق على جواله مقفل ؟
عبد الله : صدف في صدف ؟؟ وين المشكلة طيب أقول لا توسوسين وروحي اجلسي عند أمي وخالتي ..
نورة "تتنهد ووقفت " : والله ماني مرتاحة ..
عبد الله "يضحك " : نورة تكفين بلا حركات مالها داعي ..روحي بس الله يهديك ..
نورة : طيب تشوف مصير الأيام تبين ..







× راح الوقت بسرعة .. فيصل رجع للشقة .. وجالس بالصالة .. الحين مادري وش راح يسوي هذا أبو سعد ؟؟!! والله شكله فضحني ؟ وأخاف أنكشف وبكرا الملكة وينكشف كل شي ,, الله يستر بس ومتى أرجع لاستراليا أفتك..




× دانة جالسة عند أبوها .. وهي مرررة مبسوطة .. أنت ارتحت بابا؟
أبو دانة : الرجال مسكت ماشاء الله عليه ..
دانة : الحمد لله أهم شي أعجبك ..
أبو دانة : طيب الرجال والسواليف ثقل وعقل ..
×دانة مبسوطة ..
أبو دانة : بكرا تزيني والبسي خلاص يبه لازم تروحين معه خليني أرتاح ..
دانة "انصدمت وتضحك " : لا بابا وشلون أروح وأنا ماسويت شي ؟ وحتى فستان زواج ماعندي ولا شي سويته ..
أبو دانة "يفهمها " : الرجال متفهم .. ويقول تجهز معي كل شي وعن الفستان البسي أي شي ..
دانة "تضحك " : جاد ؟؟ لالالالا مستحيل ألبس أي شي خله بكرا ملكة وانا غسلت فستان حلو عندي أجلس معاه وبس ..
أبو دانة : الله يصلحك بس لازم تجهزين خرابيطك هذي عشان تروحين تدرسين؟؟
دانة : باااااااابا وش فيك ماني رايحة استراليا بعتذر وشلون أروح وأنت تعبآآآن ؟
أبو دانة : لا مافيه اعتذار بتروحين الأسبوع الجاي جهزي نفسك بس أنامافيني إلا العافية والرجال تارك دراسته وتقولين بقعد لا بتروحين وأنا ماأبيك تأجلين ..
دانة : الله يخليك أبي أجلس عندك
أبو دانة "يقاطعها " : يا يبه أنا ماراح أدوم لك ومصلحتك أهم اسمعي كلامي والله تندمين بكرا ..
دانة "طاحت دموعها " : بس أبي أجلس عندك والله ماأقدر ارتاح وأنت كذا ..
أبو دانة "يتنهد " : حتى أنا أبي أشوفك .. وراح ترتاحين إن شاء الله واسمعي كلامي أنا أبوك وأبي مصلحتك ..
دانة "منزلة راسها وتطيح دموعها " : يااالله والله أحس إن فيه نآآآآر جوا ..
× أبوها سكت ..





× نورة منسدحة بتنام .. مسكرة النور وعلى الإضاءة الهادية .. !! وتفكر .. والله كلام عبد الله صح خييير إن شاء الله يجي وش عنده !! بس لالالا أكيد فيه شي .. نورة نامت والوساويس توديها وتجيبها ..!!




× فيصل وهو منسدح بينام .. والله يا نورة لو تدرين راح تقلبين الدنيا علي .. بس الله يعين ويارب ماتدرين مالي خلق مشاكل ..ويارب تريحني إذا تزوجت دانة ..




× في بيت أبو فيصل .. علي ومحمد في الغرفة ..
علي "جالس على طرف السرير " : أنت راح تتعب أمي وأبوي معك ..وكأن عقلك مو براسك ؟
محمد "منسدح" : لا براسي وأنت اللي عقلك موبراسك الله يهديك بس ..
علي : حتى دراستك أهملتها .. سبحان الله مافيه عائلة تكتمل لازم يطلع واحد مخه مضروب ..
محمد "عصب" : وش تبي الحين ؟ خلاص ياخي اتركني ..
علي "بهدوء" : بخليك ..
×دخل أبوفيصل عليهم.. وش عندكم ؟
علي : يبه ولدك طويل لسان .. ماتعرفه ..
أبو فيصل : الله يهديك يامحمد .. خلاص احترم اللي أكبر منك .. ترا الإسلام أمرنا إننا نحترم اللي أكبر منا مو تآخذ اللي تبيه وتخلي اللي مايعجبك .. الله يصلحك ..
محمد "غطى وجهه باللحاف" : أقول خلوني أنام بس ..
أبو فيصل "يطالع علي " : للأسف ماقدرت أربيه صح ..
علي سكت ..
×طلع أبو فيصل ..

............................


مرت الساعات بسرعة وراحت الليلة على الجميع كما هي !!




وأخيراً ..
صارت ملكي وحدي !!
وأخيراً ..
سوف أعانق قلبها !!
وأسمع نبضاته !!
..

يامن لونتي حياتي بألوان الفرح ..
وعانقتي نجوم سمائي بحبك..
أحبك ..
فهذا قلبي لك ..
اجعليه بين ضلوعك ..
حبيبتي
أحبك ..



فيصل "يطالعها " : أعجبتك الهدية ؟
×دانة ترفع رآسها ومعها البطاقة ..
دانة "تضحك " : مررة روعة ..والله ماني مصدقة أخيراً صرت زوجتك ..
فيصل "يطالعها " : بس وش هالزين وش هالحلا ..
× لابسة فستان أحمر ماتكلفت فيه.. والشعر رافعته بتسريحه ناعمة الخصل على وجهها والمكياج مررة هادي ..
دانة "استحت " : عجبتك ؟
فيصل "يبتسم " : أكييييد كل هالزين ولاتعجبينني ..
دانة " نزلت رآسها " : شكراً ..
فيصل : ههههه تسلم هالشكراً .. مبروووك ألف مبروووك دنو ..
دانة : الله يوفقنا يارب وراح اسعدك ..
فيصل "يطالعها" : هاه غيرتي رآيك تجين معي استراليا ؟
دانة : والله مادري بس بابا يبي أروح أكمل ..
فيصل : شوفي حبيبتي اللي يريحك .. بس ترا قلبي بيموت من الشوق ..
دانة : بسم الله على قلبك .. بحاول أجلس انا لأني مثل ماقلت لك أكييد بابا يحتاجني وتعرف الأيام هذي مرة قلبه مو ملكه
فيصل : الله يشفيه يارب .. ويعينه .. وأنت واللي يريحك ياقلبي ..
× دانة ابتسمت .. وتشوفه ..
فيصل : وش فيك تشوفينني ؟
دانة " تبتسم " : أنت أحلى بالزي السعودي مرة خطير عليك .. والله شكل الغيرة بدت عندي
فيصل : ههههههههه ياحياتي أصلاً ماراح أشوف غيرك وفيه أحلى منك ..
دانة "بدلع " : فيييييصل والله أستحي ..
فيصل "يطالعها" : يااااحظي فيك .. ياحبي لاستراليا اللي جمعتني معك .. يازين الحب الحقيقي ..
دانة "انتبهت لكلمته " : يعني أنا حبي حقيقي والباقي خرابيط ..
فيصل : كلللللللهم خرابيط أنت الأساس ..

× انبسطوا فيصل ودانة .. وأحلى أيام حياتهم يوم ملكتهم .. اجتمع قلبين حبوا بعض !!!




× نورة تبكي .. عند أمها بالصالة .. بس يمه والله قاهرني أقلها يتصل يسأل عني .. هذا وأنا حامل حتر الرحمة مارجمني
أم عبد الله : وش بيدي أسويه يمه .. أكلم اختي أقول لها .؟. والله ما ودي أقلقها ..
نورة " والدموع تطيح " : والله يافيني قهر ونكد وقرف مايدري فيه إلا الله كله منه .. ياليتني ماعرفته ..
أم عبد الله "تتنهد وتهون عليها" : لا حول ولا قوة إلا بالله العلي العظيم .. اذكري الله .. واكيد فيه شي يمكن جواله خربان يمكن فيه الف شي كله علمه عند ربي ادعي ربك إنه يرجع مثل أول استغفري .. الحين يمه قومي وتوضي وصلي لك ركعتين ادعي ربك ..
نورة " تبكي " : الله يعينني بس ..





× دانة بالصالة هي وأمها .. ماما والله عسسسسسل ومرة انبسطت معه ..
أم دانة "تضحك " : يااااااقلبي أنت توك لا تفرحين تحسبين كل أيامك كذا .. ولا تحكمين عليه بأول يوم تملكتوا فيه ..
دانة " سكتت شوي " : طيب مامي افرحي لي موب تخوفينني ؟
ام دانة : ما خوفتك بس لاتصيرين خبلة ..
دانة "وقفت " : طيب ..× تضحك .. يالله خلينا نروح لبابا أكيد يبينا ..



× فيصل رجع الشقة وجلس بالصالة وفتح التلفزيون ونفسه يطير من الوناسة حاس بشعور غريب براحة بكل شعور حلو .. ورفع للصوت التلفزيون على العربية .. ومرجع رآسه على الكنب .. ويسمع الخبر بالعربية .. ياااالله يارب تستر .. × دق على دانة .. أهلين حبيبتي .. شوفي العربية فيه خبر تفجير بالرياض .. أوكي شوفوه .. لالالا عاجل توه مابينوا تفاصيل ولا شيء ..


× في بيت أبو فيصل .. أم فيصل واقفة هي وعلي .. وأشكالهم مو على بعضهم أبد ..
أم فيصل "تبكي ": والله قلبي مو مرتاااااااااااح أبد .. أحس بطني مو معي وكلي بطيح من الخوف واللي يعافيك دور أخوك ؟
علي : يايمه سألت عنه بكل مكان .. سألت حتى بالاستراحة اللي يروح لها .. × دق جوال علي .. هلا يبه .. لا والله محمد مارجع .. إيه سمعنا الخبر .. الله يستر ..
أم فيصل "جلست على الكنب وتبكي " : والله ماني مرتاحة رجولي مو قادرة تشيلني .. ياااااااارب تستر علينا .. ياااااارب تخلي لي وليدي .. ياااااحي ياقيوم ترجعه .. يالله ياكريم إنه مو ولدي .. × تبكي ..
علي "جلس جنبها " : يمه وش فيك ؟ اذكري الله ..
أم فيصل "تطالع علي " : يا وليدي اقرا لي الرسالة اللي هو مرسل لك ..
علي " فتح جواله " : السلام عليكم .. علي سلم على أهلي كلهم وقل يسامحونني ويحللونني وترا الدنيا فانية اتقو الله أحبكم .. !!

× شهقت بقوة تبكي وكأنها فاقدة الأمل .. تبكي ولد برئ ماله ذنب يضحك عليه !! تبكي قطعة منها وهذا حال كل أم مرت بنفس التجربة,,!! حسبي الله عليهم حسبي الله عليهم إذا ولدي صار فيه شي ..
علي : لا إله إلا الله يمه .. اذكري الله ..
أم فيصل " تبكي " : ارفع لصوت التلفزيون يمكن يجي خبر ..
علي " قام يطول للتلفزيون ..
× جت منار .. تطالع علي ومنهبلة من بكي امها .. علي وش فيكم ؟
علي : ولا شي روحي نامي بس ..
منار "جلست على الكنب وتشوف أمها " : علي وش فيكم ؟
علي "عصب " : خلاص اسكتي ..
منار "سكتت ورحمت امها وطاحت دموعها " ...!!


× راح اليوم ولا فيه ولا خبر عن محمد ...!!! وأهله كلهم مو على بعضهم عدا فيصل اللي غايب عن الدنيا ولا يدري عن شي .. !!




× فيصل يكلم دانة قبل ينام..

فيصل " بهدوء " : لاااا ياقلبي الزواج مستحيل أعلنه الحين ..
دانة "بدلع " : طيب وين المشكلة إذا أعلنته خلاص .. لا تخاف من أحد ولا يهمك أحد الشرع حلل لك أربع ..
فيصل : ههههه المسألة مو مسألة أربع .. أنا أحترم أمي ورايها يهمني .. ولا ودي أجرحها لأن زوجتي بنت اختها ..
× دانة انقهرت لما قال زوجتي ..
دانة : طيب أنا زوجتك بعد .. ماعليه اعلن الزواج ..
فيصل "يقاطعها " : دانة دانة اسمعيني .. حنا مو اتفقنا حول الأمر هذا و وافقتي خلاص ,, الحين مو وقته .. بعد ماودي أجرح نورة وهي حامل ..
دانة " حست بنار من الغيرة " : يووووه كل ماقلت شي قلت نورة .. خلاص احترمني شوي ..
فيصل "استغرب" : وش فيك أنت ؟
دانة "بعصبية " : ما تحس بالشعور إذا جبت طاريها خلاص فيصل احترمني ولا تجيب طاري زوجتك أبي كأننا اثنين لحالنا مافيه أحد معنا ..
فيصل " يتنهد " : بس لازم تتعودين على طاريها ياقلبي ..
دانة " بهدوء " : طيب الله يعينني ..
فيصل "بهدوء " : تغارين ؟
دانة " بدلع " : إيه ومرة بعد ..
فيصل : هههههه طيب أنا مررررة دخت بنام ..
دانة : أوكي تصبح على خير ..
فيصل : وفكري زين ترا زوجك محتاجك في الغربة ..
دانة : إن شاء الله ..
فيصل : مع السلامة حبيبي ..
دانة : مع السلامة ..