× فيصل راح للشاطئ وقف السيارة ومانزل لأن الجو مطر .. طلع الدخان .. يطالع البحر .. ورجع رآسه على المرتبه .. حاس الدنيا ضايقة عليه .. وحاس إن قلبه ماصار ملكه .. طلع جواله من جيبه .. ويقرا مسج دانة .. (صباح الخير فيصل .. بس حبيت أذكرك إن بيننا لقاء ) .. × يتنهد .. يا ليتني قلت الكلام اللي كنت بقوله .. أنا أجامل على حساب نفسي .. آآآه يا دانة ..!!






× في شقة دانة ودانة جالسة على طاولة الطعام .. تقرا الخاطرة ..

شكراً لك ..
أحييتي قلباً كاد أن يموت !!
أحييتي قلباً تاه في صحراء ..
كنت أبحث فيها عن قلب صادق يعيد لي الحياة ..
...

همسة على طريقتك ..
" وعلى الوفاء نلتقي "


فيصل

× دانة سرحت .. طيب أرسل له مسج وأقول له اللي فبآلي .. والله ما عطيتني فرصة يا فيصل .. × تتنهد صعبة .. والله أنا اللي أقط نفسي عليه ..


× راح اليوم وفيصل ودانة مو على بعضهم أبد .. !! ولا واحد تجرأ يصلح اللي صآآآر ..

× فيصل .. يرتب الصالة .. بيدخل ينام .. يالله بس من الحوسة .. راح وفتح درج المطبخ وطلع حبتين بنادول .. وطلع ماء من الثلاجة .. وش ذا الصداع اللي ماسك .. يارب تعينني يارب .. وتفرج عني كل ضيقة ..



× في شقة دانة .. مسترخية تقرا رواية قبل تنام .. × دق جوالها .. يووه هذي أكيد ماما .. أهلين مامي ..
أم دانة : كيفك يمه .. ؟
دانة "تتنهد" : محتاجتكم والله ..
أم دانة : إن شاء الله ترجعين رافعة روسنا ,, وتشرفيننا ..
دانة " تبتسم " : الله يسمع منك يارب .. ويوفقني ..
أم دانة : وش تسوين أجل ؟
دانة : مسترخية أقرا رواية وبنام ..
أم دانة : ما عليه بشغلك شوي قبل تنامين يمه ,,
دانة "تبتسم " : سمي .. وش بغيتي ..
أم دانة "تتنهد " : الحين أنت مرتاحة لحالك ولا تخافين ؟
دانة "تضحك " : من ايش أخاف .. إيه مرتاحة الحمد لله .. ودامي أقرا وردي وأذكر الله ماعلي خوف ..
أم دانة : بس يمه لازم يصير عندك رجل ..
دانة " مستغربة " : وش فيكم ؟ ماتثقون فيني ؟
أم دانة " تقاطعها " : لالا لاتفهمين خطأ .. يمه فيه واحد بيجي يدرس في استراليا ..
دانة " تتنهد " : و موصينه بعد ينتبه لي .. ما خليتوا أحد ما قلتوا له انتبه لها ..
أم دانة "عصبت " : وش فيك أنت ؟ اصبري لما أخلص ..
دانة : طيب طيب ..
أم دانة : أحمد ولد عمك ناصر .. بيجي يدرس عندك .. وطلب يدك من أبوك ..
دانة "مستغربة " : ايييييش ؟
أم دانة : عمك ناصر يقول نبي نزوجه عشان يستقر ويرتاح ويقول فكرنا بدانة هي تصلح دامها هناك ..
دانة " تتنهد " : شوفي ماما .. أحمد والله ما أقدر أقول فيه شي وحتى عمي ناصر حبوب .. بس ما أفكر أتزوج الحين .. والزواج يبي لي أهتم فيه .. ويبي لي أتفرغ للرجل .. أنا وحده بدرس بعدين أفكر ..
أم دانة "تقاطعها " : يا يمه .. أحمد متفهم ,, وحتى عمك ناصر يقول عارفين انها تدرس ولا راح نضغط عليها يقول حتى الشغل والله ماراح نتعبها ..
× دانة سرحت .. والله جيت بوقتك أحمد ..
أم دانة : طيب شوفي بخليك تفكرين يومين لأنهم يبون ردك بسرعة ..
دانة "تتنهد " : أوكي عطوني فرصة وأرد لكم ..
أم دانة "تبتسم " : ترا الولد حسافة تفوتينه .. والله تندمين .. ماشاء الله أبوه ناصر ولا تنسين إن الولد صعبه نلقى مثله الوقت هذا ..
دانة "تبتسم " : أدري والله الولد حسافة .. وحبوبين ..
أم دانة : يالله يمه ما أسهرك تصبحين على خير ..
دانة : تلقين خييير .. مع السلامة
أم دانة : مع السلامة ..


× قفلت دانة وسرحت .. جلست الجوال على الكومادينة .. والرواية بيدها .. ورجعت تفكر .. والله أحمد !! ما توقعت تخطبني .. بس جيت بوقت خطأ .. طيب يافيصل .. طيب .. ابتسمت .. وجلست الرواية على الكومادينة .. وانسدحت تفكر .. !!!





× في بيت أم فيصل .. أبو فيصل وأم فيصل بالصالة معهم علي .. جالسين ..
علي "يتنهد " : ياااالله وين راح ؟؟ حتى ما قدرت ألحقه من الزحمة ..
أم فيصل "تبكي " : الله يستر عليه ..
أبو فيصل "معصب " : شوفي كم الساعة وللحين ما جاء ولا يستحي .. هذا مو طوع وما أدري أي دين هذا !!
علي "يطالعهم " : طيب حالتنا بتصير كذا على طول لازم نلقى حل ..والله راح يقلقنا ..
أبو فيصل " بعصبية " : كله منك ليش ما لحقته ..
علي : وش أسوي يبه .. والله زحمة ..

× دخل محمد .....!! السلام عليكم ..
أم فيصل " معصبة وهي تبكي " : وأنت بتخلي حالتنا كذا كل يوم ..
×أبو فيصل "منزل رآسه لأنه معصب " ....
علي " يطالعه " : وين كنت ؟..
محمد " يطالعهم " : كنت في أرض الله الواسعة ..
أبو فيصل "بعصبية " : كل ما سألناك قلت في أرض الله الواسعة .. ؟؟؟ وين تروح ؟؟ أنت لا تجيب لنا بلوى بكرا ..
محمد " يهز راسه " : هداكم الله .. هداكم الله .. × راح ..
أبو فيصل " وقف " : بروح أذبحه وأرتاح منه أنا .. ولا يجيب لي مصيبة بكرا وإلا ينزل رآسي ..
× وقف علي ومسكه .. خله يبه أنا أحل المشكلة ,, خلاص ..
أم فيصل " تطالعه " : اجلس يا ابن الحلال وتعوذ من ابليس .. خلاص علي يروح يشوف وش فيه ..
أبو فيصل " مسك علي " : شف يبه أبيك تسحبه بالكلام ,, وبهداوة ..وقل بالعكس حنا فرحنا إن ربي هداك بس تتغير شخصيتك وتروح أماكن ما ندري عنها لا ومن هالكلام ,,
علي " باس رآسه " : لا تشيل هم .. ارتاح أنت ..

× راح علي ..






× في بيت أم عبد الله .. أم عبد الله وعبد الله ونورة .. توهم مخلصين متغدين ..
عبد الله : اليوم سلمان بيشوف سحر ..
نورة "تطالعه " : والله مستعجلين .. وش عليه مستعجلين ؟؟
عبد الله : وأنا أدري وش عليه ..
أم عبد الله : وش بتسوي طيب ؟
عبد الله "يتنهد " : فكرت وشفت إن سارة مالها ذنب .. وش أسوي خلاص برضى ودام الولد معجبهم كيفهم ..
نورة " تطالعه " : والله إنك صادق ,, مالها ذنب ,,
أم عبد الله " تتنهد " : إيه مالها ذنب وحتى عيالك بعد مالهم ذنب يفتحون على مشاكل .. !!
عبد الله " بقهر " : يمه وش أسوي ؟ قولي وش أسوي .. البنت أعجبتني .. وطيبه ..
أم عبد الله " تطالعه " : نلقى غيرها .. أكثر ماكثر الله البنات ..
عبد الله " بقهر " : يمه أقول لك أعجبتني .. وهي بعد .. ما أقدر أبعد عنها أبيها وش أسوي ..؟ والله البنت مالها ذنب ..
أم عبد الله "عصبت " : بعد وش يبون كل ما أبعدنا قربوا .. خلاص والله ملينا منهم ومن مشاكلهم ..
عبد الله : يمه ما أقدر ,, أبي سارة ..
نورة "تطالع امها مستغربة " : يمه خلاص هو يبيها ويالله لقيناها له ,,
أم عبد الله " بعصبية " : شوف عبد الله لا تجي وتقول لي عن المشاكل اللي راح تصير .. ولا أبي أسمع ولا مشكلة ..
عبد الله " وقف " : بروح أنام ما نمت زين .. والله شكلك يمه أنت اللي بتبدين خلاص إذا شكيت تكلمي ..
أم عبد الله " تطالعه " : كيفك رح نم أنا أبي مصلحتك ..
نورة " تطالع عبد الله " : ما باقي شي على آذان العصر .. الصلاة أول بعدين نم لأنه إذا نمت ما قمت ..
عبد الله : إيه أدري ما راح أنام على طول .. بكلم ..
نورة "تضحك " : الله يوفقك ..






× في بيت أبو فيصل .. وتحديداً في غرفة علي ومحمد .. كل واحد جالس على طرف سريرة ومتقابلين ..
علي " بهدوء" : يعني ماراح تقول لي وين تروح ؟
محمد " يطالعه " : وش تبي بالضبط .. ؟
علي : قلت لك وقسم بالله إننا فرحانين إن الله هداك والصلاة تصليها بوقتها .. بس فيه تصرفات غريبة ..
محمد : أروح لمسجد أحفظ قرآن خلاص ارتحت ..؟
علي " يطالعه " : طيب صدقتك .. بس إذا تكذب وجبت لنا مصيبة بكرا .. ؟
محمد : ما أكذب رح تكفى وخلني .. وقل لأمي وأبوي أروح لمسجد أحفظ قرآن ..
علي "وقف ": طيب بطمنهم .. ( علي ما اقتنع بكلامه أبد .. وشاك إن فيه شي )


أبو فيصل " يبتسم " : ماشاء الله يروح يحفظ قرآن ؟؟ بعد المدرسة والتعب والكرف يروح يحفظ قرآن .. اقطع يدي إذا ماصار مطلوب بكرا ..
أم فيصل " تطالع أبو فيصل " : طيب يمكن صادق ؟ ليش ما يروح ؟
علي "يضحك " : ياحبي لك يمه على نياتك .. وش يحفظ قرآن أنا مع أبوي والله الولد مو طبيعي ..
أم فيصل " تتنهد " : يارب تستر على ولدي .. يااارب ..


× في بيت أم عبد الله .. عبد الله بالغرفة .. يكلم ..
عبد الله " بقهر " : أهااا .. تتزين الحين بيجي يشوفها ؟
سارة " تضحك " : إيه عاد أنا أقول لها صيري جرئية مثلي .. ولا يهمك اللي قدامك ..
عبد الله : هههههه من زينك ..
سارة : ياااربي بسرعة انخطبنا .. وما توقعت أبد أنا وسحر بهالسرعة ..
عبد الله : الله يوفقها .. ويوفقنا وأقدر أسعدك ..
سارة : آمييين .. ويارب أنا أقدر أسعدك بعد .. لأنك مرة طيب وعسل .. والله ما توقعت إن فيه شباب كذا ..
عبد الله "يضحك " : لا توقعي دامي موجود تأكدي ..
سارة : هههههههه ياعيني على الثقة ..



× راح .. اليوم في السعودية .. بسرعة .. وهذا حالنا الأيام تركض وكأنها ثواني .. !!
× الساعة 2 نورة بتنام .. والغرفة ظلام .. وفاتحة الأباجورة على اضاءة هادية مره .. أخذت الجوال ,, وتكتب مسج ..



× دانة في شقتها .. صاحية من الساعة 9 يالله أسويها وإلا لا ..؟؟ والله ذبحني هالفيصل لازم أشوف لي حل معاه ,, برسل وأشوف ,,



× فيصل صحى على صوت المسج .. يتمغط أخذ الجوال .. يووووه الساعة 10 وش فيني أنا .. واستغرب 2 Messages من مرسل؟
ترك الجوال على الكومادينة ورمى اللحاف وجلس على طرف .. يااالله وش ذا النوم الخايس .. طالع الجوال وأخذه فتح الرسايل .. يقرا المرسل
DANAH
3omRi

يوووه نورة ودانة .. ؟؟؟!!!

ترك مسج نورة وعلى طول قرا مسج دانة

( فيصل أنت ما قدرت مشاعري وجرحتني والحمد لله ربي عوضني بولد عمي وخطبني واليوم برد بالموافقة ) .. فيصل ضاااااق صدره وماصار يشوووف .. عصب ,, ياااالله صبآح خير .. يتنهد.. ماسك الجوال ومنزل راسه .. يارب .. وش أسوي الحين ..؟؟ قرب الجوال وفتح مسج نورة ..

( فيصل عمري إذا صحيت ما عليه تدق علي والله مشتاقة لك ,, وبطمنك على البيبي لأني رحت المستشفى عشانه )
يووووه يا نورة .. والله مو وقتك أبد .. دق على نورة .. هلا نورة
نورة " مبسوطة " : هلا عمري ,,
فيصل "وواضح من صوته إنه مو على بعضه " : كيفك ؟
نورة "مستغربة " : تمام بس وش فيك ؟
فيصل " يتنهد " : مادري توي صاحي .. وقلت بشوف وش تبين .؟
نورة " استغربت " : أنا كتبت لك بالمسج إني رحت المستشفى ..
فيصل "والنفسيه واصله " : إيه إيه .. وش سويتي ؟
نورة " ضاق صدرها " : خلاص خلاص أكلمك بعدين بنام بس ما نمت أنتظرك تدق ..
فيصل "عصب وحط الحرة فيها" : لعبة هي خلاص خلاص .. قولي اللي عندك بسرعة .. ترسلين مسج وتسوين قلق وتقول خلاص ..
نورة "دمعت عينها " : ايه رحت المستشفى وقالوا الجنين بصحة جيدة الحمد لله ..
فيصل " بسرعة وبصوت مزعج " : الحمد لله .. وبس هذا اللي داقه تقولين .. نورة تكفين ارسلي رسالة وقولي قالوا لي كذا وكذا ,, ماله داعي دق ومادري كيف ,, عليك توقيت ,,
نورة " نزلت دموعها " : يا شين نفسك وأنا الغبية اللي داقه عليك ,, قلت بيهتم .. حشى والله ولا كأنه ولدك .. وحتى أنا ما كأني زوجتك ولا مهتم أبد بصحتي ,,
فيصل " يتنهد " : يااااااااالله قسم بالله مالي خلق ,, × سكر الجوال ..ورماه ع الأرض .. وحط يديه على راسه ..



× نورة ودموعها تطيح سكرت الأباجورة وسحب اللحاف وشهقت وهي تبكي لأنها كاتمه القهر .... وش فيك فيصل ..!! يعني معقولة وصل كرهي لهالدرجة .. تقفل الجوال وأنا أطمنك عني وعن ولدنا ,, معقووولة .. كله مني كله مني ,,




احكي بغيبتي وش قد تغيرتوا ؟؟
احكي وشلون الدنيا بيكم ؟؟
احكي لي ولهان لسوالفكم وإلا .. لا لاتحكي .. لا !!
مادري قلبي ش اللي جاه ..!!
خاطرة قلبي يضمك ,, خاطرة صدري يلمك ..
ماأريد قبل لا أحكي قبل لا أحكي إلا أضمك ..








× دانة .. تشرب الكافي .. وتتصفح النت .. أخذت جوالها اللي كان جنب اللاب توب .. × تكلم نفسها .. أنا أرسلت أكيد وإلا ما وصله ؟؟ وشافت الرسائل المرسلة .. ايه مرسلته .. طيب ليش ما رد .. يعني معقولة يضحك علي .. وما هميته أصلاً .. ياربي لا يصير كذا .. والله بنصدم ..




× فيصل يسوي الكافي ومو مركز أبد وباله مو مع الكافي .. وكثر السكر .. ×عصب .. وترك الكوب وترك كل شي وطلع من المطبخ .. يتنهد .. يااااااالله وش أسوي أنا .. وأصلاً وش قاعد يصير والبنت وش دخلها بحياتي .. !! أخاف أقولها لا تتزوجين وأعشمها فيني .. !! وأخاف أقولها تزوجي وأموت قهر ,, يااارب وش أسوي .. !!




× دانة ماسكة الجوال وسرحانة .. خلاص خربانة خربانة لأنه إذا ماضبطت بوافق على أحمد .. يعني برسل له .. وهي تتكلم وصلها مسج .. فتحته ياقلبي فيصل ..

( صباح الخير دانة .. أنا آسف قبل كل شي وأنت أبد ما تساهلين واليوم شمس ..ما ودك أكلمك على الشاطئ ) دانة باست الجوال .. ومبسوووطة .. ياااااااالله .. وش أسوي قامت بسرعة تلبس ,, × تذكرت ,, يوووه ما رديت عليه ,, رجعت وأخذت الجوال وتكتب ,,,


× فيصل جالس على الكنب وماله خلق شي .. وصله المسج والجوال على طاولة الكافي .. وأخذ الجوال بسرعة .. ( أوكي بس والله تأخرت ما رديت خفت والله طاح قلبي ) ,, دخل فيصل يلبس .. وسوا كافي .. وطلع ,,









× على الشاطئ .. جالسين على طاولة ..
فيصل " يتنهد " : دانة .. مادري شقول .. بس جد انقهرت من المسج اللي أرسلتيه لي ..
دانة " تبتسم " : إيه ولد عمي خطبني وما عليه كلام ..
فيصل " يطالعها ويبتسم " : دانة .. أنا بصراحة ما توفقت بزواجي .. وأبي أرتاح ..
دانة " تبتسم وتطالعه " : طيب ..
فيصل " وهو يبتسم " : دانة لا توافقين على أحمد ..
دانة " ومن جواها مبسوطة " : ليش ما أوافق ؟؟
فيصل " قرب وحط يده على الطاولة " : لو أقول أبيك زوجة توافقين ؟
دانة " حست بدوخة من الفرحة تضحك " : والله ؟
فيصل : دانة أنا اكتشفت إني ولا شي بدونك .. وحتى لما جرحتك حسيت بقهر ..
دانة " بهدوء ": بس أهلي ,,
فيصل " يطالعها ويبتسم " : ما عليك إن شاء الله راح يوافقون .. وأنت اضغطي عليهم .
دانة " ونفسها تطير من الفرحة " : طيب .. خلاص خل الموضوع علي ..

× سكتوا شوي .. ودانة مستحية .. !! ,, فيصل منزل رآسه ..


دانة "تبتسم " : كيف بنسوي الزواج وكيف بنسوي كل شي وحنا هنا ..
فيصل "يضحك ": ماااعليك نرتب له .. ودامنا هنا .. بنسوي شهر العسل .. وبنسوي كل شي ,, وحتى التجهيز تجهزين معي ,,
دانة " وهي مبسوطة مرررة " : طيب .. × تطالعه .. يوووه مالله مادري شقول ..
فيصل "يضحك " : تكلمي .. وش تبين ؟
دانة " وهي تبتسم " : فيصل .. أنا قريب عندي اجازة .. بس قهر بوقت أنت ما عندك ..
فيصل " يطالعها ويبتسم " : لا .. ماعليك .. وقتها نضبط كل شي ..
دانة " وهي تبتسم " : خلاص .. أنا لازم أكلم بابا وأقول له ..
فيصل " يطالعها ومستغرب " : أنا أقول له عطيني رقمه ..


× راح الوقت يتفقون على أهم شي .. والأهل وكذا ..!!

دانة " وقفت " : فيصل .. تسمح لي أروح ..
فيصل " يطالعها " : أكيد أسمح لك ,, بس مثل ما قلت لك ما أبي أحد يدري .. وحتى ليلى لو تجي ..
دانة " تضحك " : لالالا ماعليك .. يالله مع السلامة
فيصل " يطالعها " : مع السلامة ..

× راحت .. فيصل يكلم نفسه .. ياااااالله .. والله وناسة .. أخيراً تجرأت ..


× دانة تمشي .. وحاسه بفرحة مو طبيعية .. ودها تبكي من الفرحة وودها تنطط ودها تسوي كل شي ,, !! ×طلعت جوالها .. مالي إلا أفضفض لمشمش اللي مشتاقة لها .. ألو مشموشتي ..
مشاعل : أهلين .. كيفك ؟ وين الناس ؟
دانة "تضحك " : شوي شوي .. ههههه والله بهالدنيا .. مبسوطة مرررره يامشمش ,,
مشاعل " تتنهد " : وش عندك بعد .. والله طاير النوم من عيوني أكيد عشانك حاسة إنك جايبة لي خبر
دانة " تضحك " : فيصل بيطلبني من أبوي للزواج ..
مشاعل "انقهرت" : لااااااا والله انهبلتي ..
دانة " تقاطعها " : لااااااا مالي خلق نصايح ,, خلاص تمكنت ياقلبي وخلي نصايحك لك ..
مشاعل " بقهر " : ياااااااااااويلك من ربك بهالمسكينة .. كيف رضيتي على نفسك تجلسين معها دامك أخذتي زوجها منها .. يااااااويلك يادانة .. قسم أحس إن جواي جمر وشلون زوجته اللي مأمنة ومرتاحة ..
دانة "بهدوء " : وش ذنبي أنا .. تعلقت فيه ,, وبعدين هي مو مهتمة فيه أبد وهو طاق منها ..
مشاعل " بعصبية " : وش عليك منهم وكم مرة أقول لك وش عليك منهم .. دانة قسم بالله مصدومة منك وش اللي غيرك وش اللي خلاك كذا ؟؟والله ماني مصدقة إنك صدقيتي الحبوبة الرحومة تسوي كذا بوحدة مالها ذنب .. وبعدين ماتدرين يمكن هو اللي مقصر معها ..
دانة "بقهر" : وش ذنبي أنا ؟
مشاعل : لا تقطين خيط وخيط وش اللي وش ذنبك ؟؟ أنت مالك دخل من الأساس وأنت شيطان بينهم وأنت اللي راح تدمرين علاقتهم .. ياويلك هذا اللي أقوله ..
دانة " تتنهد " : الحين أنا داقه أبيك تفرحين وأبيك تنبسطين ..
مشاعل " والدمعة بعينها " : بإيش أفرح على خيبتك ؟؟ وبعدين أنت آخذه الدنيا ببساطة .. والأيام راح تعلمك .. وترا يمكن فيصل طلع لك بشخصية ثانية أنت ما تدرين عنه ولا هو يدري عنك ,, يمكن أفكاركم تختلف وكل شي يختلف ..
دانة " تضحك " :لااااا ياقلبي أنا وفيصل مررررة نشبه بعض ..
مشاعل " تطنز " : ماشاء الله عليك حكمتي وأنت ماسكنتي معه ,, أقول الله يوفقك ويدلك الطريق الصح ..
دانة " تتنهد " : آمين .. بس أبيك تحضرين زواجي ..
مشاعل : والله واثقة .. لااااا والله إذا وافقوا أهلك وتم كل شي لا تقولين لي شي أبد لأني جد انصدمت فيك .. حتى العلاقة اللي سويتيها وحركاتك كأنك مراهقة .. وكلها سخافة بسخافة ..
دانة "انقهرت " : طيب مع السلامة الشرهه علي أنا داقه أبشرك ..
مشاعل: مع السلامة وياليتك ما صدمتيني .. × سكرت دانة .. يوووه وش فيها هذي .. اييه ما حست بالشعور اللي أحسه .. والله عاذرتك مشمش ..









× راحت الأيام بسرعة وراح أكثر من شهر ونص .. وكثرت مقابلات فيصل ودانة .. وهم يخططون للزواج والترتيبات .. أهل دانة رفضوا في أول شي وخاصة أمها اللي عصبت منها وزعلت عليها وبنتي الوحيدة تتزوج واحد متزوج وترفض ولد عمها اللي ما فيه منه .. وأما أبوها رفض أول شي وبعدين تراجع وقال الرآي الأول والأخير لدانة وخاف يصير فيه شي ويبي يضمن مستقبل بنته لأنهم اكتشفوا إن المرض منتشر في جسمه !! ..

وأمها نصحتها وقالت راح تعانين وخاصة إنه ما طلق زوجته وزيادة على كذا حامل .. ومن ضمن اللي قالت لها أمها إنه كل الرجال يتمنونك .. يعني ليش ترمين نفسك على واحد متزوج .. لكن دانة .. مصرة ومتعلقة في فيصل .. !!
نورة .. يااااالله فيصل كل يوم يسمعها كلام أقوى من اللي قبل .. وهي صارت تعصب ,, وملت من نفسها ومن كثر دموعها ..
عبد الله قرب زواجه .. وسلمان تملك على سحر ..
محمد صار يغيب عن البيت يومياً .. !!! وعلي يضيعه في زحمة الرياض ولا قدر ولا يوم يلحقه .. لكن أهله صدقوه لأنه قال أكثر من مرة إني أروح أحفظ قرآن !!! بس علي ما زال مصر إن فيه شي !!

أما عن خالد وليلى رجعوا .. وليلى .. ما قدرت تمسك شي لأن دانة فتحت عيونها .. !! وتقابلوا أكثر من مرة ليلى ودانة ..

ونرجع للأهم فيصل ودانة .. قرروا يروحون للسعودية ويتزوجون ويرجعون يدرسون ويتمشون ..




× في مطار سدني الصبح .. فيصل ودانة جالسين ينتظرون الرحلة ..
دانة "وهي جنب فيصل " : ياالله والله ماني مصدقة ..
فيصل " يطالعها ويضحك " : لا لا صدقي ..
دانة " تطالعه " : يوووووه بسكن معك ..
× أعلنوا عن الرحلة ..
فيصل "وقف ": يالله ..



× في بيت أم عبد الله .. في نورة في غرفتها وعندها عبد الله ..
نورة "تضحك " : لاااااا خلاص أنا فقدت الأمل مع فيصل وعرفت إنه مل مني بس تدري عبد الله ..
عبد الله "يطالعها " : إيه ..
نورة : والله العظيم مقتنعة مرة إني أنا السبب ..
عبد الله "يبتسم ": حلو إنك تعترفين .. وأنا قلت لك كذا مرة بيمل ..
نورة "تتنهد " : بس مليت أحس اني صرت مثل المعلقة .. فيصل مايبيني .. ومايقدر يقول لأنه خايف من أمه أو بالأصح يحترم أمه مرة
عبد الله "استغرب " : لاااااا وش اللي معلقة هو يدرس ومعذور وإن شاء الله ترجعون أحلى من أول بكثير ..
نورة "تبتسم وباستهزاء " : إيه صح .. يمكن نرجع .. ليش لا ؟
عبد الله : وش فيك أنت شايلة الأمل ..
نورة : أنا اللي أكلمه وأنا اللي أحس فيه .. فيصل مااااال مني مرة ..
×عبد الله ساكت ما عنده تعليق ..
نورة : الله يوفقك .. ويارب ترتاح مع زوجتك ..
عبد الله "يبتسم " : آمييين خلاص ماباقي شي ..
نورة "تطالعه " : يااااسرع الدنيا ..



× في الطيارة ..
فيصل " بصوت واطي " : تدرين دانة ؟
دانة "تبتسم" : وش فيك ؟
فيصل "يتنهد " : والله اني مشتاق لأهلي ومنقهر إني بروح السعودية ولا راح أشوفهم ..
دانة "حست بغيرة " : ايييه عادي وإن شاء الله تعوضها..
× سكت فيصل ......



× في بيت أبو دانة .. أبو دانة صاحي من النوم يآخذ علاجه والتعب باين عليه ومايقدر يرتاح في النوم من التعب والألم ..
أم دانة "تعطيه العلاجه وراحمته " : سم أبو دانة ..
أبو دانة " يتنهد " : والله دانة ما تفارقني أبد ..
أم دانة " ودموعها طلعت " : ياالله مادري ايش راح تسوي إذا شافتك ..؟
أبو دانة : والله أخاف ما تكمل دراستها .. وخايف عليها بس إن شاء الله يتم زواجها وترجع مع زوجها ..
أم دانة : الله يوفقها والله استعجلنا و وافقنا على واحد ماندري عنه بس لأنها مقتنعة فيه ؟؟
أبو دانة : يا بنت الحلال هي تبيه وهي مرتاحة له .. الله يوفقها وأنا مادري متى ربي بيآخذ روحي ,, يآخذها واحد متزوج ولا يطلعون عمانها بكرا يغصبونها على واحد .. الله يتمم لها دام الولد طيب وأنا كلمته وشكله طيب ..
أم دانة " تتنهد " : إيه الله يوفقها ..
أبو دانة " يشرب ماء" : الحمد لله .. × أخذت الكاس .. لاااا وغير كذا فيصل بنفسه شرح لي وضعه وشرح إنه ما ارتاح مع زوجته ولا يقدر يتركها ومتى ما حصل فرصة يقنع أهله إنها يتركها بيتركها ..
أم دانة " مستغربة " : ما تدري يمكن البلا منه .. واكيد راح يقنعك ..
أبو دانة : أنت ادعي ربك يسعدها ويوفقها ..
أم دانة : الله يسعدها يارب ..
أبو دانة : يالله سكري النور .. والله يعينني ..
أم دانة " راحمته " : يالله أخذت مهدي وإن شاء الله تنام ..



×مر الوقت بسرعة ووقت متعب وممل على فيصل ودانة ..

× في مطار دبي .. ودانة تلبس عبايتها وتتحجب بدون غطى .. فيصل طالعها مستغرب .. ليش ماتغطين وجهك ..
دانة "تبتسم " : ليش ؟
فيصل "مستغرب " : وش اللي ليش بنروح السعودية الحين ؟
دانة "تبتسم " : طيب ؟ أنا من الأساس ما أتغطى ولو أنا أتغطى تغطيت بكل مكان ..
فيصل "قاطعها ومتسغرب " : ما تتغطين ؟؟
دانة : إيه حنا عايلتنا كذا .. وقلت لك يمكن راح تكتشف أشياء فينا ..
فيصل " مستغرب " : حرام .. طيب ..
دانة " تبتسم " : لا مو حرام ..
فيصل : إلا حرام .. غطاء الوجه واجب ..
دانة : لاااااا مو حرام وغطاء الوجه والكفين جائز .. إذا عندك أدله أنا عندي أدله مو تمسكون حرام ولا تقرون ولا شي .. وترا النقاش هذا ممل وراح يفتح لنا باب للمشكلة ..
فيصل " انقهر " : طيب أنا بعايلتي عيب .. وشلون أدخلك على عايلتي بالساهل ..

× دانة انقهرت وأسكتت ..

× فيصل أسكت وحس بالقهر .. ومصدوم ..

× دانة تطالعه .. يالله شكله أخذ عني فكرة .. والله أخاف يهون ..










دانة للحين ما تدري عن أبوها يمكن ما ترجع ويمكن تهون عن فكرة الزواج لأن أبوها أهم شخص في حياتها..!! وفيصل اكتشف شي في دانة والخافي أعظم .. ممكن أفكاره فعلاً ما تتوافق مع أفكار دانة مثل ماقالت لها مشاعل .. !! هل الزواج راح يتم .. !!