منتديات قصايد ليل - عرض مشاركة واحدة

09-02-2010

أصعب لحظة

لو عشت أصعب لحظة بإنتظارك
الأصعب أيأس لحظة من رجوعك

كل الليالي تقول.. ليلة قرارك
للصبح : ياصبح استحاله طلوعك

مدري بعادك غصب أو باختيارك
بس الوكاد الحال بعدك يروعك

يا عين نورك غاب بأول نهارك
بالله وين اللي يكفكف دموعك ؟

أشعلت شوقي نار .. وأضرمت نارك
ومن متى جمر الشوق دفّا ضلوعك؟

قل بس أبرجع وأنتظر في مدارك
العمر كله مع بقايا شموعك

واْبني بنبض القلب في القلب دارك
الروح لك تظمأ وعيني تجوعك

واْعيش عمري لحظة بانتظارك
بس المهم تتم لحظة رجوعك

أسيرة الصمت

~~~~~~~~~~~~~~~~~~~~~~~~~~~~~~~~~
يا حبيبي

يا حبيبي ما أقدر على فرقاك
خذني معك لا لا تخليني

أموت ما يطري علي أنساك
مادام طيفك ساكن عيني

لذة حياتي ضحكتك ورضاك
بس أنت يا شمس المحبيني

دنياي فرع أصلها دنياك
وشلون أبحيا لو تجافيني

دورت بك عيب لعل أسلاك
أثرك تجمل باقي سنيني

كن الغلا مخلوق لأجل أهواك
من بد كل الناس تعنيني

مدري لأن الشعر بك يزهاك
مدري لانك منكتب فيني

عمري وروحي كلها تفداك
أنت منى قلبي وأنت نظر عيني

أسيرة الصمت

~~~~~~~~~~~~~~~~~~~~~~~~~~~~~~~~~
قريت الرساله

قريت الرساله شوق..وأهتز لي غصن
وفاحت بقلبي وردة الحب وزهوره

وشدت لك بلابل لهفتي..فرحه وشجن
وبكلمة((أحبك)) غردت ألف عصفوره

كل الصحاري الجرد من فيضك أرتون
أحس بوصالك كل هالارض ممطوره

حروفك على قلبي مثل رشة المزن
خطك مثل برق خطف عيني بنوره

كلامك قصايد حب..صوتك لها لحن
كلام يفوق الشعر في صادق شعوره

بكيت..وغرقت بدمعي..وخيم الحزن
وضمت حروفك دمعة العين معذوره

من قوت إحساسك تزلزل له المدن
يغطي حدود الكون..ويفيض بحوره

تشوقت لك..وأشتقت لمغازل الحسن
ياوجه سرق منه الفجر للشفق صوره

ولك وحشة في خافقي مالها وزن
كفي بسلاسل حبك..أصبحت مأسوره

أسيرة الصمت

~~~~~~~~~~~~~~~~~~~~~~~~~~~~~~
الشرف..للي احبه

اللي أحب..الشرف له يوم حبيته
أعجبت به..والشرف له يوم يعجبني

رفعت راسي وأنا اللي قلبي أهديته
حاسبت نفسي قبل ربي يحاسبني

ذنوبي إني تخيلته وسميته
بإسم القصايد وبإحساس معذبني

يطري بنبضي..ولو بالنبض ما اطريته
وخياله أتخيله دايم يداعبني

لو ينشرى..أرخصت غالي المال وأغليته
ولو فيه حيله..ما أحد بالحيل يغلبني

ولو هو سهل..كان أصلا ماتمنيته
وماكان يقدر بأسلوبه يتعبني

لو الكل خلوه ما والله خليته
وضميري إن قلت أبـ اتخلى يأنبني

أحس لي معه يوم ماتحريته
وأدري نصيبي لذاك اليوم..يجذبني

أسيرة الصمت

~~~~~~~~~~~~~~~~~~~~~~~~~~~~~~~~