الفصل الثامن والعشرين..

في شركة بوحنين..
حنين مشغولة من اسبوعين بصفقات يديده للشركه ولاهيه تماما عن كل شي حوليها، مها تحاول تكلمها بس دايما حنين تتحجج بالشغل، ومها حدها معصبه يعني هيه كفايه عليها اهلها الي مسافرين برع، تقوم حنين وتنشغل عنها والله مب حاله..
مها قررت تروح الشركة وتفاجأ حنين، واول ماوصلت لقت عبدالله مع واحد واقفين يسولفون في الاستقبال ابتسمت لعبدلله بس ما انتبه لها فأشرت بإيدها له ويوم شافها ودر ربيعه وراح لها..
عبدالله: هلا وغلا وانا أقول ليش الشركة منوره اليوم..!!
مها: هلا فيك.. يايه أسأل عن حنين صار لي أسبوعين ماشفتها وهيه دايم مشغوله عني..
عبدالله: بصراحه توقيتج مب مناسب، حنين عندها اجتماع مع شركة سياحيه وبعدها اجتماع ثاني مع شركة البترول اليديده الي بدينا معاهم شراكه يديده، يعني مستحيل تشوفينها قبل ساعتين..
مها: انزين أقدر أقعد وانتظرها لأني حالفه ما اطلع بدون لا أِشوفها..
عبدالله: حياج في مكتبي ترتاحين وتشربين شاي وقهوه..
مها: لا ابي عصير..
عبدالله: تتشرط بعد..
مها: من حقي..
عبدالله وصلها مكتبه وطلع عنها، مها عيبها المكتب مرتب وانيق والمكتب كان على زاويه بس في شباك كبير مطل على حديقة الشركه بصراحه المنظر يجنن.. بس مها حست المكتب ينقصه لمسه أنثويه فقررت تسوي شي بهالوقت الي بتكون فيه فاضيه.. دخل عليها عبدلله ووراه الفراش شايل لها العصير..
عبدالله: مها سامحيني مابقدر أقعد وياج لأني مشغول وحنين بتذبحني لو تأخرت..
مها: لا عادي عبدالله، انت روح وأنا بنتظركم هني..
عبدالله: انا قلت لحنين انج هني وقالت لي أول ما بتفضى بتقابلج..
مها: خلاص انت روح ولاتشغل بالك فيني..
راح عبدالله ومها قامت على طول من مكانها وبدت شغلها، فاتصلت بمحل الورد وطلبت باقات ورود طبيعيه وأشجار للزينه وعطلتهم العنوان والمكتب الي لازم يوصلون له الورد، وبعدها طلبت من الفراش اييب لها عاملين اثنين يساعدونها فقامت ونقلت المكتب من مكانه وحطته بويه الدريشه يعني ستوى المنظر الحلو ورا المكتب، وغيرت أماكن الكنبات الموجوده بالغرفه ورتبتهم على مزاجها.. ويوم خلصت دفعت للعمال وخلتهم يروحون، وبعد نص ساعه وصلت باقات الورد والشجر..وحطت شجره بجنب الباب والثانيه بجنب المكتبه الي استوت على يسار المكتب.. وحطت باقة ورد على مكتب عبدالله وباقه ثانيه على الطاوله الي بوسط الكنبات.. وحطت ورده حمرا بدرج مكتبه وورده ثانيه على المكتب فوق الملفات..
واستوى المكان أحلى بوايد ويفتح النفس للشغل، بعد ماخلصت مها شغلها يلست على الكنبه ترتاح، وبعد نص ساعه دخل عليها عبدالله..
عبدالله: سوري مها تأخر....
وقطع كلامه يوم شاف إنه المكتب تغير 180 درجه.. ورجع طلع شوي ورد دخل..
عبدالله: لا مب غلطان هذا مكتبي..واطالع صوب مها.. انتي الي سويتي كل هذا..؟؟
مها: أول شي قولي عيبك والا لا..؟؟
عبدالله: بصراحه.. رووووعه.. بس كيف سويتي كل هذا بروحج.. ومن وين يبتي الورد..!!
مها: المكتب حلو وموقعه أحلى بس ناقصته لمسه أنثويه، فطلبت الورد والشجر من محل الورود، وطلبت من العمال يساعدوني والحينه صار المكتب يليق بك اكثر..
عبدالله: والله مب عارف شو أقولج.. فاجأتيني الصراحه..
مها: وانشاءلله تكون مفاجأة حلوه..؟؟
عبدالله: وأحلى مفاجأة بعد..
مها: أوكي وين حنين..؟؟
عبدالله: قالت لي أقولج تنتظرينها هني هيه بتخلص التقرير الي بايدها وبعدها بتيي حقج..
يلست مها تتعبث بالورد الي على الطاوله وعبدالله يلس ورا مكتبه يكمل شغله ويلعب بيده بالورده الي على الطاوله.. شوي ودخلت عليهم حنين..
حنين: آآآسفه حبيبتي تأخرت عليج..
مها: آسفه على الأسبوعين الي قطعتيني بهم، وإلا الساعتين الي يلستهم هني بروحي..
حنين: على كل شي.. وباست مها..
مها: مشكلتي طيبه واسامح بسرعه..
حنين: عبدالله متى غيرت ديكورات مكتبك..؟؟
عبدالله: من ساعتين..
حنين: قبل ساعتين كنت عندي كيف غيرته..!!
مها: انا الي كنت فاضيه ويلست ألعب وأغير كل شي..
حنين: خلاص نحنا عندنا الحينه جوله على المصانع ولمن أرد أشوف مكتبي مغير بعد..
مها: لا والله بتشغليني عندج شوو..؟؟
عبدلله: ههههههههه لا أنا بس الي تغير حقي الديزاين.. حنين بسج من الغيرة..
مها: هههههههه حقوق الطبع محفوظه..
حنين: هههههههههه
عبدالله: ومتى تبتدي الجوله..؟؟ والله ذبحتينا اليوم..
مها: يعني بتتركوني وبتروحون..!! خلاص بروح البيت أحسن لي..
عبدالله: حرام والله.. زرتينا بيوم غير مناسب..
حنين: خلاص حبيبتي شو رايج اليوم نتعشى برع..
مها: أكييييد موافقه..
عبدالله: وأنا بعد موافق..
مها: ومنو عزمك..؟؟
عبدالله: حرام عليج أنا تعبان طول اليوم بالدوام خلوني أستانس شوي..
حنين: لا ماشي بناخذ بعد حرمة سلطان أخوها يعني مالك أمل تيي ويانا..
عبدالله زعل وراح ورا مكتبه يطلع أوراقه..
مها: حنين أحسه زعل..
حنين: ماعليج منه دلع ولد خالي اعرفه عدل.. يالله تعالي مكتبي بعطيج أوراق حق عمي راشد فيها تقارير الشركه خل يطلع عليهم..
طلعت حنين بس مها ظلت واقفه تطالع عبدالله..
مها: عبدالله سوري بس تدري مانقدر نوديك ويانا بدون أخوي مايد.. مب حلوه بحقنا..
عبدالله: خلاص عيل راضيني بهديه..
مها: شو قصدك..؟؟
عبدالله: ابا شي يكون ذكرى منج ولو شي بسيط..
مها ابتسمت وطلعت من المكتب وراحت لحنين، وفي بالها.. شو الهديه الي ممكن أييبها له.. لازم تكون شي حلو ويدل على محبتي له..
**__**__**__**__**

في بيت حنين..
بو حنين كان يالس يسولف مع حرمته بصوت واطي وحنين تطالع التلفزيون والتوام يفرون بعض بالمخدات..
أم حنين: العنود الهنوف سيروا حجرتكم عندنا موضوع مهم..
طلعوا البنات وحنين تتطالع امها وأبوها وهيه مستغربه اشكالهم تقول شي وراهم..
حنين: أبوي شو صاير.. شوفيكم..؟؟
بوحنين: حنين في واحد متقدم لج..
حنين وقف قلبها وتمت ساكته..
بوحنين: تذكرين محمد المزروعي الي من ست شهور عقدنا صفقه وياهم..
حنين: هيه أذكره..
بوحنين: ولده العود سعيد متخرج من الجامعه وامس ماخذ الدكتوراه من بريطانيا.. ويشتغل مع أبوه وعنده بعد تجارته الخاصه..
أم حنين: ماشاءلله عيله معروفه والولد ماعليه كلام والكل يتمنى يناسبهم..
حنين: بس أنا..
بوحنين: لاتعطينا رايج الحين.. اليوم هم بيتعشون عندنا وبتشوفين الريال..
حنين: اليوم..؟؟ بس انا اليوم بطلع مع مها..
أم حنين: اتصلي واعتذري منها.. احنا واعدنا الناس وعيب نغير موعدنا..
حنين: انشاءلله..
بوحنين: حبيبتي انتي كبرتي وكلها كم شهر وبتدخلين الخمسه وعشرين، وأختج الي أصغر عنج تزوجت وبخاطرنا نفرح فيج..
حنين: يصير خير يابوي..
طلعت حنين وهي مهمومه كيف تتزوج غير مايد، كيف ترضى تقابل واحد ثاني.. ومايد شو تقوله كيف بيوصل له الخبر.. ياربي شو هالمصيبه..!!
**__**__**__**

على الساعه سبع ونص وصلوا قوم محمد المزروعي.. الأب والأم والمعرس سعيد وأخوه يوسف واخواته الثلاث ميعاد وفجر وغصون..
أم حنين استقبلتهم ودخلت الحريم ميلس الحريم وأبوحنين مع الرياييل في ميلس الرياييل..
حنين وشوق بالغرفه يتجهزون بس حنين حدها مرتبكه ولا ودها تنزل لهم..
شوق: حنين طولي بالج يمكن مالج نصيب فيه..
حنين: تخيلي كل شي صار اوكي، شو يعني بنخطب له.. لالا مستحيل..
شوق: الراي الول والأخير حقج يعني لو قلتي لا أبوي مستحيل يغصبج على شي..
دخلوا عليهم العنود والهنود وهم يضحكون..
العنود: حنين المعرس وايد حلوو واخواته شكلهم خقاقات وشايفات نفسهم..
حنين: انتوا دخلتوا عندهم..
الهنوف: لا ماما مب راضيه ندخل.. بس بصراحه شفناهم من ورا الباب..
العنود: وأمي تقولج يالله تعالي لاتتأخرين وايد..
بعد عشر دقايق نزلت حنين وهي لابسه جلابيه ورديه روووعه ومحطيه مكياج هادي، اول مادخلت على الحريم حست بقلبها بيطلع من مكانه، سلمت على أم سعيد واخواته ويلست حذال امها، وشوق وراها سلمت عليهم ويلست مع البنات..
أم سعيد: ماشاءلله هاي عروسنا..!!
أم حنين: ايه هاي بنتي العوده حنين، والثانيه شوق الأصغر..
أم سعيد: وليش مزوجين الصغيره قبل العوده..؟؟
أم حنين: شو نسوي بعد نصيبها، شوق متخبله على العرس أول مادشت العشرين تزوجت..
شوق: ماما..
ام حنين: ههههههههههه
ميعاد: حنين انت تشتغلين بشركة أبوج..
حنين: هيه اشتغل مع الوالد..
غصون: انا بعد خريجة اداره أعمال بس أبوي مب راضي يخليني أشتغل وياه..
شوق: أحسن لج قعدي بالبيت وتعززي..
أم حنين: خل انتي تموتين بيلسة البيت..
أم سعيد: بأي شهر ماشاءلله شوق..؟؟
شوق: موعدي هالأيام انشاءلله..
أم سعيد: الله يسهل عليج ويقومج بالسلامه..
شوي ويدخل عليهم ابوحنين..
بوحنين: أم حنين تعالي شوي..
راحت ام حنين ورجعت بعد شوي وهي تضحك..
أم حنين: شكله ولدكم مستعيل يبا يشوف العروس لأنه بيطلع ضروري..
فجر: صح هو قال إنه مشغول اليوم بس نحنا سحبناه غصب..
ميعاد: لو راده عليهم كان خطب وملج بدون لايشوف العروس من كثر أشغاله..
أم سعيد: لاترمسين عن اخوج جيه، يالله عيل بنسير الميلس..
قاموا الجماعه يبون يروحون ميلس الرياييل بس فجأة شوق صرخت وطاحت على الكرسي..
أم حنين: بسم الله عليج حبيبتي شو فيج..؟؟
شوق: ماما بطني يعورني حاسه بألم فظيع..
حنين: لايكون بتولدين..
شوق: ااااااه ما أدري اتصلوا بجاسم أبا أروح المستشفى..
ركضت حنين تتصل بجاسم الي وصل بسرعه وخذوها للمستشفى.. وهم طالعين كانوا قوم أبو سعيد طالعين بعد.. وحنين ركبت سيارتها مع أمها بيلحقون شوق للمستشفى.. فجر وقفت جنب اخوها تسولف وياه..
سعيد: هاي هي حنين الي ركبت المرسيدس السوده..!!
فجر: هيه هي بعينها، شو رايك فيها حلوه صح..؟؟
سعيد: حلوه وبس.. هاي هي الي أدورها..
ميعاد: يعني نقول مبروك..!!
سعيد ابتسم وركب سيارته مع اخواته وراحوا للبيت وفي باله طيف حنين ويحلم بها تكون زوجته بيوم من الأيام..
وفي المستشفى الكل كان مرتبك وجاسم حده متوتر وخايف على شوق..
حنين: جاسم هدي أعصابك انشاءلله خير..
أم جاسم: الله يقومها بالسلامه..
جاسم: هاي شوق تعرفون شو يعني شوق.. وعمتي وينها ليش ماتطلع تطمنا عليها صار لها أكثر من ساعتين في الولاده ولابين شي..
حنين: اصبر ياجاسم هاذي ولاده يعني ممكن تطول أكثر..
جاسم: الله يستر الله يستر..
وبعد نص ساعه طلعت الدكتوره وطمنتهم على شوق..: مبروك يابت بنت..
جاسم: وشوق شو اخبارها..؟؟
الدكتوره: الحمدلله كله تمام بعد شوي بنطلعها غرفتها..
جاسم: الحمدلله الحمدلله..
حنين: مبروك ياجاسم..
أم جاسم: مبروك ياولدي وحمدلله على سلامة شوق..
جاسم: الله يبارك فيكم..
وبعد ساعه تقريبا الكل كان يالس بغرفة شوق يهنونها بالسلامه..
حنين: فديتها محلاتها تشبه خالتها العوده..
جاسم: وانتي وين شفتيها..؟؟
حنين: سرت لها هناك عند الممرضات، فديتها ملاك وراقد..
شوق: جاسم..
جاسم: هلا حبيبي شو تبين..
شوق: ابا أشوفها.. ييبها حقي..
جاسم: انا بسير بشوفها وبقولهم اييبونها حقج..
حنين: الظاهر شوق طالعه على أمايه بتصف لنا البنات..
أم جاسم: شو فيهم البنات محلاتهم..
شوق: المهم يات وارتحت، يالله أحس روحي بتطلع..
أم جاسم: هذي الولاده والا حسبالكم بالسهل الروح تطلع للدنيا..
شوق: انا من الي شفته يالسه أتسامح من أمي، وقصدي اني حسيت بمعاناتها، وهي تتحراني أتسامح لأنه بيصيبني شي..
أم حنين: بسم الله عليج من كل شر..
حنين: هههههههه المهم سلامتج..
شوي ويدخل جاسم ووراه الممرضه شايله البيبي وعطتها لشوق الي خذتها ويلست تبوسها وتصيح..
حنين: انزين ليش تصيحين..؟؟
شوق: ما أدري بروحها دموعي تطيح..
جاسم: لأنج صرتي ام واحساس يديد عليج..
حنين: وشو بتسمونها..!!
جاسم: الي تختاره امها..
شوق: حنين قالت الإسم الي ابيه حقها..
حنين: شو قلت..!!
شوق: ملاك..
حنين: الله.. وبتكون أحلى ملاك بالدنيا..
وامتلا الجو بحب وفرحه والكل نسى الهم والغم، بس حنين للحينه بداخلها هم المعرس الي مب عارفه كيف تتخلص منه..
**__**__**__**__**