قصيدة ضحى العيد





الناس منجرفه مع الأسهم وكم زاد الرصيـد
هـذا يصفيـهـا وذاك يبيعـهـا ويـردهـا




وانا على رجـواي لانـي مستفيـد ولامفيـد
مدري متى علمي بجـواد الفلـوس وعدهـا


لاكن على ماقال ابو صالح حمد صالح سنيـد
الله يلعـن حاجـة الدنيـا ويلعـن جـدهـا


الحاجة اللي من ورا حبة خشم شخصٍ بليـد
مارضى بها والناس ماترضى ولاهـو قدهـا


صحيح ماعندي رصيد فلوس لاكـن الأكيـد
ماعاد عندي كون عـز النفـس ليـه اهدهـا


انا عزيز النفس وازيدك بعـد راسـي عنيـد
يبشر رفيقي بالسعد وعـداي تمسـك حدهـا


ما ارافق الرجال متمصلح لجل مالـه يزيـد
عيني قسم بالله في مخبـى الرجـل مالدهـا


ارافقه لاسار راسـه طيّـب وشبحـه بعيـد
ويمناه تعطي مادرت يسـراه وشهـو مدهـا


وليا حكيته سر ماكنـه سمـع شـيٍ جديـد
يعني خلاص السر في نفـسٍ بعيـدٍ سدهـا


هذا رفيقي وان حصل ولا فخلونـي وحيـد
خلوني امشي في هوا نفسي واحقـق ودهـا


لبيييك ياملهم فكر راسي على بـدع القصيـد
ياللي على شانك بيوت الشعر تاصـل حدهـا


في ذمتي ذمه لو انحت لك على وجه الجليد
بيتين ياوجـه الجليـد يـذوب قبـل اعدهـا


ويمكن لو اكتب لك بعد بيتين باطراف الحديد
يصبح حرير وهو تموت النـار عـاده ندهـا


الله حسيبك كيف صرت اعذر وانا باسي شديد
اصبحت اسامح زلتك وقـول :هـذي عدهـا


عذرك ينسيني خطاك الأمس يالـدر الفريـد
عذرٍ لو تداوي به اجروح المريـض يبدهـا


دايم تعز الوصل ومقدى على الراي السديـد
لاجبعت بقعى حبال الوصـل قمـت تشدهـا


الله عطاك الزين والعفه وعـادك سيـد غيـد
والله صخرني لك محبه وانت منت بضدهـا


اسمعك بيتين وانـت تقـول بالله عيـد عيـد
وعيدهـا وعيـدهـا وعيـدهـا واردهــا


كله على شانك قسم بالله ماهي لحيـة نشيـد
يسقى على ذيك اليالـي قبـل تفهـق يدهـا


يوم اليالي كنهـا مـن بيننـا ساعـي بريـد
كنها تعلمنا وش اللي بيحصـل فـي غدهـا


واليـوم لاساعـي بريـد يفيـد والا يستفيـد
كـلٍ يبـي يقطـع علاقـة ودنـا ويهـدهـا


لاكن فمان الله واشوفك ضحى العيد السعيـد
عشان احصل لي عذر وعداي تمسك حدهـا