ولك اخ امك ما تجيبه وتبزيه!
يعيف زاده لو لقى اخيه مضام

ساير مواقيفه .. وجرب مماشيه!
والناس فالميقاف منقسمه اقسام

احد تحفظ اسمه كذا ما انت تبغيه!
مجامله .. والوقت بايع وسوام
واحد مهو يحتاج تحفظ اساميه!
اصابعك بالحالها تدق الارقام

لانه خوي ما تغير مباديه!
ومحبته تزداد عام ورى عام

ذي تجربة خوه ولا تسج يا هيه!
ترى البشر منظورها ناتج احكام

يستعظمون اللي ربوعه حواليه!
ويستضعفون اللي لحاله الى قام

من يعزا اخيه ويقدر اخيه!
يندم الى بانت صواديف الايام

ما ينتعوض الاخ او فيه مافيه!
حطه ذراع لك .. والايام قدام

تلفي عليك وجيه وتغادر وجيه!
واخيك طول العمر يبقى لك حزام