لآ تعاتبني ترى ما جيت أسمع هالملام..

جيت أصحى شمسي اللي وسط قلبك غافيه





جيت لك والبرد كم تراجف له عظام..

جيت لك وأدري يدينك مثل ماهي دافيه





ياامواني فرحتي يا أول واخر غرام..

كل أنوإر الاماني في غيابك طافيه





وكل أحلام الثواني شوفتك قبل الهيام..

يعلن اللي لك بقلبي من أمور خافيه





طفلتك بعدك وحيده ضايعه وسط الزحام..

خايفه تسأل ولا تلقى أجابه شافيه





تجلس بذاك المكان اللي حضنا قبل عام..

وطيفك اللي ما ترك أحلامها المتجافيه





مرت الذكرى وخلت قلبها يصبح حطام..

والمواجع مرته مثل الرياح السافيه





أنتثر دمع الزوايا يوم نادت للغمام..

ليه يهجرني وأنا اللي من عرفته وافيه





ليه يسمح للعواذل يفرحون بهاللخصام..

ليه عكر كل حاجه كانت أول صافيه





وبعد مازاد العنا والبرد وازداد الظلام..

جت تهمس غيبتك واللي خلقني كافيه





ما تشوف إن غيبتك ماخلت بعيني كلام..

ماتشوف إن السهر ماخلى فيني عافيه





ضمني ما دام جيتك خلني بقلبك أنام..

ولي سألتك الشمس عني قل تراها غافيه