ياطير،صوتك مع الاصباح يِشْجِنِّي‬
الله يجازيك مالي با الطرب نيـّه



كانك تغــرد تبــى لك حاجةٍ مني
إفْرد جناحك وخذها ف الصباحيه

وان كان تشكي علي عاني ومتعنّي
تبغاني اكتب على الالحان قافيّه

ابشرّك في الشجَن ما يختلف ظنّي
ساعه واجهز قبال الباب مطويّه

ارسم حروفي على آلقرطاس واغنّي
رسم الزُمُرُّد على نحْر الحجازيه

واذا انت خايف على سرك وتامني
قفّلت مغلاق بابه في عراويّه

وان كنت بااحلام عمرك منت متهنّي
مجبور مثلي تعيش احلام ورديه

أحب بعض الحكي في الماضي الا اني
ما داني أخوض في الاشياء الغراميه

وان كان رزقك تعسّر وانت زابني
ماتقدر تهوش بوجيه الحراميه

فا ارزاقنا ماقواها كل متمنّي
باامر الله تروح والحاجات مقضيّه

كم حاجةٍ احتريها من صغر سني
تسهلت لي وانا احْسِبْ مالها جيّه

وكم ليلة عاش فيها الذيب متجنّي
وكم ليلةٍ صاد في الارض الخلاويه

وكم فرصةٍ من يدي ضاعت ولكني
رجعتها با الوفاء والدبلوماسيه

ابغيك ياطير تكفخ راضيٍ عني
برجك سماء والبشر من تحتك ارضيه

اظن وتظن مثلي واغلب الظني
ان القدر زين واحكامه غيابيه

⁧الشاعر / مبارك بن شعيل اليامي