الوقت وقتي و الزمن مـا صفالـي
و العمر رحله وأتعبته المشاويـر
كلي حلالك و انـت كلـك حلالـي
لكن وربي حظنـا ماهـو بـ خيـر
حاولت لكن مـا جرالـك جرالـي
مات السنع في وجه قـل التدابيـر
فـ لا تزعل اليا قلت مالـك ومالـي
دام الأماني غير و أحلامنـا غيـر
و دام الحزن بالحب فالـك وفالـي
خلنا نتفارق والبقـى للمقاديـر
أدري فراقك صعب ويهـد حالـي
و أدري فراقي صار من قبل لايصير
ما كنت أبي فرقاك بـس الليالـي
تسيّر أحلامي على عكس ما أسير
تدري خفوقك بالفراق وش هدانـي
أهدى يديني وردتين مـع طيـر
ورحت بفراقـك والهدايـا قبالـي
ومات بيديني وردتين و عصافير
يمكن يخون الود لا مـن طرالـي
لكن وربي ما أخونك مـع الغيـر
أبطلبـك حاجـه وأمانـه اذا لـي
معزه وخاطـر وحشمـه وتقديـر
تكفى بـغلاة أمك اذا كنـت غالـي
لاجيت في بالك تذكرني بخير