لولا التجارب ما نمى بعقولنا فهم الحياة

لولا التجارب ما نمى بعقولنا فهم الحياة

ولا تقدمنا واخذنا العلم من منتوجها

لكن عطتنا درسها وافي بدون مجاملات

حتى نميز بين عدلات العلوم وعوجها

ناخذ فوايد وقتنا في حكمه وصبر وثبات

ونحقق المقصود وارض الله وساع فجوجها

ما نلتفت لأهل الخطا وأهل المجادل والشمات

ناس تحذي خيلها وتشدها بسروجها

يا كثر ما نسمع بترويج الهروج الضايعات

من عالمٍ ضاعت مراجلها بكثر هروجها

تلقى مجالسهم تردد بين ود وبين هات

ما عاد تفرق مزعج الحضار من مزعوجها

علومهم تفرعت وأفكارهم راحت شتات

وعلى متابع غرة الاجواد ويش يحوجها

مجالس الغيبه تصنف من كبار المهلكات

وأكثر عباد الله يجي ساحتها ويدوجها

هو ما درى انه ما جنى غيرالذنوب الطايلات

وبكره يبين فالج الاخصام من مفلوجها

من يعتبر يلزم طريق أهل العقول الصاحيات

ولا تزلزله الرياح العاتيات وهوجها

يطلب وليه باغتنام الباقيات الصالحات

ويصعد على القمه وينزل عاليات بروجها

والخاتمة يا الله يا ربي من النار النجات

وعسى جنان الخلد تجعلنا مع أول فوجها

لشآعرها /. أحمد سعود الحمد