في غرفة واسعة... مرام و"في" مُستلقيات على مرتبات منخفضة يتكلمن بهمس ويضحكن
ريم بجانبهم تسرح شعرها قبل النوم...
وغادة جالسة في أبعد مرتبة عنهن ... واضعة سماعاتها في إذنيها
تقدمت نحوها وبيدها صحناً مغلفاً به بعض اللحم والسلطة ..
مدته نحوها ... رفعت غادة عينيها نحوها
أزالت السماعات من أذنيها..
غلا بهدوء: عشاك.
تناولته من بين يديها وهي تنظر نحوها ببرود: وش جايك؟ تكفري عن خطاياكِ؟
جلست على المرتبة التي بجانبها : إفهميها مثل ماتبين
غادة وهي تفتح الغلاف عن الصحن وتتناول بعضاً من اللحم: تبيني أكل قبل النوم عشان أسمن؟
غلا وهي تمسك بالمرآة لتمسح مساحيق التجميل عن وجهها: مشكلتك إنتِ الي دخلتي بدون ماتاكلين
صمتن للحظات..
قطعت غلا الصمت : ريان ما قام وراك كعادته ... عرف إن مافي فايدة من الركض وراك
غادة وضعت لقمتها في الصحن مجدداً : الله يعينه على توأم مثلي
غلا نظرت نحوها بتفحص، بصوتِ عال: نقدر ننزل على التكييف وتلبسين بجامة صيفية
مرام كانت مستلقية على معدتها .. نظرت إليهم : إي عادي مانمانع..أصلا الجو حلو الليل
نظرت لها غادة بحدة : أحب أنام كذا
غلا نظرت لها بخبث: تحبين تنامين كذا ولا ماتبين تلبسين صيفي؟
غادة : تعرفي إن مالك دخلك صح ؟
قدمت لها كريم مُرطب لليدين : تفضلي.. لازم ترطبين يدك قبل النوم
غادة أخذته بقبضة قوية ووضعت لها القليل منه على ظاهر يديها ووزعته بقوة
غلا: لا تنسي الساعد
نظرت لها بحقد ..
غلا إبتسمت إبتسامة جانبية
غادة رمت الكريم المرطب على الأرض بجانب مرتبتيهما : شُكراً إكتفيت..تصبحين على خير
إستلقت مغطية نفسها بالغطاء لتعطيها ظهرها ..
دخلت لين وهي مازالت بفساتنها .. نظرت لغلا بحقد
نظرت لها غلا مع إبتسامة .. لاحظت يدها المضمدة .. إختفت إبتسامتها
لين : وين أنام؟
ريم : فيه مرتبة فاضية جنب غلا
صكت على أسنانها بغضب ... تقدمت بخطواتها ناحية الحقائب المرمية في زاوية الغرفة بعيداً.. لتتناول حقيبتها وتأخذ منها ملابساً للنوم .. ندمت إنها تحمست لهذه الرحلة
ذهبت للحمام وفي هذه الأثناء وصلتا سلام وصِبا للغرفة... وعادت لهم بملابس نوم عليها قطع من الخبز مربوطة بربطة من النصف وتتراقص
نظرت إليها غلا وضحكت بسخرية
لين جلست بجانبها : غبية
غلا : شهالغباء الي تلبسينه
لين وهي ترتدي جوارب قيس لترمقها غلا بنظرة
لين بهمس: ليه من أبي أجلس في مكان تكونين قبالي أو جنبي .. يع
بصوت عالِ : صِبا مو مفروض المتزوجين ينامون في غرف منفصلة مع أزواجهم ؟
نظرت لها غلا بنصف عين ، بهمس: الي يقول أنتم تنامون في نفس الغرفة
نظرت لها بحدة : إتأكدي إن هذا الشيء بيتنفذ لما نرجع الشقة
غلا بخبث: لهدرجة إنت رخيصة عشان تسمحين لنفسك تنامين مع شخص بتتطلقين منه قريب
لم تتمالك أعصابها صرخت في وجهها : وقحة!
نظر الجميع إليهما بصدمة..
فتحت غادة عينيها ببطئ ... لم تكن نائمة ... لكنها تعلم تماماً إن الحرب قد بدأت بين غلا ولين.
لين بغضب: لا تفكري أبداً إنك تتواقحي معي مرة ثانية ..أنا مو مسؤولة إذا أمك وأبوك خربوا أخلاقك بدلالهم المفرط لك
غلا بغضب: ماسمح لك تتكلمين عنهم كذا
ريم : يا بنات هدوا ماتسوى تتهاوشون ..
لين : إذا كنتِ مثل الأطفال تفكرين إنك تقدرين تاخذين راحتك بالوقاحة وتتواقحي مثل ماتبين لأننا أحنا ضيوف عندكم بالضبطط مثل مايسوون الأطفال فأنت غلطانة
وقفت لتترك مرتبتها
غلا : الي يبدأ يتواقح يستاهل إن نتواقح عليه
مرام: لين غلا شفيكم هدو وسـ...
غلا ولين : إنت إسكتي!
لين ركلت مرتبتها بعيداً لتجلس على الأرض الخشبية مباشرة
غلا : آه وش بتسوين اللحين بتنامين على الأرض مباشرة عشان المرتبة من فلوس أبوي؟!
لين: آيه
غلا : مين الطفل بينا بالضبط اللحين؟
سلام : ثنتينكم
لين : إنتِ أغبى إنسانة شفتها في حياتي
غلا: على فكرة حتى هاذي الأرضية من فلوس أبوي
لين صكت على أسنانها بقهر
:شفيكم صوتكم واصل لنا ؟! الجدة تبي تنام
نظرت أم فهد لتلك المرتبة المائلة ولين الجالسة على الأرضية مباشرة
فَي : هوشـ...
أغلقت سلام فمها بيدها
أم فهد : لين حبيبتي ليش جالسة على الأرض مباشرة ؟
نظرت لين لغلا بحدة ... لقد تحملتها طوال اليوم كانت تلعب على أعصابها حتى لم تعد تستطيع تمالك أعصابها
إقتربت ناحية المرتبة لترتبها ..تقدمت لين بإتجاهها بندم: إتركيها عنك خالتي
أم فهد : صاير شي؟ مين الي كان يصارخ ؟
صِبا : ولا شيء خالتي مرام وفَي كانوا يصارخون وهم يسولفون من الحماس
نظرتا مرام وفي إليها بحقد
أم فهد بغضب: وطوا أصواتكم حتى الشباب ماسووها
يلا تصبحوا على خير ... ووطوا صوتكم مرة ثانية
لتخرج من غرفتهن .
نظرت لين لغلا بحقد ... أمسكت بمرتبتها لتبعدها بعيداً عن غلا وتجلس عليها
غلا : يا الله .. كأنك خدامة نايمة بعيد عنا
صِبا : غلا خلاص
غلا : نايمة في جهة تتجمع فيها الحشرات وأحنا في مكان كله زراعة مالي دخل
وإستلقت متجاهلة إياها ..
وقفت صِبا لتطفأ الأضواء..
استلقت لين وأغمضت عينيها .. ظلت تفكر بالإنتقام حتى غلبها النوم.
###
في الصباح...
بعد تناولهم لوجبة الإفطار، مازال الجو محتداً بين "غلا" و"لين"..
كنا يتجهزن ويرتدون ملابس السباحة ..
وقفت لين أمام ريم التي كانت تربط نهاية ظفيرتها
لين : حلوة تسريحتك ماشاء الله ..
ريم: حياتي تسلمي إنتِ شعرك يجنن ماشاء الله
إبتسمت لها بخجل: الكل بيسبح في المسبح اللحين؟
ريم: إيه...تبين أسوي لك ظفيرتين مثلي ؟
نظرت لها لين بتردد..
ريم: تعالي جلسي قدامي ..ماراح أطول معتادة
جلست أمامها لتسرح شعرها..آخر مرة سرحت شعرها على شكل ظفيرتين كانت عندما سرحته لها أمها وهي في الثامنة من عُمرها.. لم تجِد هي تسريحه بنفسها..إكتفت بربطه كذيل حصان عندما كانت في المدرسة...وجعله مسدولاً في أي وقت آخر، أحست بإحساس لطيف ودافئ.
سَمحت لنفسها أن تتخيل ريم...أمها.
###
تقدمت نحوه وهي تمشي بحذر وتنظر للأرجاء وكأنها تحاول إخفاء شيء ما... نظر نحوها كانت مرتدية أفرول جينز وتحته قميص قطني"تيشرت" أحمر اللون
مع تلك الظفيرتين الظريفتين.
وصلت لتقف أمامه وتنظر له بإستنكار: بيجيك شيء يوم من الأيام وإنت تشرب القهوة 24 ساعة
قيس إبتسم وهو يمسك إحدى ظفيرتيها: ظريف..أول مرة أشوف شعرك مو مسدول
إبتسمت له:شُكراً ريم سوتهم لي...المهم تعال معي
وسحبت ذراعه بكلتا يديها ليمضي معها..
دخلا غرفة اللعب..
قيس: والله خالي تعبان على هالمزرعة ..حتى أحنا في جهتنا عندنا نفس هالغرفة بالضبط
لين : إففف قيس أنا ماجبتك هنا عشان أعرفك على الغرف الي عندنا..
سحبته من ذراعه مجدداً نحو طاولة البلياردو..
قيس:وش تبين مكلمتني من الصبح وتمشين كأننا حرامية وحالتك حالة ..
لين ناولته عصا البلياردو : آبيك تعلمني
قيس قطب جبينه : أعلمك ؟ اللحين كل هالقصة الطويلة عشانك تبيني أعلمك كيف تلعبين البلياردو ؟
لين : ترا أنا مضحية بإني أسبح مع البنات في المسبح عشان أتعلم فلا تضيع وقتنا عالفاضي
قيس وهو يضع كوب قهوته جانباً: إنتِ قلتيها مضحية عشان " تتعلمين" يعني عشان نفسك فبلا هياط
لين أمسكت العصا بين يديها ووضعتها أمام وجهها وأغمضت عينيها..برجاء: إففف بليز علمني ولا بنهار
نظر نحو ضماد يدها : شفيها يدك ؟
لين : إنجرحت وأنا أغسل الصحون
أخذ العصا من بين يديها فأبتسمت إبتسامة عريضة وتناولت هي العصا الأخرى
قيس وهو يرتب الكرات في مثلث: وش قصة رغبتك الإنهيارية في تعلم البلياردو أبي أفهم
لين بحقد: عشان أكسر رأس بعض الناس
نظر لها غير مدركاً من تقصد
قيس بتكبر: طفشت وأنا أعلمك كل شي في هالحياة
لين بإستنكار: ذليتنا أقسم بالله على هالفيزياء الي تدرسني إياها
قيس: هاذي مشكلة الأذكياء الي مثلي يالين .. إن الكل يبي يستفيد من ذكائهم بأمورهم الشخصية
لين رفعت عينيها للسماء بإمتعاض: وووع عرفت ليه حبيتو بعض
قيس: إيش؟
لين: عرفت ليه حبيت غلا الغبية
قيس نظر نحوها بتفحص: لا تقولين تبين تتعلمين البلياردو عشااان ...؟
ضحك حينما رأى نظرة الحقد منها
لين : غبية راح تعرف طعم الهزيمة المرة الجاية
قيس: لا تتعبين نفسك غلا محترفة في البلياردو
لين وهي تضرب بالعصا على الطاولة لينظر لها بصدمة : شقصدك ؟! ليه طلعت من بطن أمها والعصا بيدها وباليد الثاني الكورة ؟!... عَلمني وبتشوف كيف بصير "محترفة" أنا بعد...مثل ماجبت فل مارك في الفيزياء راح أصير محترفة في البلياردو بعد .
قيس : أوكِ..تدرين إن البلياردو عبارة عن فيزياء... لما تصطدم الكرات هذا يمسى تصادم مرن وتحفظ فيه الطاقة الحركية للنظا...
لين : إففف قيس مو كل شيء تدخل فيه الفيزياء وفر لي محاضراتك ليوم الأحد لما يعطوني محاضرة فيزياء جديدة
قيس نظر لها بإستنكار: الفيزياء في كل شيء من حولنا
لين وضعت العصا على كتفها وهي تنظر له ببرود: طيب يا أستاذ قيس فهمنا مقدمة الدرس ممكن تدخل في الموضوع علطول ؟!
قيس: لين هاذي عصا بلياردو مو سيف عشان تمسكينه كذا
إسمعي وش الي ماتعرفيه بالضبط ؟
لين : مهما حاولت مستحيل تضبط مع وتدخل الكرات..
قيس : وريني
لين : إنت علمني بعدين بلعب
قيس: وريني
لين : إففففف منك
دفعت الكرة محاولتاً أن تكسر الكرات لكن لم تكن كسَرة ناجحة
قيس: مسكتك للعصا غلط
لين نظرت له بغضب:ليه سيف هي؟
وقف ورائها ليمسك بيدها ..إحمر وجهها .. إبتعدت عنه جانباً
:خيييير ؟!!!
قيس: لا حول شفيكِ مو تبيني أعلمك ؟
لين: طيب مو لازم حركات الأفلام الرومانسية ذي
قيس بنفاذ صبر: آسف لين بس أنا أستاذ فيزياء مو إستاذ بلياردو بعد عشان اعرف عدة طرق لتعليم البلياردو
إستدار ليخرج من الغرفة لكنها أمسكته مجدداً .. إبتسم بخبث ثم إدار وجهه نحوها :خير؟!
لين : إفف بلا دلع يالحساس .. تدري إني مسميتك في جوالي أستاذي الحساس؟
قيس : شُكراً أنا مو مسميكِ شيء بس حافظ رقمك في مخي
لين :إييييشششش؟!! سلامات
وين جوالك ؟
قيس أخرجه من جيب بنطاله: شتبين فيه؟ تتأكدين يعني؟
لين أخذته وأدخلت الرقم السري.. نظر لها بصدمة : ماشاء الله شعرفك
لين نظرت له بإستنكار: مايبيله معلم فيزياء كلها 1234 أحد بالغ يحط هالرقم السري بالله؟ مرة وحدة شفتك تدخل رقم السري وحفظته من البساطة
سجلت إسمها " زوجتي حبيبتي عشيقتي التي أحبها " ووضعت عدة قلوب
قيس: تمزحين ؟؟!
لين : لا
قيس: أعطيني جوالي بغير الأسم البايخ ذا
لين: عَلمني كيف ألعب بالأول
قيس: ليه كتبتي كذا ؟ ترا ماراح تفتح غلا جوالي وتشوف الإسم
لين : كيفي يلا علمني
وضع يده مجدداً على يدها .. أمسكت رباطة جأشها
قيس: المهم إنك تركزي .. وتراكِ قصيرة حدك كسرتي ظهري
لين : أكرهك
نظرت للُكرة التي قد دخلت بسبب قيس بصدمة
قيس: بس ركزي .. إنتِ تضربين الكُرة وعصبيتك غالبة عليكِ .. تماماً مثل لما تحلين مسألة فيزياء وتتوترين ..خلي أعصابك هادية
لين وهي تركز على الكرة : أعصابك هادية
قيس: تدرين إن المعلمين كانوا يستخدمون طاولة البلياردو عشان يشرحون قانون نيوتن عشان سهولة تحرك الكرات عليها..تدرين إن الكرة الثامنة إستخدموها كرمز للأمريكين من أصول أفريقية؟ البلياردو عِلم
لين : من وين تعرف كل هالمعلومات؟
قيس: أقرأ كثير
لين مخفية إعجابها بالتذمر: بدال ما تقرأ القرآن هذا الي فالح فيه
ضحك ..كعادة لين
نظر لظفيريتها : ليه تخلين شعرك مسدول دايم ؟
لين : ماعرف أسرحه ..تعرف طبعاً متى آخر مرة شفته أنا بظفيرتين
فهم تماماً ماتقصده ..
قيس نظر نحو الكرة التي أسقطتها: سكراتش
لين: إفففف وش "سكراتش" ذي الي كل شوي تقولونها .. هاذي لغة برمجة
ضحك قيس: مين اللحين الي يدخل تخصصه في كل شيء... سكراتش لما يسقط اللاعب الكرة البيضاء وخصمه يقدر يضرب الكرة البيضاء من أي مكان على سطح الطاولة
لين بحقد : الغشاشة ماقالت لي
قيس: أتوقع لأنها ماسوت " سكراتش"..هي محترفة
لين أدارت وجهها نحوه لتنظر إليه بحقد .. كانا وجهيهما متقاربان جداً..كان ورائها مباشرة.. إبتسم لها ... نظرت له بغضب وإحراج
لتدير رأسها للأمام مٌجدداً..
قيس وهو يبعد ظفيرتها ويلمس رقبتها: على فكرة ليه كلك لسعات...
إبتعدت عنه وتنفسها غير منتظم: قيس خلاص بموت ترا!
قيس نظر لها بصدمة : شفيك؟!
لين : شفيك مايصير تمسكني كذا
قيس حرك حاجبيه ليغيظها : ليش عادي مو إنت " زوجتي" ؟ إنتِ الي كاتبة كذا في جوالي؟
لين : لا ووووع الحمدلله ماباقي شيء ونتطلق
ضمها بقوة ليعاندها : زوجتييييييي
لين محاولة أن تفك سراحها منه : وووووع قيس بطعنك بالعصا وووع
إبتعد عنها ضاحكاً بشدة
لين نظرت له بحقد : والله إنت وغلا الأغبياء يقعون على أشكالهم
قيس : هيه ما أرضى عليها
لين : نننننن
إقتربت نحوه وهي تريه ساعدها بحزن : شوف كيف لسعتني الحشرات الغبية من مزرعتهم الغبية بسبة إني مابي أنام جنب الغبية
نظر نحو ملامحها البريئة مبتسماً
قيس : اللحين بعلمك كيف تصيرين مُحترفة
###
عند المسبح...
بداخله: وين أم طول شبر ونص؟
سلام وهي تنظر لها بإستغراب:مين؟
غلا: لين القزمة
نظرن لبعضهن ..لن تنتهي هذه الحرب أبداً.
غادة بإبتسامة خبث: ممكن تكون مع "زوجها" قيس
نظرت لها غلا ببرود: يتهنون
ضحكت غادة بإستهزاء
بعد دقائق..حضرت لين
نظرت إليها غلا بتفحص ..نظرت لها لين بنصف عين
لتسقط بقوة في المسبح
دخل الماء في عيني غلا : آه ياغبية ماتعرفين تدخلين المسبح مثل البشر الطبيعين الي عقلهم طبيعي وصاحيين
لين وقطرات الماء تنساب على وجهها: مشكلتك إذا دخلت الموية في عينك
نظرت لها غلا بإستنكار: من جدك؟
لين حركت يداها في الماء بقوة ليتساقط الماء بقوة على غلا
خرجت من المسبح غاضبة: شكله مو بس نمو جسدك موقف، حتى عقلك
لين نظرت لها ببرود: أشوفك العصر في غرفة اللعب عند البلياردو
نظرت لها : هه... لا تعطي نفسك إحتمالات وهمية إنك راح تفوزين..فلا تضيعين وقتي
لين : تعرفين إني فزت بشيء ثاني صح ؟ بس إنت ممكن تفوزين فيه بعد فترة؟
ترا عادي أخرب عليكِ الفوز به
نظرت لها بحقد فهمت إنها تقصد قيس... ثم نظرت ليدها المُضمدة: على إني أكرهك بس آسفة
لين فهمت مما تعتذر : إيش؟ ماسمعتك بوضوح إذني داخلها موية؟
نظرت لها بحقد: أم طول شبر ونص المتخلفة
وتركتهم لتدخل إلى الداخل..
###
عصراً إلتقته في المطبخ...
كان يُحضر القهوة والشاي..
غادة:هاي
مَيز صوت توأمه ...لم يلتفت لها
غادة بضيق: ممكن تناظرني على الأقل؟!
تجاهلها تماماً
غادة : ريان ماله داعي إنك تكون زعلان للحيـ...
صفعَ باب خزانة المطبخ بقوة ... إرتعش جسدها من الصدمة
نظر إليها، بغضب: ماله داعي؟!!!! ماله داعي إن أنا زعلان منك من ألف شغلة صح ؟؟؟أنا مايحق لي إني أزعل؟أنا مايحق لي إني أتضايق بس إنت لك حق تهربين مني ولك حق تزعلين ولك حق تقولين الي تبيه...ألف مرة قلت لك تحملي نتيجة أفعالك
أنا طفشت كل تفكيري فيكم وإنت كل تفكيرك بنفسك
حَمل صينية القهوة والشاي ليخرج تاركاً إياها مصدومة.
###
عادل : أنا بدخل الساونا مين يبي يدخل معي
فارس "أخ ريم": أنا بدخل معك
يعقوب أشار بأنه يريد ذلك أيضا
عادل بتأفف:ريان تجي معنا؟
ريان: لا مابي أحد يروح للحر برجليه
عادل: شفهمنا ايش يقول ولد خالتك بدونك
نظر له يعقوب بحدة
ريان صاكاً على أسنانه هامساً:يسمع ياحمار يسمععع
يعقوب أشار بيديه...ريان ترجم ذلك لهما: مايهمه تفهمون له بس راح يدخل
عادل ببلاهة: اللحين كلكم تعلمتوا هاللغة عشانه؟
ريان نظر له بنصف عين : عادل مزاجي في القاع...
عادل: طيب طيب...يلا تعالوا معاي
عند الساونا...
عادل : كيف نتحكم بالحرارة؟
فارس: من هنا يالمتخلف
عادل وهو يضغط على الأزرار: معلق هذا
فارس: خلاص نتحكم فيه من برا...فيه من برا ومن داخل جهاز التحكم بالحرارة
عادل : طيب
فارس خرج ليغير الحرارة
ودخل مجدداً:هاه كيف؟
عادل : ممتاز ...
نظر ليعقوب ممثلاً إنه يشعر بالحر حتى يفهمه : حرارة ...زين...إنت...حق هنا؟
نظر له يعقوب بإستنكار مشيراً لأذنه بأنه يستطيع السمع
فارس: لا تكلمه كذا كأنك تكلم هندي شفيك إنت
زينة الحرارة يعقوب؟
يعقوب رفع إبهامه مُشيراً إنها ممتازة
###
عِند الفتيات...
كنا يتبادلن الأحاديث
لين وهي تتناول الحب الشمسي: والله أنا مستغربة كيف شربوا كل قهوتي الأمس ..عمري ماسويت قهوة وريان قال لي بصريح العبارة إن قهوتي ضعيفة فمدري بصراحة كيف شربوها
صِبا بإبتسامة صفراء: عادل قال لي إن قيس خَلص باقي الدلة
نظرت لها بصدمة
بينما إنزعجت غلا بشدة
مرام: افففف كيوت قيس
صِبا دون أي سوابق: أبي أتطلق
نظرن إليها بصدمة
سلام:آممم صِبا إنت قلتي الي في عقلك بالغلط ولا تمزحين ولا ايش عشان نعرف كيف نرقع لك
صِبا ببرود وجدية: لا فعلاً أبي أتطلق
لين بصدمة: ترا مو معناة إن قيس شرب قهوتي إن علاقتنا ممتا...
قاطعتها: أبي أتطلق
وضعت لين يديها لتغطي أذني الطفل
غلا همست لها: بعده صغير على إنه يفهم ياغبية
صِبا بجدية: أنا تعبت ...تعبت وأنا أحبه وأحترمه وأخدمه وهو مو معبرني
سلام هامستا لصِبا: صبا الموضوع مو قابل للنقاش هنا
صِبا : يكلم بنت
سلام بغضب متجاهلتاً مانصحت به أختها منذ قليل: الخسيس!!!
لين :إنتِ متأكدة؟!
صِبا: إيه شفت جواله ومحادثته كلها معاها...هي معاه في العمل ..كل المحادثة حب وغزل وشعر
سلام بغضب: الحقير أبو عين زايغة قلت لك إنه وصخ
صِبا: بالضبط ناهيك عن نظراته للبنات وطريقته معي وعدم إهتمامه بفيصل وكل شيء
غلا بجدية :إطلبي منه الطلاق...مايستاهلك
فَي: هيه إنتم وفيصل ؟ !!
غلا ببرود: أبوه الي خلق هالعناء له ... يعيش مع أبوين منفصلين أحسن من يعيش معهم إثنيهم ويسمع هوشاتهم 24 ساعة
لين: أكره إني أتفق معك بس فعلاً
رمقتها غلا بنظرة
###
بعد نِصف ساعة ...
تبقى عادل ويعقوب في الساونا ...
رنَ هاتف عادل ..
عادل بسرعة :راح أطلع
يعقوب هز رأسه إيجاباً
عادل خرج مسرعاً ..
أغلق الباب خلفه وضغط زُراً دون أن يلاحظ
إبتعد بعيدا ليتكلم في هاتفه: هلا حُبي..آمري
###
بعد 10 دقائق...
شعر بالملل والإكتفاء...
ذهب متجهاً للباب لكِ يفتحه...لم يفتح
إستغرب...فتحاه عادل وفارس بكل بساطة وخرجا
حاول عدة مرات....لم ينفع
بدأ يتوتر... تقدم ناحية جهاز تعديل الحرارة...
حاول أن يغير الحرارة ...نسى إن جهاز التحكم الداخلي معطل ... ضغط على الأزرار بجنون ...
لم يكن معه هاتفه... ولم يستطع أن يصرخ
الجو يشتد حرارة ... بدأ يمسح عرقه عن وجهه.. شرب ماتبقى من علبة ماءه الصغيرة
يحاول الحفاظ على سوائل جسده ...نفسه أصبح سريعاً
###
صبا متابعة حديثها بغضب فقد إنفجرت تماماً: ولا يجيب لها ذهب تتخيلووووون
سلام بغضب: ماشرالك إكسسوار هدية حتى
صبا: بالضبط هذا الي قاهرني
لين بضيق: وإنت تشترين له؟
فَي بغضب: تشتري له ؟؟؟ باقي تعطيه روحها الكلب
###
بعد نصف ساعة ...
بدأ يشعر بالدوار ...
جلس مُستسلماً ...وضع يده على صدره...نبضه يتباطئ
أغمض عينيه ...والذكريات تمر عليه...عاد لليوم الثاني عشر من مارس...عام 1998
في المطار.
يُتبع في الجــزء القادم....
|