بسألك عن حاجه .! وداعك ذكرتـه
أمانتك ماهـو فـي حقـك غبينـه
يوم ان حبّك وسط صدري حفظتـه
ليه السفر .! اهداك بحره سفينـه
لكن .! عتابي من عقب جيت شلته
من خاطري والدم نشّـط حنينـه !
يالجوهر اللـي لاطرالـي سهرتـه
يالحب ، ودروب السلام ، وسنينـه
الشعر شفني في حضورك ذبحتـه
ضيافةٍ لك يوم جيـت المدينـه .!
والبيت يوم انـك رجعـت وآنرتـه
عقب الآسى صارت حياته سكينـه
والوقت يوم الوقت جابـك شكرتـه
وحبيت من شأن اللقا بك جبينـه !
مستقبلي / واغلا طموحي آسرتـه
والنفس مابيـن المخاليـق شينـه
ودمعي وعيني والغلا لـك رهنتـه
والحب صرت انت العضيد ويمينـه
والمشكله .! صدري إذا اني سألته
بين البشر تسمـع صـداه وآنينـه
والموت ! لاجاني سؤال وسفهته .؟
من عاذلي لاقال صاحبـك وينـه.؟
كم لي وطيفك في غيابـك سرحتـه
والشعر تسهر لك من الشوق عينه
وكم لي ودربك لاشعـوري سلكتّـه
حزين من شانك دروبـه حزينـه !
إنسان لو ماجيـت يمّـه واخذتـه
من يرأف بحاله ويأخذ يدينـه ..؟
وإحساس لو صرت بمكاني وعشته
إمن الوله قد باح حتـى كنينـه !
تعال ! قـل للنـاس داري سكنتـه
وخلّ الوصل ضيفٍ لفى عازمينـه
وقلي : وش اللي من تصديك نلتّه
وخذني معك دايم بقايـا رهينـه !
عبدالرحمن العطاوي