جيتك وكلي هم وجروح واحزان
والياس حطم كل امل حي فيني

جيتك اشيل من الألم الف عنوان
ومليون دمعة حايرة وسط عيني

بردان من كثر الجفا حيل بردان
روفي بحالي واشفقي وارحميني

لا مايروف البرد في جسم عريان
ومافيه سد ٍ حال بينه وبيني

شفتك وناديتك من الشوق غرقان
واركض وانادي رافع ٍ لك يديني

اثره سرابك لاح واطرده ضميان
من الضماء شخصك سراب ٍ يجيني

من كثر مااتسلا انا بكان ماكان
صرتي خيال بكل مكان ٍ يبيني

غريب جرب وش كثر حب الاوطان
عيت ضروف الوقت له لاتليني

ماهو بكيفه غاب عن داره اوطان
وانتي الوطن وإن عدت هل تقبليني ؟

من الغلاء وصلت بك حد الادمان
وانتي سبب ماصابني صدقيني

جيتك مثل مارحت وبزود ولهان
وانا بنار الشوق لا تكسفيني

نايف الشمري