من أسباب الجروح اللي بصدري مابقى بي حيل
أنا واشجابني للهم .. والتعذيب .. والحيره
تعبت من السهر .. وهموم قلبي طولت .. والليل
طويل .. ولاجنيت من الزمان الا مخاسيره
تعبت أصارع امواج الزمن .. مابين حط وشيل
وبقيت بموقفي حاير .. وأردد يالله الخيره
تأملت الزمان يجود .. لكن الزمان ابخيل
زماني وإن تعذر لاحشى مقبل معاذيره
زمن .. عالم .. تسابق كنها الامثل شرد خيل
وناس تبيع فيك وتشتري بأقل تسعيره
زمن قاسي .. عنيد .. ومنه شفت المهزله والويل
دخيل الله .. ياوقت التعاسه فضها سيره
تمر ايام .. وشهور .. وسنين .. وجيل يتبع جيل
وزماني ماتغير .. مابدت أبسط تباشيره
وأنا لاضاق صدري .. بأطلب الله وأكثر التهليل
حشى لله .. مانزل جبيني لواحدٍ غيره
|