ترمي العاشق على حوض المنيه
وفي مهرها يدفع الفارس حصانه
جادل لو كان لمحتها أجنبيه
عارف واين اصلها واعرف مكانه
أصلها من حاضرة نجد العذية
لونظام الروم معطيها حصانه
لاتمشت مثل مشي الراعبية
وإن تثنت مثل عود الخيزرانه
غصنها ريان وثماره ندية
يجذب الناظر ويغري بالليانه
والمبيسم خاتم الياقوت زية
وان تبسم كنها اللؤلوثمانه
وخدها برق المزون العقربية
وعينها عين أشقر نوعه ذنانه
ورمشها صفة جنود في سريه
حافظين العهد وشروط الأمانة
صاملين ومهتوين العسكرية
والرقيب اللي مدربهم تكانه
يوم لدت صرت للنظرة ضحية
ويوم صدت قلت من باب الميانه
رغبتي تزداد والنية نقية
ماتخالطها وساويس الخيانه
رغبة الخيال في سرج العبية
فارس ما اطلق يمينه من عنانه
والعسيف اللي بوادرها شقية
من غلاها يرهن الفارس سنانه