سق فديتك كل ما تملك من جنـــــون وغضـب
وابشر بصدرٍيضمك حيـل دام انـك هـواي


ولا رويت عتاب ناظرني وقل طاح الحطـب
واسأل شرايك وابنسج لك من الأعمـاق راي


باتناثر لك رضا واحساس صــــادق مـا كـذب
وأنت رتّبني على كيفــك وشكلنـي برضـــــــــاي


وان تلعثم حضـــــــــورك ثم نطّقنـي لـك تعـب
حاول انك تسمـــــع أشواقي وسط تنهيـد نـاي


اسمع دموعــــــــــه وقرّب لـي وقـرّب وأقتـرب
واسألأ عيوني عن طيــــوفك وقصتهـا معـاي


آآآه لا منه بزغ فجـر الحقــيـــــقــــــه وانسحـب
طيفك اللي ساكن عيـــــوني وضاقت بي سماي


وقتها ليتك تحس شعور من حظـــــــــه ضـرب
آخر آماله بعـرض الهـم والوحــــــــده مـداي


اكتشف وشلون يمــوت الصوت برماح الطرب
لحظـــةٍ جيـت أتغنـا بـك وعانــدنـي غنــــــــــاي


واكتشف كيف السهل فجأه يتحــــول لي صعب
لا نويت ابكيك ثـم أزريـت القى بـي بكــــــاي


أقسم بربي وربك فينـي احســـــاسٍ غصـب
كل كلي في غيابـك ينجـذب لـك ياهنـــــــاي


ما نسيتك لو نســـــى التاريـخ أمجـاد العـرب
وما تركتك الا بين ضلوع صدري وبحشـاي


لأنك أكبر من غلا الشاعر لآخــــر مـا كتـب
ولأنك أقرب لي من سكوتي اذا عانق شفـاي


ولأنك أول من تمكـــــن بـي وعلمنـي أحـب
ولأنك الشخص الوحيد اللي يجي في مستواي


صاحبي جمـــــــــــع كلامـك ثـم بعثرنـي عتـب
والله أن كل شي عادي لا غدى منك وجـاي